1-2. Ki ora Yehova ta aseptá nos adorashon?

 ORA bo tende e palabra “adorashon,” ki ta bini na bo mente? Bo mente lo kai riba un ruman na rudia banda di su kama ta hasi orashon? Òf lo bo pensa riba un famia ku ta disfrutá di nan Adorashon Komo Famia?

² Den tur dos situashon, loke e rumannan ei ta hasi ta forma parti di nan adorashon na Yehova. Yehova lo aseptá nan adorashon? Sí, basta e ta na armonia ku su propósito i nan ta hasié ku amor i rèspèt. Nos stima Yehova masha hopi mes, i e meresé nos adorashon. P’esei, nos ke hasi sigur ku nos adorashon ta di e mihó kalidat posibel.

3. Kiko nos ta bai analisá den e artíkulo akí?

³ Den e artíkulo akí, nos ta bai wak kon hende den antigwedat a adorá Yehova. Ademas, nos ta bai mira ocho kos ku nos ta hasi awe ku Yehova ta aseptá komo adorashon. Segun ku nos ta pasa den nan, pensa kon bo por mehorá e kalidat di bo adorashon na Yehova. Ademas, nos ta bai mira dikon adorá Yehova na e forma korekto ta hasi nos felis.

4. Promé ku Hesus a bini na tera, kon Yehova su adoradónan a demostrá ku nan tabata stima Yehova i respet’é?

⁴ Hòmbernan fiel manera Abel, Noe, Abraham i Yòb a mustra ku nan tabata respetá i stima Yehova. Kon nan a  hasi esei? Mediante nan obedensia, fe i sakrifisio. Beibel no ta bisa presis tur loke a forma parti di nan adorashon na Yehova. Pero loke sí tabata bisto tabata ku nan a hasi nan bèst pa mustra Yehova onor i Yehova a aseptá ku nan adorashon. Mas despues mediante Moises, Yehova a duna e israelitanan e Lei. Den e leinan ei, Yehova a duna nan instrukshonnan spesífiko ku tabata bisa kon e tabata ke pa nan ador’é.

5. Kon Yehova tabata ke pa e kristiannan ador’é?

⁵ Pero Yehova no a rekerí pa e kristiannan sigui e Lei ku el a duna e israelitanan. (Rom. 10:4) Kristiannan tabata bou di un lei nobo: “Lei di Kristu.” (Gal. 6:2) Pa obedesé e “lei” ei, nan no mester a memorisá un lista di kosnan ku nan por i no por a hasi. Mas bien, nan mester a imitá Hesus i sigui su siñansanan. Kristiannan awe tambe ta hasi nan esfuerso pa imitá Kristu, ya asina Yehova ta keda kontentu ku nan adorashon i nan ta ser refreská.​—Mat. 11:29.

6. Kon e artíkulo akí lo yuda nos?

⁶ Segun ku nos ta pasa den algun kos ku ta forma parti di nos adorashon na Yehova, puntra bo mes: ‘Den e kos spesífiko akí, mi a progresá? Òf, tin kaminda ku mi por mehorá e kalidat di mi adorashon?’ Aunke bo por sinti bo kontentu ku tur e progreso ku bo a hasi, lo ta bon tambe pa bo pidi Yehova yuda bo mira kaminda bo tin ku mehorá.

7. Kon Yehova ta sinti ora nos hasi orashon di kurason?

⁷ Orashon na Yehova. Beibel ta kompará nos orashonnan ku e sensia bon prepará ku tabata ofresé na e tabernakel i mas despues na e tèmpel. (Sal. 141:2) E sensia tabata plama un holó ku tabata agradabel pa Dios. Asina tambe ora nos hasi orashon di kurason, nan ta agradabel pa Yehova asta si nos usa palabranan simpel. (Pro. 15:8; Deu. 33:10) Nos tin bon motibu pa kere ku Yehova ta keda masha kontentu ora e tende nos yam’é danki i bis’é kuantu nos ta stim’é. E ke nos kont’é kiko ta preokupá nos, nos plan- i deseonan. P’esei, promé ku nos hasi orashon, ta bon pa nos sinta pensa kiko nos ta bai bisa. Si nos hasi esei, nos lo duna Yehova e mihó kalidat di “sensia” ku tin.

8. Na ki okashon nos ta alabá Yehova?

⁸ Alabá Yehova. (Sal. 34:1) Kiko esei ta? Esei ta ora nos ta papia ku otro hende tokante kuantu nos ta gusta i ta atmirá Yehova su bunita kualidat- i obranan. Alabansa ta bini di un kurason gradisidu. Si nos tuma tempu pa meditá riba tur e bon kosnan ku Yehova a hasi pa nos, semper nos lo tin yen motibu pa alab’é. Nos trabou di prediká ta duna nos un bunita oportunidat pa duna Dios “un sakrifisio di alabansa, esta, e fruta di nos lepnan.” (Heb. 13:15) Meskos ku nos tin ku tuma tempu pa pensa kiko nos ta bai bisa Yehova den orashon, asina tambe nos tin ku tuma tempu pa pensa kiko nos ta bai bisa e hendenan ku nos ta bai prediká na dje. Nos ke pa nos “sakrifisio di alabansa” ta di e mihó kalidat. P’esei nos ta prediká ku entusiasmo.

9. Ki benefisio adoradónan di Yehova ta haña ora nan reuní huntu? Konta un eksperensia personal.

⁹ Asistí na nos reunionnan. Ora e israelitanan  a haña e Lei, nan ser bisá: “Tres biaha pa aña tur bo hòmbernan mester presentá dilanti di SEÑOR bo Dios na e lugá ku e skohe.” (Deu. 16:16) Nan mester a laga nan kas i nan kunuku sin laga niun hende pa tira bista riba nan. Pero Yehova a primintí nan: “Ningun hende lo no kudishá bo tera ora bo bai tres biaha pa aña pa presentá dilanti di SEÑOR bo Dios.” (Éks. 34:24) Debí ku nan tabata konfia kompletamente den Yehova, nan tabata bai tur e fiestanan anual. I ora nan tabata bai, nan tabata haña masha hopi benefisio mes. Por ehèmpel, nan a haña un mihó komprondementu di Dios su Lei, a haña e chèns di papia tokante Dios su bondat i a pasa tempu ku otro sirbidó di Yehova. (Deu. 16:15) Anto awe nos tambe ta haña e mesun benefisionan ei ora nos hasi esfuerso pa bai nos reunionnan. I nos por tin sigur ku Yehova lo sintié kontentu ora nos prepará komentario kòrtiku i bon pensá.

10. Dikon kantamentu ta un parti importante di nos adorashon?

¹⁰ Kanta pa Yehova huntu ku nos rumannan. (Sal. 28:7) Pa e israelitanan, kantamentu tabata un parti hopi importante di nan adorashon. Rei David a skohe 288 levita pa kanta den e tèmpel. (1 Kró. 25:1, 6-8) Awe nos ta mustra kuantu nos ta stima Yehova ora nos ta kanta kantikanan di alabansa. Anto nos no mester ta bon kantante pa hasi esei. Pensa riba esaki: Ora nos papia, “nos tur ta trompeká hopi biaha.” Pero, esei no ta stroba nos di papia na Salòn òf den sirbishi. (Sant. 3:2) Di mes manera, asta si nos ta kere ku nos ta un mal kantante, nos no mester laga esei stroba nos di alabá Yehova den kantika.

11. Segun Salmo 48:13, dikon ta importante pa den nos skèdjel nos programá tempu pa studia Beibel huntu ku nos famia?

¹¹ Studia Beibel i yuda bo yunan konosé Yehova. Sabat a duna e israelitanan un chèns pa pone nan kosnan di tur dia un banda anto fortalesé nan amistat ku Yehova. (Éks. 31:16, 17) Esnan ku tabata fiel tabata siña nan yunan tokante Yehova i tur su bon kualidatnan. Lo ta bon pa nos tambe apartá tempu pa lesa i studia Beibel. Esei ta forma parti di nos adorashon na Yehova, i e ta yuda nos fortalesé nos amistat kuné. (Sal. 73:28) Anto ora bo studia huntu komo famia, bo ta yudando un generashon nobo, esta bo yunan, pa krea un amistat será ku Yehova.​—Lesa Salmo 48:13.

12. Kon Yehova a mira e trabou di esnan ku a traha e tabernakel su muebelnan i su artíkulonan di uso, i kiko nos ta siña for di esei?

¹² Partisipá den konstrukshon i mantenshon di nos lugánan di adorá. Beibel ta bisa ku trahamentu di e tabernakel, tur su muebelnan i su artíkulonan di uso tabata un trabou sagrado. (Éks. 36:1, 4) Awe tambe, Yehova ta mira konstrukshon di Salòn di Reino i otro edifisionan pa su adorashon komo trabou sagrado. Tin ruman ta dediká hopi tempu hasiendo esei. Sigur nos ta keda kontentu ku e rumannan akí ta duna di nan mes pa e trabou di e Reino. Klaru ku nan tambe ta saka tempu pa prediká, i algun di nan asta ke bira pionero. Ansianonan ta mustra ku nan ta apoyá e trabou di konstrukshon i di mantenshon ora nan no ta tarda pa nombra e rumannan akí komo pionero si nan ta kualifiká. Sea  ku nos tin un fishi den konstrukshon òf nò, nos tur por yuda mantené i tene e edifisionan limpi.

13. Kon nos tin ku mira e kontribushonnan ku nos ta duna pa e gastunan di e kongregashon i pa e obra mundial?

¹³ Duna kontribushon pa e kongregashon i e obra mundial. Durante e fiestanan anual, e israelitanan no por a presentá dilanti di Yehova man bashí. (Deu. 16:16) Nan mester a bini ku un ofrenda di akuerdo ku nan sirkunstansia. Di e manera ei, nan lo a demostrá nan apresio pa tur e provishonnan spiritual ku nan a haña. Awor, kon nos por demostrá nos amor pa Yehova i nos gratitut pa tur e provishonnan spiritual ku nos ta haña awe? Un manera ta di duna kontribushon pa e gastunan di kongregashon i pa e obra mundial segun nos sirkunstansia ta permití. Apòstel Pablo a pon’é asin’akí: “Si e disponibilidat t’ei promé, loke un hende ta duna ta spesialmente aseptabel pa Dios ora esei ta segun loke e tin, no segun loke e no tin.” (2 Kor. 8:4, 12) Yehova ta keda masha kontentu ku loke sea nos duna, asta si esei no ta hopi.​—Mar. 12:42-44; 2 Kor. 9:7.

14. Segun Proverbionan 19:17, kon Yehova ta mira e yudansa ku nos ta duna nos rumannan den nesesidat?

¹⁴ Duna yudansa na nos rumannan den nesesidat. Yehova a primintí di bendishoná e israelitanan ku a yuda nan rumannan pober. (Deu. 15:7, 10) Kada biaha ku nos yuda nos rumannan ku ta den nesesidat, Yehova ta mir’é komo un regalo na djE. (Lesa Proverbionan 19:17.) Por ehèmpel, ora e kristiannan di Filipo a manda un regalo pa Pablo tempu e tabata será, el a yama esei “un sakrifisio aseptabel, ku ta agradá Dios.” (Flp. 4:18) Pensa riba e rumannan den bo kongregashon i puntra bo mes: ‘Kua di e rumannan akí mi por yuda?’ Yehova ta keda masha kontentu ora e mira nos usa nos tempu, nos energia, nos abilidatnan i nos kosnan material pa yuda esnan den nesesidat. P’e, e kosnan ei ta parti di nos adorashon.​—Sant. 1:27.

15. Aunke adorá Yehova ta eksigí tempu i esfuerso, dikon e no ta pisá?

¹⁵ Ta bèrdat ku adorá Yehova manera e ke ta eksigí tempu i esfuerso. Pero, nos no ta sinti ku esei ta pisá. (1 Huan 5:3) Dikon nò? Pasobra nos stima Yehova i ta e amor ei ta motivá nos pa ador’é. Imaginá un mucha chikitu ku ta pasa oranan largu ta pinta algu ku e ke duna su tata komo regalo. E mucha no ta wòri kuantu tempu el a pasa ta pint’é. E ta stima su tata, i e ta asina kontentu ku e por a dun’é un regalo. Pa nos ta mesun kos. Nos ta stima Yehova, i nos ta kontentu pa usa nos tempu i forsa pa ador’é manera e ke.

16. Segun Hebreonan 6:10, kon Yehova ta sinti tokante e esfuersonan ku bo ta hasi pa ador’é?

¹⁶ Mayornan ku ta stima nan yunan no ta ferwagt ku kada un di nan ta bai duna nan e mesun regalo. Nan sa ku kada yu ta diferente i no ta tur por hasi meskos. Di mes manera, nos Tata den shelu ta komprondé loke kada un di nos por i no por hasi. Kisas bo por hasi mas ku mayoria di e rumannan. Òf, kisas bo no por hasi mesun tantu debí na bo edat, salú òf responsabilidatnan di famia. Pero, no laga esei desanimá bo. (Gal. 6:4) Yehova nunka lo lubidá loke abo ta hasi p’e. Tanten  bo ta hasi bo bèst anto bo tin e motivashon korekto, Yehova lo ta kontentu ku bo. (Lesa Hebreonan 6:10.) E solo echo ku bo tin deseo den bo kurason pa hasi algu pa Yehova ya kaba ta hasié kontentu. E ke pa bo keda kontentu ku loke bo por hasi p’e.

17. (a) Kiko nos tin ku hasi si nos ripará ku nos tin ku traha riba algun parti di nos adorashon? (b) Tin algun di e kosnan ilustrá den e kuadro “ Loke Lo Hasi Bo Mas Felis” ku a yuda bo?

¹⁷ Kiko bo tin ku hasi si bo a ripará ku por ehèmpel estudio personal òf sirbishi no ta bai asina fásil pa bo? Ora bo tuma tempu pa partisipá mas den nan, kisas lo bo ripará ku bo ta benefisiá i disfrutá mas di nan. Nos por kompará nos adorashon na Yehova ku hasi ehersisio òf toka un instrumènt. Si nos djis hinka un tiki tempu den dje, nos no ta bai wak ningun progreso. Pero kiko awor si tur dia nos apartá tempu p’e? Kisas nos ta kuminsá djis ku un par di minüt anto tiki-tiki nos ta hasié mas largu. Segun ku bo ta mira ku bo ta haña bon resultado i ku bo ta disfrutá, lo bo kuminsá bira ansioso pa e momento ku bo por hasié atrobe. E mesun kos ta konta pa nos adorashon.

18. Kiko ta e mihó manera pa hiba nos bida, i kiko lo ta e resultado si nos hasi esei?

¹⁸ E mihó manera pa hiba nos bida ta di adorá Yehova ku henter nos kurason. Ora nos hasi esei, nos lo tin un bida felis i satisfecho, i nos lo tin e speransa di por adorá Yehova pa semper. (Pro. 10:22) Ya for di awor nos ta sinti nos mes trankil pasobra nos sa ku Yehova ta yuda nos ora nos ta den problema. (Isa. 41:9, 10) Nos tin bon motibu pa ta felis ora nos ta adorá Yehova, kende ta digno di risibí gloria i onor for di tur su kreashon.—Rev. 4:11.