1-2. Itshi tuajiya gukalagala hagula Yehowa atshigine gukombelela guetu?

 GULA muthu wazuela egi “gukombelela,” itshi yana gugujila mu matangi? Yajiya gukhala egi wana mona phangi mumoshi wa gufugama, udi mutshita gisambu gudi Yehowa nu mutshima wenji wagasue gutuama egi abande. Yajiya gukhala egi wana mona fami imoshi yana suanguluga gulonguga ndaga jiatadila Yehowa mu Biblia.

² Muthu udi mutshita gisambu nu athu adi mutanga Biblia, mukut’awo agasue adi mukalagala ndaga jidi mumonesa egi adi mukombelela Yehowa. Yehowa wajiya gutshigina gukombelela guawo ba? Ayi, wajiya guatshigina gula adi mukalagala ngolo ha gumutumagela, gumuzumba nu gumunemesa. Tuana zumba Yehowa muavula. Tudi mujiya egi muene udi watagana hagula tumukombelele. Gishina giene tuana kalagala ngolo ha gumukombelela mu luholo luatagana.

3. Itshi tuza muzuelela mu longo edi?

³ Mu longo edi tuza mumona ndaga akombeledi a mu tangua dikulu akhalele mukalagala hagula egi muene atshigine gukombelela guawo. Tuza nji mumona maluholo 8 abonga a gukombelela Yehowa mangino. Hatudi mulonguga ndaga jiene, tudi naye gutangiza ndaga tuajiya gukalagala ha gulondega luholo luetu lua gukombelela Yehowa. Tuza nji mumona mukunda natshi gukombelela Yehowa mu luholo luabonga guana gutusuanguluisa.

4. Luholo lutshi akombeledi a Yehowa a mu tangua dikulu amonesele egi akhalele gumuzumba nu gumunemesa?

⁴ Mu tangua dikulu, akombeledi a Yehowa agujinginyina, gifua Abele, Nowa, Abalahama nu Yobo akhalele munemesa Yehowa nu gumuzumba. Luholo lutshi? Akhalele mutumagela Nzambi, akhalele musha gutshigina gudi muene nu akhalele muhana milambu gudi muene. Biblia yanago gutuwambela ndaga jiagasue akhalele mukalagala ha gumukombelela. Uvi Yehowa wakhalele mutshigina gukombelela guawo handaga akhalele mutshita yagasue ha gumutumbuisa. Gungima Yehowa wahanele enya Isalele mikhuala mu njila ya Moize. Mikhuala yene yakhalele guamonesa ndaga akhalele naye gukalagala hagula Yehowa atshigine gukombelela guawo.

5. Luholo lutshi Yehowa wana tshigina egi alandudi a Yesu amukombelele?

⁵ Gungima dia gufua gua Yesu nu gufuzumuga guenji, Yehowa gatogelego luko akombeledi enji ha gutumagela mikhuala yaahanele muene mu njila ya Moize. (Roma 10:4) Aklisto asendesele gutumagela mukhuala uhe-uhe, “mukhuala wa Klisto.” (Gal. 6:2) Ha gutumagela “mukhuala” wene, akhalelego guwukuata mu muto nga gukhala nu liste imoshi ya ndaga adi naye gukalagala nu jinyi ashigo naye gukalagala, uvi akhalele naye gulandula gifezegeselo gia Yesu nu gutumagela malongo enji. Mangino nji, Aklisto ana kalagala yagasue ha gulandula gifezegselo gia Klisto ha gusuanguluisa Yehowa nu ha ‘guheta ngolo.’—Mat. 11:29.

6. Luholo lutshi longo edi diza gutukuatesa?

⁶ Tangua tuza mutadila ndaga imoshi-imoshi tuana kalagala ha gukombelela Yehowa, dihule egi: ‘Usombegeshi utshi ngakalegele gale mu ndaga yene?’ Wajiya nji gudihula egi: ‘Luholo lutshi ngajiya gukudisa luholo luami lua gukombelela Yehowa?’ Wajiya gukhala nu gusuanguluga mu ndaga udi mutshita mangino, uvi udi naye nji gutoga ukuateshi gudi Yehowa ha gujiya ndaga jiko wajiya gukalagala kiawaha.

7. Luholo lutshi Yehowa wana tadila isambu yana katuga mu mitshima?

⁷ Tuana kombelela Yehowa tangua tuana tshita isambu. Biblia yana fuanesa isambu yetu nu uhafu wakhalele muhanewa thomo gu inzo ya tenta, gungima gu tempelo. (Ngi. 141:2) Uhafu wene wakhalele nu vumba diakhalele musuanguluisa Nzambi. Luholo lumoshi nji, isambu yetu yana katuga mu mutshima yana “gumusuanguluisa” ikhale tuazuedi mbimbi jiazonda. (Ish. 15:8; Mikh. 33:10) Tudi naye gusha mutshima egi Yehowa wana suanguluga gututegelela tangua tuana gumuwambela egi tuana gumuzumba nu tangua tuana gumuhana mersi. Wana tshigina egi tumuwambele ndaga jidi gutusagesa, mafelela etu nu ndaga tudi najio funu. Hene, gutuama dia gutshita gisambu gudi Yehowa, udi naye gutangiza muabonga ndaga udi mutshigina gumuwambela. Gula wakalagala ngenyi, mbawuhana Sh’aye wa mu dilu “uhafu” wabonga diago.

8. Mu ba okazio atshi tuana gutumbuisa Yehowa?

⁸ Tuana kombelela Yehowa tangua tuana gumutumbuisa. (Ngi. 34:1) Tuana tumbuisa Yehowa tangua tuana wambela athu ako makalegelo enji nu midimo yenji. Gula tudi muhana Yehowa mersi, tuajiya gukhala nu ndaga jiavula jia guwambela athu mukunda nu muene. Gula tudi muzula tangua dia gutangiza ima yagasue yabonga Yehowa wana gutukalegela, mbayitutuma ha gumutumbuisa. Mudimo wa gulongesa wana gutuhana luendu lua guhana Nzambi mulambu, “yakotelesa egi mbimbi jia mu kano dietu.” (Heb. 13:15) Gutuama dia gusamba Yehowa  tudi naye gujiya ndaga tudi naye gumuwambela. Luholo lumoshi nji, tudi naye gujiya muabonga ndaga tudi mutshigina guwambela athu mu mudimo wa gulongesa. Tuana tshigina egi “mulambu” tudi muhana gudi Yehowa ukhale wabonga diago. Gishina giene tudi naye gukhala nu gusuanguluga tangua tudi mu mudimo wa gulongesa.

9. Gifua enya Isalele a mu tangua dikulu, gubonga gutshi tuana heta tangua tuana guya mu gudibungisa? Hana gifezegeselo gidi mumonesa luholo guya mu gudibungisa guagukuatesele gale.

⁹ Tuana kombelela Yehowa tangua tuana guya mu gudibungisa. Yehowa wawambelele enya Isalele egi: ‘Mala agasue a mu gifutshi gienu adi naye guza mahugo thathu mu givo gimoshi mukunda nu gukombelela Yehowa Nzambi wenu ha fundo mbaditomba muene.’ (Mikh. 16:16) Akhadile naye gubemba jinzo jiawo nu mahia awo nu ima yawo iko, uvi guakhadilego nu muthu wa guyibamba. Uvi Yehowa waalayele egi: ‘Gushigo nga nu muthu mbawuvua nzala ya gifutshi giaye tangua mbawukanduga ha gudimonesa gu phala ya Yehowa Nzambi waye.’ (Guz. 34:24) Luholo enya Isalele akhalele mushila Yehowa mutshima, akhalele muya gu mawano ene givo nu givo. Akhalele nji muheta gubonga guavula. Ha gufezegesa, akhalele mukotelesa muabonga Mukhuala wa Nzambi, akhalele mutangigiza ndaga jiabonga jiaakalegele gale Yehowa, akhalele nji musuanguluga ha gudibungisa hamoshi nu athu ako ana zumba Yehowa. (Mikh. 16:15) Esue nji tuana heta gubonga gua luholo lumoshi tangua tuana kalagala yagasue ha guya mu gudibungisa. Yehowa wana suanguluga muavula tangua tuana hana komantere jia hihia nu jia gulondega kiawaha.

10. Mukunda natshi guyimbila Yehowa guana khala nu ndando tangua tuana gumukombelela?

¹⁰ Tuana kombelela Yehowa tangua tuana gumuyimbila ngimbo. (Ngi. 28:7) Guyimbila Yehowa ngimbo guakhalele mukatshi dia ndaga jia ndando enya Isalele akhalele mukalagala ha gumukombelela. Fumu Davidi watombele enya Levi 288 ha gukhala ayimbi a ngimbo gu tempelo. (1 Gudi. 25:1, 6-8) Mangino nji, tangua tuana yimbila Nzambi ngimbo ha gumutumbuisa, tuana monesa egi tuana gumuzumba. Yanago gutoga egi tudi naye gukhala nu dijui diawaha ha guyimbila Yehowa ngimbo. “Matangua avula mukut’etu agasue tuana jimbila” tangua tuana zuela. Uvi yanago gutukanga njila ha guzuela mu gudibungisa gua mu hungu nga mu mudimo wa gulongesa. (Yak. 3:2) Luholo lumoshi nji, tuajiya guyimbila Yehowa ngimbo ha gumutumbuisa, ikhale tudi mutangiza egi tushigo muyimba kiawaha.

11. Ha gutadila Ngimbo 48:13, mukunda natshi tudi naye guzula tangua dia gulonguga Biblia mu fami?

¹¹ Tuana kombelela Yehowa tangua tuana longuga mbimbi yenji nu tangua tuana kuatesa an’etu ha gumujiya. Lusugu lua Guhuluguga luakhalele muhana enya Isalele luendu lua gubemba midimo yawo ya lusugu nu lusugu ha gukolesa ufuta wawo nu Yehowa. (Guz. 31:16, 17) Enya Isalele a gujinginyina akhalele mukuatesa an’awo ha gujiya Yehowa nu ha gujiya gubonga guaakalegele muene. Mangino nji, tudi naye guzula tangua dia gutanga nu dia gulonguga Mbimbi ya Nzambi, handaga idi mukatshi dia ndaga tuana tshita ha gukombelela Yehowa, yana gutukuatesa nji ha gukolesa ufuta wetu n’enji. (Ngi. 73:28) Gula tudi mulonguga Biblia mu fami, tuajiya gukuatesa an’etu ha gukudisa ufuta wawo nu Sh’etu wa guzumba udi mu dilu.—Tanga Ngimbo 48:13.

12. Longo ditshi tuazula mu luholo Yehowa wakhalele mutadila mudimo wa athu alondele ikadigilo ya inzo ya tenta?

¹² Tuana kombelela Yehowa tangua tuana tunga nu tuana londega mafundo a gumukombelela. Biblia yana zuela egi mudimo wa gulonda inzo ya tenta nu ikadigilo yenji wakhalele ‘mudimo wa gijila.’ (Guz. 36:1, 4) Mangino nji,  mudimo wa gutunga Jinzo jia Ufumu, ba betele, ba salles d’assemblées nu jinzo jiko wana khala nji mudimo wa gijila gu meso a Yehowa. Aphangi ako ana balegesa tangua diavula mu mudimo wa gutunga. Tuana suanguluga diago muavula luholo aphangi ana gudihana mu mudimo wa Ufumu. Aphangi ene ana gudihana nji muavula mu mudimo wa gulongesa lukuma luabonga, ako ana tshigina nji gubua avundji a njila. Akulu ajiya gumonesa egi ana kuatesa mudimo wa gutunga gula adi mukuatesa aphangi ana tagenesa ndaga jiana togewa ha gubua avundji a njila. Ikhale tuana jiya mudimo wa gutunga nga ndo, mukut’etu agasue tuajiya gudihana ha gulondega Jinzo jia Ufumu hagula jikhale jiaphelegeta nu jiabonga.

13. Luholo lutshi tudi naye gutadila misomonyi tuana hana ha gukuatesa mudimo wa Ufumu?

¹³ Tuana kombelela Yehowa tangua tuana hana misomonyi yetu ha gukuatesa mudimo wa Ufumu. Enya Isalele akhalele mubatela Yehowa milambu tangua akhalele muya gu mawano. (Mikh. 16:16) Akhalele mubata milambu yene mu gudivua nu uhetelo wawo. Ngenyi, akhalele mumonesa egi adi muhana Yehowa mersi mukunda nu ndaga jiagasue jiaakalegele muene. Luholo lutshi tuajiya gumonesa egi tuana zumba Yehowa nu tuana gumuhana mersi mukunda nu ima yana gutukalegela muene? Tuajiya guyikalagala gula tudi muhana misomonyi ha gukuatesa hungu dietu nu ha gukuatesa mudimo wa gulongesa wa ha mavu agasue, mu gudivua nu uhetelo wetu. Mupostolo Phaula wamonesele ndaga yene, hazuelele muene egi: “Gula muthu wahana gima nu mutshima umoshi, Nzambi wana gugitshigina, handaga Nzambi wana tshigina egi muthu ahane ima yinyi idi nayo muene, uvi yinyi gashigo nayo ndo.” (2 Kol. 8:4, 12) Yehowa wana suanguluga nu misomonyi yetu tuana gumuhana nu mutshima umoshi ikhale idi yazonda.—Mako 12:42-44; 2 Kol. 9:7.

14. Ha gutadila Ishima 19:17, tangua tuana kuatesa aphangi’etu adi nu funu ya ukuateshi, luholo lutshi Yehowa wana guyitadila?

¹⁴ Tuana kombelela Yehowa tangua tuana kuatesa aphangi’etu Aklisto adi nu funu ya ukuateshi. Yehowa walayele enya Isalele egi mbawashimbiga gula akuatesa phutu. (Mikh. 15:7, 10) Tangua diagasue tuana kuatesa aphangi’etu adi nu funu ya ukuateshi, gudi Yehowa yana khala gifua tudi gumuhana mulambu. (Tanga Ishima 19:17.) Ha gufezegesa, tangua Aklisto a gu Filiphi atumidile Phaula ima hakhalele muene mu bologo, wazuelele egi: “Ima yene idi gifua mananashi a vumba diabonga, mulambu wana suanguluisa Nzambi.” (Fili. 4:18) Tangiza aphangi a mu hungu dienu, gungima dihule egi: ‘Gudi nu muthu ngajiya gukuatesa ba?’ Yehowa wana suanguluga ha tuana kalegela tangua dietu, ngolo jietu nu ima yetu ha gukuatesa athu adi nu funu ya ukuateshi. Mukunda nu muene, yana khala luholo lua gumukombelela.—Yak. 1:27.

15. Gukombelela Yehowa guana gututoga tangua nu ngolo, uvi mukunda natshi yanago gukhala ndaga yanema?

¹⁵ Ha gukombelela Yehowa, yana toga tangua nu ngolo. Uvi yana khalago ginemo gianema. (1 Yone 5:3) Mukunda natshi tuazuela ngenyi? Handaga guzumba guetu gudi muene guana gututuma ha gumukombelela. Ha gufezegesa, tangiza egi mona mumoshi udi mutshigina guhana sh’enji kado. Wajiya gubalegesa matangua avula ha gumulondela gifuanesa. Mona muene gajiyilego gutangiza egi tangua diabalegesa muene didi dia githuhu, handaga wana guzumba sh’enji nu udi nu gusuanguluga ha gumuhana kado gene. Luholo lumoshi nji, tuana khala nu gusuanguluga ha gukalegela tangua nu ngolo jietu ha gukombelela Yehowa handaga tuana gumuzumba.

16. Ha gutadila Hebelu 6:10, luholo lutshi Yehowa wana tadila ngolo tuana kalagala ha gumusuanguluisa?

 ¹⁶ Mvuaji jinyi jiana zumba an’awo jiana gudifelela ndo egi mona wagasue udi naye guahana kado ga luholo lumoshi. Ana jiya egi an’awo akhala agudisha nu ajiyilego gutshita ndaga jia luholo lumoshi. Luholo lumoshi nji, Sh’etu wa mu dilu wana jiya egi tuajiyilego gutshita ndaga jia luholo lumoshi. Yajiya gukhala egi wana tshita ndaga muabonga gubalega athu avula wana jiya nu wana zumba. Nga ndo, yajiya gukhala egi wajiyilego gutshita ndaga gifua athu ako mukunda udi muthu wa gukola, ushigo nu sante yabonga nga ndo udi nu inemo yavula mu fami. Uvi ulebigo muila. (Gal. 6:4) Yehowa mbagashigo mujimbila mudimo waye. Gula udi mutshita yagasue mu gudivua nu ngolo jiaye ha gukuatesa mudimo wa Ufumu, Yehowa mbawusuanguluga. (Tanga Hebelu 6:10.) Yehowa wana jiya ndaga jiana khala mu mutshima waye. Wana tshigina egi ukhale nu gusuanguluga tangua udi mukalagala ndaga mu gudivua nu ngolo jiaye ha gumukombelela.

17. (a) Itshi tuajiya gutshita gula idi lamba gudi esue ha gukalagala ndaga jiko tuazuelela mu longo edi? (b) Ndaga itshi yagukuatesa mu galuanda gadi muzuela egi: “ Ndaga Jiajiya Gugukuatesa ha Gukhala nu Gusuanguluga”?

¹⁷ Itshi tuajiya gutshita gula idi lamba gudi esue ha gukalagala ndaga jiko tuazuelela mu longo edi, gifua gulonguga Biblia hakhetu nga guya mu mudimo wa gulongesa? Gula tudi gudihana muavula ha gutshita ndaga jiene, mbatusuanguluga nji ha gujitshita nu mbatuheta gubonga guavula. Tuajiya gufuanesa ndaga tuana kalagala ha gukombelela Yehowa nu muthu udi mulonguga gushiga gitare. Gula muthu muene gashigo mushiga gitare muavula, gajiyilego gukudisa luholo luenji lua gushiga gitare giene. Uvi itshi yajiya gukalegewa gula muthu muene wazula desizio dia gushiga gitare lusugu nu lusugu? Thomo, wajiya guzula phamba minuta yazonda, uvi gungima wajiya gubalegesa matangua avula ha gugishiga. Gula wasendesa gushiga gitare giene muabonga, mbawulandula gugishiga nu gusuanguluga guagasue. Gifezegeselo egi gidi luholo lumoshi nu ndaga tuana kalagala ha gukombelela Yehowa.

18. Ndaga yabalega ndando tuajiya gutshita mu monyo wetu idi itshi? Gubonga gutshi tuajiya guheta gula tuatshita ngenyi?

¹⁸ Gukombelela Yehowa gudi ndaga yabalega ndando tuajiya gutshita mu monyo wetu. Gutshita ngenyi mbagutukuatesa ha gukhala nu gusuanguluga nu mbatukhala nji nu felela dia gumukombelela mayilago. (Ish. 10:22) Tuana khala nu guhuima handaga tuana jiya egi Yehowa wana kuatesa akombeledi enji tangua ana tagana nu malamba. (Yesh. 41:9, 10) Tuana khala diago nu ndaga jiana gututuma ha gukhala nu gusuanguluga tangua tuana kombelela Yehowa Sh’etu wa guzumba, handaga udi watagana “ha guheta lutumbu nu ginemua nu ngolo.” Muene wafugile ima yagasue.—Gum 4:11.