1-2. Ko nchani chingachitise kuti Mulungu abvume kupemphera kwathu?

 KO NCHANI chichabwera m’maganizo mwanu mukabva mawu yakuti ‘kupemphera’? Panango imwepo mungaganizire m’bale yemwe ankugwada nkumbapemphera kwa Yahova akanati kuyenda kagona. Apo neye mungaganizire banja yomwe inkukondwa kupfunzirira pabodzi Baibolo.

² Vinthu viwiri vimwevi vinkuwonesa kuti wanthu mwawa ankutumikira Mulungu. Koma ko Yahova ankukondwadi na vomwe iwo ankuchita? Iye angakondwe pokhapokha peno iwo ankuchita vimwevi ndawa ya kumukonda na kumulemekeza. Tichakonda maninge Yahova, ndipomwapa tikambamutumikira tiyesesa kuchita vose vatingakwanise kuti iye abvume kupemphera kwathu.

3. Ko tikambirane chani munkhani ino?

³ Munkhani ino tikambirane vomwe vingachitisa kuti Yahova akondwe na kupemphera kwa Aizirayeli ndipo tiwone pomwe vinthu 8 vomwe tichadekana kuchita kuti Yahova abvume kupemphera kwathu ntsiku zino. Pomwe tinkukambirana, aliyese payekha angachite bwino kuwona vomwe angachite kuti Yahova ambabvume kupemphera kwathu. Tiwone soti vifukwa vomwe vitichitisa kukhala wokondwa tikambatumikira Yahova munjira yobvumizika kwa iye.

4. Ko wanthu omwe angatumikira Yahova Yesu akanati kubwera, adawonesa tani kuti angalemekeza Yahova ndipo angamukonda?

⁴ Wanthu wachikhulupiriro ninge Abele, Nowa, Abulahamu na Yobu angakonda maninge Yahova ndipo angamulemekeza.  Ko iwo adachita tani vimwevi? Iwo adachita vimwevi pakukhala obvera, okhulupirika na kupereka ntsembe. Baibolo ifotokozeratulini vose vomwe iwo angadekana kuchita pakumutumikira. Koma vinkuwonekeratu kuti iwo angayesesa kumulemekeza Yahova ndipo kupemphera kwawo kwenze kobvumizika kwa iye. Patsogolo pake Yahova adapereka Chilamulo cha Mose kwa wana wa Abulahamu. Mu chilamulo chimwechi mweze malamulo yofotokozeratu sitiriti vomwe iwo angadekana kuchita kuti Yahova abvume kupemphera kwawo.

5. Padandoti Yesu waphewa nkumukisiwa, ko Yahova angafuna kuti wanthu ambamutumikire tani?

⁵ Padandoti Yesu waphewa nkumukisiwa, Yahova angadikhiralini kuti wanthu ambaphatise basa Chilamulo cha Mose pakumutumikira. (Aro. 10:4) Viri teno ndawa yakuti Akhrisitu angadekana kutewedza ‘Chilamulo cha Khrisitu’ chomwe ni chinyowani. (Agal. 6:2) Kuti akwanise kubvera ‘chilamulo’ chimwechi, angadekana kutewedza vomwe Yesu angapfunzisa na kutengera chitsanzo chake, osati kushupana na malamulo yazinji pa nkhani ya chabwino na choipa. Ntsiku zino, Akhrisitu chaiwo ankuchita vose vangakwanise kuti akondwerese Yahova nakuti ‘atsitsimusiwe.’—Mat. 11:29.

6. Ko tingachite tani kuti tiphindule mwakukwana na nkhani ino?

⁶ Tikambakambirana chilichose chomwe tichachita pakutumikira Yahova, mumbadzibvunze kuti: ‘Ko inepano ninkuchita bwino pambali mweyi?’ Tingachite pomwe bwino kudzibvunza kuti: ‘Ko pali vaningachite kuti Yahova ambakondwe maninge na kupemphera kwangu?’ Ni shuwadi kuti mungabve bwino mukaganizira momwe munkupitira patsogolo, koma mungachite bwino kudziunguza mosamala na kupemphera kwa Yahova kuti muwone vamungachinje.

7. Ko mapemphero yathu yochokera pasi pa moyo, Yahova ankuyalinganiza na chani?

⁷ Tipemphera kwa Yahova. Malemba yankulinganiza mapemphero yathu na vofukiza vokonzewa bwino vomwe vinkuyenda kukaperekewa muchihema na mu kachisi. (Sal. 141:2) Vofukiza vingachosa kapfungo konunkhira komwe kangakondweresa Mulungu. Mapemphero yathumbo ‘yachamukondweresa’ podiya tiyankhule mawu yang’onong’ono. (Miy. 15:8; Deut. 33:10) Tinavifukwa vobveka votichitisa kutsimikiza kuti Yahova vimukomedza akambatibva tikuyankhula mawu yomutembeja na yowonesa kuti timukonda. Iye achada kuti timbamuuze vomwe vinkutishupa, vomwe tinkufuna kuchita na vinthu vomwe tinavo shungu. Tikanati kupemphera kwa Yahova, tingachite bwino kuganizira vinthu vati timuuze. Tikachita teno, tidzapereke ‘vofukiza’ vabwino kwa Ababa wathu wakudzulu.

8. Ko tingatamande Mulungu pa vochitika viponi?

⁸ Titamanda Yahova. (Sal. 34:1) Titamanda Yahova tikambafotokoza va basa zake zodabwisa na makhalidwe yake yabwino. Tingakwanise kusimba vinthu vomwe watichitira peno ndise wotembeja. Tikambapatula nthawe yoganizira vabwino vomwe Yahova watichitira, tidzasowelini chinthu chomutembeja mpemphero. Basa yolalikira itipasa pomwe mwayi ‘wopereka ntsembe zotamanda Mulungu, zomwe ni vipaso va milomo yathu.’ (Aheb. 13:15) Ninge mwaviriri kuti tichadekana kuganizira bwino mawu yati timuuze Yahova mpemphero, tingachitembo bwino kumbaganizira mawu yati tikauze  wanthu mu utumiki. Tifuna kuti ‘ntsembe zathu zotamanda’ zimbakhale zabwino maninge. Ndipomwapa tiyesesa kumbalalikira wanthu mokondwa.

9. Ninge mwevenzere na Aizirayeli, ko isembo tiphindula tani tikambagumanika pamisonkhano? Fotokozankoni momwe misonkhano yakuthandizirani.

⁹ Tigumanika pamisonkhano. Aizirayeli wa kalekale adauziwa kuti: ‘Gole iliyose, mwamuna aliyese pakati panu ambakawonekere katatu pamaso pa Yahova Mulungu wanu pamalo yomwe Mulungu adzasalule.’ (Deut. 16:16) Iwo angadekana kusiya manyumba na maminda yawo palibe munthu woviteteza. Koma Yahova wenze adawapolomisa kuti: ‘Palibe wati adzakhumbire dziko yanu imwepo mukachoka nkuyenda kukawona nkhope ya Yahova Mulungu wanu.’ (Eks. 34:24) Pakuti Aizirayeli angathemba maninge Yahova, angayenda kuvikondwerero va pagole vimwevi. Phindu yake yenze yakuti ambachidziwa bwino Chilamulo, angawona umboni wakuti Yahova ali nawo ndipo angakondwa kucheza na anzawo omwe angakondambo Yahova. (Deut. 16:15) Isepano tiphindulambo teneretu tikambayesesa kugumanika pamisonkhano. Ndipo ndoganizani momwe Yahova achakondwera tikambapereka ndemanga zathu zachigwato koma zophindulisa.

10. Ndawa chani munkuwona kuti kuimba ni kodikana maninge pa kupemphera kwathu?

¹⁰ Tiyimba pabodzi na abale na alongo wathu. (Sal. 28:7) Aizirayeli angawona kuti kuimba ni kofunika maninge pakutumikira Yahova. Mpfumu Davide adasalula Alevi okwana 288 kuti ambaimbe pakachisi. (1 Mbiri 25:1, 6-8) Isembo ntsiku zino tingawonese kuti tikonda Yahova tikambaimba nyimbo zomutamanda. Sikuti vifuna kuti tikhale na mawu yabwino kuti tikwanise kuimba. Mwakulinganiza, munkudziwa bwino kuti ‘tose nthawe zizinji tiphonyesa’ poyankhula, koma sikuti tilekeratu kuyankhula mu Nyumba ya Ufumu na mu utumiki. (Yak. 3:2) Nchibodzibodzimbo na kuimba, osati timbazeze kuimbira Yahova poganiza kuti mawu yathu yabvekalini bwino.

11. Ninge mwainkufotokozera Salimo 48:13, ndawa chani tichadekana kuikhiratu ndandanda yopfunzira Baibolo na banja yathu?

¹¹ Tipfunzira Mawu ya Mulungu na kupfunzisambo wana wathu kuti amudziwe. Ntsiku ya Satade ingapasa mwayi Aizirayeli kuti aimeko basa zawo za ntsiku na ntsiku nkuikhira nzeru pa ushamwali wawo na Yahova. (Eks. 31:16, 17) Azibereki wokhulupirika angapfunzisa wana wawo kuti adziwembo kuti Yahova ni wabwino. Isembo timbaikhiretu ndandanda yopfunzisira mwana wathu Mawu ya Mulungu. Peno tinkufuna kuti Yahova ambabvume kupemphera kwathu, osati timbanyalanyaze nkhani mweyi. (Sal. 73:28) Ndipo tikambapfunzira pabodzi ninge banja, tingathandize wana wathu kuti akhale pa ushamwali na Ababa wathu wachikondi.—Lewengani Salimo 48:13.

12. Ko Yahova angaiwona tani basa yomanga chihema na vombo vake, ndipo tinkupfunzirapo chani?

¹² Timanga nyumba zotumikiriramo Yahova. Baibolo ifotokoza kuti kumanga chihema na kukonza vombo va nkati yenze ‘basa yopatulika.’ (Eks. 36:1, 4) Ndipo olo ntsiku zino Yahova achawona kuti kumanga Nyumba za Ufumu na nyumba zinango za gulu ni basa yopatulika. Tinkutembeja maninge abale na alongo wa muchimango ndawa ankupitisa patsogolo basa ya Ufumu. Olo viri teno, iwo apatulambo nthawe kuti alalikire, ndipo mpakana anango ankuchita upainiya. Akulu angawonese kuti ankuwaganizira abale  na alongo mwawa mwa kuwabvumiza kuti akhale apainiya peno ankuyenerera. Peno tinabuya yomanga panango neye, tose tingathandizire kuti nyumba za gulu zimbawoneke zokhuza.

13. Ko timbaviwone tani vinthu vomwe tichapereka kuti vithandizire pa basa ya Ufumu?

¹³ Tipereka kobiri zothandizira basa ya Ufumu. Aizirayeli angadekanalini kubwera pamaso pa Yahova khwasukhwasu. (Deut. 16:16) Iwo angadekana kubweresa chopereka chilichose chomwe angakwanise. Akachita tene ambawonesa kuti ankutembeja vose vomwe Yahova ankuwachitira. Ko tingawonese tani kuti timukonda Yahova ndipo tinkutembeja vose vomwe ankutichitira? Njira ibodzi ni kupereka kobiri yomwe tingakwanise kuti ithandizire pokonzakonza Nyumba ya Ufumu yathu panango basa yomanga padziko yose. Paulo adabvekesa mpfundo mweyi polewa kuti: ‘Mphaso yochokera pasi pa moyo ni yomwe Mulungu achakondwera nayo, ndawa Mulungu achada kuti munthu ambapereke vomwe angakwanise, osati vomwe angakwaniselini.’ (2 Akor. 8:4, 12) Yahova achatembeja chopereka chomwe takwanisa podiya chikhale chochepa.—Maliko 12:42-44; 2 Akor. 9:7.

14. Mobverana na Miyambo 19:17, ko Yahova achabva tani tikambathandiza abale wathu omwe ankusowa?

¹⁴ Tithandiza anzathu omwe ankusowa. Yahova ankupolomisa kuti adzabwezere munthu yemwe ankuthandiza osauka. (Deut. 15:7, 10) Pamwapa mpfundo ni yakuti, nthawe iliyose yomwe tinkuthandiza munthu, Yahova achawona kuti tinkuchita chopereka kwa iye. (Lewengani Miyambo 19:17.) Mwakulinganiza, Akhirisitu wa ku Filipi padatumiza mphaso kuti zikathandize Paulo kudjeri, Paulo adati ‘mphaso zimwezi ni ntsembe yobvumizika yomwe inkukondweresa Mulungu.’ (Afil. 4:18) Yesani kuganizira wanthu wa mumpingu mwanu ndipo patsogolo pake dzibvunzeni kuti: ‘Ko alipo yemwe ningamuthandize?’ Dziwani kuti Yahova akondwa maninge mukambaphatisa basa nthawe yanu, maluso yanu na vinthu vanu kuti muthandize osowa. Iye achawona kuti imweyi ni mbali ya kupemphera kwathu.—Yak. 1:27.

15. Kupemphera chaiko kufuna khama na kuphatisa basa nthawe yathu, koma ko ndawa chani ni ntololini?

¹⁵ Kupemphera chaiko kufuna khama na kuphatisa basa nthawe yathu mokwana. Koma sikuti kwa ise ni ntolo. (1 Yoh. 5:3) Ndawa chani ni ntololini? Ndawa yakuti tichatumikira Yahova ndawa ya kumukonda. Ganizirani va mwana yemwe ankufuna kupasa chinthu ababa wake. Panango iye angamale nthawe itali ankuchikonzekera kuti awapase. Mwana moyu angakwaniselini kuibweza nthawe yomwe wamala. Nchibodzibodzimbo, isepano ndawa yokonda Yahova tiphatisa basa nthawe na mphanvu zathu kuti timutumikire.

16. Mobverana na Aheberi 6:10, ko Yahova achabva tani aliyese akambamuchitira vomwe angakwanise?

¹⁶ Azibereki wachikondi angadikhirelini kuti wana wawo ambawapase mphaso zolingana. Iwo achadziwa kuti mwana aliyese ni wosiyana na mwanzake ndipo panavinango vomwe angakwaniselini. Nchibodzibodzimbo, Ababa wathu wakudzulu achadziwa bwino vomwe aliyese angakwanise. Panango imwepo mungachite vizinji kuposha anzanu. Apo neye, panango iwo ndiwo angachite vizinji kuposha imwepo. Peno mungakwaniselini ndawa ya udindo wanu m’banja, matenda panango uchikulire ayi kukwinyirira. (Agal.  6:4) Dziwani kuti Yahova adzayebwelini basa yanu. Mukambayesesa kuchita vamungakwanise koma na volinga vabwino, iye adzakondwe. (Lewengani Aheberi 6:10.) Yahova mpakana achadziwa bwinobwino shungu ya kumoyo kwanu. Yahova achada kuti mumbakondwe ndawa ya vomwe munkukwanisa kuchita pakumutumikira.

17. (a) Ko tingachite tani peno mbali zinango za kupemphera kwathu zinkutishupa? (b) Ko mu bokosi yakuti “ Thimizirani chimwemwe chanu,” muli chinthu chomwe chakuthandizankoni?

¹⁷ Manje tingachite tani peno vinkutishupa kupatula nthawe yopfunzira Baibolo panango kulalikira? Tingachite bwino kumbapfunzira na kulalikira kawirikawiri, ndipo tikateno tidzakomedzewe na kuphindula mokwana. Kutumikira Yahova tingakulinganize na kuyesesa kuti tizolowere kuchita masenzeka yolimbisa thupi panango kuimba banjo. Peno tingambachite mwa apo na apo, tingapitelini patsogolo. Koma tani peno tiyesesa kuchita ntsiku iliyose? Panango nthawe yoyamba tingambamale maminutu yang’onong’ono, koma tikazolowera tingambamale nthawe itali. Tikawona kuti khama yathu inkuphindula, tingambawone kuti nthawe ikuchebwa kuti tikachite pomwe. Ko mwawona momwe mungaphatisire basa chitsanzo chimwechi pankhani yopfunzira Baibolo na kulalikira?

18. Ko nchani chodikana maninge kuchita pamoyo wathu, ndipo tingaphindule tani?

¹⁸ Kuyesesa kutumikira Yahova ndicho chinthu chodikana maninge pamoyo wathu. Vimwevi vingatithandize kuti tikhale na moyo waphindu na wokondwadi chaivo ndipo tinkudikhira kudzamutumikira mpakana kalekale. (Miy. 10:22) Tinantendere wamuntima pakudziwa kuti Yahova ankutithandiza tikambagumana na mabvuto. (Yes. 41:9, 10) Tinavifukwa vobveka vokhalira wokondwa pakutumikira Ababa wathu wakudzulu omwe ni ‘wodikana kutambira ulemerero na ulemu’ ndawa yakuti adasika vinthu vose!—Chiv. 4:11.