مطالعے دا مضمون نمبر 13
یہوواہ دی عبادت کرن نال تواڈی خوشی ودھے گی
اَے یہوواہ، ساڈے خدا، تُوں عظمت تے عزت تے طاقت دے لائق ایں۔—مکاشفہ 4:11۔
گیت نمبر 31: خدا دے نال نال چلو
مضمون تے اِک نظر *
1، 2. یہوواہ ساڈی عبادت توں کدوں خوش ہوندا اے؟
جدوں تُسی لفظ عبادت سُن دے او تے تواڈے ذہن چ کیہہ آندا اے؟ شاید تواڈے ذہن چ کوئی ایہو جیہا بھرا آئے جیہڑا اپنے بسترے کول گوڈیاں بھار بیٹھ کے یہوواہ کولوں پورے دل نال دُعا کر رہیا اے۔ یاں شاید تواڈے ذہن چ کوئی ایہو جیہا خاندان آئے جیہڑا مِل کے بائبل چ لکھیاں گلاں تے گہرائی نال سوچوچار کر رہیا اے۔
2 ایہہ دونویں ای یہوواہ دی عبادت دے طریقے نیں۔ کیہہ یہوواہ ایہناں لوکاں دی عبادت نُوں قبول کرے گا؟ جی بالکل۔ پر صرف اوہدوں ای جدوں ایہہ یہوواہ دی مرضی دے مطابق زندگی گزارن گے، اوہدے نال پیار کرن گے تے اوہدی عزت کرن گے۔ اَسی ایہہ جاننے آں کہ سانوں صرف یہوواہ دی عبادت کرنی چاہی دی اے تے اَسی ایہہ بڑے ودھیا طریقے نال کرنا چاہنے آں۔
3. ایس مضمون چ اَسی کیہڑیاں گلاں تے غور کراں گے؟
3 ایس مضمون چ اَسی ویکھاں گے کہ پرانے زمانے چ یہوواہ کیہو جہی عبادت نُوں قبول کردا سی۔ ایہدے علاوہ اَسی اَٹھ ایہو جہے طریقیاں تے وی غور کراں گے جنہاں دے ذریعے یہوواہ چاہندا اے کہ اَج اَسی اوہدی عبادت کرئیے۔اِنج کردے ویلے ایس گل تے وی غور کرو کہ تُسی ہور چنگی طرحاں یہوواہ دی عبادت کیویں کر سکدے او۔ ایہدے علاوہ اَسی ایہہ وی ویکھاں گے کہ صحی طریقے نال یہوواہ دی عبادت کرن نال سانوں خوشی کیوں مِلدی اے۔
پرانے زمانے چ یہوواہ نے کیہو جہی عبادت نُوں قبول کیتا؟
4. یسوع مسیح دے زمانے توں پہلاں یہوواہ دے بندیاں نے ایہہ کیویں ثابت کیتا کہ اوہ یہوواہ دی عزت کردے نیں تے اوہنوں پیار کردے نیں؟
4 یسوع دے زمانے توں پہلاں یہوواہ دے وفادار بندیاں جیویں کہ ہابل،نوح،ابراہام تے ایوب نے ایہہ ثابت کیتا کہ اوہ یہوواہ دی عزت کردے نیں تے اوہنوں بوہت پیار کردے نیں۔ اوہناں نے اِنج کیویں کیتا؟ اوہناں نے یہوواہ دی گل منی، اوہدے تے مضبوط ایمان رکھیا تے اوہدے لئی قربانیاں دِتیاں۔ بائبل چ اوہ سارے کم نئیں دَسے گئے جیہڑے یہوواہ دے ایہناں بندیاں نُوں اوہدی عبادت لئی کرنے چاہی دے سن۔ پر اپنے وَلّوں اوہناں نے بڑے بہترین طریقے نال یہوواہ دی عبادت کرن دی کوشش کیتی تے یہوواہ نے اوہناں دی عبادت نُوں قبول وی کیتا۔ بعد چ یہوواہ نے موسیٰ دے ذریعے بنیاِسرائیل نُوں شریعت دِتی۔ ایس شریعت چ یہوواہ نے بوہت سارے حکماں دے ذریعے صاف صاف دَسیا کہ اوہدے بندیاں نُوں اوہدی عبادت کیویں کرنی چاہی دی اے۔
5. یسوع مسیح دی موت تے اوہدے جی اُٹھن توں بعد یہوواہ دی عبادت کرن دے طریقے چ کیہڑی تبدیلی آئی؟
5 یسوع مسیح دی موت تے اوہدے زندہ ہون توں بعد یہوواہ ایہہ نئیں چاہندا سی کہ ہُن اوہدے بندے اوسے طریقے نال اوہدی عبادت کرن جیویں اوہنے موسیٰ دی شریعت چ دَسیا سی۔ (رومیوں 10:4) مسیحیاں نُوں اِک نوِیں شریعت دے مطابق اوہدی عبادت کرنی سی تے ایہہ مسیح دی شریعت سی۔ (گلتیوں 6:2) ایس شریعت نُوں منن لئی نہ تے اوہناں نے ایہنوں زبانی یاد کرنا سی تے نہ ای ایہدے چ لکھے حکماں دی اِک لمی چوڑی فہرست دے مطابق زندگی گزارنی سی۔ ایہدی بجائے اوہناں نُوں یسوع وانگوں بننا سی تے اوہدیاں دَسیاں ہوئیاں گلاں تے عمل کرنا سی۔اَج وی مسیحی یہوواہ نُوں خوش کرن تے آپ وی خوشی حاصل کرن لئی یسوع دی مثال تے عمل کرن دی پوری کوشش کردے نیں۔—متی 11:29۔
6. ایس مضمون توں فائدہ حاصل کرن لئی اَسی کیہہ کر سکنے آں؟
6 جدوں اَسی یہوواہ دی عبادت کرن دے ہر طریقے تے گل کرنے آں تے سانوں اپنے آپ کولوں ایہہ پچھنا چاہی دا اے: ”کیہہ میں ایس طریقے نال چنگی طرحاں یہوواہ دی عبادت کر رہیا واں؟“ تُسی اپنے آپ کولوں ایہہ وی پچھ سکدے او:”میں ہور چنگی طرحاں یہوواہ دی عبادت کرن لئی کیہہ کر سکنا واں؟“ تُسی ہُن جِنّی وی چنگی طرحاں یہوواہ دی عبادت کر رہے او، توانوں اوہدی وجہ توں خوش ہونا چاہی دا اے۔ پر توانوں ایہہ ویکھن لئی یہوواہ کولوں مدد منگنی چاہی دی اے کہ تُسی اوہدی عبادت کرن دے سلسلے چ کتھے بہتری لیا سکدے او۔
یہوواہ دی عبادت کرن دے کجھ طریقے
7. یہوواہ اوہناں دُعاواں بارے کیہو جیہا محسوس کردا اے جیہڑیاں اَسی دلوں کرنے آں؟
7 اَسی یہوواہ کولوں دُعا کرن نال اوہدی عبادت کرنے آں۔ بائبل چ دَسیا گیا اے کہ ساڈیاں دُعاواں بخور وانگوں نیں جنہوں بڑے دھیان نال تیار کیتا جاندا سی۔ بخور نُوں پہلاں خیمۂاِجتماع چ تے بعد چ ہیکل چ یہوواہ دے حضور پیش کیتا جاندا سی۔ (زبور 141:2) اوس بخور دی خوشبو توں یہوواہ بوہت زیادہ خوش ہوندا سی۔ایسے طرحاں جدوں اَسی دلوں یہوواہ کولوں دُعا کرنے آں تے اوہنوں بوہت خوشی ہوندی اے فیر بھانویں ایہہ دُعاواں سادے لفظاں چ ای کیوں نہ ہون۔ (امثال 15:8) اَسی پکا یقین رکھ سکنے آں کہ جدوں اَسی یہوواہ نُوں دَسنے آں کہ اَسی اوہنوں کِنّاں پیار کرنے آں تے اوہدے کِنّے شکرگزار آں تے اوہنوں بوہت چنگا لگدا اے۔ یہوواہ چاہندا اے کہ اَسی اپنیاں پریشانیاں تے خواہشاں بارے وی اوہنوں دَسیئے۔ چنگا ہووے گا کہ دُعا کرن توں پہلاں اَسی سوچئے کہ دُعا چ اَسی یہوواہ نُوں کیہہ کہواں گے۔ اِنج کرن نال اَسی اپنے اسمانی باپ یہوواہ دے حضور بہترین بخور پیش کر رہے ہونواں گے۔
8. ساڈے کول یہوواہ دی تعریف کرن دے کیہڑے موقعے نیں؟
8 اَسی یہوواہ دی تعریف کرن نال اوہدی عبادت کرنے آں۔ (زبور 34:1) جدوں اَسی دُوجیاں نُوں دَسنے آں کہ اَسی یہوواہ دِیاں خوبیاں تے اوہدے شاندار کماں دی کِنّی قدر کرنے آں تے اَسی یہوواہ دی تعریف کر رہے ہنے آں۔ جدوں اَسی دلوں کسے دے شکرگزار ہنے آں تے اَسی اوہدی تعریف کرن دا کوئی وی موقع ہتھوں نئیں جان دیندے۔ ایسے طرحاں جے اَسی وقت کڈھ کے ایہہ سوچاں گے کہ یہوواہ نے ساڈے لئی کِنّاں کجھ کیتا اے تے ساڈے کول یہوواہ دی تعریف کرن لئی بوہت کجھ ہوئے گا۔ خاص طور تے مُنادی کردے ویلے سانوں ایہہ موقع مِلدا اے کہ اَسی خدا دے حضور حمد دِیاں قربانیاں پیش کرئیے۔ (عبرانیوں 13:15) جیس طرحاں دُعا کرن توں پہلاں سانوں سوچنا چاہی دا اے کہ اَسی دُعا چ یہوواہ نُوں کیہہ کہواں گے اوسے طرحاں مُنادی کرن توں پہلاں سانوں سوچنا چاہی دا اے کہ اَسی لوکاں نال کیہہ گل بات کراں گے۔ اَسی چاہنے آں کہ اَسی یہوواہ دے حضور حمد دِیاں بہترین قربانیاں پیش کرئیے۔ ایس لئی اَسی لگن نال دُوجیاں نُوں یہوواہ بارے دَسنے آں۔
9. (الف) اِسرائیلیاں وانگوں مِل کے یہوواہ دی عبادت کرن نال سانوں کیہہ فائدہ ہوندا اے؟(ب) دَسو کہ عبادتاں تے آ کے توانوں کیہہ فائدہ ہویا اے۔
9 اَسی عبادتاں تے جان نال یہوواہ دی عبادت کرنے آں۔ بنیاِسرائیل نُوں ایہہ حکم دِتا گیا سی: سال چ تِن وار بے خمیری روٹی دی عید تے ہفتیاں دی عید تے خیمیاں دی عید دے موقعے تے تیرے سارے مرد یہوواہ اپنے خدا دے اَگے اوس جگہ تے حاضر ہون جنہوں اوہ چُنے گا۔ (اِستثنا 16:16) جدوں بنیاِسرائیل ایہہ عیداں منان لئی جاندے سن تے اوہناں دے گھراں تے کھیتاں دی حفاظت کرن لئی پچھے کوئی نئیں ہوندا سی۔ پر یہوواہ نے اوہناں نال ایہہ وعدہ کیتا سی: جدوں سال چ تِن وار توں [یہوواہ] اپنے خدا دے حضور حاضر ہوویں گا تے کوئی وی تیری زمین دا لالچ نئیں کرے گا۔ (خروج 34:24) اِسرائیلیاں نُوں یہوواہ تے پورا بھروسا سی ایس لئی اوہ ہر سال عیداں منان لئی کٹھے ہوندے سن۔ ایہدے توں اوہناں نُوں بڑے فائدے ہوندے سن۔ مثال لئی، اوہ یہوواہ دی شریعت نُوں ہور چنگی طرحاں سمجھ پاندے سن تے اوہ ایس گل تے دھیان دے پاندے سن کہ یہوواہ نے اوہناں لئی کیہہ کجھ کیتا اے تے اوہناں نُوں اپنے ہمایماناں دے نال وقت گزارن دا وی موقع مِلدا سی۔ (اِستثنا 16:15) جدوں اَسی وی عبادتاں تے جان لئی قربانیاں دینے آں تے سانوں وی ایسے طرحاں دے فائدے ہوندے نیں۔ تے جدوں اَسی کوئی ایہو جیہا جواب تیار کر کے جانے آں جیہڑا چھوٹا ہوئے پر بھین بھراواں لئی فائدہمند ہوئے تے یہوواہ نُوں بڑی خوشی ہوندی اے۔
10. گیت گانا ساڈی عبادت دا اِک اہم حصہ کیوں اے؟
10 اَسی اپنے بھین بھراواں نال مِل کے گیت گان نال یہوواہ دی عبادت کرنے آں۔ (زبور 28:7) اِسرائیلیاں دی نظر چ گیت گانا یہوواہ دی عبادت دا اِک بڑا ای اہم حصہ سی۔ بادشاہ داؤد نے 288 لاویاں نُوں ہیکل چ گیت گان لئی مقرر کیتا۔ (1-تواریخ 25:1، 6-8) اَج وی گیت گا کے اَسی یہوواہ لئی محبت ظاہر کرنے آں۔ اِنج کرن لئی ضروری نئیں کہ ساڈے سُر بڑے پکے ہون۔ ذرا سوچو کہ گل کردے ویلے اَسی سارے وار وار غلطی کرنے آں۔ پر ایہدی وجہ توں اَسی کلیسیا چ یاں مُنادی کردے ویلے گل کرنا نئیں چھڈ دیندے۔ (یعقوب 3:2) ایسے طرحاں سانوں ایس وجہ توں گیت گان توں نئیں گھبرانا چاہی دا کہ ساڈی آواز چنگی نئیں اے۔
11. زبور 48:13 دے مطابق سانوں اپنے گھر والیاں نال بائبل تے گل بات کرن لئی وقت کیوں طے کر نا چاہی دا اے؟
11 اَسی یہوواہ دے پاک کلام دا مطالعیا کرن تے اپنے بچیاں نُوں اوہدے بارے سکھان نال اوہدی عبادت کرنے آں۔ سبت والے دن اِسرائیلی کوئی وی کم نئیں کردے سن۔ ایہدی بجائے اوہ یہوواہ نال اپنی دوستی نُوں مضبوط کرن تے دھیان دیندے سن۔ (خروج 31:16، 17) اوس دن اوہ اپنے بچیاں نُوں یہوواہ خدا تے اوہدیاں نعمتاں بارے دَسدے سن۔ اَج سانوں وی خدا دے پاک کلام نُوں پڑھن تے ایہدے تے سوچوچار کرن لئی اِک وقت طے کرنا چاہی دا اے۔ ایہہ وی یہوواہ دی عبادت کرن دا اِک طریقہ اے جدے ذریعے اَسی اوہدے نیڑے ہو جانے آں۔ (زبور 73:28) جدوں اَسی اپنے گھر والیاں نال مل کے بائبل تے گل بات کرنے آں تے اَسی یہوواہ دے دوست بنن چ اپنے بچیاں دی مدد کرنے آں۔—زبور 48:13 نُوں پڑھو۔
12. جیہڑے لوکاں نے خیمۂاِجتماع دِیاں چیزاں بنائیاں، یہوواہ اوہناں دے کم بارے کیہہ سوچدا سی تے اَسی ایہدے توں کیہہ سکھنے آں؟
12 اَسی عبادت گاہواں نُوں بنان تے اوہناں دی دیکھبھال کرن نال یہوواہ دی عبادت کرنے آں۔ بائبل چ خیمۂاِجتماع تے ایہدیاں چیزاں نُوں بنان دے کم نُوں مُقدس کم کہیا گیا اے۔ (خروج 36:1، 4) اَج وی یہوواہ عبادتگاہواں تے تنظیم دِیاں دُوجیاں عمارتاں بنان دے کم نُوں ساڈی عبادت دا حصہ سمجھدا اے۔ کجھ بھین بھرا ایس کم لئی اپنا بوہت سارا وقت قربان کردے نیں۔ ایہہ بھین بھرا خدا دی بادشاہی لئی جیہڑی محنت کردے نیں، اَسی اوہدی بڑی قدر کرنے آں۔ایہہ بھین بھرا مُنادی وی کر دے نیں۔ ایہناں چوں کجھ تے شاید پہلکار وی بننا چاہندے نیں۔ جدوں کلیسیا دے بزرگ ایہناں بھین بھراواں نُوں خوشی خوشی پہلکار بنا دیندے نیں تے اوہ ثابت کردے نیں کہ اوہ تنظیم دِیاں عمارتاں بنان دے کم دی حمایت کردے نیں۔ بھانویں سانوں عمارتاں بنان لئی کوئی ہنر آندا ہووے یاں نئیں، اَسی اپنیاں عبادت گاہواں نُوں صاف ستھرا تے چنگی حالت چ رکھ سکنے آں۔
13. یہوواہ دی خدمت لئی استمال ہون والے عطیات بارے ساڈی سوچ کیہہ ہونی چاہی دی اے؟
13 اَسی عطیات دین نال یہوواہ دی عبادت کرنے آں۔ یہوواہ نے اِسرائیلیاں نُوں حکم دِتا سی کہ اوہ اوہدے حضور خالی ہتھ نہ آن۔ (اِستثنا 16:16) یہوواہ چاہندا سی کہ اوہ اپنے حالاتاں دے مطابق جِنّاں وی دے سکدے نیں، اوہ دین۔ اِنج اوہ ثابت کر سکدے سن کہ اوہ اوہناں کماں لئی بڑے شکر گزار نیں جیہڑے یہوواہ نے اوہناں لئی کیتے سن۔ اَسی یہوواہ لئی اپنی محبت تے اوہناں کماں لئی قدر کیویں ظاہر کر سکنے آں جیہڑے یہوواہ ساڈے لئی کر رہیا اے؟ اِک طریقہ ایہہ وے کہ اَسی اپنے حالاتاں دے مطابق اپنی کلیسیا تے پوری دُنیا چ ہون والے کم لئی عطیات دَئیے۔ غور کرو کہ پولُس رسول نے ایہدے بارے کہیا کہ جیہڑی چیز خوشی نال دِتی جاندی اے، خدا اوہنوں دلوں قبول کردا اے کیونکہ خدا چاہندا اے کہ اَسی اوہدے مطابق دَئیے جو ساڈے کول ہے وے نہ کہ اوہدے مطابق جو ساڈے کول نئیں اے۔ (2-کُرنتھیوں 8:4، 12) اَسی خوشی نال جِنّاں وی عطیہ دینے آں، یہوواہ اوہدے توں خوش ہوندا اے فیر بھانویں اوہ تھوڑا ای کیوں نہ ہووے۔—مرقس 12:42-44؛ 2-کُرنتھیوں 9:7۔
14. جدوں اَسی اپنے ضرورتمند بھین بھراواں دی مدد کرنے آں تے امثال 19:17 دے مطابق یہوواہ ایہدے بارے کیہہ سوچدا اے؟
14 اَسی اپنے ضرورتمند بھین بھراواں دی مدد کرن نال یہوواہ دی عبادت کرنے آں۔ یہوواہ نے اِسرائیلیاں نال وعدہ کیتا سی کہ جے اوہ دل کھول کے غریباں دی مدد کرن گے تے اوہ اوہناں نُوں برکت دَوے گا۔ (اِستثنا 15:7، 10) جدوں وی اَسی اپنے کسے ضرورتمند بھین یاں بھرا دی مدد کر نے آں تے یہوواہ نُوں لگدا اے کہ جیویں اَسی اوہدے لئی کجھ کر رہے آں۔ (امثال 19:17 نُوں پڑھو۔) مثال لئی، جدوں پولُس قید چ سی تے فِلپّی دے مسیحیاں نے اوہدے لئی ضرورت دِیاں کجھ چیزاں گھلیاں۔ پولُس نے ایہناں چیزاں بارے کہیا کہ ایہہ چیزاں اوہناں نذرانیاں وانگوں نیں جیہڑے خدا نُوں پسند آندے نیں۔ (فِلپّیوں 4:18) اپنی کلیسیا دے بھین بھراواں بارے سوچو تے اپنے آپ کولوں پچھو کہ کیہہ میں کسے بھین یاں بھرا دی مدد کر سکناں واں؟ جدوں اَسی اپنا وقت، طاقت تے چیزاں دُوجیاں دی مدد کرن لئی استمال کرنے آں تے یہوواہ نُوں بڑی خوشی ہوندی اے۔ اوہ ایہنوں ساڈی عبادت دا حصہ سمجھدا اے۔—یعقوب 1:27۔
یہوواہ دی عبادت کرن نال خوشی مِلدی اے
15. یہوواہ دی عبادت لئی وقت کڈھنا تے محنت کرنا اِک بوجھ کیوں نئیں اے؟
15 یہوواہ دی عبادت کرن لئی سانوں وقت کڈھنا پیندا اے تے محنت کرنی پیندی اے۔ ایہہ ساڈے لئی بوجھ نئیں اے۔ (1-یوحنا 5:3) کیونکہ اَسی یہوواہ نال محبت دی وجہ توں اوہدی عبادت کرنے آں۔ ذرا اِک چھوٹے بچے بارے سوچو جیہڑا اپنے پیو نُوں کجھ دینا چاہندا اے۔ اوہ شاید بڑی محنت کر کے تے بڑا وقت لا کے اِک تصویر بنائے۔ ایس تصویر نُوں بنان توں بعد اوہ ایہہ نئیں سوچے گا کہ اوہنے اپنا وقت ضائع کیتا اے۔اوہ اپنے پیو نُوں بوہت پیار کردا اے ایس لئی اوہ اوہنوں ایہہ تحفہ دینا چاہندا اے۔ اَسی اپنے اسمانی باپ نال بوہت پیار کرنے آں۔ ایس لئی اَسی اوہدی عبادت کرن لئی وقت کڈھنے آں تے محنت کرنے آں۔
16. عبرانیوں 6:10 دے مطابق یہوواہ ساڈی اوس محنت بارے کیہو جیہا محسوس کردا اے جیہڑی اَسی اوہنوں خوش کرن لئی کرنے آں؟
16 جیہڑے ماں پیو اپنے بچیاں نال پیار کردے نیں، اوہ ایہہ توقع نئیں کردے کہ سارے بچے اوہناں نُوں اِکو جیہا تحفہ دین۔ اوہ جان دے نیں کہ اوہناں دے سارے بچے اِک دُوجے توں فرق نیں تے اوہ اِکو جیہا کم نئیں کر سکدے۔ ساڈے اسمانی باپ نُوں وی پتہ اے کہ ساڈے وچوں ہر اِک کیہہ کر سکدا اے تے کیہہ نئیں کر سکدا۔ شاید تُسی یہوواہ لئی کوئی ایہو جیہا کم کر سکدے او جیہڑا اوہ بھین بھرا نئیں کر سکدے جنہاں نُوں تُسی جان دے او تے بوہت پیار کر دے او۔ یاں ہو سکدا اے کہ تُسی اپنی صحت،عمر یاں اپنے گھر دِیاں ذمےداریاں دی وجہ توں اوہ سب کجھ نئیں کر سکدے جو دُوجے بھین بھرا کر رہے نیں۔ جے اِنج اے تے دل چھوٹا نہ کرو۔ (گلتیوں 6:4) یہوواہ خدا اوہناں کماں نُوں کدی وی نئیں بُھلے گا جیہڑے تُسی اوہدے لئی کر رہے او۔ جے تُسی صحی نیت نال یہوواہ لئی اوہ سب کجھ کرو گے جو تُسی کر سکدے او تے اوہ بوہت خوش ہوئے گا۔ (عبرانیوں 6:10 نُوں پڑھو۔) یہوواہ جان دا اے کہ تُسی اوہدے لئی بوہت کجھ کرنا چاہندے او تے اوہ چاہندا اے کہ تُسی اوہدے لئی جو کجھ وی کر رہے او، اوہدے توں تُسی خوش ہووو۔
17. (الف) جے توانوں یہوواہ دی عبادت کرن دا کوئی طریقہ مشکل لگدا اے تے تُسی کیہہ کر سکدے او؟ (ب) توانوں بکس ” اپنی خوشی نُوں ودھاؤ“ چ دِتے گئے کیہڑے طریقے توں فائدہ ہویا اے؟
17 جے توانوں یہوواہ دی عبادت کرن دا کوئی طریقہ مشکل لگدا اے جیویں کہ بائبل پڑھنا یاں مُنادی کرنا تے تُسی کیہہ کر سکدے او؟ تُسی جِنّاں زیادہ ایہناں طریقیاں نال یہوواہ دی عبادت کرو گے توانوں اونی زیادہ خوشی ملے گی تے فائدہ ہوئے گا۔ عبادت کرنا اِنج ای اے جیویں ورزش کرنا یاں کوئی ساز وجانا سکھنا۔ جے اَسی ایہہ کم کدی کدار کراں گے تے سانوں ایناں زیادہ فائدہ نئیں ہوئے گا۔ پر جے اَسی ایہہ کم روز کراں گے تے سانوں بوہت فائدہ ہوئے گا۔ شاید شروع شروع چ اَسی ایہہ کم تھوڑے وقت لئی کر سکنے آں تے فیر ہولی ہولی اَسی زیادہ دیر لئی کر سکنے آں۔ جدوں اَسی ویکھاں گے کہ سانوں ایہہ کم کرن نال بڑا فائدہ ہو رہیا اے تے ساڈا دل کرے گا کہ اَسی ایہہ کم ہور وی زیادہ کرئیے تے سانوں خوشی وی ملے گی۔ایہی گل یہوواہ دی عبادت کرن بارے وی سچ اے۔
18. سب توں اہم کم کیہڑا اے تے اوہنوں کرن نال کیہہ فائدہ ہوندا اے؟
18 ساڈی زندگی چ یہوواہ دی عبادت کرن نالوں زیادہ اہم کم ہور کجھ نئیں ہونا چاہی دا۔ جدوں اَسی پورے دل نال یہوواہ دی عبادت کرنے آں تے سانوں خوشی تے اِطمینان مِلدا اے تے ایہہ امید وی مِلدی اے کہ اَسی ہمیشاں تک یہوواہ دی عبادت کردے رہواں گے۔ (امثال 10:22) ایہدے علاوہ سانوں سکون وی مِلدا اے کیونکہ اَسی جاننے آں کہ جدوں یہوواہ دے بندیاں نُوں مشکلاں دا سامنا کرنا پیندا اے تے اوہ اوہناں دی مدد کر دا اے۔ (یسعیاہ 41:9، 10) ایہناں ساریاں گلاں دی وجہ توں یہوواہ دی عبادت کر کے سانوں بڑی خوشی مِلدی اے جیہڑا ایہہ حق رکھ دا اے کہ اوہنوں اوہدیاں بنائیاں ہوئیاں چیزاں توں عزت تے تمجید ملے۔—مکاشفہ 4:11۔
گیت نمبر 43: شکرگزاری دی دُعا
^ یہوواہ خدا نے سب کجھ بنایا اے۔ ایس لئی سانوں صرف اوہدی عبادت کرنی چاہی دی اے۔ یہوواہ ساڈی عبادت نُوں اوہدوں ای قبول کردا اے جدوں اَسی اوہدے حکماں نُوں مننے آں تے اوہدے اصولاں مطابق زندگی گزارنے آں۔ایس مضمون چ اَسی اَٹھ ایہو جہے طریقیاں تے غور کراں گے جنہاں نال اَسی یہوواہ دی عبادت کرنے آں۔ ایہناں طریقیاں تے غور کردے ویلے ویکھو کہ ایہناں توں سانوں خوشی کیویں مِل سکدی اے۔
