1, 2. ¿Imatataq ruranantsik adoranqantsikta Dios chaskimänapaq?

 “DIOSTA adorashun” neqta wiyarqa, ¿imamantan pensanki? Itsa cäman lädunchö qonqurikïkur llapan shonqunwan mañakuykaq wawqita o panita rikaqnö karinki. O itsa Bibliata juk familia kushishqa estudiëkäyanqanman pensarinki.

² Mañakuykaq kaq y Bibliata estudiëkaq familiapis, Jehovätam adorëkäyan. ¿Tsënö adorayanqanta Jehovä chaskintsuraq? Awmi, pë munanqannö, kuyarnin y respetarnin adorayaptinqa, chaskinmi. Jehoväta alläpa kuyarnin y pëllatana adoranapaq kaqta musyarmi, imëkanöpa kallpachakuntsik mas alli adoranapaq.

3. ¿Imatataq këchö yachakushun?

³ Këchöqa, unë witsan imanö adorayanqanta Jehovä chaskinqanta y kanan witsan imakunata rurar adoranqantsikta chaskinqantam, puwaqta yachakurishun. Tsëkunata yachakunqantsikmannö, Diosta adoranqantsikchö imachö mas alliyänapaq kaqta pensashun. Jina Diosta adoranqantsik kushishqa kanapaq imanö yanapamanqantsiktam rikäshun.

4. Patsaman Cristu manaraq shamuptin, ¿imanötan Jehoväta adorayanqanta y respetayanqanta sirweqninkuna rikätsikuyarqan?

⁴ Patsaman Cristu manaraq shamuptinmi, Abel, Noë, Abrahan y Jobnö nunakunaqa, Jehoväta kuyayanqanta y respetayanqanta rikätsikuyarqan. ¿Imanötan tsëta rurayarqan? Pëta wiyakurnin, Pëman markäkurnin o yärakurnin y Pëpaq ofrendankunawanmi. Bibliachöqa imakunata rurar Jehoväta  adorayanqantaqa manam willakuntsu. Peru adorayänampaq y respetayänampaq puëdiyanqanmannö kallpachakuyanqanqa clärum këkan. Tsëmi Jehoväqa adorayanqanta chaskirqan. Tsëpita tiempuwanqa, Abrahanpa kastan israelïtakunapaqmi, leykunata Moisesta qellqatsirqan. Tsë leykunawanmi, imanö adorayänanta munanqanta cläru rikätsirqan.

5. Jesus wanurir kawariramuptinqa, ¿imatanatan rurayänan karqan Diosta adorayänampaq?

⁵ Jesus wanuriptin y tsëpita kawariramuptinqa, Jehoväqa manam sirweqninkunata exigirqannatsu Moises Qellqanqan Leyta wiyakuyänampaq (Rom. 10:4). Tsëpa rantinqa, cristiänukunaqa juk mushoq leytanam wiyakuyänan karqan, “Cristupa leyninta” (Gäl. 6:2). Tsëta wiyakuyänampaqqa, manam mëtsika leykunata dememoriatsu yachakuyänan karqan. Sinöqa, Jesus ruranqampita y yachatsikunqampitam yachakuyänan karqan. Jehoväta kanan witsan sirweqkunaqa, pë kushishqa kanampaq y kikinkuna yamë kawakuyänampaqmi Cristu ruranqannö rurayänampaq kallpachakuyan (Mat. 11:29).

6. ¿Imanötan këchö yachakunqantsik yanapamäshun?

⁶ Jehoväta imakunata rurar adorëkanqëkiman pensar kënö tapukuy: “¿Alliyarqokü Diosta adorëkanqächö? ¿Mas alliyëta puëdïmantsuraq?”. Diosta adoranqëkichö alliyanqëkipita kushikunqëkiqa allim. Tsënö karpis, imachö alliyänëkipaq pishinqanta rikëkätsishunëkipaqmi Jehoväta mañakunëki.

7. ¿Ima cuentataq Jehoväta llapan shonquntsikwan mañakunqantsikqa?

⁷ Jehovätaqa, mañakurninmi adorantsik. Bibliachöqa, Diospa carpa wayinchö y tsëpita templuchö rupatsiyänampaq shumaq alistayanqan inciensutawanmi mañakunqantsikta igualatsin (Sal. 141:2). Tsë inciensuqa alläpa shumaqmi Diospaq pukutaq o mushkoq. Tsë cuentallam parlëta alli mana yachashqapis, llapan shonquntsikwan mañakunqantsikpita Diosqa kushikun (Prov. 15:8; Deut. 33:10). Mañakunqantsikchö kuyanqantsikta ninqantsikpita y agradecikunqantsikpita Jehovä kushikunqantaqa imëkam rikätsimantsik. Y pëqa imakunata munanqantsikpita, imakunapaq yarpachakunqantsikpita y shamoq tiempupaq imakunata shuyaranqantsikpita parlapänatam munan. Tsëqa, ¿imanirtan manaraq mañakurnin imata ninëkipaq kaqta shumaq pensarinkitsu? Tsëta ruraptikiqa, alläpa shumaq mushkoq inciensunömi mañakunqëki kanqa.

8. ¿Imakunata rurartan Diosta alabëta puëdintsik?

⁸ Jehovätaqa, alabarninmi adorantsik (Sal. 34:1). ¿Y imanötan Jehovätaqa alabantsik? Imanö kanqampita y ruranqankunapita kushishqa parlarninmi. Agradecikoq karmi, Diostaqa alabantsik. Kuyamarnintsik noqantsikrëkur, imëkata rurashqa kanqanman pensanapaq tiempuntsikta patsätsishqaqa, Jehovätaqa imë hörapis alabëkäshunllam. Y Diospita yachatsikurmi, “alabanza ofrendata Diosta imëpis qoshun, juk parlakïchöqa, shimintsikpita yarqoq ofrendata” (Heb. 13:15). Imanömi Jehoväta manaraq mañakurnin imata ninapaq kaqman pensantsik, tsënöllam nunakunata Diospita manaraq yachatsirnin imata ninapaq kaqta pensanantsik. ‘Alabanza ofrendantsik’ alläpa alli kanantam munantsik. Nunakunata Diospita yachatsirqa, shonquntsikchö kanqantam parlapantsik.

9. ¿Imanötan reunionkunaman ëwë Jehoväta sirweqkunata yanapashqa y imanötan qamta yanapashurqunki?

⁹ Jehovätaqa, reunionkunaman ëwarmi adorantsik. Unë israelïtakunatam Dios kënö  nirqan: “Cada watachö kima kuti llapan ollqu kaqkuna TEYTA DIOS akranqan sitiuman ëwëkur pëpa nöpanchö ëllukäyanqa” (Deut. 16:16). Wayinkunata y chakrankunata cuidayänampaqqa, manam pipis kaqtsu. Peru Jehoväqa këtam änirqan: “Noqa TEYTA DIOSTA adoramaq shayämunqëkiyaqqa manam pipis chakrëkita duëñu tukunqatsu” (Ex. 34:24). Israelïtakunaqa Jehoväman confiakurmi tsë fiestakunaman ëwayaq. Tsëta rurarmi Diospa leyninta mas alli entiendiyaq, kuyakoq kanqanman pensayaq y Jehoväta sirweqninkunawan juntu kushishqa kayaq (Deut. 16:15). Reunionkunaman ëwanapaq kallpachakushqaqa, noqantsikpis imëkatam yachakushun. Y tsëchö shumaq parlakurinapaq puntallatana alistakunqantsikpitam Jehoväqa masraq kushikun.

10. Jehoväta adorarninqa, ¿imanirtan pëta alabarnin cantanqantsikta precisaqpaq churanantsik?

¹⁰ Jehovätaqa, wawqi panintsikkunawan cantarninmi adorantsik (Sal. 28:7). Israelïtakunaqa Diosta adorayanqanchö cantëtapis precisaqpaqmi churayaq. Këllata yarpärishun: rey Davidqa 288 levïtakunatam churarqan templuchö cantayänampaq (1 Crön. 25:1, 6-8). Kanan witsampis, alabarnin pëpaq cantarninmi Diosta kuyanqantsikta rikätsikuntsik. Y tsëpaqqa, manam alli cantëtaraqtsu yachanantsik. Këllaman pensarishun: parlarqa ‘mëtsika kutim pantantsik’, peru manam tsërëkurtsu reunionkunachö y Diospita yachatsikurninqa parlëta dejarintsik (Sant. 3:2). Tsë cuentallam alli cantëta mana yachanqantsikta pensarpis, Jehoväta alabarnin cantashwan.

11. Salmus 48:13 ninqannöpis, ¿imanirtan tiempuntsikta patsätsinantsik familiantsikwan Bibliata estudianapaq?

¹¹ Jehovätaqa, Palabran Bibliata estudiarnin y yachakunqantsikpita wamrantsikkunata yachatsirninmi adorantsik. Israelïtakunaqa imëka rurëninkunatam cada säbadu dejayaq, Jehoväpita mas yachakuyänampaq (Ex. 31:16, 17). Jehoväta kuyaq israelïtakunaqa, Jehoväpita y kuyakoq kanqampitam wamrankunata yachatsiyaq. Y noqantsikqa, Diospa Palabranta leyinapaq y estudianapaqmi tiempuntsikta patsätsinantsik. Tsëta rurarqa, Diostam adorëkantsik y pëwan mas amïgu këmanmi chantsik (Sal. 73:28). Jina familiantsikwan juntu estudiarqa, wamrantsikkunatam kuyakoq Teyta Diosnintsikwan amïgu kayänampaq yanapantsik (leyi Salmus 48:13).

12. Diospa carpa wayinta y tsëchö utilizäyänampaq kaqkunata rurayanqan trabäjutaqa, ¿imanötan Jehovä rikarqan y imatataq tsëpita yachakuntsik?

¹² Jehovätaqa, pëta adoranapaq wayikunata rurarnin y tsëkunata altsaparninmi adorantsik. Bibliachöqa, Diospa carpa wayinta y tsëchö utilizäyänampaq kaqkunata rurë sagrädu trabäju kanqantam nin (Ex. 36:1, 4). Kanan witsampis, Diospita Yachatsikuna Wayikunata, Betel wayikunata y tsë wayikunatanö rurëtaqa, sagrädu trabäjutanömi Jehoväqa rikan. Wakin wawqi panikunaqa, mëtsika tiempum tsë trabäjukunachö yanapakuyan. Diospa Gobiernunchö tsënö yanapakuyanqampitam agradecikuntsik. Tsënö yanapakurpis, Diospita yachatsikuyänampaqmi tiempunkunata patsätsiyan. Y wakinqa, precursor kayänampaqpis churapakäyanmi. Tsënö yanapakoq wawqi panikuna precursor këta munayaptinqa, alli rikëkurmi creikoqkunata rikaqkunaqa precursor kayänampaq permitiyan. Wayikunata rurëta yachashqa o mana yachashqapis, llapantsikmi tsë wayikunata limpiuta y shumaq altsapashqata katsita puëdintsik.

13. Diospa Gobiernunchö qellënintsikwan yanapakunqantsiktaqa, ¿imanötan rikashwan?

 ¹³ Jehovätaqa, Gobiernunchö qellënintsikwan yanapakurmi adorantsik. Jehoväta adoraq ëwarqa, israelïtakunaqa imanllapis apayänanmi karqan (Deut. 16:16). Kayäpunqanmannömi ofrendata apayänan karqan. Tsëta rurarmi pëkunapaq Dios imëkata ruranqampita agradecikuyanqanta rikätsikuyaq. Y noqantsikqa, ¿imanötan Jehoväta kuyanqantsikta y imëkata ruramunqampita agradecikunqantsikta rikätsikuntsik? Juknöpaqa, congregacionnintsikchö y entëru Patsachö Diospita yachatsikurnin sïguinapaq puëdinqantsikmannö qellënintsikwan yanapakurninmi. Tsëta entienditsikurmi Pablu kënö nirqan: “Sitsun ras rurëta munë puntachö kanqa, tsëqa, nuna kapunqanmannö qonqanmi Diostaqa kushitsin, y manam mana kapunqanmannö qonqantsu” (2 Cor. 8:4, 12). Wallkalla kaptimpis, llapan shonquntsikwan qellënintsikta churakunqantsikpitam Jehoväqa kushikun (Mar. 12:42-44; 2 Cor. 9:7).

14. Proverbius 19:17 ninqannö, ¿imanötan pishipakuykaq wawqi panintsikkunata yanapanqantsikta Jehovä rikan?

¹⁴ Jehovätaqa, pishipakuykaq wawqi panintsikkunata yanaparmi adorantsik. Waktsakunata yanapaq israelïtakunata bendicinampaq kaqtam Jehoväqa änirqan (Deut. 15:7, 10). Pishipakuykaq wawqi panintsikkunata cada yanapashqam, pëta qarëkanqantsiktanö Jehoväqa rikan (leyi Proverbius 19:17). Këllata yarpärishun: Pablu prësurëkaptin Filïpus markapita cristiänukuna qarënin apatsiyanqampaqmi, tsë qarë Diosta alläpa kushitsinqanta nirqan (Filip. 4:18). Congregacionnintsikchöqa wawqi panintsikkunaman yarpärishun y kë tapukuyman pensarishun: “¿Mëqanllapis yanaparinäta wananku?”. Jehoväqa pëta adorarnin tiempuntsikta, kallpantsikta, rurëta yachanqantsikta y kapamanqantsikkunata wakinkunata yanapanapaq utilizashqam kushikun (Sant. 1:27).

15. Jehoväta adoranapaq tiempuntsikta y kallpantsikta utilizanqantsiktaqa, ¿imanirtan sasatanötsu rikantsik?

¹⁵ Munanqannö Jehoväta adoranapaqqa, tiempuntsiktam patsätsinantsik y kallpachakunantsikmi. Peru tsëta rurëqa manam alläpa sasatsu o ajatsu (1 Juan 5:3). ¿Imanir mana? Pëta kuyashqam. Teytanta juk dibüjuta qarëta munaq wamraman pensarishun. Itsa dibüjuntaqa atska hörakunachöraq qeshpitsinqa. Tsënö kaptimpis, teytanta kuyar y tsë dibüju teytanta kushitsinampaq kaqta pensarmi, tsë rurëtaqa sasatanötsu rikan. Tsënöllam, Jehoväta kuyarnin y pëta adoranapaq tiempuntsikta y kallpantsikta utilizanqantsikpita kushikuntsik.

16. Hebrëus 6:10 ninqannö, ¿imanötan Jehoväqa rikan pë kushishqa kanampaq kallpachakunqëkita?

¹⁶ Wamrankunata kuyaq teytakunaqa, manam llapan wamrankuna kaqllata qarayänantatsu shuyaräyan. Musyayanmi wamrankuna jukläya jukläya kayanqanta y imanö këkäyanqanta. Tsënöllam, Teytantsik Jehoväqa cada ünu imanö këkanqantsikta musyan. Itsa qamqa, amïguykikunapitapis masta rurëta puëdinki. O itsa edänikirëkur, salornikirëkur o familiëkita rikänëkirëkur wakinkunanöqa yanapakuyta puëdinkitsu. Peru ama llakikur qelanäkuritsu (Gäl. 6:4). Puëdinqëkimannö ruraptiki y alli kaqman pensëkur yanapakuptikiqa, Jehoväqa kushikunqam y manam qam ruranqëkita imëpis qonqanqatsu (leyi Hebrëus 6:10). Jehoväqa, shonquykichö imaman pensëkanqëkitam musyan. Pëqa, puëdinqëkimannö adoranqëkipita kushishqa kanëkitam munan.

17. (1) ¿Imatataq rurashwan Diosta adoranqantsikchö wakinta ruranqantsikchö pishiparqa? (2)  ¿Imakunata rurartan mas kushishqaqa kashun? neqta rikanqëkiqa, ¿mëqanllapis yanapashurqunkiku?

 ¹⁷ ¿Y Diosta adoranqantsikchö wakinta rurëta mana puëdishqaqa? Itsa Bibliata japallantsik estudië o Diospita yachatsikuy fäciltsu kanman. Peru tsëkunata ruranapaq tiempuntsikta patsätsishqaqa, itsa masta yachakunqantsikta y tsëkunata rurar kushishqa kanqantsikta cuentata qokushun. Jehoväta adoranqantsiktaqa, ejerciciuta rurëtawan o müsica toquëtawanmi igualatsishwan. Höra höralla tsëkunata rurashqaqa, itsa alläpaqa alliyäshuntsu. Peru cada junaq ruranapaq churapakashqaqa, masmi alliyäshun. Qallananllachöqa itsa juk ishkë minütukunalla rurashun, peru tsëpitaqa, ichikllapa ichikllapam mas tiempu tsëta rurar kashun. Y tiempuwanqa, itsa tsë junaq chämunanta shuyarëkäshun y tsëkunata rurarnin kushishqa kashun. ¿Manatsuraq Jehoväta adoranqantsikchöpis tsëta rurashwan?

18. ¿Imata rurëtataq imapitapis mas puntaman churanantsik y tsëta rurarqa imanötan kawakushun?

¹⁸ Llapan shonquntsikwan Jehoväta adoranqantsikmi imapitapis mas alliqa. Y tsëta rurarmi kanan witsan kushishqa kawakuntsik y shamoq tiempuchöpis pëta adoranapaqmi Jehoväqa permitimäshun (Prov. 10:22). Ima problëmachöpis Jehovä yanapamänapaq kaqta musyarmi, kananllapitana tranquïlu kawakuntsik (Is. 41:9, 10). Teytantsik Jehoväta adorarninqa imëkarëkurmi kushikuntsik, y pëllatam imëka kamanqankunapis alläpa precisaqpaq churayänan y respetayänan (Rev. 4:11).