1, 2. ¿Imaynatam Diosta yupaychananchik pay kusisqa kananpaqqa?

 YUPAYCHAYMANTA rimaptinku, ¿imataq umaykiman chayamun? Ichapas chayamusunki pipas Jehova Diosta sunqumanta mañakuchkaq utaq familianwan kuska bibliata leechkaq.

² Chay umaykiman chayamuq runakunaqa Diostam yupaychachkanku. ¿Yaqachu Jehova Diosqa kusikun chay ruwasqankuwan? Awriki, ichaqa munasqanman hina yupaychaptillankum. Ñuqanchikqa ancha-anchatam Jehova Diosta kuyanchik. Yachanchiktaqmi payqa yupaychananchikta munasqanta, chayraykum paypa munasqanman hina yupaychananchik.

3. ¿Imamantam yachasun kay yachachikuypi?

³ Kay yachachikuypim yachachkasunchik ñawpaqta imaynata yupaychasqankuwan Jehova Dios kusikusqanmanta. Yachachkasuntaqmi kunan imaynata yupaychasqanchikwan Jehova Dios kusikusqanmantapas. Yachasqanchikman hinayá yuyaymanasun Diosta aswan allinta yupaychanapaq imakunata ruwaypi. Chaymantapas yachachkasuntaqmi munasqanman hina Diosta yupaychayqa imaynanpi kusichiwasqanchikmanta.

4. ¿Imakunatam ruwarqaku ñawpaq tiempopi Diosta yupaychaqkunaqa Diosta kuyasqankurayku?

⁴ Abelwan Noeywan Abrahanwan Jobqa Jehova Diostam anchata kuyarqaku. Kuyasqankuraykum kasukurqaku, payllapi hapipakurqaku, animalkunata nakaspa kañapurqaku. Bibliapiqa manam ninchu imakunatawan ruwaspa Jehova Diosta yupaychasqankumantaqa. Ichaqa atisqankutamá ruwarqaku Jehova Diosta kusichinankupaq. Tiempopa pasasqanman hinam Diosqa Moisesnintakama Abrahanpa mirayninkunaman kamachikuykunata qurqa. Chay kamachikuykunapim nirqa imaynata payta yupaychanankupaq.

5. ¿Imaynatañam Diosta yupaycharqaku Jesuspa wañukuspan kawsarimusqan qipamanqa?

⁵ Jesuspa wañukuspan kawsarimusqan qipamanqa Jehova Diosqa manañam pitapas hikutarqañachu Moisespa leyninta kasukunanpaqqa (Rom. 10:4). Aswanqa ‘Cristopa kamachikuynintañam’ kasukunanku karqa (Gal. 6:2). Chaypaqqa manam achka kamachikuykunata hinachu umallankumanta yachananku karqa, aswanqa Jesusta qatipakuspankum yachachisqankunata kasukunanku karqa. Kunanpas Diosta yupaychaqkunaqa Jesusta qatipakunapaqmi atisqanchikta ruwanchik, chaynapi Jehova Diosta kusichispa hawkayayta tarinapaq (Mat. 11:29).

6. ¿Imapaqmi kay yachachikuyqa yanapawasun?

⁶ Diosta yupaychasqaykipi yuyaymanaspa nikuy: “¿Imaynataq kachkani ñawpaq kasqaymanta? ¿Atiymanraqchu Jehova Diosta aswan allinta yupaychanaypaq imapas ruwayta?”, nispa. Ichapas kunan imayna kasqanchikwanqa kusisqaña kachkanchik. Ichaqa hinallam Jehova Diosta mañakunanchik yanapawananchikpaq, chaynapi aswan allinta payta yupaychananchikpaq.

7. ¿Imaynataq Jehova Diospaqqa sunqumanta mañakusqanchikqa?

⁷ Jehova Diostam yupaychanchik payta mañakuspa. Bibliapim niwanchik mañakusqanchikqa kañasqa inciensoman rikchakusqanta, chay inciensotam kañaqku Diospa carpanpiwan Diospa wasinpi (Sal. 141:2). Chay incienso kañasqankuqa Diospaqmi miskillataña asnariq, chaynam tukuy sunqumanta mañakusqanchikpas paypaqqa agradonpaq. Payqa manam suyan suma-sumaqta mañakunanchiktaraqchu (Prov. 15:8; Deut. 33:10). Jehova Diosqa anchatam munan kuyasqanchikmanta ninanchikta, agradecekunanchikta. Munantaqmi imapas munasqanchikmanta willananchikta, imapas llakinchikkunamanta willananchikta, imapas suyasqanchikkunamanta willananchikta. Chayraykum manaraq mañakuchkaspa allinta tantiananchik imata ninanchikpaq. Chaypaq kallpanchakuptinchikqa mañakusqanchikqa miskillataña asnariq incienso hinam kanqa.

8. ¿Imata ruwaspam Diosta hatunchanchik?

⁸ Jehova Diostaqa yupaychanchiktaqmi payta hatunchaspa (Sal. 34:1). ¿Imakunata ruwaspataq Diostaqa hatunchanchik? Imayna kasqanmantawan imakuna ruwasqanmanta willakuspam. Agradecekuq kaspanchikqa Diostam hatunchasunchik. Jehova Diospa ñuqanchikrayku tukuy ima ruwasqanpi yuyaymanaspaqa haykaqpas paytam hatunchasun. Diostam hatunchanchik ‘sutinmanta runakunapa qayllanpi rimaspa’ (Heb. 13:15). Diosta manaraq mañakuchkaspaqa  allintam tantianchik imata ninanchikpaq. Chaynam runakunaman Diosmanta willakuspapas allinta tantiananchik imata ninanchikpaq. Ñuqanchikqariki munanchik munasqanman hina Diosta hatunchaytam. Hukkunaman Diosmanta willakuspaqa sunqumantam willakunanchik.

9. ¿Imaynatam huñunakuypi kayqa Jehova Dios serviqkunata yanapawanchik? ¿Imaynatam qamtapas yanapasunki?

⁹ Jehova Diostaqa yupaychanchiktaqmi huñunakuykunapi kaspa. Israel runakunatam Dios nirqa: ‘Sapa watapim kimsa kutita llapallan qarikuna rinqaku yupaychasqanchik tayta Diospa qayllanman utaq paypa akllasqan sitioman’, nispa (Deut. 16:16). Paykunaqa chayman rinankupaqqa wasinkutawan chakrankutam saqirqaku. Ichaqa Jehova Diosmi paykunata nirqa: ‘Qayllayman watapi kimsa kutita hamuptikichikqa manam pipas munapayanqachu allpaykichiktaqa’, nispa (Ex. 34:24). Chaymi paykunaqa mana iskayrayaspa Jehova Diosta yupaychaq riqku. Chay huñunakuykunaman rispankuqa Diospa kamachikuyninkunamantam astawan yachaqku, kuyakuyninpim yuyaymanaqku, Diosta yupaychaqkunawanmi kallpanchanakuqku (Deut. 16:15). Ñuqanchiktapas anchatam yanapawanchik huñunakuykunapi kayqa. ¡Maynataraq Jehova Diosqa kusikun huñunakuykunapi sumaqta rimarinanchikpaq wasinchikpi allinta estudiasqanchikwanqa!

10. ¿Imaynanpitaq Jehova Diospaq takipunanchik?

¹⁰ Jehova Diostaqa yupaychanchiktaqmi iñiqmasinchikkunawan takipuspa (Sal. 28:7). Israel runakunaqa takispankum Diosta yupaychaqku. Kamachiq Davidpas 288 Leviy runakunatam akllarqa Diospa wasinpi takinankupaq (1 Cron. 25:1, 6-8). Kunanpas Diosta kuyasqanchikraykum takikunata paypaq takipunchik. Wakiqninchikqa manam sumaqchatachu takinchik, ichaqa rimaspanchikpas llapallanchikmi sapa kuti pantanchik. Chaywanpas hinallam huñunakuypi rimarinchik, Diosmanta willakunchik (Sant. 3:2). Chaynaqa, mana sumaqchata takispanchikpas hinallayá Jehova Diospaq takipusun.

11. ¿Imaynanpitaq tiempota hurqunanchik Salmos 48:13 nisqanman hinaqa wasinchikpi kaqkunawan kuska bibliata estudiananchikpaq?

¹¹ Jehova Diostaqa yupaychanchiktaqmi palabranta estudiaspanchik, churi-wawanchikkunaman paymanta yachachispanchik. Israel runakunapas sapa sabado samaspankum Diosmanta astawan yachaqku (Ex. 31:16, 17). Diospi hapipakuq Israel runakunaqa churi-wawankumanmi Jehova Dios imayna kasqanmanta yachachiqku. Ñuqanchikpas tiempota hurquspam Diospa palabranta leespa yuyaymanananchik. Chayta ruwaspaqa Diostam yupaychachkanchik, hinaspapas paymanmi aswan-aswan asuykusunchik (Sal. 73:28). Chaymantapas, wasinchikpi kaqkunawan kuska Diospa palabranta estudiaspaqa churi-wawanchikkunatam yanapasunchik Diosninchikta kuyanankupaq (leey Salmos 48:13).

12. ¿Imapaqmi ruwarqaku carpatawan chaypi kaq serviciokunata? ¿Imatam chaymanta yachachwan?

¹² Jehova Diostaqa yupaychanchiktaqmi paypa wasinta ruwaspanchik hinaspa limpiaspanchik. Bibliapim nin Israel runakuna carpata ruwasqankuwan, chaypi kaq serviciokunata ruwasqankuwan Diosta yupaychasqankuta (Ex. 36:1, 4). Kunanpas Jehova Diostam yupaychachkanchik paypa wasinta ruwaspanchikqa utaq hukkunata ruwaspanchikpas. Wakin iñiqmasinchikkunam chay  ruwaykunapi anchata yanapakunku. Chaypi yanapakusqankumantaqa ancha-anchatam agradecekunchik. Chaypi yanapakuspankupas paykunaqa tiempotam hurqunku Diosmanta willakunankupaq. Wakinkuqa precursor kaytaraqmi munankupas. Iñiqkunapi punta apaqkunapas Diospa wasinta ruwaypi yanapakuchkaq hinam yanapakunku chaypi llamkaqkunata precursor kanankupaq yanapaspanku. Wasikuna ruwayta yachaspapas utaq mana yachaspapas llapallanchikmi yanapakuchwan Diospa wasinta limpiaypiqa hinaspa allichaypiqa.

13. ¿Imaynanpitaq qullqichanchikta churananchik?

¹³ Jehova Diostaqa yupaychanchiktaqmi qullqichanchikta churaspa. Israel runakunapas Diosmanqa asuykuqku manam mana imayuqchu (Deut. 16:16). Paykunaqa atisqankuman hinam imatapas apananku karqa. Chaynatam agradecekuqku Jehova Dios paykunapaq tukuy imata ruwasqanmanta. ¿Imatam ñuqanchikpas ruwananchik Diosta kuyaspaqa hinaspa ñuqanchikrayku tukuy ima ruwasqanmanta agradecekuspaqa? Atisqanchikman hina huñunakusqanchikpi qullqichanchikta quspam, Diosmanta willakuy enteron pachapi kananpaq qullqichanchikta quspam. Chaymanta rimaspam apostol Pablopas nirqa: “Imapas tukuy sunquwan yanapakuy qusqanchiktaqa Diosqa chaskinmi, payqa munan pipas atisqanman hina qunantam, manam mana atisqanman hina qunantachu”, nispa (2 Cor. 8:4, 12). Jehova Diosqa kusikun imaynachallatapas sunqunchikmanta qusqanchikwanmi (Mar. 12:42-44; 2 Cor. 9:7).

14. ¿Imaynataq Diospaqqa necesitaq iñiqmasinchikman imapas qusqanchikqa Proverbios 19:17 nisqanman hinaqa?

¹⁴ Jehova Diostaqa yupaychanchiktaqmi iñiqmasinchikkunata yanapaspa. Jehova Diosmi nirqa wakchakunata yanapaq Israel runakunata paypas yanapananmanta (Deut. 15:7, 10). Sapa kuti necesitaq iñiqmasinchikta yanapasqanchiktaqa Jehova Diosqa qawan payman qusqanchikta hinam (leey Proverbios 19:17). Filipos llaqtayuqkunapas apostol Pablomanmi preso kachkaptin kuyakuyninkuta apachirqaku. Payñataqmi nirqa chay apachisqankuqa, Diosman qusqanku hina kasqanta (Filip. 4:18). Iñiqmasinchikkunapi yuyaymanaspayá nikusun: “¿Pipas munachkanchu yanapaykunata?”, nispa. Jehova Diosqa anchatam kusikun necesitaq iñiqmasinchikkunapaq tiempochakuptinchik, imapipas yanapaykuptinchik, imatapas ruwaykapuptinchik, kapuqninchikta quykuptinchik. Paypaqqa chaykunata ruwayqa payta yupaychaymi (Sant. 1:27).

15. ¿Imaynanpitaq mana sasachu Diospaq tiempota hurquyqa hinaspa paypaq imatapas ruwayqa?

¹⁵ Jehova Diosta paypa munasqanman hina yupaychanapaqqa tiempotam hurqunanchik, anchatam kallpanchakunanchik, chayqa manam sasachu (1 Juan 5:3). ¿Imaynanpi? Payta kuyasqanchikraykum. Warmachapas taytanman imachatapas qunanpaqqa tukuytam ruwan. ¿Imaynanpi? Taytanta kuyasqanraykum, imapas qusqan kusichisqanraykum. Ñuqanchikpas chay warmacha hinam taytanchikta kuyanchik. Chayraykum paypaq tiempota hurqunchik, imaymanata ruwaspa payta yupaychanchik.

16. ¿Imaynam Jehova Diosqa tarikun Hebreos 6:10 nisqanman hina payta yupaychanapaq atisqanchikta ruwasqanchikwanqa?

¹⁶ Churinkuta kuyaq taytakunaqa manam llapallan churin imatapas chaynallata qunantachu  suyan. Paykunaqa yachankum churinkuqa mana chaynalla kasqankuta. Yaqa chaynam Diosninchikpas sapakamapa imayna kasqanchikta yachan. Wakiqninchikqa ichapas Diospaq imatapas astawan ruwachwan, wakiqninchikñataq ichapas unqusqanchikrayku, yuyaqña kasqanchikrayku, ayllunchikpaq llamkasqanchikrayku mana atisunchu, ichaqa chayna kaptinpas manam hukmanyananchikchu (Gal. 6:4). Jehova Diosqa manam qunqanqachu imapas ruwasqanchiktaqa. Hatunchasqa kananpaq atisqanchikta ruwaptinchikqa payqa kusisqam tarikunqa (leey Hebreos 6:10). Diosninchikqa yachantaqmi sunqunchikpi ima kasqantapas. Chaymi payqa munan atisqanchikman hina payta yupaychasqanchikwan kusisqa kananchikta.

17. (1) ¿Imatam ruwananchik bibliata estudiaytawan Diosmanta willakuyta sasachakuspaqa? (2) ¿Yanapasurqankichu “ ¿Imata ruwaspam aswan kusisqa kachwan?” niqpi rikuriq dibujokuna?

¹⁷ ¿Imatam ruwachwan sapallanchikpi bibliata estudiayta sasachakuspaqa utaq Diosmanta willakuyta sasachakuspaqa? Arpata yachanapaqqa manam iskay-kimsa punchawllachu hapinchik, aswanqa sapa punchawmi. Sapa punchaw hapispanchikqa sumaqta yacharuspam miskichata waqachinchik. Chaymantaqa manañam kachariytapas munanchikñachu. Yaqa chaynatam ruwananchik bibliata estudianapaqpas, Diosmanta willakunapaqpas. Chaypaq kallpanchakuspaqa kusisqam tukuy chaykunata ruwasun.

18. ¿Imapaqmi ñuqanchikqa unanchasqa karqanchik? ¿Imaynam tarikunchik Diosta yupaychaspaqa?

¹⁸ Ñuqanchikqa unanchasqa karqanchik Jehova Diosta sunqumanta yupaychanapaqmi. Payta yupaychasqanchikraykum kusisqa kawsakunchik, allinta kawsakunchik, wiñaypaq payllata yupaychayta suyachkanchik (Prov. 10:22). Ñuqanchikqa hawkañam kawsakunchik Diosninchik sasachakuyninchikkunapi yanapawananchikta yachasqanchikrayku (Is. 41:9, 10). Tukuy imawanmi kusisqa kanchik Diosta yupaychaspaqa. Payllamriki llapallanpa hatunchaspa yupaychananqa (Apoc. 4:11).