1, 2. Ñucanchipa adoracionda Jehová Dios chasquichunga ¿imashinata adorana capanchi?

 ADORANA shimita uyashpaca ¿imata quiquinba umamanga shamun? Talvez cai shimita uyashpaca shuj huauquigu paipa cama ladopi cungurishpa shungumanda Jehová Diosta mañajushcapi, o na cashpaca shuj familia entero Bibliamanda yachajushpa cushilla yalinajushcapimi pensarita ushapanchi.

² Cai ejemplocunamandaca ishcandicunallatami Jehová Diosta adoranajun. Pero cai adoraciongunataca ¿Jehová Diosca chasquinllu? Ari. Jehová Diosca paipa mandashcacunata cazungapaj esforzarijpi, juyaihuan, respetohuan adoranajujpica chasquinmi. Jehová Diosta ninanda juyaimanda, Jehová Dioslla ñucanchi adoracionda merecishcamandami paitaca ali adorangapaj munapanchi.

3. Caipica ¿imatata yachajugripanchi?

³ Cai yachajuipica punda tiempopi gentecuna Jehová Diosta imashina adorajpi Jehová Dios chasquishcatami yachajugripanchi. Shinallata cunan punllacunapi Jehová Dios imashina paita adorachun munashcatami 8 yuyaicunapi yachajugripanchi. Caicunata yachajujushpaca Jehová Diosta ali adorashpa catingapaj imata ashtahuan rurai ushashcapi pensaripashunchi. Shinallata Jehová Diosta ali adorana imamanda ñucanchicunata cushilla cachun ayudashcatapashmi ricugripanchi.

4. Jesús cai alpaman nara shamushca tiempocunapi Diosta sirvijcunaca ¿imashinata Jehová Diosta juyashcata, tucui shunguhuan respetashcataca ricuchirca?

⁴ Jesús cai Alpaman nara shamushca tiempocunapica Abel, Noé, Abrahán, Job runagucunaca Jehová Diostaca tucui shunguhuan juyashpa, respetashcatami ricuchirca. Jehová Diosta tucui shunguhuan juyashpa respetashcataca Jehová Diospi tucui shunguhuan confiashpa, paipa nishcacunata cazushpa, imata rurachun mandajpipash pactachingapaj esforzarishpa, sacrificiocunata rupachishpami  ricuchirca. Bibliapica cai jaricuna Jehová Diosta adorangapaj imacunatalla rurashcataca na tucuita villanllu. Shinapash Jehová Dios paicunapa adoracionda chasquichun paicuna ninanda esforzarishcatami ricuita ushapanchi. Shina esforzarijpica Jehová Dios paicunapa adoraciondaca chasquircami. Jipamanga Jehová Diosca israelitacunamanga mediante Moisesmi leycunataca curca. Cai leycunapica Jehová Dios paita imashinapacha adorachun munashcatami ricuchijurca.

5. Jesús cai alpaman shamushpa, huañushpa, causarishca jipaca ¿ima cambiocunata ricurirca?

⁵ Jesús cai alpaman shamushpa, huañushpa, cutin causarishca jipaca Jehová Diosca Moisespa leycunata cazushpa catichunga ñana mandarcachu (Rom. 10:4). Jesús ña huañushpa causarishca jipaca Jesusta catijcunaca shuj mushuj leytami pactachina ricurirca. Chai leyca ‘Cristopa mandashcacunami’ carca (Gál. 6:2). Shinaca Jesuspa leyta cazungapaca ñana Moisesman cushca leypishnaca imapash ashtaca cosascunataca ruranachu carca. Ashtahuangarin Jesuspa leyta pactachingapaca Jesuspa ejemplota catishpa, paipa yachachishcacunata ricushpami paishnalla imatapash rurai callarina carca. Shinaca cunanbi Jesusta catijcunaca Jesuspa ejemplota catishpa Jehová Diospa ñaupajpi ali ricuringapajmi esforzaripanchi (Mat. 11:29).

6. Caipi yachajushcacunaca ¿imapita ayudanga?

⁶ Jehová Diosta adorangapaj imacunatalla ruranajushcata yachajunajushpaca cashna tapuripashunchi: “Jehová Diosta ali adorangapaca ¿imatata rurapashcani? ¿Jehová Diostaca ashtahuan ali adoraita ushanichu?” nishpa. Talvez cunan horas imaguta Jehová Diosmanda rurajushpapash contentopashchari capashun. Shinapash imapi mejorana cashcata cuenta japingapami Jehová Diostaca ayudahuai nishpa mañanalla capanchi.

7. Jehová Diosta shungumanda mañajpica ¿imashinata sintirin?

⁷ Jehová Diosta adoranajushcataca paita mañashpami ricuchipanchi. Bibliapica ñucanchi mañaicunataca shuj mishquilla ashnajuj inciensohuanmi comparan. Inciensotaca aliguta preparashpami tabernáculo carpa huasigupi, shinallata jipamanga templo huasipimi mishquillagu ashnachun chaipi rupachin carian (Sal. 141:2). Shinaca inciensotaca Jehová Diospa ñaupajpi mishquillagu ashnajuchunmi rupachin carian. Ñucanchi mañaicunapash shina cuendallatami can. Shungumanda imagutapash nishpa mañajpica, paipa ñaupajpi mishquilla ashnajuj inciensoguta rupachijpishnami ‘cushilla’ sintirin (Prov. 15:8; Deut. 33:10). Jehová Diosca paita juyashcata, paita agradicishcata ricuchishpa mañachunmi munan. Shinallata paica ñucanchicuna imamanda preocuparishca cashcata villachun, imata ñucanchi munashcata paiman villachunmi munan. Chaimandami Jehová Diosta nara mañashpallata imata ningapaj munashcataca ali pensarina capanchi. Shina rurashpaca ali preparashpa mishquilla inciensota paipa ñaupapi rupachij cuendami capashun.

8. ¿Imata rurashpata Jehová Diosta alabashcataca ashtahuan ricuchi ushapanchi?

⁸ Jehová Diosta adoranajushcataca paita alabashpami ricuchipanchi (Sal. 34:1). Jehová Dios imashina cashcata, imacunatalla rurashcata shujcunaman villashpami paita alabanajushcata ricuchipanchi. Jehová Diostaca tucui shungu imagumandapash agradicishca cashpami paitaca alabangapaj munapashun. Jehová Dios shuj juyaj, llaquij Dios cashcata, ñucanchimanda imacunatalla rurashcata pensaringapaj tiempoguta llujchishpami paitaca alabaita ushapashun. Ashtahuanbachaca villachinajushpami ‘Taita Diosman imagutapash carashpa rupachinshna rurapanchi’ (Heb. 13:15, MTQI). Imashinami Jehová Diosta nara mañashpallata imata ninataca aliguta pensarina capanchi, shinallatami villachinapipash can. Shuj personaman imata ninataca aliguta pensarina capanchi. Taita Diosta shina cada punlla ñucanchi shimicunahuan alicachishpaca paiman imagutapash carashpa rupachijunshnami canga. Chaimandami villachishpapash shujcunamanga shungumanda villachina capanchi.

9. ¿Testigo de Jehovacunataca reuniongunaman rinaca imashinata ayudan? ¿Chai reuniongunaca quiquindaca imashinata ayudashca?

 ⁹ Tandanajuicunaman rishpami Jehová Diosta adoranajushcataca ricuchipanchi. Jehová Diosca israelitacunamanga, “tucui jaricunaca, canda Mandaj Taita Diospaj ñaupajpimi, paillata agllashca pushtupi, huatapi quimsacaman ricurimunga” nircami (Deut. 16:16). Chai mandashcacunata cazuimandami paicunapa huasicunata, alpacunata saquishpa rina tucurca. Jehová Diosca can shamujpica “cambaj alpataca pipash na japingachu” nircami (Éx. 34:24). Chaimandami israelitacunaca imatapash na manllashpa, Jehová Dios tandanajuchun mañashca pushtupi tandanajungapaca huatapi quimsa viajeta rin carca. Cai tandanajuicunaman rishpaca paicunaca ashtacatami beneficiarin carca. Chai tandanajuicunapica Diospa leycunataca ashtahuanmi yachajun carca. Shinallata Jehová Dios paicunamanda imatalla rurashcapimi cutin pensarin carca. Shinallata Jehová Diosta adoraj pura tuparishpami cushilla yalin carca (Deut. 16:15). Cunan punllacunapipash shinallatami can. Tandanajuicunaman rishpaca ashtaca cosascunamandami beneficiaripanchi. Jehová Diosca tandanajuicunapi comentangapaj ali prepararijta ricushpaca cushillami sintirin.

10. Jehová Diosta adorangapaca ¿imamandata candanaca importantepacha can?

¹⁰ Jehová Diosta adoranajushcataca cantashpapashmi ricuchipanchi (Sal. 28:7). Israelitacunapaca Jehová Diosta adorangapaca candanaca importantepachami carca. Rey Davidca Jehová Diospa templo huasipi candachunga 288 levitacunatami agllarca (1 Crón. 25:1, 6-8). Cunan punllacunapipash Jehová Diosta juyashcataca, ñucanchicuna paita alabangapaj candashpami ricuchita ushapanchi. Jehová Diosta cantashpa alabangapaca ñucanchicunaca shuj alipacha cantantecuna canaca na minishtirinllu. Caipi pensaripashunchi: Bibliapica ‘tucuicunami imatapash nishpa pandarinchilla’ ninmi. Shinapash pandarishcamandallaca na villachinapi, congregacionbipash parlanataca saquipanchichu (Sant. 3:2). Shina cuendallatami Jehová Diosta cantashpa alabanahuanbash can. Nali candanichu nishpa manllaimandallaca Jehová Diosta cantashpa alabanataca na saquinachu capanchi.

11. Deuteronomio 6:6, 7​pi nishcashnaca ¿imamandata familiahuan Bibliata estudiangapaj tiempoguta llujchina capanchi?

¹¹ Jehová Diosta adoranajushcataca Bibliata estudiashpa, Jehovamanda ñucanchi huahuacunaman yachachishpami ricuchita ushapanchi. Israelitacunapa tiempopica sábado punllami paicunaca tucuita imata ruranatapash saquishpa Jehová Diosmanda ashtahuan yachajushpa, paihuan ali amigo tucungapaj tiempota llujchin carian (Éx. 31:16, 17) Tucui shunguhuan Jehová Diosta sirvij israelitacunaca paicunapa huahuacunamanga Jehová Dios shuj juyaj ali Dios cashcatami yachachin carian. Cunanbica ñucanchicunapashmi Bibliata liingapaca tiempoguta llujchina capanchi. Cashna rurashpami paita ali adoranajushcata ricuchishpa paihuanbash ali amigo tucupashun (Sal. 73:28). Tucuilla familia Bibliamanda yachajushpaca taitacunaca huahuacunataca Jehová Dioshuan ali amigo cachunmi ayudaita ushan (Deuteronomio 6:6, 7​ta liipangui).

12. Jehová Diosca carpa huasiguta ruranata, chai carpa huasigupi imapash minishtirishca cosasgucunata ruranataca ¿imashinata ricurca?

¹² Jehová Diosta adoranajushcataca tandanajui huasicunata rurashpa y chai tandanajuna huasicunata cuidashpami ricuchipanchi. Bibliapica tabernáculo carpa huasiguta rurana trabajo y chaipi tucui ima tiashcacunata rurana trabajoca ninan valishca cashcatami ricuchin (Éx. 36:1, 4) Cunan punllacunapipash tandanajui huasicunata rurana y cai tandanajui huasicunapi imapash minishtirishca cosasgucunata ruranaca Jehová Diospaca ninan valishcami can. Huaquin huauquipanicunaca cashna tandanajui huasicunata rurajpi ayudangapami ashtaca tiempota utilizan. Paicuna cashna ayudashcamandaca ninandami agradicipanchi. Paicunaca cashna construcciongunapi ayudashpapash villachishpapashmi tiempotaca llujchin. Cashna construccionbi ayudaj huauquipanicunaca huaquingunaca precursorcuna tucungapami munan. Chaimandami  congregacionmanda anciano huauquicunaca paicuna precursorcuna tucungapaj munajpi requisitocunata pactachijpica aprobanallami can. Construcciongunapi alipacha na trabajai ushashpapash tucuicunallatami Jehová Diospa tandanajuna huasicunaca limpio, ali cachun ayudaita ushapanchi.

13. Jehová Diospa ali villaigucunata ñucanchi contribución culquiguhuan apoyanamandaca ¿imatata pensana capanchi?

¹³ Ñucanchi contribución culquiguhuan apoyashcacunapashmi Jehová Diosta adoranajushcata ricuchin. Israelitacunataca Jehová Diosta adorangapaj rishpaca pipash chushaj maquihuanga na ricurimungachu nircami (Deut. 16:16). Paicunaca, paicuna ima usharishcagutami apashpa rina carca. Shina rurashpami espiritualmente paicuna beneficiarichun rurashca arreglocunata apoyashcata ricuchin carca. Shinaca ñucanchicunapash ¿imashinata Jehová Diosta juyashcata, ñucanchicuna espiritualmente alicachun rurashca arreglocunatapash agradicishcata ricuchipanchi? Agradicishcata ricuchingapaca congregacionbi minishtirishcacunapa, shinallata obra mundialpami ñucanchi contribuciongunahuan apoyana capanchi. Apóstol Pablopa shimicunatami yarina capanchi. Apóstol Pabloca: “Maijambash tucui shunguhuan carangapaj munashpa, imagutapash charishcata carajpica, Diosmi chasquijun. Ashtahuangarin imatapash na charishpata carachunga, na mañajunllu” nircami (2 Cor. 8:4, 12). Shinaca Jehová Diosca ashtacata o ashaguta carajtaca na ricujunllu. Ashtahuangarin paica shungumanda imagutapash carajpimi ninanda cushijun (Mar. 12:42-44; 2 Cor. 9:7).

14. Proverbios 19:17​pi nishcashnaca minishtinajuj huauquipanigucunata ñucanchicuna ayudajpica, Jehová Diosca ¿imashinata ricun?

¹⁴ Ñucanchi huauquipanicunata imagupipash minishtinajujpi ayudashpaca Jehová Diosta adoranajushcatami ricuchinchi. Jehová Diosca israelitacunataca pobre gentegucunata ayudajpica bendiciasha nircami (Deut. 15:7, 10) Shinaca shuj huauquiguta o shuj paniguta imapipash minishtijujpi ayudashpaca Jehová Diosman shuj regaloguta carajuj cuendami capanchi (Proverbios 19:17​ta liipangui). Por ejemplo, Filipos llactamanda huauquicunaca apóstol Pablo carcelpi cajpimi paimanga shuj regaloguta cacharca. Apóstol Pablo chai regaloguta chasquishpaca, ‘canguna cachamushcacunaca, Diosman carashpa rupachijpi, mishquillagu ashnajunshnami tucushca’ nircami (Filip. 4:18). Congregacionbi huauquipanicunapi pensarishpa cashna tapuripai: “Congregacionbica ¿pipash ñuca ayudachun minishtijunllu?” nishpa. Jehová Diosca ñucanchi tiempota, fuerzata o imapash charishca cosasgucunata shuj huauquipanicunata ayudangapaj utilizajpica ninandami cushijun. Chaita rurashpaca Jehová Diosta adoranajushcatallatami ricuchipanchi (Sant. 1:27).

15. Jehová Diosta sirvingapaj ñucanchi tiempota, ñucanchi fuerzata utilizanaca ¿imamandata na yapa shinlli ricurin?

¹⁵ Jehová Diosta ali adorangapaca tiempo y esfuerzomi minishtirin. Shinapash Jehová Diosta ali adoranaca na yapa shinlli canllu (1 Juan 5:3) ¿Imamandata shina nipanchi? Jehová Diostaca juyaimandami adorapanchi. Caipi pensaripashunchi: Shuj huahuaguca paipa taitamanmi shuj regaloguta carangapaj munan. Shinapash chai regaloguta carangapaca huahuaguca ashtaca tiempotami dibujashpa yalin. Shinapash chai huahuaguca chai dibujota rurangapaj tiempota llujchishcamandaca na arripintirinllu. Paipa taitata juyashcamanda chai dibujota rurangapaj mashna tiempota yalishca cashpapash cushijushcami sintirin. Ñucanchicunapash Jehová Diosta adoranapica shina cuendallatami capanchi. Jehová Diosta juyaimandami ñucanchi tiempota, fuerzata paita adorangapaj utilizashpaca cushijushca sintiripanchi.

16. Hebreos 6:10​pi nishcashnaca, Jehová Diosta cushichingapaj tucui usharishcaguta rurajujpica, Jehová Diosca ¿imashinata ricun?

¹⁶ Taitacunaca, huahuacunata juyaimandaca tucuilla huahuacuna igual regalota carachunga na shuyanajunllu. Taitacunaca cada huahuacuna diferente causaiguta charijtaca alimi yachan. Jehová Diospash shinallatami cada uno ñucanchicuna imaguta carai ushajtaca ali yachan. Talvez quiquinga quiquinba amigocunahuan ricujpica  Jehová Diostaca ashtahuanbashchari sirvijupangui o na cashpaca shujcunahuan ricujpica talvez mayorlla caimanda o saludpi na ali caimanda o familiapi ashtahuan responsabilidadta charishcamandaca talvez Jehovata na ashta sirvita ushashcapashchari capangui. Shinapash shina pasajujpica ama desanimaripanguichu (Gál. 6:4). Jehová Diosca imata paimanda rurajpipash nunca na cungangachu. Jehová Diosta tucui usharishcagupi sirvijpica Jehová Diosca ninandami cushijunga (Hebreos 6:10​ta liipangui). Jehová Diosca ñucanchicuna imata pensajujtaca alimi yachan. Chaimandami Jehová Diosca ñucanchi usharishcagupi Jehovata sirvishpa cushilla sintirichun munan.

17. a) Jehová Diosta adorangapaj estudio personalta rurana o predicana shinlli ricurijpica ¿imatata rurai ushapanchi? b) “ Imashinata ashtahuan cushilla caita ushanchi” nishca recuadropi yuyaicunaca quiquindaca ¿imapita ayudashca?

¹⁷ Estudio personalta ruraita, predicacionman llujshita na ushajpica ¿imata tucunman? Estudio personalta charina o predicacionman llujshinami ñucanchicunataca ashtahuan cushilla sintirichun ayudanga. Cai ruraicunataca ejerciciota ruranahuan o musicata tocanahuanmi comparaita ushapanchi. Por ejemplo ejerciciota o musicata cashpapash huaquinbilla rurashpaca talvez chaicunapica na ashta imagutapash ali ushashunllu. Shinapash cada punlla cai cosascunata rurai callarishpaca talvez asha ashami mejorashpa catipashun. Cada punlla imatapash rurashcamanda ashtahuan rurai ushashpami ashtahuan cushilla sintiri ushapashun. Jehová Diosta adoranapipash shinallatami can.

18. Ñucanchi causaipica ¿imata ashtahuanbachaca importante can? Caita ruranaca ñucanchitaca ¿imapita ayudanga?

¹⁸ Jehová Diosta tucui shungu sirvingapaj esforzarinami ashtahuan importante can. Shina rurashpaca shuj cushilla causaigutami charishun. Shamuj punllapi causaigutapashmi cushijushpa shuyashun. Shinallata Jehová Diosta para siempre adorana oportunidadtapashmi charipashun (Prov. 10:22). Jehová Diosca paipa sirvijcuna llaquicunapi cajpi ayudangapaca listomi can. Caicunata yachanami ñucanchicunataca cunanbillata tranquilo sintirichun ayudashca (Is. 41:9, 10). Shinaca ashtaca cosascunamandami Jehová Diosta adorashpaca cushilla caita ushapashcanchi. Jehová Dios tucuita rurashcamandami paitalla adorana capashcanchi (Apoc. 4:11).