1-2. Таро со зависинела дали о Јехова ка прифатинел амаро обожавибе?

 КО СО мислинеа кеда шунеа кај некој обожавинела е Јехова? Шај авела туке ки годи јекх понизно пхрал кова со ко кочака молинела пе таро вило е Јеховаске англедер те совел. Или шај авела туке ки годи јекх бахтали фамилија која со уживинела икерена пли Фамилијарно рат.

² Ко солдуј примерија керена пе буќа коленцар со обожавинела пе е Јехова. Дали о Јехова ка прифатинел ленгоро обожавибе? Оја, ако тане ко склад лескере намераја хем керена адава соске мангена ле хем поштујнена ле. Амен бут мангаја е Јехова. Џанаја кај заслужинела те обожавина ле хем мангаја те кера адава ко најшукар начин.

3. Со ка дикха ки акаја статија?

³ Ки акаја статија ка дикха саво обожавибе сине прифатливо е Јеховаске ко пурано време хем ка дикха офто начинија сар о Јехова мангела те обожавина ле авдиве. Џикоте кераја адава, шај те размислина сар шај панда пошукар те служина е Јеховаске. Исто аѓаар, ка дикха соске о чачутно обожавибе керела амен бахтале.

4. Сар несаве верна мануша таро пурано време сикавѓе кај поштујнена хем мангена е Јехова?

⁴ Верна мануша таро пурано време сар на пример о Авел, о Ное, о Авраам хем о Јов сикавѓе кај поштујнена  хем мангена е Јехова. Сар? Аѓаар со сине послушна е Јеховаске, сине лен вера хем денѓе леске жртве. И Библија на вакерела аменге са со ваљани сине те керен. Ама јекх тано сигурно, ола денѓе пестар са те шај те славинен е Јехова хем адалеске ленгоро обожавибе сине прифатливо леске. Покасно о Јехова денѓа е Израелцонге е Мојсеескоро закони. Ко акава закони сине денде конкретна упатствија башо адава сар те обожавинел пе е Јехова ко прифатливо начин.

5. Откеда муло о Исус хем воскреснинѓа, со очекујнела сине о Јехова таро пле слуге?

⁵ Пало е Исусескоро мерибе хем воскресение, о Јехова на родела сине више таро мануша те икерен пе ко е Мојсеескоро закони (Рим. 10:4). О христијања ваљани сине те икерен пе ко нево закони „е Христосескоро закони“ (Гал. 6:2). Те шај те сикавен кај тане послушна акале законеске, ола на ваљани сине те икерен несаво баро списако правилонцар, него ваљани сине те џан пало е Исусескоро пример хем те овен послушна ко лескере сикљојба. Авдиве да, о христијања дена пестар са те џан пало Христос те шај те керен е Јеховаскири волја хем те „добинен неви сила“ (Мат. 11:29).

6. Сар шај те користинел аменге акаја статија?

⁶ Џикоте кераја лафи баши секоја бути сој поврзими амаре обожавибаја, шај те пуча амен: „Дали напредујнѓум ко акава поглед?“ Шај исто аѓаар те пуча амен: „Дали шај те подобринав ман ко начин сар обожавинава е Јехова?“ Шај те ове бахтало адалеа со више кереа, ама шукар ка овел те молине е Јехова те поможинел туке те дикхе со шај те кере панда пошукар.

7. Сар дикхела о Јехова ко амаре молитве со авена таро вило?

⁷ Обожавинаја е Јехова кеда молинаја амен леске. И Библија спорединела амаре молитве темјанеа кова со ваљани сине шукар те спреминел пе хем те тхарел пе ко свето шатори хем покасно ко храми (Пс. 141:2). Адава темјани мукхела сине јекх бут шужо мирис кова со сине угодно е Јеховаске, слично амаре молитве со авена таро вило тане „угодна“ леске чак кеда користинаја едноставна лафија (Изр. 15:8; 5. Мој. 33:10). Шај те ова аменге сигурна кај о Јехова мангела те шунел амаре молитве коленцар со сикаваја кај мангаја ле хем сием благодарна леске. Ов бут мангела те џанел башо со секиринаја амен, башо со надинаја амен хем амаре желбе. Англедер те молина амен е Јеховаске ваљани шукар те размислина башо адава со мангаја те вакера леске, ако кераја адава ка тхара о најшукар темјани амаре небесно Дадеске.

8. Ко кола прилике шај те фалина е Девле?

⁸ Обожавинаја е Јехова кеда фалинаја ле (Пс. 34:1). Амен фалинаја е Јехова аѓаар со вакераја е јаверенге башо лескере шуже особине хем башо адава со керѓа. О пофалбе авена таро јекх благодарно вило. Кеда размислинаја башо са о буќа со керѓа лен аменге о Јехова, иси амен бут причине те фалина ле. Кеда проповединаја, иси амен и прилика те да е Девлеске жртва колаја со фалинаја ле, или јавере лафенцар „плоди таро амаро муј“ (Евр. 13:15). Исто сар со ваљани шукар те размислина со ка вакера англедер те молина амен е Јеховаске, ваљани шукар те размислина со ка вакера околенге каске  со проповединаја. Мангаја те да амаро најшукар кеда фалинаја е Девле. Адалеске, кеда проповединаја, ваљани те кера лафи таро вило.

9. Слично сар о Израелција таро пурано време, сави корист иси амен кеда сием присутна ко состанокија? Вакер тло пример.

⁹ Обожавинаја е Јехова кеда сием присутна ко состанокија. Е Израелцонге таро пурано време сине вакердо: „Трин пути ко берш нека авен са о мурша англо Јехова, тумаро Девел, ко тхан кова со ов ка биринел“ (5. Мој. 16:16). Ола ваљани сине те мукхен пумаре кхера хем пумаре ниве бизо некој те заштитинел лен. О Јехова ветинѓа ленге: „Никој нане те мангел те лел тли пхув џикоте ка икљове трин пути ко берш англо Јехова, тло Девел“ (2. Мој. 34:24). Адалеске со е Израелцон сине лен целосно доверба ко Јехова, ола џана сине ко адала празникија хем сине лен бари корист таро адава. На пример, сиклиле повише башо е Јеховаскоро закони, размислинѓе кобор шукар сине о Јехова ленцар хем уживинѓе те овен заедно околенцар кола со исто аѓаар мангена сине е Јехова (5. Мој. 16:15). Аменде да ка овел амен корист ако кераја жртве те шај те ова присутна ко амаре состанокија. О Јехова тано бахтало кеда спреминаја амен те да кратка хем смисловна коментарија.

10. Соске о гиљајбе тано јекх важно дело таро амаро обожавибе?

¹⁰ Обожавинаја е Јехова кеда гиљаваја ко состанокија (Пс. 28:7). О Израелција дикхена сине ко гиљајбе сар важно дело таро обожавибе. О цари о Давид биринѓа 288 левитен те шај те овен пеачија ко храми (1. Лет. 25:1, 6-8). Јекх начин сар шај авдиве те сикава амаро мангипе е Јеховаске тано кеда гиљаваја фалбена гиља. Амен на ваљани те ова пеачија те шај те кера адава. Размислин башо акава: Кеда кераја лафи „бут пути грешинаја“, ама адава на чхинавела амен те кера лафи ко состанокија или ки служба (Јак. 3:2). Слично, амен шај те фалина е Јехова гиленцар, чак ако мислинаја кај на гиљаваја шукар.

11. Сар со пишинела ко Псалм 48:13, соске ваљани те одвојна време те проучина и Библија сар фамилија?

¹¹ Обожавинаја е Јехова кеда проучинаја лескоро Лафи хем сикаваја амаре чхавен баши лесте. Ко сабат, о Израелција на керена сине бути хем користинена сине адава диве те овен попаше е Јеховаја (2. Мој. 31:16, 17). Окола со сине верна сикавена сине пумаре чхавен башо Јехова хем башо шукарипе со керѓа. Авдиве да ваљани те одвојна аменге време те шај те читина хем те проучина е Девлескоро Лафи. Адава тано дело таро амаро обожавибе хем поможинела аменге те ова попаше е Јеховаја (Пс. 73:28). Хем ако проучинаја заедно сар фамилија, шај те поможина амаре чхавенге те развинен јекх шукар амалипе амаре небесно Дадеа кова со бут мангела амен. (Читин Псалм 48:13.)

12. Сар дикхља о Јехова ко окола со керѓе о свето шатори, хем со шај те сикљова таро адава?

¹² Обожавинаја е Јехова кеда градинаја хем одржинаја о тхана коте со обожавинаја ле. И Библија вакерела кај о керибе о свето шатори хем о буќа со наместинѓе андре ко шатори сине свето служба (2. Мој. 36:1, 4). О Јехова авдиве да дикхела сар свето служба кеда градинена пе дворане хем теократска објектија. Несаве пхраља хем пхења накхавена бут време ко акала активностија. Амен бут ценинаја ленгоро трудо ки акаја важно бути со керена ла башо Царство. Хем џанѓола пе, ола исто аѓаар проповединена. Несаве лендар мангена  чак те овен пионерија. О старешине шај те сикавен кај поддржинена и изградба ако мукхена акала пхраља хем пхења те овен пионерија ако исполнинена са о условија. Бизи разлика дали шај те учествујна ки изградба или на, сарине амен шај те да амаро дело аѓаар со ка икера чиста о објектија хем ка одржина лен.

13. Сар ваљани те дикха ко прилог кова со даја ле те шај те поддржина о Царство?

¹³ Обожавинаја е Јехова кеда амаре прилогонцар поддржинаја о активностија башо Царство. Кеда о Израелција славинена сине о празникија ола на смејнена сине те авен англо Јехова чуче вастенцар (5. Мој. 16:16). Ваљани сине те анен поклон спрема пумаре околностија. Аѓаар шај сине те сикавен пумари благодарност е Јеховаске. Сар шај те сикава кај мангаја е Јехова хем кај ценинаја са со керела баши аменге? Јекх начин сар шај те кера адава тано ако даја прилогија ко амаро собрание хем башо амаре активностија со керена пе ко цело свето. Башо дејбе прилогија о апостол Павле вакерѓа: „Ако некој дела таро вило, адава тано прифатливо е Девлеске. Секастар аџикерела пе те дел адава со иси ле, а на адава со нане ле“ (2. Кор. 8:4, 12). О Јехова ценинела секова прилог со даја ле таро вило, чак ако тано бут тикно (Мар. 12:42-44; 2. Кор. 9:7).

14. Спрема Изреки 19:17, сар дикхела о Јехова ко адава со поможинаја амаре пхраленге кеда ваљани ленге помош?

¹⁴ Обожавинаја е Јехова кеда поможинаја амаре пхраленге коленге со ваљани помош. О Јехова денѓа лафи кај ка дел берекети е Израелцонге со поможинѓе е чороленге (5. Мој. 15:7, 10). Секова пути кеда кераја шукарипе е пхралеске каске со ваљани помош, о Јехова дикхела ко адава сар ка пхене леске кераја ле адава. (Читин Изреки 19:17.) На пример, кеда о христијања таро Филипи денѓе поклон е Павлеске кеда сине пханло, ов дикхља ко адава сар прифатливо жртва хем сар нешто сој пријатно е Девлеске (Фил. 4:18). Размислин башо пхраља хем пхења таро тло собрание хем пуч тут: Дали ваљанела некаске помош? О Јехова тано бахтало кеда дикхела кај користинаја амаро време, сила, вештине хем материјална буќа те шај те поможина околенге каске со ваљани помош. Ов дикхела ко адава сар дело таро амаро обожавибе (Јак. 1:27).

15. Соске о чачутно обожавибе нане аменге пхаро, иако родела амендар време хем труд?

¹⁵ О чачутно обожавибе родела време хем трудо. Ама нане пхаро те керел пе адава (1. Јов. 5:3). Соске амен обожавинаја е Јехова адалеске со мангаја ле. Замислин туке јекхе чхаве со мангела те дел нешто пле дадеске. Шај саатенцар цртинела леске јекх слика. О чхаво на жалинела о време со трошинѓа. Ов мангела пле даде, хем адалеске тано бахтало те дел ле о поклон. Слично, адалеске со мангаја е Јехова, амен сием бахтале со шај те користина амаро време хем сила те шај те служина леске.

16. Спрема Евреите 6:10, сар дикхела о Јехова ко адава со секова јекх амендар керела те шај те служинел леске?

¹⁶ О родителија на очекујнена те добинен о исто поклон таро секова јекх чхаво. Ола џанена кај секова јекх чхаво тано различно хем кај иси ле различна способностија. Слично, амаро небесно Дад хаљола кај нашти секова јекх о исто те керел. Шај кереа ки служба повише него о јавера.  Или палем шај нашти те кере добором кобор о јавера со керена соске сиан попхуро, иси тут проблемија састипаја или фамилијарна одговорностија. Ма обесхрабрин тут (Гал. 6:4). О Јехова нане те бистрел адава со ту кереа. Ов тано бахтало са џикоте ту деа тло најшукар хем кереа адава таро исправна причине. (Читин Евреите 6:10.) О Јехова дикхела со иси тут ко вило хем џанела со би мангеа те кере. Ов мангела те ове бахтало хем задоволно адалеа со шај те кере леске.

17. а) Со шај те кера ако приметинаја кај несаве буќа ко амаро обожавибе тане аменге пхаре те кера лен? б) Сар поможинѓа туке и рамка „ Ов побахтало“?

¹⁷ Со ако аменге пхаро те кера несаве буќа баши коленге со керѓем лафи, сар сој те проучинел пе и Библија или те џал пе ки служба? Со почесто кераја акала буќа добором повише ка уживина ки ленде хем ка овел амен побари корист лендар. Амаро обожавибе шај те споредина ле вежбибаја јекх инструменти. Ако на вежбинаја редовно нане бут те подобрина амен. Ама со ка овел ако одлучинаја секова диве те вежбина? Ко почеток шај ка вежбина само некобор минутија, ама пало адава ка вежбина повише време. Кеда ка дикха о шукар резултатија таро амаро трудо, едвај ка аџикера палем те вежбина хем тегани чаче ка уживина ко адава. О исто важинела башо буќа сој тане дело таро амаро обожавибе.

18. Сој тани и најважно бути со шај те кера ла, хем со ка овел ако кераја адава?

¹⁸ Кеда даја амаро најшукар те шај те обожавина е Јехова тегани кераја и најважно бути која со шај те кера ла. Адалеске уживинаја хем сием бахтале, иси амен смисла ко живото хем иси амен и надеж кај вечно ка обожавина е Јехова (Изр. 10:22). Исто аѓаар, иси амен андруно мир соске џанаја кај о Јехова поможинела пле слугенге кеда иси лен проблемија (Иса. 41:9, 10). Амен иси амен бут причине те ова бахтале кеда обожавинаја амаре мангле Даде кова со заслужинела сарине те славинен ле хем те сикавен леске чест (Отк. 4:11).