1-2. Taro so zavisinela dali o Jehova ka prifatinel amaro obožavibe?

 KO SO mislinea keda šunea kaj nekoj obožavinela e Jehova? Šaj avela tuke ki godi jekh ponizno phral kova so ko kočaka molinela pe taro vilo e Jehovaske angleder te sovel. Ili šaj avela tuke ki godi jekh bahtali familija koja so uživinela ikerena pli Familijarno rat.

² Ko solduj primerija kerena pe bukja kolencar so obožavinela pe e Jehova. Dali o Jehova ka prifatinel lengoro obožavibe? Oja, ako tane ko sklad leskere nameraja hem kerena adava soske mangena le hem poštujnena le. Amen but mangaja e Jehova. Džanaja kaj zaslužinela te obožavina le hem mangaja te kera adava ko najšukar način.

3. So ka dikha ki akaja statija?

³ Ki akaja statija ka dikha savo obožavibe sine prifatlivo e Jehovaske ko purano vreme hem ka dikha ofto načinija sar o Jehova mangela te obožavina le avdive. Džikote keraja adava, šaj te razmislina sar šaj panda pošukar te služina e Jehovaske. Isto agjaar, ka dikha soske o čačutno obožavibe kerela amen bahtale.

4. Sar nesave verna manuša taro purano vreme sikavgje kaj poštujnena hem mangena e Jehova?

⁴ Verna manuša taro purano vreme sar na primer o Avel, o Noe, o Avraam hem o Jov sikavgje kaj poštujnena  hem mangena e Jehova. Sar? Agjaar so sine poslušna e Jehovaske, sine len vera hem dengje leske žrtve. I Biblija na vakerela amenge sa so valjani sine te keren. Ama jekh tano sigurno, ola dengje pestar sa te šaj te slavinen e Jehova hem adaleske lengoro obožavibe sine prifatlivo leske. Pokasno o Jehova dengja e Izraelconge e Mojseeskoro zakoni. Ko akava zakoni sine dende konkretna upatstvija bašo adava sar te obožavinel pe e Jehova ko prifatlivo način.

5. Otkeda mulo o Isus hem voskresningja, so očekujnela sine o Jehova taro ple sluge?

⁵ Palo e Isuseskoro meribe hem voskresenie, o Jehova na rodela sine više taro manuša te ikeren pe ko e Mojseeskoro zakoni (Rim. 10:4). O hristijanja valjani sine te ikeren pe ko nevo zakoni „e Hristoseskoro zakoni“ (Gal. 6:2). Te šaj te sikaven kaj tane poslušna akale zakoneske, ola na valjani sine te ikeren nesavo baro spisako praviloncar, nego valjani sine te džan palo e Isuseskoro primer hem te oven poslušna ko leskere sikljojba. Avdive da, o hristijanja dena pestar sa te džan palo Hristos te šaj te keren e Jehovaskiri volja hem te „dobinen nevi sila“ (Mat. 11:29).

6. Sar šaj te koristinel amenge akaja statija?

⁶ Džikote keraja lafi baši sekoja buti soj povrzimi amare obožavibaja, šaj te puča amen: „Dali napredujngjum ko akava pogled?“ Šaj isto agjaar te puča amen: „Dali šaj te podobrinav man ko način sar obožavinava e Jehova?“ Šaj te ove bahtalo adalea so više kerea, ama šukar ka ovel te moline e Jehova te pomožinel tuke te dikhe so šaj te kere panda pošukar.

7. Sar dikhela o Jehova ko amare molitve so avena taro vilo?

⁷ Obožavinaja e Jehova keda molinaja amen leske. I Biblija sporedinela amare molitve temjanea kova so valjani sine šukar te spreminel pe hem te tharel pe ko sveto šatori hem pokasno ko hrami (Ps. 141:2). Adava temjani mukhela sine jekh but šužo miris kova so sine ugodno e Jehovaske, slično amare molitve so avena taro vilo tane „ugodna“ leske čak keda koristinaja ednostavna lafija (Izr. 15:8; 5. Moj. 33:10). Šaj te ova amenge sigurna kaj o Jehova mangela te šunel amare molitve kolencar so sikavaja kaj mangaja le hem siem blagodarna leske. Ov but mangela te džanel bašo so sekirinaja amen, bašo so nadinaja amen hem amare želbe. Angleder te molina amen e Jehovaske valjani šukar te razmislina bašo adava so mangaja te vakera leske, ako keraja adava ka thara o najšukar temjani amare nebesno Dadeske.

8. Ko kola prilike šaj te falina e Devle?

⁸ Obožavinaja e Jehova keda falinaja le (Ps. 34:1). Amen falinaja e Jehova agjaar so vakeraja e javerenge bašo leskere šuže osobine hem bašo adava so kergja. O pofalbe avena taro jekh blagodarno vilo. Keda razmislinaja bašo sa o bukja so kergja len amenge o Jehova, isi amen but pričine te falina le. Keda propovedinaja, isi amen i prilika te da e Devleske žrtva kolaja so falinaja le, ili javere lafencar „plodi taro amaro muj“ (Evr. 13:15). Isto sar so valjani šukar te razmislina so ka vakera angleder te molina amen e Jehovaske, valjani šukar te razmislina so ka vakera okolenge kaske  so propovedinaja. Mangaja te da amaro najšukar keda falinaja e Devle. Adaleske, keda propovedinaja, valjani te kera lafi taro vilo.

9. Slično sar o Izraelcija taro purano vreme, savi korist isi amen keda siem prisutna ko sostanokija? Vaker tlo primer.

⁹ Obožavinaja e Jehova keda siem prisutna ko sostanokija. E Izraelconge taro purano vreme sine vakerdo: „Trin puti ko berš neka aven sa o murša anglo Jehova, tumaro Devel, ko than kova so ov ka birinel“ (5. Moj. 16:16). Ola valjani sine te mukhen pumare khera hem pumare nive bizo nekoj te zaštitinel len. O Jehova vetingja lenge: „Nikoj nane te mangel te lel tli phuv džikote ka ikljove trin puti ko berš anglo Jehova, tlo Devel“ (2. Moj. 34:24). Adaleske so e Izraelcon sine len celosno doverba ko Jehova, ola džana sine ko adala praznikija hem sine len bari korist taro adava. Na primer, siklile poviše bašo e Jehovaskoro zakoni, razmislingje kobor šukar sine o Jehova lencar hem uživingje te oven zaedno okolencar kola so isto agjaar mangena sine e Jehova (5. Moj. 16:15). Amende da ka ovel amen korist ako keraja žrtve te šaj te ova prisutna ko amare sostanokija. O Jehova tano bahtalo keda spreminaja amen te da kratka hem smislovna komentarija.

10. Soske o giljajbe tano jekh važno delo taro amaro obožavibe?

¹⁰ Obožavinaja e Jehova keda giljavaja ko sostanokija (Ps. 28:7). O Izraelcija dikhena sine ko giljajbe sar važno delo taro obožavibe. O cari o David biringja 288 leviten te šaj te oven peačija ko hrami (1. Let. 25:1, 6-8). Jekh način sar šaj avdive te sikava amaro mangipe e Jehovaske tano keda giljavaja falbena gilja. Amen na valjani te ova peačija te šaj te kera adava. Razmislin bašo akava: Keda keraja lafi „but puti grešinaja“, ama adava na čhinavela amen te kera lafi ko sostanokija ili ki služba (Jak. 3:2). Slično, amen šaj te falina e Jehova gilencar, čak ako mislinaja kaj na giljavaja šukar.

11. Sar so pišinela ko Psalm 48:13, soske valjani te odvojna vreme te proučina i Biblija sar familija?

¹¹ Obožavinaja e Jehova keda proučinaja leskoro Lafi hem sikavaja amare čhaven baši leste. Ko sabat, o Izraelcija na kerena sine buti hem koristinena sine adava dive te oven popaše e Jehovaja (2. Moj. 31:16, 17). Okola so sine verna sikavena sine pumare čhaven bašo Jehova hem bašo šukaripe so kergja. Avdive da valjani te odvojna amenge vreme te šaj te čitina hem te proučina e Devleskoro Lafi. Adava tano delo taro amaro obožavibe hem pomožinela amenge te ova popaše e Jehovaja (Ps. 73:28). Hem ako proučinaja zaedno sar familija, šaj te pomožina amare čhavenge te razvinen jekh šukar amalipe amare nebesno Dadea kova so but mangela amen. (Čitin Psalm 48:13.)

12. Sar dikhlja o Jehova ko okola so kergje o sveto šatori, hem so šaj te sikljova taro adava?

¹² Obožavinaja e Jehova keda gradinaja hem održinaja o thana kote so obožavinaja le. I Biblija vakerela kaj o keribe o sveto šatori hem o bukja so namestingje andre ko šatori sine sveto služba (2. Moj. 36:1, 4). O Jehova avdive da dikhela sar sveto služba keda gradinena pe dvorane hem teokratska objektija. Nesave phralja hem phenja nakhavena but vreme ko akala aktivnostija. Amen but ceninaja lengoro trudo ki akaja važno buti so kerena la bašo Carstvo. Hem džangjola pe, ola isto agjaar propovedinena. Nesave lendar mangena  čak te oven pionerija. O starešine šaj te sikaven kaj poddržinena i izgradba ako mukhena akala phralja hem phenja te oven pionerija ako ispolninena sa o uslovija. Bizi razlika dali šaj te učestvujna ki izgradba ili na, sarine amen šaj te da amaro delo agjaar so ka ikera čista o objektija hem ka održina len.

13. Sar valjani te dikha ko prilog kova so daja le te šaj te poddržina o Carstvo?

¹³ Obožavinaja e Jehova keda amare prilogoncar poddržinaja o aktivnostija bašo Carstvo. Keda o Izraelcija slavinena sine o praznikija ola na smejnena sine te aven anglo Jehova čuče vastencar (5. Moj. 16:16). Valjani sine te anen poklon sprema pumare okolnostija. Agjaar šaj sine te sikaven pumari blagodarnost e Jehovaske. Sar šaj te sikava kaj mangaja e Jehova hem kaj ceninaja sa so kerela baši amenge? Jekh način sar šaj te kera adava tano ako daja prilogija ko amaro sobranie hem bašo amare aktivnostija so kerena pe ko celo sveto. Bašo dejbe prilogija o apostol Pavle vakergja: „Ako nekoj dela taro vilo, adava tano prifatlivo e Devleske. Sekastar adžikerela pe te del adava so isi le, a na adava so nane le“ (2. Kor. 8:4, 12). O Jehova ceninela sekova prilog so daja le taro vilo, čak ako tano but tikno (Mar. 12:42-44; 2. Kor. 9:7).

14. Sprema Izreki 19:17, sar dikhela o Jehova ko adava so pomožinaja amare phralenge keda valjani lenge pomoš?

¹⁴ Obožavinaja e Jehova keda pomožinaja amare phralenge kolenge so valjani pomoš. O Jehova dengja lafi kaj ka del bereketi e Izraelconge so pomožingje e čorolenge (5. Moj. 15:7, 10). Sekova puti keda keraja šukaripe e phraleske kaske so valjani pomoš, o Jehova dikhela ko adava sar ka phene leske keraja le adava. (Čitin Izreki 19:17.) Na primer, keda o hristijanja taro Filipi dengje poklon e Pavleske keda sine phanlo, ov dikhlja ko adava sar prifatlivo žrtva hem sar nešto soj prijatno e Devleske (Fil. 4:18). Razmislin bašo phralja hem phenja taro tlo sobranie hem puč tut: Dali valjanela nekaske pomoš? O Jehova tano bahtalo keda dikhela kaj koristinaja amaro vreme, sila, veštine hem materijalna bukja te šaj te pomožina okolenge kaske so valjani pomoš. Ov dikhela ko adava sar delo taro amaro obožavibe (Jak. 1:27).

15. Soske o čačutno obožavibe nane amenge pharo, iako rodela amendar vreme hem trud?

¹⁵ O čačutno obožavibe rodela vreme hem trudo. Ama nane pharo te kerel pe adava (1. Jov. 5:3). Soske amen obožavinaja e Jehova adaleske so mangaja le. Zamislin tuke jekhe čhave so mangela te del nešto ple dadeske. Šaj saatencar crtinela leske jekh slika. O čhavo na žalinela o vreme so trošingja. Ov mangela ple dade, hem adaleske tano bahtalo te del le o poklon. Slično, adaleske so mangaja e Jehova, amen siem bahtale so šaj te koristina amaro vreme hem sila te šaj te služina leske.

16. Sprema Evreite 6:10, sar dikhela o Jehova ko adava so sekova jekh amendar kerela te šaj te služinel leske?

¹⁶ O roditelija na očekujnena te dobinen o isto poklon taro sekova jekh čhavo. Ola džanena kaj sekova jekh čhavo tano različno hem kaj isi le različna sposobnostija. Slično, amaro nebesno Dad haljola kaj našti sekova jekh o isto te kerel. Šaj kerea ki služba poviše nego o javera.  Ili palem šaj našti te kere doborom kobor o javera so kerena soske sian pophuro, isi tut problemija sastipaja ili familijarna odgovornostija. Ma obeshrabrin tut (Gal. 6:4). O Jehova nane te bistrel adava so tu kerea. Ov tano bahtalo sa džikote tu dea tlo najšukar hem kerea adava taro ispravna pričine. (Čitin Evreite 6:10.) O Jehova dikhela so isi tut ko vilo hem džanela so bi mangea te kere. Ov mangela te ove bahtalo hem zadovolno adalea so šaj te kere leske.

17. a) So šaj te kera ako primetinaja kaj nesave bukja ko amaro obožavibe tane amenge phare te kera len? b) Sar pomožingja tuke i ramka „ Ov pobahtalo“?

¹⁷ So ako amenge pharo te kera nesave bukja baši kolenge so kergjem lafi, sar soj te proučinel pe i Biblija ili te džal pe ki služba? So počesto keraja akala bukja doborom poviše ka uživina ki lende hem ka ovel amen pobari korist lendar. Amaro obožavibe šaj te sporedina le vežbibaja jekh instrumenti. Ako na vežbinaja redovno nane but te podobrina amen. Ama so ka ovel ako odlučinaja sekova dive te vežbina? Ko početok šaj ka vežbina samo nekobor minutija, ama palo adava ka vežbina poviše vreme. Keda ka dikha o šukar rezultatija taro amaro trudo, edvaj ka adžikera palem te vežbina hem tegani čače ka uživina ko adava. O isto važinela bašo bukja soj tane delo taro amaro obožavibe.

18. Soj tani i najvažno buti so šaj te kera la, hem so ka ovel ako keraja adava?

¹⁸ Keda daja amaro najšukar te šaj te obožavina e Jehova tegani keraja i najvažno buti koja so šaj te kera la. Adaleske uživinaja hem siem bahtale, isi amen smisla ko životo hem isi amen i nadež kaj večno ka obožavina e Jehova (Izr. 10:22). Isto agjaar, isi amen andruno mir soske džanaja kaj o Jehova pomožinela ple slugenge keda isi len problemija (Isa. 41:9, 10). Amen isi amen but pričine te ova bahtale keda obožavinaja amare mangle Dade kova so zaslužinela sarine te slavinen le hem te sikaven leske čest (Otk. 4:11).