1, 2. Σαρ κα κερέλ ι Ντεβλέσκο γκι αμαρί λατρεία;

 ΣΟ ΑΒΕΛΑ τουμαρέ γκοντιάτε κάνα ασουνένα ο λάφι «λατρεία»; Μπέκιμ σκεφτίνενα εκχέ ταπεινέ πφραλές σο πελό κοτσίντζαρ πασέ πι κρεβατίστε ντα πουτρέλα πο γκι κο Ιεχωβά αντράλ κατά προσευχή. Ή μπέκιμ αβέλα τουμαρέ γκοντιάτε εκ ευτυχισμέ φαμιλί σο σικλιαρέλα-πες χαράσαρ αντράλ κατά Γραφή.

² Εμ οντουβά πφραλ εμ οντιά φαμιλί ντένα λατρεία ι Ιεχωβάς οντουλέντζαρ σο κερένα. Κερέλα ι Ιεχωβάσκο γκι λένγκι λατρεία; Βα, άμα ντιντιόλα μανγκιμάσαρ ντα με σεβασμός ντα άμα να τζάλα κόντρα λέσκε σκοπόσαρ. Μανγκάσα ι Ιεχωβάς μπουτ. Τζανάσα ότι αξίνελα αμαρί λατρεία ντα μανγκάσα ανταγιά λατρεία τι αβέλ καζόμ πο λατσσί αβέλα-πες.

3. Σο κα ντικχάς ανταλέ μαθημάστε;

³ Ανταλέ μαθημάστε, κα ντας-αμέν γκοντί καγιά λατρεία κερέλας ι Ιεχωβάσκο γκι κο πουρανέ μπρεσά ντα καλέ οχτώ πραγματέντζαρ ντάσα-λες λατρεία αντιβές. Καζόμ κα ντικχάς-λεν ανταλά, κα αβέλας λατσσό τι σκεφτίνας σαρ τι κεράς αμαρί λατρεία ατζέ πο λατσσί. Ντα κα βακεράς σόσκε η αληθινή λατρεία κερέλα-αμέν ευτυχισμέ.

4. Σαρ σικαβένας ο υπηρέτες ι Ιεχωβάσκε πουμαρό σεβασμός ντα πουμαρό μανγκιπέ λέσκε πριν τι αβέλ ο Χριστός κι πφουβ;

⁴ Πριν τι αβέλ ο Χριστός κι πφουβ, πιστά μουρσά σαρ ο Άβελ, ο Νώε, ο Αβραάμ ντα ο Ιώβ σικαβένας πουμαρό σεβασμός ντα πουμαρό μανγκιπέ ι Ιεχωβάσκε. Σαρ; Ντένας καν ι  Ντεβλές, πακιάνας λέστε ντα κερένας θυσίες λέσκε. Η Γραφή να βακερέλα σαρέ οντουλά σο έπρεπε τι κερέν οντουλά τζενέ για τι ντένας-λες λατρεία. Αλλά σικαβέλα μπουτ λατσσές ότι κερένας σο νακχέλας λένγκε βαστένταρ για τι σικαβέν σεβασμός ι Ιεχωβάσκε, ντα αντικάς λένγκι λατρεία κερέλας λέσκο γκι. Πο σοράν, ο Ιεχωβά ντινάς ο Μωσαϊκός Νόμος κο προσάγγονα κι Αβρααμίσκε. Ανταβά Νόμος τθερέλας συγκεκριμέ οδηγίες σο σικαβένας σαρ τι ντιντιόλας λατρεία κο Ιεχωβά αντικάς σαρ μανγκέλας βοβ.

5. Σαρ μανγκέλας ο Ιεχωβά τι ντεν-λες λατρεία ο τζενέ σοράν κατά μεριπέ ντα κατά ανάσταση ι Ιησούσκι;

⁵ Σοράν κατά μεριπέ ντα κατά ανάσταση ι Ιησούσκι, ο Ιεχωβά τσσιναντάς τι μανγκέλ κατά τζενέ τι ντεν καν κο Μωσαϊκός Νόμος. (Ρωμ. 10:4) Ο Χριστιανοί έπρεπε τι ντένας καν εκχέ νεβέ νομόστε, “κο νόμος κι Χριστόσκο”. (Γαλ. 6:2) Για τι κερένας-λες ανταβά, να χρειαζίντιβελας τι σικλιόνας-λες αβριάλ ή τι τθερένας αζόμ μπουτ εντολές, αλλά χρειαζίντιβελας τι μοιάζεν κο Ιησούς ντα τι κερέν οντουλά σο σικλιαρντάας. Αντιβές-ντα, ο Χριστιανοί κερένα ο πο λατσσό για τι τζαν παλάλ κο Χριστός. Αντικάς, κερένα ι Ιεχωβάσκο γκι ντα “λοκχιόνα”.​—Ματθ. 11:29.

6. Σαρ κα ντικχάς λατσσιπέ ανταλέ μαθημάσταρ;

⁶ Καζόμ κα ντικχάς ο οχτώ πράγματα σο κεράσα για τι ντας λατρεία, ισί λατσσό τι πουτσάς-αμέν: “Σαρ ισί μιρί λατρεία; Μπορίναβα τι κεράβ-λα πο λατσσί;” Μπορίνασα τι χαιρίνας άμα αμαρί λατρεία ισί λατσσί ακανά, αλλά πρέπει τι σκεφτίνας με προσευχή σο χρειαζίντιβελα για τι κεράς-λα ατζέ πο λατσσί.

7. Σαρ ντικχέλα ο Ιεχωβά ο προσευχές σο νικιόνα αμαρέ γκίσταρ;

⁷ Ντάσα λατρεία ι Ιεχωβάς κάνα προσευχίντιβασα λέστε. Η Γραφή μοιασκιαρέλα αμαρέ προσευχές κο θυμίαμας σο ετοιμάντιβελας μπουτ προσεκτικά ντα ντιντιόλας κι σκηνή της μαρτυρίας ντα πο σοράν κο ναός. (Ψαλμ. 141:2) Οντουβά θυμίαμας κχάντελας μίσκι ντα κερέλας ι Ντεβλέσκο γκι. Αντικάς αμαρέ προσευχές-ντα σο νικιόνα αμαρέ γκίσταρ “κερένα Λέσκο γκι” ατζέ-ντα άμα ο λάφια σο βακεράσα ισί μπουτ απλά. (Παρ. 15:8· Δευτ. 33:​10) Τθεράσα σημαντικούς λόγους τι πακιάς ότι ο Ιεχωβά μπεϊντίνελα μπουτ τι ασουνέλ καζόμ μπουτ μανγκάσα-λες ντα εκτιμίνασα-λες. Μανγκέλα τι βακεράς λέσκε αμαρέ προβληματένγκε, ι λατσσέ πραγματένγκε σο μπεκλεντίνασα ντα οντουλένγκε σο μανγκάσα. Πριν τι κερέν προσευχή, σκεφτίνεν λατσσές σο μανγκένα τι βακερέν. Αντικάς, κα ντεν τουμαρέ Νταντέστε, κο Ιεχωβά, ο πο λατσσό «θυμίαμας» σο αβέλα-πες.

8. Καγιά μπαρί ευκαιρία τθεράσα για τι δοξάνας ι Ντεβλές;

⁸ Ντάσα λατρεία ι Ιεχωβάς κάνα δοξάνασα-λες. (Ψαλμ. 34:1) Δοξάνασα ι Ιεχωβάς κάνα βακεράσα κο γιαβερά καζόμ μπουτ εκτιμίνασα λέσκε σουκάρ ιδιότητες ντα οντουλά σο κερέλα. Η δόξα σο ντάσα-λες αβέλα αντράλ αμαρέ γκίσταρ σο ισί πφερντό εκτίμηση. Κάνα ντάσα αμαρέ σαατίσταρ για τι σκεφτίνας καζόμ λατσσό ισί ο Ιεχωβά ντα σαρέ οντουλά πράγματα σο κερντάς αμένγκε, κα τθεράς πάντα λόγους τι δοξάνας-λες. Ο έργος ντέλα-αμέν εκ μπουτ μπαρί ευκαιρία τι ντας κο Ντεβέλ «θυσίες για τι δοξάνας-λες, ντα οντουλά θυσίες ισί ο καρπός αμαρέ βουστένγκο». (Εβρ. 13:​15) Τζανάσα ότι, πριν τι κεράς λάφι κο Ιεχωβά αντράλ κατά προσευχή, πρέπει τι σκεφτίνας λατσσές σο κα βακεράς. Αντικάς αβέλα-πες κάνα κεράσα έργος-ντα, πρέπει τι σκεφτίνας λατσσές σο κα βακεράς κο τζενέ. Μανγκάσα αμαρί “θυσία σο δοξάνελα ι Ντεβλές” τι αβέλ η πο λατσσί σο τθεράσα τι ντας. Κεράσα λάφι αντράλ αμαρέ γκίσταρ κάνα βακεράσα ι αλήθεια κο γιαβερά.

9. Σαρ ο Ισραηλίτες, σο λατσσιπέ ντικχάσα αμέν-ντα κατά συναθροίσεις; Βακερέν σο λατσσιπέ ντικχλέν τουμέν.

 ⁹ Ντάσα λατρεία ι Ιεχωβάς κάνα τζάσα κο συναθροίσεις. Κο Ισραηλίτες κι πουρανέ μπρεσένγκε βακέρντιλοας: «Τριν φαρ κο μπρες σαρέ ο μουρσά τι τθεμέσταρ πρέπει τι τζαν ανγκλάλ κο Ιεχωβά τι Ντεβλέστε κο τθαν σο κα τραμπίνελ βοβ». (Δευτ. 16:​16) Έπρεπε τι μουκχέν πουμαρέ κχερά ντα πουμαρέ χωράφια. Αλλά ο Ιεχωβά ντινάς-λεν πο λάφι: «Καέκ να κα μανγκέλ το τθεμ κάνα τούι κα νικλίς για τι ντικχές ο μούι ι Ιεχωβάσκο τι Ντεβλέσκο». (Έξοδ. 34:​24) Οντουλά Ισραηλίτες ντένας σαρί πουμαρί μπέσα κο Ιεχωβά, οτθάρ τζάνας κο γιορτές κάθε μπρες. Αντικάς ντικχένας μπουτ λατσσίματα: αγαβένας πο μπουτ ο Νόμος ι Ντεβλέσκο, σκεφτίνενας Λέσκο λατσσιπέ ντα λένας ζορ κατά παρέα σο κερένας ι γιαβερέ Ισραηλιτέντζαρ. (Δευτ. 16:​15) Αμέν-ντα ντικχάσα λατσσίματα κάνα μουκχάσα ο γιαβερά πράγματα για τι τζας κο συναθροίσεις. Ντα σκεφτίνεν καζόμ αβέλα ι Ιεχωβάσκο γκι κάνα τζάσα οτθέ έτοιμοι τι ντας χουρντέ απαντήσεις σο ντένα ζορ.

10. Σόσκε ισί ο γκιλιαϊπέ μπουτ σημαντικός για τι ντας λατρεία ι Ιεχωβάς;

¹⁰ Ντάσα λατρεία ι Ιεχωβάς κάνα γκιλιαβάσα ύμνοι. (Ψαλμ. 28:7) Ι Ισραηλιτένγκε, ο γκιλιαϊπέ ισινέ μπουτ σημαντικός για τι ντεν λατρεία ι Ιεχωβάς. Ο βασιλιάς Δαβίδ τσσουντάς 288 Λευιτέν για τι γκιλιαβέν κο ναός. (1 Χρον. 25:1, 6-8) Αντιβές, αμέν σικαβάσα αμαρό μανγκιπέ ι Ντεβλέσκε κάνα γκιλιαβάσα ύμνοι. Ο πο σημαντικός νανέ τι γκιλιαβάς λατσσές. Ντεν-τουμέν γκοντί ακαβά: «Σαρέ κεράσα λάθη» μπουτ φαρ αμαρέ λαφίντζαρ, αλλά ανταβά να τσσιναβέλα-αμέν τι κεράς λάφι κι κχανγκιρί ή κο έργος. (Ιακ. 3:2) Αντικάς-ντα άμα νταράσα ότι να ισινάμ λατσσέ κο γκιλιαϊπέ, δεν πρέπει τι τσσιναβάς τι γκιλιαβάς για τι δοξάνας ι Ιεχωβάς.

11. Σαρ βοηθίνελα-αμέν ο εδάφιος Ψαλμός 48:​13 τι αγαβάς ότι πρέπει τι αρακχάς σαάτι για τι σικλιαράς-αμέν κατά Γραφή σαρ φαμιλί;

¹¹ Ντάσα λατρεία ι Ιεχωβάς κάνα σικλιαράσα-αμέν λέσκε Λαφίσταρ ντα σικλιαράσα αμαρέ τσσαβέν Λέσκε. Κο Σάββατος, ο Ισραηλίτες τθερένας ι ευκαιρία τι μουκχέν πουμαρέ μπουτιά ντα τι κερέν πράγματα για τι αβέν πο πασέ κο Ιεχωβά. (Έξοδ. 31:​16, 17) Ο πιστοί Ισραηλίτες σικλιαρένας πουμαρέ τσσαβέν ι Ιεχωβάσκε ντα λέσκε λατσσιμάσκε. Ο κάθε εκ αμένταρ πρέπει τι αρακχέλ σαάτι για τι διαβάνελ ντα τι σικλιαρέλ-πες κατά Ντεβλέσκο Λάφι. Αντικάς, ντάσα λατρεία ι Ιεχωβάς ντα αβάσα πο πασέ λέστε. (Ψαλμ. 73:​28) Ντα κάνα σικλιαράσα-αμέν γιεκ σαρ φαμιλί, βοηθίνασα αμαρέ τσσαβέν τι αβέν βον-ντα λατσσέ αμαλά αμαρέ Νταντέσαρ, ι Ιεχωβάσαρ, σο μανγκέλα-αμέν μπουτ.​—Διαβάνεν Ψαλμός 48:13.

12. Σαρ ντικχέλας ο Ιεχωβά ο μπουτιά σο αβιλέ-πες για τι κερντιόλ η σκηνή της μαρτυρίας, ντα σο σικλιάσα ανταλέσταρ;

¹² Ντάσα λατρεία ι Ιεχωβάς κάνα λατσσαράσα ντα περιποιήνασα τθανά σο οτθέ ντιντιόλα λατρεία. Η Γραφή βακερέλα ότι η μπουτί σο αβιλί-πες για τι κερντιόλ η σκηνή της μαρτυρίας ντα ο πράγματα σο τθερένας τι κερέν λάσαρ ισινέ «άγια μπουτί». (Έξοδ. 36:1, 4) Αντιβές-ντα, ο Ιεχωβά ντικχέλα ι μπουτί σο αβέλα-πες για τι κερντιόν Αίθουσες Βασιλείας ντα γιαβερά τθανά σο ντάσα λατρεία σαρ άγια μπουτί. Ισί πφραλά ντα πφενιά σο ντένα μπουτ πουμαρέ σαατίσταρ ανταλέ μπουτιέντε. Εκτιμίνασα σαρέ οντουλά σο κερένα ι Βασιλειάκε. Οντουλά πφραλά ντα πφενιά κερένα ο έργος-ντα. Ντα μερικοί λένταρ μπέκιμ μανγκένα τι αβέν σκαπανείς. Ο πρεσβύτεροι κα σικαβέν ότι εκτιμίνενα ο μπουτιά σο αβένα-πες για τι κερντιόν τθανά σο ντάσα λατρεία άμα να κα σακιντίνεν τι κερέν σκαπανείς ανταλέ μπουτιαρνέ πφραλέν  ντα πφενίν. Είτε τζανάσα λατσσές τι λατσσαράς τθανά σο ντάσα λατρεία είτε να τζανάσα, σαρέ μπορίνασα τι κεράς ο πο λατσσό για τι ατσσικιαράς-λεν πάκι ντα περιποιημέ.

13. Σαρ πρέπει τι ντικχάς οντουλά σο ντάσα κο έργος κι Βασιλειάκο;

¹³ Ντάσα λατρεία ι Ιεχωβάς κάνα ντάσα αμαρέ λοβένταρ κο έργος κι Βασιλειάκο. Ο Ισραηλίτες δεν έπρεπε τι τζαν ανγκλάλ κο Ιεχωβά τσουτσέ βαστέντζαρ. (Δευτ. 16:​16) Έπρεπε τι ντεν κο Ιεχωβά οντουβά σο μπορίνενας. Αντικάς σικαβένας ότι εκτιμίνενας σαρέ οντουλά σο κερέλας ο Ιεχωβά λένγκε. Σαρ κα σικαβάς αμέν-ντα ότι μανγκάσα ι Ιεχωβάς ντα ότι εκτιμίνασα σαρέ οντουλά σο κερέλα αμένγκε; Κεράσα-λες ανταβά κάνα ντάσα καζόμ μπορίνασα αμαρέ κχανγκιριάκε ντα ι εργόσκε σο αβέλα-πες σαρό κο ντουνιάς. Ο απόστολος Παύλος βακερντάς: «Άμα κάποιος πρώτα μανγκέλα τι ντελ αντράλ πι γκίσταρ, ισί μπουτ λατσσό τι ντελ οντουλένταρ σο τθερέλα, ντα όχι οντουλένταρ σο να τθερέλα». (2 Κορ. 8:4, 12) Ι Ιεχωβάσκε, ισί μπουτ σημαντικός σο-ντα ντάσα αντράλ αμαρέ γκίσταρ ατζέ-ντα άμα ισί μπουτ χουρντό.​—Μάρκ. 12:​42-44· 2 Κορ. 9:7.

14. Σαρ ντικχέλα ο Ιεχωβά ι βοήθεια σο ντάσα αμαρέ πφραλέν σο τθερένα ανάγκη σαρ σικαβέλα ο εδάφιος Παροιμίες 19:17;

¹⁴ Ντάσα λατρεία ι Ιεχωβάς κάνα βοηθίνασα αμαρέ πφραλέν ντα πφενίν σο τθερένα ανάγκη. Ο Ιεχωβά ντινάς πο λάφι ότι κα ευλογίνελας ι Ισραηλιτέν σο σικαβένας λατσσιπέ κο τσορορέ. (Δευτ. 15:7, 10) Βα, κάθε φαρ σο βοηθίνασα εκχέ πφραλές ή εκχέ πφενιά σο τθερέλα ανάγκη, κι Ιεχωβάσκε γιακχά ισί σαρ τι κεράσα Λέσκε εκ δώρος. (Διαβάνεν Παροιμίες 19:​17) Για παράδειγμας, κάνα ο Χριστιανοί κο Φίλιπποι μπουτσσαντέ εκ δώρος ι Παυλόσκε σο ισινέ φυλακή, βοβ βακερντάς ότι ανταβά ισινέ σαρ εκ θυσία σο κερέλας ι Ντεβλέσκο γκι. (Φιλιπ. 4:​18) Ντικχέν ντονταλάι τουμαρέ κχανγκιριάτε ντα πουτσέν-τουμέν: “Ισί καέκ τζενό σο μπορίναβα τι βοηθίναβ;” Αβέλα ι Ιεχωβάσκο γκι κάνα ντικχέλα-αμέν τι ντας αμαρέ σαατίσταρ, αμαρέ ζοριάταρ, αμαρέ πραγματένταρ ντα τι κεράς σο μπορίνασα για τι βοηθίνας οντουλέν σο τθερένα ανάγκη. Λέσκε γιακχίντε, ανταβά ισί εκ τρόπος τι ντας-λες λατρεία.​—Ιακ. 1:27.

15. Παρόλο σο η αληθινή λατρεία λέλα αμένταρ σαάτι ντα ζορ, σόσκε νανέ πφαριπέ αμένγκε;

¹⁵ Η αληθινή λατρεία λέλα αμένταρ σαάτι ντα ζορ. Αλλά νανέ πφαριπέ αμένγκε. (1 Ιωάν. 5:3) Σόσκε; Σόσκε ο μανγκιπέ σο τθεράσα ι Ιεχωβάσκε τσσίντελα-αμέν τι ντας-λες λατρεία. Ανέν τουμαρέ γκοντιάτε εκχέ χουρντέ τσσαβές σο μανγκέλα τι κερέλ εκ δώρος πι νταντέσκε. Μπέκιμ ντέλα μπουτ πι σαατίσταρ για τι κερέλ πι νταντέσκε εκ ζωγραφιά. Αλλά κερέλα-λες πι γκίσαρ. Μανγκέλα πι νταντές, ντα χαιρίνελα σο ντέλα-λες ανταβά δώρος. Αντικάς αμέν-ντα, επειδή μανγκάσα ι Ιεχωβάς, χαιρίνασα τι ντας αμαρέ σαατίσταρ ντα αμαρέ ζοριάταρ κι αληθινή λατρεία.

16. Σαρ ντικχέλα ο Ιεχωβά οντουλά σο κεράσα για τι αβέλ λέσκο γκι σαρ βακερέλα ο εδάφιος Εβραίους 6:10;

¹⁶ Εκ λατσσό ντατ να μπεκλεντίνελα πι κάθε τσσαβέσταρ τι ντελ-λες ο ίδιος δώρος. Τζανέλα ότι κάθε τσσαβό ισί διαφορετικός ντα ότι ναστί κερένα σαρέ ο τσσαβέ ο ίδια πράγματα. Αντικάς αμαρό Ντατ-ντα, ο Ιεχωβά, αγαβέλα σο μπορίνελα τι κερέλ ο κάθε εκ αμένταρ. Μπέκιμ τουμέν τζανένα τι κερέν πο μπουτ πράγματα γιαβερέ τζενένταρ ή μπέκιμ ναστί κερένα οντουλά σο κερένα ο γιαβερά σόσκε ισινέν πφουρέ, νασφαλέ ή τθερένα φαμιλί. Μα χασαρέν τουμαρί ζορ. (Γαλ. 6:4) Ο Ιεχωβά να κα μπιστρέλ τουμαρό έργος. Άμα ο μανγκιπέ  σο τθερένα λέσκε κα τσσίντελ-τουμέν τι ντεν-λες ο πο λατσσό σο τθερένα, κα αβέλ λέσκο γκι. (Διαβάνεν Εβραίους 6:​10) Ο Ιεχωβά ντικχέλα τουμαρό γκι ντα αγαβέλα ατζέ-ντα οντουλά σο κα μανγκένας τι κερέν. Μανγκέλα τι νιωθίνεν σουκάρ ντα πφερντέ οντουλέντζαρ σο μπορίνενα τι κερέν για τι ντεν-λες λατρεία.

17. (α) Άμα ισί δύσκολος αμένγκε τι κεράς εκ πράγμας κι λατρεία κι Ιεχωβάσκι, σο μπορίνασα τι κεράς; (β) Σαρ βοηθιντάς-τουμέν κάτι οντουλένταρ σο κεράσα για τι ντας λατρεία σαρ σικάντιβελα κο πλαίσιος « Μπαριαρέν Τουμαρί Ευτυχία»;

¹⁷ Σο αβέλα-πες άμα ισί δύσκολος αμένγκε τι κεράς εκ οντουλέ πραγματένταρ σο ντικχλάμ, σαρ ισί τι σικλιαράς-αμέν κατά Γραφή ή τι τζας κο έργος; Καζόμ πο μπουτ κεράσα ανταλά πράγματα, αζόμ πο μπουτ κα μπεϊντίνας-λεν ντα αζόμ πο μπουτ λατσσιπέ κα ντικχάς λένταρ. Κα μπορίναας τι μοιασκιαράς αμαρί λατρεία οντουλέντζαρ σο κερέλα εκ τζενό για τι σικλιόλ κιθάρα. Άμα οντουβά τζενό κχελέλα κιθάρα σάντε κάνα αβέλα λέσκε γκοντιάτε, να κα σικλιόλ λατσσές. Αλλά σο κα αβέλας-πες άμα κα αρακχέλας σαάτι για τι κχελέλ κάθε ντιβές; Κι αρχή, μπέκιμ τι κχελέλ χάνικ σαάτι κάθε ντιβές, ντα καζόμ τζάλα, κα κχελέλ πο μπουτ. Καζόμ κα ντικχέλ ότι να μαρέλα-πες σινανέ αλλά ότι αβέλα πο λατσσό, κα μπεσέλ σαρ σαρ τι αβέλ ο σαάτι τι κχελέλ κιθάρα ντα κα μπεϊντίνελ-λες μπαγιά. Αγαβάσα σαρ μπορίνασα τι κεράς-λες ανταβά για τι ντας πο λατσσές λατρεία ι Ιεχωβάς;

18. Σο ισινάμ κερντέ τι κεράς, ντα σο αβέλα-πες κάνα κεράσα-λες;

¹⁸ Ισινάμ κερντέ τι ντας λατρεία ι Ιεχωβάς σαρέ αμαρέ γκίσαρ. Κάνα κεράσα-λες ανταβά, αμαρί ζωή ισί πφερντί ντα ευτυχισμέ ντα τθεράσα ι ελπίδα τι ντας λατρεία ι Ιεχωβάς για πάντα. (Παρ. 10:​22) Τθεράσα από ακανά ειρήνη αμαρέ γκοντιάτε σόσκε τζανάσα ότι ο Ιεχωβά βοηθίνελα πι υπηρετόν κάνα νακχένα προβλήματα. (Ησ. 41:9, 10) Σίγουρα, ισί μπουτ πράγματα σο κερένα-αμέν τι αβάς ευτυχισμέ καζόμ ντάσα λατρεία αμαρέ λατσσέ Νταντές σο αξίνελα “τι λελ ι δόξα ντα ι τιμή” σαρέ οντουλένταρ σο λατσσαρντάς!​—Αποκ. 4:11.