1-2. I yini lexi nga yentxaka wugandzreli byezru ka Xikwembu Nkulukumba byi yamukeleka?

 I YINI swi ku buyelaka a miyanakanywini loko u twa zritu ledzri liki “wugandzreli”? Swi nga yentxeka u yanakanya hi makwezru lweyi a khinsamiki a khongota ka Yehovha na a nga si na yetlela. Kumbexana u yanakanya hi ndangu wa kukazri lowu dondzraka Bibele na wu nyonxile.

² Ka swiyimu leswi hinkwaswu vhanu lava va le ku gandzreleni. Xana Yehovha awa byi yamukela wugandzreli byavu? Ina, a ta byi yamukela loko byi fambisana ni ku zrandzra kwake, byi kombisa lizrandzru ni ku mu hlonipha. Hi mu zrandzra ngopfu Yehovha, ha swi tiva leswaku o va yene ntsena a fanelaka ku gandzreliwa nakone hi djula ku mu gandzrela hi lani hi nga kotaka ha kone.

3. Xana hi ta bula hi yini ka xidondzro lexi?

³ Ka xidondzro lexi, hi ta vona wugandzreli lebyi Yehovha a a byi yamukela a nkameni wa ku tsraliwa ka Bibele. Ntsrhaku, hi ta vona 8 wa mintxhumu leyi hi nga yi yentxaka akuva hi gandzrela Yehovha hi ndlela leyi yamukelekaka namunhla. Nkama lowu hi yentxaka leswo, yanakanyisisa hi leswi u nga swi yentxaka akuva u yampswisa wugandzreli byaku ka Yehovha. Hi ta tlhela hi vona swivangelo leswi nga hi yentxaka hi nyonxa loko hi gandzrela Yehovha hi ndlela leyi nga yone.

4. Na Yesu a nge si ta lani misaveni, xana vagandzreli va Yehovha a va swi kombisa hi ndlela yini leswaku va zrandzra Yehovha ni ku mu hlonipha?

⁴ Na Yesu a nge si na ta lani misaveni, vhanu va ku dumbeka va ku fana na Abele, Nowa, Abrahamu na Yobe va kombise leswaku  a va hlonipha ni ku zrandzra Yehovha. Hi ndlela yini? Hi ku yingiseta, ku kombisa lipfumelo ni ku titsrona swa kukazri. Bibele a dzri nyikeli wutsrhokotsrhoko mayelana ni leswi a va fanela ku swi yentxa akuva va gandzrela Yehovha. Kambe, dzri swi beka livaleni leswaku a va yentxa hinkwaswu leswi a va swi kota akuva va gandzrela Yehovha, ni leswaku a wugandzreli byavu a byi yamukeleka kwake. Hi ku famba ka nkama Yehovha a nyike va-Israyele nawu wa Moxe, milawu leyo a yi nyikela swidzringanyeto swa ndlela leyi Yehovha a a djula ku gandzreliwa ha yone.

5. I yini leswi txintxiki ka ndlela ya ku gandzrela Yehovha ntsrhaku ka loko Yesu a file a tlhela a pfuxiwa?

⁵ Ntsrhaku ka loko Yesu a file a tlhela a pfuxiwa, Yehovha a a nga ha yimeli leswaku vhanu va landzra nawu wa Moxe. (Ro 10:4) Vakriste a va fanela ku landzra nawu lowumpswha ku nga ‘nawu wa Kriste’. (Ga 6:2) Akuva va landzra ‘nawu’ lowo, a va nga na nxaxamelo wa kukazri wa milawu leyi a va fanela ku yi landzra, a va fanela ku yetisela xikombiso xa Yesu ni ku landzra leswi a swi dondzrisiki. Hi ndlela leyi fanaka, namunhla Vakriste va yentxa hinkwaswu leswi va nga swi kotaka akuva va landzra xikombiso xa Kriste, hi ndlela leyo va nyonxisa Yehovha va tlhela va kuma ku “wisisiwa”.—Mt 11:29.

6. He swini swivutiso leswi hi fanelaka ku tihamba swone akuva hi pfuneka ka xidondzro lexi?

⁶ Nkama lowu hi kambisisaka swiyenge swa wugandzreli byezru tivutise, ‘xana he wini nhluvuku ni wu yentxiki ka xiyenge lexi?’ U nga tlhela a tivutisa leswi, ‘xana ni nga yampswisa ndlela leyi ni mu gandzrelaka ha yone Yehovha?’ U nga ha nyonxa hi nhluvuku lowu u wu yentxiki ku ta ta tlhasa swoswi kambe swi djula u kombela Yehovha akuva a ku pfuna ku vona lomu u nga yampswisaka kone.

7. Xana Yehovha a swi vonisa kuyini swikhongoto swezru leswi sukelaka mbilwini?

⁷ Hi gandzrela Yehovha loko hi khongota kwake. A Bibele dzri hlaya leswaku swikhongoto swezru swi fana ni muzri wa ku nun’hwela lowu a wu lulamiseliwa akuva wu nyikeliwa a tabernakeleni nakone hi ku famba ka nkama wu sungule ku nyikeliwa a tempeleni. (Ps 141:2) Muzri luwani a wu humesa nun’hwelo lowu a wu nyonxisa Xikwembu Nkulukumba. Hi ndlela leyi fanaka, Yehovha ‘a tsrhavisiwa’ hi swikhongoto leswi humaka mbilwini nambi loko hi nga tati mazrito. (Pr 15:8; Dt 33:10) Hi nga tiyiseka leswaku Yehovha a nyonxa ngopfu swinene loko a hi twa na hi khongota hi kombisa leswaku ha mu zrandzra ni leswaku ha mu tlangela. A djula hi mu byela leswi hi kazrataka, hi swi navelaka ni makungu yezru. Na u nge si na khongota ka Yehovha, ha yini u nga yiminyana u yanakanya hi leswi u djulaka ku swi hlaya? Loko u yentxa leswo, u ta nyikela magandzrelo lama yamukelekaka ka Papayi wezru wa le matilweni.

8. He wini mukhandlu lowu hi nga na wone wa ku dzrumisa Xikwembu Nkulukumba?

⁸ Hi gandzrela Yehovha hikuva hi mu dzrumisa. (Ps 34:1) Hi gandzrela Yehovha loko hi byela vambeni ndlela leyi hi hlamalisiwaka ha yone hi matsrhamela ni mintizro yake. Loko hi mu tlangela hi mbilu Yehovha swi ta hi nabyalela kuva hi mu dzrumisa. Loko hi tinyika nkama wa kuva hi yanakanyisisa hi mintxhumu leyi Yehovha a hi yentxeliki yone minkama hinkwayu hi ta va ni swivangelo swa ku mu dzrumisa. Ntizro wa ku zrezra wu hi nyika mukhandlu wa kuva minkama hinkwayu hi nyikela ‘a mhamba ya xidzrumiso, hi leswaku a mhandzru wa milomu lemi hlayaka vito dzrakwe’. (Hb 13:15) Ku fana ni leswi hi yimakanyana kutsrongo hi yanakanyisisa hi leswi  hi djulaka ku swi byela Yehovha ka xikhongoto xezru swi nga swa lisima, ku yima akuva hi yanakanyisisa hi leswi hi djulaka ku swi byela vambeni a nsin’wini i swa lisima swinene. Loko hi djula leswaku ‘a mhamba ya xidzrumiso’ xezru wu yamukeleka hi ta khanela na swi sukela mbilwini.

9. Ku fana ni le minkameni ya va-Israyele, xana he wani mabindzru ya ku ya mintlhanganwini? Nyikela xikombiso xa ndlela leyi mintlhanganu yi samiki yi ku pfuna ha yone.

⁹ Hi gandzrela Yehovha loko hi ya mintlhanganwini. Va-Israyele va byeliwe leswi: ‘Hinkwavu a vavanuna vaku a va voneke kuzrazru hi lembe a mahlweni ka Yehovha, Xikwembu Nkulukumba waku, a mbangwini lowu a taka wu hlawula.’ (Dt 16:16) Leswo swi tlhamuxela leswaku a mimiti yavu ni masimu yavu a swi ta tsrhama swi nga sizrelelekanga. Kambe Yehovha a va dumbise leswi: ‘A tiko dzraku dzri nga naveliwi hi mhunu, loko u ta ntlhantuka u famba u ya voneka mahlweni ka Yehovha Xikwembu Nkulukumba waku kuzrazru hi lembe.’ (Eks 34:24) Leswi a va dumba Yehovha hi ku helela, va-Israyele a va famba ka mafexta lawo lembe ni lembe. Ku yentxa leswo a swi va tisela mabindzru manyingi. Hi xikombiso, a va ta dondzra leswi yengetelekiki hi milawu ya Xikwembu Nkulukumba, va yanakanyisisa hi mintxhumu leyinene leyi Yehovha a va yentxeliki yone ni ku nyonxa hi ku va ni vhanu vambeni lava va gandzrelaka Yehovha. Nakone yanakanya ndlela leyi Yehovha a titwaka ha yone loko hi tilulamisela ku nyikela tinhlamulo leti gomiki ni leti lulamiseliwiki ha hombe.

10. Ha yini ku yimbelela ku li xin’we xa swiyenge swa lisima ka wugandzreli byezru?

¹⁰ Hi gandzrela Yehovha loko hi yimbelela kun’we ni vamakwezru. (Ps 28:7) Ka Va-Israyele ku yimbelela a ku li xiyenge xa lisima ka wugandzreli byavu. Hosi Davhida a beke 288 wa Valevhi akuva va yimbelela a tempeleni. (1Mk 25:1, 6-8) Namunhla, hi kombisa ndlela leyi hi zrandzraka Xikwembu Nkulukumba ha yone loko hi yimbelela tinsimu ta ku mu dzrumisa swi nge na mhaka leswaku hi yimbelela hi ndlela leyinene kumbe im-him. Hi xikombiso, loko hi vulavula ‘ha hoxa hinkwezru ku leswinyingi’, nambi tanu a hi tsrhiki ku vulavula a bandleni ni le nsin’wini. (Yk 3:2) Hi ndlela leyi fanaka, a hi fanelanga hi tsrhika ku yimbelela tinsimu ta ku dzrumisa Yehovha hi leswi hi yanakanyaka leswaku a hi na zritu dzra ku xonga akuva hi yimbelela.

11. Hi ku ya hi Amapsalma 48:13, ha yini swi li swa lisima ku tinyika nkama wa ku dondzra hi ndangu?

¹¹ Hi gandzrela Yehovha loko hi dondzra zritu dzrake ni ku dondzrisa vanezru. A va-Israyele a va nga tizri hi masiku ya Savata, xileswo a va tizrisa siku ledzro akuva va tiyisa wuxaka byavu na Yehovha. (Eks 31:16, 17) Va-Israyele va ku dumbeka a va dondzrisa vana vavu mayelana na Yehovha ni wunene byake. Na hine namunhla, hi fanela ku tinyika nkama wa ku dondzra ni ku yanakanyisisa hi zritu dzra Xikwembu Nkulukumba. Ku yentxa leswo swi hamba xiyenge xa wugandzreli byezru ka Yehovha, nakone swi hi tsrhindzretela kusuhi na yene. (Ps 73:28) Nakone loko hi dondzra hi ndangu hi pfuna vanezru akuva va yaka wuxaka lebyi tiyiki ni Papayi wezru wa le matilweni, Yehovha.—Dondzra Amapsalma 48:13.

12. Xana hi dondzra yini ka leswi Yehovha a a wu vonisa xiswone ntizro wa lava va yakiki tabernakele?

¹² Hi gandzrela Yehovha loko hi yaka ni ku bekisa tiyindlu ta wugandzreli. Bibele dzri hlaya leswaku ku yaka tabernakele ni mintxhumu hinkwayu leyi a yi li ndzreni ka dzrone a a li ntizro wa ku xwenga. (Eks 36:1, 4) Ni ko namunhla wa siku, Yehovha a vona ku yakiwa ka Tiyindlu ta Wugandzreli ni mimbangu yimbeni leyi tizrisiwaka hi nhlengeletanu swa nga  ntizro lowu xwengiki. Van’we ka vamakwezru va xinuna ni va xisati va heta nkama wunyingi ka mintizro leyo. Nakunene ha yi tlangela mintizro leyi va yi yentxaka. Phela, na vone va hiseka a ntizrweni wa nsimu nakone van’we vavu va djula ku va maphayona. Vakulu va ta kombisa leswaku va seketela ntizro lowu wa ku yaka hikuva va nga yaleli vamakwezru lava va tiyimiseliki ni lava va fanelekaka loko va djula ku tizra swanga maphayona. Nambi loko hi nga na wuswikoti ka ntizro wa ku yaka, hinkwezru hi nga pfunisa akuva mimbangu leyi yi tsrhama na yi basile yi tlhela yi hlayiseka.

13. Ha yini swihanano swezru swi li swa lisima?

¹³ Hi gandzrela Yehovha loko hi nyikela swihanano. Va-Israyele a va nga fanelanga va ya mahlweni ka Yehovha na va nga tamelanga ntxhumu. (Dt 16:16) A va fanela ku teka ntxhumu wa kukazri kuva va nyika Yehovha hi ku ya hi makotela yavu. Hi ndlela leyo, a va kombisa leswaku va swi tlangela hinkwaswu leswi Yehovha a va yentxeliki swone. Xana hi nga kombisa hi ndlela yini leswaku ha mu tlangela Yehovha hi hinkwaswu leswi a hi yentxeliki swone? Yin’we ya tindlela i ku nyikela swihanano a bandleni akuva hi pfunisa ntizro wa misava hinkwayu hi ku ya hi makotela yezru. Mupostola Pawulo a te: ‘Hikusa loko nkhinkhi yi kone, kunene ya yamukeleka ku Xikwembu Nkulukumba, hi leswi mhunu a nga naswu, ku nge hi leswi a nge ke naswu.’ (2Ko 8:4,12) Yehovha a nyonxa swinene hi swihanano leswi hi swi nyikelaka hi mbilu hinkwayu swi nge na mhaka leswaku swi gama kwini.—Mr 12:42-44; 2Ko 9:7.

14. Hi ku ya hi Amaproverbia 19:17, xana Yehovha a wu vonisa kuyini mpfunu lowu hi wu nyikaka vamakwezru lava wu vilelaka?

¹⁴ Hi gandzrela Yehovha loko hi pfuna Vamakwezru. Yehovha a dumbise leswaku a a ta hakela Vayisrayele lava a va pfuna swisiwana. (Dt 15:7, 10) Minkama hinkwayu leyi hi pfunaka vamakwezru lava vilelaka mpfunu hi va na hi voleka Yehovha. (Dondzra Amaproverbia 19:17.) Hi xikombiso, loko vamakwezru va le Filipi va zrumele xihiwa ka mupostola Pawulo na a li djele, a vitani xihiwa lexiyani a ku i: ‘mhamba ya ku yamukeleka ni ku tsrhavisa a mahlweni ka Xikwembu Nkulukumba.’ (Flp 4:18) Yanakanya hi vamakwezru va le bandleni dzraku u va u tivutisa leswi: ‘Xana ku ni mhunu lweyi ni nga mu pfunaka?’ Yehovha a nyonxa swinene loko a vona swaku hi tizrisa a nkama wezru, ntamu wezru, wuswikoti byezru ni mali yezru akuva hi pfuna vambeni. Kwake leswo swi hamba xiyenge xa wugandzreli.—Yk 1:27.

15. Nambi leswi ku gandzrela Yehovha swi djulaka nkama ni ku tikazrata ha yini swi nga bindzri?

¹⁵ Ku gandzrela Yehovha hi ndlela leyi nga yone swi djula nkama ni ku tikazrata. Kambe a swi bindzri. (1Yh 5:3) Ha yini hi hlaya leswo? Hikusa lizrandzru hi dzrone dzri hi susumetelaka kuva hi mu gandzrela. Yanakanya hi xidjahatana lexi xi djulaka ku nyika Papayi wa xone xihiwa xa kukazri, xi nga ha teka nkama wa wunyingi akuva xi dezenyara mufoto. Kambe a xi khali hi nkama lowu xi wu hetiki na xi dezenyara. Xa mu zrandzra papayi wa xone, nakone xi nyonxa swinene hi ku mu nyika xihiwa. Hi ndlela leyi fanaka, hi mu zrandzra swinene Yehovha nakone ha nyonxa hi ku heta nkama ni ntamu wezru akuva hi mu gandzrela.

16. Hi ku ya hi Ba-Heberu 6:10, xana Yehovha a ku vonisa kuyini ku tikazrata ka mun’wana ni mun’wana wezru akuva hi mu nyonxisa?

¹⁶ Vapswele lava va nga ni lizrandzru a va yimeli leswaku vana va nyikela swihanano leswi  fanaka. Va swi tiva leswaku vanavu a va fani nakone n’wana mun’wana ni mun’wana a ni wuswikoti byake. Hi ndlela leyi fanaka, Papayi wezru wa le matilweni awa swi twisisa leswaku mun’wana ni mun’wana wezru a ni swiyimu leswi hambaniki. Swi nga yentxeka u kota ku yentxa swinyingi ku tlula vamakwezru lava zrandzrekaka kumbexana swi nga yentxeka hi kola ka ntanga, lihanyu dzraku kumbe wutiyanguleli lebyi u nga na byone ndangwini u nga swi koti ku yentxa hinkwaswu leswi a wu navela ku swi yentxa. U nga godoli. (Ga 6:4) Yehovha a nge ti wu dzrivala a ntizro waku. Loko u yentxa hinkwaswu leswi u nga swi kotaka hi swivangelo leswinene a ta nyonxa. (Dondzra Ba-Heberu 6:10.) Yehovha a wa yi vona mbilu yaku nakone a wa swi tiva leswi u navelaka ku mu yentxela swone. Nakone a djula kuva u nyonxa hi leswi u kotaka ku swi yentxa a ntizrweni wake.

17. a) Loko u vona na swi ku kazratela ku hamba mintizro ya kukazri leyi fambisanaka ni ku zrandzra ka Yehovha, xana u nga yentxa yini? b) Xana u pfunekise kuyini hi ku yentxa wun’we wa mintxhumu leyi nga ka bokisi ledzri liki “ Yengetela Ku Nyonxa Kwaku”?

¹⁷ Swi li yini loko swin’we swa leswi hi swi voniki ka xidondzro lexi swi ku kazratela, swa ku fana ni dondzro ya ximhunu ni ku zrezra a mbangwini wa mani na mani? Loko u ya u yentxa mintxhumu leyo, swi nga yentxeka u ta ya u yi zrandzra u tlhela u pfuneka. Hi leswo swi yentxekaka loko hi sungula ku hamba wutiwololi kumbe ku dondzra ku txhaya xitxhayatxhayana. Loko hi nga titoloveti ku yentxa leswo minkama hinkwayu, swi ta kazrata ku hamba nhluvuku. Kambe hi nga ha boha ku hamba siku ni siku, hi sungula hi ku hamba ha kutsrongo kutsrongo kutani hi ya hi yengesela. Loko hi ya hi vona leswaku hi hamba nhluvuku ka leswi hi swi yentxaka, swi ta hi susumetela kuva hi tama hi swi yentxa. Hi nga hlaya leswi swi fanaka ka mintizro leyi hi yi yentxaka akuva hi gandzrela Yehovha.

18. Xana hi vumbeliwe yini? Xana hi wani mabindzru lamanene hi nga na wone hi ku hetisisa nkongometo lowo?

¹⁸ Hi vumbeliwe kuva hi tizrela Yehovha. Xileswo loko hi yentxa leswo hi mbilu hinkwayu ha yaneliseka hi tlhela hi nyonxa, hi va ni dumbo dzra ku tizrela Yehovha hi lani ku nga helikiki. (Pr 10:22) Hi tlhela hi va ni ku zrula ka miyanakanyu hikusa ha swi tiva leswaku Yehovha a pfuna vagandzreli vake loko va kumana ni swikazratu. (Eza 41:9, 10) Nakunene, hi ni swivangelo swinyingi swa ku nyonxa loko hi gandzrela Papayi wezru lweyi a faneliwaka hi ku yamukela ku phatima ni lidzrumu dzra swivumbiwa swake hinkwaswu!—Mpf 4:11.