1-2. Tisafunika kucitanji toera Yahova atawire ulambiri wathu?

 MUSANYEREZERANJI mungabva fala yakuti “ulambiri”? Panango musanyerezera m’bale wakucepeseka wakuti agodama mbakacita phembero kuna Yahova na ntima onsene. Peno musanyerezera banja yakutsandzaya yakuti iri kupfundza Bhibhlya.

² Mu pitsandzo pyenepi piwiri, iwo ali kucita pinthu toera kulambira Yahova. Kodi Yahova anatawira ulambiri wawo? Iye anatawira ulambiri wawo khala iwo akucita pyenepi mwakubverana na cifuno cace, pontho khala asanfuna na kumulemedza. Ife tisafuna kakamwe Yahova, kusiyapo pyenepi tisadziwa kuti iye athema kulambirwa. Pontho tisafuna kucita pyenepi munjira yadidi kakamwe.

3. Tinapfundzanji mu nsolo uno?

³ Mu nsolo uno tinapfundza ulambiri ukhatawira Yahova mu ndzidzi wakale, pontho tinapfundza pinthu pisere pyakuti Yahova asafuna kuti tipicite pakumulambira. Mu ndzidzi unapfundza ife pinthu pyenepi, tinakwanisa kunyerezera kuti tinalambira tani Yahova mwadidi kakamwe. Kusiyapo pyenepi tinapfundzambo kuti thangwi yanji kulambira Yahova munjira yadidi kusatiphedza toera kukhala akutsandzaya.

4. Anthu akukhulupirika a mu ndzidzi wakale apangiza tani kuti akhalemedza, pontho akhafuna Yahova?

⁴ Mu ndzidzi wakale, anthu akukhulupirika ninga Abheli, Nowa, Abhrahamu na Yobe apangiza kuti akhalemedza, pontho akhafuna Yahova. Munjira ipi? Iwo akhabvera Mulungu, akhan’khulupira, pontho akhapereka ntsembe kuna iye.  Bhibhlya nee isalonga pinthu pyonsene pikhafunika iwo kucita. Mbwenye iwo acita pyonsene pikhakwanisa iwo toera kupasa mbiri Yahova, pontho ulambiri wawo ukhali wakutawirika kuna iye. Mukupita kwa ndzidzi, Yahova aphatisira Mose toera kupereka Mwambo kuna Aizraeli. Mwambo unoyu ukhaphataniza pitsogolero pizinji pikhapangiza kuti Yahova akhafuna kulambirwa munjira ipi.

5. Ndi macinjo api adacitwa thangwi ya ulambiri wandimomwene pakumala kufa na kulamuswa kwa Yezu?

⁵ Pakumala kufa na kulamuswa kwa Yezu, Yahova nee akhadikhirabve kuti atumiki ace amulambire mwakubverana na Mwambo udapasa iye Aizraeli. (Aroma 10:4) Akristu akhafunika kutowezera Mwambo upswa wakuti ndi “mwambo wa Kristu.” (Agal. 6:2) Toera kucita pyenepi iwo nee akhafunika kukoya “mwambo” unoyu m’manyerezero na kubvera mitemo mizinji. Mbwenye akhafunika kutowezera citsandzo ca Yezu na kucita pinthu pidapfundzisa iye. Lero, Akristu asacitambo pyonsene pinakwanisa iwo toera atowezere Kristu, akomerese Yahova ‘mbagumana ciwangiso.’—Mat. 11:29.

6. Nsolo uno unatiphedza tani?

⁶ Mu ndzidzi unapfundza ife pinthu pyakuti tisafunika kupicita pakulambira Yahova, m’bodzi na m’bodzi wa ife asafunika kubvundzika: ‘Ndacitanji toera ndilambire Yahova munjira yadidi?’ Peno ‘Ndinacitanji toera ndilambire Yahova mwadidi kakamwe?’ Imwe munakwanisa kutsandzaya na pinthu pinacita imwe cincino. Mbwenye musafunika kuphemba Yahova toera akuphedzeni kuona pinthu pinafunika imwe kusasanyira.

7. Yahova asaona tani maphembero anacita ife na ntima onsene?

⁷ Tisalambira Yahova mu ndzidzi unacita ife phembero kuna iye. Bhibhlya isalandanisa maphembero na insenso yakukhunganywa mwadidi yakuti ikhaperekwa pa tabhernakulo, pontho mukupita kwa ndzidzi ikhaperekwa mu templo. (Masal. 141:2) Insenso ineyi ikhabulusa khwema yadidi kakamwe yakuti ikhakomeresa Mulungu. Munjira ibodzi ene, maphembero anacita ife na ntima onsene ‘asakomeresa’ Mulungu, ngakhale kuti tilonge mafala akukhonda nentsa. (Mis. 15:8; Deut. 33:10) Tiri na mathangwi adidi toera kunyindira kuti Yahova asatsandzaya kubvesera mafala athu akupangiza ufuni na kupereka takhuta kuna iye. Iye asafuna kuti timpange pinthu pinatinentsa, pinthu pinadikhira ife na pifuno pyathu. Natenepa mbamudzati kucita phembero kuna Yahova, nyerezerani mwadidi pinthu pinafuna imwe kulonga. Mungacita pyenepi, imwe munapereka ‘insenso’ yadidi kakamwe kuna Babanu wakudzulu.

8. Ndi mwai upi wadidi uli na ife toera kusimba Mulungu?

⁸ Tisalambira Yahova mu ndzidzi unansimba ife. (Masal. 34:1) Ife tisasimba Yahova tingapanga anango kuti tisanfuna kakamwe, pontho tisadzumatirwa na makhaliro ace na mabasa ace. Tingakhala anthu akupereka takhuta tinakhala na pinthu pizinji pyadidi toera kulonga thangwi ya Yahova. Pontho tinganyerezera pinthu pyadidi pidaticitira Yahova, tinakhala na mathangwi mazinji toera kunsimba. Basa yakumwaza mphangwa isatipasa mwai ukulu kakamwe toera ‘kupereka ntsembe kuna Mulungu, yakuti ndi misapo ya milomo yathu.’ (Aheb. 13:15) Ninga pinacita ife mbatidzati kulonga na Yahova m’phembero, ife tisafunika kunyerezera mwadidi mafala anafuna longa ife mbatidzati kulonga na anthu anafuna ife kumwazira mphangwa. Tisafuna kuti ‘ntsembe yathu yakusimba’ Mulungu ikhale yadidi kakamwe. Na thangwi ineyi, tisamwaza mphangwa mwakugalamuka.

9. Ninga Aizraeli, tisaphedzeka tani tingagumanyikana pa misonkhano? Perekani citsandzo cinapangiza kuti misonkhano yakuphedzani tani.

 ⁹ Tisalambira Yahova tingagumanika pa misonkhano. Aizraeli akale apangwa: ‘Katatu pa caka, amuna onsene asafunika kubwera pamaso pa Yahova Mulungu wako pa mbuto inafuna iye kusankhula.’ (Deut. 16:16) Iwo akhafunika kubuluka mbakhonda kusiya munthu toera kuonera nyumba zawo na minda yawo. Mbwenye Yahova aapanga: ‘Nee munthu m’bodzi anafuna kusirira dziko yanu mu ndzidzi unaenda imwe katatu pa caka toera kuonekera pamaso pa Yahova Mulungu wanu.’ (Eks. 34:24) Nakuti Aizraeli akhanyindira Yahova, iwo akhagumanika m’maphwando onsene akhacitwa pa caka. Thangwi yakucita pyenepi, iwo akhaphedzeka munjira zizinji. Mwacitsandzo, iwo akhapfundza pizinji thangwi ya Mwambo wa Mulungu, akhanyerezera pinthu pyadidi pikhaacitira Yahova, pontho akhatsandzaya thangwi yakukhala pabodzi na atumiki anango a Yahova. (Deut. 16:15) Ife tisaphedzekambo munjira ibodzi ene tingawangisira toera kugumanika pa misonkhano Yacikristu. Pontho Yahova asatsandzaya kakamwe tingakhunganyika toera kupereka mitawiro yadidi mu ndzidzi wakucepa.

10. Thangwi yanji kuimba ndi kwakufunika kakamwe pakulambira kwathu?

¹⁰ Tisalambira Yahova tingaimba nyimbo pabodzi na abale na alongo athu. (Masal. 28:7) Kuna Aizraeli kuimba kukhali kwakufunika kakamwe pa ulambiri wawo. Mambo Dhavidhi asankhula Alevi akukwana 288 toera kuimba mu templo. (1 Pya dziko. 25:1, 6-8) Lero, ife tinakwanisa kupangiza kuti tisafuna Mulungu tingaimba nyimbo toera kunsimba. Nee tisafunika kukhala anyakuimba adidi toera kucita pyenepi. Nyerezerani basi: Pakulonga ‘tonsene tisadodoma kazinji kene,’ mbwenye pyenepi nee pisaticitisa kusiya kulonga mu mpingo na mu utumiki. (Tiya. 3:2) Munjira ibodzi ene, ife tinakwanisa kusimba Yahova pakuimba, ngakhale tione kuti nee tisaimba mwadidi.

11. Mwakubverana na Masalmo 48:13, thangwi yanji tisafunika kukhala na ndzidzi toera kupfundza Bhibhlya pabodzi na banja?

¹¹ Ife tisalambira Yahova tingapfundza Mafalace, pontho tingapfundzisa anathu thangwi ya iye. Ntsiku ya Sabudu ikhapasa mwai Aizraeli toera kusiya mabasa akhacita iwo ntsiku na ntsiku mbawangisa uxamwali wawo na Yahova. (Eks. 31:16, 17) Aizraeli akukhulupirika akhapfundzisa anawo thangwi ya Yahova na pinthu pyadidi pikhaacitira iye. Lero, ife tisafunikambo kukhala na ndzidzi toera kuleri na kupfundza Mafala a Mulungu. Pyenepi pisacita khundu ya ulambiri wathu kuna Yahova, pontho pisatiphedza toera kuwangisa uxamwali wathu na iye. (Masal. 73:28) Kusiyapo pyenepi, tingapfundza Bhibhlya pabodzi na banja yathu, tinakwanisa kuphedza anathu toera akhale na uxamwali wakuwanga na Babathu wakudzulu.—Lerini Masalmo 48:13.

12. Tisapfundzanji na njira ikhaona Yahova basa ya anthu akhacita pinthu pya mu tabhernakulo?

¹² Tisalambira Yahova tingamanga na kusasanyira nyumba za ulambiri. Bhibhlya isalonga kuti basa yakumanga tabhernakulu na pinthu pikhali mwenemo ikhali yakupambulika. (Eks. 36:1, 4) Lero, Yahova asaona basa yakumanga nyumba za Umambo na nyumba zinango za gulu yace ninga khundu ya ulambiri wathu. Abale na alongo anango asamala ndzidzi uzinji m’mabasa anewa. Ife tisapereka takhuta kakamwe thangwi yakuphedzera kwawo basa ya Umambo munjira ineyi. Kusiyapo pyenepi, iwo asacitambo basa yakumwaza mphangwa. Pontho anango mwa iwo panango asafuna kutumikira ninga apainiya. Abale  na alongo anewa angaphemba toera kutumikira ninga apainiya, akulu a mpingo anakwanisa kupangiza kuti asaphedzera basa yakumanga angakhonda kunyinyirika toera kuakhazikisa khala ndi akuthema toera kutumikira ninga apainiya. Mwakukhonda tsalakana khala tiri na maluso akumanga peno nkhabe, ife tinakwanisa kuphedzera basa yakucenesa na kusasanyira nyumba zinamangwa.

13. Tisafunika kuona tani pyakupereka pinacita ife toera kuphedzera basa ya Umambo?

¹³ Tisalambira Yahova tingaphedzera basa ya Umambo na pyakupereka pyathu. Aizraeli nee akhafunika kuenda pa maphwando cimanja-manja. (Deut. 16:16) Iwo akhafunika kupereka miyoni mwakubverana na pire pikhakwanisa iwo. Munjira ineyi, Aizraeli akhapangiza kuti akhapereka takhuta kuna Yahova thangwi ya pinthu pikhaacitira iye. Tinapangiza tani ufuni na kupereka takhuta kuna Yahova thangwi ya pinthu pyonsene pinaticitira iye? Njira ibodzi ndi kucita pyakupereka toera kuphedzera mpingo na basa yakumwaza mphangwa pa dziko yonsene yapantsi, mwakubverana na pinthu piri na ife. Mpostolo Paulu alonga tenepa: “Muoni ndi wakutawirika khala munthu asafuna kupereka. Thangwi munthu asafunika kupereka mwakubverana na piri na iye, tayu kupiringana piri na iye.” (2 Akor. 8:4, 12) Yahova asatsandzaya kakamwe na pyakupereka pyathu, maseze pikhale pyakucepa.—Marko 12:42-44; 2 Akor. 9:7.

14. Mwakubverana na Misangani 19:17, Yahova asaona tani ciphedzo cinapereka ife kuna abale na alongo athu anafuna ciphedzo?

¹⁴ Tisalambira Yahova tingaphedza abale na alongo athu anafuna ciphedzo. Yahova alonga kuti mbadabwezera Aizraeli akuti mwakudzala manja akhapasa pinthu anyakutcerenga. (Deut. 15:7, 10) Mwandimomwene, ndzidzi onsene unaphedza ife m’bale peno mulongo wakuti asafuna ciphedzo, Yahova asaona pyenepi ninga muoni kuna Iye. (Lerini Misangani 19:17.) Mwacitsandzo, Akristu akakhala ku Filipi atumiza muoni kuna Paulu mu ndzidzi ukhali iye nkaidi. Na thangwi ineyi, Paulu alonga kuti muoni unoyu ukhali ‘ntsembe yakutawirika, yakununkhira na yadidi pamaso pa Mulungu.’ (Afil. 4:18) Nyerezerani thangwi ya abale na alongo a mu mpingo mwanu, pontho bvundzikani: ‘Kodi alipo munthu wakuti ndinakwanisa kum’phedza?’ Yahova asatsandzaya angationa mbatikaphatisira ndzidzi wathu, mphambvu zathu, maluso athu na pinthu piri na ife toera kuphedza anthu anafuna ciphedzo. Kuna Yahova, pyenepi pisacita khundu ya ulambiri wathu.—Tiya. 1:27.

15. Ngakhale kuti kulambira Yahova kusaphemba ndzidzi na kuwangisira, thangwi yanji nee ndi kwakunentsa?

¹⁵ Toera kulambira Yahova munjira yakutawirika kuna iye pisaphemba ndzidzi na kuwangisira. Mbwenye nee ndi pyakunentsa. (1 Juwau 5:3) Thangwi yanji? Thangwi pinaticitisa kulambira Yahova ndi ufuni wathu kuna iye. Nyerezerani mwana wakuti asafuna kupasa cinthu pai wace. Panango anamala ndzidzi uzinji mbakalemba cithundzithundzi toera apase pai wace. Mwana unoyu nee asatsumbikika thangwi ya ndzidzi unamala iye mbakacita pyenepi, thangwi iye asafuna pai wace, pontho ali wakutsandzaya toera kumpasa muoni unoyu. Munjira ibodzi ene, nakuti tisafuna Yahova, ife tisatsandzaya kuphatisira ndzidzi wathu na mphambvu zathu toera kumulambira.

16. Mwakubverana na Ahebheri 6:10, Yahova asaona tani kuwangisira kunacita ife toera kuntsandzayisa?

¹⁶ Anyakubala aufuni nee asadikhira kuti anawo aapase miyoni ibodzi ene. Iwo asadziwa kuti anawo ndi akusiyana, pontho pinakwanisa iwo kucita ndi pyakusiyana. Munjira ibodzi  ene, Babathu wakudzulu asadziwa pinthu pinakwanisa kucita m’bodzi na m’bodzi wa ife. Panango imwe munakwanisa kucita pizinji kupiringana anthu anango anadziwa imwe na anafuna imwe. Peno nee munakwanisa kucita pizinji ninga pinacita anango, panango thangwi ya thunga yanu, ungumi wanu peno thangwi yakutsalakana banja. Khala pyenepi pisacitika kuna imwe lekani kutsukwala. (Agal. 6:4) Yahova nee anaduwala basa yanu. Mungapitiriza kucita pinakwanisa imwe na mathangwi adidi iye anatsandzaya. (Lerini Ahebheri 6:10.) Yahova asaona ngakhale pinthu pinanyerezera imwe kucita. Iye asafuna kuti mukhale wakutsandzaya, pontho mukomerwe na pinthu pinakwanisa imwe kucita toera kumulambira.

17. (a) Tinacitanji tingaona kuti ndi pyakunentsa kucita pinthu pinango toera kulambira Yahova? (b) Mwaphedzeka tani na pinthu pinagumanika pa bokosi ya nsolo wakuti “ Pinthu Pinathimizira Kutsandzaya Kwathu”?

¹⁷ Tinacitanji tingaona kuti ndi pyakunentsa kucita pinthu pinango pidapfundza ife mu nsolo uno, ninga kupfundza Bhibhlya peno basa yakumwaza mphangwa? Tingacita pinthu pyenepi kazinji kene, panango pinathimizira kutsandzaya kwathu, pontho pinatiphedza. Ife tinakwanisa kulandanisa pyenepi na kuthamula manungo peno kupfundza kuimba valimba. Tingakhonda kuthamula manungo peno kuimba valimba kazinji kene nee tinathambaruka. Mphapo ninji pinafuna kucitika tingatonga kuthamula manungo peno kuimba valimba ntsiku zonsene? Pakutoma panango tinacita pyenepi mu ndzidzi wakucepa. Mbwenye mukupita kwa ndzidzi panango tinapicita mu ndzidzi uzinji. Tingaona kuti tiri kukwanisa kucita pinthu pyenepi, panango tinamala ndzidzi uzinji mbatikapicita, pontho pinatitsandzayisa kakamwe. Pyenepi pisacitikambo na pinthu pinacita ife toera kulambira Yahova.

18. Ndi cinthu cipi cakufunika kakamwe kuna ife, pontho tinaphedzeka tani tingacita cinthu ceneci?

¹⁸ Kucita pyonsene pinakwanisa ife toera kulambira Yahova ndi cinthu cakufunika kakamwe kuna ife. Thangwi ya pyenepi tisakhala na umaso wakutsandzaya, pontho tiri na cidikhiro cakulambira Yahova kwenda na kwenda. (Mis. 10:22) Ife tiri na ntendere wa m’manyerezero thangwi tisadziwa kuti Yahova asatiphedza tingathimbana na nyatwa. (Iza. 41:9, 10) Mwandimomwene tiri na mathangwi adidi toera kukhala akutsandzaya pakulambira Babathu waufuni wakuti ndi wakuthema toera ‘kutambira mbiri na cilemedzo’ kubulukira ku pinthu pyonsene pidacita iye!—Apok. 4:11.