1-2. Yihowa magansiˈranke adhanno gede maa assa hasiissannonke?

 “MAGANSIˈRA” yaanno qaale macciishshatto woyite maa hedatto? Goxara albaanni guluphe giddosita kule Yihowa huucciˈrannoha mitto rodoo hedattoha ikkara dandaanno. Woy Qullaawa Maxaafa seekkite xiinxallitannota mitte hagiirraame maate hedattoha ikkara dandaanno.

² Lamente ikkitora kulli manni Magano magansiˈranni no. Yihowa insa magansiˈra adhanno? Insa iso magansidhinohu fajjosi ledo sumuu yaanno garinni hattono baxillunninna ayirrinyunni ikkiro Magansiˈransa adhanno. Yihowa lowo geeshsha banxeemmo. Magansiˈra hasiissannonkehu iso ikkinota anfoommo hattono dandaaminke deerrinni iso danchu garinni magansiˈra hasiˈneemmo.

3. Konni birxichira maa ronseemmo?

³ Konni birxichira hundi waro Yihowa adhino magansiˈra hiittooteronna xaa yannara Yihowa iso magansiˈnammora hasiˈrannota sette doogga ronseemmo. Tenne assineemmo woyite mittu mittunku Yihowa magansiˈneemmo gara woyyeessiˈneemmohu hiittoonniitiro heda dandiineemmo. Qoleno halaalu magansiˈra hagiidhineemmo gede assitannonke yineemmohu mayiraatiro ronseemmo.

4. Hundi waro heeˈrinohu Yihowa magansiˈranno manni iso ayirrisannotanna baxannota leellishinohu hiittoonniiti?

⁴ Hundi waro heedhinori ammanantino labballi yaano Aabeeli,  Nohi, Abirihaaminna Iyyoobi Yihowa ayirrissannotanna baxxannota leellishshino. Hiittoonni? Hajajante, ammana noonsata leellishshenna kakkalo shiqishshe iso ayirrissannotanna baxxannota leellishshino. Qullaawu Maxaafi insa Magano magansiˈrate maa assa hasiissannonsaro mitto mittonka coye dikulanno. Kayinni insa Yihowa ayirrissannota leellishate dandiiture baala assitino; Yihowano magansiˈransa adhino. Gedensoonni Yihowa Abirihaami sirchira Muse widoonni Seera uyino. Kuni seeri, Yihowa hasiˈranno garinni iso magansiˈra dandiinanni dooggano tittire kulanno.

5. Yesuusi reyihunna reyotenni kaihu gedensaanni, Yesuusi harunsaano Yihowa ma garinni magansiˈra hasiissannonsa?

⁵ Yesuusi reyihunna reyotenni kaihu gedensaanni, mannu Yihowa magansiˈrate Muse Seera harunsa dihasiissannonsa. (Rom. 10:4) Kiristaanu haaro seera yaano “Kiristoosi Seera” harunsanno. (Gal. 6:2) Insa konni ‘seerira’ hajajantannohu konne asse konne assitinoonte yitannota batinye wodho agadhite woy konne seera qaagge ikkikkinni Yesuusi lawishshanna isi rosiisino roso harunsiteeti. Xaa yannarano Kiristaanu Kiristoosi lawishsha harunse, Yihowa hagiirsiisatenna lubbonsara ‘fooliishsho afiˈrate’ dandaaminsare baala assanno.—Mat. 11:29.

6. Kuni birxichi kaaˈlannonkehu hiittoonniiti?

⁶ Magano magansiˈneemmo woyite assineemmoha mitto mittonka coye xiinxallineemmo woyite ateneeto togo yite xaˈmi, ‘Tenne hajo daafira woyyeessiˈroommo coyi maati?’ Qoleno togo yite xaˈma dandaatto: ‘Magano magansiˈreemmo gara kawii roore woyyeessiˈra dandeemmo?’ Woyyeessiˈrootto coyi heeˈriro hagiidha hasiissannohe; woyyeessiˈra hasiissannohe coyi heeˈriro kayinni huuccatto assidhe heda dandaatto.

7. Yihowa giddonkenni kaˈne huucciˈneemmo huuccatto ma garinni laˈˈanno?

⁷ Yihowa huucciˈneemmo woyite iso magansiˈnanni heeˈnoommo. Qullaawu Maxaafi, huuccattonke umo xaadooshshu dunkaani giddo gedensoonni kayinni qullaawu mini giddo shiqinshannihu dancha gede qixxeessinoonni hixaani gede ikkitinota kulanno. (Far. 141:2) Konni hixaani suˈniilli Magano lowo geeshsha hagiirsiisanno. Hatteente gede giddonkenni kaˈne huucciˈneemmoti harancho huuccatto nafa “tashshi assitannosi.” (Law. 15:8; Mar. 33:10) Yihowa banxeemmositanna galatu noonketa kulleemmosi woyite macciishsha hagiirsiissannosi; togo yineemmo gede assannonkehu ikkadu korkaati noonke. Isi huluullinonkere, hexxineemmo coyenna halchonke kullammosira hasiˈranno. Huuccatto assiˈnammora albaanni mayine huucciˈneemmoro seekkine heda hasiissannonke. Hatto assanke iimi Anninkera dancha ‘hixaana’ shiqishiˈneemmo gede kaaˈlitannonke.

8. Magano galaxxineemmoti hiitti kaajja faro noonke?

⁸ Yihowa galaxxineemmo woyite iso magansiˈnanni heeˈnoommo. (Far. 34:1) Yihowata dhagge ikkitanno akattanna loosino loosi daafira wolootaho kulle iso galaxxa dandiineemmo. Galanteemmore ikkinummoro Yihowa guwinseemmo gede assannonkehu batinyu coyi noonke. Yanna gaaˈmine Yihowa danchumma yaano assinonke coye baala hiincineemmoha ikkiro iso galaxxineemmo gede assannonkere dihoongeemmo. Sabbakate loosi ‘Maganoho suumenkenni galatu kakkalo’ shiqishiˈneemmota kaajja faro fanannonke. (Ibi. 13:15) Yihowa huucciˈnammora albaanni mayine huucciˈneemmoro seekkine hendeemmonte gede, soqqanshonniwa xaandeemmo manna mayine hasaawinseemmorono seekkine heda hasiissannonke.  Shiqishiˈneemmoti “galatu kakkalo” lowo geeshsha dancha ikkitara hasiˈneemmo. Wolootaho halaale kulleemmo woyite woˈma giddonkenni kulleemmohu iseraati.

9. Hundi Israeele gede gambooshshe haˈra kaaˈlitannonkehu hiittoonniiti? Gambooshshe haˈra kaaˈlitinohe gara kuli.

⁹ Gambooshshe haˈneemmo woyite Yihowa magansiˈnanni heeˈnoommo. Hundi Israeelera togo yine kulloonninsa: “Labballiˈne baalu dirunni sase hige, . . . doodhanno dargira Maganiˈne Kaaliiqi albira shiqqona.” (Mar. 16:16) Insa qaensanna gatensa agarannohu nookkiha agurte haˈra hasiissinonsa. Kayinni Yihowa togo yee qaale einonsa: “Ane Maganiˈne Kaaliiqi albira shiqqinanni yannara, baattoˈne ayino diyoranno.” (Ful. 34:24) Kuni Yihowa waajjannohu Israeelete manni woˈmunni woˈma iso addaxxe diru kiiro ayirrinsanni ayyaana ayirrisate haˈranno. Konni garinni insa lowo atoote afidhanno; lawishshaho, Maganu Seera albinni roore huwattanno; danchummasi hiincitanno hattono ammanate roduuwinsa ledo hagiirsiissanno yanna sayissanno. (Mar. 16:15) Ninkeno uminke horo agurre gambooshshe haˈneemmoha ikkiro togoo atoote afiˈneemmo. Gambooshshunniwa haranchonna xabbe leeltanno dawaro qolate qixxaambe haˈneemmo woyite Yihowa mageeshsha hagiidhannoro hanni hedi!

10. Faarso magansiˈranke widooti yineemmohu mayiraati?

¹⁰ Roduuwinke ledo faarso faarsineemmo woyite Yihowa magansiˈnanni heeˈnoommo. (Far. 28:7) Israeelete manni faarso faarsa magansiˈransa wido ikkitinohu gede asse laˈˈanno. Moote Daawiti qullaawu mini giddo faarsitannore 288 Leewaawoota doorino. (1 Dud. 25:1, 6-8) Xaa yannarano galatu faarso faarsine Magano banxeemmota leellisha dandiineemmo. Faarso faarsineemmo woyite roore hasiisanno coyi dancha huuro afiˈra diˈˈikkitino. Hanni tenne hendo: Coyiˈneemmo woyite ninke baalunku duucha hinge “soˈneemmo”; tini kayinni gambooshshunniwanna soqqanshonniwa coyiˈneemmokki gede diassitannonke. (Yai. 3:2) Hatteente gede ‘Faarseemmo woyite huuroˈya didanchate’ yine Yihowara galatu faarso faarsa agura dihasiissannonke.

11. Faarso 48:13 kultanno garinni maatete deerrinni Qullaawa Maxaafa xiinxallate yanna gaaˈma hasiissannonkehu mayiraati?

¹¹ Yihowa Qaale xiinxallineemmo woyitenna oosonkera isi daafira rosiinseemmo woyite Yihowa magansiˈnanni heeˈnoommo. Sambatu, Israeelete manni barru dilgonsa agure Yihowa ledo noonsa jaalooma illachishanno faro fanannonsa. (Ful. 31:16, 17) Ammanaminohu Israeelete manni oosonsara Yihowanna isi danchumma daafira rosiisannonsa. Ninkeno mittu mittunku Maganu Qaale nabbawatenna xiinxallate yanna gaaˈma hasiissannonke. Tini Yihowa magansiˈrate widooti; hattono isiwa shinqeemmo gede kaaˈlitannonke. (Far. 73:28) Qoleno, maate mitteenni Maganu Qaale xiinxallitanno woyite haaro ilama yaano oosonsa baxillaanchu iimi Anninke ledo dancha jaalooma kalaqidhanno gede kaaˈlitanni noonsa.—Faarso 48:13 nabbawi.

12. Yihowa xaadooshshu dunkaani giddo worranni uduunnicho loosate daafira noosi laonni maa ronseemmo?

¹² Magano magansiˈnanni mine minneemmo woyitenna gatamarreemmo woyite Yihowa magansiˈnanni heeˈnoommo. Yihowa xaadooshshu dunkaananna giddosi worranni uduunnicho loosa qullaawu loosi gede asse laˈˈanno. (Ful. 36:1, 4) Xaa yannarano Yihowa Gambooshshu Addaraashenna wole tiokiraasete minna minate looso qullaawa soqqansho gede asse laˈˈanno. Mitu roduuwi konne looso loossanni lowo yanna sayissanno. Maganu Mangiste looso konni garinni kaaˈlitanno roduuwa naada dihasiissannonke? Hige insa sabbakate loosono loossanno. Insa giddo mitu isinni suwisaano ikka  nafa hasidhara dandiitanno. Songote cimeeyye kuri diinaggaabbe loossanno roduuwi ikkadda ikkituro, suwisaano ikkitanno gede shoonte gimbaatu looso kaaˈlitannota leellisha dandiitanno. Gimbaatu loosira dandoo heedhunkerono hooggunkerono, ninke baalunku Magano magansiˈnanni mini ishinannokki gede towaata dandiineemmo.

13. Maganu Mangiste looso kaaˈlate fushshineemmo woxe ma garinni laˈˈa hasiissannonke?

¹³ Maganu Mangiste looso kaaˈlate woxe fushshineemmo woyite Yihowa magansiˈnanni heeˈnoommo. Israeele Yihowa albira mulla anganni shiqqannokki gede kulloonninsa. (Mar. 16:16) Insa angansa assitu deerrinni mito coye aa hasiissannonsa. Insa konni garinni, ayyaanaamittetenni insa kaaˈlate assinoonni qixxaawo naaddannota leellishshanno. Ninkeno Yihowa banxeemmotanna qixxeessinoonninketa ayyaanaamittete qixxaawo naandeemmota leellisha dandiineemmohu hiittoonniiti? Tenne assa dandiineemmoti mitte doogo anganke assitu deerrinni songonkeranna alamete doyicho loosira woxe fushshate. Tenne hajo daafira soqqamaasinchu Phaawuloosi togo yiino: “Aate halchiniro, nookkihu aaninni ikkikkinni afiˈnoonnihu bikkinni aa danchate.” (2 Qor. 8:4, 12) Fushshineemmo woxi gariha ikka hoogiro nafa giddonkenni kaˈne uyineemmo woxe Yihowa lowo geeshsha naadanno.—Maq. 12:42-44; 2 Qor. 9:7.

14. Lawishsha 19:17 kultanno garinni Yihowa kaaˈlo hasiissannonsa roduuwa kaaˈlate assineemmore ma garinni laˈˈanno?

¹⁴ Kaaˈlo hasiissannonsare ammanate roduuwanke kaaˈlineemmo woyite Yihowa magansiˈnanni heeˈnoommo. Yihowa buxanete uyitannore Israeelete manna kiisannonsata kulinonsa. (Mar. 15:7, 10) Addaho, kaaˈlo hasiissannosihu ammanate rodiinkera uyinummo kiiro Yihowa isira uyinoommohu gede asse laˈˈanno. (Lawishsha 19:17 nabbawi.) Lawishshaho Filiphisiyusi heeˈranno Kiristaani, usurame noohu Phaawuloosira mitore soyi yannara Phaawuloosi, “Kuni afanshiˈne suˈniitanno kakkalo gede Maganu hagiidhannohonna adhannoho” yiino. (Fil. 4:18) Songokkira noo roduuwa hedde, ‘Kaaˈla dandeemmo rodii noo ikka?’ yite ateneeto xaˈmi. Yihowa yannanke, wolqanke, dandoonkenna noonkeha maalaamittete coye horoonsiˈne kaaˈlo hasiissannonsare kaaˈlinanna laˈˈanno woyite lowo geeshsha hagiidhanno. Isi tenne iso magansiˈnanni heeˈnoommohu gede asse laˈˈanno.—Yai. 1:27.

15. Halaalunni Yihowa magansiˈrate yannanna sharro hasiissannoha ikkirono, tenne assa diqarrissanno yineemmohu mayiraati?

¹⁵ Halaalunni Yihowa magansiˈrate yannanna sharro hasiissanno. Kayinni tenne assa qarrissannota diˈˈikkitino. (1 Yoh. 5:3) Mayira? Korkaatuno Yihowa magansiˈneemmohu iso banxeemmo daafiraati. Hanni annisira mitore aara hedino qaaqqo hendo. Isi annisira aanno misile kayisanni lowo yanna gudinoha ikkara dandaanno. Tenne misile kayisanni lowo yanna gudino daafira digaabbanno. Isi annasi baxanno hattono tenne misile annisira uyino daafira hagiidhanno. Hatteente gede ninkeno Yihowa banxeemmo daafira yannankenna wolqanke horoonsiˈne iso magansiˈrate assineemmori hagiirsiisannonke.

16. Ibiraawoota 6:10 kultanno garinni ninke mittu mittunku Yihowa hagiirsiisate assineemmore isi ma garinni laˈˈanno?

¹⁶ Qaaqquullensa baxxanno annuwinna amuuwi ‘Qaaqquullinke mittu gari afansha aannonke’ yite diheddanno. Insa mittu qaaqqinsa assa dandaannore wolu qaaqqinsa assa dandaannokkita affino. Hatteente gede iimi Anninke ninke mittu mittunku assa dandiineemmore afanno. Affinoonni manninna baxxinanni  manni assa dandaannorinni roorinore assa dandiitinanniha ikkara dandaanno. Woy diru akkalle amaddinoˈne daafira, dhiwanni waadannoˈne daafira woy maatete qeechi nooˈne daafira wolootu assitannohu geeshsha assa hoogginara dandiitinanni. Hatto ikkiro hexxo mudhitinoonte. (Gal. 6:4) Yihowa loossinoonni looso dihawanno. Dancha giddonni kaˈine wolqaˈne assitu geeshsha uyitinanniha ikkiro Yihowa hagiidhanno. (Ibiraawoota 6:10 nabbawi.) Yihowa assate heddinoonniri maatiro nafa afanno. Isi, iso magansiˈrate assineemmorinni hagiirraamma ikkinammoranna harshammi yinammora hasiˈranno.

17. (a) Yihowa magansiˈneemmo woyite assineemmoha mito coye assa qarra ikkitunkero maa assa dandiineemmo? (b) “ Hagiirrikki Lexxanno Gede Assiˈri” yitanno saaxinera noori giddo ate kaaˈlinohehu hiikkonneeti?

¹⁷ Yihowa magansiˈneemmo woyite assineemmoha mito coye assa, lawishshaho hojju xiinxallo assiˈra woy soqqansho fula qarra ikkitinonkehalla ikki? Kuri coyibba duucha woyite assinummo kiiro albinni roore assa baxissankera dandiitanno hattono albinni roore hoˈro afiˈneemmo. Yihowa magansiˈrate assineemmore, mite ispoorte loosatenna muuziiqa gana rosiisiˈrate ledo heewisiisa dandiineemmo. Kuri coyibba saˈne saˈne calla assineemmoha ikkiro dandoonke woyyeessiˈra didandiineemmo. Kayinni hanni kuri coyibba barru baala assate murciˈnoommo yine hendo. Umo shiima shiima yanna calla rosiisiˈnanni gedensaanni seeda yanna rosiisiˈra dandiineemmo. Tenne assate sharramanke dancha guma abbitinota laˈneemmo woyite, kuri coyibba assineemmo yanna quqquxamme agadhinammoranna addinta banxammora dandiineemmo. Yihowa magansiˈneemmo woyite assineemmoreno hakko garinni woyyeessiˈra dandiineemmo.

18. Yihowa hede kalaqinonke garinni heeˈra dandiineemmohu hiittoonniiti? Tini maa afiˈneemmo gede assitannonke?

¹⁸ Woˈmu wodaninkenni Yihowa magansiˈneemmoha ikkiro isi hede kalaqinonke garinni heeˈnanni heeˈnoommo. Tini hagiirraamma ikkineemmonna dancha heeshsho heeˈneemmo gede hattono hegerera Yihowa magansiˈrate hexxo afiˈneemmo gede assitannonke. (Law. 10:22) Yihowa iso magansidhannorira qarru iillannonsa woyite kaaˈlannonsata anfoommo daafira giddoyidi keeri noonke. (Isa. 41:9, 10) Kalaqamu baalu ‘ayirrisanna guweenya’ aa hasiissannoha baxillaancho iimi Annanke magansiˈneemmo woyite hagiirraamma ikkineemmo gede assannonkehu ikkadu korkaati noonke!—Aju. 4:11.