1-2. Ino ty tokony hataontsika laha teantsika haneky ty fanompoantsika Ndranahary?

 INO ty avy an-tsainao ao laha vo maharè safà hoe “mivavaky”? Mety hieritseritsy olo raiky mandohaliky mivavaky noho miresaky amy Jehovah alohani-hiroroany vasa iha. Na mieritseritsy fianakavia raiky falifaly miaraky mianatsy Baiboly.

² Samby tafilitsy amy fanompoam-pivavaha iaby raha roe reo. Haneky ani-fanompoa ataon-drozy reo va Jehovah? Hanao ani-zay ie laha miezaky manao ty sitrapony rozy, sady tea noho manaja azy. Tena tea ani-Jehovah tsika. Haintsika fa maeva hotompoe ie ka teantsika ty hanompo azy amy fomba farani-ze soa.

3. Ino ty hodinihintsika amy lahatsoratsy toy ato?

³ Hodinihintsika amy lahatsoratsy toy ato hoe ino ty karaza fanompoa nekeni-Jehovah taloha tany, bakeo tsika handiniky fomba valo teani-Jehovah hanompoantsika azy henanizao. Lafa mianatsy ani-raha reo tsika, le eritsereto hoe akory ty hanasoavanao ty fanompoanao. Hohenteantsika koa hoe manino ro mahafalifaly ty manompo ani-Jehovah amy fomba itiavany azy.

4. Akory ty nampisehoani-mpanomponi-Jehovah taloha tany hoe nanaja ani-Jehovah rozy sady tea azy?

⁴ Maro ty olo tsy nivaliky taloha tany. Anatini-zay, ohatsy, ry Abela, Noa, Abrahama, noho Joba. Nasehon-drozy hoe nanaja ani-Jehovah rozy sady tea azy. Tamy fomba akory? Nanoriky ty safà-Ndranahary rozy, nino azy, le nanao fanatitsy ho azy. Tsy miresaky tsipiriany mikasiky ty raha iaby tokony ho nataon-drozy  ty Baiboly. Fe azo antoky hoe nanao ze fara herin-drozy rozy mba hanomeza voninahitsy ani-Jehovah, le zay ro nahavy ani-Jehovah naneky ty fanompoan-drozy. Tafara atoy, nameani-Jehovah ho ahi-ty taranakini-Abrahama ty Lalànani-Mosesy. Misy toromariky mazava soa anatini-lalàna rey ao hoe akory ty teani-Jehovah hanompoa azy.

5. Laha mikasiky ty fivavaha marina, ino ty raha niova tafarani-nahafatesani-Jesosy noho nameloma azy?

⁵ Tsy nila nanaraky ty Lalànani-Mosesy sasy hoasani-Jehovah ty olo tafarani-nahafatesani-Jesosy noho nameloma azy. (Rom. 10:4) Mila manaraky lalàna vaovao ty Kristiana, tsy ino zay fa “ty lalànani-Kristy.” (Gal. 6:2) Manoriky ani-“lalàna” io rozy laha manahaky ty modelini-Jesosy noho manaraky ty raha nampianariny, fa tsy hoe manao tsianjery ani-lalàna io noho manaraky fitsipiky maro biby avao. Miezaky manahaky ani-Kristy koa ty Kristiana henanizao mba hampifalifalea ani-Jehovah noho hahazoa famelombeloma.​—Mat. 11:29.

6. Ino ty tokony hataontsika laha teantsika hahasoa antsika lahatsoratsy toy?

⁶ Handiniky fomba valo hanompoantsika ani-Jehovah tsika henanizao. Lafa mandiniky ty kiraidraiky amy raha reo tsika, le eritsereto zao: ‘Ino ty raha mbo mila iezahako amy raha toy?’ Afaky mieritseritsy koa iha hoe: ‘Azoko atao va ty manasoa ty fanompoako?’ Tokony hahafalifaly anao ty ezaky vitanao henanizao, fe tokony hangataky amy Jehovah koa iha mba hanampy anao hahita ty raha mbo mila hasoavinao.

7. Manao akory ty fahitani-Jehovah ty vavaky ataontsika lafa baka am-pontsika?

⁷ Manompo ani-Jehovah tsika lafa mivavaky aminy. Ampitovizini-Baiboly amy emboky manitsy ty vavaky ataontsika. Voaoma soa emboky hatolotsy amy tranolay masy noho amy tempoly ao rey. (Sal. 141:2) Manimanitsy ty fahareza-Ndranahary ani-emboky rey ka falifaly ie. Manahaky ani-zay koa fa “mahafalifaly” azy ty vavaky baka am-po ataontsika, ndre safà tsotsotra avao aza ro ampiasantsika. (Ohab. 15:8; Deot. 33:10) Afaky matoky zany tsika fa mahafalifaly ty foni-Jehovah ty maharè antsika manambara ty fitiavantsika azy noho ty fankasitrahantsika azy. Teany laha volanintsika aminy ty raha mampiasa loha antsika, ty raha tamanintsika, noho ty raha irintsika. Ka alohani-hiresaha amy Jehovah amy vavaky zany, le eritsereto soa hoe ino iaby ty raha hovolaninao aminy. Hanolotsy “emboky manitsy” farani-ze soa ho ani-Babanao an-danitsy any iny iha amy zay.

8. Ino ty azontsika atao mba hiderà a Ndranahary?

⁸ Manompo ani-Jehovah tsika lafa midera azy. (Sal. 34:1) Midera ani-Jehovah tsika lafa resahintsika amin’olo hafa ty toetsy soany noho ty raha nataony. Hahita raha soa maro biby hovolany mikasiky ani-Jehovah tsika laha mankasitraky azy. Hahita antony maro hiderà ani-Jehovah koa tsika lafa mandiniky ty raha soa iaby nataony ho antsika. Ty asa fitoria ro fomba tena soa ahafahantsika ‘manao soro fiderà ho ahi-Ndranahary, zany hoe ty vokatsini-sony.’ (Heb. 13:15) Tokony hoeritseretintsika soa ty raha hovolanintsika amy Jehovah alohani-hivavahantsika aminy. Manahaky ani-zay koa lafa hitory. Soa laha eritseretintsika soa sandrany ty raha horesahintsika amy ze olo hitoriantsika. Teantsika laha tena soa “ty soro fiderà” ataontsika. Zay ty antony mahavy antsika mafana fo lafa mizara fahamarina amin’olo.

9. Ino iaby ty soa azoni-vahoakini-Jehovah lafa rozy mandeha mivory? Miresaha raha nihitanao na niainanao.

 ⁹ Manompo ani-Jehovah tsika lafa manatriky fivoria. Zao ty didy namea ho ani-Israelita taloha tany: “Intelo santao ty lahilahy iaby aminao eo ro hiseho anatrehani-Jehovah Ndranaharinao, amy ze pilasy filiny.” (Deot. 16:16) Tsy maintsy hanenga ty tranon-drozy noho ty fambolean-drozy rozy. Tsy hisy hiamby zany raha reo. Fe fa nampitamà an-drozy Jehovah hoe: “Tsy hisy olo haniry ty taninao lafa miakatsy hahita ty tarehini-Jehovah Ndranaharinao [iha].” (Eks. 34:24) Tena natoky ani-Jehovah ty Israelita ka nanatriky ani-fety reo avao rozy santao. Nandramby soa maro rozy vokatsini-zay. Lasa nahay raha maro mikasiky ty Lalàna-Ndranahary, ohatsy, rozy, afaky nametsivetsy ty hasoani-Jehovah, sady falifaly niaraky tamy mpiara-manompo amin-drozy rey. (Deot. 16:15) Maro koa ty soa ho azontsika lafa manao ze azontsika atao tsika mba hanatreha fivoria. Eritsereto koa hoe manao akory ty hafaleani-Jehovah lafa tsika parè hanome valin-teny boribory sady voaoma soa.

10. Manino ro azo volany hoe tampany bevata amy fanompoa ataontsika ty hira?

¹⁰ Manompo ani-Jehovah tsika lafa mihira miaraky amy rahalahy noho anabavintsika reo. (Sal. 28:7) Tampany bevata tamy fanompoam-pivavaha nataoni-Israelita rey ty hira. Nanendry Levita 288 ho mpihira tamy tempoly ao mihintsy aza Davida Mpanjaka. (1 Tan. 25:1, 6-8) Afaky manambara ty fitiavantsika a Ndranahary koa tsika henanizao lafa manao hira fiderà. Tsy voatery ho soa feo tsika vo afaky manao ani-zay. Diniho zao: “Manao hadisoa matetiky tsika iaby” lafa mivola, fe tsy misaka antsika tsy hivola raha zay lafa amy fiangona eo na lafa manompo. (Jak. 3:2) Manahaky ani-zay koa fa mbo afaky mihira fiderà ho ani-Jehovah avao tsika ndre mieritseritsy aza hoe tsy soa ty feontsika.

11. Laha hentea ty Salamo 48:13, manino tsika ro tokony hanoka fotoa hianara Baiboly miaraky amy fianakaviantsika?

¹¹ Manompo ani-Jehovah tsika lafa mianatsy ty Safàny noho mampianatsy ty anakintsika mikasiky azy. Tsy niasa ty Israelita saky Sabata ka afaky nanatanjaky ty fifandrambesan-drozy amy Jehovah. (Eks. 31:16, 17) Nampianatsy ty anany mikasiky ani-Jehovah noho ty hasoa toetsiny ze Israelita tsy nivaliky. Tokony hanoka fotoa hamakia noho hianara ty Safà-Ndranahary koa tsika henanizao. Tampany amy fanompoantsika ani-Jehovah raha zay sady manampy antsika hifandramby marìny aminy. (Sal. 73:28) Ka lafa miaraky mianatsy amy fianakaviantsika tsika, le afaky manampy ty anakintsika hana fifandrambesa manoka amy Babantsika be fitiava an-danitsy any iny.​—Vakio Salamo 48:13.

12. Ino ty ianaranao baka amy fomba fahitani-Jehovah ty asani-azy namboatsy fitaova tamy tranolay masy ao rey?

¹² Manompo ani-Jehovah tsika lafa mamboatsy noho mikojakoja ty pilasy fivavahantsika. Mivola ty Baiboly fa “asa masy” ty asa fanamboara tranolay masy noho ty fitaova iaby tanatiny ao. (Eks. 36:1, 4) Mbo manahaky ani-zay avao koa henanizao. Amy Jehovah, le fanompoa masy ty asa fanorena Efitrano Fanjakà noho ty trano hafa ampiasani-fandamina. Mandany fotoa maro mba hanaova ani-raha reo ty rahalahy noho anabavy sisany. Tsy ankasitrahantsika va asa bevata ataon-drozy ho ani-Fanjakà iny io? Mazava ho azy fa mbo mandramby anjara amy asa fitoria koa rozy. Ty sisany amin-drozy aza mety maniry ho lasa mpisava lala mihintsy. Asehoni-anti-panahy hoe manoha ty asa fanorena  rozy laha manenga ani-rahalahy noho anabavy miasa mafy reo hanao mpisava lala lafa mahafeno fepetra rozy. Ndre mana fahaiza amy asa fanorena tsika ndre tsy mana, le samby afaky mandramby anjara amy fanadiova noho fikojakojà ani-trano rey iaby.

13. Manao akory ty tokony ho fahitantsika ty fanomeza ataontsika mba hanohana ty asani-Fanjakà iny?

¹³ Manompo ani-Jehovah tsika lafa manao fanomeza mba hanohana ty asani-Fanjakà iny. Tsy tokony handay tanam-polo ty Israelita lafa nandeha tanatrehani-Jehovah eo. (Deot. 16:16) Tokony handay fanomeza rozy, arakaraky ze raha nananan-drozy. Nasehon-drozy baka amy zay hoe nankasitraky ty raha iaby nataoni-Jehovah ho an-drozy rozy. Akory ty ampisehoantsika hoe tea ani-Jehovah tsika sady ankasitrahantsika ty raha iaby nataony ho antsika? Manao ani-zay, ohatsy, tsika laha manome drala arakaraky ze ananantsika mba hanohana ty fiangona misy antsika noho hanohana ty asa atao amy tany toy iaby. Nivola apostoly Paoly hoe: “Laha parè hanome ty olo raiky, le ankasitraha bevata raha zay laha mifanaraky amy ze ananany fa tsy mifanaraky amy ze tsy ananany.” (2 Kor. 8:4, 12) Lafa vokatsini-fontsika ty fanomeza ameantsika ani-Jehovah le lafovily aminy avao ndre kelikely manao akory.​—Mar. 12:42-44; 2 Kor. 9:7.

14. Laha hentea ty Ohabolana 19:17, manao akory ty fahitani-Jehovah ty fanampea ameantsika ani-rahalahintsika mila fanampea rey?

¹⁴ Manompo ani-Jehovah tsika lafa manampy mpiara-manompo mila fanampea. Nampitamà Jehovah fa hotahiny ze Israelita miferinay ty mahantra. (Deot. 15:7, 10) Amy Jehovah zany, saky tsika manampy mpiara-manompo mila fanampea, le sahala hoe manome Azy zay. (Vakio Ohabolana 19:17.) Lafa nandefa fanomeza ho ani-Paoly tam-pigadrà any, ohatsy, ty Kristiana ta Filipy any, le nivola Paoly fa “soro ankasitraha-Ndranahary raha rey sady tena mahafalifaly azy.” (Fil. 4:18) Diniho amy zay ty amy fiangona misy anareo eo, le eritsereto zao: ‘Ia ty olo azoko ampea?’ Falifaly Jehovah lafa mahita hoe ampiasantsika hanampea ani-ze mila fanampea ty fotoantsika, ty herintsika, ty fahaizantsika noho ty raha ananantsika. Aminy, le anisani-fanompoa ataontsika ho azy raha zay.​—Jak. 1:27.

15. Mitaky fotoa noho ezaky ty manaraky fivavaha marina, fe manino raha zay ro tsy mavesatsy?

¹⁵ Mitaky fotoa noho ezaky ty fanompoa ani-Jehovah. Fe tsy mavesatsy raha zay. (1 Jaona 5:3) Ino ty antony? Satria ty fitiavantsika ani-Jehovah ro mahavy antsika manompo azy. Mba eritsereto moa hoe misy anakajà raiky ta hanome raha ho ani-babany. Mety handany lera maro ie mba hanamboara sary ho ani-babany. Fe tsy anenenani-ajà iny raha zay. Teany babany ka falifaly ie manome ani-sary iny azy. Manahaky ani-zay koa fa teantsika Jehovah ka falifaly tsika mampiasa ty fotoantsika noho ty herintsika hanompoa azy.

16. Laha hentea ty Hebreo 6:10, manao akory ty fahitani-Jehovah ty ezaky ataontsika kiraidraiky mba hampifalefalea azy?

¹⁶ Tsy mitamà ty ray aman-dreny be fitiava hoe hitovy iaby ty fanomeza ho azon-drozy baka amy ty anan-drozy. Hain-drozy fa tsy mitovy ajà reo sady tsy mitovy koa ty raha vitan-drozy. Manahaky ani-zay koa Babantsika an-danitsy any iny. Hainy hoe ino ty raha azontsika kiraidraiky atao. Mety hahavita raha maro mandilatsy ty olo hainao noho teanao iha. Na mety tsy hahavita be mandilatsy an-drozy  iha satria fa be, na tsy salama, na tratsini-andraikitsy amy fianakavia eo. Fe ka kivy. (Gal. 6:4) Tsy hohalinoni-Jehovah mihintsy ty asa ataonao. Ho falifaly ie laha manome ze farani-soa iha sady antony soa ro mahavy anao manao ani-zay. (Vakio Hebreo 6:10.) Hitani-Jehovah iaby ndre ty faniria anainao any aza. Teany ho falifaly noho ho afa-po amy fanompoa ataonao ho azy iha.

17. a) Ino ty azontsika atao laha hitantsika hoe sarotsy amintsika ty manatanteraky ty sisany amy fanompoantsika? b) Fa nanampy anao va ty raiky amy raha aseho amy efajoro hoe “ Tovono ty Hafaleanao” reo? Tantarao.

¹⁷ Ino ty azontsika atao laha sarotsy amintsika ty manatanteraky ty sisany amy raha niresahintsika rey, ohatsy hoe manao fianara am-bata na mitory? Ho hitantsika fa arakaraky ty anaovantsika ani-raha rey, le vomaiky ho teantsika ty manao azy sady hahasoa antsika koa. Manahaky olo ta hahay laboly na ta hahay hititiky gitara rey avao tsika. Laha tsy manao ani-raha iny matetitetiky tsika le mety tsy hahay mihintsy. Fe hanao akory laha manapa-kevitsy tsika hoe hataontsika sanandro raha iny? Mety ho tselatsela avao tse ty anaovantsika azy amy voalohany, fe hitombo tsikelikely zay lafa mandeha ty fotoa. Ka lafa hitantsika hoe misy vokany soa ty ezaky ataontsika, le mety fa tsy ho linintsika ty hiaviani-fotoa iny sady ho falifaly iaby aza tsika manao azy. Manahaky ani-zay avao koa ty fanompoa ataontsika.

18. Ino ty raha farani-ze bevata azontsika atao, le hanao akory ty vokany laha manao ani-zay tsika?

¹⁸ Ty manao ze fara herintsika amy fanompoa ani-Jehovah ro raha farani-ze bevata azontsika atao. Laha manao ani-zay tsika, le ho sambatsy noho ho afa-po, sady afaky mitamà hoe hanompo ani-Jehovah avao tsika zisiky farany. (Ohab. 10:22) Hilamy koa ty saintsika satria haintsika hoe hanampy antsika Jehovah lafa miatriky raha sarotsy tsika. (Isaia 41:9, 10) Maro zany ty antony mahafalifaly antsika lafa tsika manompo ani-Babantsika be fitiava an-danitsy any iny. “Maeva hamea voninahitsy noho haja” ie satria namoro ty kila raha iaby!​—Apok. 4:11.