1-2. O le ā e tatau ona tatou faia ina ia talia ai e le Atua la tatou tapuaʻiga?

 O LE ā e oso ane i lou mafaufau pe a e faalogo i le upu “tapuaʻi”? Atonu e te mafaufau ai i se uso lotomaulalo o loo tootuli i autafa o lona moega, ma sasaa atu lona loto iā Ieova e ala i le tatalo. Pe atonu foʻi e te mafaufau i se aiga o loo fiafia e suʻesuʻe le Afioga a le Atua.

² Ua faailoa mai i nei faaaʻoaʻoga o loo aofia i latou uma nei i vala o le tapuaʻiga iā Ieova. Pe e talia e Ieova la latou tapuaʻiga? E talia e Ieova la latou tapuaʻiga pe a ōgatusa ma lona finagalo, ma faavae aʻe i le alofa ma le faaaloalo iā te ia. E tatou te alolofa tele iā Ieova. E tatou te iloa e tatau ona tapuaʻi iā Ieova, ma e tatou te mananaʻo e faia le mea e sili e tapuaʻi atu ai iā te ia.

3. O le ā o le a tatou iloiloina i lenei suʻesuʻega?

³ O le a tatou talanoaina i lenei suʻesuʻega le ituaiga o tapuaʻiga na talia e Ieova i aso anamua. O le a tatou iloiloina ai foʻi vala e valu o le tapuaʻiga e talia e Ieova i aso nei. A o tatou talanoaina na vala, e mafai ona tatou mafaufau ai i auala e faaleleia atili ai la tatou tapuaʻiga iā Ieova. O le a tatou talanoaina ai foʻi māfuaaga e tatou te maua ai le fiafia ona o le tapuaʻiga moni.

4. Na faapefea ona faaalia e tane faamaoni anamua le faaaloalo ma le alofa mo Ieova?

⁴ Na faaalia e tane faamaoni e pei o Apelu, Noa, Aperaamo ma Iopu, le faaaloalo ma le alofa mo Ieova. E faapefea? E ala i lo latou usiusitaʻi, faatuatua ma taulaga na latou ofoina atu iā Ieova. E lē o auʻiliʻili mai i le Tusi Paia mea uma na latou faia e tapuaʻi ai iā Ieova. Ae na latou faia le mea sili e tapuaʻi ai iā Ieova ma na ia talia la latou tapuaʻiga. Na tuuina atu e Ieova i ē na tupuga mai iā Aperaamo le Tulafono a Mose. Na aofia i na tulafono ni faatonuga maʻoti i le auala na finagalo Ieova e tapuaʻi atu ai iā te ia.

5. O le ā le suiga i le tapuaʻiga moni ina ua mavae le maliu ma le toetū o Iesu?

⁵ Ina ua mavae le maliu ma le toe faatūina mai o Iesu, e leʻi toe taliaina e Ieova le tapuaʻiga e faaaogā ai le Tulafono a Mose. (Roma 10:4) Na finagalo Ieova e usitaʻia e Kerisiano se tulafono fou, “le Tulafono a le Keriso” e tapuaʻi atu ai iā te ia. (Kala. 6:2) E lē manaʻomia ona taulotoina lenā “tulafono,” pe mulimuli i se lisi o mea e tatau ma mea e lē tatau ona fai. Ae e latou te usitaʻi i lenā tulafono, e ala i le faaaʻoaʻo i le faaaʻoaʻoga a Iesu ma mulimuli i ana aʻoaʻoga. E faia foʻi e Kerisiano i aso nei le mea sili latou te mafaia e mulimuli ai i le faaaʻoaʻoga a le Keriso, ina ia faafiafiaina ai Ieova ma “faafouina ai” i latou.​—Mata. 11:29.

6. E faapefea ona aogā iā i tatou lenei suʻesuʻega?

⁶ Ia fesili ifo a o tatou talanoaina vala taʻitasi o la tatou tapuaʻiga, ʻPo o faaleleia le auala o lo o oʻu tapuaʻi ai iā Ieova? Pe e mafai ona faaleleia le auala ou te tapuaʻi ai?’ E tatau ona e fiafia i suiga lelei ua e faia i le auala e te tapuaʻi ai. Peitaʻi, e te manaʻo e tatalo iā Ieova ma mafaufau i auala e manaʻomia ona faaleleia atili ai lau tapuaʻiga iā te ia.

7. O le ā le silafaga a Ieova i a tatou tatalo mai le loto?

⁷ E tatou te tapuaʻi iā Ieova pe a tatou tatalo iā te ia. Ua faatusaina a tatou tatalo i le mea manogi na saunia lelei, lea na ofo atu i le faleʻie paia ma le malumalu mulimuli ane ai. (Sala. 141:2) Na maua mai i lenā mea manogi se manogi lelei na fiafia i ai le Atua. “E fiafia” foʻi le Atua i a tatou tatalo mai le loto, e tusa lava pe e faaaogā ai upu faigofie. (Faata. 15:8; Teu. 33:10) E iai māfuaaga lelei e tatou te talitonu ai, e fiafia le finagalo o Ieova pe a faafofoga mai o faamatala atu lo tatou alofa ma le lotofaafetai iā te ia i a tatou tatalo. E finagalo foʻi o ia ina ia taʻu atu o tatou popolega, o mea e tatou te faamoemoe i ai ma o tatou faanaunauga. A o leʻi tatalo atu iā Ieova, ia mafaufau muamua i mea o le a tatou tatalo atu ai. O le faia faapea, o le a tatou ofoina atu ai i lo tatou Tamā i le lagi le “mea manogi” sili.

8. O le ā se tasi o avanoa sili ona lelei e tatou te vivii atu ai i le Atua?

⁸ E tatou te tapuaʻi iā Ieova pe a tatou vivii atu iā te ia. (Sala. 34:1) E tatou te vivii iā Ieova e ala i le faamatalaina atu o lo tatou talisapaia o ona uiga matagofie ma ana galuega. E tatou te vivii atu ona o lo tatou lotofaafetai. O le faaalu o se taimi e manatunatu loloto ai i le lelei o Ieova ona o mea uma ua ia faia mo i tatou, o le a tele ai pea māfuaaga e tatou te vivii atu ai iā te ia. O se tasi o avanoa e sili ona lelei e ʻtatou te ofo soo atu ai i le Atua taulaga o viiga, o le fua o laugutu.’ (Epe. 13:15) E pei ona manaʻomia ona tatou mafaufau lelei muamua i mea e tatalo atu ai iā  Ieova, e manaʻomia foʻi ona tatou mafaufau lelei muamua i mea e talanoa atu ai i tagata a o leʻi ō i le talaʻiga. E tatou te mananaʻo e faia le mea sili e avatu ai “taulaga o viiga.” O le māfuaaga lenā e tatou te faaalia ai le aasa pe a tatou faasoa atu le upu moni i isi.

9. E faapefea ona tatou maua aogā i le auai i sauniga e pei o tagata Isaraelu anamua? Aumai se faataʻitaʻiga o se auala na aogā ai sauniga iā te oe.

⁹ E tatou te tapuaʻi iā Ieova pe a tatou auai i sauniga. Na faatonuina tagata Isaraelu anamua “e faatolu i le tausaga ona tutū ou tane uma i luma o Ieova lou Atua i le nofoaga e filifili e ia.” (Teu. 16:16) Na tuua o latou fale ma faatoʻaga e aunoa ma se tasi e leoleoina. Ae na folafola atu e Ieova, “e leai se tasi e manaʻo i lou fanua a o e alu aʻe e vaai i fofoga o Ieova lou Atua.” (Eso. 34:24) Talu ai na maufaatuatuaina atoatoa e tagata Isaraelu Ieova, o lea na latou auai ai i na tausamiga i tausaga taʻitasi. Na matuā tauia i latou. Na faateleina lo latou malamalama i tulafono a le Atua, manatunatu loloto i lona lelei ma maua ai faatasiga faalaeiau ma isi tagata tapuaʻi. (Teu. 16:15) E tatou te maua foʻi na aogā, pe a faia faataulaga ina ia auai i sauniga faa-Kerisiano. Seʻi mafaufau i le faafiafiaina o Ieova, pe a tatou sauniuni e ofo atu ni tali pupuu ma uigā i a tatou sauniga.

10. E faapefea ona avea le usuina o pese ma vaega tāua o le tatou tapuaʻiga iā Ieova?

¹⁰ E tatou te tapuaʻi iā Ieova pe a tatou usuina ona viiga. (Sala. 28:7) Na avea le usuina o pese o se vaega tāua o le tapuaʻiga a tagata Isaraelu. Na tofia e le tupu o Tavita tagata sā Levi e 288 e pepese i le malumalu. (1 No. 25:1, 6-8) I aso nei, e faailoa atu e tatou te alolofa i le Atua, pe a tatou usuina pese o ona viiga. E lē o le lelei o tatou leo le mea e sili ona tāua. Mātau le manatu lenei: “E sesē i tatou uma i mea e tele” pe a tatou tautatala, ae e lē mafai ona taofia ai lo tatou tautatala i le faapotopotoga ma le talaʻiga. (Iako. 3:2) E lē tatau la ona avea le lē lelei o tatou leo, ma māfuaaga e taofia ai le usuina o pese o viiga o Ieova.

11. I le Salamo 48:13, aiseā e tatau ai ona faatulaga se taimi e suʻesuʻe faatasi ai le Tusi Paia o se aiga?

¹¹ E tatou te tapuaʻi iā Ieova pe a suʻesuʻe lana Afioga ma aʻoaʻo le fanau e faatatau iā te ia. O le Sapati o se avanoa e tuu ese ai e tagata Isaraelu a latou galuega masani o aso taʻitasi, ae uaʻi atu i le faamalosia o la latou faiā ma Ieova. (Eso. 31:16, 17) Na aʻoaʻo ai foʻi e tagata Isaraelu faamaoni a latou fanau e faatatau iā Ieova ma lona lelei. E tatau foʻi ona faatulaga se taimi e tatou te faitau ma suʻesuʻe ai le Afioga a le Atua. O se vaega lenā o le tapuaʻiga iā Ieova ma e fesoasoani e tatou te māfana atu ai iā te ia. (Sala. 73:28) Pe a suʻesuʻe faatasi o se aiga, o le a tatou fesoasoani ai i fanau e atiaʻe se faiā māfana ma lo tatou Tamā alofa i le lagi.​—Faitau le Salamo 48:13.

12. O le ā e tatou te aʻoaʻoina mai i le silafaga a Ieova iā i latou na fausiaina mea na faaaogā mo le faleʻie paia?

¹² E tatou te tapuaʻi iā Ieova a o tatou fausia ma tausia lelei nofoaga mo tapuaʻiga. Ua faapea mai le Tusi Paia, o se “galuega paia” le fausiaina o le faleʻie paia ma mea uma na faaaogā ai i ina mo le tapuaʻiga. (Eso. 36:1, 4) I aso nei, o se auaunaga paia foʻi iā Ieova le fausiaina o Maota mo Sauniga ma isi nofoaga mo tapuaʻiga. E faaalu e nisi uso ma tuafāfine se taimi tele mo na galuega. Pe e tatou te talisapaia lo latou sao tāua mo galuega o le Malo? E auai foʻi na uso ma tuafāfine i le galuega talaʻi. Atonu e mananaʻo nisi o i latou e auauna o ni paeonia. E talisapaia e toeaina o faapotopotoga le galulue mamafa o nei uso  ma tuafāfine i galuega faufale, e ala i le lē faatalatū e tofia i latou o ni paeonia pe a agavaa. E tusa pe e iai ni o tatou tomai i galuega faufale pe leai, ae e mafai e i tatou uma ona faia se sao i le tausia lelei o nei fale.

13. O le ā la tatou vaaiga i foaʻi e lagolagoina ai galuega o le Malo?

¹³ E tatou te tapuaʻi iā Ieova pe a lagolagoina galuega o le Malo e ala i a tatou foaʻi tauofo. Na tatau ona ō atu tagata Isaraelu i na tausamiga ma avatu se meaalofa mo Ieova, e tusa ai ma o latou tulaga. (Teu. 16:16) O le faia faapea, ua faailoa atu ai lo latou talisapaia o faatulagaga uma ua faia e Ieova mo lo latou lelei faaleagaga. E faapefea ona faaalia atu lo tatou alofa iā Ieova, ma le talisapaia o sauniuniga faaleagaga ua tatou maua? O se tasi o auala, o le faia lea o foaʻi tauofo i a outou faapotopotoga ma le galuega i le lalolagi aoao, e tusa ma o tatou tulaga. Na faamatala e le aposetolo o Paulo: “Auā afai e lotomalie se tasi e foaʻi atu, e talileleia lea e tusa ma mea ua iā te ia, ae e lē tusa ma mea e lē o iā te ia.” (2 Kori. 8:4, 12) E talisapaia e Ieova so o se foaʻi e tatou te faia, e tusa lava po o le ā le laʻitiiti.​—Mare. 12:42-44; 2 Kori. 9:7.

14. I le Faataoto 19:17, o le ā le silasila a Ieova pe a tatou fesoasoani i uso ma tuafāfine o loo manaʻomia le fesoasoani?

¹⁴ E tatou te tapuaʻi iā Ieova pe a fesoasoani i uso Kerisiano o loo manaʻomia le fesoasoani. Na folafola mai e Ieova o le a ia tauia tagata Isaraelu e faaalia le agalelei i ē matitiva. (Teu. 15:7, 10) O taimi uma e tatou te fesoasoani ai i o tatou uso talitonu o loo manaʻomia le fesoasoani, e silasila Ieova i lenā mea o se meaalofa iā te Ia. (Faitau le Faataoto 19:17.) O se faataʻitaʻiga, ina ua avatu e Kerisiano i Filipi se meaalofa iā Paulo a o falepuipui, na ia taʻua na meaalofa “o le taulaga talileleia, e matuā finagalo malie i ai le Atua.” (Fili. 4:18) Ia mafaufau iā i latou i lau faapotopotoga ma fesili ifo, ʻPe iai se tasi e mafai ona ou fesoasoani i ai?’ E faafiafiaina Ieova pe a silasila mai o loo faaaogā o tatou taimi, malosi, tomai ma meafaitino e fesoasoani ai iā i latou o loo manaʻomia se fesoasoani. E silasila i ai Ieova o se vaega o la tatou tapuaʻiga.​—Iako. 1:27.

15. Aiseā e lē o se avega mamafa ai le faaalu o le tele o le taimi ma taumafaiga mo le tapuaʻiga moni?

¹⁵ O le tapuaʻiga moni e tele le taimi ma taumafaiga e manaʻomia ai. Ae e lē o se avega mamafa. (1 Ioa. 5:3) Aiseā? Talu ai e tatou te tapuaʻi iā Ieova ona e tatou te alolofa iā te ia. Seʻi mafaufau i se tamaitiiti e manaʻo e avatu se meaalofa i lona tamā. Atonu e na te faaalu le tele o le taimi e tusi ai se ata mo lona tamā. E lē popole le tamaitiiti i le tele o le taimi e tusi ai lenā ata. E alofa o ia i lona tamā, ma e fiafia e avatu lenā meaalofa iā te ia. O lo tatou alolofa foʻi iā Ieova e tatou te fiafia ai e faaaogā o tatou taimi ma le malosi e tapuaʻi ai iā te ia.

16. I le Eperu 6:10, o le ā le silafaga a Ieova i a tatou taumafaiga e faafiafia o ia?

¹⁶ E lē faatalitalia e mātua alolofa e tutusa meaalofa e avatu e a latou fanau. E latou te iloa e eseese uma tamaiti ma o latou tulaga. E malamalama foʻi lo tatou Tamā i le lagi i o tatou tulaga taʻitoʻatasi. Atonu e tele atu mea e mafai ona e faia, nai lo i latou e te iloa ma alofa i ai. Pe atonu foʻi e lē mafai ona e faia le tele o mea e pei o isi, ona o le soifua matua, maʻi po o tiute tauave i le aiga. Aua e te lotovaivai ai. (Kala. 6:4) E lē mafai ona faagaloina e Ieova au galuega. E faafiafiaina o ia pe a e faia le mea sili ma ia saʻo le uunaʻiga e faia  ai. (Faitau le Eperu 6:10.) E silafia e Ieova faanaunauga o lou loto, ma e finagalo ia e fiafia ma faamalieina i le tapuaʻiga ua mafai ona e avatu iā te ia.

17. (a) O le ā e tatou te faia pe a faigatā ona faia nisi o vala o la tatou tapuaʻiga? (e) O le ā se vala o loo taʻua i le pusa “ Ia Faateleina Lou Fiafia” ua fesoasoani iā te oe?

¹⁷ O le ā e tatou te faia pe a faigatā ona faia nisi o vala o la tatou tapuaʻiga, e pei o le faia o au lava suʻesuʻega po o le auai i le talaʻiga? O le tele e faia ai na mea, o le faateleina foʻi lenā o lo tatou olioli ma maua ai aogā. E ono faatusaina la tatou tapuaʻiga i le faia o se gaoioiga e pei o le faamalositino ma le tāina o se meafaifaaili. Pe afai e seāseā ona tatou faia, e lē mafai ona iai se faaleleiga. Ae seʻi faapea e fai i aso uma, atonu e amata ona fai mo sina minute ma faaauau ai mo se taimi umi. A o mātauina iʻuga lelei o a tatou taumafaiga, o le a tatou tulimataʻia taimi e faia ai ma matuā fiafia ai. Pe e mafai ona e faatatauina lenei faataʻitaʻiga i nisi o vala o la tatou tapuaʻiga e faigatā ona fai?

18. O le ā le mea e sili ona tāua i o tatou olaga, ma o ā iʻuga?

¹⁸ O le tapuaʻi iā Ieova ma le lotoatoa, o le mea sili lenā ona tāua i o tatou olaga. O le faia faapea, o le a tatou maua ai le fiafia ma le faamalieina i le olaga, ma ua iā i tatou le faamoemoe e tapuaʻi iā Ieova e faavavau. (Faata. 10:22) Ua tatou maua le filemu o le mafaufau, ona ua tatou iloa e fesoasoani Ieova i ona tagata tapuaʻi pe a feagai ma faigatā. (Isa. 41:9, 10) Maʻeu le tele o māfuaaga lelei e tatou te fiafia ai, a o tapuaʻi i lo tatou Tamā alofa o lē ua tatau “ona mauaina le viiga, ma le mamalu” mai i ana foafoaga uma!​—Faaa. 4:11.