1-2. Kɛkɔnge k’okokaso nangha djɛ Ndjambe ndjawola ɔtɛmwɛlɔ wɔso?

 KƐKƆNGE k’okanelakɛ winá w’okɛ itepela ‘ɔtɛmwɛlɔ’? Mbala imɔtshi wɛ nkanelaka wɔnanyɔ ɔmɔtshi wombokfusama awɔngɔ entshupa la mbeto kɛnde ko alɔmba Yehova l’oloko ɔmɔ. Kana ongokanelake nkfumbo kɛmɔtshi kelekɔ l’osasa winá wonanghawɔ wekelo wɔ Bible.

² Lá mbamba yɛkɔ ipe, wanɛ wa nangha akambo wasɔ ɔtɛmɔlawɔnde ntɛmɔla. Yehova angawola ɔtɛmwɛlɔ wɔwɔ? Nde angawola ntsha w’ɔtɛmɔla lá yopo yokana l’ikanyi yɛnde la ntsha wanangha la ngandji edjinge la dilɛmɛlɔ. Iso nkɔpaka Yehova efula. Iso ndjewaka ente nde ɛdje djɛ ntɛmɔma, endjinge iso nkɔpaka ndɔɔtɛmɔla lá yopo yeleka wɔlɔ.

3. Kɛkɔnge k’ɔkɔpaso nshishima lá djamba djɛnɛ?

³ Lá djamba djɛnɛ, tongoshishima yopo y’ɔtɛmwɛlɔ yɛ Yehova ndawolaká l’etsho wɛ ntondo edjinge tongoshishima akambo enanɛyi wawolama l’ɔtɛmwɛlɔ wɔso lɔɔko kɛnɛ. Winá wɔ sotashishima akambo wasɔ, iso nkoka nkanela wopo wɔ onto l’onto okokande ndɔngɔsɔla yopo yɛnde yɛ ntɛmɔla. Tɔngɛna lonkina lamo ntɛmɔla Yehova lá yopo yɛ wɔlɔ ɔtɔpɛyɛwɔ osasa.

4. Wopo wɔkɔnge antɛmɔdji yɛ Yehova yewikaki lá ntondo kɛ Yeso ndjɛ iyɛnyɛ dilɛmɛlɔ la ngandji kɛwɔ te Yehova?

⁴ Lá ntondo kɛ Yeso ndjɛ lanɛ lá looko, ampame yɛ nkɔmano, ndjɔmbɔmba: Abɛlɛ, Noe, Abrahama la Djɔbɔ wɛnyɛka dilɛmɛlɔ la ngandji kɛwɔ te Yehova. Lá wopo wɔkɔnge? Má  ntshunamo, djawo la elambo wɛwɔ. Bible apatepela ikakambo inkfumɔ yelendana la wopo wiyatɛmɔlaka. Koko nyɛnamaka papoo ente iwɔ wananghaka kɛnɛ kɛ yakoke nangha djɛ mpɛyɛ Yehova lomo edjinge ɔtɛmwɛlɔ wɔwɔ wawolamaka mende. Masɔ Yehova ayɛka ndɔpɛyɛ tonkanola tɔ Abrahama Ɛlɛmbɛ má lotshimbo lɔ Mɔsɛ. Ɛlɛmbɛ wɛsɔ wapɛyɛki ɛlɔndjɛlɔ k’ɛnyɛki papoo wopo wɔ ntɛmɔla Yehova lá yopo yɛ ndawolaka.

5. Otshikitano wɔkɔnge w’onanghemisa l’ɔtɛmwɛlɔ wɔ nsɔsɔlɔ m’ɔkɔngɔ wɔ nyɔyi la ekfundwelo kɛ Yeso?

⁵ M’ɔkɔngɔ wɔ nyɔyi l’ekfundwelo kɛ Yeso, Yehova atalɔmba lonkina dj’anto ndɔɔtɛmɔla lá nkilika Ɛlɛmbɛ wɛ Mɔsɛ. (Ɔrɔ. 10:4) Akristo wayalaka ladjɛ nkilika ɔlɛmbɛ wɔ bango ntepela ente: ‘Ɔlɛmbɛ wɔ Kristo.’ (Nga. 6:2) Iwɔ walɛmɛyɛki ‘ɔlɛmbɛ,’ wɔsɔ ape má ndookota lá yimba kana má nkilika ɔnɔnghɔ w’akambo w’oyɛwɔ ladjɛ nangha la w’iyopakoke nangha, koko má ndjokola ndjɔmbɔmba kɛ Yeso la má nkilika elakanyelo wɛnde. Edjinge lɔɔko kɛnɛ, Akristo nanghaka kenkfumɔ k’okokawɔ nangha djɛ ndjokola Kristo l’ikanyi yɛ nsasangɛ Yehova la iwɔ yɔmɛlɛ ‘mba ekeketshelo.’—Mat. 11:29.

6. Wopo wɔkɔnge w’okokaso mba wapɔ má djamba djɛnɛ?

⁶ Winá wɔ sotashishima nkambo mmɔ mmɔ djelendana l’ɔtɛmwɛlɔ wɔso, yawopola nghɔmɛlɛ ente: ‘Efulelo wɛkɔnge wɛ momonangha lá nkambo djɛsɔ?’ Wɛ nkoka ndawopola lonkina ente: ‘Lemi nkoka mbɔngɛ yopo yɛmi yɛ ntɛmɔla?’ Wɛ nkoka ndjala l’osasa má kɛnɛ k’onanghɛ winá wɔsɔ, koko lonkina wɛ ladjɛ ndɔmba Yehova djɛ nkokotshɛ djɛ wɛ nyɛna lampe oyɛ la djonyi djɛ ndalɔngɔsɔla.

7. Wopo wɔkɔnge Yehova ɔsakande alɔmbɛlɔ waso wim’anse k’oloko?

⁷ Iso ntɛmɔlaka Yehova winá w’ɔlɔmbaso. Afunelo ndjɛdjɛka alɔmbɛlɔ waso la mbele kɛ yalɔngɔsɔlaka la nkɔmɛ nkfumɔ djɛ ndambola lá tabɛrnaklɛ edjinge ndambo l’ɔkɔngɔ lá tɛmpɛlɔ. (Yee. 141:2) Mbele kɛsɔ kaposɛki nsolo kɛ mpimbo kesasangɛki Ndjambe. Wopo wɔk’ɔmɔ ndeke, alɔmbɛlɔ waso wim’anse k’oloko ‘ndoosasangɛka,’ kaanga ntsha tombokambaka la totépélá tɔ wɔdju efula. (Woo. 15:8; Mvu. 33:10) Tolekɔ la donga djɛ wɔlɔ djɛ ndjawola ente iso nsasangɛka oloko wɔ Yehova winá w’oshimelaso etepela wɛnyɛ ngandji la djedjɛ djɛso tende. Nde nkɔpaka iso ndooshimela ekiyano wɛso, wayi wokongelaso, la mposɛ yɛso. Lá ntondo kɛ iso nsawola la Yehova lá lɔlɔmbɔ, lamo sopakanela la nkɔmɛ nkfumɔ kɛnɛ k’ɔkɔpaso ndooshimela? Má nangha nghɔsɔ, tongolambola Papa kɛso kel’olongo ‘mbele’ kɛso keleka wɔlɔ.

8. Mbamba kɛkɔnge kɛ wɔlɔ k’okotshɛso kɛ numɛ Ndjambe?

⁸ Iso ntɛmɔlaka Yehova winá w’olumɛso. (Yee. 34:1) Iso numɛka Yehova má nshimelaka anto ankina la djedjɛ nkfumɔ wekeka wande wa wɔlɔ edjinge elemo wɛnde. Ndjala la djedjɛ djɛ m’anse k’oloko ntotshindaka djɛ numɛ Ndjambe. Ntsha iso ndɔsaka winá djɛ ntɔnɔla lá wɛlɔ wɛ Yehova ntepela ente l’akambo ankfumɔ w’otonanghelande, topasambaki donga djɛ ndoolumɛ kaanga ndambo. Olemo w’ipoposanyɛ ntɔpɛyɛka mbamba ketshikitanyi kɛ ‘ndambola Ndjambe elambo wɛ lomo, ntepela ente, mbambo yemá ntɔmbɔ djɛso.’ (Heb. 13:15) Ngongete oyɛso ladjɛ ntɔnɔlaka la ntɔnɔ nkfumɔ lá kɛnɛ k’ɔkɔpaso ntepela lá ntondo k’iso nsawola la Yehova lá lɔlɔmbɔ, iso ladjɛ ntɔnɔlaka la nkɔmɛ nkfumɔ lá kɛnɛ kɛ songoshimela anto w’opomanaso lawɔ l’olemo wɔso w’ipoposanyɛ. Iso nkɔpaka djɛ ‘elambo wɛso wɛ lomo’ ndjala kɛnɛ keleka wɔlɔ leso. Djɛkondeke otepelakaso l’osasalo onkfumɔ winá w’oshimelakaso anto akina akambo wa nsɔsɔlɔ.

9. Ngo ngete ase Isariyɛlɛ yɛ ntondo, wapɔ wɛkɔnge w’owaso má ndjingela nsanghanyɛ? Pɛyɛ ndjɔmbɔmba kɛnyɛ wopo wokokotshɛ nsanghanyɛ.

 ⁹ Iso ntɛmɔlaka Yehova winá w’ingelaso nsanghanyɛ. Washimelaka ase Isariyɛlɛ yɛ ntondo ambɔ: ‘Mbala isato l’ɔnɔnyi, ampame yɛnyo inkfumɔ ladjɛ nyɛnama lá ntondo kɛ Yehova Ndjambe kɛnyo l’edjena kɛ ndɔngɔsɔna.’ (Mvu. 16:16) Iwɔ wayalaki ladjɛ ntshika amvulu yɛwɔ la awedji wawɔ ipa l’onami. Koko Yehova álakaka ante: ‘Lako onto wongokombola nkete djɛnyo winá wɔ nyongotshɔka ntɛna elongi kɛ Yehova Ndjambe kɛnyo.’ (Epo. 34:24) Ladjikɛnde wayalaki la djawo nkfumɔ te Yehova, ase Isariyɛlɛ wokáki Ndjambe wɔma wasɔ watshɔki tá wa fɛtɛ yenanghemaki ɛnɔnyi enkfumɔ yɛsɔ. Má nangha nghɔsɔ iwɔ wawaki ɛtshɔkɔ efula, ndjɔmbɔmba, iwɔ wayalaki la looka lɔ wɔlɔ l’Ɛlɛmbɛ wɛ Ndjambe, watɔnɔlaki lá wɛlɔ wɛnde, la wayalaki l’osasa wɔ nsanghana l’anto ankina wakɔpaki Yehova. (Mvu. 16:15) Iso mbaka wopo w’ɛtshɔkɔ wɛkɔ ɛmɔ winá w’onanghaso la wolo djɛ ndjingela nsanghanyɛ y’Akristo. Kokanela wopo wɔ Yehova osasangande winá w’oyalɔngɔsɔlaso djɛ mpɛyɛ kɔmantɛrɛ yɛ totenyi la yɛ djɔ.

10. Lamo teembo oyɛwɔ etenyi kɛmɔtshi kɛ djonyi k’ɔtɛmwɛlɔ wɔso?

¹⁰ Iso ntɛmɔlaka Yehova winá w’otshumbelaso teembo esanga la wananyɔ l’ankaana yɛso. (Yee. 28:7) Ase Isariyɛlɛ w’ɔsaki teembo etengo etenyi kɛmɔtshi kɛ djonyi k’ɔtɛmwɛlɔ wɔwɔ. Nkfumi Davidɛ asɔnaka ase Lewi 288 djɛ ndjala antshumbi teembo lá tɛmpɛlɔ. (1 Ɛk. 25:1, 6-8) Lɔɔko kɛnɛ, iso nkoka nyɛnyɛ ngandji kɛso te Ndjambe má ndoolumɛka la teembo tɔso. Topalekɔ la djonyi djɛ ndjala la longonga lɔ wɔlɔ djɛ nangha nkambo djɛsɔ. Kolenda ndjɔmbɔmba kɛnɛ: Winá w’otepelaso, ‘iso ntakanaka mbala efula,’ koko nkambo djɛsɔ mpatoshimbe djɛ ntepela l’otshumano kana l’olemo w’ipoposanyɛ. (Dja. 3:2) Wopo wɔk’ɔmɔ ndeke, iso ladjɛ ntshumbela Yehova teembo kaanga ntsha tokanela ente topalekɔ la longonga lɔ wɔlɔ.

11. Etengo yɔmbɛnyɛ lá Yeembo 48:13, lamo oyɛso ladjɛ ntshungolaka winá djɛ ndjekaka Bible lá nkfumbo?

¹¹ Iso ntɛmɔlaka Yehova winá w’ekaso Otepela wɔnde la w’olakanyɛso wana waso akambo walendana lande. Etsho wɛ Saba wapɛyɛki ase Isariyɛlɛ mbamba kɛ mpomola m’elemo wɛwɔ wɛ lofu la lofu ko ndeka ndjila yimba lá djokanelo djɛwɔ la Yehova. (Epo. 31:16, 17) Anto wa nkɔmano wayalaki l’anteyi kɛwɔ walakanyɛki wana wawɔ akambo walendana la Yehova edjinge la wɛlɔ wɛnde. Kaanga lɔɔko kɛnɛ iso ladjɛ ntshungolaka winá djɛ mbalaka la djɛ ndjekaka Otepela wɔ Ndjambe. Ɔsɔ alekɔ etenyi kɛmɔtshi k’ɔtɛmwɛlɔ wɔso te Yehova, la kengotokotshɛke djɛ ndasukanyɛ lande. (Yee. 73:28) Edjinge winá w’ekaso esanga lá nkfumbo, iso nkoka nkotshɛ lɔlɔnga lɔ bango ntepela ente, wana waso dj‘iwɔ ndjala la djokanelo djɛ wɔlɔ la djɛ ma ma la Papa kɛso kel’olongo.—Wala Yeembo 48:13.

12. Olakanyelo wɔkɔnge w’owaso má wopo wɔ Yehova ndɔsaka olemo wɔ wanɛ wananghaki tabɛrnaklɛ la nkete djel’eteyi?

¹² Iso ntɛmɔlaka Yehova winá w’opikaso la w’ɔlɔngɔsɔlaso djena dj’ɔtɛmwɛlɔ. Bible ntepelaka ante olemo wɔ nangha tabɛrnaklɛ la nkete djɛnde, woyalaka ‘olemo w’ekina.’ (Epo. 36:1, 4) Kaanga lɔɔko kɛnɛ, Yehova nyɛnaka olemo w’opikelo w’amvulu y’Onkfumi la w’amvulu inkina y’olonghanyelo etengo olemo w’ekina. Wananyɔ l’ankaana imɔtshi mpetshɛka winá efula djɛ nkamba olemo wɔsɔ. Topakoke nyɛnyɛ djedjɛ djɛso tá osukɔ w’ɔpɛyɛwɔ l’olemo w’Onkfumi wɔ djonyi wɔsɔ? Lá nsɔsɔlɔ, iwɔ ndapɛyɛka lonkina l’olemo w’ipoposanyɛ. Amɔtshi l’anteyi kɛwɔ nkombolaka ndjala kaanga tat’ekalo. Tokokolo tel’otshumano nyɛnyɛka osukɔ wɔwɔ t’olemo w’opikelo wɔsɔ má ntona djɛ nkaakanda djɛ nsɔna wananyɔ  l’ankaana yekamba olemo wɔ wolo wɔsɔ etengo tat’ekalo winá w’okotshɛwɔ kɛnɛ kɛlɔmbama. Ayale kaanga iso ndjewaka olemo w’opikelo kana lako, isankfumɔ nkoka ndapɛyɛ djɛ ndjilaka piyɔɔ la ndɔngɔsɔlaka amvulu yɛsɔ.

13. Wopo wɔkɔnge w’oyɛso ladjɛ ndɔsa epapɛyɛ w’ɔpɛyɛso djɛ nsuka olemo w’Onkfumi?

¹³ Iso ntɛmɔlaka Yehova winá w’osukaso olemo w’Onkfumi l’epapɛyɛ wɛso. Ase Isariyɛlɛ watɛnamaki lá ntondo kɛ Yehova ɛwɔ toko. (Mvu. 16:16) Iwɔ wayalaki ladjɛ ntɔla epapɛyɛ lá nkilika akoka wawɔ. Má nangha nghɔsɔ, iwɔ wɛnyɛki djedjɛ djɛwɔ lá nonghanyi inkfumɔ yɔsamaki dj’iwɔ mba wapɔ lá nyuma. Wopo wɔkɔnge w’okokaso nyɛnyɛ ngandji k’okaso Yehova la djedjɛ djɛso tá nkete djɛ nyuma dj’owaso? Yopo imɔtshi nde má nsuka la mfalanga yɛso otshumano wɔso la olemo wonanghema l’andja w’otondo lá nkilika akoka waso. Ɔpɔstɔlɔ Poolo ɛnyɛka nkambo djɛsɔ má ntepela ante: ‘Ntsha ɛkɔpa kelekɔ lá ntondo, nkambo djɛso ndjawolamaka pekapeka lá nkilika kɛnɛ k’onto ókótshɛnde koko ape má nkilika kɛnɛ k’onto ndopakotshi.’ (2 Kɔ. 8:4, 12) Yehova nsasangaka l’epapɛyɛ w’ɔpɛyɛso l’oloko ɔmɔ, ayale wopo wɔkɔnge woyɛwɔ.—Mar. 12:42-44; 2 Kɔ. 9:7.

14. Lá nkilika Woongo 19:17, wopo wɔkɔnge Yehova ɔsande okotshɔ wɔpɛyɛso wananyɔ walekɔ l’osambo?

¹⁴ Iso ntɛmɔlaka Yehova winá w’okindjɛso nkotshɛ Akristo walekɔ l’osambo. Yehova alakaka djɛ mfuta ase Isariyɛlɛ w’okaki ase ɔmvɔ nkɛtshi. (Mvu. 15:7, 10) Ee, winá enkfumɔ w’okotshɛso winaso walekɔ l’osambo, Yehova nyɛnaka etengo Nde ndeke lɔpɛyɛso. (Wala Woongo 19:17.) Ndjɔmbɔmba, winá wɔ Akristo welá Filipɛ yapɛyɛ Poolo epapɛyɛ winá wɔ ndayalaka lá lokando, nde etaka epapɛyɛ wɛsɔ ante, ‘elambo w’awolama, la wesasangɛ Ndjambe.’ (Flp. 4:18) Kokanela nkambo dj’anto wel’otshumano wɔko ko koyawopola ente, ‘onto ɔmɔtshi alekɔ w’okokami nkotshɛ?’ Yehova nsasangaka winá w’ɔtɛnande tokamba la winá wɛso, wolo wɔso, akoka waso la nkete djɛso djelá demba djɛ nkotshɛ wanɛ walekɔ la djonyi. Nde ndɔsaka epapɛyɛ wɛsɔ etengo etenyi kɛmɔtshi k’ɔtɛmwɛlɔ wɔso.—Dja. 1:27.

15. Ɔtɛmwɛlɔ wɔ nsɔsɔlɔ ndɔmbamaka winá edjinge welo, ko lamo nkambo djɛsɔ yopalekɔ odjito?

¹⁵ Ɔtɛmwɛlɔ wɔ nsɔsɔlɔ ndɔmbamaka winá la welo. Koko nkambo djɛsɔ djepalekɔ odjito. (1 Dj. 5:3) Lamo nghɔsɔ? Ladjikɛnde iso ntɛmɔlaka Yehova má ngandji k’owokaso. Kokanela ilɛngɛ imɔtshi yɛkɔpa mpɛyɛ papa kɛnde ekete kɛmɔtshi. Nde nkoka ndɔsa winá efula djɛ ndoosangela ntshango mɔtshi. Wɔna wɔsɔ apangokiyana winá wɛ ndombohetshɛ djɛ nsanga ntshango djɛsɔ. Nde nkɔpaka papa kɛnde, la alekɔ l’osasa wɔ ndɔɔpɛyɛ opapɛyɛ wɔsɔ. Wopo wɔk’ɔmɔ ndeke, má ngandji k’okaso Yehova, tolekɔ l’osasa wɔ nkamba la winá wɛso edjinge la wolo wɔso djɛ ndɔtɛmɔla.

16. Lá nkilika Hebero 6:10, wopo wɔkɔnge Yehova ɔsande welo w’ilá onto l’onto djɛ ndoosasangɛ?

¹⁶ Ambotshi wa ngandji wapahonaka mba wepo w’epapɛyɛ wɛkɔ ɛmɔ me wɔna la wɔna. Iwɔ nsipisoyɛka ambɔ wɔna la wɔna ntshikitana la walekɔ l’akoka watshikitanyi. Wopo wɔk’ɔmɔ ndeke, Papa kɛso kel’olongo nsipisoyɛka akoka w’onto l’onto. Nkoka ndjala olekɔ l’akoka wa nangha akambo efula ndeka anto efula w’ewɛ la w’ɔkɔpɛ. Kana mbala imɔtshi m’ɛnɔnyi wɛko, demba djɛko kana edjito welekɔ la wɛ lá nkfumbo, opalekɔ l’akoka wa nangha akambo efula etengo anto ankfumɔ onanghawɔ. Ntsha oyɛwɔ nde nghɔsɔ tɔlɛmbake. (Nga. 6:4) Yehova apangovungɛ olemo wɔko. Winá enkfumɔ wɛ ngɔngɔpɛyɛka kɛnɛ keleka wɔlɔ le wɛ l’ekoma wɛ wɔlɔ, nde angosasangaka. (Wala Hebero 6:10.) Yehova nyɛnaka kaanga tokanyi tel’oloko wɔko. Nde nkombalaka djɛ nyo ndjala l’osasa  edjinge nsasanga lá kɛnɛ k’oyɛnyo l’akoka wa ndɔpɛyɛ.

17. a) Ntsha tolekɔ l’okakasano wɔ nangha nkambo mɔtshi l’ɔtɛmwɛlɔ wɔso, okokaso nangha nge? b) Wopo wɔkɔnge nkambo dj’otepelawɔ l’ipapango “ Fudjɛ osasa wɔko” okokawɔ nkokotshɛ?

¹⁷ Kɛkɔnge k’okokaso nangha ntsha tolekɔ l’okakasano wɔ ndapɛyɛ lá wayi amɔtshi wel’ɔtɛmwɛlɔ wɔso, ndjɔmbɔmba wekelo w’onto nyɔmɛlɛ kana olemo w’ipoposanyɛ welá ntshandjawala? Tewe ente winá w’oyapɛyɛso mbala la mbala l’elemo wɛsɔ, ndeke songoleka nsasanga l’elemo wɛkɔ la mba wapɔ m’eteyi. Tokoka ndjɛdjɛ ɔtɛmwɛlɔ wɔso la nkambo mɔtshi, ndjɔmbɔmba nsasokɛ ndemba kana ndjeka wopo wɔ nkamba l’epeko kɛmɔtshi k’otshumbakawɔ teembo. Ntsha tongekake ngo taangoyi, topangoyala la balo dj’efula l’eteyi. Ko, kɔsa djɛ tɔmbɔsa nkano djɛ ndjekaka lofu la lofu. Má bango tokoka nanghaka ngo minitɛ imangha winá enkfumɔ ko masɔ, ntafudjɛka ndambondambo. Winá wɔ sɔngɛna eposelo wɛ wɔlɔ má welo w’ilaso, tongokongelaka winá wɔsɔ l’eloko lukuluku la tongosasangaka la wɔkɔ efula. Wɛ ɛna wopo w’okokɛ nkamba la ndjɔmbɔmba kɛsɔ l’ɔtɛmwɛlɔ wɔso?

18. Nkambo djɛkɔnge djeleka ndjonyi dj’okokaso nangha, ko eposelo wɛkɔnge songowa ntsha tombonangha nkambo djɛkɔ?

¹⁸ Nangha kenkfumɔ k’okokaso nangha djɛ ntɛmɔla Yehova ndeke nkambo djeleka djonyi dj’okokaso nangha lá lowiko lɔso. Eposelo welekɔ la nkambo djɛsɔnde, iso ndjalaka la lowiko l’osasa la lolekɔ l’okoma edjinge iso ndjalaka la nkongi djɛ ntɛmɔla Yehova lotshinda lotshinda. (Woo. 10:22) Tomboshiyɛka mba vu djelá wɔɔngɔ ladjikɛnde iso ndjewaka ente Yehova nkotshɛka enkambi wɛnde winá w’opomanawɔ l’ekakasano. (Iza. 41:9, 10) Tolekɔ la ndonga djɛ wɔlɔ efula djɛ ndjala l’osasa winá w’ɔtɛmɔlaso Papa kɛso kɛ ngandji, kanga ‘l’ɛdje ndongola lomo la wumu’ me ntongami djɛnde nkfumɔ!—Ndj. 4:11.