1-2. Andi o mbei Jehovah wai ku di dini di u ta dini ën?

 ANDI i ta pakisei te i jei di wöutu „dini”? Kandë i ta pakisei wan baaa di tjökö kini a goon ta begi Jehovah ufö a go duumi. Nasö kandë i ta pakisei soni u wan wosudendu ka hii sëmbë dë waiwai, ta lei soni u Bëibel.

² Wë dee tu kulupu sëmbë dee u taki u de aki tuu ta dini Gadu. Jehovah o wai ku di dini di de ta dini ën u? Wë a o wai ku de, ee de ta du soni di ta kai ku ën, ee de ta lesipeki ën, söseei ee de lobi ën. U lobi Jehovah gaanfa seei. U sabi taa a fiti fuu dini ën, nöö fëën mbei u kë dini ën a di möön bunu fasi di u sa dini ën.

3. Andi woo luku a di woto aki?

³ A di woto aki, woo taki u di fasi u dini Gadu di Jehovah bi ta feni bunu na awooten, söseei woo luku aiti fasi fa Jehovah kë fuu dini ën a di ten aki. Te woo du di soni aki, nöö useei sa pakisei luku unfa u sa du dee soni aki u dini Gadu möön bunu. Söseei woo luku faandi mbei a bunu fuu dini Jehovah a di fasi di a kë.

4. Unfa dee sëmbë dee bi ta dini Jehovah ufö Keesitu bi ko a goonliba aki, bi lei taa de bi ta lesipeki Jehovah, söseei taa de lobi ën?

⁴ Na awooten i bi abi womi kuma Abeli, Noa, Abahamu  ku Jöpu di bi abi wan taanga biibi. Dee womi aki bi ta lei taa de bi ta lesipeki Jehovah, söseei de bi ta lei taa de bi lobi ën. Unfa de bi du di soni aki? Wë de bi ta piki Gadu buka, de bi ta futoou ën, söseei de bi ta tjuma soni dëën. Di Bëibel an ta taki u hii dee soni di de bi du. Ma de bi mbei hii möiti u tja gafa ko da Jehovah, söseei de bi dini ën a wan fasi di a bi feni bunu. Bakaten Jehovah bi da Mosesi di Wëti faa bi da dee Isaëli sëmbë. Di Wëti bi abi sömëni soni di bi ta lei de unfa a bi kë taa de bi musu ta dini ën.

5. Unfa Jehovah bi kë u dee bakama u Jesosi bi musu dini ën?

⁵ Baka di Jesosi dëdë, söseei di a toona weki baka, nöö Jehovah an bi kë u sëmbë dini ën möön ku dee Wëti dee a bi da dee Isaëli sëmbë (Lom. 10:4). Dee Keesitu sëmbë bi musu hoi wan njunjun wëti. Di wëti dë, da ’di wëti u Keesitu’ (Gal. 6:2). De bi o sa hoi di wëti aki te de bi ta djeesi Jesosi, söseei te de bi ta du dee soni dee a bi lei de. An bi dë u de bi hoi sömëni wëti a hedi möön. A di ten aki seei Keesitu sëmbë ta mbei hii möiti u djeesi Jesosi, sö taa Jehovah sa wai ku de, söseei u de sa „feni böö”.​—Mat. 11:29.

6. Unfa u sa feni wini u di woto aki?

⁶ Te woo taki u dee soni dee u musu ta du a dini di u ta dini Jehovah, nöö hakisi iseei di soni aki: ’Mi go a fesi a di fasi fa mi ta dini Gadu a di pisi aki ö?’ I sa hakisi iseei tu taa: ’Mi sa du soni u mbei taa di fasi fa mi ta dini Gadu ko möön bunu ö?’ I sa ta wai ku di möiti di i ta mbei nöunöu, ma tökuseei i sa hakisi Jehovah faa heepi i fii si dee soni dee i sa du möön bunu.

7. Unfa Jehovah ta si dee begi fuu?

⁷ U ta dini Jehovah te u ta begi ën. Di Bëibel ta taki taa dee begi fuu dë kuma sumëësuti soni di sëmbë bi ta tjuma da Gadu a di Wosu fëën (Ps. 141:2). Dee soni aki bi ta sumëësuti da Jehovah, nöö de bi ta mbei a ta piizii tu. Wë sö nöö dee begi fuu „ta dëën piizii” tu (Nöng. 15:8; Deto. 33:10). U sa dë seiki taa Jehovah ta fii piizii te u ta piki ën fa u lobi ën tjika, söseei te u ta dëën tangi. A kë fuu ta konda dëën andi ta da u bookohedi, andi u ta dë ku di mëni taa woo feni, söseei andi da dee soni dee u ta kë. A bi o bunu fii pakisei bunu andi i kë taki a di begi fii ufö i fan ku Jehovah. Te i ta du sö, nöö a o dë kuma i ta tjuma di möön bunu „sumëësuti soni” da di Tata fii di dë a liba ala.

8. Na un ten u sa gafa Gadu?

⁸ U ta dini Jehovah te u ta Gafëën (Ps. 34:1). U ta gafa Jehovah te u ta taki u dee bunu fasi fëën ku dee foombo soni dee a ta du. Woo abi sömëni bunu soni u taki u Jehovah ee u dë ku tangi a hati u dee soni dee a ta du da u. Te u ta kai pakisei a dee bunu dee Jehovah ta du da u, nöö woo si taa sömëni soni dë di mbei u musu gafëën. Te u ta peleiki, nöö a dë wan bunu ten seei ’fuu ta gafa Gadu nöömö. Biga te u du sö, nöö a o dë kuma wan suti peesenti u ta tja ko dëën, ta dëën tangi’ (Heb. 13:15). Leti kumafa u musu pakisei bunu andi woo taki ufö u begi Jehovah, sö nöö u musu pakisei bunu andi woo taki da dee sëmbë dee u ta peleiki da. U kë „gafa Gadu” a di möön bunu fasi. Fëën mbei u ta dë ku wai te u ta peleiki.

9. Unfa u ta feni wini u dee komakandi kuma dee Isaëli sëmbë te de bi ta ko makandi u dini Jehovah? Konda unfa dee komakandi bi heepi i.

 ⁹ U ta dini Jehovah te u nango a dee komakandi. Gadu bi piki dee Isaëli sëmbë taa: „Dii pasi a wan jaa hii dee womi sëmbë musu go a Jehovah di Gadu fuunu fesi, a di kamian di a o lei unu” (Deto. 16:16). De bi abi u disa de wosu ku dee goon u de, hii fa sëmbë an bi dë u luku de. Ma Jehovah bi paamusi de taa: „Na wan sëmbë o kë tei di köndë fuunu te un nango a Jehovah fesi” (Ëki. 34:24). U di dee Isaëli sëmbë bi abi tuutuu futoou a Jehovah, mbei de bi nango a dee piizii di de bi ta hoi hiniwan jaa. De bi ta feni sömëni gaan bunu. De bi ta ko sabi dee wëti u Gadu möön bunu, de bi ta kai pakisei a dee bunu soni dee Gadu bi du da de, söseei de bi ta dë makandi ku woto sëmbë di bi lobi Jehovah tu (Deto. 16:15). U ta feni dee seei wini aki tu te u ta mbei hii möiti u go a dee komakandi. Nöö pakisei unfa Jehovah ta wai tjika te u seeka useei u da wan sati piki di o da wotowan taanga.

10. Faandi mbei kanda dë wan fanöudu pisi a di dini di u ta dini Jehovah?

¹⁰ U ta dini Jehovah te u ta kanda makandi ku dee baaa ku sisa fuu (Ps. 28:7). Dee Isaëli sëmbë bi ta si kanda kuma wan fanöudu pisi u di dini di de bi ta dini Gadu. Könu Dafiti bi buta 288 Leifi sëmbë u kanda a di Wosu u Gadu (1 Klon. 25:1, 6-8). A di ten aki, u sa lei taa u lobi Gadu te u ta kanda ta gafëën. An dë fuu dë gaan kandama fuu sa du di soni aki. Pakisei di soni aki: „Hii u tuu ta mbei föutu” te u ta fan, ma tökuseei di soni aki an ta tapa u fu wa fan möön te u dë a dee komakandi nasö a di peleikiwooko (Jak. 3:2). Wë sö nöö wa musu mbei di sa’ di wa sa’ u kanda sö bunu, tapa u fuu kanda gafa Jehovah.

11. Faandi mbei u musu buta wan juu ka u ta lei soni u Bëibel makandi ku dee sëmbë fuu, te u luku andi Psalöm 48:13 ta taki?

¹¹ U ta dini Jehovah te u ta lei soni a di Wöutu fëën, söseei te u ta lei dee mii fuu soni fëën. Dee Isaëli sëmbë an bi ta wooko a Saba daka, u di de bi ta tei di daka dë u du soni, u de ku Jehovah bi sa ko dë möön gaan mati (Ëki. 31:16, 17). Dee Isaëli sëmbë dee bi ta hoi deseei a Jehovah, bi ta lei dee mii u de soni u Jehovah ku dee bunu soni dee a ta du. A di ten aki useei musu ta tei ten ta lesi Gadu Wöutu, ta lei soni nëën. Di soni aki da wan fasi fa u ta dini Jehovah, söseei a ta mbei u ku ën ko dë möön gaan mati (Ps. 73:28). Boiti di dë, te u ku dee sëmbë fuu wosudendu ta lei soni u Bëibel makandi, nöö woo heepi dee mii fuu u de ko dë mati ku di Tata fuu di dë a liba ala.​—Lesi Psalöm 48:13.

12. Andi u ta lei u di fasi fa Jehovah bi si di wooko u dee sëmbë dee bi mbei dee soni u di tenti fëën?

¹² U ta dini Jehovah te u ta mbei kamian u dini ën, söseei te u ta seeka de. Di Bëibel ta taki taa di mbei di sëmbë bi mbei di tenti u Gadu ku dee soni dee bi dë nëën dendu, bi dë wan „santa wooko” (Ëki. 36:1, 4). A di ten aki seei, Jehovah ta si di mbei di u ta mbei Könuköndë zali ku woto kamian ka u ta dini Gadu, kuma wan fasi fa u ta dini ën. So baaa ku sisa ta tei wan hii pisi u di ten u de, u du dee wooko aki. U dë ku tangi a hati seei taa de ta mbei möiti u tei di ten u de, u de du Könuköndë wooko! De ta heepi du di peleikiwooko tu. Nöö a kan taa so u de kë du di pioniliwooko tu. Wë dee gaanwomi sa lei taa de ta heepi ku di mbei di u ta  mbei kamian u dini Gadu, te de ta da dee baaa ku dee sisa aki di okasi u de sa du di pioniliwooko ee soni an ta tapa de. Aantoobi ee wa sa’ u mbei dee kamian ka u ta dini Gadu, ma tökuseei hii u tuu sa heepi u dee kamian aki sa ta dë limbolimbo.

13. Unfa u musu si dee möni dee u ta da u heepi u di Könuköndë wooko go a fesi?

¹³ U ta dini Jehovah te u ta da möni u du di Könuköndë wooko. Jehovah bi kë taa dee Isaëli sëmbë bi musu tja wan soni ko dëën te de bi ta ko a dee piizii fëën (Deto. 16:16). De bi musu da kumafa de bi sa da dou. A di lö fasi dë de bi ta lei taa de bi dë ku tangi a hati, da hii dee soni di Jehovah bi ta du da de. Unfa u sa lei taa u lobi Jehovah, söseei taa u dë ku tangi a hati da hii dee soni dee a ta du da u? Wan fasi fa u sa du di soni aki, hën da te u ta da möni a di kemeente ka u dë, söseei te u ta da möni u mbei di wooko di u ta du a hii goonliba go a fesi. Apösutu Paulosu bi taki taa: „Be hiniwan sëmbë musu da kumafa a sa da dou. Biga wë ee wan sëmbë i kë da sëmbë soni, nöö an dë a di fa di soni hia ma fu di i kë da. Ja o da wan soni di ja abi ma joo da di i abi, nöö Gadu o si taa a bunu kaa” (2 Kol. 8:4, 12). Jehovah ta wai ku hii soni di u ta da, aluwasi ee an hia seei.​—Maik. 12:42-44; 2 Kol. 9:7.

14. Unfa Jehovah ta si di heepi di u ta heepi dee baaa ku dee sisa fuu dee abi heepi fanöudu, te u luku andi Nöngö 19:17 ta taki?

¹⁴ U ta dini Jehovah te u ta heepi dee baaa ku sisa fuu dee abi heepi fanöudu. Jehovah bi paamusi taa a bi o toona paka dee Isaëli sëmbë dee bi ta da dee pooti sëmbë soni (Deto. 15:7, 10). Sö nöö a dë taa hiniwan juu te u heepi wan baaa nasö wan sisa fuu, nöö Jehovah ta si ën kuma wan kado di u dëën. (Lesi Nöngö 19:17.) Di dee Keesitu sëmbë u Filipi bi manda soni da Paulosu di a bi dë a dunguwosu, hën a bi taki taa dee soni dë bi dë ’leti kuma wan paima de tja go da Gadu, nöö Gadu seei ta wai ku de tu’ (Fil. 4:18). Te i pakisei dee sëmbë dee i ku de dë a wan kemeente, nöö hakisi iseei di soni aki: ’Wan sëmbë dë a di kemeente di mi sa heepi ö?’ Jehovah ta wai te a ta si taa u ta tei u ten, u kaakiti, dee soni di u sa’ u du, ku dee gudu fuu u heepi wotowan. A ta si di soni aki kuma wan fasi fa u ta dini ën.​—Jak. 1:27.

15. Faandi mbei an ta hebi da u fuu tei u ten ku u kaakiti fuu dini Jehovah?

¹⁵ U musu ta da u ten ku u kaakiti te u ta dini Jehovah. Ma tökuseei an dë kuma wan hebi da u (1 Joh. 5:3). Faandi mbei? U di u ta dini Jehovah u di u lobi ën. Pakisei taa wan piki mii kë da hën tata wan soni. Kandë a ta tei sömëni juu faa teeken wan soni dëën. An ta hati di mii taa a tei sömëni juu faa du di soni dë. U di a lobi ën tata, mbei a ta wai taa a sa dëën di soni dë. Sö nöö a dë ku u tu. U di u lobi Jehovah mbei u ta wai u tei u ten ku u kaakiti fuu sa dini ën.

16. Unfa Jehovah ta si dee soni dee hiniwan fuu ta du u mbei a wai, te u luku andi Hebelejën 6:10 ta taki?

¹⁶ Wan mama ku wan tata di lobi dee mii u de, sabi taa na di seei soni hii dee mii u de o sa da de. De sabi taa dee mii u de tooka ku deseei, söseei de an ta du soni di wan fasi. Sö nöö di Tata fuu a liba ala sabi andi hiniwan fuu sa du. Kandë i sa du möön hia soni möön so sëmbë di i sabi, söseei di i lobi. Nasö kandë ja sa du sö hia soni kumafa so sëmbë ta du, u di i ko abi jaa kaa, u di  di gösöntu fii an dë sö bunu, nasö u di i musu sölugu dee sëmbë fii wosudendu. Ee sö a dë, nöö na lasi hati (Gal. 6:4). Jehovah an o fëëkëtë di wooko di i du. Ee i ta du hii soni di i sa du dëën, söseei ee i ta du ën ku wan bunu pakisei, nöö a o wai ku i. (Lesi Hebelejën 6:10.) Jehovah sabi dee soni dee i kë du. A kë fii dë waiwai, söseei a kë fii dë tifeedi ku dee soni dee i sa du dëën.

17. (a) Andi u sa du, te so soni di u ta du u dini Jehovah ta taanga da u? (b) Unfa wan u dee soni dee sikifi a di pisi „ Soni di sa mbei i ko ta möön dë waiwai” bi heepi i?

¹⁷ Andi u sa du ee a ta taanga da u fuu lei soni u Bëibel, nasö fuu go a di peleikiwooko, hii fa dee soni aki nama ku di dini di u ta dini Jehovah? Wë möön u ta du dee soni aki, möön woo ko lobi de, söseei woo feni wini u de. U sa tei di dini di u ta dini Jehovah maaka ku wan sport di u ta du, ku di lei di u ta lei pëë gitali, nasö ku di pëë di u ta pëë poku. Ee wanwan pasi nöö u ta du dee soni aki, nöö wa o go a fesi. Ma unfa a o dë ee u buta taa woo ta du de hiniwan daka? Kandë bigibigi woo ta du de wantu miniti nöö, ma te u kaba fëën woo ta du de möön longi. Te u si taa u ta du de möön bunu, nöö woo ta hangi u du de hiniwan daka. Sö nöö a dë ku dee soni dee u ta du u dini Jehovah.

18. Andi da di möön fanöudu soni di u sa du a di libi, nöö un wini woo feni ee u du ën?

¹⁸ Di möön fanöudu soni di u sa du a di libi, hën da fuu dini Jehovah ku hii u hati. Te u ta du di soni aki, nöö woo ta dë waiwai, söseei woo abi di biibi taa u sa dini Jehovah u teego (Nöng. 10:22). U dë bööböö, u di u sabi taa Jehovah ta heepi dee dinima fëën te fuka ta miti de (Jes. 41:9, 10). U ta wai u di u ta dini di lobihati Tata fuu di ’waiti tjika u kisi gafa, söseei di fiti u kisi hei’ da hii dee soni dee a mbei!​—Ako. 4:11.