1-2. Naho fa manao akore ro ankasitrahan’Agnahare ty fanompoantikagne aze?

 INOGNE ty avy an-tsai’o ao naho vaho maharey ty rehake tihoe “manompo an’Agnahare”? Va’e ho rahalahy raike mitongaleke, le mirehake amy i Jehovah amy ty vavake ty raha am-po’e ao, aloha ty hiroro varagne. Ndra ka va’e ho keleiagne raike falefale miara-mianatse Baiboly.

² Sambe agnisa ty fanompoagne an’Agnahare o raha roe rehoe. Faie eke i Jehovah vao ty fanompoa o ndaty rehoe aze? Eka naho ohatse mifagnarake amy ty fikasa’e sady naho ty hatea iareo naho ty fagnaja iareo aze ty mahavy iareo manao izay. Tena teantika ty Jehovah. Haintikagne ka fa ireke raike avao ty fagneva ty hotompoegne sady teantika naho ty fara’e soa ro meintikagne aze.

3. Inogne ty hodinehentikagne ato?

³ Hodinehentikagne amy ty lahatsoratse toy tie akore ty fomba nitea i Jehovah hanompoagne aze tamy ty andro ty Baiboly naho ty fomba valo tea i Jehovah hanompoantikagne aze amy izao. Naho fa mandineke ireo tika, le azontika atao ty misaintsaigne tie akore ty azontika agnasoagne ty fanompoantika. Hodinehentikagne ka tie nagnino ty fanompoagne i Jehovah amy ty fomba ankasitraha’e ro mahavy antika ho falefale.

4. Akore ty natao i mpanompo i Jehovah tamy ty andro ty Baiboly rey mba hampisehoagne fa tea naho nagnaja aze iareo?

⁴ Natoro i Abela, i Noa, i Abrahama naho i Joba, lahilahy tsy nivalike tamy ty andro ty Baiboly, fa nagnaja naho nitea i Jehovah iareo. Akore ty fomba nanoroa iareo izay? Nagnorike ty saontsi’e, nino aze naho nanao sorogne ho aze iareo. Tsy rehafe ty Baiboly amy ty pitsopitso’e tie ino iaby ty raha natao  iareo naho fa nanompo an’Agnahare. Faie trea tie ty fara’e soa ro nimey iareo naho fa nanompo i Jehovah mba ho fagnajagne aze. Ty voka’e, neke’e ty fanompoa iareo aze. Naho fa tafara tatoy, le nagnomey Lalàna hoahy o tarana i Abrahamao ty Jehovah. Nisy toromareke maro voafaritse soa ty amy ty fomba tea i Jehovah hanompoa iareo aze ty tamo o Lalàna iohoe ao.

5. Akore ty fomba tea i Jehovah hanompoagne aze tafara ty nimateza naho ty namelomagne i Jesosy tamy ty mate?

⁵ Faie tafara ty nimateza i Jesosy naho ty namelomagne aze tamy ty mate, le tsy nitaké i Jehovah sasa ty hagnorihagne i Lalà i Mosesỳ. (Rom. 10:4) Lalàna vaovao ty norihe o Kristianao, le “ty lalà i Kristy.” (Gal. 6:2) Tsy misy lisita atao tsianjery ndra lily voafaritse mahakasike ty raha azo atao naho tsy azo atao ty amo o “lalàna” iohoe. Nankatò o Lalàna iohoe iareo naho fa nitsikombe ty modely i Jesosy naho nagnorike ty fampianara’e. Mikezake mafe magnorike ty lia i Kristy ty Kristiana amy izao mba hampifaleagne i Jehovah naho hahavy iareo “ho velombolo.”​—Mat. 11:29.

6. Inogne ty soa ho rambesentika boake amy ty lahatsoratse toy?

⁶ Isake tie mandineke ty raike amo o raha agnisa ty fanompoantika i Jehovah-o tika, le saintsaigno zao: ‘Inogne ty fandrosoagne fa nataoko tamo o lafi’e iohoe?’ Va’e hagnontane hoe izao ka rehe: ‘Ino ty mbe azoko agnasoagne ty fanompoako?’ Maregne fa toko’e ho fale amy ze fandrosoagne fa nivita’o rehe. Faie toko’e hatao antom-bavake ka ze trea’o tie mbe azo’o hasoaegne.

7. Akore ty fivazohoa i Jehovah i vavake amy ty fo ataontika rey?

⁷ Manompo i Jehovah tika naho fa mivavake ama’e. Ampitovie ty Soratse Masigne amy ty emboke magnitse natolotse tamy i tragnolay masigney ao naho tamy i tempolỳ ao ty vavake voaomagne soa ataontikagne. (Sal. 141:2) Nagnomey hagnitse nampifale an’Agnahare o emboke magnitse iohoe. ‘Mahafinaritse’ i Jehovah hoe izay ka ty mijanjigne ty vavake vokatse ty fo ataontika, ndra tie rehake tsotra avao aza ty ampiasaentikagne. (Ohab. 15:8; Deot. 33:10) Misy anto’e mahavy antika mino tie mahafale ty arofo i Jehovah ty mijanjigne antika mirehake ama’e ty hateantikagne aze naho ty fisaorantikagne aze. Tea’e naho rehafentikagne ama’e ty raha mampinekoneko antika, ty raha tamaentika naho ty raha irientika. Nagnino areke naho dinehe’o soa iaby heike tie inogne ty raha horehafe’o naho fa hivavake? Naho ihe manao izay, le hoe manolotse ‘emboke magnitse’ fara’e soa hoahy i Baba’o an-dagnitse agney.

8. Inogne ty raha azontika hararaotegne mba hideragne i Jehovah?

⁸ Manompo i Jehovah tika naho fa midera aze. (Sal. 34:1) Midera i Jehovah tika naho fa mirehake amy ty hafa tie tena teantika ty toetse’e naho ty raha natao’e. Hanagne raha maro horehafegne miomba i Jehovah tika naho mankasitrake aze. Naho misaintsaigne ze raha soa natao i Jehovah ho antikagne tika, le hanagne anto’e maro hideragne aze. Ty asa fitoriagne, le agnisa ty fomba raike azontikagne hararaotegne soa mba ‘hanoloragne sorogne fideragne ho an’Andrianagnahare, le i voka ty sognintikagney.’ (Heb. 13:15) Nirehafentikagne taloha teo tie toko’e hodinehentika heike tie inogne iaby ty raha rehafentikagne naho fa mivavake. Le hoe izay ka fa toko’e ho saintsaignentikagne soa heike ty raha horehafentikagne amy ze ndaty hitoriantika. Teantikagne naho ty fara’e soa ty sorogne fideragne meintikagne i Jehovah. Izay ty mahavy antikagne toko’e hafana fo naho fa mitory amo o ndatio.

9. Nagnino ro mahasoa antika, manahake o Israelita talohao ty magnatreke fivoriagne miarake? Rehafo ty soa nirambese’o manokagne.

 ⁹ Manompo i Jehovah tika naho fa magnatreke fivoriagne. Izao ty raha nirehafagne tamo o Israelio: “In-telo isan-taogne ty lahilahy iaby ama’areo eo ro hiseho agnatrehan’Andrianagnahare’o eo amy ze toeragne hofilie’e.” (Deot. 16:16) Tsy nisy niambegne ty tragno iareo naho ty tete iareo naho fa nandeha iareo. Faie izao ty nampitamae i Jehovah iareo: “Tsy hisy ndaty hagniry o tane’ò naho fa mandeha hagnente ty lahara i Jehovah Andrianagnahare’o rehe.” (Eks. 34:24) Nandeha nagnatreke i fete rey isan-taogne areke ze Israelita tena natoky i Jehovah naho natahotse aze. Ty voka’e, nahazo valesoa maro iareo. Nanjare nitombo ohatse ty fahatakara iareo ty Lilin’Agnahare. Afake nisaintsaigne ty hasoa toetse i Jehovah ka iareo sady nahazo fampaherezagne boake amo o Israelita nama iareo tea i Jehovah-o. (Deot. 16:15) Maro ka ty soa ho azontika naho manao ze azontikagne atao mba hagnatrehagne i fivoriantikagne rey tika. Saintsaigno ka tie manao akore ty hafalea i Jehovah naho fa mahavazoho antika magnomey toin-drehake fohe sady voaomagne soa.

10. Nagnino ty fihiragne ro agnisa ty tapa’e lahibey amy ty fanompoantika i Jehovah?

¹⁰ Manompo i Jehovah tika naho fa miarake mihira. (Sal. 28:7) Nihevere o Israelitao ho tapa’e lahibey amy ty fanompoagne i Jehovah o hirao. I Davida Mpanjaka zao nanendre Levita 288 mba ho mpihira amy i tempolỳ ao. (1 Tan. 25:1, 6-8) Manoro ty hateantikagne i Jehovah ka tika tie amy izao naho mihira fideragne ho aze. Tsy ty hasoa ty feontikagne ro tena raha lahibey. Dineho zao: ‘Mateteke tika ro manao fahadisoagne’ naho fa mirehake. Faie tsy mikalagne antika tsy hirehake amo o fiangonagneo eo ndra naho fa amy i fanompoagney ey zay. (Jak. 3:2) Hoe izay ka fa tsy toko’e hataontika sakagne tsy hihiragne hira fideragne hoahy i Jehovah ty haraty ty feontikagne.

11. Nagnino tika ro toko’e hanokagne fotoagne hiarahagne hianatse ty Baiboly miarake amo o keleiantikagneo, arake ty Salamo 48:13?

¹¹ Manompo i Jehovah tika naho fa mianatse ty Saontsi’e sady mampianatse ty anantikagne ty miomba aze. Afake nagnasoa ty fifandrambesa’e tamy i Jehovah o Israelio naho fa Sabata, satria tsy niasa iareo tamo o andro iohoe. (Eks. 31:16, 17) Nampianatse ty ana’e miomba i Jehovah naho ty hasoa toetse’e ze Israelita nanam-pinoagne tamo o fotoagne iohoe. Mila manokagne fotoagne mba hamakiagne naho hianaragne ty Saontsin’Andrianagnahare ka tika. Agnisa ty fanompoantika i Jehovah io sady magnampe antika hifandrambe maifitse ama’e. (Sal. 73:28) Naho manao fotoam-pivavaha ty keleiagne ka tika, le izay ty hagnampe o anantikagneo hifandrambe maifitse amy i Babantikagne bey hatea an-dagnitse agney.​—Vakio ty Salamo 48:13.

12. Inogne ty ianarantikagne boake amy ty fivazohoa i Jehovah ty asa natao o Israelita namboatse i fanake tamy i tragnolay masigney tao rey?

¹² Manompo i Jehovah tika naho fa magnoregne naho mikojakoja i Anjomba anoagne ty fanompoagne i Jehovah rey. Rehafe ty Baiboly fa nihevere i Jehovah ho ‘fanompoagne masigne’ ty famboaragne i tragnolay masigney naho ty fitaovagne nilaegne mba hampiasaegne tao. (Eks. 36:1, 4) Amy izao ka, le hevere i Jehovah ho fanompoagne masigne ty fagnoregnagne Anjomba i Fanjakagney naho ty fagnoregnagne hafa mifandrambe amy ty fanompoagne aze. Misy rahalahy naho rahavaventikagne ila’e mahafoe ty fotoa’e mba hanoagne o asa rehoe. Ankasitrahantikagne vao ty asa mafe anoe iareo mba hagnoregnagne i Anjomba i Fanjakagney rey? Mazava hoaze fa mandrambe anjara amy ty asa fitoriagne ka iareo. Ty ila’e amy iareo aza va’e te hanao mpisava lalagne. Akore ty azo o androanavi-pagnahio ampisehoagne tie manohagne  ty asa fagnoregnagne iareo? Manao izay iareo naho magnenga i rahalahy naho i rahavaventika miasa mafe amy ty fagnoregnagne rey hanao mpisava lalagne naho mameno fangatahagne iareo. Faie ndra managne traikefa amy ty fagnoregnagne tikagne ndra tsy managne, le sambe afake magnalio i Anjomba rey naho mikojakoja aze.

13. Akore ty toko’e ho fiheverantikagne i fagnomezagne ataontika mba hanohagnagne i asa i Fanjakagney rey?

¹³ Manompo i Jehovah tika naho fa manohagne ty asa i Fanjakagney amy ty alala ty fagnomezagne ataontika. Tsy toko’e hinday tagnam-polo o Israelio naho fa nandeha tagnatreha i Jehovah eo. (Deot. 16:16) Toko’e hinday fagnomezagne arakarake ze fitahiagne niazo’e iareo. Ty fanoa iareo izay, le nampiseho tie nankasitraha iareo ze raha natao i Jehovah hoahy iareo. Akore ka ty azontikagne anoroagne ty hateantikagne i Jehovah naho ty fankasitrahantika ze raha omei’e antikagne? Manao izay tika naho manohagne ara-bola ty fiangonagne misy antika naho ty asa magneran-tane, arakarake ze fahafahagne anagnantika. Izao ty nisorate i apostoly Paoly miomba izay: “Naho vognogne hagnomey ty ndaty raike, le ankasitrahagne zay naho mifagnarake amy ze anagna’e fa tsy amy ze tsy anagna’e.” (2 Kor. 8:4, 12) Tena ankasitraha i Jehovah ty fagnomezagne vokatse ty fo ataontikagne, ndra tie kede avao aza.​—Mar. 12:42-44; 2 Kor. 9:7.

14. Akore ty fivazohoa i Jehovah i fagnampeagne ataontika amy ze rahalahintikagne mipay fagnampeagne rey, arake ty Ohabolana 19:17?

¹⁴ Manompo i Jehovah tika naho fa magnampe ze mpiara-manompo mipay fagnampeagne. Nampitamà o Israelitao ty Jehovah tie hotahie’e ze mitretré o mahantrao. (Deot. 15:7, 10) Tena maregne zay. Isake tie magnampe rahalahy raike ndra rahavave raike mipay fagnampeagne tika, le hevere i Jehovah ho manao fagnomezagne ho aze. (Vakio ty Ohabolana 19:17.) Naho fa nandefa fagnomezagne hoahy i Paoly ohatse ty Kristiana ta Filipy agne tamy ireke tam-pirizò agney, le nirehafe’e tie ‘sorogne ankasitrahan’Agnahare rey sady tena mahafale aze.’ (Fil. 4:18) Saintsaigno areke zao: ‘Ia koahe ty ndaty azoko ampeagne amy fiangona’ay eo?’ Mahafale i Jehovah ty mahavazoho antika mampiasa ty fotoantika, ty herintika, ty fahaiantika naho ty fanagnantikagne mba hagnampeagne ze mipay fagnampeagne rey. Rambese’e ho fanompoantikagne aze rey.​—Jak. 1:27.

15. Mitake fotoagne naho kezake ty fanompoagne i Jehovah, faie nagnino ro tsy magnavesatse ty fanoagne aze?

¹⁵ Mitake fotoagne naho kezake ty fanompoam-pivavahagne maregne faie tsy mavesatse. Fa nagnino? Satria ty hateantikagne i Jehovah ty mahavy antikagne manompo aze. (1 Jaona 5:3) Eretsereto tie misy ajaja raike te hagnomey raha i baba’e. Va’e handany lera maro reke mba hagnamboaragne sare homeagne i baba’e. Faie tsy hanegnena i ajajay i fotoagne nilani’e rey. Ty anto’e, tea’e ty baba’e, le mahafale aze ty magnomey fagnomezagne ho aze. Hoe izay ka fa mahafale antika ty manompo i Jehovah ndra tie mitake fotoagne naho hery aza ty fanoagne aze, satria teantikagne reke.

16. Akore ty fivazohoa i Jehovah i kezake ataontika mba hampifaleagne aze rey, arake ty Hebreo 6:10?

¹⁶ Ty rae aman-drene bey hatea, le tsy hampitovy ty fagnomezagne mey ty ana’e aze. Ty anto’e, tsy mitovy i ana’e rey sady tsy mitovy ka ty raha iaigna iareo. Taka i Babantikagne an-dagnitse agney ka fa tsy mitovy ty raha iaignantika tsikiraidraike. Ihe zao va’e hahavita bey naho oharegne amy ty ndaty hafa, va’e ho fanta’o ndra trea’o. Ndra irehe ka ro tsy le hahavita bey naho oharegne amy ty ndaty hafa, satria va’e fa mihantetse ndra tsy salama ndra noho ty andraiki’o amy ty keleiagne eo. Faie ko kivy. (Gal. 6:4)  Tsy hagnaligno ty asa atao’o ty Jehovah. Naho ihe magnomey ze fara’e soa vita’o hoahy i Jehovah sady anto’e soa ty mandrisike azo hanao izay, le ho fale reke. (Vakio ty Hebreo 6:10.) Ndra i fagniriagne soa am-po’o aoy aza, le fa vazoho i Jehovah. Tea’e ho fale naho ho afa-po amy ze fanompoagne azo’o atao ho aze rehe.

17. a) Inogne ty raha azontikagne atao naho tsapantika tie sarotse amantika ty manao ty ila’e amy i raha agnisa ty fanompoantika i Jehovah rey? b) Akore ty nagnampea ty raike amo o raha trea amy ty efajoro tihoe “ Ampitombò ty Hafalea’o” azo?

¹⁷ Inogne ty azontikagne atao naho hoe sarotse amantikagne ty manao ty ila’e amy i raha nidinehentikagne teo rey, ohatse ty mianatse Baiboly ndra mitory? Magneke varagne tikagne fa arakarake ty anoantikagne i raha rey mateteke ty vao mainke hahavy antikagne ho tea manao aze naho handrambe soa boake ama’e. Azo ampitoviegne amy ty fianaragne mozike o fanompoantikagneo. Naho ohatse kindraikindraike avao tikagne ty mba mihisa i mozikey, le tsy hitombo ty fahaizantikagne. Faie akore naho ataontika ho agnisa ty fahazarantikagne isan’andro ty manao aze? Va’e ho agnate ty minitra tsiampeampe heike ty hanoantikagne aze amy ty voaloha’e, le azontikagne ampitomboegne tsikede zay naho fa mandeha ty fotoagne. Naho fa mitombo amy izay ty fahaiantika aze, le hanjare tsy ho lignentika ty fotoagne hihisantikagne aze sady tena hahafinaritse antikagne. Tsy hita’o vao tie azontikagne ampiharegne amy ty fanompoantikagne o fagnoharagne iohoe?

18. Akore ty anoroantika fa magnatanterake ty anto’e namboara i Jehovah antikagne tika? Le ino ty ho voka’e naho itika manao izay?

¹⁸ Magnatanterake ty anto’e namorogna i Jehovah antikagne tika naho manompo aze amy ty fo. Naho itika manao izay, le ho falefale, hisy dika’e ty fiaignantika sady afake hitamà ty hanompo aze nainai’e. (Ohab. 10:22) Milamin-tsaigne ka tika hinane zao, satria haintika tie magnampe o mpanompo’eo ty Jehovah naho fa miatreke olagne iareo. (Isaia 41:9, 10) Mieke tika fa maro ty anto’e mahafale antikagne noho itika manompo i Babantika bey hateay, i fagneva ty ‘homey ze hene raha finoro’e voninahitse naho hajay.’​—Apok. 4:11.