1-2. Kumbi ntchinthu wuli cho chingachitiska kuti Chiuta wazomerezi kusopa kwidu?

 KUMBI muŵanaŵananji asani mwavwa mazu ngakuti “kusopa”? Panyaki muŵanaŵaniya va mubali wakujiyuyuwa yo wajikama kuti wapempheri ndi kumupunguliya Yehova vosi vo ve mumtima waki. Pamwenga muŵanaŵaniya va banja lalikondwa lo kuchitiya limoza kusopa kwa pabanja.

² Pa vakuchitika vosi viŵi, wosi achita vinthu vakukwaskana ndi kusopa. Kumbi Yehova wazomerezengi kusopa kwawu? Iyu wangazomereza asani kukoliyana ndi khumbu laki ndipuso asani atimuyanja kweniso kumutumbika. Titimuyanja ukongwa Yehova. Tiziŵa kuti Iyu ndiyu ngwakwenere kumusopa ndipuso kuti tikhumbika kumusopa mu nthowa yamampha ukongwa.

3. Kumbi tikambiskanengenji mu nkhani iyi?

³ Mu nkhani iyi, tikambiskanengi kusopa ko Yehova wazomerezanga mu nyengu yakali kweniso vinthu 8 vo wakhumba kuti tichitengi pakumusopa mazuŵa nganu. Po tichita venivi, tingaŵanaŵaniya mo weyosi pakuyija wangasope Yehova mu nthowa yamampha ukongwa. Tiwonengi so vifukwa vo kusopa kwauneneska kutovye kuti tikondwengi.

4. Kumbi ŵanthu wo asopanga Yehova, Yesu wechendazi pacharu chapasi, angulongo wuli kuti amutumbikanga kweniso amuyanjanga Yehova?

⁴ Yesu wechendazi pacharu chapasi, anthulumi akugomezgeka nge Abelu, Nowa, Abrahamu kweniso Yobu, angulongo  kuti amutumbikanga Yehova kweniso amuyanjanga. Mu nthowa wuli? Yiwu angumuvwiya Chiuta, ŵenga ndi chivwanu mwaku iyu ndipuso aperekanga sembi. Bayibolu likamba vinthu vosi cha vo akhumbikanga kuchita pakusopa. Kweni viwoneke limu kuti yiwu ayesesanga kuti athamiki Yehova ndipu wazomerezanga kusopa kwawu. Pati pajumpha nyengu, Yehova wanguŵapaska dangu Ayisirayeli kuziya mwaku Mozesi. Mu dangu lenili mwenga ulongozgi wa mo angasope Yehova mu nthowa yo iyu wazomereza.

5. Kumbi ndi vinthu wuli vo vingusintha pa nkhani ya kusopa kwauneneska Yesu wati wafwa kweniso kuyuskika?

⁵ Yesu wati wafwa kweniso kuyuskika, Yehova wakhumbanga so cha kuti ŵanthu amusopengi mwakukoliyana ndi Dangu laku Mozesi. (Aro. 10:4) Akhristu akhumbikanga kulondo dangu lasonu, “dangu laku Khristu.” (Aga. 6:2) Yiwu atingi avwiyengi “dangu” lenili mwakuloŵeza kweniso kulondo marangu nganandi cha, kweni mwakuyezga chakuwoniyapu chaku Yesu kweniso vo iyu wasambizanga. Mazuŵa nganu napu, Akhristu akhumbika kwesesa kulondo Khristu kuti akondwesi Yehova ndipuso kuti ‘asisipuliki.’—Mate. 11:29.

6. Kumbi tingayanduwa wuli ndi nkhani iyi?

⁶ Po tikambiskana chigaŵa chechosi chakukwaskana ndi kusopa kwidu, jifumbeni kuti, ‘Kumbi ini ndaluta panthazi wuli pa chigaŵa chenichi?’ Mungajifumba so kuti, ‘Kumbi ndingasazgiyaku kuchita umampha ukongwa pa nkhani ya kusopa?’ Mungakondwa ndi mo mwalutiya panthazi, kweni mungakhumbika so kupemphera kwaku Yehova kuti wakuwovyeni kuwona vinthu vo mungakhumbika kusintha.

7. Kumbi Yehova watingawona wuli mapempheru ngidu ngakutuliya pasi pa mtima?

⁷ Tisopa Yehova asani tipemphera kwaku iyu. Malemba ngayeruzgiya mapempheru ngidu ndi vakununkhira vo vanozgekanga umampha ukongwa vo vaperekekanga pachihema ndipu pavuli paki pa nyumba yakusopiyamu. (Salimo 141:2) Vakununkhira venivi, vatuzganga kafungu ko kakondwesanga Chiuta. Mwakuyanana ŵaka, mapempheru ngidu ngakutuliya pasi pa mtima, ‘ngatimukondwesa’ chinanga kuti tingagwiriskiya ntchitu mazu ngapusu. (Nthanthi 15:8; Doto. 33:10) Te ndi chifukwa chakuvwika chakugomezge kuti Yehova wakondwa kutivwa tichilongo kuti titimuyanja kweniso kumuwonga. Iyu wakhumba kuti timukambiyengi vo vititifipiska mtima, vo tikhazga kuti watichitiyi kweniso vo tikhumba. Mwechendayambi kukambiskana ndi Yehova mupempheru, mungachita umampha kuŵanaŵaniya mwakuphwere vo mukhumba kukamba. Asani muchitengi viyo, muŵapaskengi “vakununkhira” vamampha ukongwa Awusemwi akuchanya.

8. Kumbi mpha vakuchitika nivi po tingathamika Chiuta?

⁸ Tisopa Yehova asani titimuthamika. (Salimo 34:1) Tithamika Yehova asani tikambiyaku anyidu mijalidu kweniso ntchitu zaki zakuziziswa. Tiŵengi ndi vinthu vinandi vamampha vo tingakamba vakukwaskana ndi Yehova asani titimuwonga. Asani tisaniya nyengu yakuŵanaŵaniya vinthu vosi vamampha vo Yehova watichitiya, tiŵengi ndi vifukwa vinandi vakumuthamikiya. Ntchitu yakupharazga ndiyu yititipaska ukongwa mwaŵi ‘wakupereka sembi yakuthamika kwaku Chiuta, yo ntchipasu cha milomu yidu.’ (Ahe. 13:15) Nge mo tikhumbikiya kuŵanaŵaniya mwakuphwere vo tikhumbika kukamba mu pempheru techendakambiskani ndi Yehova, tikhumbika so kuŵanaŵaniya mwakuphwere vo tamukambiya ŵanthu wo takuŵapharazgiya. Tikhumba kuti ‘sembi yidu yakuthamika’ yijengi yamampha ukongwa. Ndichu chifukwa chaki tikamba mwakutuliya pasi pamtima asani tipharazga.

9. Mwakuyanana ndi Ayisirayeli a mu nyengu yakali, kumbi tiyanduwa wuli asani tiwungana? Kambani mo maunganu ngakuwovyiyani yimwi pakumwija.

 ⁹ Tisopa Yehova asani tiwungana. Ayisirayeli a mu nyengu yakali angukambirika kuti: “Katatu pa chaka, anthulumi wosi pakati pinu awonekiyengi pa masu paku Yehova Chiuta winu kumalu ngo wasankha.” (Doto. 16:16) Yiwu akhumbikanga kusiya nyumba zawu kweniso minda yawu kwambula munthu wakuvivikiliya. Kweni Yehova wanguŵalayizga kuti: “Muchiluta kuchiwona chisku chaku Yehova Chiuta winu.  . . . palivi munthu yo wazamukhumbira charu chinu.” (Eki. 34:24) Chifukwa chakuti ŵenga ndi chivwanu chikulu mwaku Yehova, Ayisirayeli wo awopanga Chiuta, alutanga ku maphwandu ngo ngachitikanga pachaka. Yiwu ayanduwanga ukongwa. Mwakuyeruzgiyapu, alivwisanga umampha ukongwa dangu laku Chiuta, aŵanaŵaniyanga vinthu vamampha vo waŵachitiyanga kweniso achiskananga ndi Ayisirayeli anyawu wo asopiyanga nawu limoza Chiuta. (Doto. 16:15) Mwakuyanana ŵaka, nasi tiyanduwa asani tachita vosi vo tingafiska kuti tikasaniriki pa maunganu Ngachikhristu. Ndipu ŵanaŵaniyani mo Yehova wakondwe asani tanozgeke kuchipereka ndemanga zifupi, kweni zakuchiska.

10. Ntchifukwa wuli kumba sumu ntchigaŵa chakukhumbika pakusopa kwidu?

¹⁰ Tisopa Yehova asani titumba sumu limoza ndi abali kweniso azichi. (Salimo 28:7) Ayisirayeli awonanga kuti kumba sumu, ntchigaŵa chakukhumbika ukongwa pakusopa kwawu. Fumu Davidi yingusankha alevi 288, kuti ambengi sumu pa nyumba yakusopiyamu. (1 Mbiri 25:1, 6-8) Mazuŵa nganu, tingalongo kuti titanja Chiuta widu mwakumba sumu zakuthamika. Titenere kuja ndi lusu la kumba sumu pe cha kuti tichiti venivi. Ŵanaŵaniyani chakuyeruzgiyapu ichi: Asani tilongoro, “tosi tiguŵa nyengu zinandi,” kweni venivi vitititondekeska cha kuŵereŵeta mumpingu ndipuso mu uteŵeti. (Yako. 3:2) Mwakuyanana ŵaka, kuŵavi lusu la kumba kungatitondekesanga cha kumba sumu za kuthamika Yehova.

11. Nge mo pakonkhoske pa Salimo 48:13, ntchifukwa wuli tikhumbika kuja ndi ndondomeku yakusambiriya Bayibolu nge banja?

¹¹ Tisopa Yehova asani tisambira Mazu ngaki kweniso kusambiza ŵana ŵidu vakukwaskana ndi iyu. Pa zuŵa la Sabata, Ayisirayeli agwiranga ntchitu cha ndipu aŵikanga maŵanaŵanu ngawu pa vinthu vo vingaŵawovya kuja pa ubwezi wakukho ndi Yehova. (Eki. 31:16, 17) Ayisirayeli akugomezgeka, asambizanga ŵana ŵawu vakukwaskana ndi Yehova ndipuso vinthu vamampha vo waŵachitiyanga. Nasi mazuŵa nganu, tingachita umampha kuja ndi ndondomeku yakuŵerenge ndi kusambiriya Mazu ngaku Chiuta. Chenichi ntchigaŵa cha kusopa kwidu Yehova ndipu chititiwovya kuti tindere kufupi ndi iyu. (Salimo 73:28) Ndipu asani tisambiriya limoza nge banja, tingawovya ŵana ŵidu kuti aje pa ubwezi wakukho ndi Awusefwi akuchanya wo atitiyanja.​—Ŵerengani Salimo 48:13.

12. Kumbi tisambiranji pa mo Yehova wanguwone ntchitu ya ŵanthu wo angupanga vinthu vo vajanga muchihema?

¹² Tisopa Yehova asani tizenga kweniso kunozga malu ngakusopiyapu. Bayibolu likamba kuti ntchitu yakupanga chihema kweniso vinthu vosi vo vajanga mukati mwaki, yenga “ntchitu yakupaturika.” (Eki. 36:1, 4) Mazuŵa nganu napu, Yehova wawona kuti ntchitu yakuzenga Nyumba za Ufumu kweniso nyumba zinyaki za gulu laku Chiuta, mbuteŵeti wakupaturika. Abali ndi azichi anyaki, amaliya nyengu yawu yinandi pakugwira ntchitu zenizi. Tiwonga ukongwa vo abali ndi azichi ŵenaŵa achita pa ntchitu ya Ufumu. Kweni yiwu agwiraku  so ntchitu yakupharazga. Ndipu anyaki angakhumba kuja apayiniya. Ŵara mumpingu angalongo kuti atovya ntchitu zakuzenga asani aleka kuziŵaniza kuzomereza abali ndi azichi ŵenaŵa kuja apayiniya asani afiska vo vikhumbika. Kwali te ndi lusu pa ntchitu yakuzenga pamwenga cha, tosi tingawovyaku kuti nyumba zenizi zilutirizgi kuja zakutowa kweniso ziwonekengi umampha.

13. Kumbi titenere kuziwona wuli ndalama zo tipereka kuti ziwovyi pa ntchitu ya Ufumu?

¹³ Tisopa Yehova asani titovya pa ntchitu ya Ufumu mwakupereka ndalama zidu. Ayisirayeli akhumbikanga cha kuchiwoneke pa masu paku Yehova ndi manja ngaŵaka. (Doto. 16:16) Akhumbikanga kuza ndi mphasu mwakukoliyana ndi mo vinthu venge pa umoyu wawu. Asani achita viyo, yiwu alongonga kuti awonga chechosi cho Yehova waŵachitiyanga kuti ayanduwi mwauzimu. Kumbi tingalongo wuli kuti titimuyanja Yehova kweniso tiwonga vinthu vauzimu vo tilonde? Nthowa yimoza yo tingachitiya venivi, nkhupereka ndalama zakovya pa mpingu widu kweniso pa ntchitu ya pacharu chosi, mwakukoliyana ndi mo vinthu viliri pa umoyu widu. Wakutumika Paulo wangukamba kuti: “Asani mphasu yaperekeka mwakukhumbisiska, njakuzomerezeka kwaku Chiuta, ndipu yitenere kuperekeka mwakukoliyana ndi vo munthu walivi cha, kweni mwakukoliyana ndi vo we navu.” (2 Akori. 8:4, 12) Mwaviyo, Yehova wawona kuti ndalama yo tapereka mwakutuliya pasi pa mtima njakuzirwa ukongwa, vilivi kanthu kuti njimana pamwenga cha.​—Mariko 12:42-44; 2 Akori. 9:7.

14. Mwakukoliyana ndi Nthanthi 19:17, kumbi Yehova wativiwona wuli vo tichitiya abali ŵidu wo akhumbika chovyu?

¹⁴ Tisopa Yehova asani titovya Akhristu anyidu wo akhumbika chovyu. Yehova wangulayizga kuti waŵaweziyengi Ayisirayeli wo achitiyanga lisungu akavu. (Doto. 15:7, 10) Mwaviyo, nyengu yeyosi yo tawovya Mkhristu munyidu yo wakhumbika chovyu, Yehova wawona kuti mphasu yo tapaska Iyu. (Ŵerengani Nthanthi 19:17.) Mwakuyeruzgiyapu, Akhristu a ku Filipi ŵati atumiza mphasu kwaku Paulo yo wenga mujeri, iyu wanguyidana kuti ndi “sembi yakuzomerezeka kweniso yakukondwesa kwaku Chiuta.” (Afi. 4:18) Ŵanaŵaniyani abali ndi azichi mumpingu winu ndipu jifumbeni kuti, ‘Kumbi pe munthu munyaki yo ndingamuwovya?’ Yehova wakondwa asani wawona kuti tigwiriskiya ntchitu nyengu yidu, nthazi zidu, malusu ngidu kweniso vinthu vo tenavu kuti tiwovyi wo akhumbika chovyu. Iyu wawona kuti venivi ntchigaŵa cha kusopa kwidu.​—Yako. 1:27.

15. Kusopa kwauneneska kukhumba nyengu ndipuso phamphu, kweni ntchifukwa wuli nkhwakufyo cha?

¹⁵ Kusopa kwauneneska kukhumba nyengu ndipuso phamphu. Kweni nkhwakufyo cha. (1 Yoha. 5:3) Chifukwa wuli? Pakuti tisopa Yehova chifukwa chakuti titimwanja. Yeruzgiyani kuti mwana wakhumba kuŵapaska chinthu chinyaki awisi. Iyu wangamaliya nyengu yinandi kuŵajambuliya chithuzi. Iyu wadandawula cha kuti wamaliya nyengu yinandi pa kuchijambula. Iyu watiŵayanja awisi ndipu wakondwa kuŵapaska mphasu yeniyi. Mwakuyanana ŵaka, chifukwa chakuti titimuyanja Yehova, tikondwa kugwiriskiya ntchitu nyengu yidu kweniso kufwiyapu kuti timusopi.

16. Mwakukoliyana ndi Aheberi 6:10, kumbi Yehova wawona wuli vo titesesa kuchita kuti timukondwesi?

¹⁶ Apapi achanju akhaza cha kuti alondiyengi mphasu zakuyanana ku ŵana ŵawu wosi. Yiwu aziŵa kuti mwana weyosi wapambana ndi munyaki. Mwakuyanana ŵaka, Awusefwi akuchanya  avwisa vo weyosi wangafiska kuchita. Panyaki mungachita vinandi kuluska ŵanthu wo muziŵa pamwenga kuŵayanja. Pamwenga mungafiska cha kuchita vinandi nge mo anyinu achitiya, panyaki chifukwa cha ukoti, kutama pamwenga maudindu nga mu banja. Mungadandawulanga cha. (Aga. 6:4) Yehova waluwengi cha ntchitu yinu. Asani mutimupaska vinthu vamampha ukongwa kweniso ndi chilatu chamampha, iyu wakondwengi. (Ŵerengani Aheberi 6:10.) Ndipu Yehova waziŵa vo mukhumba kuchita. Iyu wakhumba kuti mukondwengi kweniso mukhorwengi ndi vo mufiska kuchita pakumusopa.

17. (a) Asani tiwona kuti vititisuzga kuchita vinthu vinyaki vakukwaskana ndi kusopa, kumbi tingachitanji? (b) Kumbi yimwi mwawovyeka wuli ndi vinthu vo vakambika mu bokosi lakuti, “ Kutovya Kuti Mukondwengi Ukongwa”?

¹⁷ Kumbi tingachita wuli asani vititisuzga kuchita vinthu vinyaki vakukwaskana ndi kusopa kwidu nge kuchita sambiru la pakutija pamwenga kupharazga? Asani tichita vinthu venivi kaŵikaŵi, tingayamba kuviyanja ukongwa kweniso tingayanduwa navu ukongwa. Tingayeruzgiya kusopa kwidu ndi vinthu nge kuchita masaza pamwenga kusambira kugwiriskiya ntchitu chipangizu chakumbiya sumu. Asani tichita venivi kaŵikaŵi cha, tingaluta panthazi cha . Tiyeruzgiyi kuti tasankha kuti tichitengi venivi zuŵa lelosi. Tingayamba kuvichita kwanyengu yimanavi ndipu kamana ndi kamana tingasazgiyaku nyengu. Asani tiwona kuti tayamba kuchita umampha ukongwa, tingasazgiyaku so nyengu yinyaki ndipu tingayamba kukondwa. Ndimu so viliri ndi kusopa kwidu.

18. Kumbi ntchinthu chakukhumbika ukongwa nichi cho tingachita?

¹⁸ Kusopa Yehova ndi mtima wosi, ndichu chinthu chakuzirwa ukongwa cho tingachita. Asani tachita viyo, tikondwengi kweniso kukhorwa ndi umoyu ndipu tisopengi Yehova mpaka muyaya. (Nthanthi 10:22) Te ndi chimangu cha mumtima chifukwa tiziŵa kuti Yehova watovya ateŵeti ŵaki asani akumana ndi masuzgu. (Yesa. 41:9, 10) Te ndi vifukwa vamampha vakukondwe pakusopa Awusefwi akuchanya, wo mbakwenere “kulonde unkhankhu ndi ulemu” ku vinthu vosi vo akulenga!​—Chivu. 4:11.