1-2. Ginani gi na girago gu wukhozeyi wathu wu hakhwa khu Nungungulu?

 GINANI u gi dundrugeyago wa gupwa lito “gukhozeya”? Yimbe tepo u nga dundrugeya khu ndriyathu moyo a khidzimago gasi gu gombeya khu monyo waye watshavbo ga Jehovha na si gu hongoli a ya lala. Mwendro adzina u nga dundrugeya khu ndranga yi tsakidego khu gu hevbula Bhibhiliya.

² Ga siemo sesi sa sivili, avo va gu patega avba nya gu gire wukhozeyi. Ina Jehovha a na hakha wukhozeyi wawe? Uye a na wu hakha wa gu ba wu gimbidzisana ni gugola gwaye nigu na va ri va gu wu gira khu lihaladzo ni githawo. Ethu hi ngu mu haladza ngudzu Jehovha. Ethu hi ngu dziti gu khethu uye a ngu yedwa gu khozedwa, nigu ho vbweta gu gira isoso khu ndziya nya yadi.

3. Ginani hi na bhulago khigyo avba nya ndrima yeyi?

³ Avba nya ndrima yeyi, hi na hevbula khu wukhozeyi owu Jehovha a nga ba a wu hakha dziteponi nya gu lowe nya Bhibhiliya nigu hi na bhula khu 8 dzindziya edzi Jehovha a vbwetago gu khuye hi mu khozeya khidzo muhuno. Tepo hi girago isoso, hi nga dundrugeya khedzi hi nga tshukwadzisago khidzo wukhozeyi wathu. Hi na wona gambe gu khethu khu ginani gu khozeya Jehovha khu ndziya nya yadi si hi reseyago litsako.

4. Vakhozeyi va Jehovha va dziteponi nya Makristo nyo pheye, va yeyedzide kharini gu khavo va di gu ninga githawo ni gu haladza Jehovha?

⁴ Dziteponi nya Makristo nyo pheye, vama nyo tumbege nya nga Abheli, Nowa, Abrahama ni Joba, va yeyedzide githawo ni lihaladzo khu Jehovha. Khu ndziya muni? Avo va engiside Nungungulu, va khodwa gwaye va bwe va gira silo nya singi gasi gu mu tsakisa. Bhibhiliya kha yi ganeyi satshavbo esi va giridego.  Ganiolu, avo khu lisine va giride iso va nga si kodza gasi gu dhumisa Jehovha nigu uye a hakhide wukhozeyi wawe. Khu hwane, Jehovha ningide Vaisrayeli nayo khu gu thumisa Mosi. Ga milayo yeyi, yi di gu pata sileletelo nya singi maningano ni edzi Jehovha a nga ba a vbweta gu khozedwa khidzo.

5. Guvbindrugeza muni gu manegidego umo nya wukhozeyi nya lisine hwane nya gufe ni guwuswa ga Jesu?

⁵ Hwane nya gufe ni guwuswa ga Jesu, Jehovha kha vireya gu khuye vathu va mu khozeya na va gu dzi seketeya avba nya nayo wa Mosi. (Rom. 10:4) Makristo ma gu landra nayo nya wuphya a gu “nayo wa Kristo.” (Gal. 6:2) Avo va di yede gu engisa “nayo” wowu, nasiri khu gu wu vega hungoni va bwe va sasamedza silo va yedego gu gira ni esi va gu mba yela gu gira, ganiolu khu gu pimedzeya giyeyedzo gya Jesu ni gu landrisa sihevbudzo saye. Muhuno gambe, Makristo ma ngu gira satshavbo ma si kodzago gasi gu landreya Kristo ma bwe ma tsakisa Jehovha gasi ma “mana guhefemula.”— Mat. 11:29.

6. Hi nga phasega kharini khu ndrima yeyi?

⁶ Tepo u hevbulago khu gimwegyo ni gimwegyo gi pategago avba nya wukhozeyi wathu, dzi wudzise esi: ‘Ginani nyi giridego khu mahungo yaya?’ Adzina u nga dzi wudzisa gambe khuwe: ‘Ina nyi nga tshukwadzisa wukhozeyi wangu?’ Uwe u yede gu tsaka khesi u girago olu, ganiolu u yede gu lomba gambe Jehovha gasi a gu phasa gu wona esi u yedego gu tshukwadzisa.

7. Jehovha a gu yi wona kharini milombelo yathu yi khugeyago monyoni?

⁷ Ethu ho khozeya Jehovha tepo hi gombeyago gwaye. Milowo ya gu fananisa milombelo yathu ni libani li dongisedwego gwadi gasi gu ya ningedwa omu nya tabhernakeli ni umo nya tempele. (Ndzi. 141:2) Libani lolo li di gu dusa mahema ma nga ba ma tsakisa Nungungulu. Khu ndziya nyo fane, milombelo yathu nyo khugeye monyoni yi ngu mu “tsakisa” ambari ha gu thumisa malito nya madugwana. (Mav. 15:8; Dhet. 33:10) Hi na ni sighelo nya sadi gasi gu khodwa gu khethu Jehovha a ngu tsaka tepo a hipwago na hi gu mu bonga ni gu ganeya edzi hi mu haladzago khidzo. Uye o vbweta gu khuye hi mu embeya esi si hi garadzago, gutumba gwathu ni esi hi si vbwetago. Na wu nga si ganeyi ni Jehovha khu nombelo, u nga pheya khu gu pimisa gwadi khesi u vbwetago gu ganeya. Wa gu gira isoso, u na ningeya “libani” nya ladi ga Papayi wago wa ndzadzini.

8. Khu levbini lithomo hi gu nalo nya gu rungudze Nungungulu?

⁸ Ethu ha gu khozeya Jehovha tepo hi mu rungudzago. (Ndzi. 34:1) Ha gu rungudza Jehovha tepo hi bhuleyago vambe khedzi hi mu haladzago khidzo ni gu samadziswa khu makhalelo yaye ni mithumo yaye. Hi na manega ni silo nya singi nya sadi nyo ganeye maningano ni Jehovha ha gu mu bonga. Ha gu dundrugeya khu satshavbo silo nya sadi esi Jehovha a hi giredego, hi na manega ni sighelo nya singi nya gu mu dhumise. Thumo nyo tshumayele wu ngu hi ninga lithomo nya gu “rungudze Nungungulu . . . rungudzo yoyo i mhamba hi ningeyago, yi ningedwago khu magana ma rungudzago.” (Hebh. 13:15) Gu fana ni olu hi yedego gu dundrugeya gwadi khesi hi na ganeyago na hi nga si gombeyi ga Jehovha, khyadi ngudzu gu dundrugeya gwadi khesi hi na ganeyago ni vathu hi na va manago thumoni nyo tshumayele. Ho vbweta gu khethu ‘rungudzo wathu nya mhamba’ yi khala iyo nya tshukwana. Esi khiso si hi girago hi ganeya na hi tsakide tepo hi tshumayelago.

9. Gufana ni Vaisrayeli va gale, hi nga phasega kharini khu gu manega mitshanganoni ni vandriyathu? Ninga giyeyedzo nya edzi mitshangano yi gu phasago khidzo.

 ⁹ Ethu ha gu khozeya Jehovha tepo hi manegago mitshanganoni. Vaisrayeli va gale va embedwe gupwani: “Vama vatshavbo va na gyanu, va fanede guya dzi wonegisa mbeli ga Pfhumu Nungungulu wago, nyondro tharu khu mwaga wulangani a na wu hathago.” (Dhet. 16:16) Avo va di yede gu diga dzindranga dzawe ni mathembwe yawe nya mbana muthu nyo si vhikeye. Jehovha ava tumbiside gu khuye va gu: ‘Dzi wonegisa ga Pfhumu Nungungulu wawe, mwalo muthu a na girelago lidiwo litigo lawe.’ (Ekiso. 34:24) Khu kotani nya olu Vaisrayeli va nga ba va tumba Jehovha khu gu vbeleya, avo myaga yatshavbo va di gu manega mibuzutunu. Nigu avo va phasegide khu dzindziya nya dzingi, khu giyeyedzo, avo va hevbude nya singi maningano ni milayo ya Nungungulu, va dundrugede maningano ni edzi Jehovha a va yeyedzidego khidzo wuwadi ni gu avo va tsakide khu gu manega ni vambe va nga ba va haladza navo Jehovha. (Dhet. 16:15) Ethu hi ngu phasega khu ndziya nyo fane tepo hi manegago mitshanganoni nya Wukristo. Nigu dundrugeya khedzi Jehovha a tsakago khidzo tepo hi hongolago mitshanganoni na hi dongide guya ningeya milhamulo nyo role yi dongisedwego gwadi.

10. Khu ginani gu embeleya a gu gipandre nya lisima avba nya wukhozeyi wathu?

¹⁰ Ethu ha gu khozeya Jehovha tepo hi embeleyago ni vandriyathu. (Ndzi. 28:7) Vaisrayeli va di gu wona gu embeleya kha nga gipandre nya lisima nya wukhozeyi wawe. Pfhumu Dhavhidhe a di emisa 288 Valevhi gasi gu embeleya tempeleni. (1 Dzik. 25:1, 6-8) Muhuno hi nga yeyedza lihaladzo lathu khu Nungungulu tepo hi embeleyago dzindzimo nya gu mu dhumise. Kha si lombi gu hi khala va embeleyi nya vadi gasi hi gira isoso. Nga wona gifananiso gegi: Tepo hi ganeyago, “hatshavbo hi ngu hosisa,” ganiolu isoso kha si hi himbedzeyi gu ganeya ha gu ba hiri libandlani ni thumoni nyo tshumayele. (Jak. 3:2) Khu ndziya nyo fane, ethu hi nga si kodza gu emba dzindzimo nyo dhumise Jehovha ambari ha gu pimisa gu khethu kha hi si kodzi gu embeleya gwadi.

11. Kha nga si yeyedzwago omu ga Ndzimo 48:13, khu ginani hi yedego gu dzi vegeya tepo nya gu hevbule Bhibhiliya khu ndranga?

¹¹ Ethu ha gu khozeya Jehovha tepo hi hevbulago lito laye ni gu hevbudza sanana sathu khuye. Khu sabhadho, Vaisrayeli kha va nga ba va yede gu thuma nigu va di gu thumisa litshigu leli gasi gu tiyisa wupari wawe ni Jehovha. (Ekiso. 31:16, 17) Sithumi sesi nyo tumbege si di gu hevbudza sanana sawe khu Jehovha ni wuwadi waye. Muhuno gambe, ethu hi yede gu dzi tshiyela tepo nyo leri ni gu hevbula lito la Nungungulu. Egi gipandre nya lisima nya wukhozeyi wathu ga Jehovha nigu igyo gi ngu hi phasa gu hidzimeya gwaye. (Ndzi. 73:28) Nigu tepo hi hevbulago hatshavbo kha nga ndranga, hi nga phasa sanana sathu gu tiyisa wupari waso ni Papayi wathu nya lihaladzo wa ndzadzini. — Leri Ndzimo 48:13.

12. Ginani hi gi hevbulago khedzi Jehovha a nga ba a wona khidzo thumo wa vale va nga ba va gira omu nya tabhernakeli?

¹² Ethu ha gu khozeya Jehovha tepo hi vbahago ni gu sayisa malanga nya wukhozeyi. Bhibhiliya yari khiyo thumo nya gu vbahe tabhernakeli ni sombo sakone wu diri “thumo nya guage.” (Ekiso. 36:1, 4) Muhuno gambe, Jehovha a ngu wona thumo nya gu vbahe Dzisalawu nya Mufumo kha nga gipandre nya wukhozeyi wathu. Vandriyathu nyo khaguri va ngu vbedza tepo nya yingi na va gu gira mithumo yeyi. Ina kha hi tsaki khu mithumo yeyi nya lisima yi seketeyago thumo nya Mufumo? Khu  lisine avo va ngu gira gambe thumo nya gutshumayele. Nigu vambe gwawe adzina va nga vbweta gu khala vapiyonero. Madhota ma nga yeyedza gu khayo ma ngu seketeya thumo nya gu vbahe khu gu dzumeleya vandriyathu vava nya sighingi gu khala vapiyonero va gu ba va ninganedwa. Gani hi ngu kodza gu vbaha mwendro ne, hatshavbo hi ngu ninganedwa khu gu khathaleya ni gu sayisa dzinyumba.

13. Hi yede gu yi wona kharini miningelo hi girago gasi gu seketeya mithumo nya Mufumo?

¹³ Ha gu khozeya Jehovha tepo hi seketeyago thumo nya Mufumo khu miningelo yathu. Vaisrayeli va di yede gu ningeya miningelo Jehovha tepo va nga ba va hongola mibuzutunu. (Dhet. 16:16) Avo va di yede gu gira miningelo yawe guya khu giemo gyawe. Khu ndziya yeyi, va di gu yeyedza gu khavo va ngu bonga khu satshavbo esi Jehovha a nga ba ava gireya. Hi nga yeyedza kharini gubonga ni lihaladzo lathu khu Jehovha khu satshavbo esi a hi gireyago? Mweyo nya ndziya khu gu gira miningelo gasi gu seketeya libandla lathu ni thumo nya mafu yatshavbo khavba hi si kodzago khavbo. Mupostoli Pawulo ganede gu khuye: “Kholu muthu a gu nigela khu ligolo, satshavbo esi a na ningelago si na hakhwa khu matsenya, na siri egi muthu a gu mwalo nagyo.” (2 Kor. 8:4, 12) Jehovha a ngu tsaka ngudzu khesi hi kodzago gu ningeya, ambari nari sidugwana.— Marko 12:42-44; 2 Kor. 9:7.

14. Guya khu Mavingu 19:17, Jehovha a gu gi wona kharini giphaso hi yeyedzago vandriyathu va vbwetago giphaso?

¹⁴ Ethu ha gu khozeya Jehovha tepo hi phasago Makristo makhwathu ma vbwetago giphaso. Jehovha tumbiside gu tshatshazeya Vaisrayeli va yeyedzago wuhindzi khu sisiwana. (Dhet. 15:7, 10) Khu lisine, tepo yatshavbo hi phasago vandriyathu va vbwetago giphaso uye a gu wona isoso nga khatshi ha gu gireya uye. (Leri Mavingu 19:17.) Khu giyeyedzo, tepo Makristo ya Filipi ma nga rumeya giningwa ga Pawulo, uye a di gi rana khuye “mahema nya yadi nya mhamba yi hakhwago khu Nungungulu yi mu salalegisa.” (Filp. 4:18) Nga dundrugeya khu vathu va libandlani gwago u dzi wudzisa khuwe ‘Ina womo muthu nyi nga mu phasago?’ Jehovha a ngu tsaka tepo a hi wonago na hi thumisa tepo yathu, tshivba yathu, makodzelo yathu ni simbe silo gasi gu phasa ava va vbwetago giphaso. Uye a gu wona silo sesi kha nga gipandre nya wukhozeyi wathu. — Jak. 1:27.

15. Wukhozeyi nya lisine wa gu vbweta tepo ni tshivba, ganiolu khu ginani isoso si gu mba garadza?

¹⁵ Wukhozeyi nya lisine wa gu vbweta tepo ni tshivba. Ganiolu isoso kha si garadzi. (1 Joh. 5:3) Khu ginani? Kholu ha gu khozeya Jehovha kholu hi mu haladzago. Nga dundrugeya gyanana gi vbwetago gu ninga gilo nyo khaguri Papayi wagyo. Igyo adzina gi vbedzide tepo nya yingi na gi gu gira dezenyu gasi gu ninga Papayi wagyo. Igyo kha gi na nga dzi laya khu tepo gi vbedzidego na gi gu gira isoso. Igyo gi ngu haladza Papayi wagyo nigu gi ngu tsaka khu gu mu ninga giningwa gegi. Khu ndziya nyo fane, khu kotani nya olu hi haladzago Jehovha, hi ngu tsaka khu gu thumisa tepo ni tshivba yathu gasi gu mu khozeya.

16. Guya khu Vahebheru 6:10, Jehovha a gu dzipwa kharini khesi moyo ni moyo wathu a girago gasi gu mu tsakisa?

¹⁶ Vavelegi va gu na ni lihaladzo, kha va vireyi gu khavo sanana sawe si va ninga giningwa nya gu fane. Avo va ngu dziti gu khavo sanana sawe si hambanide nigu si na ni makodzelo nyo hambane. Khu ndziya nyo fane, Papayi wathu wa ndzadzini a ngu pwisisa giemo gya moyo ni moyo wathu. Adzina u nga gira nya singi guvbindra vathu nya vangi u va tigo ni gu  va gola. Mwendro adzina u mwalo makodzelo nyo gire nya singi gufana ni vambe khu kotani nya tanga yago, mawugelo yago ni rwalo nya gu khathaleye ndranga. Abari kharato u nga vbeyi tshivba. (Gal. 6:4) Jehovha kha na nga divala thumo wago. Wa gu ningeya esi u si kodzago khu gighelo nya gyadi uye a na si tsakeya. (Leri Vahebheru 6:10.) Jehovha a ngu siti esi u golago gu gira. Uye a gu vbweta gu khuye u tsaka khesi u si kodzago gu mu gireya.

17. a) Abari gu gyomo gilo nyo khaguri gi hi garadzeyago avba nya wukhozeyi wathu, ginani hi nga girago? b) Wa gu phasega kharini khu gimwegyo nya silo si yeyedzwago avba nya kwadru: “Engedzeya gutsaka gwago.”

¹⁷ Ginani hi nga girago sa gu hi garadzeya gu gira silo nyo khaguri nya esi hi bhudego khiso, nya nga gu hevbula Bhibhiliya mwendro gu tshumayela? Ha gu dzi garadzeya gu gira silo sesi hi na tsaka nigu hi na phasega khiso. Hi nga fananisa wukhozeyi wathu ni thumo nyo khaguri nya nga hagano nya gutiyise givili mwendro gu hevbuleya gu womba gilo nyo khaguri. Ha gu mba gira hagano wowo nya gutiyise givili tepo yatshavbo, mwendro gu hevbuleya gu womba gilo nyo khaguri tepo yatshavbo kha hi na nga si kodza gu tshukwadzisa. Ganiolu ginani gi na dugeleyago ha gu hunga gu gira silo sesi matshigo yatshavbo. Gupheyani adzina hi nga si gira khu dzimeneti dzidugwana ganiolu khu gu gimbiya nya tepo hi nga simama gu si gira khu tepo nyo laphe. Tepo va wonago mihandro nya gu dzi garadze gwathu, tepo yatshavbo hi na vbweta gu gira silo sesi ni gu hi na tsaka khu lisine. Khiso sasimweso si giregago avba nya wukhozeyi wathu.

18. Gilo muni nya lisima hi yedego gu gira, nigu ginani gi na giregago ha gu gira isoso?

¹⁸ Gu gira satshavbo hi si kodzago gasi gu khozeya Jehovha gilo nya lisima hi nga girago. Ha gu gira isoso, hi na manega ni womi nyo tsakise nigu hi na manega ni gutumba nyo khozeye Jehovha kala gupindruga. (Mav. 10:22) Hi na manega ni gurula kholu hi ngu dziti gu khethu Jehovha a ngu phasa vakhozeyi vaye tepo va emisanago ni sigaradzo. (Isa. 41:9, 10) Nya mba kanakana, hi na ni sighelo nya sadi nya gutsake tepo hi khozeyago Papayi wathu nya lihaladzo, oyu a yedwago khu gu “hakha gidhumo, ni rungudzo” khu satshavbo a si vangidego! — Gutu. 4:11.