1-2. I yini lexi nga ta endla leswaku Xikwembu xi tsaka loko hi xi gandzela?

I YINI lexi fikaka emiehleketweni ya wena loko u twa rito leri nge “gandzela”? Kumbexana u vona makwerhu a khinsame etlhelo ka mubedo wakwe a ri karhi a phofulela Yehovha ta le mbilwini. Kumbe u vona ndyangu wu ri karhi wu tiphina hi ku dyondza Bibele.

² Eka swiyimo sweswo hinkwaswo, hinkwavo va endla swiendlo swa ku n’wi gandzela. Xana ku gandzela ka vona ka amukeleka eka Yehovha? Wa swi amukela loko swi fambisana ni ku rhandza kakwe naswona va swi endla hileswi va n’wi rhandzaka ni ku n’wi xixima. Yehovha ha n’wi rhandza swinene. Ha swi tiva leswaku u faneriwa hi ku gandzeriwa naswona hi lava ku n’wi gandzela hi ndlela leyi n’wi fanelaka hilaha hi nga swi kotaka hakona.

3. Hi ta kambisisa yini eka nhlokomhaka leyi?

³ Eka nhlokomhaka leyi hi ta kambisisa muxaka wa vugandzeri lebyi Yehovha a a byi amukela emikarhini ya khale, nakambe hi ta tlhela hi kambisisa tindlela ta nhungu leti amukelekaka namuntlha. Loko hi ri karhi hi endla tano, un’wana ni un’wana wa hina a xiyisise leswi a nga swi antswisaka eka ndlela leyi a n’wi gandzelaka hayona. Hi ta tlhela hi kambisisa swivangelo leswi endlaka hi tsaka loko hi gandzela Yehovha hi ndlela leyinene.

4. Vagandzeri va Yehovha va le mikarhini ya khale a va swi kombisa njhani leswaku a va n’wi xixima ni ku n’wi rhandza?

⁴ Emikarhini ya khale vanhu vo tshembeka vo fana na Avele, Nowa, Abrahama na Yobo va swi kombisile leswaku va n’wi xixima ni ku n’wi rhandza Yehovha. Njhani? Hi ku va ni ripfumelo eka yena, va n’wi yingisa ni ku n’wi endlela magandzelo. Bibele a yi hi nyiki vuxokoxoko bya ndlela leyi a va fanele va n’wi gandzela hayona. Swi le rivaleni leswaku a va swi rhandza ku xixima Yehovha naswona ndlela leyi a va n’wi gandzela hayona a yi n’wi tsakisa. Hi ku famba ka nkarhi Yehovha u nyike vatukulu va Abrahama Nawu hi ku tirhisa Muxe. Nawu wolowo a wu katsa swileriso swa ndlela leyi Yehovha a lavaka ku gandzeriwa hayona.

5. I yini leswi nga cinca eka ndlela yo gandzela Yehovha endzhaku ka ku fa ni ku pfuxiwa ka Yesu?

⁵ Endzhaku ka ku fa ni ku pfuxiwa ka Yesu, Yehovha a a nga ha langutelanga leswaku vanhu va n’wi gandzela hi ku landza Nawu lowu a wu nyike Vaisrayele. (Rhom. 10:4) Vakreste a va ta fanela ku landzela nawu lowuntshwa ku nga “nawu wa Kreste.” (Gal. 6:2) “Nawu” lowu a va ta wu yingisa hi ku tekelela xikombiso xa Yesu ni ku yingisa tidyondzo takwe ku nga ri hi ku wu hlokohata kumbe ku landzela swileriso swo tala. Hikwalaho, Vakreste namuntlha va wa va pfuka ku landzela Kreste leswaku va tsakisa Yehovha ni ku va va “phyuphyisiwa.”—Mat. 11:29.

6. Hi ta vuyeriwa njhani eka nhlokomhaka leyi?

⁶ Loko hi ri karhi hi kambisisa ndlela ha yin’we ya ku n’wi gandzela, tivutise, ‘Xana ndzi endla njhani eka ndlela yoleyo yo gandzela?’ U nga ha tivutisa u ku, ‘Xana ndzi nga yi antswisa ndlela leyi ndzi n’wi gandzelaka ha yona?’ Tsaka hileswi u swi antswiseke kambe khongela u kombela Yehovha a ku pfuna u vona laha u nga antswisaka kona.

7. Yehovha u swi teka njhani swikhongelo swa hina leswi humaka embilwini?

⁷Ku khongela i ndlela yin’wana yo gandzela Yehovha. Matsalwa ma fanisa swikhongelo swa hina ni murhi wo nunh’wela lowu endliweke kahle lowu a wu nyikeriwa etabernakeleni naswona hi ku famba ka nkarhi wu nyikeriweke etempeleni. (Ps. 141:2) Murhi wolowo a wo nkhulee, lerova Xikwembu xi tsaka. Hilaha ku fanaka swikhongelo swa hina leswi humaka embilwini swa n’wi “tsakisa” hambiloko hi nga tirhisi marito yo hlawuleka. (Swiv. 15:8; Det. 33:10) A swi kanakanisi leswaku Yehovha wa tsaka loko hi phofula ndlela leyi hi n’wi rhandzaka ni ku n’wi tlangela ha yona. U lava hi n’wi byela leswi hi karhataka ni leswi hi navelaka ku swi fikelela. Loko u lava ku khongela eka Yehovha, hikwalaho ka yini u nga rhangi hi ku ehleketisisa hi leswi u lavaka ku swi vula? Loko u endla tano u ta va u nyika tata wa hina wa le matilweni “murhi wo nun’hwela.”

8. Hi wihi nkarhi lowu hi pfulekelaka leswaku hi dzunisa Xikwembu?

⁸Ku dzunisa Yehovha i ndlela yo n’wi gandzela. (Ps. 34:1) Loko hi byela van’wana hi vumunhu ni mitirho yo hlamarisa ya Yehovha hi va hi ri eku n’wi dzuniseni. Hi ta kota ku dzunisa Yehovha loko hi tlangela leswi a hi endlelaka swona. Loko hi tinyika nkarhi wo ehleketisisa hi swilo leswinene leswi Yehovha a hi endleleke swona, hi ta va ni swivangelo swo tala swo va hi n’wi dzunisa. Ntirho wo chumayela wu hi nyika nkarhi lowunene wo nyikela “Xikwembu gandzelo ra ku dzunisa . . . ku nga marito lama humaka emilon’wini ya hina.” (Hev. 13:15) Tanihi leswi hi rhangaka hi ehleketisisa  hi leswi hi nga ta swi vula loko hi khongela eka Yehovha, hi ta va hi endla kahle loko hi ehleketisisa hi leswi hi nga ta swi byela van’wana ensin’wini. Hi lava leswaku “gandzelo ra [hina ra] ku dzunisa” ri va lerinene. Hi yona mhaka ha swi chivirikela ku byela van’wana mahungu lamanene.

9. Hi vuyeriwa njhani loko hi hlengeletana ku fana ni Vaisrayele va khale? Vula ntokoto wa wena.

⁹Loko hi va kona etinhlengeletanweni ta vandlha hi va hi gandzela Yehovha. Vaisrayele va khale a va byeriwe leswi: “Vaxinuna hinkwavo va wena va fanele va ya emahlweni ka Yehovha Xikwembu xa wena kanharhu hi lembe, endhawini leyi a nga ta yi hlawula.” (Det. 16:16) A va fanele va siya makaya ni masimu ya vona swi ri swoxe. Kambe Yehovha u va tshembise a ku: “A ku na munhu loyi a nga ta navela tiko ra wena loko wa ha ye eka Yehovha Xikwembu xa wena.” (Eks. 34:24) Leswi Vaisrayele a va tshemba Yehovha hi ku helela a va nga xwi emikhubyeni ya lembe ni lembe. A va vuyeriwa hi tindlela to tala, a va dyondza swo tala eka Nawu wa Xikwembu, va anakanyisisa hi vunene bya xona ni ku khutazeka hi ku va swin’we ni vapfumerikulobye. (Det. 16:15) Na hina ha vuyeriwa loko hi tikarhatela ku va kona etinhlengeletanweni ta vandlha. Ehleketa ndlela leyi Yehovha a tsakaka hayona loko hi lunghiselele nhlamulo yo koma leyi khutazaka.

10. Hikwalahokayini ku yimbelela ku ri ndlela ya nkoka yo gandzela Yehovha?

¹⁰Loko hi yimbelela swin’we na vamakwerhu hi va hi gandzela Yehovha. (Ps. 28:7) Vaisrayele a va teka ku yimbelela ku ri xiphemu xa nkoka xo gandzela Yehovha. Hosi Davhida u hlawule Valevhi va 288 leswaku va yimbelela etempeleni. (1 Tikr. 25:1, 6-8) Namuntlha hi nga kombisa leswaku hi rhandza Xikwembu hi ku yimbelela tinsimu to dzunisa. A swi kali swi lava hi va swilombe. Xiya mhaka leyi: “Hi endla swihoxo ko tala” loko hi vulavula kambe sweswo a swi hi siveli leswaku hi vulavula evandlheni kumbe loko hi ri karhi hi chumayela. (Yak. 3:2) Hilaha ku fanaka, hi nga dzunisa Yehovha hi ku yimbelela swi nga ri na mhaka leswaku hi ni vuswikoti byo fikela kwihi.

11. Hilaha swi hlamuseriweke hakona eka Pisalema 48:13 hikwalahokayini hi fanele hi tivekela nkarhi wo dyondza Bibele hi ri ndyangu?

¹¹Hi gandzela Yehovha loko hi dyondza Rito rakwe ni ku dyondzisa vana va hina ha yena. Vaisrayele a va tshika ku endla migingiriko ya siku hi Savata leswaku va ta kota ku tiyisa vuxaka bya vona na Yehovha. (Eks. 31:16, 17) Vanhu vo tshembaka a va dyondzisa vana va vona hi Yehovha ni hi vunene byakwe. Un’wana ni un’wana wa hina u fanele a tivekela nkarhi wo hlaya ni ku dyondza Rito ra Xikwembu. Leyi i ndlela yin’wana yo gandzela Yehovha naswona yi hi pfuna leswaku hi tshinela eka yena. (Ps. 73:28) Loko hi dyondza swin’we hi ri ndyangu, hi ta kota ku pfuna vana va hina leswaku va va ni vuxaka lebyinene na Tata wa hina wa rirhandzu la nge ematilweni.—Hlaya Pisalema 48:13.

12. Hi nga dyondza yini eka ndlela leyi Yehovha a wu languta hayona ntirho wa lava a va endla nhundzu ya le tabernakeleni?

¹²Hi gandzela Yehovha loko hi aka ni ku khathalela tindhawu to n’wi gandzela. Bibele yi vula leswaku ntirho wo endla tabernakela ni nhundzu ya yona a ku ri ‘ntirho wo kwetsima.’ (Eks. 36:1, 4) Ninamuntlha, Yehovha u teka ntirho wo aka Tiholo ta Mfumo ni miako yin’wana ya nhlangano ku ri ndlela yin’wana ya ku n’wi gandzela. Vamakwerhu van’wana va heta nkarhi wo tala eka mitirho leyi. Nseketelo wa vona i wa nkoka naswona ha wu tlangela. Vamakwerhu lava va tlhela va katseka eka  ntirho wo chumayela. Van’wana va vona va swi tsakela ku va maphayona. Vakulu emavandlheni va nga seketela ntirho wo aka hi ku pfumelela vamakwerhu lava ku va maphayona loko va faneleka. Hambiloko hi nga ri na byona vuswikoti byo aka, hinkwerhu ka hina hi nga hoxa xandla eku basiseni ni ku khathalela miako ya hina.

13. Hi fanele hi va ni langutelo rihi loko hi humesa minyikelo yo seketela mitirho ya Mfumo?

¹³Hi gandzela Yehovha loko hi seketela mitirho ya Mfumo hi minyikelo ya hina. Vaisrayele a va nga fanelanga va humelela emahlweni ka Yehovha va ri ximandlamandla. (Det. 16:16) A va fanele va nyikela hi ku ya hi swiyimo swa vona. Hi ku endla tano a va kombisa ndlela leyi va swi tlangelaka hayona swilo hinkwaswo leswi Yehovha a a va endlela swona. Hi nga swi kombisa njhani leswaku ha n’wi rhandza Yehovha ni ku tlangela swilo hinkwaswo leswi a hi endlelaka swona leswaku hi n’wi gandzela? Hi nga nyikela hi mali emavandlheni ni le ka ntirho wa misava hinkwayo hi ku ya hi swiyimo swa hina. Muapostola Pawulo u te: “Loko mi lava ku nyika, swa amukeleka, hi ku ya hi leswi munhu a nga na swona, ku nga ri leswi a nga riki na swona.” (2 Kor. 8:4, 12) Yehovha wa yi amukela minyikelo yin’wana ni yin’wana hambiloko yi vonaka yi nga nyawuli ntsena loko yi huma embilwini.—Mar. 12:42-44; 2 Kor. 9:7.

14. Hi ku ya hi Swivuriso 19:17, Yehovha u titwa njhani loko hi pfuna vamakwerhu lava lavaka mpfuno?

¹⁴Loko hi pfuna Vakrestekulobye lava lavaka mpfuno hi va hi gandzela Yehovha. Yehovha u tshembise ku katekisa Vaisrayele lava a va pfuna swisiwana. (Det. 15:7, 10) Yehovha u swi teka swi fana ni loko hi n’wi nyika nyiko loko hi pfuna vamakwerhu lava lavaka ku pfuniwa. (Hlaya Swivuriso 19:17.) Hi xikombiso loko Vakreste va le Filipiya va rhumela nyiko eka Pawulo loyi a a khotsiwile, u yi teke tanihi “gandzelo leri amukelekaka ni leri tsakisaka swinene eka Xikwembu.” (Filp. 4:18) Xiyisisa vamakwerhu evandlheni kutani u tivutisa, ‘Xana u kona loyi ndzi nga n’wi pfunaka?’ Yehovha wa tsaka loko hi tirhisa nkarhi, matimba, vuswikoti, ni swilo swa hina leswaku hi pfuna lava lavaka ku pfuniwa. Sweswo u swi teka ku ri ndlela yin’wana ya ku n’wi gandzela.—Yak. 1:27.

15. Hikwalahokayini ku gandzela Yehovha swi nga ri ndzhwalo hambiloko swi lava matshalatshala ni nkarhi?

¹⁵ Ku gandzela Yehovha swi lava nkarhi ni matshalatshala. Kambe a hi ndzhwalo. (1 Yoh. 5:3) Hikwalahokayini? Hikuva hi gandzela Yehovha hi leswi hi n’wi rhandzaka. Ehleketa hi n’wana loyi a lavaka ku nyika tatana wa yena nchumu wo karhi. A nga ha heta nkarhi wo leha a ri karhi a n’wi dirohwela xifaniso. A nga na mhaka ni nkarhi lowu a wu heteke a ri eku dirohweni. U rhandza tata wakwe naswona u tsakela ku n’wi nyika nyiko leyi. Hilaha ku fanaka, leswi hi rhandzaka Yehovha, ha tsaka loko hi tinyika nkarhi ni ku endla matshalatshala yo n’wi gandzela.

16. Hi ku ya hi Vaheveru 6:10, Yehovha u titwa njhani hi matshalatshala lawa hi ma endlaka leswaku hi n’wi tsakisa?

¹⁶ Vatswari va swi tiva leswaku vana va vona a va nge va nyiki tinyiko leti fanaka. Va swi tiva leswaku vana va vona va hambanile ni swiyimo swa vona a swi fani. Hilaha ku fanaka tata wa hina wa le tilweni wa swi twisisa leswaku hi hambanile. Kumbexana u kota ku endla swo tala ku tlula van’wana. Kumbexana a wu koti ku endla swo tala ku fana ni van’wana hikwalaho ka vutihlamuleri byo wundla ndyangu, rihanyo ni ku dyuhala. U nga wi mapa. (Gal. 6:4) Yehovha a nge yi rivali mitirho ya  wena. Ntsena loko u endla leswi u nga swi kotaka hi xikongomelo lexinene, Yehovha u ta tsaka. (Hlaya Vaheveru 6:10.) Yehovha u tiva leswi nga embilwini ya wena. U lava leswaku u tsaka u tlhela u eneriseka hi leswi u kotaka ku swi endla loko u n’wi gandzela.

17. (a) Loko hi vona onge tindlela tin’wana to n’wi gandzela ta hi tikela, xana hi nga endla yini? (b) U vuyeriwe njhani hi ku tirhisa yin’wana ya tindlela leti kombisiweke eka bokisi leri nge, “ Leswi Hi Endlaka Hi Tsaka”?

¹⁷ Hi nga endla yini loko swi hi tikela ku katseka eka tin’wana ta tindlela to n’wi gandzela to tanihi ku chumayela kumbe ku endla dyondzo ya munhu hi yexe? Loko hi swi endla mikarhi yo tala hi ta xiya leswaku hi ya hi swi rhandza naswona swa hi vuyerisa. Hi nga fanisa ndlela leyi hi gandzelaka hayona ni ku endla vutiolori kumbe ku dyondza ku tlanga swichayachayana swo karhi. Loko hi nga swi endli siku ni siku swi ta hi tekela nkarhi leswaku hi antswisa vuswikoti bya hina. Kambe a hi nge hi swi endla siku ni siku. Hi nga ha sungula ku swi endla hakatsongotsongo naswona hi ku famba ka nkarhi hi engetela. Loko hi vona vuyelo bya matshalatshala ya hina swi ta endla leswaku hi ya emahlweni hi tsakela ku swi endla. Hi nga endla leswi fanaka loko hi gandzela.

18. Hi wihi nchumu wa nkoka swinene lowu hi faneleke hi wu endla naswona hi ta vuyeriwa hi yini?

¹⁸ Nchumu wa nkoka lowu hi nga wu endlaka i ku gandzela Yehovha hi timbilu ta hina hinkwato. Sweswo swi endla leswaku hi tsaka ni ku tlhela hi va ni xikongomelo evuton’wini naswona hikwalaho ka sweswo hi ta kota ku gandzela Yehovha hilaha ku nga heriki. (Swiv. 10:22) Ha pepa emoyeni hi ku tiva leswaku Yehovha wa va pfuna vagandzeri vakwe loko va ri ni swiphiqo. (Esa. 41:9, 10) Hi ni swivangelo leswinene swo va hi tsaka loko hi ri karhi hi gandzela Tata wa hina loyi a nga ni rirhandzu loyi a faneriwaka hi ku “dzunisiwa ni ku xiximiwa” hi swivumbiwa swakwe hinkwaswo!—Nhlav. 4:11.