1-2. Cini ci to maha ku a wukhozeli ga hina gi amukeleka ka Nungungulu?

 U ALAKANYA yini loku uzwa a gezu “wukhozeli”? Kuzvilava u alakanyela makabye wo ti koramisa a khizamileko reveni ga mubhedhi wakwe a chulula mbilu yakwe ka Jehovha hi mukhongelo. Kutani u alakanyela ngango wu tshamileko wu ti gondzela Bhibhiliya na wu tsakile.

² Ka zviyimo lezvi hi wumbiri ga zvona, a vanhu lavo vo khozela. Xana Jehovha i ta amukela a wukhozeli gabye? I ta gi amukela loku gi longoloka ni kungo gakwe ni loku va mu randza va tlhela va mu komba cichavo. Ha mu randza nguvhu Jehovha. Ha zvi tiva ku wa ringanelwa hi kuva hi mu khozela niku hi lava ku maha lezvo hi ndlela ya yinene nguvhu hi laha hi zvi kotako hi kona.

3. Zvini hi to bhula hi zvona ka ndzima leyi?

³ Ka ndzima leyi, hi ta bhula hi wukhozeli legi gi nga amukeleka ka Jehovha cikhatini ci hundzileko hi tlhela hi wona 8 wa tindlela leti Jehovha a lavako ku hi mu khozela hi tona nyamutlha. Laha hi mahako lezvo, hi nga ehleketa hi lezvi hina wutsumbu hi nga mahako kasi ku chukwatisa a wukhozeli ga hina. Hi ta tlhela hi wona ku hikuyini a ku khozela Jehovha hi ndlela yi faneleko zvi hi nyikako litsako.

4. A vakhozeli va Jehovha cikhatini ca kale va kombisile kuyini lezvaku va mu randza va tlhela va mu komba cichavo?

⁴ Cikhatini ca kale, a vavanuna vo tsumbeka vo kota Abheli, na Nowa, na Abrahama, na Joba va wa mu komba cichavo va tlhela va mu randza Jehovha. Hi ndlela muni? Va wa mu ingisa, va kholwa kakwe, va tlhela va mu mahela miphahlo. A Bhibhiliya a gi wuli zvontlhe lezvi va nga maha kasi ku mu khozela. Kanilezvi zvi te dlunya ku va wa maha zvontlhe va nga zvi kota kasi ku mu nyika wudzundzo Jehovha niku a wukhozeli gabye gi wa amukeleka ka yena. Hi kufamba ka masiku, Jehovha i no va nyika Nayo wa Mosi a vaIzrayeli. A xaxameto lowo wa milayo wu wa patsa zvileletelo zvo kongoma xungetano hi lezvi Jehovha a nga lava ku va mu khozelisa zvona.

5. Kucica muni ku mahilweko ka wukhozeli ga lisine andzhako ka kufa ka Jesu ni kuvhuxiwa kakwe?

⁵ Andzhako ka kufa ka Jesu ni kuvhuka kakwe, Jehovha i wa nga ha lavi lezvaku a vanhu va ingisa Nayo wa Mosi. (Rom. 10:4) A maKristu ma wa fanele ku ingisa a nayo wuswa, wu nga “nayo wa Kristu”. (Gal. 6:2) Kasi ku ingisa “nayo” lowo, zvi wa nga lavi ku vava ni xaxameto wa lezvi va faneleko ku maha ni lezvi va nga faneliko ku zvi maha. Kanilezvi va wa ta wu ingisa hi ku pimanyisa cikombiso ca Jesu ni ku landzela tigondzo takwe. Ni nyamutlha kambe, a maKristu ma ti karatela ku landzela Kristu kasi ku tsakisa Jehovha ni ku kuma ‘kuhumula’. — Mat. 11:29.

6. Zvini hi faneleko ku maha kasi hi vhuneka hi ndzima leyi?

⁶ Laha hi bhulako hi cipandze cin’we ni cin’wani ca wukhozeli ga hina, ti wutise lezvi: ‘Kukula muni ndzi ku kombisileko mhakeni leyi?’ U nga tlhela u ti wutisa lezvi: ‘Ci kona ndzi nga mahako kasi ku chukwatisa a wukhozeli ga mina?’ U fanele ku tsaka hi kukula loku u ku kombisileko, kanilezvi zvi nene kambe ku u ehleketa u tlhela u khongela hi lezvi wa ha faneleko ku zvi chukwatisa.

7. Jehovha i yi wonisa kuyini a mikhongelo ya hina yo huma mbilwini?

⁷ Hi khozela Jehovha hi ku maha mukhongelo ka yena. A Mitsalo yi fananisa a mikhongelo ya hina ni libani li longiselweko khwatsi leli li nga hisiwa tabhernakelini ni lomu tempeleni. (Lis. 141:2) A libani li wa hi ni masema yo nuhela ma nga tsakisa Nungungulu. Hi kufanana, a mikhongelo ya hina yo huma mbilwini ya mu ‘tsakisa’, hambu loku hi tirisa magezu yo olova. (Mav. 15:8; Deut. 33:10) Hi na ni zvigelo zva zvinene zva ku kholwa lezvaku Jehovha wa tsaka hi ku hi ingisela na hi ti phofula lezvi hi mu randzisako zvona ni ku mu bonga. I lava lezvaku hi mu byela lezvi zvi hi karatako, kutsumba ka hina, ni kuxuva ka hina. Na u nga se tshinela ka Jehovha hi mukhongelo, zvi ngo yini loku wo ti nyika cikhati ca ku ehleketa khwatsi hi lezvi u to wula? Loku u maha lezvo, u ta mu hisela “libani” la linene nguvhu a Papayi wa wena wa le tilweni.

8. I mole muni wo hlawuleka hi nga nawo wa ku dhumisa Nungungulu?

⁸ Hi khozela Jehovha hi ku mu dhumisa. (Lis. 34:1) Hi dhumisa Jehovha hi ku byela van’wani a matshamela yakwe ya ma nene ni mitiro yakwe yo saseka. A magezu ya ku dhumisa ma huma ka mbilu yi kombisako kubonga. Loku hi ti nyika cikhati ca ku ehleketa hi wunene ga Jehovha, kutani hi zvilo zvontlhe zva zvinene lezvi a hi mahelako, hi tava ni zvigelo zvo tala zva ku mu dhumisa. A ntiro wa hina wa kuchumayela wu hi vhululela mole wa hombe nguvhu wa ku ‘nyika  Nungungulu a muphahlo wa kudhumisa, ku nga handzu wa minomu ya hina’. (Mah. 13:15) A ku fana ni lezvi hi faneleko ku ehleketa khwatsi hi lezvi hi to wula loku hi tshinela ka Jehovha hi mukhongelo, hi fanele ku ehleketa khwatsi kambe hi lezvi hi to wula ka lava hi va kumako kuchumayeleni. Hi lava lezvaku a ‘muphahlo wa hina wa kudhumisa’ wuva zvontlhe zvi nga ntan’wini wa hina. Hi cigelo leco, hi wulawula na zvi huma mbilwini a cikhati hi chumayelako.

9. A ku fana ni vaIzrayeli va kale, hi vhunekisa kuyini hi kuva kona mitlhanganweni? Nyika cikombiso hi wena wutsumbu.

⁹ Hi khozela Jehovha hi kuva kona mitlhanganweni. A vaIzrayeli va kale va wa byelilwe lezvi: ‘Wanuna mun’we ni mun’wani i ta ya ti wonekelisa mahlweni ka Jehovha Nungungulu wa wena zvikhati zvinharu hi lembe, laha ka wutshamu lego Jehovha a ta nga gi hlawula’. (Deut. 16:16) Va wa fanele ku siya mimiti yabye ni masimu yabye na zvi nga hi na munhu wa ku zvi wonelela. Kanilezvi Jehovha i va tsumbisile lezvi: ‘Ku nga tava kona a munhu a ta nga mbilukela a tiko ga n’wina, loku mu ya ti wonekelisa . . . ka Jehovha, Nungungulu wa wena.’ (Ekso. 34:24) Hi kota ya lezvi a vaIzrayeli va nga mu tsumba hi kumbhelela Jehovha, va wa famba ka mibuzo leyo lembe ni lembe. Niku va wa vhuneka nguvhu hi ku maha lezvo. Hi cikombiso, va wa vhuniwa ku zwisisa khwatsi a Nayo wa Nungungulu, va ehleketa hi wunene ga Jehovha, va tlhela va tiyisana ni makholwa-kuloni. (Deut. 16:15) Hinawu ha vhuneka hi ndlela yaleyo loku hi maha zvontlhe hi zvi kotako kasi kuva kona mitlhanganweni ya wuKristu. Ehleketa kambe hi lezvi Jehovha a xalalisako zvona loku hita na hi longile ku ta nyika mihlamulo yo koma yo zwala khwatsi.

10. Hikuyini a ku yimbelela ci nga cipandze ca lisima ca wukhozeli ga hina?

¹⁰ Hi khozela Jehovha loku hi yimbelela zvin’we ni vamakabye. (Lis. 28:7) Ka vaIzrayeli, a kuyimbelela ci wa hi cipandze ca lisima ca wukhozeli gabye. Hosi Dhavhidha i wa yimisile 288 wa vaLevhi kasi ku yimbelela tempeleni. (1 Kro. 25:1, 6-8) Ni nyamutlha, hi nga komba ku ha mu randza Nungungulu hi ku yimbelela tisimu ta ku dhumisa. A zvizi zvi lava ku kala hi zvi tiva khwatsi ku yimbelela. Hi nga zvi fananisa hi ndlela leyi: A cikhati hi wulawulako, “hontlheni ha phazama makhati yo tala”, hambulezvo a hi tsiki ku wulawula laha bandleni ni kuchumayeleni. (Jak. 3:2) Hi kufanana, hi nga tsiki ku yimbelela tisimu ta ku dhumisa Jehovha hambu loku hi hi ni madiyo.

11. Kota lezvi zvi wuliwako ka Lisimu 48:13, hikuyini hi faneleko ku ti vekela cikhati ca cigondzo ca Bhibhiliya ca ngango?

¹¹ Hi khozela Jehovha loku hi gondza Mhaka yakwe hi tlhela hi gondzisa vana va hina. A Sabhadho gi wa hi siku ga ku a vaIzrayeli va veka mitiro yabye hi tlhelo kasi va veka kupima ka wunghana gabye na Jehovha. (Ekso. 31:16, 17) A vaIzrayeli vo tsumbeka va wa tlhela va gondzisa vana vabye xungetano hi Jehovha ni wunene gakwe. Hinawu nyamutlha, hi fanele ku ti nyika cikhati ca ku lera hi tlhela hi gondza a Mhaka ya Nungungulu. Lezvo zvi maha cipandze ca wukhozeli ga hina niku zvi hi vhuna ku tshinela ka Jehovha. (Lis. 73:28) Niku laha hi gondzako kota ngango, hi nga vhuna vana va hina lezvaku va wumba wunghana go tiya ni Papayi wa hina wa lirandzo wa le tilweni. — Lera Lisimu 48:13.

12. Hi gondza yini ka lezvi Jehovha a nga wu wonisa zvona a ntiro wa lava va nga maha a zvibya zva tabhernakeli?

¹² Hi khozela Jehovha loku hi aka ni ku  hlayisa matshamu ya ku khozela ka wona. A Bhibhiliya gi wula lezvaku a ntiro wa ku aka tabhernakeli ni zvibya zva gona wu wa hi ntiro wo basa. (Ekso. 36:1, 4) Ni nyamutlha, Jehovha i wona ntiro wa hina wa ku aka tiSalawu ta Mufumo ni miako yin’wani kota ntiro wo basa. A vamakabye vo kari va mbheta cikhati co tala na va hi ka mitiro leyo. Ha wu bonga nguvhu a ntiro lowu va wu mahako! Hambulezvo, va tlhela va tira kuchumayeleni kambe. A vokari va nga ha lava ni ku teka wuphayona. A madhota ya bandla ma nga komba ku ma wu seketela a ntiro lowo hi ku kala ma nga mahi mihoni ya ku yimisa vamakabye lavo vo ti tsitsirita kota maphayona loku va ringanelwa. Kani hi na ni wutlhari ga kuaka kani a hi nago, hontlheni hi nga vhunetela ku hlayisa ni ku basisa miako leyo.

13. Hi fanele ku yi wonisa kuyini a minyikelo leyi hi yi mahako kasi ku seketela a ntiro wa Mufumo?

¹³ Hi khozela Jehovha loku hi seketela a ntiro wa Mufumo hi minyikelo ya hina. A vaIzrayeli va wa ngayi ka Jehovha na va nga welelangi nchumu. (Deut. 16:16) Va wa fanele ku khoma cokari hi kuya hi makotela yabye. Hi ndlela leyo, va wa komba ku va bonga zvontlhe lezvi Jehovha a zvi mahileko kasi va vhuneka hi tlhelo ga moya. Hi nga kombisa kuyini ku ha mu randza Jehovha niku ha bonga zvontlhe lezvi a hi nyikako kasi ku hi hlayisa hi tlhelo ga moya? A yin’we ya tindlela ku maha minyikelo ya ku seketela mitiro ya laha bandleni ni ya ntiro wa misava yontlhe hi kuya hi makotela ya hina. Mupostoli Pawule i zvi tlhamusele hi ndlela leyi: “Loku a munhu a longile ku nyika, a cinyikiwo leco ca amukeleka nguvhunguvhu loku a nyikela lezvi a nga nazvo, na ku nga hi lezvi a nga hava.” (2 Kor. 8:4, 12) Jehovha wa wu nyika lisima ni wihi munyikelo hi wu mahako na zvi sukela mbilwini, hambu loku wu wonekisa ku khwatsi wu tsongwani. — Mar. 12:42-44; 2 Kor. 9:7.

14. Hi kuya hi Mavingu 19:17, Jehovha i ci wonisa kuyini a civhuno leci hi nyikako vamakabye va hina va nga ni cilaveko?

¹⁴ Hi khozela Jehovha loku hi vhuna vamakabye va nga ni cilaveko. Jehovha i tsumbisile ku katekisa a vaIzrayeli lava va nga vhuna zvisiwana. (Deut. 15:7, 10) Khati ni khati hi vhunako makabye a nga ni cilaveko, Jehovha i zvi wonisa ku khwatsi hi Yena hi mu nyikako. (Lera Mavingu 19:17.) Hi cikombiso, a cikhati leci a maKristu ya le Filipi ma nga rumela cinyikiwo ka Pawule na a hi paxweni, yena i ci vitanile ku “muphahlo wo amukeleka wu xalalisako Nungungulu”. (Filp. 4:18) Ehleketa hi vamakabye va bandla ga wena, u ti wutisa lezvi: ‘I kona wa ku ndzi nga mu vhuna?’ Jehovha wa tsaka loku a hi wona na hi tirisa cikhati ca hina, ntamu wa hina, wutlhari ga hina ni titshomba ta hina kasi ku vhuna lava va nga ni cilaveko. Ka yena, lezvo zvi maha cipandze ca ku mu khozela. — Jak. 1:27.

15. Hikuyini a wukhozeli ga lisine gi kalako gi nga bindzi, hambu lezvi gi lavako cikhati ni kutikarata?

¹⁵ A wukhozeli ga lisine gi lava cikhati ni kutikarata. Kanilezvi a gi bindzi. (1 Joh. 5:3) Hikuyini? Hi ku hi khozela Jehovha hi ku mu randza. Hi nga alakanyela n’wanana a lavako ku mu nyika nchumu papayi wakwe. A nga mbheta tihora to tala na a tsala dezenyo kasi ku mu nyika. A nga ti layi hi cikhati a nga ci mbheta na a dezenyara. Wa mu randza papayi wakwe, hikwalaho wa tsaka hi ku mu nyika cinyikiwo leco. Hi kufanana, kota lezvi hi mu randzako Jehovha, ha tsaka hi ku tirisa cikhati ca hina ni ntamu wa hina kasi ku mu khozela.

16. Hi kuya hi Mahebheru 6:10, Jehovha i ku wonisa kuyini a kutikarata loku hi ku mahako kasi ku mu tsakisa?

 ¹⁶ A vapswali va lirandzo a va rindzeli ku vontlhe vana vabye va va nyika zvilo zvo fana. Va zvi tiva ku a vana vabye a va fani. Hi kufanana, a Papayi wa hina wa le tilweni wa zvi tiva ku a hi nge zvi koti ku maha zvilo zvo fana. Kuzvilava wa zvi kota ku maha zvo tala a ku hundza van’wani u va tivako ni ku va randza. Kutani a wu zvi koti ku maha zvotala a ku fana ni van’wani, kuzvilava hi kota ya tanga, lihanyo kutani wutihlamuleli ga ngango. U nga mbheli ntamu. (Gal. 6:4) Jehovha a nga ta tshuka a rivakelwa a ntiro wa wena. Loku u maha zvontlhe zvi nga ntan’wini wa wena, hi zvigelo zva zvinene, Jehovha i ta tsaka hi ntiro wa wena. (Lera Mahebheru 6:10.) Jehovha wa yi wona a mixuvo ya mbilu ya wena. I lava ku u tsaka u tlhela u xalala hi lezvi u zvi kotako ku maha kasi ku mu khozela.

17. (a) Hi nga maha yini loku zvi hi karatela ku maha zvilo zvo kari wukhozelini ga hina? (b) U vhunekisa kuyini hi cin’we ca lezvi zvi kombisiwako ka kwadru “ Engetela litsako la wena”?

¹⁷ Ahati loku zvi hi karatela ku maha zvokari zvi nga cipandze ca wukhozeli ga hina, zvo kota cigondzo ca munhu wutsumbu kutani ntiro wa kuchumayela? Laha hi yako hi ti tsitsirita ka zvilo lezvo, kuzvilava hi taya hi zvi randza hi tlhela hi vhuneka. Hi nga fananisa wukhozeli ga hina ni zvilo zvo kota ku gondza ku fambisa bhasikeni kutani ku gondza kuba vhiyola. Loku hiya hi ku tshuka hi zvi maha, hi nga ta tshuka hi pasa. Kanilezvi ahati loku hi zvi maha siku ni siku ke? Kusanguleni, kuzvilava hi nga zvi maha hi cikhati ci tsongwani, hiya hi engetela cikhati leco hi kutsongwani-kutsongwani. Loku hi wona ku haya hi pasa, hi taya hi zvi lava nguvhu a ku ti siyela cikhati hi tlhela hi tsaka hi ku maha lezvo. Hi nga maha zvezvo kambe ka wukhozeli ga hina.

18. Hi nga yi tatisisa kuyini a fanelo ya kuvakona ka hina, niku hi ta vhunekisa kuyini?

¹⁸ Loku hi khozela Jehovha hi mbilu yontlhe ho tatisa a fanelo ya kuvakona ka hina. Loku hi maha lezvo, hi tava ni wutomi go tsakisa ni kutsumba ka ku simama hi khozela Jehovha kala kupindzuka. (Mav. 10:22) Hi sina hi hi ni kurula hakuva ha zvi tiva ku Jehovha wa vhuna vakhozeli vakwe loku va kumana ni zvikarato. (Isa. 41:9, 10) Hakunene hi na ni zvigelo zvo zwala zva ku khozela a Papayi wa hina wa lirandzo, loyi a ringanelwako “hi ku amukela kudhumiswa ni wudzundzo” hi ka zvivangwa zvakwe zvontlhe! — Kuv. 4:11.