1-2. Hi fanele hi yentxa yini swaku Yehovha a yamukela wugandzeli la hina?

 KA WENA swi vula yini “ku gandzela”? Loko u twa rito leli nge ku gandzela swi nga yentxeka u pimisa hi wanuna lweyi a nga khizama tlhelweni ka mubedu wa yena a khongela ka Yehovha na a nge se yetlela. Naswona swi nga yentxeka u pimisa hi ndjangu lowu nga tsaka lowu djondzaka Bibele xikan’we.

² Makwerhu lweyi a khongelaka ka Yehovha na a khizamile, ni ndjangu lowu djondzaka Bibele xikan’we, hinkwavu va le ku gandzeleni, kambe Yehovha a to yamukela wugandzeli la vona ntsena loko li fambisana ni ku rhandza ka yena va tlhela va mu rhandza ni ku mu hlonipha. Hi mu rhandza hintamu Yehovha naswona ha swi tiva swaku swa mu fanela ku gandzeliwa, se hi swi lava hintamu ku yentxa hinkwaswu leswi hi nga swi kotaka swaku hi mu gandzela hi ndlela ya yinene.

3. Hi ta vona yini ka nhlokomhaka leyi?

³ Ka nhlokomhaka leyi, hi ta vona leswi vanhu va Yehovha va khale va nga swi yentxa swaku Yehovha a yamukela wugandzeli la vona. Hi ta tlhela hi vona 8 wa swilo leswi hi nga swi yentxaka namuntlha swaku Yehovha a yamukela wugandzeli la hina. Nkama hi djondzaka hi mhaka leyi, hi ta pimisa hi leswi mun’wana ni mun’wana wa hina a nga swi yentxaka swaku a yampsisa ndlela leyi a gandzelaka Yehovha hi yona. Hi ta tlhela hi vona leswi hi yentxaka hi tsaka loko hi gandzela Yehovha.

4. Vanhu va ku tshembeka lava a va gandzela Yehovha khale va swi kombisise ku yini swaku a va mu rhandza hintamu naswona a va mu hlonipha?

⁴ Vavanuna va ku tshembeka va ku fana na Abele, Nowa, Abrahamu na Yobo a va mu rhandza hintamu Yehovha naswona a va mu hlonipha, va mu yingisa, va va ni lipfumelo va tlhela va mu yentxela magandzelo. Hambileswi Bibele li kalaka li  nga hi byeli hinkwaswu leswi va nga swi yentxa ka wugandzeli la vona, ha tiyiseka swaku va yentxe hinkwaswu leswi va nga swi kota swaku va dzunisa Yehovha naswona Yehovha a li yamukelile wugandzeli la vona. Yehovha a game a nyika Vayisrayele Nawu wa Moxe lowu a wu va byela leswi va faneleke va swi yentxa swaku a yamukela wugandzeli la vona.

5. Yehovha a lava swaku Vakreste va mu gandzelisa ku yini?

⁵ Loko Yesu se a pfuxiwile, Yehovha a a nga ha lavi swaku Vakreste va mu gandzela hi ku landzela leswi Nawu wa Moxe a wu vula swona. (Rom. 10:4) Kambe a a lava swaku va landzela Nawu wa nyuwani ku nga “nawu wa Kreste”. (Gal. 6:2) A va fanele va yingisa nawu lowu hi ku tekelela xikombiso xa Yesu va tlhela va yentxa hinkwaswu leswi a nga swi djondzisa. Ni namuntlha, leswi hi nga Vakreste hi yentxa hinkwaswu leswi hi nga swi kotaka swaku hi tekelela xikombiso xa Yesu swaku hi tsakisa Yehovha hi tlhela hi hanya na hi pepile ka wutomi la hina. — Mat. 11:29.

6. Nkama lowu u djondzaka nhlokomhaka leyi, i yini leswi u faneleke u tivutisa swona?

⁶ Nkama lowu hi kambisisaka nhlokomhaka leyi, hi fanele hi tivutisa leswi: ‘Ni mu gandzela hi ndlela ya yinene Yehovha? Ni nga yentxa yini swaku ni yampsisa ndlela leyi ni mu gandzelaka hi yona Yehovha?’ Swi nga yentxeka u tsaka hi leswi u swi yentxaka swaku u gandzela Yehovha swoswi. Kambe u nga kombela Yehovha swaku a ku pfuna ku tama u yampsisa ndlela leyi u mu gandzelaka hi yona.

7. Yehovha a titwisa ku yini loko hi khongela ka yena hi mbilu hinkwayu?

⁷ Hi gandzela Yehovha loko hi khongela. Bibele li fanisa swikhongelo swa hina ni insensu leli a li nyikeliwa ka tabernakela ni ka tempele. (Pis. 141:2) A insensu leli a va li nyikela a li nun’hwela naswona a li mu tsakisa Yehovha. Hilani ku fanaka, swikhongelo leswi sukaka mbilwini ‘swa mu tsakisa’ Yehovha hambiloko hi tirhisa marito ya ku vevuka. (Swi. 15:8; Det. 33:10) Ha tiyiseka swaku Yehovha a swi rhandza hintamu ku hi twa na hi mu byela leswi hi mu rhandzisaka xiswona ni ku mu khensa hi leswi a hi yentxelaka swona. Yehovha a swi lava hintamu swaku hi mu byela hi xikhongelo leswi hi titwisaka xiswona ni leswi hi navelaka ku va na swona. Se na u nge se khongela ka Yehovha, swi ngo yini u tinyika nkama wa ku pimisa hi leswi u lavaka ku mu byela swona ka xikhongelo? Loko u yentxa leswo, u ta mu tsakisa hintamu Papayi wa wena Yehovha.

8. I yini leswi hi nga swi yentxaka swaku hi dzunisa Yehovha?

⁸ Hi gandzela Yehovha loko hi mu dzunisa. (Pis. 34:1) Swin’wana leswi hi nga swi yentxaka swaku hi dzunisa Yehovha, i ku byela van’wana hi wumunhu ni mintirho ya yena. Loko hi ni mbilu ya ku khensa hi ta va ni swilo swa swinyingi swa ku mu khensa hi swona Yehovha. Loko hi tinyika nkama wa ku pimisa hi swilo swa swinene leswi Yehovha a hi yentxelaka swona, hi ta va ni swa swinyingi swa ku mu khensa hi swona, naswona loko hi chumayela hi va hi nyikela magandzelo, ‘ku nga marito lama humaka hi ka minomo ya hina, lawa hi ma humesaka swaku hi twalisa vito la yena.’ (Heb. 13:15) Ku fana ni leswi hi pimisaka kahle hi marito lawa hi nga ta ma vula na hi nge se khongela, hi fanele hi pimisa kahle hi leswi hi nga ta swi vula ka lava hi va chumayelaka. Hi lava leswaku leswi hi swi vulaka swi fana ni magandzelo lawa ma nga lulamiseliwa kahle. Se hi fanele hi vulavula swi suka mbilwini loko hi li ka ntirho wa ku chumayela.

9. a) Ku fana ni Vayisrayele, hi nga pfunekisa ku yini loko hi va kona mintlhanganwini? b) Nyikela xikombiso xa leswi mintlhanganu yi nga ku pfunisa xiswona.

 ⁹ Hi gandzela Yehovha loko hi ya mintlhanganwini. Vayisrayele a va byeliwe leswi: “Vavanuna hinkwavu va fanele va ya mahlweni ka Yehovha Xikwembu xa wena kanharhu hi lembe, andhawini leyi a nga yi langa”. (Det. 16:16) A va fanele va siya makaya ya vona ni masimu ya vona, na swi nga na munhu wa ku swi vonelela, kambe Yehovha a va tshembise leswi: “A ku na munhu lweyi a nga ta navela tiko la wena loko u ya gandzela Yehovha Xikwembu xa wena kanharhu hi lembe.” (Ekso. 34:24) Leswaku Vayisrayele va kota ku ya ka mafexta lawa a ma yentxiwa lembe ni lembe a swi lava va tshemba Yehovha, naswona ku yentxa leswo a swi va pfuna hintamu. Hi xikombiso, a va djondza Nawu wa Yehovha, a va pimisa hi swilo swa swinene leswi Yehovha a va yentxelaka swona, naswona a va tikhorisa hi ku va xikan’we ni vamakwerhu van’wana lava rhandzaka Yehovha. (Det. 16:15) Na hina hi pfuneka hintamu loko hi yentxa hinkwaswu leswi hi nga swi kotaka swaku hi va kona mintlhanganwini naswona nkama hi nyikelaka tinhlamulu leti sukaka mbilwini, hi va hi dzunisa Yehovha.

10. Hi mhaka muni swi li swa lisima ku yimbelela loko hi gandzela Yehovha?

¹⁰ Hi gandzela Yehovha loko hi yimbelela. (Pis. 28:7) Vayisrayele a va swi vona swi li swa lisima hintamu ku yimbelela loko va gandzela Yehovha. Hosi Davhida a lange 288 wa Valevhi swaku va yimbelela tempeleni. (1 Tikro. 25:1, 6-8) Ni namuntlha hi nga kombisa swaku ha mu rhandza Yehovha loko na hina hi yimbelela. Nkama lowu hi yimbelelaka a hi fanelanga hi karhateka hi leswi rito la hina li nga tshamisa xiswona. Pimisa hi mhaka leyi: “Hinkwerhu ha phazama minkama ya yinyingi” loko hi vulavula, kambe a hi tshiki ku vulavula loko hi li bandleni ni loko hi chumayela. (Yak. 3:2) Hi ku fana, a hi fanelanga hi karhateka hi swaku rito la hina li sasekile kumbe a li sasekanga loko hi yimbelela hikusa xa lisima i ku dzunisa Yehovha hi ku yimbelela.

11. Hi ku ya hi Tipisalema 48:13, hi mhaka muni hi fanele hi tinyika nkama wa ku va ni wugandzeli la ndjangu?

¹¹ Hi gandzela Yehovha loko hi djondza Bibele hi tlhela hi djondzisa vana va hina. Yehovha a a byele Vayisrayele swaku hi Sabadu a va nga fanelanga va tirha, kambe a va fanele va tinyika nkama wa ku kulisa wunghanu la vona na Yehovha. (Ekso. 31:16, 17) Vayisrayele lava a va wu yingisa nawu lowo, a va tinyika nkama wa ku djondzisa vana va vona hi Yehovha va tlhela va va byela hi swilo swa swinene leswi a nga va yentxela swona. Na hina hi fanele hi tinyika nkama wa ku lerha hi tlhela hi djondza Rito la Xikwembu. Leswo na swona i ku gandzela Yehovha funtshi swi hi pfuna ku kulisa wunghanu la hina na yena. (Pis. 73:28) Nkama lowu hi vaka ni wugandzeli la ndjangu hi pfuna vana va hina swaku na vona va kulisa wunghanu la vona na Yehovha. — Lerha Tipisalema 48:13.

12. Hi djondza yini ka leswi Yehovha a a wu vonisa xiswona ntirho wa ku hamba tabernakela ni swibya swa yona?

¹² Hi gandzela Yehovha loko hi yaka hi tlhela hi lunghisa tindhawu leti hi gandzelaka Yehovha ka tona. Bibele li vula swaku a ntirho wa ku hamba tabernakela ni swibya swa yona a wu li “ntirho wa ku kwetsima”. (Ekso. 36:1, 4) Ni namuntlha, Yehovha a vona ntirho wa ku yaka Tiyindlo ta Wugandzeli ni tiyindlo tin’wana ta ku gandzela ka tona na wu li ntirho wa ku kwetsima. Vamakwerhu va heta nkama wa wunyingi na va pfunisa ka ntirho lowu wa ku yaka. Phela hi wu tlangela hintamu ntirho lowu va wu yentxaka. Handle ka ntirho lowu, va tlhela va tinyika nkama wa ku chumayela,  funtshi van’wana va yentxa leswo hi ku va vapfuli va ndlela va nkama hinkwawu. Madoda na wona ma nga kombisa swaku ma wu seketela ntirho wa ku yaka hi ku pfumelela vamakwerhu swaku va va vapfuli va ndlela loko va vona swaku va faneleka. Hambiloko hi swi kota kumbe hi nga swi koti ku yaka, hinkwerhu hi nga pfunisa ka ku hlayisa tindhawu leti hi gandzelaka Yehovha ka tona hi ku yentxa swaku ti tshama na ti basile.

13. Hi fanele hi yi vonisa ku yini minyikelo leyi hi yi yentxaka?

¹³ Hi gandzela Yehovha loko hi nyikela hi male ya hina. Vayisrayele a va nga fanelanga va famba va ya gandzela Yehovha na va nga tamelanga nchumu. (Det. 16:16) A va fanele va famba ni xan’wanchumu hi ku ya hi swiyimu swa vona. Loko va yentxa leswo, a va ta kombisa swaku va mu khensa Yehovha hi swilo hinkwaswu leswi a va yentxelaka swona. Se hina ke, hi nga mu kombisa ku yini Yehovha swaku ha mu rhandza ni swaku ha mu khensa hi swilo hinkwaswu leswi a hi yentxelaka swona? Ndlela yin’wana ya ku yentxa leswo i ku nyikela hi male swaku yi pfunisa ka mabandla ya hina ni ka ntirho wa misava hinkwayu. Kambe hi fanele hi yentxa leswo hi ku ya hi swiyimu swa hina. Loko mupostolo Pawulo a vulavula hi mhaka leyi a te: “Loko munhu a nyikela na swi suka mbilwini, Xikwembu xa swi yamukela hikusa xi lava swaku munhu a nyikela leswi a nga na swona ku nga li leswi a kalaka a nga li na swona.” (2 Kor. 8:4, 12) Yehovha a tsaka hintamu loko hi nyikela, ku nga na mhaka swaku i swinyingi kumbe i switsongo. — Marku 12:42-44; 2 Kor. 9:7.

14. Hi ku ya hi Swivuriso 19:17, Yehovha a titwisa ku yini loko hi pfuna vamakwerhu lava pfumalaka?

¹⁴ Hi gandzela Yehovha loko hi pfuna vamakwerhu lava pfumalaka. Yehovha a tshembise Vayisrayele swaku a a ta va hakela loko va pfuna swisiwana. (Det. 15:7, 10) Nkama ni nkama loko hi pfuna vamakwerhu lava pfumalaka, swi fana ni loko hi nyika Yehovha. (Lerha Swivuriso 19:17.) Hi xikombiso, nkama Vakreste va bandla la Filipiya va nga mu nyika swilo Pawulo nkama na a li djele, a vule swaku “swi fana ni gandzelo leli yamukelekaka, swa nun’hwela naswona swa tsakisa swinene ka Xikwembu.” (Filp. 4:18) A hi tinyikeni nkama wa ku txuvuka vamakwerhu lava hi nga na vona bandleni, se hi tivutisa leswi: ‘I mani lweyi ni nga mu pfunaka?’ Yehovha a tsaka swinene loko hi tirhisa nkama, matimba ya hina ni swilo leswi hi nga na swona swaku hi pfuna van’wana lava pfumalaka funtshi leswo a swi vona ku li ndlela yin’wana ya ku mu gandzela. — Yak. 1:27.

15. Ku gandzela Yehovha swi lava nkama ni minzamu, kambe hi mhaka muni swi nga karhati?

¹⁵ Ku gandzela Yehovha swi lava nkama ni minzamu, kambe a swi karhati. (1 Yoh. 5:3) Hi mhaka muni swi nga karhati? Hikusa hi gandzela Yehovha hileswi hi mu rhandzaka. Pimisa hi n’wana lweyi a lavaka ku nyika prezenti papayi wa yena. Swi nga ha lava a heta nkama wa wunyingi na a dezenyara nchumu lexi a lavaka ku nyika papayi wa yena, kambe a nga tisoli hi nkama lowu a wu hetaka na a yentxa leswo hikusa wa mu rhandza papayi wa yena funtshi a swi lava hintamu ku mu nyika prezenti lolelo. Hi ku fanana, leswi hi mu rhandzaka Yehovha, hi tsaka hintamu loko hi heta nkama ni matimba ya hina swaku hi mu gandzela.

16. Hi ku ya hi Vaheberu 6:10, Yehovha a titwisa ku yini hi leswi hi zamaka ku mu yentxela swona?

¹⁶ Vapsali lava nga ni lirhandzu a va nyimeli ku yamukela swilo swa ku fana ka vana va  vona. Vona va swi tiva swaku vana va vona va hambanile ni swaku swiyimu swa vona swi hambanile. Hilani ku fanaka, Papayi wa hina Yehovha wa swi tiva leswi mun’wana ni mun’wana wa hina a kotaka ku swi yentxa. Swi nga ha yentxeka u kota ku yentxa swa swinyingi ku tlula van’wanyana kumbe u nga koti ku yentxa swa swinyingi hi mhaka ya ku guga, mavabyi kumbe mintirho yin’wana ya le kaya. Leswo swi nga ku heti ntamu! (Gal. 6:4) Yehovha a nge tshuki a wu khohlwile ntirho wa wena hikusa xa lisima i ku yentxa hinkwaswu leswi u nga swi kotaka hi mbilu ya wena hinkwayu. Loko u yentxa leswo, Yehovha a ta tsaka. (Lerha Vaheberu 6:10.) Yehovha wa swi tiva leswi hi navelaka ku swi yentxa, kambe a lava hi tsaka hi leswi hi kotaka ku mu yentxela swona.

17. a) Hi nga yentxa yini loko hi vona swaku swa hi karhatela ku yentxa mintirho yin’wana ya Yehovha? b) I yini leswi u nga pfuneka hi swona ka kwadru leli nge “ Yengetela Ku Tsaka Ka Wena”?

¹⁷ Hi nga yentxa yini loko hi vona swaku swa hi karhatela ku yentxa mintirho yin’wana ya Yehovha ya ku fana ni ku djondza ni ku chumayela? Ku yi yentxa nkama ni nkama mintirho leyo, hi swona swi nga ta hi yentxa hi yi tsakela yi tlhela yi hi pfuna. Hi nga fanisa mintirho leyi hi yi yentxelaka Yehovha ni ku tiwolola miri kumbe ku djondza ku chaya. Phela loko hi nga swi yentxi nkama ni nkama swilo leswi, swi nga hi karhatela ku swi tolovela. Kambe a hi nge hi swi yentxa siku ni siku! Hi sungula hi ku swi yentxa hi nkama wa wutsongo, na hi ya hi yengesela nkama lowu hi wu hetaka na hi swi yentxa. Hi ta ya hi swi rhandza naswona nkama lowu hi vonaka swaku hi ya hi swi yentxa kahle, hi ta ya hi tsakela ku swi yentxa siku ni siku. Leswo swa fana ni mintirho leyi hi yi yentxaka swaku hi gandzela Yehovha.

18. Hi wini nchumu wa lisima lowu hi faneleke hi wu yentxa naswona hi ta pfuneka hi yini?

¹⁸ Nchumu wa lisima lowu hi nga wu yentxaka, i ku yentxa hinkwaswu leswi hi nga swi kotaka swaku hi gandzela Yehovha. Ku yentxa leswo swi ta hi yentxa hi tsaka hi tlhela hi va ni ntshembo wa ku tama hi gandzela Yehovha. (Swi. 10:22) Phela ni swoswi hi hanya na hi rhulile mbilwini hi ku tiva swaku Yehovha wa va pfuna vanhu lava mu tirhelaka loko va kumana ni swikarhatu. (Esa. 41:9, 10) I swinyingi leswi hi yentxaka hi tsaka nkama hi gandzelaka Yehovha, Xikwembu lexi faneliwaka hi ku “dzunisiwa ni ku hloniphiwa” hi minchumu hinkwayu leyi xi nga yi yentxa. — Nhla. 4:11.