1, 2. ¿Ambechi jatsiski para úni paraka Tata Diosï Jeoba jiókuarhiaka ambe engachi újka parachi kʼéri ambe arhini?

 ¿AMBEJTSÏ eranhaskasïni engajtsï kurhaajka kʼéri ambe arhini Tata Diosïni? Jamberi erachini ma enga tinguixurhitini kómarhini jaka Tata Diosï Jeobani ka imani jingoni uénhekuarhini jarhani. O jamberijtsï eranhaskajka familiani ma engaksï májku kʼéri jorhenguarhini jaka Bibliani.

² Íksï kʼuiripuecha kʼéri ambe arhixati Tata Diosï Jeobani. Peru, ¿ima jiókuarhia na engaksï kʼéri ambe arhini jaka? Jo, peru engaksï ísï úska eska ima na uékajka ka enga xénchperakua ka janhanharhikua jingoniuaka. Uékasïngachi kʼéri ambe arhini Tata Diosï Jeobani jimbokachi kánikua xénchasïnga ka jimbokachi míteska eska ima jukanchaska eskachi kʼéri ambe arhiaka.

3. ¿Ambechi exeni jaua ini jorhenguarhikua jimbo?

³ Ini jorhenguarhikua jimbo exeakachi néna uékasïreeni Tata Diosï Jeoba eskaksï kʼéri ambe arhipiringa ióntki ka ochu ambe engachi iásï uaaka úni parachi kʼéri ambe arhini ísï eska ima na uékajka. Engachi jorhenguarhiani jauaka, ju je eratsentani nénachi uaa sánderu sési úni indeni ambe. Ístuchi exeaka eska kʼéri ambe arhini Tata Diosïni ísï eska ima na uéjka úsïnga eskachi tsípikua jingoni irekaaka.

4. Ante de Jesúsi Echerirhu jurhani, ¿nénaksï xarhataspi Tata Diosï Jeobaeri marhuaricha eskaksï xénchasïreenga ka janhanharhini?

⁴ Ante de Jesúsi Echerirhu jurhani, máru Tata Diosïri marhuaricha komu Abeli, Noé, Abraáni ka Jobu, xarhatasptiksï eskaksï janhanharhisïreenga  ka xénchani Tata Diosï Jeobani. ¿Nénaksï ísï úspi? Kurhajchasptiksï, mintsikasptiksï ka mámaru ambeksï úspti para imani marhuakuni. Biblia no uandasïndi ambe engaksï meru uénga paraksï kʼéri ambe arhini Tata Diosïni, peru kʼóru uandasïndi eskaksï jánguarhintaspka janhanharhini ka eska Tata Diosï jaiapanhentaspti ambe engaksï imeecha úpka. Tátsekua Moisésini úraparini, Tata Diosï Jeoba íntsaaspti Leichani israelitechani. Íksï Leicha uandasïreendi na engaksï jatsipka para kʼéri ambe arhini Tata Diosïni.

5. ¿Néna uékasïreeni Tata Diosï Jeoba eskaksï Jesúsiri chúxapaticha kʼéri ambe arhipiringa?

⁵ Enga Jesúsi na uarhipkia ka tsíntani, Tata Diosï Jeoba nóteru erokuarhisïrendia eskaksï israelitecha kurhajchapiringa Moisésiri Lei (Rom. 10:4). Kristianuechaksï jatsipirindi para kurhajchani “Kristueri mandamientu” o lei (Gal. 6:2). Nóteruksï jatsipirindia paraksï miántaani iámindu mandamientuechani nijtu imani ambe engaksï no jatsipka para úni. Sánderu sési, jatsipirindiksï para ísï jámani eska Jesúsi ka úni ambe enga ima jorhentpipka. Iásï, kristianuechajtuksï jánguarhintasïndi para ísï jámani eska Kristu paraksï úni jaiapanherantani Tata Diosï Jeobani ka únksï sési pʼikuarherantani (Mat. 11:29).

6. ¿Nénajtsïni uaa jarhuatani i jorhenguarhikua?

⁶ Engajtsï exeni jauaka ambe engajtsï uaaka úni parajtsï kʼéri ambe arhini Tata Diosï Jeobani, kurhamarhikuarhi je: “¿Sánderuni sési úsïnia ini ambe parani kʼéri ambe arhini Tata Diosïni? ¿Uaa sánderuni jánguarhintani?”. Sési jarhasti eskajtsï sési pʼikuarheraaka imani ambe jingoni engajtsï úni jaka para kʼéri ambe arhini Tata Diosïni, peru ístujtsï uaaka kurhakuni eskaksïni jarhuataaka sánderu sési úni indeni ambe.

7. ¿Néna exeasïni Tata Diosï Jeoba kómarhikuechani engachi mintsita jingoni uaajka?

⁷ Kʼéri ambechi arhisïnga Tata Diosï Jeobani engachi kómarhijka. Biblia ísï terukutantasïndi kómarhikuani komueska insiensu enga kánikua sési únheenga ka enga tabernakulurhu kéjtsïtanhenga ka ísï tátsekua templurhu (Sal. 141:2). I insiensu kánikua sési jájkundisïreendi ka Tata Diosï jaiapanhentasïreendi. Sáno májkueni, engachi mintsita jingoni uaajka juchaari kómarhikuechani, kánikuachi sési pʼikuastasïnga Tata Diosïni (Prov. 15:8; Deut. 33:10). Uánikua ambe jarhasti engachi jimbo uaaka jakajkuni eska Tata Diosï Jeoba kánikua tsitisïnga engachi arhijka na engachi xáni xénchajka ka na engachi xáni agradesidu jaka imani jingoni. Ima uékasïndi eskachi aianguaka ambe engachi tsitijka, ambe engajtsïni uandanhiatajka ka ambe engachi jucha erokuarhini jaka. Ísï jimbo, ante dejtsï kómarhini, ¿andisïjtsï no eratsentajki ambe engajtsï arhiaka? Engajtsï ísï úska, íntskuni jauakajtsï ambakiti insiensu ma juchaari Taati auandarhu anapuni.

8. ¿Kánchi uaa kʼéri ambe arhini Tata Diosïni?

⁸ Kʼéri ambechi arhisïnga Tata Diosï Jeobani engachi imeeri ambe aianguajka máteruechani (Sal. 34:1). ¿Ka nénachi úsïni indeni ambe? Engachi uandontskuarhekuajka máteruechani imeeri sési járhati kualidadicheri ka engachi aianguajka ambe enga xáni újka ima. Engachi mintsita jingoni agradesidu jauaka imani jingoni, uánikua ambechi jatsiaka para aianguani máteruechani imeeri ambe. Ka engachi arhutaska tiempu parachi eratsentani ambe enga xáni úkia Tata Diosï Jeoba juchantsïni jimbo, méntkisïchi jatsiaka ambe ma engachi jimbo uaaka kʼéri ambe arhini imani. Engachi aianhpini jámajka, úsïngachi kéjtsïtakua úkuni Tata Diosïni “juchaari uandakuechani jimbo engaksï jindeeka para kʼéri ambe arhini” (Ebr. 13:15). Ísï eskachi na jatsika para sési eratsentani ambe engachi arhiaka Tata Diosï Jeobani juchaari kómarhikuecharhu, ístuchi jatsiska para sési eratsentani ambe engachi arhiauaka kʼuiripuechani aianhpikuarhu. Uékasïngachi sánderu ambakiti ambe íntskuni Tata Diosïni parachi “kʼéri ambe arhini”. Ísï jimbo, tsípikua jingonchi aianguasïnga máteruechani imeeri ambe.

9. ¿Néna marhuakusïni Tata Diosïri ireta tánguarhikuecharhu nirani, ka nénaksïni jarhuataskia chánksïni?

 ⁹ Kʼéri ambechi arhisïnga Tata Diosï Jeobani engachi tánguarhikuecharhu nirajka. Ióntki, israelitechaksï ini ambe arhinhaspti: “Tanimu xanhari ma uéxurhini jimbo, iámindu tatakechaksï jatsisti para chiiti Tata Diosï Jeobaeri orhepatini jarhani nani enga ima erakuaka” (Deut. 16:16). Jatsisptiksï para jurajkuani imeecheri kʼumanchikuechani ka echerichani. Joperu Tata Diosï Jeoba aiakuaspti: “No nema uékaati inchaakuni chiiti echerirhu engari karhamaaka exeni chiiti Tata Diosï Jeobani” (Éx. 34:24). Israelitechaksï mintsikaparini Tata Diosï Jeobani nirasïrendiksï kʼuínchikuecharhu engaksï mándani uéxurhini úkuarhienga. Ísïksï úsïreendi kʼérati kóntperatechani pʼiuani: sánderuksï sési kurhangusïreendi Tata Diosïri Leini, eratsentasïrendiksï na enga xáni sési kámpijka Tata Diosï ka tsípikuarhisïrendiksï máteru Tata Diosïri marhuaricha jingoni (Deut. 16:15). Juchantsïntujtsïni kánikua marhuachesïndi engachi jánguarhintajka tánguarhikuecharhu nirani. Ka Tata Diosï Jeoba kánikua sési pʼikuarherajti engachi ambakiti komentariuechani íntspiajka ka engaksï no xáni kʼérajka.

10. ¿Andisï xáni jukaparhakue pirekuni Tata Diosï Jeobani parachi kʼéri ambe arhini?

¹⁰ Kʼéri ambechi arhisïnga Tata Diosï Jeobani engachi pirekujka juchaari erachicha jingoni (Sal. 28:7). Para israelitecha, kánikua jukaparhakuespti pirekuni Tata Diosïni paraksï kʼéri ambe arhini. Pori ejemplu, rei Dabidi 288 lebitechani peeraaspti parakaksï kʼéri ambe arhipiringa templurhu (1 Crón. 25:1, 6-8). Iásïjtu, úsïngachi xarhatakuni Tata Diosïni na engachi xáni xénchajka, engachi pirekuajka pirekuechani parachi kʼéri ambe arhini, nájkirukachi no xáni ambakiti bosi ma kámaaka. Engachi uandontskuarhejka, iáminduechachi uánikua xanhari no úsïnga sési uandani ambe ma, peru i ambe no úsïndi eskachi nóteru uandaakia tánguarhikuecharhu o aianhpikuarhu (Sant. 3:2, TNM). Ka sáno májkueni, nájkirukachi no xáni ambakiti bosi ma kámaaka, uaakachi pirekuni Tata Diosï Jeobani parachi kʼéri ambe arhini.

11. Eska na arhijka Salmo 48:13, ¿andichisï jatsi para arhutani tiempu parachi májku kʼéri jorhenguarhini Biblieri ambe familia jingoni?

¹¹ Kʼéri ambechi arhisïnga Tata Diosï Jeobani engachi jorhenguarhijka imeeri Karakatani ka engachi aianguajka imeeri ambe juchaari sapiichani. Sábaduechani, israelitechaksï no ánchikuarhisïreendi ka imani jurhiatikua jimbo jorhenguarhisïrendiksï Tata Diosï Jeobaeri ambe paraksï sánderu sési pájperani imani jingoni (Éx. 31:16, 17). Israelitecha engaksï sési marhuakuenga Tata Diosï Jeobani, jorhendaasïrendiksï imeecheri sapiichani Tata Diosïri ambe ka na enga xáni sési kámpijka ima. Juchajtuchi jatsiska para arhutani tiempu parachi arhintani ka jorhenguarhini imeeri Karakateri ambe. Engachi ísï újka, kʼéri ambechi arhini jarhasïnga Tata Diosï Jeobani ka jarhutasïndijtsïni parachi sánderu sési pájperani imani jingoni (Sal. 73:28). Ístu, engachi májku kʼéri jorhenguarhijka familia jingoni, jarhuataani jarhasïngachi juchaari sapiichani parakaksï imeechajtu sési pájperaaka juchaari Taati auandarhu anapu jingoni enga xáni xénchpetika (arhinta je Salmo 48:13).

12. ¿Tata Diosï Jeoba néna exesïreni ánchikuarhitani enga tabernakulurhu úkuarhipka ka ambejtsïni jorhendasïni i ambe?

¹² Kʼéri ambechi arhisïnga Tata Diosï Jeobani engachi jarhuajpejka konstruksionirhu ka engachi kuidariuajka imani kʼumanchikuechani. Biblia uandasïndi eska ánchikuarhita para tabernakuluni úni ka iámindu ambe enga jima japiringa, pímbinhasï ánchikuarhita máespka (Éx. 36:1, 4). Íni jurhiatikuecha jimbo, Tata Diosï Jeoba ísï exesïndi komueska pímbinhasï ánchikuarhita ma engachi uaajka Kʼumanchikuechani Reinueri ka ístu máteru kʼumanchikuechani engachi úrajka para imani kʼéri ambe arhini. Máru erachichaksï kánikua tiempu inchajpasïndi paraksï jarhuajpeni ini ánchikuarhitecharhu. Ka juchachi kánikua jukaparharasïnga ambe engaksï xáni újka i erachicha paraksï jarhuajpeni Reinueri ánchikuarhitarhu.  Ístuksï i erachicha arhutasïndi tiempu paraksï aianhpini ka máruksï asta uékasïndi prekursorini. Orhejtsïkutichaksï xarhatasïndi eskaksï jarhuajpesïnga konstruksionirhu, engaksï jurajkujka eskaksï i erachicha uaaka prekursorini engaksï uaaka ísï úni. Nájkirukachi mítekuaka konstruksioniri ambe o no xáni, iáminduechachi uaaka jarhuajpeni para kuidariuani ka limpiu jatsiani ini kʼumanchikuechani.

13. ¿Nénachi jatsiski para exeani donasionichani engachi íntspiajka para jarhuajpeni Reinueri ánchikuarhitani?

¹³ Kʼéri ambechi arhisïnga Tata Diosï Jeobani engachi juchaari donasionicha jingoni jarhuajpejka Reinueri ánchikuarhitani. Israelitechaksï jatsisïreendi paraksï pákuni ambe ma Tata Diosïni engaksï kʼuínchikuecharhu nireenga (Deut. 16:16). Jatsisïrendiksï para páni ambe engaksï imeecha úpiringa. Ísïksï xarhatasïreendi eskaksï jukaparharasïreenga iámindu kóntperatechani enga Tata Diosï Jeoba íntsauenga. ¿Ka juchachi néna uaa xarhatani eskachi xénchasïnga ka eskachi jukaparharasïnga kóntperatechani engajtsïni ima íntskuajka? Ma ambe engachi uaaka úni jindeesti donasioni íntspini juchaari kúnguarhikuarhu ka para ánchikuarhita enga interu parhakpinirhu úkuarhijka seguni na engachi xáni uaaka. Apostoli Pablu, i ambe uandaspti: “Jimboka [Tata] Diosï jaiapanhentasïnga ima kʼuiripuni enga tsípikua jingoni íntspijka eska xáni uaaka, ka no uinhamarhitspisïndi eska íntspiaka ma ambe enga no jatsiaka” (2 Kor. 8:4, 12). Tata Diosï Jeoba jukaparharasïndi donasionichani engachi mintsita jingoni íntspiajka, no arhiparini enga no kánikueuaka (Mar. 12:42-44; 2 Kor. 9:7).

14. Ísï eska na uandajka Proverbios 19:17, ¿néna exesïni Tata Diosï Jeoba engachi jarhuataajka imeechani engaksï uétarhinchani jarhajka?

¹⁴ Kʼéri ambechi arhisïnga Tata Diosï Jeobani engachi jarhuataajka erachichani engaksï uétarhinchani jarhajka. Tata Diosï Jeoba aiatspespti eska kóndeantapiringa imani israelitechani engaksï jarhuatapiringa pobrichani (Deut. 15:7, 10). Méni engachi jarhuatajka erachini ma enga uétarhinchani jarhajka, Tata Diosï Jeoba ísï exesïndi enajkichi imani íntskuni japiringa ambe ma (arhinta je Proverbios 19:17). Pori ejemplu, engaksï Filipusï anapu kristianuecha axakupka ambe ma Pabluni jiáni enga ima ónhakata japka, uandaspti eska ima ambe engaksï axakupka ísïispka komueska kéjtsïtakua ma enga Tata Diosï kánikua jaiapanhentapka (Filip. 4:18). Uaakachi eratseantani juchaari kúnguarhikuarhu anapu erachichani ka kurhamarhikuarhini: “¿Uaa jarhuatani nemani?”. Tata Diosï Jeoba sési pʼikuarherasïndi engachi úrajka juchaari tiempuni, uinhapikua, ambe engachi jorhenaka ka ambe engachi xáni jatsikuarheka para jarhuataani imeechani engaksï uétarhinchani jarhajka. Ístu, engachi ini ambe újka kʼéri ambechi arhini jarhasïnga imani (Sant. 1:27).

15. ¿Andichisï no jatsi parachi úkua jukanchani arhutani tiempu ka jánguarhintani parachi kʼéri ambe arhini Tata Diosï Jeobani?

¹⁵ Parachi kʼéri ambe arhini Tata Diosï Jeobani ísï eska ima na uéjka, uétarhisïndi tiempu ka eskachi jánguarhintaaka ka inde ambe no úkua jukasti (1 Juanu 5:3). ¿Andi nómbe? Jimbokachi xénchasïnga. Ju je eranhaskani tataka sapichuni ma enga uéjka intsïmbini ambe ma taati jémbani. Jamberi kánikua tiempu úraati para dibuju ma úkuni, joperu no úkua exesïndi ísï úni jimboka xénchasïnga imeeri taati jémbani ka sési pʼikuarherasïndi enga ísï újka. Sáno májkueni, jimbokachi xénchasïnga Tata Diosï Jeobani, sésichi pʼikuarherasïnga engachi úrajka juchaari tiempu ka uinhapikua parachi kʼéri ambe arhini.

16. Eska na arhijka Ebreu 6:10, ¿néna exesïni Tata Diosï Jeoba na engajtsï xáni jánguarhintajka parajtsï jaiapanherantani?

¹⁶ Taaticha engaksï xénchajka imeecheri uájpeechani, nóksï erokuarhisïndi eskaksï imeecheri uájpeecha májkuenksï jásï ambe intsïmbiauaka. Mítestiksï eskaksï no májkueni jásïiska ka eskaksï no májkueni ambe úsïnga úni. Ísï eskaksï i taaticha,  juchaari Taati auandarhu anapu sési mítesti ambe engachi mándani arhini újka úni. Jamberijtsï chá sánderu ambe uaaka úni eska chaari amiguecha o jamberijtsï no uaaka ísï úni eska máteruecha jimbokajtsï jatirikia, pʼamenchani jarhani o responsabilidadichani jatsiani familiarhu. Joperu asï no sési pʼikuarhera je (Gal. 6:4). Tata Diosï Jeoba no méni mirikurhiati ambe engajtsï chá uaaka. Engajtsï méntkisï jánguarhintaska xáni eskajtsï xáni uaaka ka ambakiti mintsita ma jingoni, ima sési pʼikuarheraati (arhinta je Ebreu 6:10). Tata Diosï Jeoba mítesti ambe engajtsï tsitipiringa úni. Uékasïndi eskajtsï tsípikua jingoni irekaaka ka eskajtsï sési pʼikuarheraaka imani ambe jingoni engajtsï uaaka úni para imani kómarhini.

17. a) ¿Ambechi uaa úni engachi úkua jukanchaaka úni ambe ma parachi kʼéri ambe arhini Tata Diosïni? b) ¿Jarhuataskiksïnia máru ambe enga xarharajka rekuadrurhu “ Nénachi uaa sánderu tsípikua jingoni irekani”?

¹⁷ ¿Ka ambechi uaa úni engachi úkua jukanchaaka jandiajku jorhenguarhini Bibliani o uérani aianhpini? Jamberichi kuenta íntskukuarheaka eska engachi sánderu jánguarhintaska ini ambe úni, sánderujtsïni marhuacheaka ka sánderuchi tsitiaka ísï úni. Kʼéri ambe arhini Tata Diosïni ísïisti komueska jorhenguarhini guitarra ma kústani. Engachi iauani ménichani kústaaka, jamberichi no uaaka sési jorhenguarhini. Joperu engachi jánguarhintaska pauani pauani ma ratituechani kústani ka tátsekua sánderu ióni, exeakachi eskachi niáraaka sési kústani. Ka tátsekuachi uékani jauaka eska niáraaka ora parachi kústani jarhani. ¿Andichisï no májkueni ambe újki para kʼéri ambe arhini Tata Diosï Jeobani?

18. ¿Ambeeski sánderu jukaparhakua ambe engachi uaaka úni ka ambechi andaa engachi ísï uaaka?

¹⁸ Mintsita jingoni kʼéri ambe arhini Tata Diosï Jeobani, sánderu jukaparhakua ambeesti engachi uaaka úni. Engachi ísï úska, uaakachi tsípikua jingoni irekani, sési pʼikuarherani ka sánderu orhepatini uaakachi kʼéri ambe arhini Tata Diosïni para méntkisï (Prov. 10:22). Desde iásïchi úsïngia sési pʼikuarherani jimbokachi míteska eska Tata Diosï Jeobajtsïni jarhuatasïnga engachi uandanhiatechani jatsiajka (Is. 41:9, 10). Uánikua ambe jarhasti engachi jimbo uaaka sési pʼikuarherani engachi kʼéri ambe arhiska juchaari Taatini enga kánikua xénchpetika, jimboka ima jukanchaska ‘tʼíntskua intsïnhani ka arhinhani eska kʼéri ambeeska’ (Jaŋ. 4:11).