1-2. Biki ebiraletera okuramya kwaitu kusiimwa Ruhanga?

 KIKI ekyotekerezaaho obwohurra ekigambo “okuramya”? Obundi otekerezaaho ow’oruganda ow’ayebundaize atiize amaju ha rubaju rw’ekitabu kye nasaba kuruga ha mutima. Obundi otekerezaaho eka eine okusemererwa ey’eri omu kwejumbira omu kuramya okw’eka.

² Omu nyikara ezi ebiri, abo abatubalizeeho nibejumbira omu bikorwa eby’okuramya. Yahwe araikiriza okuramya kwabo? Naija kwikiriza okuramya kwabo kakuba kukwatagana n’ekigendererwa kye, kandi bakamuramya omu mulingo ogw’okugonza kandi ogw’ekitiinisa. Yahwe nitumugonza muno. Tukimanyire ngu Yahwe nuwe asemeriire kuramibwa, kandi nitugonza kumuramya omu mulingo ogurukukirayo oburungi.

3. Kiki ekiturukugenda kubazaaho omu kicweka kinu?

³ Omu kicweka kinu nitugenda kubazaaho okuramya Yahwe okuyaikiriize omu kasumi akakara kandi nitwija kubazaaho ebintu munaana ebirukwahukana ebyarukwikiriza omu kasumi kanu. Obuturaaba nitukora eki, nitusobora kutekerezaaho omulingo tusobora kusemezaamu okuramya kwaitu. Nitwija n’okurora ensonga habwaki okuramya okw’amananu kutuletera okusemererwa.

4. Abantu abaramyaga Yahwe, Yesu atakaizire omu nsi, bakooleka bata ngu nibamugonza kandi nibamutamu ekitiinisa?

⁴ Abasaija abesigwa nka Aberi, Nuha, Iburahimu, hamu na Yobu bakooleka ngu nibateekamu Yahwe ekitiinisa kandi nibamugonza.  Omu mulingo ki? Kurabira omu buhulizi bwabo, okwikiriza, hamu n’ebihongwa ebibahayoga. Baibuli terukutugambira buli kimu kyona ekibakoraga omu kuramya kwabo. Baitu bakakora ekibarukusobora kuteekamu Yahwe ekitiinisa, kandi akaikiriza okuramya kwabo. Hanyuma Yahwe akaha Abaisaleri ebiragiro kurabira omu Musa. Omu biragiro binu hakaba harumu ebiragiro ebikaba nibyoleka omulingo bakaba basemeriire kumuramyamu.

5. Mpinduka ki ey’abaireho omu kuramya okw’amananu hanyuma ya Yesu kufa kandi n’okuhumbuuka?

⁵ Hanyuma y’okufa kwa Yesu kandi n’okuhumbuuka, Yahwe akaba atakyanihirramu abantu kumuramya kusigikirra ha biragiro bya Musa. (Bar. 10:4) Abakristaayo bakaba basemeriire kuhondera ekiragiro ekihyaka, kandi eki nikyo “ekiragiro kya Kristo.” (Bag. 6:2) Bakworobiire ekiragiro kinu hatali kurabira omu kukikwata omu mutwe kandi n’okuhondera ebiragiro bingi, baitu kurabira omu kwegera ha kyokurorraho kya Yesu kandi n’okuhondera enyegesa ze. N’omu kasumi kanu, Abakristaayo bakora kyona ekibarukusobora kuhondera Kristo nukwo basobole kusemeza Yahwe kandi batunge okuhuumuzibwa.​—Mat. 11:29.

6. Nitusobora tuta kugasirwa omu kicweka kinu?

⁶ Obuturaaba nitubazaaho buli mulingo turamyamu, wekaguze, ‘Nyeyongiire kukurakurana omulingo gunu?’ Nosobora n’okwekaguza, ‘Nsobora kusemezaamu omulingo ndamya Yahwe?’ Semererwa habw’okukurakurana okw’okozere, baitu kandi osemeriire n’okusaba Yahwe akukonyere kurora nambere osobora kusemezaamu.

7. Yahwe arora ata esaara zaitu ezirukuruga ha mutima?

⁷ Turamya Yahwe obutumusaba. Ebyahandiikirwe nibirengesaniza esaara zaitu n’emigaju rundi emyamirro ey’etekaniziibwe kurungi eibahayoga ha heema ey’okutangatanganirwamu kandi hanyuma na ha yekaru. (Zab. 141:2) Emigaju egi yarugamuga akahooho akasemezaaga Ruhanga. Omu mulingo nugwo gumu, esaara zaitu kuruga ha mutima zisemeza Yahwe n’obutuba tukozeseze ebigambo ebyanguhire kwetegereza. (Nfu. 15:8; Bir. 33:10) Twine ensonga enungi habwaki nitwikiriza ngu kisemeza omutima gwa Yahwe kuhurra nitumugambira nk’oku nitumugonza kandi nitumusiima. N’agonza tumugambire ebitweralikiriize, ebiturukunihira, hamu n’ebiturukugonza. Otakatandikire kubaza na Yahwe omu kusaba, habwaki otabanza kutekerezaaho ebyorukugenda kumugambira? Obworakora oti, noija kuha So ow’omu iguru “emyamirro” erukukirrayo kimu oburungi.

8. Mugisa ki ogutwine ogw’okukugiza Ruhanga?

⁸ Turamya Yahwe obutumukugiza. (Zab. 34:1) Tukugiza Yahwe kurabira omu kugambira abandi omulingo turukugonza kandi turukusiima emiringo ya Yahwe hamu n’emirimo ye. Kukugiza kuruga omu mutima ogwijwire okusiima. Nahabweki obuturatunga obwire obwokutekerezaaho ebintu byona ebirungi Yahwe ebyatukoliire, nitwija kutunga ensonga nyingi ez’okumukugiza. Obututebeza kaba kasumi karungi ‘ak’okuhonga hali Ruhanga obutoosa ekyonzira [eky’okukugiza], nikyo kyana eky’eminwa.’ (Baheb. 13:15) Nk’oku tusemeriire kubanza kutekerezaaho ebiturukugenda kugambira Yahwe omu kusaba, tusemeriire n’okutekerezaaho ebiturukugenda kugambira abantu abaturatebeza. Nitugonza ekyonzira kyaitu eky’okukugiza kuba ekirukukirayo oburungi. Egi niyo ensonga habwaki tubaza kuruga ha mutima obutuba nitutebeza.

9. Kusisanaho n’Abaisaleri abakara tugasirwa tuta obutusorrokana hamu? Bazaaho ekyokurorraho ekirukwoleka omulingo ensorrokano zikugasiire.

 ⁹ Turamya Yahwe obutugenda omu nsorrokano. Abaisaleri abakara bakagambirwa bati: “Emirungi esatu omwaka gumu abasaija bawe bona barazokaga omu maiso ga [Yahwe] Ruhanga omu kiikaro ekyalyegomboza.” (Bir. 16:16) Abaisaleri balekaga amaka gaabo hamu n’emisiri yabo bitaine ow’okubirinda. Baitu Yahwe akabaraganiza ati: ‘Omuntu wena talyegomba ensi yaawe obwolitabaara okuzooka omu maiso ga [Yahwe] Ruhanga wawe.’ (Kurug. 34:24) Abaisaleri habwokuba bayesigiraga kimu Yahwe, bagendaga omu bijaguzo ebi ebya buli mwaka. Kinu kyabaleteraga kutunga emigisa nyingi, nk’okweyongera kwetegereza kurungi Ebiragiro bya Ruhanga, kwecumitirizaaho oburungi bwe, hamu n’okugarurwamu amaani habwokuba hamu n’abaikiriza bagenzi baabo. (Bir. 16:15) Naitwe tugasirwa omu miringo niyo emu obutukora kyona ekiturukusobora kugenda omu nsorrokano. Kandi tekerezaaho omulingo Yahwe asemererwa obutwija tutekaniize kuhayo eky’okugarukamu ekigufu, kandi ekitutekaniize kara.

10. Habwaki kuzina kiri kicweka kikuru omu kuramya kwaitu?

¹⁰ Turamya Yahwe obutuzinira hamu n’ab’oruganda na banyaanya itwe. (Zab. 28:7) Abaisaleri batwaraga okuzina nk’ekintu ekikuru muno omu kuramya kwabo. Omukama Daudi akakoma Abalevi 288 kuba bazini ha yekaru. (1 Byom. 25:1, 6-8) Omu kasumi kanu, naitwe nitusobora kwoleka okugonza okutwiniire Ruhanga obutuzina ebizina eby’okumukugiza. Kuba niraka erirungi tikiri nikyo kikuru. Tekerezaaho kinu: Obutuba nitubaza, “[emirundi nyingi] tusobya itwena,” baitu eki tikitutanga kugumizaamu nitubaza omu kitebe kandi n’obutuba tuli omu buheereza. (Yak. 3:2) Omu mulingo nugwo gumu, tusemeriire kugumizaamu nituzinira Yahwe ebizina eby’okumukugiza n’obuturaaba nitutekereza ngu amaraka gaitu tigali marungi.

11. Kusigikirra ha Zabuli 48:13, habwaki tusemeriire kweteraho obwire obw’okwesomesa Baibuli nk’eka?

¹¹ Turamya Yahwe obutwesomesa Ekigambo kye kandi tukeegesa abaana baitu hali uwe. Ha kiro kya Sabiiti Abaisaleri tibakoraga mulimo gwona kandi bakozesaaga ekiro eki kugumya enkoragana yabo na Yahwe. (Kurug. 31:16, 17) Abaisaleri abesigwa bayegesaaga abaana baabo hali Yahwe hamu n’oburungi bwe. N’omu kasumi kanu naitwe tusemeriire kweteraho obwire obw’okusoma hamu n’okwesomesa Ekigambo kya Ruhanga. Kinu kicweka ky’okuramya kwaitu hali Yahwe, kandi kitukonyera kumwirra haihi. (Zab. 73:28) Kandi obutwesomesa nk’eka tukonyera abaana baitu kutunga enkoragana enungi na Isiitwe ow’omu iguru ow’okugonza.​—Soma Zabuli 48:13.

12. Kiki ekiturukwega kuruga omu mulingo Yahwe yarozeremu abo abakozere ebintu by’eheema eyokutangatanganirwamu?

¹² Turamya Yahwe obutwombeka kandi tukarolerra kurungi ebiikaro byaitu ebyokuramizaamu. Yahwe akarora omulimo ogw’okwombeka eheema ey’okutangatanganirwamu hamu n’ebintu ebikaba nibyetagisibwamu, nk’omulimo ogurukwera. (Kurug. 36:1, 4) Na kasumi kanu, Yahwe n’arora omulimo ogw’okwombeka Kingdom Hall hamu n’ebyombeko ebindi eby’Obukama nk’omulimo ogurukwera. Ab’oruganda na banyaanya itwe abamu bamara obwire bwingi nibejumbira omu mirimo enu. Mali nitusiima muno habw’omulingo basagikamu omulimo gw’Obukama. Kandi nabo bejumbira omu mulimo ogw’okutebeza. Kandi abamu nibasobora n’okugonza  kwehayo kuheereza nka bapayoniya. Abagurusi booleka ngu nibasagika omulimo gunu ogw’okwombeka, obubaikiriza ab’oruganda na banyaanya itwe banu abekambi kufooka bapayoniya obubahikiiriza ebirukwetaagisibwa. Katube twine obukugu omu kwombeka rundi nangwa, itwena nitusobora kukonyera kwikaza ebyombeko biri byecumi kandi omu nyikara enungi.

13. Tusemeriire kurora tuta sente ezituhayo kusagika omulimo gw’Obukama?

¹³ Turamya Yahwe obutuhayo sente kusagika omulimo gw’Obukama. Abaisaleri bakaba batasemeriire kwija omu maiso ga Yahwe batalesere kisembo. (Bir. 16:16) Bakaba basemeriire kuleeta ebisembo binu nibasigikirra ha nyikara yabo. Omu mulingo gunu, bayolekaga ngu nibasiima habw’entekaniza zoona ezaabaga zikozerwe kubagasira omu by’omwoyo. Nitusobora tuta kwoleka ngu nitugonza Yahwe kandi nitusiima habw’ebintu eby’omwoyo ebyarukutuha? Omulingo gumu ogutusobora kukikoramu nugwo ogw’okuhayo sente kusigikirra ha nyikara yaitu, ez’okusagika ekitebe nambere tuli rundi kusagika omulimo gw’ensi yoona. Omukwenda Paulo akasoborra ensonga enu ati: “Nambere haroho okugonza nukuikirizibwa nkomuntu okwanyina, tikuli nkokwatanyina.” (2 Kol. 8:4, 12) Yahwe asemererwa muno obutuhayo ekiturukusobora n’obukiba kiri kitaito.​—Mar. 12:42-44; 2 Kol. 9:7.

14. Kusigikirra ha Enfumo 19:17, Yahwe arora ata obukonyezi obutuha ab’oruganda abali omu bwetaago?

¹⁴ Turamya Yahwe obutukonyera Abakristaayo bagenzi baitu abali omu bwetaago. Yahwe akaraganiza kuha empeera Abaisaleri abakonyeraga abanaku. (Bir. 15:7, 10) Ego, buli murundi tukonyera Omukristaayo mugenzi waitu owali omu bwetaago, Yahwe akirora nk’ekisembo ekituhaire Uwe. (Soma Enfumo 19:17.) Ekyokurorraho, Abakristaayo omu Firipi obubasindikiire Paulo ow’akaba ali omunyankomo ekisembo, ekisembo eki akakyeta “ekyonzira ekiikirizibwa, ekirukusemera hali Ruhanga.” (Baf. 4:18) Tekerezaaho abali omu kitebe kyanyu kandi oyekaguze oti, ‘Harumu omuntu wena ounsobora kukonyera?’ Yahwe asemererwa muno obwarora nitukozesa obwire bwaitu, amaani, obukugu, hamu n’ebintu ebitwine kukonyera abali omu bwetaago. Eki akirora nk’ekicweka ky’okuramya kwaitu.​—Yak. 1:27.

15. N’obukiraaba ngu kuramya okw’amananu kwetaagisa obwire hamu n’okuteekamu amaani, habwaki gutali mugugu?

¹⁵ Okuramya okw’amananu nikwetaagisa obwire hamu n’okuteekamu amaani. Baitu tiguli mugugu. (1 Yoh. 5:3) Habwaki? Habwokuba nituramya Yahwe habw’okumugonza. Tekerezaaho omwana omuto owarukugonza kuha ise ekisembo. Nasobora kumara esaara nyingi n’ateera ekisisani ekyaramuha. Kandi tayeijukya habw’obwire obwamara nakiteera. Nagonza ise, kandi asemererwa muno kumuha ekisembo eki. Omu mulingo nugwo gumu, habwokuba nitugonza Yahwe, naitwe kitusemeza kuteekamu amaani, hamu n’obwire bwaitu kusobora kwejumbira omu kuramya okw’amananu.

16. Kusigikirra ha Abaheburaniya 6:10, Yahwe arora ata amaani buli omu omuliitwe arukuteekamu kusobora kumusemeza?

¹⁶ Abazaire ab’okugonza tibanihirramu abaana baabo kubaha ebisembo ebirukusisana. Bakimanyire ngu buli mwana w’embaganiza obukirukuhika hali ebi ebyarukusobora kukora. Omu mulingo nugwo gumu, Isiitwe ow’omu iguru nayetegereza buli omu omuli itwe ekyarukusobora kukora. Obundi  nosobora kukora bingi kukira baingi ab’omanyire kandi aborukugonza. Rundi torukusobora kukora bingi nk’abandi, obundi habw’okukura muno omu myaka, oburwaire, rundi habw’obujunanizibwa bw’amaka. Otahwamu amaani. (Bag. 6:4) Yahwe talyebwa emirimo yaawe. Kakuba oraaba n’omuha ekirukukirayo oburungi, kandi habw’ekigendererwa ekihikire, naija kusemererwa. (Soma Abaheburaniya 6:10.) Yahwe amanyire n’ebintu ebiwakugondeze kukora. Nagonza otunge okusemererwa omuli ebi eby’osobora kumukorra.

17. (a) Kakuba ebintu ebimu ebitukora omu kuramya kwaitu biba nibitugumira, kiki ekitusobora kukora? (b) Gumu ha miringo oguli omu kasanduuko “ Yongera ha Kusemererwa Kwawe” gukukonyire guta?

¹⁷ Kiki ekitusobora kukora kakuba kiba nikitugumira kukora kimu ha bintu ebitubalizeeho nk’okwesomesa Baibuli, rundi kutebeza? Obuturayeyongera kwejumbira omu bintu binu butoosa nitwija kweyongera kubyegondezaamu kandi n’okubigasirwamu. Nitusobora kulengesaniza okuramya kwaitu n’ebintu ebimu ebitukora, nk’okukora ebisasaizi, kwega kuteera enanga. Kakuba ebintu binu tubikora dimu na dimu titurukusobora kubyega kurungi. Baitu kiki ekisobora kubaho kakuba tucwamu kubikora buli kiro tutarukwosa? Ha kubanza nitusobora kubikora kumara edakiika nke, baitu hanyuma y’obwire nitusobora kutandika kubikora kumara obwire oburukukiraho. Obuturora ebirungi ebirukuruga omu maani agaturukuteekamu kukora ebintu binu, kituletera kweyongera kutunga ekihika eky’okubikora kandi n’okubyegondezaamu. Nukwo kiri n’obukirukuhika ha bintu ebitukora omu kuramya kwaitu.

18. Kintu ki ekirukukira obukuru ekitusobora kukora, kandi biki ebirarugamu obuturakikora?

¹⁸ Kukora kyona ekiturukusobora kuramya Yahwe nikyo kintu ekirukukirayo obukuru ekiturukusobora kukora. Ekirugamu tutunga okusemererwa, ekigendererwa omu bwomeezi, kandi n’okunihira okw’okuramya Yahwe ebiro n’ebiro. (Nfu. 10:22) Twine obusinge habwokuba tukimanyire ngu Yahwe akonyera abo boona abarukumuramya obubatunga ebizibu. (Is. 41:9, 10) Tutunga okusemererwa obuturamya Isiitwe ow’okugonza, ow’asemeriire “okuhabwa ekitinisa nokutinwa” kuruga omu bihangwa bye byona!​—Kus. 4:11.