1-2. Cinyi cinoita kuti kunamata kedu kutenderhwe na Mwari?

 MUNORANGARIREI pamunozwa soko rekuti “kunamata”? Pamweni mungarangarira hama imwe yakagwadama yeciita munamato kuna Djehovha no mwoyo wese isati yaenda kowata. Kana kuti, pamweni mungarangarira mhuri yecifunda Bhaibheri no mupfaro.

² Pa nyaya mbiri idzi, awona ese arikunamata Mwari. Kodi Djehovha acatendera kunamata kawo here? Ayena acatendera kana awona akaedza kuita kuda kake uye opangidza rudo no rureremedzo kaari. Isusu tinoda maningi Djehovha. Tinoziya kuti akasisira kunamathwa uye tinoda kumunamata nge mushobo wakasisira.

3. Ticaonei mu fundo ino?

³ Mu fundo ino, ticaona mushobo wekunamata waitenderhwa na Djehovha mu nguwa dze Bhaibheri uye ticaonawo zviro zvinomwe e manamatire atingaita Djehovha nge mushobo unotenderhwa nyamasi uno. Patinozviita, rangarirai magadzirisire amungaita kunamata kenyu Djehovha. Ticaonawo kuti ngei tinopfara patinonamata Djehovha nge mushobo kwawo.

4. Djesu asati auya pa nyika, anamati a Djehovha aipangidza kudini kuti aimuda uye aimureremedza?

⁴ Djesu asati auya pa nyika, anarume akagondeka akaita hingana Abheri, Nowa, Abrahamu, uye Djobo akapangidza kuti aida uye aireremedza Djehovha. Akazvipangidza kudini?  Awona aimuzwira, akatenda muna Mwari uye akaita zvibairo kaari. Bhaibheri aripanganidzi zvese zvaaidikana kuita kuti anamate Mwari. Asi irona rinopangidza pamhene kuti awona aipeta masimba kuti akudze Djehovha, uye kuti kunamata kawo kaitenderhwa naye. Nokuhamba ke nguwa, Djehovha akapasa Aisraeri Mutemo wa Mozesi. Mutemo uu waipangidza manamatire aidikana kuizwa Djehovha.

5. Djesu paakafa uye omutswa, cinyi cakacinja pa mishobo ye kunamata Djehovha?

⁵ Mumasure mekuti Djesu afa uye omutswa, Djehovha ainga asikacaimiri kuti anhu ateerere Mutemo wa Mozesi. (Aro. 10:4) Akristu aidikana kuteerera mutemo upsva, “mutemo wa Kristu.” (Aga. 6:2) Kuti ateerere “mutemo”uu, awona ainga asikadikani kuteerera mundanda we zviro zvakatarhwa. Awona aidikana kuteedzera muezaniso wa Djesu uye kuteerera fundiso dzake. Nyamasi uno, Akristu anoitawo zviri zvese kuti ateerere Kristu, nge kudaro, awona anopfadza Djehovha uye anoona “nyaradzo.”—Mat. 11:29.

6. Fundo ino ingamubetsera kudini?

⁶ Patinonga teciongorora dii rimwe na rimwe rakaringana nokunamata kedu, dzibvunzisei kuti: ‘Kuhambira mberi kupi kandakaita pa dii iri?’ Mungadzibvunzisazve kuti: ‘Ndingagadzirisa manamatiro angu here?’ Zvirokwazvo kuti mungapfara ngekubudirira kamaita dakara zvino, asi kumbiraiwo Djehovha kuti amubetsere kuwona pamunodikana kugadzirisa.

7. Djehovha anoona kudini minamato yedu ye mwoyo wese?

⁷ Isusu tinonamata Djehovha patinoita munamato kaari. Bhaibheri rinoezanisa minamato yedu no rusenzi yakanyasa kugadzirirhwa yaipaswa ku tabhernakuro uye nokuhamba ke nguwa ku tempro. (Pis. 141:2) Rusenzi iyona, yaidusa munuhwi wainuhwirira waipfadza Djehovha. Ngo mushobo umwewo, minamato yedu “inomupfadza” kunyazi isikashamisi. (Zvie. 15:8; Dhe. 33:10) Tingagonda hedu kuti Djehovha anoda kutizwa tecireketa nge zve rudo redu uye nge zve kutenda kedu ngezva anotiitira. Ayena anoda kuti timubvunze zviro zvirikutinetsa, zviro zvatiri kuronga kuita uye zvido zvedu. Musati mareketa na Djehovha meciseenzesa munamato, madini kumboimira, morangarira zvamucada kureketa? Kana mukadaro, imwimwi mucapasa “rusenzi” yakanakisisa kuna Baba enyu e kudenga.

8. Mukana upi wakanakisisa watinawo watingarumbidza nawo Djehovha?

⁸ Isusu tinonamata Djehovha patinomurumbidza. (Pis. 34:1) Tinorumbidza Djehovha nge kubvunza amweni madire atinoita uye kushamiswa katinoizwa nge mawara ake anoshamisa, uye nge mabasa ake. Patinotenda Djehovha no mwoyo wese, zvinoita nyore kuti timurumbidze. Patinopsvaka nguwa kuti tinyase kurangarira nge zve zviro zvakanaka zvatinoizirhwa na Djehovha, ticaona zvikonzero zvakawanda kuti timurumbidze. Basa rekuparidzira, ndi mukana wakanaka “wekupasa Djehovha cibairo cekurumbidza, izvi zvirikuda kureya zvibereku zve muromo wedu.” (Ahe. 13:15) Hinga kukosha kunoita kutanga tarangarira zvaticareketa na Djehovha teciseenzesa munamato, zvinokoshawo maningi kuti titange tarangarira zvaticareketa no anhu mu basa rekuparidzira. Isusu tinoda kuti “cibairo cedu cekurumbidza” cigare cakanakisisa. Uye patinoparidzira amweni, isusu ticareketa zvecibva mu mwoyo.

9. Hingana Aisraeri, tinobetsereka kudini patinoungana? Pasai muezaniso wekuti musangano wakambomubetsera kudini.

 ⁹ Isusu tinonamata Djehovha patinopinda misangano. Aisraeri akapaswa mutemo wekuti: “Katatu pa gore anarume ako ese ngaauye pamberi pa Djehovha Mwari wako pa mbuto yaacasanangura.” (Dhe. 16:16) Izvi zvaireya kuti nyumba no zvirimwa zvawo zvaizogara zvisina munhu ungazvidziirira. Asi Djehovha akagondesa kuti: “Apana munhu acasirira nyika yako paunonga wecienda koona hope ya Djehovha Mwari wako.” (Eki. 34:24) Ngekugonda Djehovha no mwoyo wese, Aisraeri aienda ku mitambo ii ye gore. Awona aibetsereka maningi ngekuita izvona. Ngo muezaniso, awona aikwanisa kufunda zvakawanda nge zve Mutemo wa Mwari, kunyasa kurangarira nge zve zviro zvese zvakanaka zvaaizirhwa na Mwari uye kuzwa mupfaro wekugara pamwepo no anhu amweni aidawo Djehovha. (Dhe. 16:15) Izvona zvakatodzana no zvirikuitikawo mazuwa ano patinoita zviri zvese kuti tipinde musangano. Uye rangarirai kuti Djehovha anopfara kudini patinonga takagadzirira kupasa mhinduro dzisikazi kureba uye dzakanyasa kurangarirhwa.

10. Ngei kuemba iciro cinokosha pakunamata kedu?

¹⁰ Isusu tinonamata Djehovha patinoemba no hama dzedu. (Pis. 28:7) Aisraeri aiwona kuemba hingana ciro cinokosha pakunamata kawo. Mambo Dhavhidhi wakagadza Arevhi anokwana kuita 288 kuti aembe mu tempro. (1 Mak. 25:1, 6-8) Nyamasi uno, tingapangidza kuti tinoda Djehovha nge kuemba ngoma yekurumbidza. Azvinei kuti tinoemba zvakanaka here kana kuti haiwa. Ngo muezaniso, patinoreketa “tese isusu tinokuhunyika kakawanda,” asi izvona azvitiitisi kuti tisarekete mu ungano uye mu basa rekuparidzira. (Tg. 3:2) Ngo mushobo umwewo, isusu atidikani kusiya kuembera Djehovha ngekurangarira kuti atikwanisi kuemba zvakanaka.

11. Maererano na Pisarema 48:13, ngei zvecikosha kuti tipsvake nguwa kuti tifunde Bhaibheri se mhuri?

¹¹ Isusu tinonamata Djehovha patinofunda Bhaibheri uye patinofundisa ana edu nge zvake. Aisraeri ainga asikaseenzi mu ma Sabudu, asi aikanda ndangariro dzawo pakubambisa ushamwari wawo na Djehovha. (Eki. 31:16, 17) Aisraeri aifundisa ana awo nge zva Djehovha uye nge zve zviro zvakanaka zvaaiita. Nyamasi uno, isusu tinodikana kupsvaka nguwa kuti tierenge uye tifunde Soko ra Mwari. Izvona zvinobatanidzwawo pakunamata kedu uye zvinotikhwededza dhuze naye. (Pis. 73:28) Uye patinofunda se mhuri, tingabetsera mubarirhwana mupsva, kana kuti—ana edu—kuti asakurire ushamwari we padhuze na Baba edu e kudenga ano rudo.—Erengai Pisarema 48:13.

12. Djehovha aiwona kudini basa re anhu akawaka tabhernakuro uye izvona zvinotifundisei?

¹² Isusu tinonamata Djehovha patinowaka uye kucengetedza mbuto dzekunamatira. Bhaibheri rinobhuya kuti, kuwakwa ke tabhernakuro no zvese zvaibatanidzwepo, rainga riri “basa rakacena.” (Eki. 36:1, 4) Nyamasi uno, Djehovha anoonawo kuwakwa ke Nyumba dze Umambo uye no maprojeto amweni e kuwaka mu sangano rake hingana basa rakacena. Hama no hanzvadzi dzimweni dzinopedza nguwa yakareba dzakabatikana mu basa iri rekuwaka. Isusu tinokoshesa maningi basa rakakura raanoitira Umambo. Izvirokwazvo kuti awona anoseenzawo mu basa rekuparidzira uye amweni angatodawo kugara mapionero. Akuru anopangidza kuti anotsigira basa rekuwaka, ngekugadza  hinga mapionero hama no hanzvadzi idzi dzakakwaniriswa kuita basa iri. Kunyazi tisikazii zvakawanda nge zvekuwaka, tese isusu tingabetsera ngekuita kuti mbuto iyona irumbwe yakacena.

13. Ngei mipiro yedu yekubetsera basa re Umambo yecikosha?

¹³ Isusu tinonamata Djehovha patinotsigira basa re Umambo nge kupasa mipiro yedu. Aisraeri ainga asikadikani kuenda kuna Djehovha asina ciro. (Dhe. 16:16) Awona aidikana koopasa cipo kuna Djehovha maererano no migariro yawo. Ngekuita kudaro, awona aipangidza kuti aitenda nge zviya zvaiitirhwa na Djehovha. Tingapangidza kudini rudo kuna Djehovha uye nokutenda nge zviya zvaanotipasa? Umwe we mushobo ngewekupasa mipiro ku ungano uye ku nyika yese maererano no zvatinazvo. Muphostori Pauro wakati: “Kana mwoyo unoda ukagara pa mbuto yekutanga, zvinotenderhwa maererano ne zvine munhu, haiwa maererano ne zvisina munhu.” (2 Ako. 8:4, 12) Djehovha anopfara no mipiro yatinomupasa kunyazi iri doko.—Mk. 12:42-44; 2 Ako. 9:7.

14. Maererano na Zvierengo 19:17, Djehovha anoona kudini kubetsera katinoita hama dzedu?

¹⁴ Isusu tinonamata Djehovha patinobetsera hama dzedu. Djehovha akagondesa kuti aizopasa mubairo Aisraeri aibetsera arombo. (Dhe. 15:7, 10) Zvezvirokwazvo, patinobetsera hama kana hanzvadzi irikusongana no zvinetso, zvinoita hingana kuti tirikutopasa cipo kuna Djehovha. (Erengai Zvierengo 19:17.) Ngo muezaniso, Akristu e ku Firipo paakatumira zviro kuna Pauro paainga ari mukaraboso, iyena wakabhuya kuti: “Cibairo cinotenderhwa uye cinopfadza Mwari.” (Afi. 4:18) Rangarirai nge zve hama no hanzvadzi dziri mu ungano yenyu, pedzepo dzibvunzisei kuti, ‘Pano hama kana hanzvadzi yandingabetsera here?’ Djehovha anopfara maningi paanotiwona teciseenzesa nguwa yedu, simba redu, zviro zvatinokwanisa kuita uye zviro zvatinazvo kuti tibetsere aya anoda kubetserhwa. Kaari, izvi zvinobatanidzwa pakunamata kedu.—Tg. 1:27.

15. Kunamata Djehovha zvinoda nguwa no simba, asi ngei zvisikaremi?

¹⁵ Kunamata Djehovha nge mushobo kwawo zvinoda nguwa no simba, asi azviremi. (1 Juau 5:3) Ngei? Ngekuti tinonamata Djehovha ngekuti tinomuda. Rangarirai nge zve mwana mudoko unoda kupasa cipo baba ake. Pamweni iyena ungapedza nguwa yakareba eciaitira dhezenyo. Asi iyena aagurunguti nge ndaa ye nguwa yaapedza eciita dhezenyo iyona. Iyena unoda baba ake uye unopfara ngekuapasa cipo icona. Ngo mushobo umwewo, isusu tinoda Djehovha, ndiyo ndaa tinopedza nguwa no simba redu kuti timunamate.

16. Maererano na Ahebheru 6:10, Djehovha anorangarirei nge zve kupeta masimba kunoizwa ndi umwe na umwe wedu kuti timupfadze?

¹⁶ Abereki ano rudo, aaimiri kutambira zvipo zvimwezvo ku ana awo. Awona anoziya kuti mwana umwe na umwe wakasiyana no amweni uye ano migariro yakasiyana. Ngo mushobo umwewo, Baba edu e kudenga anoziya zvinokwaniswa kuizwa no umwe na umwe wedu. Pamweni mungakwanisa kuita zvakawanda kupinda hama dzedu dzimweni dzinodiwa. Kana kuti mungakonerhwa kuita zvakawanda hingana anhu amweni nge ndaa ye thunga, uthongo uye ubaba wamunawo mu mhuri. Kana zviri izvona, musaore mwoyo.  (Aga. 6:4) Djehovha aazokanganwi zvamunoita. Asi ayena acapfara kana meciita zvirizvese uye no cikonzero cakanaka. (Erengai Ahebheru 6:10.) Djehovha angatoona zviri mu mwoyo wedu uye anoziya zvataizoda kumuitira. Uye ayena anoda kuti tipfare nge zviro zviya zvatinoita kuti timunamate.

17. (a) Mungaitei kana meciona hingana kuti pano basa rinoshupha rakaringana nokunamata Djehovha? (b) Panganidzai kuti makabetserhwa kudini ngekuita cimwe ce zviro zviri mu bhokisi rakazwi “ Tunhudzirai Mupfaro Wenyu”?

¹⁷ Asi zvakadini kana musikakwanisi kuita zviro zvimweni pa mafundo aya, akaita hingana fundo ye munhu ega uye basa rekuparidzira? Pamweni mucaona kuti pamucarumbwa meciita zviro izvi, mucanyasa kuzvipfarira uye mucabetsereka nazvo. Ngo muezaniso, ndizvona zvinoitikawo patinotanga kuita ezersisiyo uye patinofundira kuridza zviridzwa zve ngoma. Kana tikasama kuzviita kakawanda, atizobudiriri. Asi tingasanangura kuzviita mazuwa ese tecitangisa padoko no padoko. Patinoona kubudirira ke kupeta kedu masimba, tinopfara maningi uye tinogara no cido cekuda kuzviitazve. Tingabhuya zvimwezvo here pa mabasa atinoita kuti tinamate Djehovha?

18. Cinangwa cipi cakaita kuti tisikwe, uye ngaipi migumisiro yakanaka kana tikadzadzisa cinangwa icona?

¹⁸ Isusu takasikwa kuti tinamate Djehovha, ndiyo ndaa tikaita izvona no mwoyo wese, tinogara no upenyu unopfadza, unogutsa uye tinogara no kariro yekunamata Djehovha nokusikaperi. (Zvie. 10:22) Kusiya izvona, tinogara no runyararo mundangariro ngekuti tinozviziya kuti Djehovha anobetsa aseenzi ake paanobatana no matambudziko. (Isa. 41:9, 10) Zvezvirokwazvo, tino zvikonzero zvakawanda kuti tipfare pakunamata Baba edu ano rudo, akasisira “kutambira kukudzwa ne rureremedzo” ngekuti akasika zviro zvese!—Zvak. 4:11.