1, 2. Иегова кандыг байдалда мөгейиишкинивиске чүүлзүнүп турар?

 «МӨГЕЙИИШКИН» деп сөстү дыңнааш, бажыңарга чүү кирип кээр-дир? Кежээ удуурунуң мурнунда дискек кырынга олуруп алгаш, сеткилинден Иеговага мөргүп турар акывыс бе азы Библияны кады сайгарып олурар аас-кежиктиг өг-бүле бе?

² Ийе, бо улусту Бурганга мөгейип турар деп болур. Ынчалза-даа Иегова оларның мөгейиишкинин чүүлзүнүп турар бе? Ийе, бир эвес олар Иегованың күзел-соруун күүседип, Аңаа ынакшыл биле хүндүткелди көргүзүп турар болза. Бис Иеговага дыка ынак болгаш, чүгле Ол бистиң мөгейиишкинивиске төлептиг деп билип турар бис. Ынчангаш бараалгалывыска Аңаа эң-не экини бээрин кызып чоруур бис.

3. Бо статьяга чүнү сайгарар бис?

³ Бо статьяга бис бурунгу үеде Бурганның шынчы бараалгакчылары Аңаа канчаар мөгейип чораанын көөр бис. Оон ыңай кандыг сес ажыл-херек чокта амгы үеде мөгеери болдунмазын сайгарар бис. Оларны чаңгыстап сайгарбышаан, мөгейиишкинивистиң кайы талазын экижидип болурувусту боданыылыңар. Ол ышкаш алыс шын чүдүлге аас-кежиивис-биле сырый харылзаалыг деп чүге чугаалап болурун көөр бис.

4. Христостуң мурнунда чурттап турган чамдык улус Иеговага ынакшылын болгаш хүндүткелин канчаар көргүзүп чорааныл?

⁴ Христостуң черге кээриниң мурнунда чурттап чораан Авел, Ной, Авраам болгаш Иов Иегованы ханы хүндүлеп,  Аңаа ынак турганнар. Ол чүүден көскү? Олар Бурганга бүзүреп, Ону бүрүнү-биле дыңнап, Аңаа өргүлдерни эккеп турган. Иеговага мөгейип тургаш, оларның сагып турган ёзулалдарын Библияда тодаргай биживээн. Ынчалза-даа олар Иегованы ханы хүндүлеп чораан, а Ол оларның мөгейиишкинин чүүлзүнүп турган деп чигзинмес бис. Соонда Иегова Моисей таварыштыр Авраамның салгалдарынга хоойлулар берген. Ол хоойлуларда Иеговага канчаар чүдүүрүн тода айтып каан турган.

5. Христостуң өлүмүнүң болгаш дирлип келгениниң соонда, Иегова бараалгакчыларындан чүнү негеп эгелээн?

⁵ Иисустуң өлүмүнүң болгаш дирлип келгениниң соонда, Иегова бараалгакчыларындан Моисейниң хоойлузун сагыырын негевейн барган (Рим. 10:4). Ол оларга чаа хоойлуну — Христостуң хоойлузун — берген (Гал. 6:2). Ол хоойлуну шээжилээн херээ чок турган база ында чүнү кылыр-кылбазын айыткан узун даңзы чок. Ынчаарга Иисустуң өөреникчилери ону канчаар күүседир турган? Олар Христостуң чижээн эдерип, ооң өөредиглериниң аайы-биле амыдыраар ужурлуг турган. Иегованы өөртүксээш, бис база бүгү сагыш-сеткиливистен Христосту өттүнерин кызып, ооң ачызында тамчык-дышты миннип чоруур бис (Мф. 11:29).

6. Бо статья биске ажыктыг болзун дизе, чүнү канчаарыл?

⁶ Иеговага мөгейиишкинивистиң сес талазын сайгарып тургаш, бодувустан мындыг айтырыгларны салып болур бис: «Чүнү чедип алган мен? Оон ыңай чүнү экижидер болзумза эки?» Чугаажок, чаңгыс черге тапталбайн, бүзүреливистиң быжыгып орарын билип алыры биске өөрүнчүг боор. Ындыг-даа бол, мөгейиишкинивистиң кайы талазын экижидип болурун айтып бээр кылдыр, Иеговадан дилээр болзувусса эки.

7. Иегова сеткиливистен мөргүлдеривиске кандыг хамаарылгалыг?

⁷ Мөргүл. Библияда мөргүлдү эки кылып каан чаагай чыттыг айдызаар чүүлге дөмейлээн. Ону эгезинде ыдыктыг өргээ-майгынынга кыпсып турган, а соонда — Бурганның өргээзинге (Ыд. ыр. 140:2). Ол айдызаар чүүлдүң чыды Иеговага чаагай турган. Ооң-биле дөмей, Иегова сеткиливистен мөргүлдеривисти, безин бөдүүн сөстер-биле чугаалаан-даа болза, дыңнаарынга ынак (Ы. х. к. 33:9—10; У. ч. 15:8). Чугаажок, Иеговага ынакшылывысты болгаш өөрүп четтиргенивисти илередиривиске, Ооң чүрээ өөрүп-хөглеп турар. Бурган бисти дүвүрелдеривис, идегеливис, күзелдеривис-биле үлежирин дилеп турар. А мөргүлдеривис Иеговага чаагай чыттыг айдызаар чүүл ышкаш болзун дизе, чүнү канчаарыл? Мөргүүрүнүң мурнунда чүнү чугаалаарын баш удур боданып алыр болзувусса эки.

8. Бурганны канчаар алгап-мактап болур бис?

⁸ Алгаг-мактал. Иегованы алгап-мактаары дээрге Ооң шынарларының болгаш ажыл-херээниң дугайында магадал-биле чугаалаары-дыр (Ыд. ыр. 33:2). Кижини ону кылырынче өөрүп четтирген сеткил оттурар. Бурганның биске кылып турар буянныг херектери эңме-тикчок! Бурганны алгап-мактаар эң кайгамчык арга дээрге Ооң дугайында өскелерге чугаалаары-дыр. Суртаалдап тургаш, бис «аастардан үнер алгаг-мактал өргүлүн» Иеговага эккеп турар бис (Евр. 13:15). Иеговага мөргүүрүнүң мурнунда баш удур боданып алыры дег, суртаалдаарының бетинде чүнү чугаалаарын эки  бодап алыр херек. Бистиң «аастардан үнер алгаг-мактал өргүлүн» эң эки шынарлыг, четпес-дудуу чок болурун күзээр бис. Ынчангаш суртаалдап тургаш, кижи бүрүзү-биле сеткиливис ханызындан чугаалажып турар бис.

9. Чыыштар Бурганның бараалгакчыларынга болгаш хууда силерге кандыг ажык-дузаны эккеп турар?

⁹ Чыыштарже баары. Моисейниң хоойлузунда: «Шупту эр улузуң чылда үш катап... Дээрги-Чаяакчы Бурганыңның мурнунга, Ооң шилип алыр черинге чедип кээр ужурлуг» — деп бижээн (Ы. х. к. 16:16). Ынчап кээрге, израильчилер бажың-балгадын, шөлдерин ээн каггаш, чоруптар ужурлуг турган. Иегова оларны: «Ол өйде кым-даа сээң чериңни эжелеп алыксавас» — деп бүзүреткен (Хост. 34:24). Израильчилер Бурганга бүрүнү-биле идегеп, чыл санында ол байырлалдарже барып турган. Олар аңаа Иегованың хоойлуларын оон-даа эки билип ап, Ооң ачы-буянының дугайында эки боданып, кады бүзүрээн акы-угбалары-биле үени аянныг эрттирип турганнар (Ы. х. к. 16:15). Бис база, чеже-даа бир чүүлден ойталаар апарзывысса, чыыштарже барып тургаш, шак ындыг йөрээлдерни ап турар бис. А чыышка холувусту көдүргеш, эки боданып алган кыска харыывысты бээривиске, Иегованың арын-шырайы өөрээнинден чырып турар деп чигзинмес бис.

10. Бурганны ырыларга алдаржыдары — мөгейиишкинивистиң чугула кезээ деп чүге чугаалап болур?

¹⁰ Бурганны ырыларга алдаржыдары (Ыд. ыр. 27:7). Израильчилер Бурганны ырыларга алдаржыдып, ону мөгейиишкинниң чугула кезээ кылдыр санап турган. Давид хаан безин 288 левитти «Дээрги-Бурган-Чаяакчының өргээзинге... ырлап бараан болур» кылдыр шилип каан (1 Чыл. 25:1, 6—8). Амгы үеде бис база Бурганны алгап-мактаан ырыларны күүседип тургаш, Аңаа ынакшылывысты илередип турар бис. Арта бистиң ырлап билир-билбезивис оон хамаарышпас. Мындыг чижекти көрүптээлиңер. Бистиң аравыста «аксы-биле бачыт үүлгетпес кижи» чок болгай (Иак. 3:2). Ынчалза-даа ол дээш бис чыыштарга харыылавайн база суртаалдавайн барбас болгай бис. Ынчангаш ырлаарыңар шоолуг эвес-даа бол, ол чүүл Иегованы алдаржыдып ырлаарынга шаптыктавас болзун!

11. Ырлар 47:14-те өг-бүле мөгейиишкинин эрттирер кандыг чылдагаанны бижээн?

¹¹ Хууда шинчилел биле өг-бүле мөгейиишкини. Израильчилер амыр-дыш хүнүнде ажыл-херектер кылбайн, бүгү үезин Иеговага мөгееринче үндүрүп турган (Хост. 31:16, 17). Ада-иелер ажы-төлүнге Бурганны болгаш Ооң ачы-буянын чугаалап берип чораан. Бис база Бурганның Сөзүн номчуп шинчилээр дээш, үени үндүрер ужурлуг бис. Ынчалдыр бис Иеговага мөгейип, Ооң-биле найыралывысты быжыктырып ап турар бис (Ыд. ыр. 72:28). А ада-иелер өг-бүле мөгейиишкинин эрттирип тургаш, «келир салгалга», бодунуң ажы-төлүнге, дээрде Адазы-биле чылыг-чымчак хамаарылганы сайзырадып алырынга дузалап турар. (Номчуптуңар: Ырлар 47:14.)

12. Иегова ыдыктыг майгынны тударынга кандыг хамаарылгалыг турган? Оон чүнү өөренип ап болур бис?

¹² Бурганга мөгеер черлерни тудары база хандырары. Библияда ыдыктыг майгынны тударын база ында бар чүүлдерни кылырын ыдыктыг ажылга хамаарыштырган (Хост. 36:1, 4). Амгы үеде Иегова Хурал залдарын болгаш организациявыстың өске-даа тудугларынга киржирин мөгейиишкинниң чугула кезээ кылдыр санап турар. Чамдык акы-угбалар ол ажылче дыка хөй үезин үндүрүп турар. Оларга ол дээш улуу-биле  өөрүп четтиргенивисти илередир-дир бис! Чугаажок, олар ам-даа суртаалдап чоруур. Оларның чамдыызы безин доктаамал эгелекчилер кылдыр бараалгаксаар. Бир эвес ол акы-угбалар негелделерге дүгжүп, анкетаны долдурар болза, удуртукчулар оларны эгелекчилер кылдыр томуйлаар. Шак ынчаар удуртукчулар организацияның тудуг проектилерин деткип турар боор. А тудуг ажылдарынга киржир дуржулгазы чок улус Хурал залдарын аштап-арыглаарынга база хандырарынга киржип болур.

13. Чагырганың ажыл-херээн деткиир өргүлдерге кандыг хамаарылгалыг болур ужурлуг бис?

¹³ Чагырганың ажыл-херээн деткиир өргүлдер. Израильчилер чыл санында байырлалдарга чыглып тургаш, «Дээрги-Чаяакчының мурнунга хол куруг» келбес турган (Ы. х. к. 16:16). Оларның өргүлдери бай-шыдалындан хамааржыр турган. Ынчаар олар бүзүрелин быжыктырарынга дузалап турары дээш, Иеговага ынакшылын база өөрүп четтиргенин илередип турган. А бис ону канчаар кылып болур бис? Чижээ, шыдаар шаавыс-биле чыыжывыстың чарыгдалдарын дуглажып, делегей чергелиг ажыл-чорудулгавыска өргүлдерни берип тургаш. Аңаа хамаарыштыр Павел элчин: «Силерде күзел-чүткүл-ле бар болза, чүңер чогун эвес, а чүңер барын барымдаалап, Бурган силерниң хайырлалыңарны хүлээп алыр» — дээн (2 Кор. 8:4, 12). Бир эвес эвээш-бичии-даа бол, өргүлдерни кылыксап турар болзуңарза, Иегова өөрүп турар (Мк. 12:42—44; 2 Кор. 9:7).

14. Чугаалар 19:17-ден алырга, дуза хереглээн акы-угбаларывыска деткимчени Иегова канчаар көрүп турар?

¹⁴ Дуза хереглээн акы-угбаларга деткимче. Израильчилер ядыы улустуң дугайында сагыш човаарга, Иегова оларның чарыгдалдарының орнун эгидип берип турган (Ы. х. к. 15:7, 10). Ол безин чединмес бараалгакчыларынга дузалаан улуска Бодун өрелиг деп санап турар. (Номчуптуңар: Чугаалар 19:17.) Солун чүүл, кажан Павел кара-бажыңга турда, акы-угбалар Филиппыдан белек чоргузуп бээрге, ол ону «Бурганга таарымчалыг чаагай өргүл» деп адаан (Флп. 4:18). Ынчангаш бодуңардан айтырыңар: «Кымга дузалап болур мен?» Шынап-ла, дуза хереглээн акы-угбаларывыска деткимчени көргүзер дээш, үевисти, күжүвүстү, акша-көпеевисти берип, арга-мергежиливисти ажыглаар болзувусса, Иегова дыка өөрүүр. Ол ону алыс шын чүдүлгениң кезээ деп санап турар (Иак. 1:27).

15. Алыс шын чүдүлгеже үевисти болгаш күжүвүстү үндүрери биске чүге харааданчыг эвес?

¹⁵ Алыс шын чүдүлге бистен хөй үени болгаш күштү негеп турар. Ынчалза-даа ол биске аар чүък эвес-тир (1 Ин. 5:3). Чүге дизе бис Иеговага дыка ынак бис. Ачазының сеткилин өөртүксээн бичии оолду сагыштаалап көрүңер. Ол шак-шагы-биле саазынга бир-ле чүүлдү кызып чуруп олурар. Ынчалза-даа ол оолак үндүрген үези дээш бичии-даа хараадавайн турар. Ол ачазынга ынак болгаш, аңаа белекти бериксеп турар. Шак ынчаар бис база Иеговага ынак болгаш, Ооң күзээни дег, мөгеер дээш, үевисти болгаш күжүвүстү өөрүшкүлүг үндүрүп турар бис.

16. Иегова Ооң сеткилин өөртүр дээн күжениишкиннеривиске кандыг хамаарылгалыг?(Еврейлерге 6:10).

¹⁶ Ынакшылдыг ада-иеге кайы-даа төлүнүң белээ үнелиг боор. Олар ажы-төлүн деңневейн турар. Ооң-биле дөмей, Иегова бистиң байдалывыс аңгы-аңгы деп билип турар. Эштериңге бодаарга, сен хөйнү кылып  шыдаар чадавас сен. Азы кадыың, хар-назының, өг-бүледе хүлээлгелериң дээш, хөйнү кылып шыдавайн турар чадавас сен. Бир эвес ындыг болза, муңгарава (Гал. 6:4). Иегова сээң ажыл-херээңни кажан-даа утпас. Аңаа шын хөөнден болгаш бүгү сагыш-сеткилиңден бараалгаар болзуңза, Ол сеңээ чүүлзүнер. (Номчуптуңар: Еврейлерге 6:10.) Безин Иегова сээң чүнү кылыксап турарыңны билир. Ол бараалгалыңдан өөрүшкү ап, сеткил ханып чурттаарыңны күзеп турар.

17. а) Мөгейиишкинивиске бир-ле чүүлдү кылыры берге болза канчаар? б)  23-кү арында көзенекте Иеговага мөгейиишкинниң кандыг талалары силерге аас-кежиктиг апаарынга дузалаан?

¹⁷ Бо статьяга Иеговага мөгейиишкинивистиң сес талазын көрдүвүс. Бир эвес оларның чамдыызын кылыры, чижээ, хууда Библияны өөренири азы суртаалдаары берге болза, чүнү канчап болурул? Маңаа мындыг дүрүм дузалаар: хөйнү кылган тудум, чедиишкинниг болур сен. Иеговага мөгейиишкинни сула шимчээшкин кылырынга азы гитарага ойнаарынга дөмейлеп болур. Бир эвес ону ында-хая кылыр болза, кижи чедиишкинниг болбас. А бир эвес хүннүң-не ынаар үени үндүрер болза, көңгүс өске херек-тир. Эгезинде олче эвээш үени үндүрүп, оон чоорту узадып болур. Күжүвүстүң немежип, дуржулгалыг апар чыдарывысты көргеш, ону оон-даа чүткүлдүг кылыксай бээр бис. Мону Иеговага мөгейиишкинивиске хамаарыштыр ажыглап болур.

18. Бурганның күзел-соруунуң аайы-биле чурттап турарывысты канчаар көргүзүп болур бис база ону кылыры чүге чугула?

¹⁸ Иеговага чүлдү-чүрээвистен мөгейип тургаш, Ооң күзел-соруунуң аайы-биле чурттап турар бис. Чүгле ынчан чуртталгавыс аас-кежиктиг болгаш ёзулуг ужур-уткалыг боор. Оон ыңай Иеговага мөгейиишкин биске мөңге чурттаар идегелди берип турар (У. ч. 10:22). Бурган кандыг-даа үеде биске дузалаарынга белен деп бодап кээривиске безин, сагыш-сеткиливисти амыр-дыш бүргей бээр (Иса. 41:9, 10). Ийе, бистиң дээрде Адавыс «алдарны, мактал-хүндүнү, эрге-чагырганы хүлээп аарынга төлептиг... чүге дээрге... [Ол] бүгү чүвени чаяаган» (Ажыд. 4:11). Шынап-ла, Бурганывыска мөгеери дээрге биске ёзулуг аас-кежик-тир!