1, 2. Мар кароно, йыбыртъянмы Иеговалы ярамон мед луоз шуыса?

 МАР сярысь тӥ малпаськоды, куке «йыбыртъян» кылэз кылӥськоды? Кин ке но син азяз пуктэ агаез, кудӥз изьыны выдон азяз пыдесъяськыса, вань сюлмысьтыз Иеговалы вӧсяське. Мукетыз син азяз пуктэ семьяез, кудӥз Библиез эскере.

² Кыкез но та учыръёс Иеговалы йыбыртъянэн герӟаськемын. Но юан кылдэ: кызьы та учыръёс шоры учке Иегова? Соослэн йыбыртъянзы Иеговалы ярамон луоз, куке соос Иеговалы солэн курон-косонъёсызъя ужало-тыршо, сое ярато но гажало. Ми Иеговаез туж яратӥськомы но валаськомы, солы йыбыртъяны кулэ шуыса. Соин ик солы ужан-тыршонын лэсьтӥськомы ваньзэ, мае быгатӥськомы.

3. Мае ми эскеромы та статьяын?

³ Та статьяын ми эскеромы, кызьы Иеговалэн оскымон ужась-тыршисьёсыз солы вашкала дыръя йыбыртъязы. Озьы ик тодомы, кыӵе тямыс ужъёсты милемлы туннэ лэсьтоно, йыбыртъянмы Иеговалы ярамон мед луоз шуыса. Та малпанъёсты эскерыку, ойдолэ малпаськомы, мае милемлы тупатыны кулэ. Со сяна, ми тодомы, малы Иеговалы йыбыртъян юрттоз милемлы шудогес луыны.

4. Кызьы Иисус Христослэн музъем вылэ лыктэмезлэсь азьло Иеговалэн ужась-тыршисьёсыз солы яратэмзэс но гажамзэс возьматъязы?

⁴ Иисус Христослэн музъем вылэ лыктэмезлэсь азьло Инмарлы оскымон адямиос, кылсярысь, Авель, Ной, Авраам но Иов, Иеговаез яратӥзы но гажазы. Кытысь со адӟиськиз? Соос Инмарлы оскизы, солэсь кылзӥськизы но солы курбонъёс вайылӥзы. Библиын пыр-поч уг вераськы, мар соос каризы, Иеговалы йыбыртъян понна. Но ми тодӥськомы, та адямиос лэсьтӥзы ваньзэ, мае быгатӥзы, Иеговаез данъян понна. Соин ик йыбыртъянзы Иеговалы ярамон вал. Берлогес Иегова израиль калыклы Моисей пыр Закон сётӥз. Та Законын пыр-поч вераськиз, кызьы Инмарлы йыбыртъяно.

5. Кыӵе закон сётӥз Иегова Иисуслэн кулэмез но улӟемез бере?

⁵ Иисуслэн кулэмез но улӟемез бере Моисейлэн законэзъя улоно ӧй вал ини (Рим. 10:4). Иегова аслаз калыкезлы сётӥз выль закон — «Христослэсь законзэ» (Гал. 6:2). Отын пыр-поч гожтэмын ӧй вал, мае карыны яра, нош мае уг яра. Та законэз быдэсъян понна, Христослэсь адӟем кароно вал но солэн дышетонъёсызъя улоно вал. Иеговаез шумпоттон понна, ми но Иисуслэсь адӟем карыны тыршиськомы. Со юрттэ милемлы каньыл сюлмын улыны (Матф. 11:29).

6. Мар кароно, та статья милемлы пайда мед ваёз шуыса?

⁶ Али ми эскеромы тямыс ужъёсты, кудъёссэ лэсьтоно туннэ, Иеговалы йыбыртъян понна. Котькудзэ эскерыку, малпаське: «Мар мынам пӧрме ини, нош мае мыным тупатыны кулэ на?» Та юанъёс юрттозы тӥледлы азинсконъёстэс адӟыны но соослы шумпотыны. Со сяна, Иеговалэсь юрттэт куре валаны, мае тӥледлы тупатоно на.

7. Кызьы Иегова учке вань сюлмысьтымы вӧсяськеммы шоры?

⁷ Вӧсяськон. Библиын вӧсяськонъёс ӵошатӥсько фимиамен, кудзэ нырысь вӧсяськон скинияын ӵындыто вал, нош собере — храмын (Пс. 140:2). Инмарлы фимиамез ӵындытон яра вал. Озьы ик вань сюлмысьтымы вӧсяськонъёс но Инмарлы ярамон луо, соос огшоры кылъёсын верамын ке но (К. Зак. 33:10; Мад. 15:8). Зэм но, тау карон кылъёсмы Иеговалэсь сюлэмзэ шунто. Иеговалэн потэ, ми солы сюлмаськонъёсмы, малпанъёсмы но мылпотонъёсмы сярысь мед вераломы шуыса. Нош вӧсяськеммы азьын ми малпамы ке, мар вераломы, вӧсяськонъёсмы Иеговалы эшшо но дуногес потозы.

8. Кызьы ми Инмарез ушъяны быгатӥськомы?

⁸ Иеговаез ушъян. Ми Иеговаез ушъяськомы, куке вераськомы солэн паймымон сямъёсыз но ужъёсыз сярысь (Пс. 33:2). Мар милесьтым мылкыдмес ӝутэ Иеговаез ушъяны? Тау карон мылкыд. Нош Иеговалы тау карон понна, милям туж трос мугъёсмы вань! Кылсярысь, ми Инмарез ушъяськомы, куке со сярысь мукетъёсызлы вераськомы. Тодытыса ми «ушъян-данъян курбон» вайиськомы (Евр. 13:15). Кызьы ми вераськимы ини, вӧсяськон азьын малпаськыны кулэ, озьы ик тодытон азьын но малпаськыны кулэ, мар сярысь ми адямиосын вераськомы. Милям потэ, «ушъян-данъян курбонмы» шектэм мед луоз шуыса. Соин ик ми вань  сюлмысьтымы адямиосын вераськыны тыршиськомы.

9. Кыӵе пайда ваё кенешлэн пумиськонъёсыз? Кызьы соос тӥледлы юртто?

⁹ Пумиськонъёсы ветлон. Моисейлэн законаз гожтэмын вал, вань пиосмуртъёс «Кузё-Инмарлэн быръем интыяз... арлы быдэ куинь пол» ветлыны кулэ вал шуыса (К. Зак. 16:16). Озьыен, коркаоссы но бусыоссы чакласьтэк кылё вал. Но Иегова соослы кылзэ сётӥз: «Тынэсьтыд музъемдэ басьтыны нокинлэн мылкыдыз уз ӝутскы» (Пот. 34:24). Арлы быдэ праздникъёсы ветлон понна, соослы Инмарлы быдэсак осконо вал. Но кылзӥськемзы соослы трос пайда вайиз. Кылсярысь, соос Иеговалэсь законзэ умойгес валазы, солэн ӟеч ужъёсыз сярысь малпаськизы но дырзэс ортчытъязы адямиосын, кудъёсыз соос кадь Иеговаез яратӥзы (К. Зак. 16:15). Ми но та выллем пайда басьтӥськомы, куке кенешлэн пумиськонъёсаз ветлӥськомы, куддыръя со капчи ӧвӧл ке но. Малпалэ гинэ, макем шумпотэ Иегова, куке ми пумиськонъёсын умой малпам но вакчи валэктонъёс сётъяськомы.

10. Малы Иеговаез кырӟанъёсын данъяно?

¹⁰ Кырӟанъёсын данъян (Пс. 27:7). Вашкала Израильын кырӟанъёсты Иеговалы йыбыртъян пӧлы пырто вал. Кылсярысь, Давид эксэй 288 левитъёсты бырйиз, соос «Кузё-Инмарлэн корказ» мед кырӟалозы шуыса (1 Пар. 25:1, 6—8). Ми но Инмарлы яратэммес возьматӥськомы, кырӟанъёс кырӟаса. Эн малпалэ, тӥ чебер кырӟаны уд ке быгатӥське, кырӟано ӧвӧл шуыса. Малпаське: ми пӧлын ӧвӧл соос, «кин кылыныз уг сьӧлыка» (Иак. 3:2). Озьы ке но ми кенешлэн пумиськонъёсаз валэктонъёс сётъяськомы, тодытыкумы адямиосын вераськиськомы. Соин ик эн кышкалэ Иеговаез кырӟанъёсын данъяны.

11. Кыкетӥ Законын 6:6, 7 верамъя, малы семьяен йыбырттонэз ортчытоно?

¹¹ Ас поннад Библиез эскерон но семьяен йыбырттон. Суббота нуналъёсы израиль калык, аслэсьтыз ужъёссэ кельтыса, вань дырзэ Иеговалы висъя вал (Пот. 31:16, 17). Анай-атайёс нылпиоссылы Инмар сярысь но солэн ӟеч ужъёсыз сярысь верало вал. Милемлы но кулэ дырмес висъяны, Инмарлэсь Кылзэ лыдӟон но сое эскерон понна. Озьы ми Иеговалы йыбыртъяськомы но соин кусыпъёсмес юнматӥськомы (Пс. 72:28). Нош анай-атайёс, семьяенызы йыбырттонзэс ортчытыса, нылпиоссылы юртто Инмысь Атаенызы матысь кусыпъёс будэтыны. (Лыдӟе Кыкетӥ Законэз 6:6, 7).

12. Кызьы Иегова учкиз йыбырттон юртъёсты пуктон шоры азьвыл но кызьы со учке со шоры туннэ?

¹² Йыбыртъян юртъёсты пуктон но эскерон-тупатъян. Вӧсяськон скинияез пуктон шоры Иегова учкиз солы ужан-тыршон шоры кадь (Пот. 36:1, 4). Туннэ но Эксэйлык юртъёсты но Иеговалы йыбыртъянэн герӟаськем мукет юртъёсты пуктон шоры Иегова озьы ик учке. Куд-ог вын-агайёс но сузэр-апайёс пуктӥськон ужлы туж трос дырзэс висъяло. Туж бадӟым тау соослы тыршемзы понна! Озьы ке но соос тодытэмысь но уг дугдо. Куд-огъёсызлэн пионер но луэмзы потэ. Та вын-агайёс но сузэр-апайёс заявление сёто ке но пионер луон понна куронъёслы тупало ке, тӧроос лэзё соослы пионер луыса ужаны-тыршыны. Озьы тӧроос пуктӥськон ужлы юртто. Со сяна, ми ваньмы быгатӥськомы юрттыны Эксэйлык юртъёсты утялтыны но эскерыны-тупатъяны.

13. Кызьы учконо Эксэйлык ужлы коньдонэн юрттӥськон шоры?

 ¹³ Эксэйлык ужлы коньдонэн юрттӥськон. Куке израиль калык арлы быдэ праздникъёсы ветлэ вал, со Иеговалы салам-кузьымъёс вайылӥз. «Одӥг адями но... буш киын лыктыны кулэ» ӧй вал (К. Зак. 16:16). Соос сёто вал сомында, кӧня быгатӥзы. Озьы израиль калык Иеговалы тау каре вал солэн яратэмез но сюлмаськемез понна. Нош кызьы милям Иеговалы тау кареммы луэ? Кылсярысь, кенешлы но быдэс дунне вылын ортчытӥськись ужлы быгатэммыя коньдонэн юрттӥськыса. Тани, мар со сярысь вераз апостол Павел: «Уго тӥляд сюлмаськон-тыршонды вань ке, ваньлыктыя-моӵтыя сётэм кузьымдэс Инмар кабыл басьтоз, нош марды ӧвӧл, сое Со кулэ уг кары» (2 Кор. 8:4, 12). Соин ик, кӧня гинэ ми Иеговалы медам сётэ, со шумпотэ, куке ми вань сюлмысьтымы сётӥськомы (Марк 12:42—44; 2 Кор. 9:7).

14. Мадёнъёсын 19:17 верамъя, кызьы Иегова учке вын-агайёсмылы но сузэр-апайёсмылы юрттӥськеммы шоры?

¹⁴ Вын-агайёслы но сузэр-апайёслы юрттӥськон. Куке израиль калык куанер муртъёслы юрттӥськиз, Иегова соосты бакель кариз (К. Зак. 15:7, 10). Куке ми вын-агайёсмылы но сузэр-апайёсмылы юрттӥськомы, Иегова малпа, ми солы пунэмен сётӥськомы шуыса. (Лыдӟе Мадёнъёсты 19:17.) Апостол Павел пытсэт сьӧрын пукыку, Филиппы карысь христианъёс солы кузьым ыстӥзы. Павел вераз, со «Инмарлы ярамон курбон» вал шуыса (Флп. 4:18). Соин ик юалэ асьтэлэсь: «Вын-агайёсмы но сузэр-апайёсмы пӧлысь кинлы мон юрттыны быгатӥсько?» Иегова туж шумпотэ, куке ми дырмес, кужыммес но ваньбурмес кинлы ке юрттон понна кутӥськомы. Инмарлэн малпамезъя, со чылкыт йыбырттон пӧлы пыре (Иак. 1:27).

15. Малы милемлы секыт ӧвӧл дырмес но кужыммес висъяны, Иеговалы йыбыртъян понна?

¹⁵ Иеговалы йыбыртъян понна, дыр но кужым кулэ. Но со милемлы секыт ӧвӧл (1 Иоанн 5:3). Малы? Малы ке шуоно ми Иеговаез яратӥськомы. Пуктэ син азяды пичи пияшез, кудӥзлэн атайзэ шумпоттэмез потэ. Со кема пуке, мае ке но суредаса. Но солы дырыз жаль уг поты, малы ке шуоно со атайзэ яратэ но солы кузьым лэсьтэмез потэ. Озьы ик ми но Иеговаез яратӥськомы, соин ик шумпотыса дырмес но кужыммес висъяськомы, солы йыбыртъян понна.

16. Еврейёслы 6:10 верамъя, кызьы Иегова учке сое шумпоттыны тыршемед шоры?

¹⁶ Яратӥсь анай-атайёс котькуд нылпизылэсь кузьымзэ туж дунъяло. Соос валало, нылпиоссы пӧртэмесь шуыса, соин ик соосты уг ӵошато. Ӵапак озьы ик Инмысь Атаймы но вала, милям югдуръёсмы пӧртэмесь шуыса. Оло нош, эшъёсыныд ӵошатыса, тон тросгес лэсьтыны быгатӥськод. Оло нош, арлыдыд, тазалыкед яке мукет мугъёсын сэрен тон трос лэсьтыны уд быгатӥськы. Озьы ке, мылкыдыд медаз куашка (Гал. 6:4). Иегова тынэсьтыд уждэ уз вунэты. Тон солы вань сюлмысьтыд но шонер мылкыдын ужаськод-тыршиськод ке, со туж шумпотэ. (Лыдӟе Еврейёслы 6:10.) Со сяна, Иегова адӟе, мае карыны тынад мылкыдыд вань. Солэн потэ: тон мед шумпотод солы, мае лэсьтыны быгатӥськод.

17. а) Мар кароно, куке Иеговалы йыбыртъянын милемлы мар ке но секытэн сётӥське? б) Кызьы ужъёс, кудъёсыз Иеговалы йыбыртъян пӧлы пыро, юрттӥзы тӥледлы шудогес луыны? (Учке  «Мар юрттоз шудогес луыны» рамкаез.)

 ¹⁷ Та статьяын ми эскеримы тямыс ужъёсты, кудъёсыз Иеговалы йыбыртъянмы пӧлы пыро. Мар кароно, соос пӧлысь куд-огъёсыз милемлы секытэн сётӥсько ке? Кылсярысь, ас поннад Библиез эскерон яке тодытон. Ми та ужъёсын ӵемгес выримы ке, милемлы капчигес луоз. Тае валан понна, пуктэ син азяды, тӥ арганэн шудыны дышетскиськоды шуыса. Тӥ арганэз шер гинэ кияды кутылӥды ке, номыр уз пӧрмы. Но тӥ котькуд нунал сое кияды басьтыны тыршиды ке, со туж бадӟым пайда ваёз. Нырысь тӥ быгатӥськоды кӧня ке минут гинэ шудыны, нош собере кемагес но кемагес. Куке тӥ адӟоды, мае ке шудэмды луэ ини шуыса, тӥляд нош ик потоз арганэз кияды басьтэмды. Та малпанъёс пайда ваёзы соку но, куке Иеговалы йыбыртъянын милемлы мар ке но секытэн сётӥське.

18. Кыӵе самой кулэ луись ужез милям лэсьтэммы луэ но кыӵе пайда со ваёз?

¹⁸ Иеговалы вань сюлмысьтымы йыбыртъяса, ми самой кулэ луись ужез лэсьтӥськомы. Соку гинэ ми шудо луиськомы. Милям осконмы луоз пырак дауръёс ӵоже улыны (Мад. 10:22). Иегова милемлы котьку но юрттыны дась (Ис. 41:9, 10). Соин ик ми али ик ини каньыл сюлмын улыны быгатӥськомы. Инмысь Атаймы «данлыкез, сӥ-данэз... басьтыны ярась», малы ке шуоно со ваньзэ кылдытӥз (Усьт. 4:11). Ми туж шумпотӥськомы солы йыбыртъяны!