1-2. Nye ci pondola oku lekisa okuti efendelo lietu li taviwa la Suku?

 NYE o sima eci o yeva ondaka, “efendelo”? Citava okuti o sokolola ku manji umue wa kekama oco a likutilile loku sapela la Yehova osimbu handi kapekelele. Ale o sokolola kepata limue lia sanjuka noke lielilongiso liavo Liembimbiliya.

² Kolonepa evi vivali, vosi yavo va kala oku fendela. Anga hẽ Yehova o tava efendelo liavo? Eye o litava nda olio lili kuata locipango caye, nda ovo vo sole kuenda vo sumbila. Etu tu sole calua Yehova. Tua kũlĩha okuti eye o sesamẽla oku fendeliwa kuenda tu yongola oku ci linga lonjila yimue yi taviwa laye.

3. Nye tu konomuisa vocipama cilo?

³ Vocipama cilo, tu konomuisa efendelo Yehova a tava kosimbu kuenda tu konomuisavo atosi ecelãla konjila ndomo Yehova a yongola okuti oco tu u fendela koloneke vilo. Tu konomuisavo poku sokolola ndomo omunu lomunu a sukila oku mioñoloha konjila yoku u fendela. Tu ka molavo ndomo oku fendela Yehova ci tu kokela esanju.

4. Afendeli va Yehova kosimbu va lekisa ndati esumbilo kuenda ocisola ku Yehova?

⁴ Afendeli va Yehova kosimbu okuti, alume vakuekolelo ndeci Abele, Noha, Avirahama kuenda Yovi, va lekisa esumbilo kuenda ocisola ku Yehova. Ndamupi? Ovo va pokuile ku Suku,  vo kolelele kuenda va enda oku eca ovilumba kokuaye. Embimbiliya ka li tu sapuila onjila ndomo va enda oku u fendela. Pole, ovo va likolisilako oco va sumbile Yehova kuenda efendelo liavo lia taviwile laye. Noke Yehova pocakati ca Mose wa eca ku va Isareli Ovihandeleko. Vulala waco wovihandeleko, mua kongelele olonumbi viatiamẽla konjila ndomo Yehova a yonguile oku fendeliwa.

5. Epongoloko lipi lia lingiwa kefendelo liocili noke liolofa kuenda epinduko lia Yesu?

⁵ Noke liolofa kuenda epinduko lia Yesu, Yehova ka kisikile vali oku pokola kocihandeleko ca eciwile ku Mose. (Va Rom. 10:4) Akristão kaliye va ponduile oku pokola kocihandeleko co kaliye okuti “ocihandeleko ca Kristu.” (Va Gal. 6:2) Ovo va ponduile oku pokola ‘kocihandeleko’ eci okuti, ka va ci patekela lika kuenda oku linga ulala wovina, pole, va sukilile oku setukula ongangu ya Yesu loku kuama alongiso aye. Koloneke vilo, Akristão va likolisilakovo oku kuama Kristu oco va sanjuise Yehova kuenda oku “sanga ekavuluko.”—Mat. 11:29.

6. Tu kuatisiwa ndati poku konomuisa ocipama eci?

⁶ Poku konomuisa onepa lonepa yefendelo lietu, lipula ndoco, ‘Epongoloko lipi ñasi oku linga konepa eyi?’ Handi vali, o sukila oku lipula ndoco, ‘Ndi sukila hẽ oku mioñolola onjila ndomo ndi fendela?’ Ove o sukila oku sanjukila kueci o kasi oku linga, pole, o sukilavo oku pinga ku Yehova oco a ku kuatise oku limbuka kovina o sukila oku mioñoloha.

7. Yehova o tenda ndati ohutililo tu linga lutima wosi?

⁷ Etu tu fendela Yehova eci tu likutilila kokuaye. Ovisonehua vi sokisa olohutililo vietu linsensu via endaile oku pongiyiwa lutate oco vieciwe kotavernakulu kuenda noke vonembele. (Osa. 141:2) Insensu viaco via tundaile elemba liwa lia enda oku sanjuisa Suku. Cimuamue haico okuti, olohutililo tu linga lutima wosi Yehova o vi “sanjukila” ndaño tu tukula olondaka vitito. (Olosap. 15:8; Esin. 33:10) Tu kuete asunga alua oku tava okuti Yehova o sanjukila oku yeva alombelo etu ocisola kuenda olopandu kokuaye. Eye o yongola okuti tu u sapuila asakalalo etu, ovisimĩlo vietu kuenda olonjongole vietu. Osimbu kua vanguile la Yehova vohutililo, momo lie ku pongiyila ovina o sukila oku vangula? Poku ci linga, ove o ka eca insensu via velapo ku Isiove wo kilu.

8. Epuluvi lipi liwa tu kuete lioku sivaya Suku?

⁸ Tu fendela Yehova eci tu eca esivayo kokuaye. (Osa. 34:1) Etu tu sivaya Yehova poku sapuila vakuetu ndomo tu u sole kuenda oku komõha ovituwa viaye viwa lovilinga viaye. Nda tua lekisa olopandu tu kuata ovina vialua viwa vioku popia catiamẽla ku Yehova. Eci tu sokolola kovina vialua viwa Yehova a siata oku tu lingila, tu ka kuata asunga alua oku u sivaya. Upange woku kunda u tu ĩha epuluvi liwa lioku ‘eca ocilumba cesivayo ku Suku olonjanja viosi okuti, epako liovimẽla vietu.’ (Va Hev. 13:15) Ndeci tu sukila oku lipongiya eci tu popia osimbu handi ka tua likutililile ku Yehova, cimuamue haico okuti, tu sukilavo oku sokolola lutate kovina tu ka sapuila ku vana tu sanga kupange woku kunda. Tu yongola okuti ‘ocilumba cetu cesivayo’ ci velapo. Etu tu vangula lutima wosi eci tu kunda ocili ku vakuetu.

9. Ndeci va Isareli kosimbu, tu kuatisiwa ndati poku liongolola kolohongele? Tukula ocindekaise cimue ndomo wa siata oku kuatisiwa.

⁹ Etu tu fendela Yehova eci tu kala kolohongele. Va Isareli va va sapuilile hati:  “Olonjanja vitatu vunyamo, alume vosi va ka molẽha kovaso a Yehova Suku yove kocitumãlo eye a nõla.” (Esin. 16:16) Ovo va sukilile oku siapo olonjo viavo kuenda ovapia okuti lomue wa ponduile oku vi lava. Yehova wa va likuminyile hati: “Lomue o kuata onjongole yoku tambula ofeka yove, osimbu o lamana oco o molẽhe kovaso a Yehova Suku yove.” (Etu. 34:24) Omo okuti va Isareli va kolelele ku Yehova lutima wosi ovo va endaile kocipito cunyamo. Ovo va ponduile oku kuatisiwa kolonepa vialua, ndeci, ovo va enda oku lilongisa calua catiamẽla Kovihandeleko via Suku, ndomo eye a va tata kuenda ndomo va endaile oku sanjuka oku kala pamosi la vana va solelevo Yehova. (Esin. 16:15) Cimuamue haico okuti, tu kuatavo asumũlũho aco eci tu likolisilako oku kala kolohongele. Kuenda oku sokolola ndomo tu sivaya Yehova, ci tu vetiya oku pongiya etambululo limue li teta onimbu hailio li vetiya.

10. Momo lie ovisungo, onepa yimue yi kuete esilivilo kefendelo lietu?

¹⁰ Etu tu fendela Yehova eci tu likongela la vamanji poku imba ovisungo. (Osa. 28:7) Va Isareli va tendele ovisungo ndonepa yimue yi kuete esilivilo kefendelo liavo. Soma Daviti wa nõla eci ci soka 288 ya va Lewi oco va kale olonjimbi vonembele. (1 Asa. 25:1, 6-8) Koloneke vilo, tu pondola oku lekisa ocisola cetu ku Suku eci tu imba ovisungo viesivayo. Elaka liondaka yetu, halioko ocina ca velapo. Kũlĩhĩsa ocindekaise eci: Eci tu vangula, “vosi yetu tuakuakulueya olonjanja vialua,” pole, ka tu liwekapo oku vangula vekongelo, ale kupange woku kunda. (Tia. 3:2) Cimuamue haico okuti, ka tu ka sakalali lekambo lioku kuata elaka liwa, oco tu imbe ovisungo vi sivaya Yehova.

11. Ndomo ca tangiwa Kolosamo 48:13, momo lie tu sukilila oku sokiya otembo yoku linga elilongiso Liembimbiliya vepata?

¹¹ Etu tu fendela Yehova eci tu lilongisa Ondaka yaye kuenda oku longisa omãla vetu catiamẽla kokuaye. Esambata lia ecaile ku va Isareli epuluvili, lioku siapo ovopange avo eteke leteke, oco va pamise ukamba wavo la Yehova. (Etu. 31:16, 17) Ovo va longasaile komãla vavo catiamẽla ku Yehova kuenda kohenda yaye. Koloneke vilo, tu sukilavo oku linga esokiyo lioku tanga loku lilongisa Ondaka ya Suku. Eyi onepa yimue yefendelo lietu ku Yehova kuenda ci tu kuatisa oku amẽla kokuaye. (Osa. 73:28) Eci tu lilongisila kumosi lepata, tu kuatisa omãla vetu oku pamisa ukamba uwa la Isietu wokilu ukuacisola.—Tanga Olosamo 48:13.

12. Nye tu lilongisila konjila ndomo Yehova a tendele upange wa vana va pangele ovikuata viotavernakulu?

¹² Etu tu fendela Yehova osimbu tu tunga kuenda tu tata ovitumãlo viefendelo. Embimbiliya li popia okuti upange woku tunga otavernakulu kuenda oku yi sondoluila kocitumãlo cikuavo, wa kala “upange u kola.” (Etu. 36:1, 4) Koloneke vilo, Yehova o tendavo upange woku tunga Olonjango Viusoma kuenda olonjo vikuavo vi panga onepa kusoma, ndupange u kola. Vamue pokati ka vamanjetu va siata oku litumbika kovopange aco. Ku sanjukila hẽ ekuatiso liaco lia siata oku eciwa kupange Wusoma? Ocili okuti, vamanji vaco va litumbikavo kupange woku kunda. Vamue pokati kavo handi va yongola oku kala akundi votembo yosi. Akulu vekongelo va pondola oku eca ekuatiso liavo kovopange oku tunga, poku ecelela vamanji ava olondingupange oku kala akundi votembo yosi nda ovo va lieca kupange waco. Ci kale okuti tu kuete uloño woku tunga, ale sio, vosi yetu tu  pondola oku kuatisa kupange waco kuenda oku tata ocitumãlo caco.

13. Tu tenda ndati olombanjaile tu eca koku kuatisa kupange Wusoma?

¹³ Etu tu fendela Yehova eci tu kuatisa kupange Wusoma lolombanjaile vietu. Va Isareli va enda oku vetiyiwa oku eca ombanjaile yimue ku Yehova eci va endaile kocipito. (Esin. 16:16) Ovo va sukilile oku nena ombanjaile va kuete ndomo ci likuata lekalo liavo. Poku ci linga, ovo va lekisa okuti va sanjukila ovina viosi Yehova a kala oku va lingila. Tu lekisa ndati ocisola cetu ku Yehova kuenda olopandu, omo liovina viosi Yehova a kasi oku tu lingila? Onjila yimue poku kuatisa lolombongo vonjango yetu Yusoma kuenda kupange woku kunda u lingiwa voluali luosi ndomo ci likuata lekalo lietu. Upostolo Paulu wa soneha ndoco: “Ombanjaile yeciwa lutima yi taviwa la Suku, momo Suku o lavoka okuti, omunu eca eci a pondola, haceciko ka pondola.” (2 Va Kor. 8:4, 12) Yehova o sanjukila calua ombanjaile yeciwa lutima wosi, ndaño muẽle yitito.—Mar. 12:42-44; 2 Va Kor. 9:7.

14. Ndomo ca tangiwa Kolosapo 19:17, Yehova o tenda ndati ekuatiso tu eca ku vamanji vana va suka?

¹⁴ Etu tu fendela Yehova eci tu kuatisa vamanji vana va suka. Yehova wa likuminyile oku sumũlũisa va Isareli vana va lekisa ocali kohukũi. (Esin. 15:7, 10) Olonjanja viosi tu kuatisa manji umue wa suka, Yehova o ci tenda ndombanjaile yeciwa Kokuaye. (Tanga Olosapo 19:17.) Ndeci, eci Akristão vo ko Filipu va tuma olombanjaile ku Paulu wa kala kumandekua, Paulu wa ci tukula hati ‘cilumba ca sunguluka, haico ci sanjuisa Suku.’ (Va Fil. 4:18) Kũlĩhĩsa eci catiamẽla ku vana va sangiwa vekongelo ove o kasi kuenda lipula ndoco: ‘Muli hẽ umue okuti ndi pondola oku u kuatisa?’ Yehova o sanjuka calua eci eye a tu mola oku eca otembo yetu, ongusu kuenda ovipako oco tu kuatise vana va suka. Eye o ci tenda okuti ci panga onepa kefendelo lietu.—Tia. 1:27.

15. Vefendelo Liocili mua kongela otembo kuenda elikolisilo, pole, momo lie oku ci linga ka ca tĩlilile? (Tala okakasia losapi hati, “Vokiya Esanju Liove.”)

¹⁵ Vefendelo Liocili mua kongela otembo kuenda elikolisilo. Pole, oku ci linga ka ca tĩlile. (1 Yoa. 5:3) Momo lie? Momo tu fendela Yehova omo liocisola tu u kuetele. Sokolola omõla umue o yongola oku eca cimue ku isiaye. Eye pamue o pita otembo yalua poku u lingilako ociluvialuvia cimue. Omõla ka liveli otembo a pesela oco a linge ociluvialuvia caco. Eye o sole isiaye kuenda o sanjukila oku eca ombanjaile yaco kokuaye. Cimuamue haico okuti, omo liocisola tu kuetele Yehova, tu sanjukila oku talavaya lotembo yetu kuenda ongusu, oco tu u fendele.

16. Ndomo ca tangiwa ku Va Heveru 6:10, Yehova o tenda ndati alikolisilo tu linga oco tu u sanjuise?

¹⁶ Olonjali vakuacisola ka vi lavoka oku tambula ombanjaile yimuamue yomõla lomõla. Ovo va kũlĩha okuti omõla lomõla wa litepa kuenda o kuete ovoloño alitepa. Cimuamue haico okuti, Isietu wokilu wa kũlĩha ovina vi kasi vepondolo lietu. Citava okuti ove o pondola oku linga ovina vialua, okuti viomanu vana wa kũlĩha haivo o sole ci sule. Ale, pamue ku kuete epondolo lioku linga ovina vialua ndeci vakuene, omo lioku kuka, ekambo liu hayele kuenda ovikele vepata. Pole, ku ka sumue. (Va Gal. 6:4) Yehova ka ivalako upange wove. Nda o likolisilako oku linga eci o tẽla lutima wosi, eye o ka ci sanjukila. (Tanga Va Heveru 6:10.) Yehova o lete eci ove o yongola oku linga. Eye o yongola  okuti tu sanjuka lefendelo tu pondola oku eca kokuaye.

17. (a) Nda tua limbuka okuti olonumbi vimue vi panga onepa kefendelo lietu via tĩla, nye tu sukila oku linga? (b) Wa siata oku kuatisiwa ndati lolonumbi vimue via lekisiwa vokakasia losapi hati, “Vokiya Esanju Liove”?

¹⁷ Nye tu sukila oku linga nda tua limbuka okuti olonumbi vimue vi panga onepa kefendelo lietu via tĩla ndeci, elilongiso liopokolika, ale upange woku kunda? Citava okuti, tu limbuka okuti osimbu tu litumbika koku tẽlisa ovopange aco, tu ka sanjukila oku ci linga kuenda tu ka kuatisiwa. Tu sokisa efendelo lietu ndoku pindisa etimba, ale oku talavaya locikuata cimue coku sika. Nda tu ci linga lika olonjanja vimue, ka tu pondola oku loñoloha. Pole, nye ci pita nda tua nõlapo oku ci linga eteke leteke? Tete, tu fetika oku ci linga vokatembo katito kuenda noke, votembo yalua. Eci tu mola onima yiwa yalikolisilo etu, tu ka limbuka asumũlũho a keyilila kovaso, loku a sanjukila. Ove hẽ o pondola oku limbuka esunga lieci tu kapelako ovina evi kefendelo lietu?

18. Ocina cipi ca velapo tu sukila oku linga kuenda onima yipi tu ka kuata?

¹⁸ Ocina ca velapo tu sukila oku linga, oku fendela Yehova lutima wetu wosi. Nda tua ci linga, tu ka kuata esanju liocili komuenyo kuenda tu ka kuata elavoko lioku vumba Yehova otembo ka yi pui. (Olosap. 10:22) Etu olonjanja viosi tu kuete ombembua yovutima, momo tua kũlĩha okuti Yehova o tu kuatisa eci tu pita lovitangi. (Isa. 41:9, 10) Ocili okuti, tu kuete esunga liwa lioku kuata esanju poku fendela Isietu ukuacisola una o sesamẽla “oku tambula ulamba, lesumbilo,” koviluvo viaye viosi!—Esit. 4:11.