1-2. Come che la nostra adorassion la pol piaserghe a Geovà?

 COSSA te pensi quando te scolti la parola “adorassion”? Fursi te pensi nte un fradel che l’è indenocià par pregar a Geovà vanti de dormir. O pol esser che te pensi nte una fameia che la ze drio studiar la Bìblia.

² Savemo che questo fradel e questa fameia i ze drio adorar a Geovà. Ma sarà che ghe piase a Geovà la so maniera de adorarlo? Si, se lori i lo obedisse e i ghe mostra amor e rispeto. Tuti noantri amemo tanto a Geovà. Volemo adorarlo dela meio maniera che podemo parché savemo che el mèrita esser adorà.

3. Cossa ndaremo imparar in questo stùdio?

³ In questo stùdio, ndaremo imparar come che i servi de Geovà del passà i lo adorea e sora oto robe che podemo far par adorar a Geovà ancoi. Intanto che studiemo, proemo pensar in come podemo farle ancora meio. Ndaremo anca capir parché restemo contenti quando adoremo a Geovà dela maniera giusta.

4. Come che i servi de Geovà i mostrea che i lo amea e i lo rispetea vanti de Gesù vegner ala Tera?

⁴ Vanti che Gesù el vegnesse ala Tera, òmini fedeli come Abel, Noè, Abraon, e Giò i ga mostrà che i amea e che rispetea a Geovà. De che maniera? Lori i obedia a Geovà, i gavea fede in lu e i ghe fea sacrifissi. La Bìblia  no la ne dise tuto quel che lori i fea nela so adorassion. Ma la Bìblia ne mostra che i se sforsea de far quel che ghe piase a Dio e che lu el restea contento cola so adorassion. Dopo, Geovà el ga dato ai israeliti la lege par meso de Moisè e in questa lege el disea come che i gavea de adorarlo.

5. Come che i servi de Geovà i ga scominsià a adorarlo dopo dela ressuression de Gesù?

⁵ Dopo che Gesù l’è morto e l’è stà ressussità, Geovà no’l spetea pi che le persone le obedisse ala Lege de Moisè. (Rom. 10:4) Adesso lori i gavea de obedir una nova lege, “la lege del Cristo.” (Gàl. 6:2) Alora, invesse de ndarghe drio a una mùcia de lege, lori i gavea de far compagno a Gesù, e obedir ai so comandamenti. Anca ancoi, i servi de Geovà i fà el meio che i pol par ndarghe drio a Gesù. Cossita lori i fà quel che ghe piase a Geovà e i ze incoraiadi. — Mat. 11:29.

6. Come questo stùdio el podarà giutarne?

⁶ Adesso ndaremo studiar sora oto robe che femo par adorar a Geovà. Intanto che le studiemo proa domandarte: ‘Sarà che son drio far questa roba meio che una volta? Sarà che posso farla ancora meio?’ Sicuro che restemo contenti con quel che ghemo fato fin adesso. Ma podemo domandar a Geovà che el ne giute a veder le robe che podemo far ancora meio.

7. Come Geovà el se sente quando preghemo a lu de cuor?

⁷ Adoremo a Geovà quando preghemo a lu. La Bìblia la dise che le nostre orassion le ze come insenso. Nel passà, el insenso l’era ben parecià, e l’era doperà nel tabernàcolo e dopo, anca nel témpio. (Sal. 141:2) Geovà el ghe piasea del profumo che vegnea fora quando i brusea insenso. Ancoi, Geovà anca el resta tanto contento quando preghemo a lu de cuor, anca che no semo boni de doperar tante bele parole. (Pro. 15:8; Deu. 33:10) Podemo esser sicuri che quando parlemo a Geovà che lo amemo tanto e lo ringrassiemo, lu el resta tanto contento. Lu el vol che ghe parlemo dei nostri pensieri, quel che pensemo e de quel che volemo far. Alora come che te pol pregar ancora meio? Vanti de farlo te pol pensar in quel che te vol parlar a Geovà. Cossita te vè dar a lu el meio “insenso” che te pol.

8. Quando che podemo parlar ai altri sora Geovà e sora le so bele qualità?

⁸ Adoremo a Geovà quando parlemo ai altri dele so bele qualità e de quel che sentimo par lu. (Sal. 34:1) Sarà pi fàcile parlar ai altri sora Geovà se pensemo e ghe demo valor a tuto quel che Geovà el ga fato par noantri. Se seitemo a farlo volaremo ringrassiarlo e lodarlo. Par esémpio, podemo lodarlo, o sia, dar “un sacrifissio de lode” nela predicassion. (Ebr. 13:15) Ma come podemo parlar sora Geovà ai altri de cuor? Cossita come ghemo de pensar cossa ndaremo parlar a Dio nele nostre orassion, ghemo de pensar vanti in quel che ndaremo parlar cole persone nela predicassion. Alora saremo boni de dar a Geovà un bel sacrifìssio de lode.

9. Parché che l’è bon par noantri ndar ale riunion? Parla de come le riunion te ga belche giutà.

⁹ Adoremo a Geovà quando ndemo ale riunion. Geovà el ga dito ai israeliti:  “Tuti i òmini i ga de ndar tre volte al ano davanti de Geovà el nostro Dio, nel posto che lu el ndarà scòlier.” (Deu. 16:16) Quando i israeliti i viaiea, no ghen’era nissuni par tender dele so case e dele so tere. Par quela che Geovà el ghe ga prometesto: “Nissun volerà gaver la to tera intanto che te vè su tre volte al ano par ndar davanti al to Dio, Geovà.” (Éso. 34:24) Alora quando i israeliti i viaiea par adorar a Geovà, lori i mostrea che i se fidea in lu. Parché che l’era bon che i se riunisse? Parché i podea imparar de pi sora la Lege de Dio, pensarghe sora in tuto quel che Geovà el gavea belche fato par lori e restar insieme con quei che lo amea. (Deu. 16:15) Ancoi sucede la medèsima roba con noantri quando se sforsemo par ndar ale riunion e de far pìcoli comentari che ne insegna tanto. Sicuro che Geovà el resta tanto contento quando lo femo.

10. Parché cantar l’è una roba tanto importante nela nostra adorassion?

¹⁰ Adoremo a Geovà quando cantemo insieme coi nostri fradei. (Sal. 28:7) Par i israeliti, cantar l’era una roba tanto importante nela so adorassion a Geovà. Par quela che el rè Davi el ga scoliesto 288 leviti par cantar nel témpio. (1 Cró. 25:1, 6-8) Anca noantri mostremo che amemo a Geovà quando cantemo i càntichi. E no ne ocore restar preocupadi se no semo boni de cantar tanto ben. Par esémpio, quando parlemo, sbaliemo tante volte, ma no se fermemo de parlar nele riunion e nela predicassion. (Tiago 3:2) Alora, ghemo de seitar a cantar a Geovà par lodarlo anca che pensemo che no semo boni de farlo ben.

11. De acordo col Salmo 48:13, parché che i genitori i ga de studiar la Bìblia coi so fioi?

¹¹ Adoremo a Geovà quando studiemo la Bìblia e insegnemo i nostri fioi sora lu. Nei sabi i israeliti no i laorea parché i doperea quel giorno par far pi forte la so amicìssia con Geovà. (Éso. 31:16, 17) Ancoi anca noantri ghemo de torse el tempo par leder e studiar la Bìblia. Quando femo queste robe semo drio adorar a Geovà e deventemo ancora pi so amighi. (Sal. 73:28) I israeliti fedeli anca insegnea i so fioi sora Geovà e sora le bone robe che el fea. Ancoi anca i genitori i pol giutar i so fioi a esser amighi del so caro Pare, Geovà. — Ledi Salmo 48:13. *

12. Cossa che Geovà el pensea del laoro de far su el tabernàcolo e tute le robe che ghen’era rento? E cossa imparemo?

¹² Adoremo a Geovà quando giutemo a far su e a tender dei nostri posti de adorassion. La Bìblia la mostra che l’era un laoro sacro giutar a far su el tabernàcolo e tute le robe che ghen’era rento. (Éso. 36:1, 4) Ancoi, giutar a far su Saloni del Regno e altri posti dela organisassion anca l’è un laoro sacro par Geovà. Noantri demo valor ai fradei e ale sorele che i dopera tanto del so tempo par farli. Lori anca i laora nela predicassion e fursi arquanti i gavaria caro de esser pionieri. I ansiani i mostra che i giuta el laoro de costrussion quando i aprova come pionieri questi bravi fradei e sorele. Cossa podemo far se no semo bravi de giutar a far su questi posti? Podemo giutar a tenderli e a netarli.

13. Cossa mostremo quando demo dei nostri soldi par giutar la organisassion?

 ¹³ Adoremo a Geovà quando demo dei nostri soldi par giutar el laoro dela organisassion in tuto el mondo. Quando i israeliti i ndea adorar a Geovà, lori i gavea de darghe qualcossa de acordo con quel che i podea. (Deu. 16:16) Cossita i mostrea che i dea valor a tuto quel che Geovà el fea par lori. Anca noantri mostremo che amemo a Geovà e che demo valor a tuto quel che el fà quando doperemo dei nostri soldi par giutar la nostra congregassion e i altri laori dela organisassion. Ma Geovà el speta che lo femo de acordo con quel che podemo. Varda quel che el apòstolo Paolo el ga dito: ‘Parché se la persona la vol, Dio el resta contento che la dae quel che la ga, e nò quel che no la ga.’ (2 Cor. 8:4, 12) Alora, Geovà el resta contento con quel che demo de cuor, anca che sìpia poco. — Mar. 12:42-44; 2 Cor. 9:7.

14. De acordo con Proverbi 19:17, cossa Geovà el pensa del aiuto che ghe demo ai nostri fradei?

¹⁴ Adoremo a Geovà quando giutemo i nostri fradei. Geovà el ga prometesto ai israeliti che el ndaria benedir quei che giutesse ai poareti. (Deu. 15:7, 10) La Bìblia anca la dise che quando giutemo un fradel o una sorela che ghe ocore l’è come se fùssino drio darghe un presente a Geovà. (Ledi Proverbi 19:17. *) Par esémpio, varda quel che ga sucedesto quando el apòstolo Paolo l’era in preson. I fradei de Filipo i ga mandà qualcossa par giutarlo e Paolo el ga dito che quel l’era un sacrifìssio che ghe piasea a Dio. (Fil. 4:18) Cossa che anca noantri podemo far? Pensar nei fradei e sorele dela nostra congregassion che ghe ocore de aiuto. Geovà el resta tanto contento quando doperemo del nostro tempo, dela nostra forsa, quel che savemo e i nostri soldi par giutar a quei che i ga de bisogno. Par Geovà, giutar i nostri fradei l’è una maniera de adorarlo. — Tiago 1:27.

15. Parché no l’è fadiga adorar a Geovà?

¹⁵ Semo sicuri che ghemo de sforsarse de tor del nostro tempo par adorar a Geovà, ma no la ze una roba fadiga de farla. (1 Gio. 5:3) Parché nò? Noantri adoremo a Geovà parché lo amemo. Proa imaginar un tosatel che el vol dar un presente al so pare. Fursi el ghe mete arquante ore par farghe un disegno, ma lu no’l sbrontola mia de farlo. Parché? Lu el ama el so pare e el resta contento de darghelo. Anca noantri restemo contenti de sforsarse par adorar a Geovà e tor del nostro tempo par farlo, parché lo amemo.

16. De acordo con Ebrei 6:10, come Geovà el se sente quando femo el nostro meio a lu?

¹⁶ I genitori i sa che i fioi i ze difarenti un del altro. Alora lori no i speta che i so fioi i ghe dae presenti compagni. Anca el nostro Pare, Geovà, el sa che semo difarenti un del altro. Fursi ti te pol far de pi a Geovà che altri fradei. O pol esser che no te sì bon de far come i altri parché te ghè belche una bela età, qualche malatia o te ghè tante robe da far par tender dela to fameia. (Gàl. 6:4) Ma Geovà el vol che te resti contento con quel che te sì bon de far par lu. E lu mai ndarà desmentegarse  del to laoro. Sicuro che se te sì drio far el meio che te pol parché te lo ami, lu el resta contento. (Ledi Ebrei 6:10. *) Lu l’è anca bon de veder quel che te ghè rento el to cuor e quel che te volarissi farghe a lu.

17. (a) Cossa pol giutarte se no te sì tanto bravo de far qualcossa che ghemo imparà in questo stùdio? (b) Parla come che te ga giutà far qualcossa che ghen’è nel quadro “ Resta ancora pi contento”.

¹⁷ Ma fursi no semo bravi de far qualcossa che ghemo imparà in questo stùdio. Par esémpio, fursi te ghè de sforsarte de pi par studiar la Bìblia o par predicar. Se questo l’è drio suceder con ti, cossa pol giutarte? Seita a sforsarte de farle. Cossita te vedarè che queste robe le pol giutarte tanto e te piaserà cada volta de pi studiar la Bìblia e predicar. La medèsima roba la sucede quando scominsiemo a far un esersìssio o a sonar qualcossa. Se femo queste robe ciare volte no saremo boni de imparar a farle ben. Ma se le femo tuti i giorni e doperemo cada volta de pi del nostro tempo par farlo, saremo cada volta pi bravi. Cossita restaremo cada volta pi contenti. La medèsima roba ndarà suceder se se sforsemo par far cada volta meio quel che ghemo imparà in questo stùdio.

18. Parché che Geovà el ne ga creà e cossa che ndarà suceder se lo femo?

¹⁸ Geovà el ne ga creà par adorarlo. Alora, quando lo femo de cuor semo felici, savemo quel che volemo far dela nostra vita e ghemo la speransa de adorar a Geovà par sempre. (Pro. 10:22) Anca restemo tranquili parché savemo che, se infrontemo problemi, Geovà el ndarà giutarne. (Isa. 41:9, 10) Sicuro che restemo tanto contenti de adorar el nostro Pare, che ‘el mèrita ricever la glòria e el onor’ de tuto quel che el ga creà! — Apo. 4:11.