1-2. Yihooway nu goynuwan ufayttiyoy awudee?

 NEENI “goynuwaa” giyo qaalaa siyiyo wode qoppiyoobay aybee? Woossanawu gulbbatidanne zinˈˈanaappe kase Yihoowa haasayissiya issi ishaa qoppennan aggakka. Woy Geeshsha Maxaafaa issippe xannaˈiya ufayttiya issi keettaa asaa qoppana danddayaasa.

² He naaˈˈubaykka eti goynniyoogaa bessiyaaba. Yihooway eta goynuwan ufayttanee? Eti A sheniyaa oottanawu baaxetikko, qassi A siiqikkonne bonchchikko I ufayttana. Nuuni Yihoowa keehi siiqoos. Awu goynoy bessiyoogaa eroos, qassi keehi loˈˈo ogiyan awu goynnana koyoos.

3. Nuuni ha huuphe yohuwan ay beˈanee?

³ Ha huuphe yohuwan, Yihooway beni wode ufayttido goynuwaanne nuuni ha wodiyan awu goynnanaadan I koyiyo hosppun ogeta beˈana. Nuuni yaatiyo wode, kaseegaappe waati loytti goynnana danddayiyaakko qoppana danddayoos. Tumu goynoy nuuni ufayttanaadan oottiyo gaasuwaakka beˈana.

4. Yesuusi saˈaa yaanaappe kase Yihoowawu goynnida asati Yihoowa siiqiyoogaanne bonchchiyoogaa waati bessidonaa?

⁴ Aabeela, Noha, Abrahaamanne Iyyooba mala ammanettida asati Yihoowa bonchchiyoogaanne siiqiyoogaa bessidosona. Waatidi? Eti Xoossawu azazettidosona, A ammanidosonanne awu yarshshidosona. Geeshsha Maxaafay eti oottido ubbabaa yootenna. SHin eti Yihoowa bonchchanawunne A  ufayssiya ogiyan goynnanawu banttawu danddayettida ubbabaa oottidoogee qoncce. Guyyeppe, Yihooway Abrahaama zaretuyyo Muuse Higgiyaa immiis. I koyiyo ogiyan awu goynnanaadan yootiya daro maaratubaa higgee yootees.

5. Yesuusi hayquwaappe denddi simmin tumu goynuwan aybi laamettidee?

⁵ Yesuusi hayquwaappe denddi simmin, asay Muuse Higgiyawu azazettanaadan Yihooway koyibeenna. (Roo. 10:4) Kiristtaaneti ooratta higgiyawu, hegeekka “Kiristtoosa higgiyau” azazettoosona. (Gal. 6:2) Eti ha ‘higgiyaa,’ ubbatoo qoppiyoogaaninne daro higgeta kaalliyoogan gidennan, Yesuusa milatiyoogaaninne I tamaarissidobaa kaalliyoogan azazettana danddayoosona. Ha wodiyankka, Kiristtaaneti Yihoowa ufayssanawunne banttassi ‘shemppo demmanawu’ Kiristtoosa kaallanawu banttawu danddayettida ubbabaa oottoosona.—Maa. 11:29.

6. Ha huuphe yohuwaappe nuuni waati goˈettana danddayiyoo?

⁶ Nuuni goynniyo ogeta pilggiyo wode, nena hagaadan oychcha, ‘Hagaa xeelliyaagan taani giigissidobay aybee?’ Hagaadankka nena oychchana danddayaasa, ‘Taani kaseegaappe loytta goynnana danddayiyaanaa?’ Neeni haˈˈi oottiyooban ufayttana danddayaasa; shin kaseegaappe loytta oottana danddayiyoobaa akeekanaadan Yihooway nena maaddanaadankka neeni oychchana koshshees.

7. Nuuni wozanappe woossiyo woosaa Yihooway waati xeellii?

⁷ Nuuni Yihoowa woossiyo wode awu goynnoos. Xoossaa Dunkkaaniyaaninne guyyeppe beeta maqidasiyan shiiqida loytti giigissido ixaanaara Geeshsha Maxaafay nu woosaa geeddarssees. (Maz. 141:2) Sawuwaa tonggu giya he ixaanan Xoossay ufayttiis. Hegaadankka, nuuni akeekanawu metenna qaalata goˈettikkonne, wozanappe nu woossiyo woosay A “ufaissees.” (Lee. 15:8; Zaa. 33:10) Nuuni A siiqiyoogaanne galatiyoogaa qonccissiyo wode Yihooway siyidi ufayttiyoogaa ammanettoos. Nuuni nuna qofissiyaabaa, nu hidootaanne nuuni koyiyoobaa awu yootanaadan I koyees. Neeni woosan Yihoowa haasayissanaappe kase, woossanaabaa loyttada qoppiyoogee loˈˈo. Yaatiyoogan, neeni saluwan deˈiya ne Aawawu keehi loˈˈo “ixaanaa” shiishshana.

8. Nuuni Xoossaa sabbanawu goˈettana danddayiyo injjee aybee?

⁸ Nuuni Yihoowa sabbiyo wode awu goynnoos. (Maz. 34:1) Nuuni maalaalissiya Yihoowa eeshshatubaanne oosotubaa nashshidi haasayiyoogan A sabboos. Nuuni Yihoowa galatiyaageeta gidikko, A xeelliyaagan haasayiyo loˈˈo gidida darobay deˈees. Yihooway nuussi oottido loˈˈoba ubbaa nuuni qoppiyo wode, A sabbanaadan oottiya gaasoti deˈoosona. Nuuni sabbakiyo wode, ‘Xoossaayyo sabaa yarshshuwaa yarshshoos; hegaa giyoogee menttershshaa ayfiyaa giyoogaa.’ (Ibr. 13:15, NW) Nuuni Yihoowa woossanaappe kase haasayanabaa loytti qoppana koshshiyoogaadan, nuuni sabbakiyoogeetussi haasayanabaa loytti qoppana koshshees. Nuuni nuussi danddayettida ubban “sabaa yarshshuwaa” yarshshanawu koyoos. Nuuni haratussi tumaa sabbakiyo wode wozanappe yootoos.

9. Beni Israaˈeelatuugaadan, issippe shiiqiyoogan nuuni waani goˈettiyoo? SHiiqoti nena waati maaddidaakko qonccissa.

⁹ Nuuni shiiqota shiiqiyo wode Yihoowawu goynnoos. Beni Israaˈeelatussi hagaadan  odettiis: “Intte biittan attuma asa gidida ubbai laittan heezzutoo, . . . GODAA intte Xoossaa sinttan i dooriyo sohuwan beetto.” (Zaa. 16:16) Eti bantta keettaanne bantta gadiyaa naagiyaabi baynnan aggi baana koshshiis. SHin Yihooway etawu hagaadan qaalaa geliis: “GODAA intte Xoossaa sinttan intte laittan heezzutoo beettanau pude kiyiyo wode, ooninne intte biittaa amottenna.” (Kes. 34:24) Israaˈeelati Yihoowan wozanappe ammanettido gishshawu, layttan layttan baalata bonchchidosona. Hegaa gishshawu eti daro ogetun goˈettidosona. Leemisuwawu, eti Xoossaa higgiyaabaa loytti tamaaridosona, Xoossay etayyo keehi loˈˈo gidiyoogaa loytti qoppidosonanne Yihoowa siiqiyaageetuura issippe shiiqiyoogan ufayttidosona. (Zaa. 16:15) Nuuni Kiristtaane shiiqota shiiqanawu nuussi danddayettida ubbabaa oottiyo wode, hegaa mala anjjota demmoos. Qassi nuuni loytti giigettidi qantta qofaa yootiyo wode, Yihooway keehi ufayttiyoogaa hassaya.

10. Yexxiyoogee goynuwan keehi koshshiyaaba gidiyoy aybissee?

¹⁰ Nuuni nu ishanttuuranne michchonttuura mazaamuriyaa yexxiyo wode Yihoowawu goynnoos. (Maz. 28:7) Yexxiyoogaa Israaˈeelati goynuwan keehi koshshiyaabadan xeellidosona. Kawuwaa Daawiti 288 Leewati beeta maqidasiyan yexxanaadan maddabiis. (1 Odi. 25:1, 6-8) Ha wodiyan, nuuni sabaa mazamureta yexxiyo wode Xoossaa siiqiyoogaa bessana danddayoos. Yaatanawu nuuni gooba yettanchcha gidana koshshenna. Hagaa qoppa: Haasayiyo wode, “nuuni ubbaikka daroban baleettees,” shin hegee nuuni gubaaˈiyaaninne haggaazuwan haasayennaadan diggenna. (Yaaq. 3:2) Hegaadan, nuuni loytti yexxokko giidi qoppikkonne, yexxiyoogan Yihoowa sabbana danddayoos.

11. Mazamure 48:13n qonccidaagaadan, so asay Geeshsha Maxaafaa xannaˈiyo prograamiyaa nuuni kessana koshshiyoy aybissee?

¹¹ Nuuni Yihoowa Qaalaa xannaˈiyo wodenne nu naata abaa tamaarissiyo wode awu goynnoos. Sambbatan, Israaˈeelati ooso oottokkona, qassi eti Yihoowaara dabbotido dabbotaa minttanawu he gallassa goˈettidosona. (Kes. 31:16, 17) Eta giddon deˈiya ammanettidaageeti Yihoowabaanne A loˈˈotettaabaa bantta naata tamaarissidosona. Ha wodiyankka, nuuni Xoossaa Qaalaa nabbabanawunne xannaˈanawu wodiyaa bazzana koshshees. Hegee nuuni Yihoowawu goynniyo goynuwaa shaahonne nuuni akko kaseppe aaruwan shiiqanaadan nuna maaddees. (Maz. 73:28) Qassi nu so asay issippe xannaˈiyoogee nu naati saluwan deˈiya nu siiqo Aawaara dabbotaa minttanaadan maaddana danddayees.—Mazamure 48:13 nabbaba.

12. Xoossaa dunkkaaniyaa giddon wottiyo miishshata oottiyo oosuwaa Yihooway xeellido ogiyaappe nuuni ay tamaariyoo?

¹² Nuuni goyno sohota keexxiyo wodenne bottokoniyo wode Yihoowawu goynnoos. Xoossaa Dunkkaaniyaanne A giddon wottiyo miishshata oottiyo oosuwaa Yihooway geeshsha oosodan xeelliis. (Kes. 36:1, 4) Ha wodiyankka, SHiiquwaa Addaraashatanne Yihoowa dirijjitee goˈettiyo hara keettata keexxiyoogaa Yihooway geeshsha oosodan xeellees. Amarida ishanttinne michchontti he oosota oottiyoogan daro wodiyaa aattoosona. Kawotettaa oosuwaa oottiyoogan keehi maaddiyaageeta wozanappe nashshoos. Eti sabbakiyo oosuwaakka oottoosona. Etappe amaridaageeti aqinye gidanawukka koyana danddayoosona. Cimati he minni oottiya ishanttinne michchontti aqinye gidanawu danddayiyo wode aqinye gidanaadan paqqadiyoogan keexuwaa oosuwaa maaddiyoogaa  bessana danddayoosona. Nuuni keexuwaa oosuwan gooba gidin woy gidana xayin, nuuni ubbaykka he keettata muletoo geeshshananne loˈˈo hanotan oyqqana danddayoos.

13. Nuuni Kawotettaa oosuwaa maaddanawu miishshaa immiyoogaa waati xeellana koshshii?

¹³ Kawotettaa oosuwaa nu miishshan maaddiyo wode Yihoowawu goynnoos. Israaˈeelati Yihoowa sintti mela kushe yaana koshshenna. (Zaa. 16:16) Eti bantta wolqqa keena imotaa immana koshshiis. Yaatiyoogan, eti Yihooway banttawu oottido ubbabaa gishshawu A galatiyoogaa bessidosona. Nuuni Yihoowa siiqiyoogaanne I nuuyyo oottiiddi deˈiyo ubbabaa gishshawu A nashshiyoogaa waati bessana danddayiyoo? Nu wolqqa keenan nu gubaaˈiyaanne kumetta saˈan oosettiya oosuwaa maaddanawu miishshaa immiyoogee nashshiyoogaa bessiyo issi oge. Kiitettida PHawuloosi hegaa xeelliyaagan hagaadan giis: “Issi urai Xoossau immanau keehi amottikko, Xoossai au de7ida keenaa ekkanaappe attin, au bainnabaappe ekkenna.” (2 Qor. 8:4, 12) Nuuni immiyoobay daro gidana xayikkonne, nu danddayiyoogaa keenaa immikko Yihooway keehi ufayttees.—Mar. 12:42-44; 2 Qor. 9:7.

14. Leemiso 19:17y yootiyoogaadan, maadoy koshshiyo nu ishantta nuuni maaddiyoogaa Yihooway waati xeellii?

¹⁴ Maadoy koshshiyo nu mala Kiristtaaneta nuuni maaddiyo wode Yihoowawu goynnoos. Yihooway hiyyeesatussi kehatettan immiya Israaˈeelata anjjanawu qaalaa geliis. (Zaa. 15:7, 10) Ee, maadoy koshshiyo nu mala Kiristtaaniyaa nuuni maaddiyo wode ubban, Yihooway hegaa baassi imettida imotadan xeellees. (Leemiso 19:17 nabbaba.) Leemisuwawu, Piliphphisiyuusan deˈiya Kiristtaaneti qasho keettan deˈiya PHawuloosawu imotaa kiittido wode, I hegaa “[Xoossay] dosiyo, a ufaissiya yarshsho” yaagiis. (Pili. 4:18) Ne gubaaˈiyan deˈiyaageetu hanotaa qoppada nena hagaadan oychcha, ‘Taani maaddana danddayiyo uri deˈii?’ Nuuni maadoy koshshiyoogeeta maaddanawu nu wodiyaa, nu wolqqaa, nu eraanne nuussi deˈiyaabaa goˈettiyoogaa beˈiyoogan Yihooway ufayttees. Yihooway hegaa nu goynuwaa shaahodan xeellees.—Yaaq. 1:27.

15. Tumu goynuwawu wodeenne baaxee koshshiyaaba gidikkonne, hegee deexo gidennay aybissee?

¹⁵ Tumu goynuwawu wodeenne baaxee koshshees. SHin hegee deexo gidenna. (1 Yoh. 5:3) Aybissi? Nuuni Yihoowawu goynniyoy A siiqiyo gishshataassa. Ba aawaayyo imotaa immanawu qoppiya issi guutta naˈa qoppa. I ba aawaassi immiyo misiliyaa medhdhiyoogee ayyo daro saatiyaa ekkana danddayees. He naˈay misiliyaa medhdhiiddi daro saatiyaa wurssidoogan zilˈˈettenna. I ba aawaa siiqiyo gishshawu, ayyo he imotaa immiyoogan ufayttees. Hegaadan, nuuni Yihoowa siiqiyo gishshawu, awu goynnanawu nu wodiyaanne nu wolqqaa goˈettiyoogan ufayttoos.

16. Ibraawe 6:10y yootiyoogaadan, Yihooway nuuni A ufayssanawu baaxetiyo baaxiyaa waati xeellii?

¹⁶ Siiqiya yelidaageeti bantta naatu ubbaappe issi mala imotaa naagokkona. Eti bantta naati oottiyooban dumma dumma gidiyoogaa eroosona. Hegaadan, saluwan deˈiya nu Aaway nuuni ubbay oottana danddayiyoobaa akeekees. Geella, neeni eriyoonne siiqiyo darotuppe aarobaa oottana danddayaasa. Woy neeni cimatettaa, sahuwaa woy so asaa aawatettaa gaasuwan haratuugaa keenaa oottennan aggana danddayaasa. Hidootaa qanxxoppa. (Gal. 6:4) Yihooway neeni  oottiyo oosuwaa mule dogenna. Neeni neessi danddayettida keenan wozanappe immikko, I ufayttana. (Ibraawe 6:10 nabbaba.) Neeni oottanawu koyiyoobaakka Yihooway erees. Awu oottana danddayiyooban neeni ufayttanaadan I koyees.

17. (a) Nu goynuwaara gayttidaagan issi issibata oottanawu nuuni metootikko, waatana danddayiyoo? (b) “ Loytta Ufaytta” giya saaxiniyan qonccidabay nena waati maaddidee?

¹⁷ Geeshsha Maxaafaa xannaˈiyoogaa woy sabbakiyoogaa mala nuuni qommoora beˈidobatuppe amaridaageeta oottanawu metootikko, waatana danddayiyoo? Nuuni hageeta darotoo loytti oottiyo wode, loytti ufayttananne hegan loytti goˈettana danddayoos. Nuuni bollaa minttanawu oottiyo ispporttiyaa woy muuziqaa miishshaa meezetiyoogaa mala amarida oosotuura nu goynuwaa geeddarssana danddayoos. Nuuni hegaa issi issitoo xalla oottikko, gooba gidana danddayokko. SHin nuuni hegaa ubba galla oottanawu kuuyida gaada qoppa. Koyro, nuuni guutta wodiyawu oottiyoogan doommidi loddan loddan wodiyaa gujjana danddayoos. Nuuni baaxetidoogee demissido loˈˈobaa akeekiyo wode, he wodiyaa yeemuwan naagana danddayoos, qassi hegan keehi ufayttana. Nu goynuwaara gayttidaagankka hanotay issi mala.

18. Nuuni oottana danddayiyo aybippenne aadhdhiyaabay aybee, qassi hegee ay demissii?

¹⁸ Yihoowawu goynnanawu nuussi danddayettida ubbabaa oottiyoogee nuuni oottana danddayiyo aybippenne aadhdhiyaaba. Nuuni yaatiyo wode, nu deˈuwan ufayttoos, qassi Yihoowawu merinawu goynniyo hidootay nuussi deˈees. (Lee. 10:22) Yihooway bawu goynniyaageeta metoy gakkiyo wode maaddiyoogaa nuuni eriyo gishshawu woppu giidi deˈoos. (Isi. 41:9, 10) Ba medhdhido mereta ubbaappe ‘bonchchuwaanne sabaa ekkanawu bessiya’ nu siiqo Aawawu goynniyo wode nuuni ufayttiyoogee qoncce!—Ajj. 4:11.