ALATIKE AKO 13
ʼE Kotou Fiafia Anai ʼi Te Tauhi Moʼoni
“ ʼE tuha mo koe, Sehova tomatou ʼAtua, ke ke maʼu te kololia, mo te fakaʼapaʼapa pea mo te malohi.”—APK. 4:11.
KATIKO 31 Haʼele Mo Te ʼAtua
TE ʼU MANATU FAKANOUNOU *
1-2. Kotea ʼe tonu ke tou fai ke tali e Sehova tatatou tauhi?
KOTEA ʼe kotou manatu ki ai moka kotou logo ki te kupu “tauhi”? ʼE lagi kotou manatu ki he tahi ʼe tuʼutuli pea mo faikole fakamalotoloto kia Sehova. Peʼe kotou manatu ki he kiʼi famili ʼe natou ako fakatahi ia te Tohi-Tapu.
2 ʼI te ʼu aluʼaga ʼaia ʼe lua, ʼe natou fakahoko fuli tanatou tauhi ki te ʼAtua. Kae ʼe tali koa e te ʼAtua tanatou tauhi? ʼE tali e te ʼAtua ia tanatou tauhi mo kapau ʼe alu tahi pea mo tona finegalo, pea mo kapau ʼe natou fai ʼaki te ʼofa pea mo te fakaʼapaʼapa. ʼE tou ʼoʼofa fuli ia Sehova. ʼE tou iloʼi ʼe tuha mo ia ke tou tauhi kia te ia pea ʼe tou loto fuli ke lelei tukupau ia te tauhi ʼae ʼe tou fai kia te ia.
3. Kotea ʼae ka tou vakaʼi anai ʼi te alatike ʼaeni?
3 ʼI te alatike ʼaeni, ʼe tou vakaʼi anai ia te faʼahiga tauhi ʼae neʼe tali e Sehova ʼi te temi muʼa. Pea ʼe tou vakaʼi anai ia faʼahi ʼe valu ʼe tonu ke tou fai ke tali e Sehova tatatou tauhi. ʼE feala anai ke tou fakakaukauʼi pe kotea ʼae ʼe tonu ke tou fai ke lelei age tatatou tauhi. Pea ʼe tou vakaʼi anai pe koʼe ʼe tou fiafia ʼuhi ko tatatou tauhi.
TE TAUHI ʼAE NEʼE TALI E SEHOVA ʼI TE TEMI MUʼA
4. Neʼe fakaha feafeaʼi e te ʼu kaugana ʼa Sehova tanatou fakaʼapaʼapa pea mo tonatou ʼofa kia te ia?
4 ʼI te temi muʼa, neʼe fakaha e te ʼu tagata agatonu ohage ko Apele, mo Noe, mo Apalahamo pea mo Sopo, tanatou fakaʼapaʼapa pea mo tonatou ʼofa kia Sehova. ʼO feafeaʼi? Neʼe natou fakaha ʼaki tanatou fakalogo, mo tanatou tui pea mo ʼanatou sakilifisio. ʼE mole fakamatalatala lelei ʼi te Tohi-Tapu pe neʼe natou fakahoko feafeaʼi tanatou tauhi. Kae ʼe mahino ia neʼe natou faiga fakamalotoloto ke natou fakaʼapaʼapa mo fakamaʼuhigaʼi ia Sehova, koia neʼe tali ai e Sehova ia tanatou tauhi. Neʼe foaki leva ki ʼamuli e Sehova ia te Lao ki te hologa ʼo Apalahamo. Neʼe tohi ʼi te lao ʼaia ia te ʼu fakatuʼutuʼu ʼo ʼuhiga mo te tauhi ʼae ʼe tali e te ʼAtua.
5. Kotea ia te tauhi ʼae neʼe loto e Sehova ke fai e te ʼu tisipulo ʼa Sesu?
5 Hili te fakatuʼuake ʼo Sesu, neʼe mole kei fakamaʼua e Sehova ke fakalogo te hahaʼi ki te Lao ʼa Moisese. (Loma 10:4) Neʼe tonu leva ki te kau Kilisitiano ke natou fakalogo ki he lao foʼou, ko “te lao ʼa Kilisito.” (Kal. 6:2) Neʼe mole ko he “lao” neʼe tonu ke natou ako fakaʼatamai, pea neʼe mole ko he lisi ʼo te ʼu meʼa ʼe tonu ke natou fai mo te ʼu meʼa ʼe mole tonu ke natou fai. Kailoa ia. Ko he tahi neʼe fia fakalogo ki te lao ʼaia, neʼe tonu ke ina faʼifaʼitakiʼi ia Sesu pea mo maʼuliʼi ʼana akonaki. ʼE toe feia pe ia ʼaho nei. ʼE faiga fakamalotoloto te kau Kilisitiano ke natou faʼifaʼitakiʼi ia Kilisito ke tupu ai te fiafia ʼa Sehova pea ke natou ‘maʼu ai he fakafimalie’ maʼa natou.—Mat. 11:29.
6. Kotea te ʼu lelei ʼe feala ke tou maʼu mai te alatike ʼaeni?
6 Ka tou vakaʼi anai te ʼu faʼahi takitahi ʼae ʼe tonu ke tou fai ʼi tatatou tauhi, kotou tahi fai ia te ʼu fehuʼi ʼaeni: ‘Kotea ʼae ʼe tonu ke au fai ke lelei age te faʼahi ʼaia? Kotea ʼe tonu ke au fai ke lelei age taku tauhi?’ ʼE tonu ke tou fiafia ʼuhi ko te ʼu faiga ʼae kua tou fai, kae ʼe lelei ke tou toe fakakaukauʼi ʼi te faikole mo vakaʼi pe kotea ʼae ʼe tonu ke tou fai ke lelei age tatatou tauhi.
KOTEA ʼAE ʼE TONU KE TOU FAI ʼI TATATOU TAUHI?
7. Kotea te manatu ʼa Sehova moka tou faikole fakamalotoloto?
7 Ka tou faikole kia Sehova ʼe tou tauhi kia te ia. ʼE fakatatau ʼi te Tohi-Tapu ʼatatou faikole ki te iseso ʼae neʼe teuteuʼi fakalelei pea mo foaki ʼi te kamata ʼi te tapenakulo, pea ki ʼamuli leva, ʼi te fale lotu. (Pes. 141:2) Ka tutu te iseso neʼe ʼi ai te ʼaele magoni neʼe leleiʼia e Sehova. ʼE toe feia pe mo ʼatatou faikole, ʼe “fiafia” ia Sehova, tatau aipe pe ʼe mole tou fakaʼaogaʼi ni kupu ʼe matalelei ke feafeaʼi. (Taag. 15:8; Tet. 33:10) ʼE tou tui papau ʼe fiafia ia Sehova moka tou faikole kia te ia ʼo fakaha age totatou ʼofa mo tatatou lotofakafetaʼi. ʼE loto ia ke tou fakaha age ki ai ʼatatou tuʼania, mo ʼatatou fakaʼamu pea mo te ʼu meʼa ʼae ʼe loto ki ai. Koia ʼi muʼa ʼo tatatou faikole, ʼe lelei ke tou toʼo he temi ke tou fakakaukauʼi pe kotea ʼae ʼe feala ke tou palalau ki ai. Kapau ʼe kotou fai feia, ʼe magoni age anai ia te “iseso” ʼae ʼe foaki kia Sehova.
8. Kotea te ʼu aluʼaga ʼe feala ke tou fakavikiviki ai ki te ʼAtua?
8 Ka tou fakavikiviki ki te ʼAtua ʼe tou tauhi kia te ia. (Pes. 34:1) Ka tou palalau ki te hahaʼi ʼo ʼuhiga mo te ʼu kalitate taulekaleka ʼo Sehova pea mo ʼana gaue, ʼe tou fai ai he fakavikiviki ki te ʼAtua. Ka tou lotofakafetaʼi ki te ʼAtua ʼe tou fia fai he fakavikiviki ia te ia. Koia kapau ʼe tou toʼo he temi ke tou metitasio ki te manavaʼofa ʼo Sehova, ki te ʼu meʼa ʼae neʼe ina fai maʼa tatou, ʼe tou fia fai ai he fakavikiviki kia te ia. Ko te gaue faifakamafola ʼe ko he faigamalie ʼaia ke “tou momoli tuʼumaʼu ki te ʼAtua he sakilifisio fakavikiviki, ko tona fakaʼuhiga, te fua ʼo ʼotatou laugutu.” (Hep. 13:15) ʼE maʼuhiga ke tou fakakaukauʼi te ʼu meʼa ʼae ʼe tou fia palalau ki ai ʼi muʼa ʼo tatatou faikole. ʼE toe maʼuhiga ke tou fakakaukauʼi te ʼu meʼa ʼae ʼe tou fia palalau ki ai ʼi muʼa ʼo tatatou olo ki te faifakamafola. ʼE tou loto ke lelei te ʼu “sakilifisio fakavikiviki” ʼae ʼe tou foaki. Koia ka tou vaevae mo te hahaʼi ia te moʼoni ʼe tonu ke tou faifakamalotoloto.
9. He koʼe ʼe lelei ke tou fakatahitahi ohage ko tona fai e te kau Iselaele? Kotou tuku mai he faʼifaʼitaki.
9 Ka tou kau ki ʼatatou fono, ʼe tou tauhi kia Sehova. Neʼe ui fenei e Moisese ki te kau Iselaele: “ ʼE tutuʼu anai te ʼu tagata fuli ia muʼa ʼo Sehova tou ʼAtua ʼo tuʼa tolu ʼi te taʼu, ʼi te koga meʼa ʼae ʼe ina filifili.” (Tet. 16:16) Neʼe tonu ke natou tuku ʼonatou api mo ʼonatou koloa, kae mole he tahi ke ina leʼoleʼo. Kae neʼe fakapapau fenei e Sehova: “ ʼE mole fia fai anai he tahi ki tou fenua ʼi te temi ʼae ʼe ke hake ai anai ʼo tuʼu ia muʼa ʼo Sehova tou ʼAtua, tuʼa tolu ʼi te taʼu.” (Eke. 34:24) Neʼe olo te kau Iselaele ʼo kau ki te ʼaho lalahi, he neʼe natou falala katoa pea mo manavasiʼi kia Sehova. Pea neʼe lahi te ʼu tapuakina neʼe natou maʼu ai, he neʼe natou mahino lelei ki te Lao ʼa te ʼAtua, pea neʼe ko te faigamalie ʼaia ke natou metitasio ki te manavaʼofa ʼo Sehova pea mo fakatahitahi pea mo natou ʼae ʼe ʼoʼofa ia Sehova. (Tet. 16:15) ʼE toe feia pe mo tatou ia ʼaho nei. ʼE lahi te ʼu lelei ʼe tou maʼu moka tou kau ki ʼatatou fono. ʼE fiafia ʼaupito ia Sehova moka tou kau ki te ʼu fono pea moka neʼe tou teuteuʼi he ʼu tali ke tou fai.
10. He koʼe ʼe maʼuhiga ia te hiva ʼi tatatou tauhi?
10 Ka tou hiva fakatahi mo ʼotatou tehina mo tuagaʼane, ʼe tou tauhi kia Sehova. (Pes. 28:7) Neʼe maʼuhiga ia te hiva ki te tauhi ʼa te kau Iselaele. Neʼe hinoʼi e te Hau ko Tavite ia te toko 288 kau Levite ke natou faʼufaʼu ia te kau hiva ʼi te fale lotu. (1 Klk. 25:1, 6-8) ʼI te temi nei, ʼe feala ke tou fakaha totatou ʼofa kia Sehova ʼaki ni hiva fakavikiviki. Tou hiva kia Sehova, tatau aipe pe ʼe tou hiva leʼo kovi. Tou toʼo he faʼifaʼitaki: Ka tou palalau, ʼi ʼihi temi ʼe tuta tatatou palalau. Kae ʼe mole tou tuku anai tatatou palalau ʼi te kokelekasio peʼe ʼi te faifakamafola ʼuhi pe he neʼe tuta tatatou palalau. (Sakp. 3:2) ʼE toe feia pe mo te hiva, ʼe mole tou tuku anai tatatou hiva ni fakavikiviki kia Sehova ʼuhi pe he ʼe mole tou hiva lelei.
11. Ka tou lau ia Pesalemo 48:13, he koʼe ʼe maʼuhiga ke tou fai ia te ako fakafamili ʼi te vahaʼa fuli?
11 Ka tou ako ia te Tohi-Tapu pea mo akoʼi ʼatatou fanau, ʼe tou tauhi kia Sehova. Neʼe mole gaue ia te kau Iselaele ʼi te aho ʼo te Sapato, kae neʼe tonu ke natou tokakaga tafito ki tanatou felogoi mo Sehova ke malohi tuʼumaʼu. (Eke. 31:16, 17) Neʼe natou akoʼi ki ʼanatou fanau te ʼu gaue ʼa Sehova pea mo tona manavaʼofa. ʼE toe feia pe mo tatou, ʼe tonu ke tou toʼo he temi ke tou lau pea mo ako ia te Tohi-Tapu. He ka tou fai ia te faʼahi ʼaia, ʼe tou fakahoko ai tatatou tauhi kia Sehova pea mo fakaovi ki ai. (Pes. 73:28) Pea ka tou ako ia te Tohi-Tapu mo totatou kiʼi famili, ʼe tokoni ai ki ʼatatou fanau ke natou felogoi totonu mo ia pea mo ʼoʼofa ai.—Lau ia Pesalemo 48:13.
12. Kotea te manatu ʼa Sehova ʼo ʼuhiga mo te gaue ʼae neʼe fai e natou ʼae neʼe natou faʼu ia te ʼu meʼa ʼae neʼe tuku ʼi te Tapenakulo?
12 Ka tou kau ki te ʼu laga fale ʼa te kautahi, ʼe tou tauhi kia Sehova. Neʼe fakatotonu e Sehova ki te kau Iselaele ke natou faʼu ia te tapenakulo pea mo te ʼu meʼa ʼae neʼe tuku ʼi loto. Pea ʼe ui ʼi te Tohi-Tapu neʼe ko te “gaue taputapu.” (Eke. 36:1, 4) ʼE toe feia pe ia ʼaho nei, kia Sehova, ko te laga ʼo ʼotatou Fale Fono ʼe ko he gaue taputapu. ʼE ʼi ai ʼihi ʼi ʼotatou tehina mo tuagaʼane ʼe natou lagolago malohi ki te ʼu gaue ʼaia. ʼE tou fiafia ʼi te gaue ʼaia ʼe natou fai maʼa te Puleʼaga ʼo te ʼAtua. Kae ʼe natou toe lagolago foki ki te gaue faifakamafola. Pea ʼe ʼi ai ʼihi ia natou ʼe natou pionie. ʼE fakaha anai e te kau tagata ʼafeā tanatou lagolago ki te ʼu laga fale, ʼaki tanatou fakafealagia kia natou ʼae ʼe gaue ki te ʼu laga fale ke natou pionie. Pe ʼe tou faiva ʼi te laga fale peʼe kailoa, kae ʼe feala kia tatou fuli ke tou tokoni ki te taupau ʼo te ʼu fale ʼa te kautahi.
13. He koʼe ʼe tonu ke tou foaki he ʼu meʼa ʼofa moʼo lagolago ki te ʼu gaue ʼa te Puleʼaga ʼo te Atua?
13 Ka tou foaki he meʼa ʼofa moʼo lagolago ki te ʼu gaue ʼa te Puleʼaga, ʼe tou tauhi kia Sehova. Ka olo te kau Iselaele ki te ʼu ʼaho lalahi, neʼe tonu ke natou olo mo he meʼa ʼofa maʼa Sehova. (Tet. 16:16) Neʼe tonu ke natou ʼave he meʼa ʼofa ʼo mulimuli ki te ʼu meʼa ʼae neʼe natou maʼu. Ko tanatou faʼahiga fakaha ʼaia tanatou lotofakafetaʼi ki te ʼu meʼa ʼae neʼe fai e Sehova maʼa natou. ʼE feafeaʼi hatatou fakaha tatatou lotofakafetaʼi ki te ʼu lelei fakalaumalie ʼae ʼe foaki mai e Sehova? ʼE feala ke tou foaki he meʼa ʼi te kesi ʼo te kokelekasio peʼe ki te ʼu gaue fakamalamanei, ʼo mulimuli ki te fealagia. Neʼe ui fenei e te apositolo ko Paulo: “Kapau ʼe ʼuluaki maʼu ai te lotolelei, ʼe tali leleiʼi e te ʼAtua ʼo mulimuli ki te meʼa ʼae ʼe maʼu e he tahi, kaʼe mole ki te meʼa ʼae ʼe mole ina maʼu.” (2 Ko. 8:4, 12) ʼE fiafia ia Sehova moka tou foaki he meʼa ʼofa ʼaki he loto lelei, tatau aipe pe ʼe mole lahi.—Mko. 12:42-44; 2 Ko. 9:7.
14. Ka tou lau ia Taʼaga Lea 19:17, kotea te manatu ʼa Sehova moka tou tokoni ki ʼotatou tehina mo tuagaʼane ʼae ʼe tau mo ni fihifihia?
14 Ka tou tokoni ki ʼotatou tehina mo tuagaʼane ʼae ʼe fihifihia, ʼe tou tauhi kia Sehova. Neʼe fakapapau e Sehova ʼe ina tapuakiʼi anai ia te kau Iselaele ʼae ʼe manavaʼofa ki te kau masiva. (Tet. 15:7, 10) Kia Sehova, ka tou tokoni ki he tehina peʼe ko he tuagaʼane ʼe tau mo he fihifihia, ʼe hage pe neʼe foaki he meʼa ʼofa kia te ia. (Lau ia Taʼaga Lea 19:17.) Ohage la neʼe momoli e te kau Kilisitiano ʼo Filipe ia he meʼa ʼofa kia Paulo ʼi te temi ʼae neʼe pilisoni ai. Pea neʼe ui e Paulo neʼe “ko he sakilifisio ʼe magoni pea ʼe tali leleiʼi e te ʼAtua.” (Flp. 4:18) Kotou tokagaʼi ʼokotou tehina mo tuagaʼane ʼo te kokelekasio pea mo kotou feʼekeʼaki pe ko ai ʼae ʼe feala ke kotou tokoni ki ai. ʼE fiafia ia Sehova moka kotou fakaʼaogaʼi tokotou temi, mo tokotou malohi, mo ʼokotou fealagia pea mo ʼokotou koloa, moʼo tokoni kia natou ʼae ʼe tau mo ni fihifihia. Ka kotou fai ia te faʼahi ʼaia, ʼe hage pe ʼe kotou fakahoko takotou tauhi kia Sehova.—Sakp. 1:27.
ʼE TOU FIAFIA ʼUHI KO TE TAUHI MOʼONI
15. He koʼe ʼe mole faigataʼa tatatou fakahoko tatatou tauhi?
15 ʼE ʼaoga he temi mo ni faiga ke tou fakahoko tatatou tauhi. Kae ʼe mole faigataʼa fau. (1 Soa. 5:3) Kotea tona tupuʼaga? He ʼe tou tauhi kia Sehova ʼaki te ʼofa. ʼE hage pe ko he kiʼi tamasiʼi ʼe ina fia foaki he meʼa ki tana tamai. ʼE ina fai he pāki lolotoga ni hola. ʼE mole ina lau te ʼu hola he ʼe ʼofa ʼi tana tamai pea ʼe fiafia ʼi tana foaki te meʼa ʼofa ʼaia ki tana tamai. ʼE toe feia pe mo tatou, ʼe tou ʼoʼofa ia Sehova, koia ʼe tou fiafia ʼi te fakaʼaogaʼi totatou temi mo totatou malohi ki tana tauhi.
16. Ka tou lau ia Hepeleo 6:10, kotea te manatu ʼa Sehova ʼo ʼuhiga mo tatatou faiga ʼae ke tou fakafiafiaʼi tona loto?
16 ʼE iloʼi e te ʼu matuʼā ʼae ʼe lotomahino, ʼe mole feala ke tatau ia te ʼu meʼa ʼofa ʼae ʼe foaki e ʼana fanau. He ʼe mole tatau ia te ʼu fanau. ʼE toe feia pe mo Sehova, ʼe mahino ki ʼotatou aluʼaga ʼo tatou takitokotahi. ʼE lagi lahi age te ʼu gaue ʼe feala ke kotou fai ia natou ʼae ʼe kotou iloʼi pea mo ʼoʼofa ai. Pe ʼe lagi mole kei feala ke kotou fai te ʼu gaue ohage ko te temi muʼa ʼuhi ko te vaivai matuʼa, peʼe ko te mahaki, peʼe ko ʼotatou maʼua fakafamili. Kae ʼaua naʼa kotou lotovaivai. (Kal. 6:4) ʼE mole galo kia Sehova te ʼu gaue ʼae neʼe kotou fai. ʼE fiafia tuʼumaʼu pe Sehova moka kotou gaue fakamalotoloto maʼa ia ʼuhi he ʼe kotou ʼoʼofa ai. (Lau ia Hepeleo 6:10.) ʼE iloʼi e Sehova ia te loto ʼo te tagata takitokotahi, ʼe ina iloʼi te ʼu gaue ʼae ʼe kotou fia fakahoko. Kae ʼe loto ke kotou fiafia ʼi te ʼu gaue ʼae ʼe feala ke kotou fakahoko ʼi tana tauhi.
17. (1) Kotea ʼae ʼe feala ke tou fai mo kapau ʼe tou tokagaʼi ʼe ʼi ai te ʼu meʼa ʼe faigataʼa tatatou fai ʼi tatatou tauhi? (2) Kotea te ʼu manatu ʼi te ʼa takai “ Ke Lahi Age Takotou Fiafia” neʼe ʼaoga kia koutou?
17 Kotea ʼae ʼe feala ke tou fai mo kapau ʼe ʼi ai he ʼu meʼa ʼi tatatou tauhi ʼe faigataʼa hatatou fai, ohage la ko te ako tokotahi peʼe ko te faifakamafola? Neʼe lagi kotou tokagaʼi ka kotou fakahoko te ʼu aluʼaga ʼaia ʼe kotou fiafia pea mo lotomalohi. ʼE feala ke tou fakatatau tatatou tauhi ki he faigaoʼi peʼe ko te faimaholo. Kapau ʼe mole tou fai tuʼumaʼu ʼe mole feala ke tou liliu ʼo faiva. Kae kapau ʼe tou fai ʼi te ʼaho fuli, ʼo tou kamata fai muʼa ʼi he ʼu kiʼi temi siʼi, ʼe fakaalualu leva pea tou tokagaʼi ʼona fua. Pea ʼaki te alu ʼo te temi, kua tou manako leva ki te faʼahi ʼaia. ʼE toe tatau pe mo tatatou tauhi.
18. Kotea te meʼa ʼae ʼe maʼuhiga ʼaupito ʼae ʼe tonu ke tou fai? Pea kotea te ʼu lelei ʼe tou maʼu mai ai?
18 Ko te meʼa ʼae ʼe maʼuhiga ʼaupito ʼi totatou maʼuli, ʼe ko tatatou tauhi kia Sehova mo he loto katoa. Ka tou fai te faʼahi ʼaia ʼe tou maʼuli fiafia pea ʼe feala anai ke tou tauhi kia Sehova ki te heʼe gata. (Taag. 10:22) Kua tokalelei tatatou fakakaukau he ʼe tou tui papau ʼe tokoni ia Sehova ki ʼana kaugana ʼae ʼe tau mo te ʼu faigataʼaʼia. (Esa. 41:9, 10) ʼE tou fiafia ʼi te tauhi kia Sehova, ia ia ʼae ʼe tuha mo “te kololia, mo te fakaʼapaʼapa.”—Apk. 4:11.
KATIKO 24 Tou Hake Ki Te Moʼuga ʼo Sehova
^ Ko Sehova ʼae neʼe ina fakatupu ia meʼa fuli. Koia ʼe tuha mo ia ke tou tauhi kia te ia. ʼE tali e Sehova tatatou tauhi mo kapau ʼe tou fakalogo ki ʼana fakatotonu pea mo maʼuliʼi ʼana pelesepeto. ʼE tou vakaʼi anai ʼi te alatike ʼaeni ia faʼahi ʼe valu ʼe tonu ke tou fai moka tou tauhi kia Sehova. Pea kapau ʼe tou fai ia te ʼu faʼahi ʼaia ʼe tou fiafia anai.