1, 2. ¿Baʼax kʼaʼabéet k-beetik utiaʼal u kʼamik Jéeoba le adoración k-tsʼáaiktiʼoʼ?

 ¿BAʼAX ku taal ta tuukul kéen a wuʼuy le tʼaan adoraciónoʼ? Maʼ xaaneʼ ka máansik ta tuukul juntúul sukuʼun xolokbal orar tiʼ Jéeoba yéetel tuláakal u puksiʼikʼal. Wa maʼ xaaneʼ ku máan ta tuukul junpʼéel familia jach kiʼimak u yóol táan u múul xokikoʼob le Bibliaoʼ.

² Le sukuʼun yéetel le familia tsʼoʼok k-chʼaʼchiʼitikoʼ táan u adorarkoʼob Jéeoba. Chéen baʼaleʼ, ¿ku kʼamik wa Jéeoba le adoración ku tsʼáaikoʼobtiʼoʼ? Jeʼel u kʼamik wa ku beetkoʼob jeʼex uts tu tʼaaneʼ, ku adorarkoʼob tumen u yaabiltmoʼob yéetel tumen ku respetarkoʼob. Toʼoneʼ k-jach yaabiltmaj Jéeoba yéetel k-ojel ku merecertik ka k-adorarte, le oʼolaleʼ k-kʼáat k-meyajt jeʼex uts tu tʼaaneʼ.

3. ¿Baʼax ken k-xakʼalt teʼ xookaʼ?

³ Teʼ xookaʼ yaan k-tʼaan tiʼ bix le adoración tu kʼamaj Jéeoba úuchjeakiloʼ, yéetel yaan k-xakʼaltik ocho baʼaloʼob yaan yil yéetel le adoración ku kʼamik teʼ kʼiinoʼobaʼ. Mientras táan k-xakʼaltikoʼobeʼ maʼalob ka tuukulnakoʼon tiʼ bix jeʼel k-maas maʼalobkíintik le adoración k-tsʼáaiktiʼoʼ. Tu tsʼookeʼ yaan k-ilik baʼaxten le u jaajil adoraciónoʼ ku beetik u kiʼimaktal k-óol.

4. Le máaxoʼob adorart Jéeoba úuchjeakiloʼ, ¿bix tu yeʼesiloʼob u yaabiltmoʼob yéetel ku respetarkoʼob?

⁴ Antes u taal Jesús way Luʼumeʼ yanchaj máakoʼob jeʼex Abel, Noé, Abrahán yéetel Job tu yeʼesoʼob u yaabiltmoʼob Jéeoba yéetel ku respetarkoʼob. ¿Bix tu beetiloʼob? Tu yuʼuboʼob tʼaan, tu yeʼesoʼob yaan u fejoʼob yéetel tu beetoʼob sacrificioʼob. Le Bibliaoʼ maʼ tu yaʼaliktoʼon jach bix tu adorartiloʼob Jéeoba. Chéen baʼaleʼ k-ojleʼ tu beetoʼob tuláakal le ku páajtal utiaʼal u alabarkoʼob le oʼolaleʼ kʼaʼam le adoración ku tsʼáaikoʼoboʼ. Le ka máan tiempoeʼ Dioseʼ tu tsʼáaj u Ley tiʼ u paalal Abrahán. Teʼ Leyoʼ tu yaʼalajtiʼob bix u kʼáat ka adorartaʼak.

5. Le ka tsʼoʼok u kaʼa kuxkíintaʼal Jesúseʼ, ¿bix kʼexpajik le bix u adorartaʼal Jéeobaoʼ?

⁵ Ka tsʼoʼok u kaʼa kuxkíintaʼal Jesúseʼ, Jéeobaeʼ xuʼul u kʼáatik tiʼ u kaajal ka u tsʼoʼokbesoʼob le baʼax ku yaʼalik le Ley tu tsʼáaj tiʼ u paalal Abrahánoʼ (Rom. 10:4). Tu lugar leloʼ, letiʼeʼ tu yaʼalajtiʼob ka u tsʼoʼokbesoʼob «u ley Cristo» (Gál. 6:2). Utiaʼal u tsʼoʼokbeskoʼob le túumben leyaʼ maʼ kʼaʼabéet u kankoʼob de memoriail junpʼéel lista tiʼ le baʼaxoʼob unaj u beetkoʼob wa maʼ unaj u beetkoʼoboʼ. Baʼaxeʼ chéen unaj u seguerkoʼob u ejemplo Jesús yéetel u beetkoʼob le baʼax tu kaʼansoʼ. Teʼ kʼiinoʼobaʼ le máaxoʼob meyajtik Diosoʼ ku yilik u kuxtaloʼob jeʼex Cristoeʼ tumen u kʼáatoʼob lúubul utsil tiʼ Jéeoba yéetel ka yanaktiʼob jeetsʼelil (Mat. 11:29).

6. ¿Bix jeʼel u yáantkoʼon le baʼax ken k-xakʼalt teʼ xookaʼ?

⁶ Mientras táan a xakʼaltik bix a adorartik Jéeobaeʼ tukulte: «¿Bukaʼaj tsʼoʼok in progresar? ¿Jeʼel wa u páajtal in maas maʼalobkíintik bix in adorartik Dioseʼ?». U jaajileʼ maʼ kʼaas u kiʼimaktal a wóol yéetel le bix táan a meyajtik Jéeobaoʼ, chéen baʼaleʼ unaj a kʼáatiktiʼ ka u yáantech a wil bix jeʼel u páajtal a mejorarkeʼ.

7. ¿Bix u yilik Jéeoba le oración k-beetik tiʼ letiʼ yéetel tuláakal k-puksiʼikʼaloʼ?

⁷ K-adorartik Jéeoba kéen orarnakoʼon. Le Bibliaoʼ ku yaʼalikeʼ le oraciónoʼoboʼ beyoʼob jeʼex le incienso maʼalob preparartaʼanil utiaʼal u kʼuʼubul kaʼach teʼ tabernáculo yéetel teʼ templooʼ (Sal. 141:2). Úuchjeakileʼ Jéeobaeʼ jach uts tu tʼaan u yuʼubik u book le inciensooʼ. Bey túun xanoʼ letiʼeʼ uts tu tʼaan u yuʼubik le oraciónoʼob k-beetik tiʼ letiʼ yéetel tuláakal k-puksiʼikʼaloʼ (Pro. 15:8; Deu. 33:10). Yaʼab baʼaxoʼob eʼesiktoʼoneʼ Jéeobaeʼ jach uts tu tʼaan u yuʼubik k-aʼaliktiʼ k-yaabiltmaj yéetel k-tsʼáaik gracias tiʼ yoʼolal le baʼaxoʼob ku beetik t-oʼolaloʼ. Tsʼoʼoleʼ uts tu tʼaan xan ka k-aʼaltiʼ baʼax k-tsʼíiboltik, baʼax chiʼichnakkúuntikoʼon yéetel baʼax k-páaʼtik ka u beet t-oʼolal. Le oʼolaleʼ antes k-orareʼ maʼalob ka k-tukult tubeel baʼax ken k-aʼaltiʼ. Wa k-beetik beyoʼ bey jeʼex ka k-kʼub tiʼ Jéeoba junpʼéel «incienso» maʼalob beetaʼanileʼ.

8. ¿Baʼax ku páajtal k-beetik teʼ kʼaʼaytajoʼ?

⁸ K-adorartik Jéeoba kéen k-alabarte (Sal. 34:1). ¿Bix k-alabartik Jéeoba? K-beetik le kéen tʼaanakoʼon tiʼ le jatsʼuts modos yaantiʼoʼ bey xan tiʼ le baʼaxoʼob u beetmoʼ, lelaʼ junpʼéel baʼal ku síijil tu puksiʼikʼal máak. Wa k-jóoʼsik tiempo utiaʼal k-tuukul tiʼ le baʼaxoʼob tsʼoʼok u beetik Jéeoba t-oʼolaloʼ mantatsʼ ken k-alabarte. Teʼ kʼaʼaytajoʼ ku meyajtoʼon k-chiʼ utiaʼal k-alabartik, «lelaʼ bey junpʼéel sacrificio» k-kʼubik tiʼ letiʼeʼ (Heb. 13:15). Antes k-orar tiʼ Jéeobaeʼ kʼaʼabéet k-tuklik tubeel baʼax ken k-aʼale, leloʼ bey xan unaj k-beetik le táan k-líiʼsikba utiaʼal k-táakpajal teʼ kʼaʼaytajoʼ. Toʼoneʼ k-kʼáat k-alabart Jéeoba le u maas maʼalobil ku páajtaleʼ, le oʼolaleʼ kéen kʼaʼaytajnakoʼon tiʼ le máakoʼoboʼ k-beetik yéetel tuláakal k-puksiʼikʼal.

9. ¿Baʼax utsil ku jóoʼsik u kaajal Jéeoba u bin teʼ muchʼtáambaloʼoboʼ, yéetel baʼax utsil tsʼoʼok u taasik tiʼ teech?

 ⁹ K-adorartik Jéeoba kéen xiʼikoʼon teʼ muchʼtáambaloʼoboʼ. Úuchjeakileʼ aʼalaʼab tiʼ le israelitaʼoboʼ: «Tuláakal le xiiboʼoboʼ unaj u binoʼob tu táan Jéeoba a Dios óoxtéen ichil junpʼéel año teʼ lugar ken u yéey[oʼ]» (Deu. 16:16). Utiaʼal u beetkoʼob lelaʼ kʼaʼabéetchaj u pʼatik u yotochoʼob bey xan u luʼumoʼob. Chéen baʼaleʼ Jéeobaeʼ tu yaʼalajtiʼob: «Le kéen xiʼikeʼex óoxtéen tiʼ cada año tu táan Jéeobaeʼ mix máak ken u tsʼíibolt le luʼum tuʼux kajakbaleʼexoʼ» (Éxo. 34:24). Le israelitaʼoboʼ jach yaan u fejoʼob kaʼach tiʼ Jéeoba, le oʼolaleʼ ku binoʼob tiʼ tuláakal le fiestaʼoboʼ. Kéen xiʼikoʼobeʼ ku maas naʼatkoʼob baʼax ku yaʼalik u Tʼaan Dios, ku tuukuloʼob tiʼ le utsil ku yeʼesaʼaltiʼoboʼ yéetel ku páajtal u múul líiʼsik u yóoloʼob yéetel uláakʼ máaxoʼob meyajtik Jéeoba (Deu. 16:15). Bejlaʼeʼ letiʼe utsiloʼob ku taasiktoʼon xan k-bin teʼ muchʼtáambaloʼoboʼ. Jéeobaeʼ jach ku kiʼimaktal u yóol kéen u yil k-líiʼsmakba maʼalob utiaʼal k-comentar.

10. ¿Baʼaxten le kʼaayoʼ táakaʼan ichil le adoración k-tsʼáaik tiʼ Jéeobaoʼ?

¹⁰ K-adorartik Jéeoba kéen múul kʼaaynakoʼon yéetel le sukuʼunoʼoboʼ (Sal. 28:7). Le israelitaʼoboʼ suuk kaʼach u kʼaayoʼob utiaʼal u adorarkoʼob Jéeoba. Por ejemploeʼ rey Davideʼ tu tsʼáaj 288 levitaʼob utiaʼal u kʼaayoʼob teʼ templooʼ (1 Cró. 25:1, 6-8). Teʼ kʼiinoʼobaʼ jeʼel u páajtal k-eʼesik tiʼ Jéeoba k-yaabiltmaj le kéen múul kʼaaynakoʼon yéetel le sukuʼunoʼoboʼ. Utiaʼal k-kʼaay tiʼ Jéeobaeʼ maʼ tsaaj jach táaj jatsʼuts k-voziʼ. Lelaʼ jeʼel u páajtal k-ketik yéetel le baʼax ku yúuchul kéen tʼaanakoʼonoʼ. Maʼ u tuʼubultoʼoneʼ kéen tʼaanakoʼoneʼ «k-tʼóochpajal yaʼab u téenel», chéen baʼaleʼ kex beyoʼ maʼ tu xuʼulul k-tʼaan teʼ múuchʼuliloʼ mix teʼ kʼaʼaytajoʼ (Sant. 3:2). Bey túun xanoʼ kex maʼ jach jatsʼuts k-vozeʼ unaj k-kʼaay utiaʼal k-alabartik Jéeoba.

11. Jeʼex u yaʼalik Salmo 48:13, ¿baʼaxten kʼaʼabéet k-jóoʼsik tiempo utiaʼal k-xokik le Biblia yéetel k-familiaoʼ?

¹¹ K-adorartik Jéeoba kéen k-xok u Tʼaan yéetel kéen k-áant k-paalal u kʼaj óoltoʼob. Cada sábadoeʼ le israelitaʼoboʼ yaantiʼob kaʼach u oportunidadil u jeʼeleloʼob utiaʼal u yantaltiʼob tiempo u maas biskubaʼob yéetel Jéeoba (Éxo. 31:16, 17). Le israelitaʼob chúukpaj u yóoloʼoboʼ tu yáantaj u paalaloʼob u kʼaj óoltoʼob Jéeoba yéetel u yiloʼob u yutsil. Teʼ kʼiinoʼobaʼ toʼon xaneʼ jach kʼaʼabéet k-jóoʼsik tiempo utiaʼal k-xakʼalxoktik u Tʼaan Dios. Lelaʼ táakaʼan ichil le adoración k-tsʼáaiktiʼoʼ yéetel ku yáantkoʼon utiaʼal k-maas náatsʼal tu yiknal (Sal. 73:28). Tsʼoʼoleʼ le kéen xooknakoʼon yéetel k-familiaeʼ k-áantik k-paalal utiaʼal ka u bisubaʼob maʼalob yéetel le k-Taata yaan teʼ kaʼanoʼ (xok Salmo 48:13).

12. ¿Bix tu yilil Jéeoba le meyaj tu beetaj le máaxoʼob beet u nuʼukuliloʼob le tabernáculooʼ, yéetel baʼax ku kaʼansiktoʼon?

¹² K-adorartik Jéeoba kéen k-beet lugaroʼob utiaʼal k-adorartik bey xan kéen k-tsʼáa mantenimiento tiʼob. Le Bibliaoʼ ku yaʼalikeʼ Jéeobaeʼ tu yilaj bey junpʼéel meyaj santo le u beetaʼal le tabernáculo yéetel u nuʼukuliloʼoboʼ (Éxo. 36:1, 4). Teʼ kʼiinoʼobaʼ bey xan u yilik le u beetaʼal le lugaroʼob utiaʼal u adorartaʼaloʼ. Yaan sukuʼunoʼobeʼ yaʼab tiempo ku jóoʼskoʼob utiaʼal u apoyarkoʼob le meyajoʼob beyaʼ. ¿Máasaʼ jach k-agradecertik le meyaj ku beetkoʼoboʼ? Chéen baʼaleʼ kex beyoʼ le sukuʼunoʼobaʼ ku jóoʼskoʼob xan tiempo utiaʼal u kʼaʼaytajoʼob. Maʼ xaaneʼ hasta jujuntúul tiʼ letiʼobeʼ ku tsʼíiboltik u beetik u precursoriloʼob. Wa le ancianoʼob ku yilkoʼob jeʼel u páajtal u beetkoʼoboʼ maʼalob ka u apoyartoʼob, beyoʼ ku yeʼeskoʼob ku apreciarkoʼob le meyaj ku beetkoʼob tiʼ construcciónoʼ. Chéen baʼaleʼ kex wa óoliʼ mix baʼal k-ojel tiʼ construccióneʼ tuláakloʼon jeʼel u páajtal k-áantaj utiaʼal u pʼáatal  limpioil yéetel jatsʼuts le lugaroʼob tuʼux k-adorartik Jéeobaoʼ.

13. ¿Baʼaxten unaj k-tsʼáaik k-donaciónoʼob utiaʼal u kʼaʼaytaʼal le Reinooʼ?

¹³ K-adorartik Jéeoba kéen k-tsʼáa k-donaciónoʼob utiaʼal u kʼaʼaytaʼal le Reinooʼ. Le israelitaʼob kaʼachoʼ maʼ unaj u binoʼob pikʼil kʼabil tu táan Jéeobaiʼ (Deu. 16:16). Baʼaxeʼ unaj u bisik u kʼuboʼob tiʼ Jéeoba junpʼéel ofrenda según le bukaʼaj ku páajtal u tsʼáaikoʼoboʼ. Kéen u beetoʼob beyoʼ ku yeʼeskoʼob tiʼ Jéeoba ku tsʼáaikoʼob u graciasil le baʼaxoʼob ku beetaʼal tu yoʼolaloʼoboʼ. Kux túun toʼon, ¿bix jeʼel u páajtal k-eʼesik tiʼ Jéeoba k-yaabiltmaj yéetel k-tsʼáaik gracias tiʼ yoʼolal tuláakal le baʼaxoʼob ku beetik t-oʼolaloʼ? Junpʼéel bixeʼ letiʼe k-tsʼáaik k-donaciónoʼob utiaʼal le múuchʼulil yéetel le obra mundialoʼ. Le apóstol Pablooʼ tu yaʼalaj: «Wa tu puksiʼikʼal máak ku síijil u tsʼáaik wa baʼaxeʼ, lelaʼ jach ku lúubul utsil tiʼ Dios, tumen Dioseʼ uts tu tʼaan ka u tsʼáa máak le baʼax ku páajtal u tsʼáaikoʼ, maʼ le baʼax maʼ tu páajtal u tsʼáaikoʼ» (2 Cor. 8:4, 12). Jéeobaeʼ jach ku kiʼimaktal u yóol u yilik k-tsʼáaik le bukaʼaj ku síijil t-puksiʼikʼaloʼ (Mar. 12:42-44; 2 Cor. 9:7).

14. Jeʼex u yaʼalik Proverbios 19:17, ¿bix u yilik Jéeoba le áantaj k-tsʼáaik tiʼ le sukuʼunoʼoboʼ?

¹⁴ K-adorartik Jéeoba kéen k-áant le sukuʼunoʼoboʼ. Jéeobaeʼ tu prometertaj u bendecirtik le israelitaʼob wa ku yáantkoʼob le máaxoʼob óotsiloʼoboʼ (Deu. 15:7, 10). Cada ken k-áant juntúul sukuʼuneʼ Jéeobaeʼ ku yilik bey tiʼ letiʼ k-eʼesik k-utsileʼ (xok Proverbios 19:17). Por ejemploeʼ le sukuʼunoʼob kajaʼanoʼob kaʼach Filiposoʼ le ka tu túuxtoʼob jujunpʼéel baʼaloʼob tiʼ Pabloeʼ letiʼeʼ tu yaʼaleʼ le baʼax túuxtaʼabtiʼoʼ bey junpʼéel kʼambeʼen sacrificio jach uts tu tʼaan Dioseʼ (Fili. 4:18). Toʼoneʼ maʼalob xan ka tuukulnakoʼon tiʼ le kʼáatchiʼaʼ: «¿Yaan wa máax jeʼel u páajtal in wáantik teʼ múuchʼuliloʼ?». Jéeobaeʼ jach ku kiʼimaktal u yóol u yilik u meyajtoʼon k-tiempo, k-muukʼ, le baʼaxoʼob yaantoʼon yéetel le baʼaxoʼob k-ojel utiaʼal k-áantik u maasiloʼ tumen leloʼ táakaʼan ichil le adoración k-tsʼáaiktiʼoʼ (Sant. 1:27).

15. ¿Baʼaxten kiʼimak k-óol u meyajtoʼon k-tiempo yéetel k-muukʼ utiaʼal k-adorartik Jéeoba?

¹⁵ Utiaʼal k-adorartik Jéeoba jeʼex uts tu tʼaaneʼ kʼaʼabéet k-xupik k-tiempo yéetel k-muukʼ, chéen baʼaleʼ toʼoneʼ kiʼimak k-óol k-beetik (1 Juan 5:3). ¿Baʼaxten? Tumen k-yaabiltmaj. Koʼoneʼex tuukul tiʼ juntúul chan paal taak u beetik junpʼéel dibujo u síi tiʼ u taata. Maʼ xaaneʼ yaan u bisiktiʼ yaʼab tiempo, chéen baʼaleʼ kiʼimak u yóol u beetik tumen u yaabiltmaj u taata. Bey túun xanoʼ tumen k-yaabiltmaj Jéeobaeʼ kiʼimak k-óol u meyajtoʼon k-tiempo yéetel k-muukʼ utiaʼal k-adorartik.

16. Jeʼex u yaʼalik Hebreos 6:10, ¿bix u yilik Jéeoba le baʼaxoʼob ka beetik tu yoʼolaloʼ?

¹⁶ Le taatatsiloʼob u yaabiltmoʼob u paalaloʼoboʼ maʼ tu páaʼtkoʼob ka u beetoʼob junpʼéeliliʼ baʼal, tumen u yojloʼobeʼ cada juntúul paaleʼ jelaʼan yéetel maʼ junpʼéeliliʼ baʼax ku páajtal u beetkoʼobiʼ. Bey túun xanoʼ le k-Taata yaan teʼ kaʼanoʼ u yojel maʼ junpʼéeliliʼ baʼal ku páajtal k-beetkiʼ. Por ejemploeʼ techeʼ maʼ xaaneʼ maas yaʼab baʼaloʼob ku páajtal a beetik ke u maas yaʼabil a amigoʼob. Chéen baʼaleʼ maʼ xaan xaneʼ maʼ tu páajtal a beetik yaʼab baʼaloʼob tumen tsʼoʼok u chan yantal a jaʼabil, kʼojaʼanech wa tumen yaantech uláakʼ responsabilidad ichil a familia. Wa bey u yúuchultechoʼ maʼ u lúubul a wóol (Gál. 6:4). Jéeobaeʼ maʼ ken u tuʼubs le baʼax ka beetkoʼ. Letiʼeʼ yaan u kiʼimaktal u yóol wa ka tsʼáaiktiʼ le u maas maʼalobil ku páajtaloʼ yéetel ka beetik  tumen a yaabiltmaj (xok Hebreos 6:10). Jéeobaeʼ ku yilik le baʼax yaan ichil a puksiʼikʼaloʼ. Letiʼeʼ u kʼáat ka kiʼimakchajak a wóol yéetel le adoración ka tsʼáaiktiʼoʼ.

17. 1) ¿Baʼax jeʼel u yáantkoʼon wa yaan tiʼ le baʼaxoʼob táakaʼan ichil le adoración k-tsʼáaik tiʼ Jéeoba ku talamtal k-beetkoʼ? 2) ¿Tsʼoʼok wa u yáantkech junpʼéel tiʼ le baʼaxoʼob ku chíikpajal teʼ cuadro « Bix jeʼel u maas kiʼimaktal k-óoleʼ»?

¹⁷ ¿Kux túun wa yaan tiʼ le baʼaxoʼob táakaʼan ichil le adoración k-tsʼáaik tiʼ Jéeoba ku talamtal k-beetkoʼ? Maʼ xaaneʼ yaan k-tsʼáaik cuentaeʼ mientras maas k-jóoʼsik tiempo utiaʼal k-beetkeʼ maas yaan k-disfrutartik yéetel maas yaan k-jóoʼsik u yutsil. Koʼoneʼex ketik yéetel le baʼax ku yúuchul kéen káajak u beetik máak ejercicio wa kéen káajak u paxik junpʼéel instrumentooʼ. Wa chéen wa baʼax kʼiin ku beetik máakeʼ maʼ xaaneʼ maʼ kun mejorar, chéen baʼaleʼ wa ku beetik sáamsamaleʼ maas yaʼab utsil ken u taastiʼ, kex maʼ xaaneʼ tu káajbaleʼ chéen junpʼíit tiempo ku dedicartiktiʼ. Wa ku suuktal tiʼ máak u beetkeʼ maʼ xaaneʼ hasta yaan u tsʼíiboltik u kʼuchul u súutukil utiaʼal u beetik. ¿Máasaʼ bey xan unaj k-beetik yéetel le baʼaloʼob táakaʼan ichil le adoración k-tsʼáaik tiʼ Jéeobaoʼ?

18. ¿Baʼax maas maʼalob jeʼel u páajtal k-beetik yéetel k-kuxtaleʼ, yéetel baʼax utsil ku taasiktoʼon?

¹⁸ Le baʼax maas maʼalob jeʼel u páajtal k-beetkoʼ letiʼe k-adorartik Jéeoba yéetel tuláakal k-puksiʼikʼaloʼ. Wa k-beetik beyoʼ yaan u kiʼimaktal k-óol, yaan u yantal u biilal k-kuxtal yéetel yaan u páajtal k-adorartik Jéeoba utiaʼal mantatsʼ (Pro. 10:22). U jaajileʼ desde bejlaʼeʼ kiʼimak k-óol, tumen k-ojel Jéeobaeʼ táan u yáantkoʼon utiaʼal k-aktáantik tuláakal le problemas ku yantaltoʼonoʼ (Isa. 41:9, 10). Jeʼex tsʼoʼok k-ilkoʼ yaʼab baʼax oʼolal unaj u kiʼimaktal k-óol ikil k-adorartik Jéeoba, le máax ku merecertik ka alabartaʼak yéetel ka respetartaʼakoʼ (Apo. 4:11).