ARTÍCULO DE ESTUDIU 13
Riuʼnu nayecheʼ ora runi adorarnu Jehová
«Jehová Dios stidu, lii nga runi merecerluʼ guicaaluʼ gloria, honra ne poder» (APOC. 4:11).
CANCIÓN 31 Guzané Dios guiráʼ dxi
NI ZAZÍʼDINU *
1, 2. ¿Xi caquiiñeʼ gúninu para guicaa Dios adoración stinu?
¿XI RINÍʼ íqueluʼ ora runadiágaluʼ diidxaʼ adoración? Zándaca guiníʼ íqueluʼ zuxibi ti hermanu cueʼ cama stiʼ ne cayuni orar Jehová de guidubi ladxidóʼ. O guiníʼ íqueluʼ nayecheʼ cayuni estudiar ti familia Biblia.
2 Lu guiropaʼ ejemplu ni bizéʼtenu riʼ, cayuni adorárcabe Jehová. Zacaa Jehová adoración stícabe pa gúnicabe ni modo racalaʼdxiʼ ne gúnicabe ni né respetu ne guendarannaxhii. Cumu guizáʼ nadxiinu Jehová la? ne nánnanu laasibe nga naquiiñeʼ guni adorarnu, nga runi racaláʼdxinu guni adorarnu laabe jneza ne modo riuuláʼdxibe.
3. ¿Xi zadúʼyanu lu artículo riʼ?
3 Lu artículo riʼ zadúʼyanu modo gunabaʼ Jehová guni adorárcabe laa dxiqué. Ne zadúʼyanu xhono modo rinábabe laanu guni adorarnu laabe tiempu riʼ. Ne ra guni estudiarnu ca ni la? guiníʼ íquenu ximodo zanda guni adorarnu Jehová jma jneza. Laaca zadúʼyanu xiñee riuʼnu nayecheʼ ora runi adorarnu Jehová.
MODO GUNABAʼ JEHOVÁ GUNI ADORÁRCABE LAA DXIQUÉ
4. Ante gueeda Jesús, ¿ximodo bisihuinni ca xpinni Jehová nadxiicaʼ laabe ne runi respetarcaʼ laabe?
4 Ante gueeda Jesús lu Guidxilayú, bisihuinni Abel, Noé, Abrahán ne Job runi respetarcaʼ ne nadxiicaʼ Jehová. ¿Ximodo bíʼnicabe ni yaʼ? Ra bizuubacabe diidxaʼ, ra bisihuínnicabe fe ne ra bíʼnicabe sacrificiu. Qué riete diʼ lu Biblia ximodo peʼ biʼniʼ adorárcabe Jehová. Peru nánnanu bíʼnicabe stipa gusisácabe laabe ne gucuaa Jehová adoración stícabe. Gudiʼdiʼ si tiempu bidii Dios Ley stiʼ Moisés, ca binni ni zá de Abrahán. Lu Ley que bidiibe laacaʼ instrucción ximodo racaláʼdxibe gaca adorarbe.
5. ¿Ximodo bidxaa modo raca adorar Jehová despué de guti Jesús ne biasa de lade gueʼtuʼ?
5 Despué de guti Jesús ne biasa de lade gueʼtuʼ, qué ninabaʼ Jehová guidxi stiʼ chinanda Ley stiʼ Moisés (Rom. 10:4). Lugar de nga la? maʼ naquiiñeʼ chinándacabe «ley stiʼ Cristu» (Gál. 6:2). Cumu qué gapa ley riʼ ti lista de xi naquiiñeʼ gúnicabe ne xi cadi naquiiñeʼ gúnicabe la? nga runi cadi naquiiñeʼ guiaananécabe ni de memoria, sínuque naquiiñeʼ chinándacabe ejemplu stiʼ Jesús ne guiráʼ ni bisiidiʼ. Tiempu riʼ, runi ca xpinni Cristu stipa chinándacaʼ ejemplu stiʼ Cristu para gusiéchecaʼ Jehová ne gatadxí ladxidoʼcaʼ (Mat. 11:29).
6. ¿Ximodo zanda gacané artículo riʼ laanu?
6 Ora guiníʼ íqueluʼ modo runi adorarluʼ Jehová guníʼ ique ca pregunta riʼ: «¿Pabiáʼ maʼ bineʼ progresar? ¿Ñee zanda guneʼ adorar Dios jma jneza la?». Galán nga chuʼluʼ nayecheʼ né biaʼ maʼ biʼniʼ progresarluʼ, peru laaca zanda guinábaluʼ Jehová gacané lii gúʼyaluʼ paraaruʼ zanda guchaaluʼ.
¿GUNÁʼ NGA CA MODO RUNI ADORARNU JEHOVÁ?
7. ¿Ximodo ruuyaʼ Jehová ca oración ni rúninu de guidubi ladxidoʼno?
7 Runi adorarnu Jehová ora runi orarnu laa. Ruchaaga Stiidxaʼ Dios ca oración ni rúninu né inciensu ni guca preparar né stale cuidadu para iquiiñeʼ ndaaniʼ tabernáculo ne despué ndaaniʼ templu (Sal. 141:2). Nabé rindaʼ naxhi inciensu que ne guyuulaʼdxiʼ Dios ni. Zaqueca nga zeeda gaca ca oración ni rúninu de guidubi ladxidoʼno, riuulaʼdxiʼ Jehová ca ni ne cadi guiníʼ íquenu caquiiñeʼ iquiiñenu diidxaʼ nagana para chuuláʼdxibe ca ni (Prov. 15:8; Deut. 33:10). Nuu stale cosa ni rucaa laanu guni crenu riuulaʼdxiʼ Jehová gábinu laa pabiáʼ nadxiinu laa ne rudiʼnu xquixe peʼ laa. Ne racaláʼdxibe gábinu laabe xi naguu xizaa laanu, xi racaláʼdxinu gúninu ne xi esperanza nápanu. Nga runi ante guni orarnu, galán guiníʼ íquenu xi racaláʼdxinu gábinu Jehová. Pa gúninu ni casi ñaca cudiʼnu Bixhózenu ni nuu guibáʼ inciensu ni jma galán.
8. ¿Ximodo zanda gusisácanu Dios?
8 Runi adorarnu Jehová ora rusisácanu laa (Sal. 34:1). ¿Ximodo rusisácanu laabe yaʼ? Rúninu ni ora rininu de ca cualidad sicarú ni nápabe ne de ca cosa ni maʼ bíʼnibe. Ne de ndaaniʼ ladxidoʼbe nga riale gúninu ni purtiʼ rudiʼnu xquixe peʼ laabe. Pa cueenu tiempu para guiníʼ íquenu pabiáʼ nachaʼhuiʼ Jehová né laanu pur guiráʼ cosa galán ni maʼ bíʼnibe pur laanu, qué ziaanadxinu de gusisácanu laabe. Ora runi predicarnu rusisácanu Dios «casi ñaca nudiʼnu ti sacrificiu, laani nga ra iquiiñenu ruaanu para guinínenu binni» (Heb. 13:15). Cásica dede ante riníʼ íquenu xi chitídxinu Jehová ora runi orarnu laa, zaqueca nga naquiiñeʼ cueenu tiempu para guiníʼ íquenu xi chitídxinu binni ora guni predicarnu laa. Nga runi racaláʼdxinu gusisácanu Dios casi ñaca nudiʼnu laa ti sacrificiu ni jma galán. Ora runi predicarnu binni rininu ni nuu ndaaniʼ ladxidoʼno.
9. ¿Xi ribeendú xquidxi Jehová ora rié reunión, ne ximodo huayacané ca reunión ca lii?
9 Runi adorarnu Jehová ora riuunu reunión. Ndiʼ nga mandatu gucuaa ca israelita dxiqué: «Chonna biaje lu ti iza, naquiiñeʼ cheʼ guiráʼ hombre nezalú Jehová Dios stiluʼ lugar ra cuibe» (Deut. 16:16). Gupa xidé bisaanacabe lídxicabe ne layú stícabe sin chuʼ tu gapa ca ni. Ndiʼ nga promesa biʼniʼ Jehová laacabe: «Guirutiʼ zacalaʼdxiʼ guicaa layú stiluʼ ora cheluʼ nezalú Jehová, Dios stiluʼ» (Éx. 34:24). Rié ca israelita que ca saa ni raca guiráʼ iza para Jehová sin cuʼ xaíquecaʼ ca cosa sticaʼ. Ribeendúcabe stale cosa ni galán, riene chaahuicabe ley stiʼ Dios, riníʼ íquecabe pabiáʼ nachaʼhuiʼ ne riuucabe gana ora riniʼnécabe xcaadxi xpinni Jehová (Deut. 16:15). Laanu laaca ribeendunu stale cosa galán ora riuunu reunión. Ne nánnanu guizáʼ riecheʼ Jehová ora riuunu reunión ne runi prepararnu ti comentariu galán ne ni cadi ziuulaʼ.
10. ¿Xiñee nabé risaca guidúʼndanu para guni adorarnu Jehová?
10 Runi adorarnu Jehová ora ridúʼndanenu ca hermanu stinu canción para laabe (Sal. 28:7). Nabé risaca para ca israelita que gúʼndacaʼ para guni adorarcaʼ Jehová. Dxiqué la? biʼniʼ mandar rey David chuʼ 288 levita para gúʼndacaʼ ndaaniʼ templu que (1 Crón. 25:1, 6-8). Tiempu riʼ, laaca rusihuínninu pabiáʼ nadxiinu Jehová ora ridúʼndanu canción para gusisácanu laa, gastiʼ naca pa cadi galán ridúʼndanu. Guníʼ ique ndiʼ, ora rininu «guiranu rucheʼnu stale biaje» peru qué rucueeza diʼ ni laanu de guininu lu ca reunión ca ne ora guni predicarnu (Sant. 3:2). Nga runi cadi guiníʼ íquenu cumu qué ridúʼndanu galán la? maʼ qué zadúʼndanu para Jehová.
11. Casi ná Salmo 48:13, ¿xiñee naquiiñeʼ cueenu tiempu para guni estudiárnenu familia stinu?
11 Runi adorarnu Jehová ora runi estudiarnu Biblia ne rusíʼdinu ca xiiñinu de laabe. Guiráʼ sábadu, rusaana ca israelita que dxiiñaʼ ni rúnicaʼ ne riquiiñecaʼ dxi que para chuʼcaʼ gaxha de Jehová (Éx. 31:16, 17). Rusiidiʼ ca israelita que ca xiiñicaʼ de Jehová ne pabiáʼ nacháʼhuibe. Laanu laaca naquiiñeʼ cueenu tiempu para guidúʼndanu ne guni estudiarnu Stiidxaʼ Dios. Laaca cayuni adorarnu Jehová ora rúninu ni ne racané ni laanu chuʼnu jma gaxha de laabe (Sal. 73:28). Ne ora runi estudiárnenu familia stinu racanenu ca xiiñinu gaca xhamígucaʼ Bixhózenu ni nuu guibáʼ (biindaʼ Salmo 48:13).
12. ¿Ximodo biiyaʼ Jehová dxiiñaʼ ni biʼniʼ ca xpinni dxi bíʼnicaʼ ca dxiiñaʼ stiʼ tabernáculo que, ne xi rusiidiʼ ni laanu?
12 Runi adorarnu Jehová ora racanenu cuiʼ lugar ra runi adorarnu laabe ne ora rudiʼnu ca ni mantenimientu. Biblia ná dxiiñaʼ ni guca dxi gurí tabernáculo que ne ca cosa ni guca para iquiiñeʼ ndaaniʼ ni gúcani ti dxiiñaʼ santo (Éx. 36:1, 4). Tiempu riʼ, ora racanenu cuiʼ Yoo stiʼ Reinu o ca lugar ra runi adorarnu Jehová nácani serviciu sagradu o ti dxiiñaʼ ni cayúninu ni para laabe. Nuu hermanu guizáʼ rigacané lu dxiiñaʼ riʼ. Ne guizáʼ rudiʼnu xquixe peʼ laacabe pur rigacanécabe lu dxiiñaʼ stiʼ Reinu. Peru laaca ribeecabe tiempu para guni predicárcabe. Dede nuu de laacabe racalaʼdxiʼ gaca precursor. Laaca racané ca ancianu ca lu dxiiñaʼ de construcción ora rudiicaʼ lugar gaca ca hermanu riʼ precursor pa ruchacaʼ ca requisitu ca. Pa nánnanu dxiiñaʼ de construcción o coʼ guiranu zanda gacanenu chuʼ ca lugar riʼ nayá ne gápanu ca ni.
13. ¿Ximodo naquiiñeʼ guidúʼyanu ca donación ni rudiʼnu para gacanenu gaca dxiiñaʼ stiʼ Reinu?
13 Runi adorarnu Jehová ora rudiʼnu donación para gaca dxiiñaʼ stiʼ Reinu. Ley que ná cadi naquiiñeʼ cheʼ ca israelita que nezalú Jehová xiee nacaʼ (Deut. 16:16). Naquiiñeʼ chinécabe ti ofrenda biaʼ zanda gudiicabe, zaqué zusihuínnicabe rudiicabe xquixe peʼ Dios pur guiráʼ ca ndaayaʼ ni rudii laacabe. Yanna laanu yaʼ, ¿ximodo zanda gusihuínninu nadxiinu Jehová ne rudiʼnu xquixe peʼ laa pur ca ndaayaʼ ni rudii laanu? Ti modo zanda gúninu ni nga ra gudiʼnu donación biaʼ zanda para congregación stinu ne para obra mundial. Sicaríʼ bisiene apóstol Pablo ni: «Riuulaʼdxiʼ Dios guicaa ni gudii binni de guidubi ladxidóʼ, purtiʼ ribézabe gudii binni biaʼ zanda gudii ne cadi ni qué zanda gudii» (2 Cor. 8:4, 12). Rusisaca Jehová ca donación ni rudiʼnu de guidubi ladxidoʼno neca huaxiéʼ ni (Mar. 12:42-44; 2 Cor. 9:7).
14. Casi ná Proverbios 19:17, ¿ximodo ruuyaʼ Jehová ora racanenu ca hermanu ni cadiʼdiʼ lu xiixa guendanagana?
14 Runi adorarnu Jehová ora racanenu ca hermanu ni cadiʼdiʼ lu xiixa guendanagana. Guníʼ Jehová zaguu ndaayaʼ ca israelita ni gacané ca binni pobre (Deut. 15:7, 10). Cada biaje gacanenu ti hermanu ni cadiʼdiʼ lu guendanagana para Jehová casi ñaca cudiʼnu laa ti regalu (biindaʼ Proverbios 19:17). Guzéʼtenu ti ejemplu, biseendaʼ ca xpinni Cristu de Filipos ti regalu para Pablo dxi deguyoo ne laa guníʼ naca regalu ca ti sacrificiu ni ricaa Dios ne ni riuulaʼdxiʼ (Filip. 4:18). Zanda guiníʼ íquenu ndiʼ: «¿Tu hermanu de congregación stinneʼ zanda gacaniáʼ?». Riuulaʼdxiʼ Jehová iquiiñenu tiempu stinu, stipa stinu, ca cosa ni nánnanu gúninu ne ca cosa risaca ni nápanu para gacanenu ca hermanu ni caquiiñeʼ ni. Para laabe la? nácani parte de adoración ni rudiʼnu laabe (Sant. 1:27).
RIUʼNU NAYECHEʼ ORA RUNI ADORARNU JEHOVÁ
15. ¿Xiñee qué raca nagana para laanu iquiiñenu tiempu ne stipa stinu para guni adorarnu Jehová?
15 Caquiiñeʼ iquiiñenu tiempu stinu ne stipa stinu pa racaláʼdxinu guni adorarnu Jehová modo riuulaʼdxiʼ. Ne cadi nagana para gúninu ni (1 Juan 5:3). ¿Xiñee coʼ yaʼ? Purtiʼ nadxiinu laabe. Guiníʼ íquenu racalaʼdxiʼ ti xcuidihuiiniʼ gusigaʼdeʼ ti dibuju bixhoze. Zándaca guindaabe para gúnibe ni. Peru qué raca ni nagana para laabe purtiʼ nadxiibe bixhózebe ne racaláʼdxibe gudiibe laa dibuju ca. Zaqueca nga laanu, cumu nadxiinu Jehová la? riéchenu iquiiñenu tiempu ne stipa stinu para guni adorarnu laa.
16. Casi ná Hebreos 6:10, ¿ximodo ruuyaʼ Jehová stipa ni rúninu pur gusiéchenu laa?
16 Ca padre ni nadxii ca xiiñiʼ, qué ribézacaʼ gudiicabe laacaʼ ti tipu si regalu nánnacaʼ gadxé gadxé nga ca xiiñicaʼ. Zaqueca nga Bixhózenu ni nuu guibáʼ, riénebe ximodo nuu cada tobi de laanu. Zándaca zúniluʼ jma lu xhiiñaʼ Jehová que ca xhamíguluʼ. O zándaca qué ganda gúniluʼ jma biaʼ ñuuláʼdxiluʼ ñúniluʼ purtiʼ maʼ huaniisiluʼ, maʼ huaraluʼ o naquiiñeʼ gacaneluʼ familia stiluʼ. Peru cadi guireeluʼ gana (Gál. 6:4). Qué zusiaandaʼ Jehová guiráʼ ni gúniluʼ pur laa. Pa gúniluʼ ni nabe purtiʼ nadxiiluʼ laabe la? guizáʼ ziuube nayecheʼ (biindaʼ Hebreos 6:10). Nanna Jehová xi nuu ndaaniʼ ladxidoʼloʼ. Ne racaláʼdxibe chuʼnu nayecheʼ né biaʼ zanda gúninu lu xhiiñabe.
17. a) ¿Xi zanda gúninu pa raca nagana para laanu gápanu estudiu personal o guni predicarnu? b) ¿Ñee huayacané tobi de ca cosa ni zeeda lu cuadru ni láʼ « Ximodo chuʼnu jma nayecheʼ» lii la?
17 Yanna, ¿xi zanda gúninu pa raca nagana para laanu gápanu estudiu personal stinu o guni predicarnu yaʼ? Ra jma cueenu tiempu para gúninu ni jma ziuuláʼdxinu ni ne jma zacaneni laanu. Zanda guchaaganu estudiu personal stinu o guni predicarnu casi guizíʼdinu guxhídxinu ti instrumentu, pa ti biaje si gúninu ni la? zándaca qué zazíʼdinu nagueenda. Peru pa gúninu ni guiráʼ dxi neca caadxi ne despué cueenu jma tiempu para gúninu la? zabeendunu stale cosa galán. Ne ra tidiʼ tiempu, dede maʼ racaláʼdxinu guedandá hora para gúninu ca ni. Zaqueca nga naquiiñeʼ gúninu né adoración ni rudiʼnu Jehová.
18. ¿Xi naquiiñeʼ gúninu né xquendanabáninu ne xi zabeendunu?
18 Ora runi adorarnu Jehová de guidubi ladxidoʼno, ribáninu nayecheʼ ne ribáninu né esperanza de guni adorarnu laabe para siempre (Prov. 10:22). Ne ratadxí ladxidoʼno purtiʼ nánnanu racané Jehová laanu ora tídinu lu xiixa guendanagana (Is. 41:9, 10). Guiranu zanda chuʼnu nayecheʼ ora runi adorarnu Bixhózenu ni nuu guibáʼ, laa runi merecer guicaa gloria ne honra purtiʼ laa bizáʼ guiráʼ xixé ni nuu (Apoc. 4:11).
CANCIÓN 24 Quíbanu lu dani stiʼ Jiobá
^ párrafo 5 Cumu Jehová nga bizáʼ guiráʼ cosa la? nga runi naquiiñeʼ guni adorarnu laabe. Zacaabe adoración stinu pa chinándanu ca mandamientu stibe ne guibáninu modo rusiidiʼ Biblia. Lu artículo riʼ zadúʼyanu xhono cosa ni rúninu para guni adorarnu laabe. Ne ora guidúʼyanu ca ni la? guiníʼ íquenu ximodo zanda gúninu ni jma galán ne ximodo zacané ca ni laanu chuʼnu nayecheʼ.
