1-2. O ngaˈayay a taˈarawan ni Pawlo pakayni malohemay malitengay iraay ko maanan a sapadama?

 TAROKOS ci Pawlo tada maolahay to salikaka, caay ka talaw to roray matayal saki cangranan. (Dmak 20:31) Mansa tangongolay ko olah no salikaka cingranan. Kinacecayay, o malohemay malitengay no Ifiso mafanaˈ to cowato ko mamaˈaraw nangra ci Pawlo, ‘ongong sanay a tomangic.’ (Dmak 20:37) Malecaday, o malohemay malitengay ita maolahay to salikaka, hanaca misaˈicelay padama cangranan. (Filipi 2:16, 17) Kawra nolatekay, adihayay ko masiˈayaway no malohemay malitengay a pasangaray, o manan ko papadama cangranan miremo tonini a pasangaray hani?

² O marorayay matayal a malohemay malitengay ngaˈayay miharateng to taˈarawan ni Pawlo. (1 Korinto 11:1) Cowa ko mikiriwiˈay a tamdaw cingra, o cowa ka lefot a tamdaw, latekay misaˈicelay cingra ngaˈ matatodongay ko pidemak. (Loma 7:18-20) Roma i, misiˈayawayho cingra to masakenakenaay a pasangaray. Kawra cowa ka pisawad ci Pawlo, cowa ka lahdaw ko lipahak. Ano todongen no malohemay malitengay ci Pawlo o ngangaˈay miremo to pasangaray, padadotoc lipahak matayal saki Yihofaan.

3. Onini a lalakaw mamilengo to maanan sepat malifaay no malohemay malitengay a pasangaray? Wa mananamho ita ko maanan?

³ Onini a lalakaw mamilengo to sepat marariday malifa no malohemay malitengay a pasangaray: (1) midimokos to mitosilay tayal ato roma ˈinorong, (2) malo ngaˈayay pakaenay a tamdaw, (3) miremo to dangoc no niyah, (4) misodod to dangoc no salikaka. Wa mananam ita samaanay ci Pawlo miremo tonini a pasangaray, ato sasamaan ko malohemay malitengay minanam to taˈarawan ningra.

4. Pakayni malohemay malitengay, mikerid to mitosilay tayal hano o pasangaray konini hani?

⁴ Hano o pasangaray konini hani? Cowa ko pikerid aca to mitosilay a tayal, adihayayho ko ˈinorong no malohemay malitengay. Tinakoen, ˈalomanay malohemay malitengay itini tenok no lipay a saˈopo makakotayayho malo tatiyakan anca misikay to kasakopang a picekiw. O mamihadak cangra to roma a kimad alatek. Roma i, misaˈicelay cangra pahatatanam to dama sikawdan, padadotocayho pakalalok to salikaka i kasakopang. (1 Pitiro 5:2) O roma malohemay malitengay mirienangay to patirengay ato mitomadaway to kasaˈopoan ato romaroma pidokoan a kitiraan. Soˈlin kalimlaan konini a tayal, kawra malecad to polong a salikaka, sakakaay a ˈinorong no malohemay malitengay o milasilay to ngaˈayay lihaf no Hongti Kitakit.—Matay 28:19, 20.

5. Itini mitosilay a tayal patirengay ci Pawlo to maanan a taˈarawan hani?

⁵ Taˈarawan ni Pawlo. Mikitini Filipi 1:10 maˈaraway ita ko malaˈosiay a pakayraan ni Pawlo, onini i ‘hapinangen o maanan ko kalimlaan a demak.’ Patirengay ci Pawlo to taˈarawan, manilnil cingra midemak to mitosilay a ˈinorong ikor, itini pina poloˈ miheca misaaretengan ningra minengneng konini a ˈinorong. ‘Ano itinito kaˈalomanan anca pakalomalomaˈ,’ fanekfekay cingra mitosil. (Dmak 20:20) Cowa ko itini aca i cecay romiˈad no cecay lipay anca itini cecay tatokian no cecay romiˈad a mitosil cingra to tamdaw, ao mimetmetay to kahacecay a toki mihaen to demak. Tinakoen, itini cingra i Atin mitala to cafay i, pasayraay cingra iraay ko saaroˈan a tamdaw mitosil, iraay ko ngaˈayay a minaroˈan. (Dmak 17:16, 17, 34) Ano itinito i kapalitan, mimetmetan ni Pawlo ko toki mitosil to itihiay a tamdaw.—Filipi 1:13, 14; Dmak 28:16-24.

6. Samaanay ci Pawlo pahatatanam to salikaka?

⁶ Ngaˈayay ko pisaka dademak ni Pawlo to toki, marariday mitahidang to roma tamdaw kalacafay cingranan mitosil. Tinakoen, itini sakinacecay miliwko a mitosil, miˈorongan ningra koya ci Marko hananay a Yohani a malingad, sakinatosa i, ci Timoti ko miˈorongan ningra. (Dmak 12:25; 16:1-4) Maedeng misarocoday ci Pawlo padama cangranan minanam samaan milikakawa to kasakopang, samaan midemak to pakaenay a demak, ato sasamaan malo ngaˈayay a singsi.—1 Korinto 4:17.

7. Mikitini Ifiso 6:14, 15, o malohemay malitengay ngaˈayay samaan ko pidemak?

⁷ Mananamay ita ko maanan? Ngaˈayay todongen no malohemay malitengay ci Pawlo, cowa ko pakalomalomaˈ aca mitosil, maharekho misaday micerid mitosil to tamdaw. (ˈOsien ko Ifiso 6:14, 15.) Tinakoen, ano masadak cangra micakay to dafong anca itini katayalan, ngaˈay milengo to ngaˈayay lihaf i tamdaw, anca mirienang to patirengay a tayal no likakawa i, pasayra i fiyafiyaw ato pacakayay to dafong a tamdaw misawacay. O roma i, malecad ci Pawloan, ngaˈayay sakadademaken no malohemay malitengay ko pitosilan a tatokian pahatatanam to dama sikawdan ato romaroma a salikaka.

8. Latekay sasamaan ko pidemak no malohemay malitengay hani?

⁸ O malohemay malitengay coka ngaˈay pakidem ko ˈifowa to tayal no kasakopang ato kasakilac, awato ko toki a mitosil. Sapidimokosaw to caka lecad a ˈinorong, latekay o maminaˈay cangra to mahaenay a tayal. Ikor no mitolon ato misongilaˈ a misimsim mamahapinang nangra alatek, ano micada to cecay a tayal, wa awato ko pakayraan midemak to kalimlaan a demak, tinakoen fanekfek a mitosil, pahatatanam to wawa to mitosilay a tayal anca misikay to pakalomaˈay pidoko to lipalipay. Harateng no roma malohemay malitengay, minaˈay to faelohay a katayalan cowa kangaˈay, kawra ngaˈay cangra rihaday ko falocoˈ, mafanaˈay ci Yihofa mihaen ko demak nangra pakayniay sapidimokosaw to cowa ka lecad a ˈinorong.

9. O ˈifowaay a malohemay malitengay misiˈayaway to manan pasangaray a demak hani?

⁹ Hano o pasangaray konini hani? O finawlan ni Yihofa o tatahalifa to masakenakenaay a sapalifet. Itini salikoray a romiˈad, kita maemin misaaliay to sapakalalok, sadama ato sahinom. Latekay, o papadama ko malohemay malitengay to salikaka miliyas to sapidemakaw to kapiliˈan no Kawas a demak. (1 Tisalonika 5:14) Manaokaniw, awaay ko pakayraan no malohemay malitengay misaysay to kihcod pasangaray no finawlan ni Yihofa. Soˈlin mahaen, makalimay ci Yihofa misarocod a midemak ko malohemay malitengay, pakalalok ato midipot to siri Ningra. Mihaenay, sasamaan ko malohemay malitengay itini ka ˈifowa no kaˈorip, mihadak to toki padama to salikaka hani?

10. Mikitini 1 Tisalonika 2:7, samaanay ci Pawlo midimokos to salikaka hani?

¹⁰ Taˈarawan ni Pawlo. Marariday ci Pawlo mikilim to toki pakahemek to salikaka, ho mapakalalok cangra. Damsayayho cingra micada to salikaka, patirengay to ngaˈayay taˈarawan no malohemay malitengay. (ˈOsien ko 1 Tisalonika 2:7.) Pasowalan ni Pawlo ko salikaka, tada maolahay cingra cangranan, ano ci Yihofato maolahay cangranan. (2 Korinto 2:4; Ifiso 2:4, 5) Kalawidangan ni Pawlo ko salikaka, mipalak to toki kalacafay cangranan, pakasoˈlinayho cangranan, makahiay mikifalocoˈ mihadak to cariraw ato dangoc no niyah. (2 Korinto 7:5; 1 Timoti 1:15) Kawra, mihaen ko demak ni Pawlo, cowa ko paihkalay to hakowaay ko pasangar no niyah, ao makalimay sapadamaaw to salikaka.

11. Hano mihadak ci Pawlo to sapalimoˈot i salikaka hani?

¹¹ Latekay, misaaliay ci Pawlo to sapalimoˈotaw to salikaka. Kawra mihaen cingra to demak cowa ko pakayniay i kaketer, ao pakayniay i noka ciharateng cangranan, sapidipotaw cangranan, padama cangranan miliyas to masakenakenaay katalawan. Misarocoday cingra ihkal a mahapinang ko sapalimoˈot no niyah, ciharatengayho to mamakahi micada ko salikaka to sapalimoˈot ningra hokira. Tinakoen, itini tikami ningra to Korintoay a Krisciyang, mihadakay ci Pawlo to pakidemay a sapalimoˈot. Maharek cingra mitilid tonini a tikami i, miocoran ningra ci Titus tayra cangranan. Makalimay ci Pawlo sakafanaˈaw to samaanay ko pinengneng nangra to tikami ningra, tiya mafanaˈ cingra to mikifalocoˈay cangra micada to sapalimoˈot i, tada lipahakay ko falocoˈ.—2 Korinto 7:6, 7.

12. Sasamaan ko malohemay malitengay pakalalok to salikaka hani?

¹² Mananamay ita ko maanan? Ngaˈayay todongen no malohemay malitengay ko taˈarawan ni Pawlo, mipalak to adihayay toki kalacafay to salikaka. Tinakoen, ngaˈay cangra itini ˈayaw no saˈopo kahenay a tahira, mihaen wa ngaˈayto ko kasasowal to salikaka. Adihayay tatokian, pina aca ehon ko mipalakan no malohemay malitengay, o ngangaˈayto matinako no salikaka ko kaciharateng ato sapakalalok. (Loma 1:12; Ifiso 5:16) Roma i, ngaˈayay tano Fangcalay Cudad ko malohemay malitengay paˈicel to pakasoˈlin no salikaka, ho mafanaˈ cangra tada maolahay ci Yihofa cangranan. Ngaˈay micerid ko malohemay malitengay paihkal to olah i salikaka, micerid a mirinnak, hanaca mikilim to toki pakahemek cangranan. Ano kalimlaan i, wa misalalangian to Fangcalay Cudad ko malohemay malitengay mihadak to ihkalay a sapalimoˈot, hanaca paihkal to damsayay a waywayan, samanen makalimay cangra makahi ko salikaka micada to sapalimoˈot no niyah.—Kalatiya 6:1.

13. Pakayni i dangoc no niyah iraay ko masamaanay a pinengneng no malohemay malitengay alatek?

¹³ Hano o pasangaray konini hani? Cowa ko malefotay ko malohemay malitengay, malecaday to roma tamdaw mararaway ko demak. (Loma 3:23) Latekay, pasangaray cangra matatodong ko pinengneng to dangoc no niyah. Roma tamdaw pakidemay ko pisamacay to dangoc no niyah, telocto matoleday ko niyah. Roma tamdaw madoloay paˈading to niyah, telocto ngaˈayay ko demak no niyah, awaay ko sasalofen saan miharateng.

14. Mikitini Filipi 4:13, samanen iraay ko misapoeneray a waywayan ni Pawlo, mansa samaanay ko pinengneng to dangoc no niyah?

¹⁴ Taˈarawan ni Pawlo. Misapoeneray ci Pawlo, mafanaˈay cingra awaay ko pakayraan mitiˈer to ˈicel no niyah miremo to dangoc no niyah, misaaliay to Kawas pafeli cingranan to ˈicel. Ci Pawlo na pakidemay ko pipalak to Krisciyang, kawra ikor mahapinangay ningra mararaway ko demak no niyah, makahiay mifalic to waywayan ato capeling no niyah. (1 Timoti 1:12-16) Pakayni pitadiˈec to sapadama ni Yihofa, malo ngaˈayayto a pakaenay ci Pawlo, misapoeneray ko falocoˈ iraayho ko mihadidiay ato siniˈadaay a falocoˈ. Ano maharateng ningra ko dangoc no niyah maedeng makesemay cingra, kawra cowa ka haharatengsa cingra tonini a demak. Pakasoˈlinay cingra maharekayto ci Yihofa misodod cingranan. (Loma 7:21-25) Cowa pisaali ci Pawlo malefot ko midemakan no niyah, ao misaˈicelay misalof to capeling no Krisciyang no niyah, hanaca misapoener a mitadiˈec ci Yihofaan ngaˈay ko pidemak to mitosilay a tayal.—1 Korinto 9:27; ˈosien ko Filipi 4:13.

15. Pakayni i dangoc no niyah papairaen no malohemay malitengay ko maanan matatodongay a pinengneng?

¹⁵ Mananamay ita ko maanan? O cecay tamdaw cowa ko pakayniay i kalefot a manilnil malo malohemay malitengay. O malohemay malitengay mararaway ko demak, kawra makalimay ci Yihofa to malohemay malitengay mihayi to raraw no niyah, hanaca padadotoc palahad to ngaˈayay capeling no Krisciyang. (Ifiso 4:23, 24) O mamikitini i Fangcalay Cudad ko malohemay malitengay mikinsa to niyah, hanaca makahi a misalof. Ano mihaen, o papadama ci Yihofa cingranan padadotoc a lipahak, malo ngaˈayay a malohemay malitengay.—Yakop 1:25.

16. Ano pakidem ko pinengneng no malohemay malitengay to dangoc no tao i, sasamaanto ko teloc hani?

¹⁶ Hano o pasangaray konini hani? Marariday ko malohemay malitengay malacafay to salikaka, madoloay maˈaraw ko dangoc nangra. Ano caka pinaˈon, o mamatoled ko malohemay malitengay to salikaka alatek, o papakidem ko saali anca mikimkim to dangoc. Patalipaˈelalay ci Pawlo to Krisciyang, makalimay ci Satan pakaˈaraw to mahaenay a teloc.—2 Korinto 2:10, 11.

17. Samaanay ko pinengneng ni Pawlo to salikaka hani?

¹⁷ Taˈarawan ni Pawlo. Ihkalay mafanaˈ ci Pawlo to raraw no salikaka, o demak nangra latekay taˈangayay ko pifiyor cingranan. Kawra, tawlikay ko pinengneng ni Pawlo to salikaka. Mafanaˈay cingra mararaw ko cecay tamdaw, mitaypiyaway to tatiihay konini a tamdaw cowa ka saan. Tada maolahay cingra to salikaka, o ngaˈayay nangra ko misinanotan. Ano mararaw ko salikaka i, pakasoˈlinay ci Pawlo makahiay cangra midemak to matatodongay a demak, edengan misaaliay cangra to sapadama.

18. Mikitini pakayraan ni Pawlo micada ci Yuotian aci Sintikian mananam iso ko maanan hani? (Filipi 4:1-3)

¹⁸ Tinakoen, nengnengen samaanay ko picada ni Pawlo to itiniay i Filipi a kasakopang tatosaay fafahiyan salikaka Yuotia aci Sintiki. (ˈOsien ko Filipi 4:1-3.) Onini tatosaay fafahiyan salikaka iraay ko lacongis, telocto marawraway ko kalalaˈed nangra. Cowa ka pakidem ko pilikaf ni Pawlo cangranan, anca ira ko masofaway a pinengneng cangranan, ao misamacayay to makapahay a capeling nangra. Mafanaˈay ci Pawlo noniya tatosaay fafahiyan salikaka halafinayto madimadi midoko ci Yihofaan, mihaenay tada maolahay ci Yihofa cangranan. Iraay ko tawlikay noka pinengneng ni Pawlo cangranan, mansa makahi pakalalok cangranan misaysay to lacongis nangra. O mahaenay a waywayan padamaay ci Pawloan padadotoc lipahak, hanaca ira ko ngaˈayay kalalaˈed to salikaka itini i Filipi a kasakopang.

19. (1) Sasamaan ko malohemay malitengay tawlik ko pinengneng to salikaka hani? (2) Mikitini coka no 19 fatac mananam iso ko maanan?

 ¹⁹ Mananamay ita ko maanan? O makapahay a capeling no salikaka ko na nengnengen no malohemay malitengay. Soˈlin cowa ko malefotay ko kahacecay a tamdaw, kawra i tireng no kahacecay tamdaw iraay ko kasemeran ita a ngaˈayay. (Filipi 2:3) Manaokaniw, latekay misaaliay ko malohemay malitengay to papalimoˈot to cecay faˈinayan salikaka anca fafahiyan salikaka. Kawra malecad ci Pawloan, o mamihadak ko malohemay malitengay to ˈicel, cowa ko tatiihay aca a demak no tao anca somowalay to maanan a tatiihay a sowal ko nengnengen, ao mamisinanot to hakowaay ko kaolah nonini a tamdaw ci Yihofaan, hakowaay ko pisaˈicel midoko Cingranan, pakasoˈlinho to mamalingad ko kangaˈay no demak ningra noikor. Ira ko tawlikay a pinengneng no malohemay malitengay to salikaka, o papaira to damsayay no kasakopang, ngaˈay matinako no kahacecay tamdaw to kaciharateng ato olah.

20. Sapadotocaw mitodong ci Pawloan, ngaˈay samaan ko pidemak no malohemay malitengay hani?

²⁰ Adihay ko pinanam no malohemay malitengay to taˈarawan ni Pawlo, wa adihay ko malifokay a epoc. Ngaˈay saka dademaken iso ko Pirorodan to Mitepangan Cudad no Mikecolay, salakat kilimen ko “Pawlo (Sawlo)” a lalangian, kilimenho ko “taˈarawan no malohemay malitengay” dama a lalangian, ikor mahelato ko milingatay a lalakaw. Ano micekiw kiso ngaˈayay licayen ko niyah: “O taˈarawan ni Pawlo sasamaan padama takowanan malo ngaˈayay a malohemay malitengay, hanaca padadotoc a lipahak hani?”

21. Wa ngaˈay pakasoˈlin ko malohemay malitengay to maanan?

²¹ Haratengen no malohemay malitengay, cowa pisaali ci Yihofa malefot kamo, ao makalimay madimadi kamo. (1 Korinto 4:2) Malalokay ci Pawlo matayal, madimadiay a dademak, tada masemeray ci Yihofa cingranan. Ngaˈay pakasoˈlin kamo, malecaday ko pisalimla ni Yihofa to nano demak namo Cingranan. Ci Yihofa ‘cowa ko mamapawan to nano demak namo ato paihkalan namo a olah pakayni i ngangan Ningra, o katayal namo isalakat i fangcalay finawlan, nohatini padadotocayho matayal saki cangranan.’—Hipray 6:10.