1, 2. Һәвари Булусун нүмунәси ағсаггаллара неҹә көмәк едә биләр?

 ҺӘВАРИ БУЛУС иман баҹы-гардашларыны чох истәјирди. Онлардан өтрү јорулмадан зәһмәт чәкирди (Һәв. 20:31). Тәбии ки, онлар үчүн дә Булусун хәтри әзиз иди. Бир дәфә Ефесдәки ағсаггаллар Булусу бир даһа ҝөрмәјәҹәкләрини биләндә ондан өтрү «һөнкүр-һөнкүр» ағламышдылар (Һәв. 20:37). Бизим дә зәһмәткеш ағсаггалларымыз баҹы-гардашлары чох севирләр вә онлардан өтрү ҝүҹләрини әсирҝәмирләр (Филип. 2:16, 17). Амма бәзән ағсаггаллар мүәјјән чәтинликләрлә үзләширләр. Бәс онлара бунун өһдәсиндән ҝәлмәјә нә көмәк едә биләр?

² Онлар һәвари Булусдан чох шеј өјрәнә биләр (1 Кор. 11:1). Булус гејри-ади ҝүҹә саһиб дејилди. О, гејри-камил инсан иди, һәмишә дүзҝүн давранмаг онда алынмырды (Ром. 7:18—20). Үстәлик, мүхтәлиф проблемләри вар иди. Амма о, баҹы-гардашлары үчүн зәһмәт чәкмәкдән усанмырды, севинҹини итирмирди. Ағсаггаллар да Булусдан өрнәк алараг, чәтинликләрә бахмајараг, Јеһоваја севинҹлә хидмәт едә биләрләр. Ҝәлин ҝөрәк неҹә.

3. Бу мәгаләдә нә һагда данышаҹағыг вә нәји өјрәнәҹәјик?

³ Бу мәгаләдә ағсаггалларын үзләшдији дөрд әсас чәтинликдән данышаҹағыг: 1) тәблиғ иши илә диҝәр мәсулијјәтләр арасында таразлығы горумаг; 2) баҹы-гардашлара вахт ајырмаг; 3) зәиф ҹәһәтләри илә мүбаризә апармаг; 4) диндашларыны гејри-камилликләринә рәғмән севмәк. Өјрәнәҹәјик ки, һәвари Булуса бу чәтинликләрин һәр бирини ашмаға нә көмәк етмишди вә ағсаггаллар ондан неҹә өрнәк ҝөтүрә биләрләр.

4. Нәјә ҝөрә бәзән ағсаггаллара тәблиғ ишиндә өндә олмаг чәтин олур?

⁴ Нәјә ҝөрә чәтин олур? Ағсаггалларын үзәринә чохлу мәсулијјәт  дүшүр вә бу онлара тәблиғ ишиндә өндә ҝетмәјә мане ола биләр. Мәсәлән, онлар һәфтәичи ҝөрүшдә тез-тез сәдрлик едирләр, јығынҹагда Мүгәддәс Китаб дәрсини апарырлар. Бундан әлавә, башга нитгләри дә олур. Үстәлик, јығынҹаг хидмәтчиләринә чохлу тәлим кечирләр, баҹы-гардашлары руһландырмаг үчүн һәмишә вахт ајырырлар (1 Бут. 5:2). Бәзи ағсаггаллар исә ибадәт евләринин вә диҝәр биналарын тикинтисиндә вә тәмириндә иштирак едирләр. Буна бахмајараг, јығынҹагда һамы кими, ағсаггалларын да башлыҹа вә ән ваҹиб иши хош хәбәри мүждәләмәкдир (Мәт. 28:19, 20).

5. Бир тәблиғчи кими, Булус һансы нүмунәни гојуб?

⁵ Һәвари Булусун нүмунәси. Булусун уғурунун сирри Филиппилиләрә 1:10 ајәсиндә јазылыб. О дејир ки, «даһа ваҹиб шејләри ајырд» един. Булус вердији мәсләһәтә өзү дә әмәл едирди. Јеһова Булуса тәблиғ ишини һәвалә етмишди. Тәблиғ етдији узун илләр әрзиндә Булус бу иши һәјатда һәр шејдән үстүн тутмушду. О, «инсанлар гаршысында, ев-ев» тәблиғ едирди (Һәв. 20:20). О, тәблиғ ишини анҹаг һәфтәнин һансыса ҝүнү, ҝүнүн һансыса сааты етмирди. Булус јаранан һәр фүрсәтдә мүждәни бәјан едирди! Мәсәлән, о, Афинада әмәкдашларыны ҝөзләдији мүддәтдә вәзифәли шәхсләрә мүждәни чатдырмышды вә бу, чох ҝөзәл бәһрәләр ҝәтирмишди (Һәв. 17:16, 17, 34). Булус һәтта һәбсдә оланда белә јанында оланлара тәблиғ едирди (Филип. 1:13, 14; Һәв. 28:16—24).

6. Булус башгаларына нәләр өјрәдирди?

⁶ Булус вахтындан сәмәрәли истифадә едирди. О, тез-тез башгаларыны да хидмәтдә онунла әмәкдашлыг етмәјә дәвәт едирди. Мәсәлән, илк тәблиғ сәјаһәти заманы о өзү илә Марк ләгәбли Јәһјаны, икинҹи дәфә исә Тимутини апармышды (Һәв. 12:25; 16:1—4). Шүбһә јохдур ки, Булус онлара јахшы мүәллим олмаг, јығынҹағын тәшкили вә ағсаггал мәсулијјәти илә бағлы чох шеј өјрәдирди (1 Кор. 4:17).

7. Ағсаггаллар Булусун Ефеслиләрә 6:14, 15 ајәләриндәки сөзләринә неҹә әмәл едә биләрләр?

⁷ Тәтбиги. Ағсаггаллар Булусдан өрнәк алараг ев-ев тәблиғ етмәкдән әлавә, һәр фүрсәтдә шаһидлик вермәјә һазыр олмалыдырлар. (Ефеслиләрә 6:14, 15 ајәләрини охујун.) Мәсәлән, базарлыг едәркән, јахуд ишдә оларкән тәблиғ едә биләрләр. Әҝәр тәшкилатын тикинти ишиндә чалышырларса, гоншулара вә ја тикинти мәһсулларыны алдыглары ишчиләрә тәблиғ едә биләрләр. Һәмчинин Булус кими, тәблиғдә әмәкдашлыг етдикләри диндашларына, еләҹә дә јығынҹаг хидмәтчиләринә тәлим верә биләрләр.

8. Бәзән ағсаггаллар нә етмәли олур?

⁸ Ағсаггаллар јығынҹаг вә рајонун ишләри илә о гәдәр мәшғул олмамалыдыр ки, тәблиғ  етмәјә вахтлары олмасын. Таразылығы горумаг үчүн бәзән һансыса ишә «јох» демәк лазым ҝәлә биләр. Ола билсин, ағсаггал дуа едиб дүшүнәндән сонра ҝөрәҹәк ки, һансыса мәсулијјәти гәбул етсә, даһа ваҹиб шејләрә вахты галмајаҹаг. Мәсәлән, даһа ваҹиб ишләрин сырасына һәр һәфтә аиләви ибадәт кечирмәји, тәблиғдә фәал олмағы вә ушагларына тәблиғ етмәји өјрәтмәк дахилдир. Ола билсин, ағсаггаллар мүәјјән мәсулијјәтләрдән имтина етмәјә чәкинирләр. Амма нараһат олмамалыдырлар, Јеһова баша дүшүр ки, онлар таразылы олмаг истәјирләр.

9. Ағсаггаллар чох мәшғул олдугларына ҝөрә бәзән онлара нә етмәк чәтин олур?

⁹ Нәјә ҝөрә чәтин олур? Јеһованын халгы чохлу проблемләрлә үзләшир. Јашадығымыз бу ахырзаманда һәр биримизин дәстәјә, тәсәллијә, руһланмаға еһтијаҹы вар. Бәзән кимисә сәһв јолдан чәкиндирмәк үчүн көмәк лазым олур (1 Салон. 5:14). Тәбии ки, ағсаггаллар Јеһованын хидмәтчиләринин үзләшдији бүтүн чәтинликләри арадан галдыра билмәзләр. Амма бунунла белә, Јеһова истәјир ки, ағсаггаллар Онун гузуларыны горусунлар вә руһландырсынлар. Бәс ағсаггаллар бу гәдәр ишин арасында диндашларына неҹә вахт ајыра биләрләр?

10. 1 Салоникилиләрә 2:7 ајәсиндә ҝөстәрилдији кими, Булус Јеһованын халгынын гејдинә неҹә галырды?

¹⁰ Һәвари Булусун нүмунәси. Булус һәмишә чалышырды ки, диндашларыны тәрифләсин, онлары үрәкләндирсин. Ағсаггаллар да Јеһованын халгы илә нәвазишлә давранараг Булусдан өрнәк ҝөтүрә биләрләр. (1 Салоникилиләрә 2:7 ајәсини охујун.) Булус диндашларына онлары севдијини дејирди. Һәмчинин әмин едирди ки, Јеһова да онлары севир (2 Кор. 2:4; Ефес. 2:4, 5). О, јығынҹагдакы баҹы-гардашлара дост кими јанашырды, онларла вахт кечирирди. О, онлара етибар едиб, сәмими шәкилдә өз зәифлији, нараһатлығы һагда данышырды (2 Кор. 7:5; 1 Тим. 1:15). Амма онун мәгсәди диггәтини өз проблемләринә ҹәмләмәк јох, баҹы-гардашлара көмәк етмәк иди.

11. Булус баҹы-гардашлара нәдән ирәли ҝәләрәк мәсләһәт верирди?

¹¹ Булус јери ҝәләндә диндашларына мәсләһәт верирди, амма буну һеч вахт онлара гыҹыгландығы үчүн етмирди. Онлары севирди, мүхтәлиф тәһлүкәләрдән горумаг истәјирди. О чалышырды ки, вердији мәсләһәт ајдын олсун вә диндашлары ону раһат гәбул едә билсинләр. Мәсәлән, Коринф јығынҹағына ҹидди мәсләһәт вермишди. Мәктубдан сонра онларын јанына Титусу ҝөндәрмишди. Булус билмәк истәјирди ки, онлар мәктубдакы мәсләһәтә неҹә јанашыблар. Ҝөрүн Булус ешидәндә ки, онлар онун мәсләһәтини гәбул едибләр вә она әмәл едибләр, неҹә севинмишди! (2 Кор. 7:6, 7).

12. Ағсаггаллар диндашларыны неҹә мөһкәмләндирә биләрләр?

¹² Тәтбиги. Ағсаггаллар диндашларына вахт  ајырмагла Булусдан нүмунә ҝөтүрмүш олурлар. Бунун бир үсулу јығынҹаға бир аз әввәл ҝәлиб диндашлары илә үнсијјәт етмәкдир. Адәтән баҹы-гардашлары руһландырмаг үчүн бир нечә дәгигә дә бәс едир (Ром. 1:12; Ефес. 5:16). Булусун нүмунәсини изләјән ағсаггал һәмчинин чалышаҹаг ки, диндашларыны Аллаһын Кәламы васитәсилә ҝүҹләндирсин вә онлары Јеһованын мәһәббәтинә әмин етсин. Бундан әлавә, ағсаггал өзүнүн дә онлара олан севҝисини ифадә едәҹәк. О, мүтәмади олараг онлардан һал-әһвал тутаҹаг вә онлары тәрифләмәјә фүрсәт ахтараҹаг. Онлара мәсләһәт вермәк лазым ҝәләндән исә буну Аллаһын Кәламына әсасландыраҹаг. Ағсаггал конкрет мәсләһәт версә дә, буну мүлајим шәкилдә верир, чүнки о истәјир ки, баҹы-гардашлар мәсләһәти гәбул едиб әмәл етсинләр (Гал. 6:1).

13. Бәзи ағсаггаллар өз зәифликләринә неҹә јанашырлар?

¹³ Нәјә ҝөрә чәтин олур? Ағсаггаллар камил дејил, һамы кими онларын да сәһвләри олур (Ром. 3:23). Бәзән онлар да өз зәиф ҹәһәтләринә таразлы јанашмагда чәтинлик чәкирләр. Кимиси өзүнә гаршы чох тәнгиди јанашыр вә руһдан дүшүр. Кимиси исә һәмишә өз нөгсанларына бәраәт газандырыр вә нәтиҹәдә, өзүндә нәјисә дәјишмәјә еһтијаҹ ҝөрмүр.

14. Филиппилиләрә 4:13 ајәсинә әсасән, тәвазөкарлыг Булуса зәифликләри илә мүбаризәдә неҹә көмәк етди?

¹⁴ Һәвари Булусун нүмунәси. Булус тәвазөкарлыгла гәбул едирди ки, өз зәифликләринин өһдәсиндән тәкбашына ҝәлә билмәјәҹәк. О, Аллаһын дәстәјинә еһтијаҹ дујурду. Булус мәсиһи олмамышдан габаг Мәсиһин давамчыларыны тәгиб едирди. Амма сонра о, өз сәһвини баша дүшдү, дүшүнҹә тәрзини вә хасијјәтини дәјишди (1 Тим. 1:12—16). Јеһованын көмәји илә Булус мәһәббәтли, шәфгәтли вә тәвазөкар бир ағсаггал олду. О, гејри-камиллијинин фәргиндә иди, амма ҝеҹә-ҝүндүз сәһвләри һаггында фикирләшмирди, Јеһованын әфвинә сығынырды (Ром. 7:21—25). О өзүндән камиллик ҝөзләмирди. Амма әлиндән ҝәләни едирди ки, Мәсиһи кејфијјәтләринә јијәләнсин. Һәмчинин она һәвалә олунан иши ҝөрмәк үчүн Јеһованын ҝүҹүнә архаланырды (1 Кор. 9:27; Филиппилиләрә 4:13 ајәсини охујун).

15. Ағсаггаллар өз зәифликләринә неҹә јанашмалыдырлар?

¹⁵ Тәтбиги. Ағсаггаллар камил олдуглары үчүн тәјин олунмур. Амма Јеһова ҝөзләјир ки, онлар өз сәһвләрини гәбул етсинләр вә мәсиһи хүсусијјәтләринә јијәләнсинләр (Ефес. 4:23, 24). Ағсаггаллар өзләрини Мүгәддәс Китаб әсасында јохламалыдырлар  вә лазыми дәјишикликләр етмәлидирләр. Онда Јеһова онлара көмәк едәҹәк ки, хидмәтләрини уғурла иҹра етсинләр вә бундан севинҹ тапсынлар (Јаг. 1:25).

16. Ағсаггаллар диггәтләрини диндашларынын нөгсанларына ҹәмләсәләр, нә баш верәр?

¹⁶ Нәјә ҝөрә чәтин олур? Ағсаггаллар диндашлары илә даһа чох вахт кечирдикләри үчүн онларын гүсурларыны даһа асан ҝөрүрләр. Амма ағсаггаллар еһтијатлы олмасалар, диндашларынын һәрәкәтләринә гыҹыгланар, онлара гаршы сәрт вә тәнгиди јанашарлар. Булус мәсиһиләри хәбәрдар етмишди ки, онларын бу ҹүр олмасыны Шејтан истәјир (2 Кор. 2:10, 11).

17. Булус баҹы-гардашларына неҹә јанашырды?

¹⁷ Һәвари Булусун нүмунәси. Булус чалышырды ки, һәмишә баҹы-гардашлара мүсбәт тәрәфдән јанашсын. О, диндашларынын сәһвләриндән аҝаһ иди, чүнки бәзән онларын сәһви Булуса да тәсирсиз өтүшмүрдү. Ән әсасы исә Булус баша дүшүрдү ки, инсанын әмәли писдирсә, о демәк дејил ки, инсан өзү дә писдир. Булус баҹы-гардашларыны севирди. Онларын јахшы хүсусијјәтләринә диггәт јетирирди. Әҝәр диндашына дүзҝүн давранмаг чәтин ҝәлирдисә, Булус онун нијјәтинин пис олдуғуну дүшүнмүрдү, анлајырды ки, диндашынын көмәјә еһтијаҹы вар.

18. Булус Еводија вә Синтихи адлы баҹылара неҹә көмәк етди вә биз бундан нә өјрәнирик? (Филиппилиләрә 4:1—3).

¹⁸ Мәсәлән, ҝөрүн Булус Филиппи јығынҹағында Еводија вә Синтихи адлы ики баҹыја неҹә көмәк етмишди. (Филиппилиләрә 4:1—3 ајәләрини охујун.) Ҝөрүнүр һансыса анлашылмазлыға ҝөрә онларын арасы дәјмишди. Булус онларла сәрт давранмады, онлары мүһакимә етмәди. Онларда олан јахшы хүсусијјәтләрә диггәт јетирди. Бу баҹылар узун илләр әрзиндә Јеһоваја сәдагәтлә хидмәт етмишди. Булус билирди ки, Јеһова онлары севир. Онлар һагда мүсбәт фикирдә олмасы Булуса көмәк етди ки, онлары араларындакы нифагы һәлл етмәјә тәшвиг едә билсин. О, инсанларын јахшы ҹәһәтләринә фикир вердији үчүн севинҹини горуду, һәм дә һәмин јығынҹагдакыларла достлуг мүнасибәти корланмады.

19. а) Ағсаггаллара диндашлары һагда мүсбәт фикирдә олмаға нә көмәк едә биләр? б) Ибадәт евини тәмизләјән ағсаггалдан нә өјрәнә биләрсиниз? Шәклә бахын.

¹⁹ Тәтбиги. Әзиз ағсаггаллар, баҹы-гардашларынызын јахшы хүсусијјәтләрини ҝөрмәјә чалышын. Һәр кәс гејри-камилдир, амма һәр кәсдә һәсәд апараҹағымыз хүсусијјәтләр вар (Филип. 2:3). Дүздүр, бәзән ағсаггаллар баҹы-гардашларын јанлыш дүшүнҹәсинә дүзәлиш етмәли олурлар. Амма Булус кими, онлар да чалышмалыдырлар ки, диггәтләрини диндашынын етдији вә  дедији гыҹыгландырыҹы шејләрә ҹәмләмәсинләр. Онун Јеһоваја олан мәһәббәтинә, хидмәтдә ҝөстәрдији әзмә вә онда јахшы ишләр ҝөрмәк потенсиалынын олдуғуна фикир версинләр. Баҹы-гардашлар һагда мүсбәт фикирдә олан ағсаггаллар јығынҹагда меһрибан вә хош аб-һава јарадыр.

20. Ағсаггаллар Булусдан даһа чох шеј өјрәнмәк үчүн нә едә биләрләр?

²⁰ Ағсаггаллара бундан сонра да Булусун нүмунәсини арашдырмағын чох көмәји олаҹаг. Мәсәлән, «Аллаһын Падшаһлығы һаггында әтрафлы шәһадәт верәк» китабынын 12-ҹи фәслинин 17—20 абзасларына, јахуд «Ҝөзәтчи Гүлләси нәшрләринин индекси»ндә «Булус» башлығы алтында «ағсаггаллар үчүн нүмунә» адлы јарымбашлыға (рус.) баха биләрсиниз. Орада олан мәгаләләри охујаркән өзүнүзә нөвбәти суалы верин: «Булусун нүмунәси мәнә бир ағсаггал кими өз мәсулијјәтләрими иҹра едәркән севинҹими горумаға неҹә көмәк едә биләр?»

21. Ағсаггаллар нәјә әмин ола биләрләр?

²¹ Әзиз ағсаггаллар, унутмајын ки, Јеһова сиздән камиллик тәләб етмир. О сизин сәдагәтли олмағынызы истәјир (1 Кор. 4:2). Јеһова Булусун зәһмәтини вә садиглијини гијмәтләндирирди. Әмин олун ки, О сизин дә хидмәтинизи гијмәтләндирир. Јеһова һеч вахт «кечмишдә вә инди мүгәддәсләрә хидмәт едәрәк Онун адына ҝөстәрдијиниз мәһәббәти вә чәкдијиниз зәһмәти» унутмајаҹаг (Ибр. 6:10).