1-2. ?Wafa sɛ yɛ Pɔlu i su ndɛ’n kwla uka asɔnun kpɛnngbɛn mun andɛ-ɔ?

 AKOTO Pɔlu kloli aniaan’m be kpa. Ɔ tuli i klun dili junman fa niannin be lika. (Yol. 20:31) Aniaan’m be kusu be kloli i kpa wie. Cɛn kun liɛ bɔbɔ’n, kɛ asɔnun kpɛnngbɛn nga be o Efɛzi lɔ’n be tili i kɛ be su wunmɛn i kun’n, “be kwlaa be sunnin kpa.” (Yol. 20:37) Andɛ kusu’n, asɔnun kpɛnngbɛn’m be klo aniaan’m be kpa yɛ be tu be klun be uka be. (Fp. 2:16, 17) Sanngɛ ɔ ju wie’n, sa wie’m be kle be yalɛ. ?Ngue yɛ ɔ kwla uka be naan b’a jran sa sɔ’m be ɲrun kekle-ɔ?

² Asɔnun kpɛnngbɛn’m be kwla nian Pɔlu i ajalɛ’n su. (1 Kor. 11:1) Pɔlu ti sran kɛ e sa. Fɔ o i nun wie. Ɔ maan blɛ wie nun’n, ɔ kplili kpa naan w’a kwla yo like ng’ɔ ti kpa’n. (Rɔm. 7:18-20) Asa ekun’n, sa fanunfanun be tɔli i su. Ɔ nin i sɔ ngba’n, i sa sin w’a bubumɛn i yɛ ɔ dili aklunjɔɛ titi. Sɛ asɔnun kpɛnngbɛn’m be nian Pɔlu i ajalɛ’n su’n, bé kwlá jrán be su sa’m be ɲrun kekle yɛ bé sú Zoova aklunjɔɛ nun titi. Siɛn’n, maan e kan wafa nga be kwla yo sɔ’n i ndɛ.

3. ?Ngue yɛ é wá kɛ́n i ndɛ like suanlɛ nga nun-ɔn?

³ Like suanlɛ nga nun’n, é wá kán sa nnan mɔ be kwla kle asɔnun kpɛnngbɛn’m be yalɛ’n be ndɛ. I klikli’n yɛle kɛ be ɲanman blɛ naan b’a bo jasin fɛ’n naan be kunngba’n b’a di be junman uflɛ mun. I nɲɔn su’n yɛle kɛ be ɲanman blɛ naan b’a wla aniaan’m be fanngan. I nsan su’n yɛle kɛ be ayeliɛ wie’m be kle be yalɛ. Kpɛkun i nnan su’n yɛle kɛ, kɛ ɔ ko yo naan aniaan’m be fɔnlɛ’m b’a sɔn be nun’n, ɔ ti kekle man be. Asa ekun’n, é wá kán wafa nga Pɔlu jrannin sa sɔ’m be ɲrun kekle’n i ndɛ. Kpɛkun é wá wún wafa nga asɔnun kpɛnngbɛn’m be kwla niɛn i ajalɛ’n su’n.

4. ?Ngue ti yɛ ɔ ju wie’n asɔnun kpɛnngbɛn’m be ɲanman be ti be boman jasin fɛ’n niɔn?

⁴ Like nga ti yɛ i sɔ yolɛ’n kwla yo kekle man be’n. Asɔnun kpɛnngbɛn mun yɛ ɔ fata kɛ be fa jasin fɛ bolɛ’n i nun ta’n niɔn. Sanngɛ kusu be le junman kaka uflɛ be di. I wie yɛle kɛ be tinngɛ lemɔcuɛ afiɛn’n nun aɲia mun ɔ nin asɔnun’n i Biblu’n like suanlɛ aɲia’n kpɛkun be ijɔ nzra nun. Asa ekun’n, be kle asɔnunfuɛ’m be ukafuɛ’m be like yɛ be wla aniaan’m be fanngan. (1 Piɛ. 5:2) Asɔnun kpɛnngbɛn wie’m be uka aniaan nga be kplan Ɲanmiɛn Sulɛ sua mun. Sanngɛ kɛ aniaan kwlaa sa’n, ɔ fata kɛ be bo jasin fɛ’n wie.—Mat. 28:19, 20.

5. ?Jasin fɛ bolɛ nun’n, ajalɛ kpa benin yɛ Pɔlu kle e-ɔ?

⁵ Ajalɛ nga Pɔlu kle e’n. Like kun m’ɔ ukali Pɔlu kpa’n, yɛle ndɛ nga i bɔbɔ kannin m’ɔ o Filipufuɛ Mun 1:10 nun’n. Ɔ seli kɛ: “Amun wun ninnge nga be ti cinnjin kpa’n be wlɛ.” Pɔlu bɔbɔ nantili ndɛ sɔ’n su. Yɛle kɛ junman nga Ɲanmiɛn fa wlɛli i sa nun’n, ɔ yoli i cinnjin trali like kwlaa. Ɔ tuli i klun boli jasin fɛ’n “nzra nun nin awloawlo’m be nun.” (Yol. 20:20) Pɔlu i jasin fɛ bolɛ’n leman dɔ annzɛ cɛn. Blɛ kwlaa ng’ɔ ɲɛn i wun atin’n, ɔ bo jasin fɛ’n. Sa kun m’ɔ kle sɔ’n yɛle kɛ i nun m’ɔ́ mínndɛ i niaan mun Atɛnin lɔ’n, ɔ boli jasin fɛ’n kleli sran wie mɔ be le ɲrun kpa’n. Yɛ i bo’n guali klanman. (Yol. 17:16, 17, 34) Kɛ be wlɛli i bisua bɔbɔ’n, ɔ boli jasin fɛ’n kleli be nga be o i wun lɛ’n.—Fp. 1:13, 14; Yol. 28:16-24.

6. ?Wafa sɛ yɛ Pɔlu ukali aniaan mun-ɔn?

⁶ Pɔlu fɛli i blɛ’n yoli ninnge nga be ti cinnjin kpa’n. Kpɛ sunman’n, kɛ ɔ́ kɔ́ Ɲanmiɛn junman i dilɛ’n ɔ yiali aniaan wie mun kɛ be ko sunmɛn i. I wie yɛle kɛ kpɛ klikli nga ɔ́ kɔ́ i ngaliɛ dilɛ junman’n i dilɛ’n, ɔ nin Zan Marki yɛ be ɔli-ɔ. Kpɛkun i kpɛ nɲɔn su’n, ɔ nin Timote yɛ be ɔli-ɔ. (Yol. 12:25; 16:1-4) Pɔlu tuli i klun kleli aniaan sɔ’m be junman wie’m be dilɛ. I wie yɛle kɛ ɔ kleli be wafa nga be kwla siesie asɔnun’n nun junman mun’n, nin wafa nga be kwla uka aniaan mun’n ɔ nin wafa nga be kwla kle sran’m be like kpa’n.—1 Kor. 4:17.

7. ?Wafa sɛ yɛ asɔnun kpɛnngbɛn’m be kwla nanti ndɛ nga Pɔlu kannin m’ɔ o Efɛzifuɛ Mun 6:14, 15 nun’n i su-ɔ?

⁷ Like nga Pɔlu i su ndɛ’n kle e’n. Wafa nga asɔnun kpɛnngbɛn’m be kwla nian Pɔlu i ajalɛ’n su’n yɛle kɛ ɔ fataman kɛ be ka awloawlo’m be nun jasin fɛ bolɛ’n ngunmin su. Sanngɛ ɔ fata kɛ be buabua be wun be sie naan lika kwlaa nga be o lɛ’n b’a kwla bo jasin fɛ’n. (An kanngan Efɛzifuɛ Mun 6:14, 15 nun.) I wie yɛle kɛ sɛ be kɔ gua bo annzɛ junman’n, be kwla bo jasin fɛ’n. Annzɛ kɛ bé úka aniaan nga be kplan Ɲanmiɛn Sulɛ sua mun’n, be kwla bo jasin fɛ’n kle be  nga be tran kokolɛ’n annzɛ sua kplanlɛ ninnge atɛ yofuɛ mun. Asa ekun’n, kɛ Pɔlu sa’n kɛ be nin asɔnunfuɛ’m be ukafuɛ mun annzɛ aniaan uflɛ bé bó jasin fɛ’n, blɛ sɔ’n nun’n be kwla kle be like.

8. ?Ɔ ju wie’n, ngue yɛ ɔ fata kɛ asɔnun kpɛnngbɛn’m be yo-ɔ?

⁸ Ɔ fata kɛ asɔnun kpɛnngbɛn’m be nian be wun su naan asɔnun’n nun junman annzɛ akpasua’n nun junman wie’m be dilɛ ti’n, b’a ɲanman blɛ b’a boman jasin fɛ’n. Kɛ ɔ ko yo naan b’a ɲan blɛ b’a yo ninnge cinnjin wie mun’n, ɔ ju wie’n nán maan be sɔ junman nga be fa man be’n i nun. Kwlaa naan b’a sɔ junman kun nun’n, maan be srɛ Ɲanmiɛn yɛ be bu i sin kpa. Sɛ be yo sɔ’n, bé wún i wlɛ sɛ junman sɔ’n ti’n be ɲin kpá ninnge cinnjin wie’m be su-o. Ninnge sɔ’m be nun wie mun yɛle awlo lɔ Ɲanmiɛn sulɛ’n, annzɛ jasin fɛ bolɛ’n annzɛ be mma’m be ukalɛ naan b’a si jasin fɛ’n i bo’n. Asɔnun kpɛnngbɛn wie’m be sɔ junman kwlaa nga be fa man be’n i nun. I yo, i sɔ’n kle kɛ be kunndɛ kɛ bé tú be klun bé sú Zoova kpa. Sanngɛ Zoova kunndɛ kɛ be yo ninnge’m be nuan su sɛsɛ.

9. ?Ngue yɛ ɔ kle asɔnun kpɛnngbɛn sunman be yalɛ-ɔ?

⁹ Like nga ti yɛ i sɔ yolɛ’n kwla yo kekle man be’n. Sa kekle sunman tɔ Zoova i sufuɛ’m be su. Mɛn i awieliɛ blɛ nga nun’n, e kwlakwla e kunndɛ kɛ be wla e fanngan yɛ be suan e bo. Asa’n, aniaan wie’m be kunndɛ kɛ be uka be naan b’a kwla wla ayeliɛ tɛ wie’m be ase. (1 Tes. 5:14) I yo, asɔnun kpɛnngbɛn’m be kwlá yoman naan aniaan’m be su sa’n kwlaa wie. Sanngɛ Zoova kunndɛ kɛ be wla aniaan’m be fanngan yɛ be sasa be. Kusu be le junman kaka be di. ?Ɔ maan bé yó sɛ naan b’a ɲan blɛ b’a uka aniaan mun?

10. ?Kɛ nga 1 Tesalonikifuɛ Mun 2:7 fa kan’n sa’n, wafa sɛ yɛ Pɔlu ukali aniaan mun-ɔn?

¹⁰ Ajalɛ nga Pɔlu kle e’n. Pɔlu wlali aniaan’m be fanngan titi. Ɔ fata kɛ asɔnun kpɛnngbɛn’m be niɛn i ajalɛ kpa sɔ’n su yɛ maan be kle aniaan’m be kɛ be klo be. (An kanngan 1 Tesalonikifuɛ Mun 2:7 nun.) Pɔlu kleli i niaan’m be kɛ ɔ klo be. Kpɛkun ɔ seli be kɛ Zoova klo be wie. (2 Kor. 2:4; Efɛ. 2:4, 5) Pɔlu nin aniaan’m be trannin kɛ sran kun nin i janvuɛ sa, yɛ ɔ nin be yoli ninnge wie mun likawlɛ. Asa’n, ɔ yili i nglo kɛ ɔ lafi be su. Afin ɔ kannin sa nga be tɔli i su’n nin ninnge nga be kle i yalɛ’n be ndɛ weinwein kleli be. (2 Kor. 7:5; 1 Tim. 1:15) Kannzɛ sa fanunfanun tɔli Pɔlu su’n, sanngɛ w’a fɛmɛn i ɲin w’a sieman be su. Like ng’ɔ yoli i cinnjin’n yɛle aniaan’m be ukalɛ.

11. ?Ngue ti yɛ Pɔlu mɛnnin i niaan’m be afɔtuɛ-ɔ?

¹¹ Blɛ wie nun’n, Pɔlu mannin aniaan’m be afɔtuɛ. Sanngɛ w’a yoman sɔ ya su le. Like nga ti yɛ ɔ mannin be afɔtuɛ’n, yɛle kɛ be ndɛ lo i yɛ ɔ kunndɛ kɛ ɔ́ sásá be sa wie’m be lika. Kɛ ɔ́ mán be afɔtuɛ’n, ɔ yoli maan be  wunnin afɔtuɛ’n i wlɛ ndɛndɛ. Asa’n, kɛ ɔ man be afɔtuɛ’n, ɔ kunndɛ kɛ ɔ́ sí wafa nga be sɔli ndɛ’n nun’n. I wie yɛle kɛ cɛn kun’n, ɔ klɛli lɛtri ko mannin Korɛntifuɛ mun. Lɛtri sɔ’n nun’n, ɔ tuli be fɔ kekle kpa. Sanngɛ kɛ ɔ fali lɛtri’n ko mannin be’n, i sin’n ɔ sunmannin Titi be sin. Afin ɔ kunndɛ kɛ ɔ́ sí wafa nga be sɔli afɔtuɛ sɔ’n nun’n. Kɛ ɔ tili i kɛ be sɔli nun klanman naan be fa su’n, i sɔ’n yoli i fɛ dan.—2 Kor. 7:6, 7.

12. ?Wafa sɛ yɛ asɔnun kpɛnngbɛn’m be kwla wla aniaan’m be fanngan-ɔn?

¹² Like nga Pɔlu i su ndɛ’n kle e’n. Wafa nga asɔnun kpɛnngbɛn’m be kwla nian Pɔlu i ajalɛ’n su’n yɛle kɛ maan be fa blɛ naan be nin aniaan’m be yo ninnge wie mun likawlɛ. I wie yɛle kɛ maan be ju aɲia’m be bo lɔ ndɛ nun naan be nin aniaan’m b’a kwla koko yalɛ. Blɛ kpe kan sɔ nun bɔbɔ’n be kwla wla aniaan’m be fanngan. (Rɔm. 1:12; Efɛ. 5:16) Asa ekun’n, maan be fa Ɲanmiɛn Ndɛ’n be uka aniaan mun naan be lafi Ɲanmiɛn su kpa ekun. Kpɛkun be yo naan aniaan’m be wun i wlɛ kɛ Ɲanmiɛn klo be. Asa’n, maan be bɔbɔ be kle aniaan’m be kɛ be klo be. Maan be nin be koko yalɛ tikatika, yɛ be yo be mo junman kpa mɔ be di’n ti. Sɛ be waan bé mán aniaan kun i afɔtuɛ’n, maan afɔtuɛ sɔ’n taka Ɲanmiɛn Ndɛ’n su. Maan be kan like trele ng’ɔ fata kɛ aniaan’n yo’n i ndɛ be kle i. Sanngɛ maan be yo i sɔ amanniɛn su naan ndɛ’n i nun sɔlɛ’n w’a yo pɔpɔ w’a mɛn i.—Gal. 6:1.

13. ?Ngue yɛ ɔ kle asɔnun kpɛnngbɛn wie’m be yalɛ-ɔ?

¹³ Like nga ti yɛ i sɔ yolɛ’n kwla yo kekle man be’n. Fɔ o asɔnun kpɛnngbɛn’m be nun wie. Ɔ maan kɛ sran kwlakwla sa’n, ɔ ju wie’n be fɔn. (Rɔm. 3:23) Asa ekun’n, ayeliɛ wie’m be kle be yalɛ. I wie yɛle kɛ asɔnun kpɛnngbɛn wie’m be fa be ɲin be sie i be fɔnlɛ’n su dan. I ti’n be sa sin bubu be. Wie mun ekun be liɛ’n, kɛ be fɔn’n be se be wun kɛ ɔ timan tɛ dan sɔ liɛ. Ɔ maan be bumɛn i kɛ ɔ ti cinnjin kɛ be kaci be sa.

14. ?Kɛ nga Filipufuɛ Mun 4:13 fa kan’n sa’n, ngue yɛ ɔ ukali Pɔlu naan w’a jran ayeliɛ nga be kle i yalɛ’n be ɲrun kekle-ɔ?

¹⁴ Ajalɛ nga Pɔlu kle e’n. Pɔlu dili i nanwlɛ kɛ i kunngba kwlá jranman ayeliɛ nga be kle i yalɛ’n be ɲrun kekle. Ɔ wunnin i wlɛ kɛ ɔ fata kɛ Ɲanmiɛn ukɛ i. Kwlaa naan Pɔlu w’a kaci Klisifuɛ’n, ɔ kleli aniaan’m be yalɛ tɛtɛ kpa. Sanngɛ i sin’n, sa sɔ’n yoli i nsisɔ yɛ ɔ kacili i sa. (1 Tim. 1:12-16) Zoova fanngan nun’n, ɔ wa kloli sran kpa, ɔ sili sran aunnvuɛ yɛ ɔ yoli wun ase kanfuɛ. Pɔlu wunnin i wlɛ weiin kɛ i ayeliɛ wie’m be kle i yalɛ. Sanngɛ w’a fɛmɛn i ɲin w’a siemɛn i sɔ’n su. Ɔ lafili su kɛ sɛ ɔ fɔn’n, Zoova yáci i wun  sa’n cɛ́ i. (Rɔm. 7:21-25) Pɔlu w’a seman kɛ ɔ́ yó ninnge mun kɛ fɔ nunmɛn i nun sa. Sanngɛ ɔ miɛnnin i ɲin kacili i ayeliɛ’n yɛ ɔ lafili su kɛ Zoova úkɛ i naan w’a kwla di i junman’n i kpa.—1 Kor. 9:27; an kanngan Filipufuɛ Mun 4:13 nun.

15. ?Ngue yɛ ɔ fata kɛ asɔnun kpɛnngbɛn’m be yo-ɔ?

¹⁵ Like nga Pɔlu i su ndɛ’n kle e’n. Aniaan nga be ti asɔnun kpɛnngbɛn’n, nán kɛ fɔ nunman be nun ti yɛ be sieli be asɔnun kpɛnngbɛn-ɔn. Ɔ maan be kwla fɔn. Sanngɛ kɛ i sɔ sa’n ju’n, Zoova kunndɛ kɛ be di i nanwlɛ yɛ be mian be ɲin be kaci be sa. (Efɛ. 4:23, 24) I sɔ yolɛ nun’n, maan be nian Ɲanmiɛn Ndɛ’n nun naan be wun be ayeliɛ ng’ɔ kle be yalɛ’n i wlɛ naan be kaci. Sɛ be yo sɔ’n, Zoova úka be naan b’a di be junman’n i kpa yɛ bé dí aklunjɔɛ.—Zak. 1:25.

16. ?Sɛ asɔnun kpɛnngbɛn kun fɛ i ɲin sie i aniaan’m be fɔnlɛ’n su dan’n, ngue sa yɛ ɔ kwla ju-ɔ?

¹⁶ Like nga ti yɛ i sɔ yolɛ’n kwla yo kekle man be’n. Kɛ mɔ asɔnun kpɛnngbɛn’m be nin aniaan’m be di junman likawlɛ’n ti’n, be kwla wun be fɔnlɛ mun ndɛndɛ kpa. Ɔ maan sɛ b’a nianman be wun su’n, be kwla fa aniaan’m be wun ya. Annzɛ be kwla yo be ɲrun wiwi be wun annzɛ be kwla kpli di be jɔlɛ. Pɔlu wlali Klisifuɛ’m be su nun kpa kɛ nán maan be yo sɔ. Afin i sɔ bɔbɔ yɛ Satan kunndɛ kɛ e yo-ɔ.—2 Kor. 2:10, 11.

17. ?Wafa sɛ yɛ Pɔlu buli aniaan mun-ɔn?

¹⁷ Ajalɛ nga Pɔlu kle e’n. Pɔlu buli aniaan’m be wun akunndan kpa titi. Ɔ si jrɛiin kɛ be ayeliɛ wie’m be kle be yalɛ. Afin blɛ wie nun’n be loli i bɔbɔ i ngasi. Sanngɛ ɔ si kɛ be ti sran kpa. Afin ɔ wunnin i wlɛ kɛ kannzɛ sran kun yo like kun m’ɔ timan kpa’n, i sɔ’n kleman kɛ i bɔbɔ ba’n timan kpa. Pɔlu fɛli i ɲin sieli i aniaan’m be nzuɛn kpa’n su, yɛ ɔ kloli be kpa. Asa ekun’n, sɛ ɔ ju wie naan be fɔn’n, ɔ se i wun kɛ nán be ɲinfu naan be mian ukalɛ wun.

18. ?Wafa sɛ yɛ Pɔlu siesieli ndɛ ng’ɔ tɔli Evodi nin Sɛntisi be afiɛn’n niɔn? (Filipufuɛ Mun 4:1-3)

¹⁸ Maan e fa e ɲin e sie i wafa nga Pɔlu siesieli ndɛ kun m’ɔ tɔli aniaan bla nɲɔn be afiɛn’n i su. Aniaan bla sɔ’m be o Filipu lɔ asɔnun’n nun. (An kanngan Filipufuɛ Mun 4:1-3 nun.) Be flɛ kun kɛ Evodi yɛ kun suan Sɛntisi. Be yacili ndɛ kaan ng’ɔ tɔli be afiɛn’n lɛ maan ɔ kacili ndɛ dan. Ɔ maan atrɛkpa’n, be ijɔman kun bɔbɔ. Kɛ ɔ yoli sɔ’n, Pɔlu w’a kputuman be yɛ w’a kpliman w’a diman be jɔlɛ. Sanngɛ ɔ fɛli i ɲin sieli i be nzuɛn kpa’n su. Aniaan bla nɲɔn sɔ’m be tu be klun be su Zoova kpa, yɛ be yo sɔ nán andɛ sa-ɔ. Asa ekun’n, Pɔlu si kɛ Zoova te klo be. Kɛ mɔ Pɔlu buli be wun akunndan kpa ti’n, ɔ wlali be fanngan kɛ be siesie be afiɛn. Asa’n, kɛ m’ɔ fɛli i ɲin sieli i aniaan’m be nzuɛn kpa su’n ti’n, i bɔbɔ dili aklunjɔɛ titi yɛ ɔ nin aniaan nga be o asɔnun sɔ’n nun’n be afiɛn mantannin kpa titi.

19. (1) ?Ngue yɛ ɔ fata kɛ asɔnun kpɛnngbɛn’m be yo-ɔ? (2) ?Ngue yɛ asɔnun kpɛnngbɛn ng’ɔ su yo Ɲanmiɛn Sielɛ sua’n nun yɛinyɛin’n i su foto’n kle e-ɔ?

 ¹⁹ Like nga Pɔlu i su ndɛ’n kle e’n. Asɔnun kpɛnngbɛn mun, amun fa amun ɲin sie i aniaan’m be nzuɛn kpa’n su. Fɔ o aniaan’m be kwlaa be nun sɔ. Sanngɛ kusu be yi nzuɛn kpakpa wie’m be nglo. (Fp. 2:3) Sanngɛ ɔ ju wie’n, ɔ fata kɛ asɔnun kpɛnngbɛn’m be man aniaan kun i afɔtuɛ. I sɔ yolɛ nun’n, kɛ Pɔlu sa’n nán maan be fa be ɲin be sie i ndɛ yaya nga aniaan’n kwla kan kle be’n annzɛ ninnge ng’ɔ́ wá yó be’n be su. Sanngɛ maan be fa be ɲin be sie i klolɛ nga aniaan’n klo Zoova’n nin i klun m’ɔ tu su Ɲanmiɛn’n, ɔ nin ninnge kpakpa ng’ɔ yo be’n be su. Kɛ asɔnun kpɛnngbɛn’m be fa be ɲin be sie i aniaan’m be nzuɛn kpa’n su’n, aniaan’m be wun kpaja be kpɛkun asɔnun’n nun tranlɛ’n yo fɛ.

20. ?Ngue yɛ asɔnun kpɛnngbɛn’m be kwla yo naan b’a nian Pɔlu i ajalɛ’n su titi-ɔ?

²⁰ Asɔnun kpɛnngbɛn mun, sɛ amun suan Pɔlu i su like kpa ekun’n, amún ɲán su ye. I lɛ nun’n, amun kwla nian afuɛ 2018, Avrili Sasafuɛ Tranwlɛ’n i bue 21-23 nin afuɛ 2013, Zanvie 1 Sasafuɛ Tranwlɛ’n i bue 27-31 be nun. Kɛ amún súan fluwa sɔ’m be nun like’n, amun usa amun wun kɛ: ‘?Wafa sɛ yɛ Pɔlu i su ndɛ’n kwla uka min naan m’an di min asɔnun kpɛnngbɛn junman’n aklunjɔɛ su-ɔ?’

21. ?Ngue su yɛ asɔnun kpɛnngbɛn’m be kwla lafi-ɔ?

²¹ Asɔnun kpɛnngbɛn mun, nán amun wla fi su kɛ Zoova kunndɛman kɛ amun yo ninnge mun kɛ fɔ nunman amun nun sa. Like ng’ɔ kunndɛ’n yɛle kɛ amun su i kpa titi. (1 Kor. 4:2) Zoova buli junman nga Pɔlu tuli i klun dili’n ɔ nin sulɛ m’ɔ suli i kpa’n be like dan. Ɔ maan amun kwla lafi su kɛ Zoova bu junman nga amun tu amun klun be di’n, i like dan wie. Zoova i wla su fiman “junman nga amun di mɛnnin i’n, ɔ nin klolɛ nga an fa kloli i dunman mɔ i ti’n, amun dili junman mɛnnin i sran mun’n, mɔ amun te di te man be’n” i su le.—Ebr. 6:10.