1-2. Paano makakatabang sa mga elder ngunyan an halimbawa ni apostol Pablo?

 NAMUMUTAN ni apostol Pablo an mga tugang. Nagmaigot siyang marhay para sa sainda. (Gibo 20:31) Huli kaiyan, namutan na marhay siya kan saiyang mga kapagtubod. Sarong beses, “naghiribian” an mga elder sa Efeso kan maaraman ninda na dai na ninda mahihiling giraray si Pablo. (Gibo 20:37) Namumutan man na marhay kan mahihigos tang mga elder an mga tugang asin ginigibo ninda an saindang pinakamakakaya para tabangan an mga tugang. (Fil. 2:16, 17) Pero kun minsan, may mga kadipisilan man sindang inaagihan. Ano an puwedeng makatabang sainda?

² Puwedeng pag-isipan kan satong mahihigos na mga elder an halimbawa ni Pablo. (1 Cor. 11:1) Mayo siya nin mga kakayahan na arog kan sa mga anghel. Si Pablo sarong tawo na bakong perpekto na nasasakitan kun minsan na gibuhon an tama. (Roma 7:18-20) Asin may inagihan siyang mga problema. Pero dai nagsuko si Pablo asin dai man nawara an saiyang kaugmahan. Paagi sa pag-arog ki Pablo, makakayanan kan mga elder an mga kadipisilan na naeeksperyensiyahan ninda asin mapapagdanay ninda an saindang kaugmahan mantang naglilingkod ki Jehova. Aramon ta kun paano.

3. Ano an pag-uulayan ta sa artikulong ini, asin ano pa an maaaraman ta?

³ Sa artikulong ini, pag-uulayan ta an apat na komun na kadipisilan na naeeksperyensiyahan kan mga elder: (1) pagbalanse kan saindang oras para sa paghuhulit asin sa iba pang mga responsabilidad, (2) pagigin mapagmalasakit na pastor, (3) pag-atubang sa sadiring mga kaluyahan, asin (4) pag-atubang sa pagkabakong perpekto kan iba. Maaaraman ta kun paano naatubang ni Pablo an kada saro sa mga kadipisilan na iyan asin kun paano siya maaarog kan mga elder.

4. Taano ta puwedeng magin dipisil sa mga elder an panginginot sa paghuhulit?

⁴ Kun taano ta puwedeng magin dipisil iyan. Apuwera sa panginginot sa gibuhon na paghuhulit, kadakul nin responsabilidad na kaipuhan asikasuhon an mga elder. Halimbawa, nagsusurusalida sinda sa panginginot sa pagtiripon sa tahaw kan semana asin sa pagkondukta sa Pag-adal sa Bibliya kan Kongregasyon. May mga asignasyon man sinda na magpahayag. Aktibo man sinda sa pagsasanay sa mga ministeryal na lingkod asin gustong-gusto ninda na padagos na pakusugon an mga tugang. (1 Ped. 5:2) May mga elder na nagtatabang sa pagtugdok asin pagmentenar nin mga Kingdom Hall asin iba pang teokratikong mga pasilidad. Pero, arog kan gabos sa kongregasyon, an pinakapanginot na gibuhon kan mga elder iyo an paghuhulit.—Mat. 28:19, 20.

5. Anong halimbawa an ipinahiling ni Pablo bilang parahulit?

⁵ An halimbawa ni Pablo. Mababasa sa Filipos 1:10 kun taano ta nagin mapangganang parahulit si Pablo. Sinasadol niya kita na ‘siyertuhon an mas importanteng mga bagay.’ Ginibo mismo iyan ni Pablo. Pinagkatiwalaan siya nin sarong ministeryo, asin sa laog nin mga dekada, ibinilang niya an ministeryong iyan na saro sa mas importanteng mga bagay. Naghulit siya “nin hayagan asin sa harong-harong.” (Gibo 20:20) Dai siya naghulit sa pare-pareho sanang oras kan aldaw o nin saro sanang aldaw kada semana. Inaprobetsaran niya an lambang oportunidad na makapagpatotoo! Halimbawa, mantang naghahalat sa mga kairiba niya sa Atenas, ipinakipag-ulay niya an maugmang bareta sa prominenteng mga tawo sa lugar na idto, asin nagkaigwa iyan nin positibong resulta. (Gibo 17:16, 17, 34) Asin dawa “nakapreso,” naghulit si Pablo sa mga nakakaulay niya.—Fil. 1:13, 14; Gibo 28:16-24.

6. Paano ni Pablo sinanay an iba?

⁶ Ginamit ni Pablo sa pinakamarahay na paagi an saiyang panahon. Parati niyang inaagda an iba na ibanan siya sa ministeryo. Halimbawa, sa saiyang inot na pagbiyahe bilang misyonero, iiniba niya si Juan Marcos, asin sa ikaduwa, si Timoteo. (Gibo 12:25; 16:1-4) Siguradong ginibo ni Pablo an saiyang pinakamakakaya para tukduan an mga lalaking ini kun paano oorganisaron an sarong kongregasyon, kun paano magpapastor, asin kun paano magigin epektibong mga paratukdo.—1 Cor. 4:17.

7. Paano magigibo kan mga elder an sadol ni Pablo na mababasa sa Efeso 6:14, 15?

⁷ Leksiyon. Maaarog si Pablo kan mga elder bako lang paagi sa paghuhulit sa harong-harong kundi paagi man sa pagigin andam na magpatotoo sa lambang pagkakataon. (Basahon an Efeso 6:14, 15.) Halimbawa, puwede sindang makapagpatotoo pag namamakal o sa lugar na pinagtatrabahuhan ninda. O kun nagtatabang sa mga proyekto nin pagtugdok kan organisasyon, puwede  nindang ihiras an maugmang bareta sa mga tawong nakaistar harani sa tinutugdukan asin sa mga nakakatransaksiyon ninda. Arog ni Pablo, puwedeng gamiton kan mga elder an saindang panahon mantang nasa ministeryo para sanayon an iba, kaiba na an mga ministeryal na lingkod.

8. Kun minsan, ano an tibaad kaipuhan na gibuhon nin sarong elder?

⁸ Dai dapat magin sobra kasibot an mga elder sa pag-asikaso sa mga gibuhon sa kongregasyon o sa sirkito na mayo na lugod sindang oras para maghulit. Tanganing magin balanse, may mga pagkakataon na tibaad kaipuhan nindang sayumahan an ibang mga asignasyon. Pagkatapos na mamibi asin pag-isipan an mga bagay-bagay, puwedeng marealisar ninda na kun aakuon ninda an asignasyon, puwedeng mapabayaan ninda an mas importanteng mga bagay. Kaiba diyan an panginginot sa pampamilyang pagsamba kada semana, lubos na pagpartisipar sa paghuhulit, o pagsasanay sa saindang mga aki na maghulit. Maski ngani bakong madali para sa iba na sayumahan an sarong pribilehiyo nin paglilingkod, makakasigurado sinda na nasasabutan ni Jehova an saindang pagmawot na magin balanse sa gabos na bagay.

9. Anong kadipisilan an napapaatubang sa sibot na mga elder?

⁹ Kun taano ta puwedeng magin dipisil iyan. Kadakul nin problemang inaagihan an mga lingkod ni Jehova. Sa huring mga aldaw na ini, gabos kita nangangaipo nin pampakusog, suporta, asin pagranga. Asin kun minsan, may mga nangangaipo nin tabang para malikayan an salang paggawi. (1 Tes. 5:14) Siyempre, dai man mahahali kan mga elder an gabos na problema na inaagihan kan mga lingkod ni Jehova. Minsan siring, gusto ni Jehova na gibuhon kan mga elder an saindang pinakamakakaya para pakusugon asin protektaran an saiyang mga karnero. Paano an sibot na mga elder magkakaigwa nin panahon para makatao nin kinakaipuhan na tabang sa mga tugang?

10. Kauyon kan 1 Tesalonica 2:7, ano an ginibo ni Pablo para ipahiling an pagmalasakit niya sa mga lingkod ni Jehova?

¹⁰ An halimbawa ni Pablo. Naghahanap si Pablo nin mga paagi para komendaran an mga tugang asin pakusugon sinda. Marahayon nanggad na arugon kan mga elder an halimbawa niya paagi sa pagtrato sa mga lingkod ni Jehova nin may kabuutan asin pagkamuot. (Basahon an 1 Tesalonica 2:7.) Inasigurar ni Pablo an saiyang mga kapwa parasamba na namumutan niya sinda asin na namumutan sinda ni Jehova. (2 Cor. 2:4; Efe. 2:4, 5) Trinato ni Pablo an mga nasa kongregasyon bilang mga amigo, na tinatawan sinda nin panahon para makaibanan sinda. Ipinahiling niya an saiyang tiwala sa sainda paagi sa daing pag-alangan na pagsabi sa sainda kan mga ikinakatakot asin kan mga kaluyahan niya. (2 Cor. 7:5; 1 Tim. 1:15) Pero, dai nagpokus si Pablo sa sadiri niyang mga problema. Imbes, gusto niyang tabangan an saiyang mga tugang.

11. Taano ta tinawan ni Pablo nin konseho an mga tugang?

¹¹ May mga pagkakataon na kinaipuhan ni Pablo na magtao nin konseho sa mga tugang. Pero,  dai niya iyan ginibo dahil sa pagkauyam. Nagtao siya nin konseho dahil nagmamalasakit siya sa sainda asin gusto niyang protektaran sinda sa manlain-lain na peligro. Hininguwa niya na an saiyang konseho magin madaling masabutan asin madaling akuon. Halimbawa, sa surat niya sa mga taga Corinto, nagtao si Pablo nin magabat na konseho. Pagkatapos niyang magibo an surat, sinugo niya si Tito para dumanan sinda. Interesadong marhay si Pablo na maaraman kun ano an nagin reaksiyon ninda sa saiyang surat. Naugma siyang marhay kan maaraman niya na inako ninda an saiyang konseho asin inaplikar iyan!—2 Cor. 7:6, 7.

12. Paano mapapakusog kan mga elder an saindang mga kapwa parasamba?

¹² Leksiyon. Maaarog kan mga elder an halimbawa ni Pablo paagi sa pagtao nin panahon sa saindang mga kapwa parasamba. An sarong paagi para magibo iyan iyo an pag-abot nin amay sa mga pagtiripon kan kongregasyon para magkaigwa nin nakakapakusog na pakikipag-ulay sa iba. Sa parati, dikit na minuto lang an kaipuhan para makatao nin mamumuton na pampakusog na kinakaipuhan nin sarong tugang. (Roma 1:12; Efe. 5:16) Inaarog kan sarong elder an halimbawa ni Pablo pag pinapakusog man niya an saiyang mga kapwa parasamba gamit an Tataramon nin Diyos para parigunon an saindang pagtubod asin an saindang pagtitiwala na namumutan sinda nin Diyos. Saka ipinapamati niya an saiyang pagkamuot sa mga nasa pangangataman niya. Regular niya sindang kinakaulay asin naghahanap nin mga oportunidad para komendaran sinda. Pag an sarong elder kaipuhan na magtao nin konseho, ibinabasar niya iyan sa Tataramon nin Diyos. Espesipiko siya sa pagtao nin konseho pero mabuot huling gusto niya na magin madaling akuon iyan kan tugang.—Gal. 6:1.

13. Ano an puwedeng magin epekto sa sarong elder kan saiyang mga kaluyahan?

¹³ Kun taano ta puwedeng magin dipisil iyan. An mga elder bakong perpekto. Arog kan iba, nakakagibo man sinda nin sala. (Roma 3:23) Puwedeng nasasakitan sinda kun minsan na magkaigwa nin tamang pagmansay sa mga kaluyahan ninda. May mga elder na tibaad pigpaparaisip na marhay an saindang mga kaluyahan kaya nadidisganar sinda. An iba tibaad madaling ipangatanusan an saindang mga pagkukulang kaya nababaliwala na lugod ninda iyan asin dai sinda nakakagibo nin kinakaipuhan na mga pagbabago.

14. Uyon sa Filipos 4:13, paano nakatabang ki Pablo an kapakumbabaan na magkaigwa nin tamang pagmansay sa saiyang mga kaluyahan?

¹⁴ An halimbawa ni Pablo. Huling mapakumbaba si Pablo, nasabutan niya na dai niya mapapangganahan an saiyang mga kaluyahan kun siya sana. Kaipuhan niya an kusog na hali sa Diyos. Dati, sarong maisog asin maigot na parapersegir si Pablo sa mga Kristiyano. Pero kan huri, inako niya an mga nagibo niyang sala asin handa siya na baguhon an saiyang ugali asin personalidad.  (1 Tim. 1:12-16) Sa tabang ni Jehova, si Pablo nagin sarong mamumuton, mapagmalasakit, asin mapakumbabang pastor. Aram niya na kadakul siyang kaluyahan; pero imbes na pagparaisipon an mga iyan, nagtiwala siya sa pagpapatawad ni Jehova. (Roma 7:21-25) Dai siya nag-asang magin perpekto. Imbes, pinagmaigutan niyang pauswagon an saiyang Kristiyanong personalidad asin mapakumbabang nagsarig sa tabang ni Jehova para magibo an saiyang asignasyon.—1 Cor. 9:27; basahon an Filipos 4:13.

15. Paano magkakaigwa nin tamang pagmansay an mga elder sa saindang mga kaluyahan?

¹⁵ Leksiyon. Ninonombrahan an mga elder bakong dahil perpekto sinda. Minsan siring, inaasahan sa sainda ni Jehova na aakuon ninda an mga sala ninda asin na papauswagon an saindang Kristiyanong personalidad. (Efe. 4:23, 24) Dapat na siyasaton kan sarong elder an saiyang sadiri kauyon kan mga nanunudan niya sa Bibliya para mahiling niya kun ano pa an dapat niyang baguhon. Asin tatabangan siya ni Jehova na magin maugma asin magin sarong mahusay na elder.—Sant. 1:25.

16. Ano an puwedeng mangyari kun mapokus an sarong elder sa mga kaluyahan kan iba?

¹⁶ Kun taano ta puwedeng magin dipisil iyan. Puwedeng madaling mahiling kan mga elder an mga kaluyahan kan mga tugang sa kongregasyon huling parati nindang nakakaibanan an mga ini. Minsan siring, kun dai mag-iingat an mga elder, tibaad madisganar sinda, dai magin mabuot, o magin mapanghusgar. Pinatanidan ni Pablo an mga Kristiyano na gusto ni Satanas na magin arog sinda kaiyan.—2 Cor. 2:10, 11.

17. Paano minansay ni Pablo an mga tugang?

¹⁷ An halimbawa ni Pablo. Pinagdanay niya an positibong pagmansay sa mga tugang. Aram niya an saindang mga nagibong sala, ta may beses na siya ngani mismo nakulgan man ninda. Minsan siring, aram ni Pablo na dawa nakagibo sinda nin sala, bako sindang maraot na tawo. Namumutan niya an mga tugang asin nagpokus siya sa saindang marahay na mga kuwalidad. Pag nahihiling niyang nasasakitan an mga tugang na gibuhon an tama, iniisip niya na gusto man talaga nindang gibuhon an tama asin kaipuhan lang ninda nin tabang.

18. Ano an nanudan mo sa ginibo ni Pablo manungod sa dai pagkasinabutan ni Eudias asin Sintique? (Filipos 4:1-3)

¹⁸ Halimbawa, pag-isipan kun ano an ginibo ni Pablo manungod sa nagin problema kan duwang sister sa kongregasyon nin Filipos. (Basahon an Filipos 4:1-3.) Posibleng pinabayaan ni Eudias asin Sintique an saindang dai pagkasinabutan na makaraot kan saindang pagigin mag-amiga. Dai nagin maisog o mapanghusgar si Pablo; nagpokus siya sa marahay na mga kuwalidad ninda. Mga maimbod sindang sister na haloy nang naglilingkod ki Jehova. Aram ni Pablo na namumutan sinda ni Jehova. Huling positibo an pagmansay ni Pablo sa mga sister na ini, napahiro siya na dagkahon sinda na resolberan an saindang dai pagkasinabutan. An pagmansay na iyan ni Pablo nakatabang man saiya na mapagdanay an saiyang kaugmahan asin an saiyang dayupot na pakikiamigo sa mga tugang sa kongregasyon na iyan.

19. (a) Paano mapapagdanay kan mga elder an positibong pagmansay sa saindang mga kapwa parasamba? (b) Ano an manunudan mo sa ritrato nin sarong elder na naglilinig sa Kingdom Hall?

 ¹⁹ Leksiyon. Mga elder, hilingon an marahay na mga kuwalidad kan mga tugang. An kada saro sa sainda bakong perpekto; alagad, an kada saro may mga kuwalidad na puwede niyatong hangaan. (Fil. 2:3) Iyo, tibaad kaipuhan kan mga elder na itanos paminsan-minsan an kaisipan nin sarong brother o sister. Pero arog ni Pablo, dapat na hinguwahon kan mga elder na dai magpokus sa nakakairitar na tataramon asin paggawi nin sarong tugang. Imbes, marahay na magpokus sinda sa pagkamuot ki Jehova kan tugang na iyan, sa saiyang pakatagal sa paglilingkod sa Diyos, asin sa saiyang potensiyal sa paggibo nin marahay. An mga elder na positibo an pagmansay sa iba nakakatabang na mamatian kan mga tugang an pagkamuot kan gabos sa kongregasyon.

20. Paano padagos na makikinabang an mga elder sa halimbawa ni Pablo?

²⁰ Makakatabang na marhay sa saindo mga elder kun padagos nindong pag-aadalan an halimbawa ni Pablo. Halimbawa, sa Watch Tower Publications Index, puwede nindong hilingon an main heading na “Paul” dangan an subheading na “example for elders.” Mantang binabasa nindo an nagkapirang reperensiyang yaon diyan, haputon an saindong sadiri, ‘Paano an halimbawa ni Pablo makakatabang sa sako na mapagdanay an sakong kaugmahan mantang ginigibo ko an sakong asignasyon bilang elder?’

21. Sa ano makakasigurado an mga elder?

²¹ Mga elder, tandaan na dai hinahagad saindo ni Jehova na magin perpekto; an hinahagad niya sa saindo iyo na magin maimbod kamo. (1 Cor. 4:2) Pinahalagahan ni Jehova an pagmamaigot asin kaimbudan ni Pablo. Kaya makakasigurado kamo na pinapahalagahan man nin Diyos an ginigibo nindong paglilingkod sa saiya. Dai nuarin man ‘lilingawan ni Jehova an saindong ginibo asin an pagkamuot na ipinahiling nindo para sa saiyang pangaran paagi sa paglilingkod asin padagos pang paglilingkod sa mga banal.’—Heb. 6:10.