1-2. ?Olsem wanem eksampol blong aposol Pol i save halpem ol elda tede?

 APOSOL Pol i lavem ol brata mo sista, mo hem i wok had blong givhan long olgeta. (Wok 20:31) Hemia nao from wanem ol brata sista oli lavem hem tumas. Eksampol, taem ol elda long Efesas oli harem se bambae oli neva luk Pol bakegen, “oli krae we oli krae.” (Wok 20:37) Ol elda tu oli lavem ol brata mo sista mo oli mekem evri samting we oli naf blong mekem blong givhan long olgeta. (Fil. 2:16, 17) Be samtaem, i had blong ol elda oli mekem evri samting we oli mas mekem. ?Long taem olsem, wanem i save givhan long olgeta?

² Ol elda oli save tingbaot eksampol blong Pol. (1 Kor. 11:1) Hem i no gat paoa olsem ol enjel. Hem i wan sinman, mo samtaem hem i traehad tu blong mekem samting we i stret. (Rom 7:18-20) Pol i fesem sam problem, be nating se i olsem, hem i no stop blong givhan long ol brata sista mo i no lusum glad. Taem ol elda oli folem eksampol blong Pol, oli save gohed blong mekem wok blong Jehova wetem glad, nating se oli fesem sam problem. Naoia bambae yumi luk olsem wanem oli save mekem samting ya.

3. ?Bambae yumi tokbaot wanem long stadi ya?

³ Long stadi ya, bambae yumi tokbaot fo samting we i no isi blong ol elda oli mekem: (1) gat naf taem blong prij mo mekem ol narafala wok, (2) faenem taem blong leftemap tingting blong ol brata sista, (3) dil wetem ol slak fasin blong olgeta, mo (4) dil wetem ol slak fasin blong ol narafala. Mo tu bambae yumi luk olsem wanem Pol i dil wetem ol samting ya we hem i fesem, mo olsem wanem ol elda oli save folem eksampol blong hem.

4. ?From wanem samtaem i no isi blong ol elda oli soem gudfala eksampol long wok blong prij?

⁴ ?From wanem i no isi? Ol elda oli wok strong long wok blong prij, mo oli gat ol narafala wok tu blong mekem. Eksampol, oli mekem jeaman long miting blong medel wik, mo oli lidim Baebol Stadi Blong Kongregesen. Mo tu maet oli givim ol tok. Oli traehad blong trenem ol man blong givhan mo leftemap tingting blong ol brata sista. (1 Pita 5:2) Sam elda oli wok blong bildim mo mentenem ol Haos Kingdom mo ol narafala tiokratik bilding. Nating se i olsem, impoten wok we oli mas mekem, hemia blong talemaot gud nius sem mak olsem evriwan long kongregesen.—Mat. 28:19, 20.

5. ?Pol i soem wanem nambawan eksampol long wok blong prij?

⁵ Eksampol blong Pol. Long Filipae 1:10, Pol i tokbaot samting we i givhan long hem blong wok strong long wok blong prij. Hem i se: “Faenemaot ol samting we oli moa impoten.” Pol i folem advaes ya we hem i talem. Taem hem i stat blong mekem wok blong prij, hem i luk wok ya se i moa impoten i bitim eni narafala samting long laef blong hem, mo hem i gohed blong mekem wok ya. Hem i prij “long fes blong ol man mo long ol haos wanwan.” (Wok 20:20) Hem i no jes prij smol taem nomo long wan dei, o wan dei long wan wik. !Be hem i tekem evri janis we hem i gat blong prij! Eksampol, taem hem i stap wet long ol fren blong hem long Atens, hem i talemaot gud nius long sam impoten man, mo sam long olgeta oli lesin. (Wok 17:16, 17, 34) Mo tu taem hem i “stap kalabus,” hem i prij long ol man we oli stap wetem hem.—Fil. 1:13, 14; Wok 28:16-24.

6. ?Pol i trenem ol narafala blong mekem wanem?

⁶ Pol i yusum gud taem blong hem. Oltaem hem i invaetem ol narafala blong joen wetem hem long wok blong prij. Eksampol, long faswan misinari trip blong hem, hem i tekem Jon Mak i go wetem hem. Mo long seken trip blong hem, hem i tekem Timoti. (Wok 12:25; 16:1-4) I sua se Pol i tijim olgeta olsem wanem blong lukaot gud long wan kongregesen, blong visitim ol brata sista, mo blong kam ol gudfala tija.—1 Kor. 4:17.

7. ?Olsem wanem ol elda oli save folem tok blong Pol long Efesas 6:14, 15?

⁷ Lesen. Ol elda oli save folem eksampol blong Pol blong prij long ol haos wanwan, mo oli mas rere blong prij long eni ples mo eni taem. (Ridim Efesas 6:14, 15.) Eksampol, oli save prij taem oli go long stoa o taem oli stap long ples blong wok. O taem oli stap bildim wan Haos Kingdom, oli save prij long ol man raonabaot mo long ol man we oli salem samting long olgeta. Olsem Pol, ol elda oli save  yusum taem we oli spenem long wok blong prij blong trenem ol narafala, inkludum ol man blong givhan.

8. ?Samtaem wan elda i mas mekem wanem?

⁸ Ol elda oli no mas bisi tumas long ol wok blong kongregesen o blong seket, nao oli no gat taem blong prij. Blong oli gat taem blong mekem evri samting we oli nid blong mekem, samtaem oli mas talem no long sam wok. Afta we oli tingting mo prea from samting ya, maet bambae oli luksave se sipos oli akseptem wok ya, bambae oli no naf blong mekem ol wok we oli moa impoten olsem, famle wosip evri wik, joen fulwan long wok blong prij, o trenem ol pikinini blong olgeta blong prij. Samfala oli faenem i had blong talem no long sam wok, be i gud oli tingbaot se Jehova i kasemsave se oli wantem mekem samting we i moa impoten.

9. ?Maet ol elda oli faenem i had blong mekem wanem?

⁹ ?From wanem i no isi? Ol man blong Jehova oli fesem plante problem. Long ol las dei ya, yumi nidim we narafala i leftemap tingting blong yumi, i sapotem yumi, mo i mekem yumi harem gud. Mo samtaem, samfala oli nidim we narafala i givhan long olgeta blong no mekem samting we i nogud. (1 Tes. 5:14) I tru, ol elda oli no save tekemaot evri problem we ol man blong Jehova oli stap fesem. Nating se i olsem, Jehova i wantem se ol elda oli mekem bes blong olgeta blong leftemap tingting mo protektem ol sipsip blong hem. ?Olsem wanem ol elda we oli bisi finis, oli save faenem taem blong mekem samting ya?

10. Folem 1 Tesalonaeka 2:7, ?olsem wanem Pol i soem se hem i kea long ol man blong Jehova?

¹⁰ Eksampol blong Pol. Oltaem Pol i talem gudfala toktok blong leftemap tingting blong ol brata sista. I gud ol elda oli folem eksampol blong hem blong soem lav mo kaen long ol brata mo sista. (Ridim 1 Tesalonaeka 2:7.) Pol i talem long ol brata sista se hem i lavem olgeta mo se Jehova i lavem olgeta. (2 Kor. 2:4; Efes. 2:4, 5) Hem i tritim ol brata mo sista long kongregesen olsem ol fren blong hem, mo i spenem taem wetem olgeta. Hem i soem se hem i trastem olgeta taem hem i no fraet blong talemaot ol wari blong hem mo ol mastik blong hem. (2 Kor. 7:5; 1 Tim. 1:15) Nating se i olsem, Pol i no tingbaot nomo ol problem blong hem, be i wantem halpem ol brata mo sista.

11. ?From wanem Pol i givim advaes long ol brata mo sista?

¹¹ Samtaem, Pol i mas givim advaes long ol brata mo sista. Hem i no mekem olsem from hem i kros long olgeta, be from we hem i lavem olgeta mo i wantem protektem olgeta long ol samting we i save spolem olgeta. Hem i traehad blong givim advaes we i isi blong oli kasemsave mo akseptem. Eksampol, Pol i givim strong advaes taem hem i raetem leta i go  long olgeta long Korin. Afta we hem i raetem leta ya, hem i sanem Taetas blong i go visitim olgeta. Pol i wari se ol Kristin long Korin bambae oli harem olsem wanem taem oli kasem leta ya. !Be hem i glad tumas blong harem se oli akseptem advaes ya mo folem!—2 Kor. 7:6, 7.

12. ?Ol elda oli save mekem wanem blong givhan long ol brata mo sista?

¹² Lesen. Ol elda oli save folem eksampol blong Pol taem oli spenem taem wetem ol brata mo sista. Wan rod blong mekem olsem, hemia blong oli kam eli long miting blong oli save storian blong leftemap tingting blong ol narafala. Plante taem i tekem sam minit nomo blong oli save leftemap tingting blong wan brata o sista. (Rom 1:12; Efes. 5:16) Wan elda we i folem eksampol blong Pol, bambae i yusum Baebol tu blong mekem bilif blong ol brata mo sista i kam strong, mo blong mekem oli save se God lavem olgeta. Mo tu, hem i meksua se ol brata mo sista oli save se hem i lavem olgeta. Oltaem hem i toktok wetem olgeta mo i talem gudfala tok from ol samting we oli mekem. Taem wan elda i wantem givim advaes, hem i mas meksua se advaes blong hem i stanap long Tok blong God. Hem i tok stret be long fasin we i kaen, from hem i wantem se brata o sista ya i folem advaes we hem i givim.—Gal. 6:1.

13. ?Ol slak fasin blong wan elda oli save mekem hem i harem olsem wanem?

¹³ ?From wanem i no isi? Ol elda oli no stret gud olgeta. Olgeta tu oli mekem mastik olsem evri man. (Rom 3:23) Samtaem, maet i had blong oli gat stret tingting long ol slak fasin blong olgeta. Samfala, maet oli wari tumas long ol slak fasin blong olgeta, we i mekem se tingting blong olgeta i foldaon. Sam narafala, maet oli ting nating long ol slak fasin blong olgeta, mo oli ting se i no nid blong oli mekem eni jenis.

14. Folem Filipae 4:13, ?olsem wanem tingting daon i givhan long Pol?

¹⁴ Eksampol blong Pol. Pol i gat tingting daon mo i luksave se hem wan i no save dil wetem ol slak fasin blong hem. Hem i nidim paoa blong God. Bifo, Pol i wan man we i mekem i strong long ol Kristin. Be biaen, hem i luksave se samting we hem i mekem i no stret mo hem i glad nomo blong jenisim fasin blong hem. (1 Tim. 1:12-16) Jehova i halpem Pol blong i kam wan elda we i gat lav, sore, mo tingting daon. Hem i save se hem i bin mekem plante samting we i no stret, be hem i no gohed blong tingbaot ol samting ya. Defren olgeta, Pol i bilif se Jehova bambae i fogivim hem. (Rom 7:21-25) Taswe hem i no  ekspektem blong kam stret gud olgeta. Be hem i wok had blong kam gud moa long ol Kristin fasin blong hem, mo i dipen long Jehova blong halpem hem blong finisim wok blong hem.—1 Kor. 9:27; Ridim Filipae 4:13.

15. ?Wanem tingting we ol elda oli mas gat long ol slak fasin blong olgeta?

¹⁵ Lesen. Jehova i no putumap ol elda from we oli stret gud olgeta. Be hem i wantem se oli mas talemaot mastik blong olgeta mo oli traehad blong kam gud long ol Kristin fasin blong olgeta. (Efes. 4:23, 24) Wan elda i mas stadi long Baebol blong luksave ol fasin we hem i nid blong kamgud moa long olgeta mo mekem ol jenis. Olsem nao Jehova bambae i halpem hem blong i glad mo i save mekem gud wok blong hem.—Jem. 1:25.

16. ?Wanem i save hapen sipos wan elda i lukluk nomo ol slak fasin blong narafala?

¹⁶ ?From wanem i no isi? Taem ol elda oli spenem plante taem wetem ol brata mo sista long kongregesen, i isi blong oli luk ol slak fasin blong olgeta. Taswe sipos oli no lukaot gud, oli save gat rong tingting, kam kros, mo no kaen long narafala. Pol i wonem ol Kristin se hemia nao samting we Setan i wantem olgeta blong mekem.—2 Kor. 2:10, 11.

17. ?Pol i gat wanem tingting long ol brata mo sista?

¹⁷ Eksampol blong Pol. Oltaem hem i gat stret tingting long ol brata mo sista. Hem i save se oli mekem mastik, from we samtaem oli mekem hem i harem nogud. Nating se i olsem, Pol i save se taem wan man i mekem mastik, hemia i no min se hem i wan rabis man. Hem i lavem ol brata mo sista mo i lukluk moa long ol gudfala fasin blong olgeta. Sipos ol brata mo sista oli faenem i had blong mekem samting we i stret, be Pol i tingbaot olgeta se oli gat wan gudfala hat mo oli nidim blong narafala i givhan long olgeta.

18. ?Yu yu lanem wanem long fasin blong Pol blong dil wetem situesen blong Yuodia mo Sintike? (Filipae 4:1-3)

¹⁸ Traem luk olsem wanem Pol i halpem tu sista long kongregesen blong Filipae. (Ridim Filipae 4:1-3.) I luk olsem se Yuodia mo Sintike tufala i no agri long sam samting mo tufala i no moa fren gud. Pol i no mekem i strong long tufala, be hem i tingbaot moa ol gudfala fasin blong tufala. Tufala sista ya i bin mekem wok blong Jehova longtaem. Mo Pol i save se Jehova i lavem tufala. From we Pol i gat stret tingting long tufala sista ya, hem i enkarejem tufala blong mekem pis. Pol i tingbaot moa ol gudfala fasin blong narafala, mo hemia i givhan long hem blong i gohed blong stap glad mo fren gud wetem olgeta long kongregesen ya.

19. (1) ?Olsem wanem ol elda oli save gat stret tingting long ol brata mo sista? (2) Folem pija, ?yu save lanem wanem long elda ya we i stap klinim Haos Kingdom?

¹⁹ Lesen. Ol elda, i gud yufala i tingbaot gudfala fasin blong ol brata mo sista. Nating se  evriwan oli sinman, be yet, wanwan long olgeta i gat ol gudfala fasin. (Fil. 2:3) I tru, maet samtaem ol elda oli mas givim advaes long wan brata o sista. Be olsem Pol, ol elda oli no mas tingbaot nomo ol nogud tok mo aksen blong brata o sista ya. Be oli mas tingbaot moa lav we hem i gat long Jehova, fasin blong hem blong stanap strong long wok blong God, mo olsem wanem hem i save kam gud moa long fasin blong hem. Ol elda we oli tingbaot moa ol gudfala fasin blong narafala, oli halpem ol brata mo sista blong harem save se kongregesen i lavem olgeta.

20. ?Ol elda oli save mekem wanem blong oli gohed blong kasem gudfala samting long eksampol blong Pol?

²⁰ Ol elda, bambae yufala i kasem plante gudfala samting sipos yufala i gohed blong stadi long eksampol blong Pol. Eksampol, long Watch Tower Publications Index, yufala i save luk tok ya “Paul” mo biaen luk smol stamba tok ya “example for elders.” Taem yufala i ridim sam long ol refrens we oli stap long haf ya, askem yufala wan se: ‘?Olsem wanem eksampol blong Pol i save halpem mi blong gohed blong stap glad mo mekem wok blong mi olsem wan elda?’

21. ?Ol elda oli save sua long wanem samting?

²¹ Ol elda, tingbaot se Jehova i no askem yufala blong kam stret gud olgeta, be hem i askem yufala blong mekem gud wok blong yufala. (1 Kor. 4:2) Jehova i glad long Pol from we hem i wok had, mo i mekem gud wok blong hem kasem en. Taswe, yufala i save sua se God i glad long wok we yufala i mekem blong hem. Jehova bambae i neva “fogetem ol wok ya we yufala i mekem. Hem bambae i stap tingbaot we yufala i lavem nem blong hem, taem yufala i mekem minista wok mo yufala i stap gohed yet blong givhan long ol tabu man.”—Hib. 6:10.