1-2. Engkai maka usihen arah Rasul Paulus banci nampati pertua-pertua gundari?

 KELENG kel ate Rasul Paulus man turang seninana. Kerja keras ia guna nampati kalak e. (Perb. 20:31) Emaka, turang senina pe keleng atena Paulus. Bas sada wari, sanga iteh pertua-pertua bas Epesus maka lanai pagi jumpa kalak e ras Paulus, “tangis” kalak e kerina. (Perb. 20:37) Bage ka pe, pertua-pertuata si kerja keras keleng atena turang seninana janah usahaken kalak e asa ngasupna nampatisa. (Pil. 2:16, 17) Mon-mon, mesera akap pertua-pertua ngelakoken kerina tugasna. Kai si banci nampati kalak e?

² Pertua-pertua banci ngusih Paulus. (1 Kor. 11:1) Gegeh Paulus labo bagi malekat. Labo ia sempurna janah mon-mon mesera kapna ngelakoken si benar. (Rom. 7:18-20) Lit ka erbage-bage masalah si adapina. Tapi la ia nyerah janah tetap ia ermeriah ukur. Adi usih pertua-pertua Paulus, banci adapi kalak e masalah si terjadi janah tetap ermeriah ukur bas ngelayani Jahwe. Mari sipelajari uga carana.

3. Kai kari sipelajari bas artikel enda, janah kai deba nari si banci sipelajari?

³ Bas artikel enda, sipelajari kari lit empat hal si mon-mon mesera akap pertua ngelakokenca: (1) tetap seimbang bas dahin erberita ras dahin si debanna, (2) ndarami kesempaten guna mpegegehi, (3) ngadapi kelemahen pribadi, ras (4) kerja sama ras kalak si la sempurna. Sipelajari ka kari uga Paulus ngadapi empatna masalah e ras uga pertua-pertua banci ngusih ia.

4. Engkai maka mon-mon mesera akap pertua-pertua jadi usihen bas dahin erberita?

⁴ Engkai maka mon-mon mesera ngelakokenca? Selain minpin dahin erberita, melala denga tugas si arus ilakoken pertua-pertua. Contohna, enterem arah kalak e si rusur jadi ketua bas perpulungen tengah pekan ras mandu Pelajaren Pustaka si Badia Runggun. Dat kalak e ka tugas guna mpeseh khotbah. Arus ka isampati kalak e sinampati runggun, ras sibuk kalak e mpegegehi turang senina. (1 Pet. 5:2) Piga-piga pertua ikut ngurus Bale Kerajan ras bangunen si deban si ipake guna nembah Jahwe. Tapi bali bagi kerina turang senina, dahin si pentingna man pertua-pertua eme erberita si meriah.​—Mat. 28:19, 20.

5. Kai usihen si iban Paulus selaku perberita?

⁵ Usihen Paulus. Bas Pilipi 1:10, ituriken Paulus kai si erban ia berhasil selaku perberita. Nina, ‘Pastiken kai si lebih penting.’ Idalanken Paulus kai si katakenna e. Enggo itugasken ia jadi perberita janah puluhen tahun dekahna ianggapna dahin e si pentingna. Erberita ia “i lebe-lebe jelma si enterem bage pe arah rumah ku rumah.” (Perb. 20:20) Labo bas jam tertentu ntah pe bas wari-wari tertentu saja ngenca ia erberita. Tapi lit kenca kesempaten, erberita ia. Contohna, sanga nimai temanna ia bas Aten, erberita ia man sada kelompok kalak si penting janah lit si nggit megikenca. (Perb. 17:16, 17, 34) Sanga ia “ipenjaraken” pe, erberita ia man kalak si lit i sekelilingna.​—Pil. 1:13, 14; Perb. 28:16-24.

6. Kai si ajarken Paulus man kalak si deban?

⁶ Igunaken Paulus waktuna alu cara si mehulina. Rusur ajakna kalak si deban bas dahin erberita. Contohna, bas perdalanen utusen injilna si pertama, ajakna Johanes si igelari Markus. Bas perdalanen utusen injilna si peduaken, ajakna Timotius. (Perb. 12:25; 16:1-4) Ilakoken Paulus si mehulina guna ngajari kalak e kerna uga carana ngaturken runggun, mpermakani, ras gelah beluh ngajar.​—1 Kor. 4:17.

7. Uga pertua-pertua banci ndalanken kai si kataken Paulus bas Epesus 6:14, 15?

⁷ Pelajarenna. Pertua-pertua banci ka ngusih Paulus alu erberita i japa pe ras katawari pe sanga lit kesempaten, labo saja arah rumah ku rumah. (Baca Epesus 6:14, 15.) Contohna, banci kalak e erberita sanga belanja ntah pe bas inganna erdahin. Selain si e, sanga kalak e nampati bas  dahin pembangunen, banci kalak e erberita man kalak si lit i sekitar daerah pembangunen e ntah pe man kalak si ndayaken bahan bangunen. Bali bagi Paulus, banci pake pertua-pertua waktuna sanga erberita guna ngelatih kalak si deban, termasuk sinampati runggun.

8. Mon-mon, kai si banci saja arus ilakoken sekalak pertua?

⁸ Banci saja melala tugas pertua-pertua bas runggun ntah pe bas wilayah. Tapi ula min perban sibuksa kalak e, lanai lit waktuna erberita. Gelah banci tetap seimbang, mon-mon arus tulak kalak e tugas tambahen. Kenca ukuri kalak e ras totokenna kerna si e, banci saja iteh kalak e maka adi alokenna tugas e lanai kari lit waktuna ngelakoken dahin si terpentingen. Contohna, ibadah keluarga tiap minggu, ikut erberita si meriah, ntah pe ngelatih anak-anakna bas dahin erberita. Piga-piga pertua mesera kapna nulak tugas tambahen, tapi banci kalak e tek maka angkai Jahwe nge sura-sura kalak e gelah tetap seimbang bas kerinana.

9. Perban melala tugas si arus ilakoken pertua-pertua, banci saja kai si mesera akap kalak e ngelakokenca?

⁹ Engkai maka mon-mon mesera ngelakokenca? Melala masalah si arus iadapi umat Jahwe. Bas wari-wari pendungi enda, kerina kita perlu ipegegehi, isampati, ras iapuli. Selain si e, lit ka si arus isampati mpengadi kebiasan si la mehuli. (1 Tes. 5:14) Memang labo banci idungi pertua-pertua kerina masalah si iadapi umat Jahwe. Tapi ate Jahwe, ilakoken pertua-pertua min asa ngasupna guna mpegegehi ras ngelindungi umatNa. Uga carana pertua-pertua mereken penampat si iperluken man turang senina, amin pe mbue si arus ilakoken kalak e?

10. Bagi si ikataken bas 1 Tesalonika 2:7, uga perbahanen Paulus man turang seninana?

¹⁰ Usihen Paulus. Lalap darami Paulus kesempaten guna muji turang seninana ras mpegegehi kalak e. Pertua-pertua pe banci ngusih Paulus. Carana? Perkeleng ras mehuli min perbahanen kalak e man turang seninana. (Baca 1 Tesalonika 2:7.) Ikataken Paulus ka man turang seninana maka keleng atena kalak e janah Jahwe pe keleng ateNa kalak e. (2 Kor. 2:4; Ep. 2:4, 5) Iban Paulus turang senina bagi temanna, janah rusur ia ras kalak e. Buktikenna maka tek ia man kalak e alu nceritaken kerna kebiarenna ras kelemahenna. (2 Kor. 7:5; 1 Tim. 1:15) Tapi, tujun Paulus labo gelah ia iperdiateken turang seninana. Situhuna, atena gelah nampati kalak e.

11. Engkai maka ipersingeti Paulus turang seninana?

 ¹¹ Mon-mon, perlu ipersingeti Paulus turang senina. Persingetina kalak e labo perban nembeh atena, tapi perban keleng atena janah lindungina atena kalak e arah erbage-bage bahaya secara rohani. Usahakenna gelah persingetna e nukah iangkai ras gelah banci idalanken kalak e. Contohna, bas suratna man kalak Korinti, iberena persinget si tegas. Kenca dung itulisna suratna e, suruhna Titus ndahi kalak e. Merhat kel Paulus metehsa uga tanggapen turang seninana man suratna ndai. Kepeken nggit turang senina ngaloken persingetna e ras ndalankenca. Emaka, meriah kel ukur Paulus!​—2 Kor. 7:6, 7.

12. Uga carana pertua-pertua mpegegehi turang seninana?

¹² Pelajarenna. Banci usih pertua-pertua Paulus adi rusur kalak e ras turang senina. Salah sada carana eme lampas kalak e reh ku perpulungen gelah banci ercakap-cakap ras turang senina guna mpegegehi sada ras si debanna. Biasana piga-piga menit saja pe ercakap-cakap, enggo banci erban turang senina terpegegehi. (Rom. 1:12; Ep. 5:16) Pertua si ngusih Paulus pe mpegegehi turang seninana alu Kata Dibata janah sampatina kalak e gelah tek maka keleng ate Dibata man kalak e. Selain si e, buktikenna ka maka keleng atena turang senina. Rusur ia ercakap-cakap ras kalak e janah daramina kesempaten guna muji kalak e. Adi perlu akap pertua mereken persinget, pastikenna lalap maka persingetna e erpalasken Pustaka. Sanga pertua mereken persinget, persinget e arus terus terang tapi perkeleng gelah banci idalanken turang senina.​—Gal. 6:1.

13. Uga perasan pertua nandangi kelemahenna?

¹³ Engkai maka mon-mon mesera ngelakokenca? Pertua-pertua la sempurna. Banci ban kalak e kesalahen bali bagi kerina jelma. (Rom. 3:23) Mon-mon, mesera kap kalak e gelah banci seimbang perukurenna kerna kelemahen pribadina. Lit si kuatir kel nandangi kelemahenna, emaka kitik ukurna. Lit ka si banci mis lupa nandangi kelemahenna, emaka la kapna perlu erban perubahen.

14. Menurut Pilipi 4:13, uga sipat si meteruk rukur nampati Paulus gelah benar carana rukur kerna kelemahenna?

¹⁴ Usihen Paulus. Perban Paulus meteruk rukur, itehna maka labo banci adapina kelemahenna e sisada. Perlu ia gegeh  arah Dibata. Mbarenda semangat kel ia nyiksa kalak Kristen. Tapi dungna tehna maka salah perbahanenna e janah nggit ia robah. (1 Tim. 1:12-16) Alu penampat Jahwe, ia jadi pertua si perkeleng, perkuah, ras meteruk rukur. Itehna nge maka melala kelemahenna. Tapi labo lalap ukurina si e. Tek ia maka nggit nge Jahwe ngampuni ia. (Rom. 7:21-25) Labo arapken Paulus ia jadi kalak si sempurna. Tapi erjuang ia mpehuli sipat-sipatna janah andalkenna penampat Jahwe bas ndungi dahinna.​—1 Kor. 9:27; baca Pilipi 4:13.

15. Uga arusna perukuren pertua-pertua nandangi kelemahenna?

¹⁵ Pelajarenna. Pertua-pertua ilantik labo perban kalak e sempurna. Tapi iarapken Jahwe gelah akui kalak e kelemahenna janah terus usahakenna mpehuli sipat-sipatna. (Ep. 4:23, 24) Arus gunaken pertua Pustaka guna mereksa dirina ras erban perubahen si iperluken. Alu bage, isampati Jahwe me kalak e gelah ermeriah ukur ras jadi pertua si mehuli.​—Jak. 1:25.

16. Kai si banci terjadi adi lalap ukuri pertua kelemahen turang seninana?

¹⁶ Engkai maka mon-mon mesera ngelakokenca? Perban pertua-pertua rusur kerja sama ras turang seninana, nukah akap kalak e ngidah kelemahen turang seninana. Adi la kalak e hati-hati, e banci erban nembeh atena turang seninana, la mehuli perbahanenna, ras hakimina turang seninana. Persingeti Paulus kalak Kristen maka bage me ate Setan si ilakoken kalak e.​—2 Kor. 2:10, 11.

17. Uga perukuren Paulus kerna turang seninana?

¹⁷ Usihen Paulus. Si mehulina lalap ukuri Paulus kerna turang seninana. Itehna maka turang seninana labo sempurna janah mon-mon ia pe kena akibat arah perbahanen kalak e. Tapi iteh Paulus maka kalak si ngelakoken kesalahen labo ertina ia kalak jahat. Keleng atena turang seninana janah ukurina lalap sipat-sipatna si mehuli. Adi lit turang senina si mesera kapna ngelakoken kai si benar, ianggapna maka si mehuli nge ate kalak e ilakokenna, mungkin perlu ia penampat.

18. Pelajaren kai si banci sidat arah Paulus sanga sampatina Eiodia ras Sintike? (Pilipi 4:1-3)

¹⁸ Cuba ukuri usihen Paulus sanga sampatina Eiodia ras Sintike bas runggun Pilipi. (Baca Pilipi 4:1-3.) Banci saja la sicocoken duana turang senina e, dungna lanai kalak e erteman. Labo pandangi Paulus kalak e ntah pe la mehuli perbahanenna man kalak e. Tapi ukuri Paulus sipat-sipat si mehuli arah kalak e. Enggo ndekah kalak e ngelayani Jahwe alu setia.  Teh Paulus maka keleng ate Jahwe kalak e. Emaka nggit ia mpersingeti kalak e guna erdame mulihi. Banci Paulus tetap ermeriah ukur janah rembak ras turang senina bas runggun e perban inenna sipat-sipat si mehuli arah turang seninana.

19. (a) Uga pertua-pertua banci tetap ngenen sipat-sipat si mehuli arah turang seninana? (b) Kai si banci sipelajari arah gambar sekalak pertua si mbersihken Bale Kerajan?

¹⁹ Pelajarenna. Pertua-pertua, nenlah sipat-sipat si mehuli arah turang seninandu. Memang kerina kita la sempurna, tapi tiap kalak lit nge sipatna si mehuli. (Pil. 2:3) Banci saja pertua-pertua arus mere persinget man turang seninana. Tapi bali bagi Paulus, perlu usahaken pertua gelah la lalap ukurina ranan ras perbahanen si la mehuli arah turang seninana e. Si perlu lalap ukuri pertua-pertua eme kekelengen turang seninana man Jahwe, kesetianna ngelayani Dibata, bage pe kengasupenna bas ngelakoken si mehuli. Adi bage ban pertua-pertua, turang senina bas runggun banci nggejapken kekelengen.

20. Uga pertua-pertua banci terus ngusih Paulus?

²⁰ Pertua-pertua, teruslah usih Paulus. Banci baca kena bahan-bahan si lit bas Indeks Publikasi Menara Pengawal, banci nen kena bagin si erjudul “Paulus” kenca si e ku bagin “teladan bagi penatua.” Sanga baca kena piga-piga bahan si lit i je, cuba ukuri kena penungkunen enda: ‘Uga usihen arah Paulus banci nampati aku tetap ermeriah ukur bas ndalanken tugasku selaku pertua?’

21. Pertua-pertua tek kerna kai?

²¹ Pertua-pertua, ingetlah maka labo arapken Jahwe gelah kena sempurna, si iarapkenNa eme gelah kena setia. (1 Kor. 4:2) Iergai Jahwe kerja keras Paulus ras kesetianna. Teklah kena maka ergai Dibata kerja keras kena bas ngelayani Ia. ‘Labo lupaken Jahwe perbahanen kena bage pe kekelengen si buktiken kena guna gelarNa alu ngelayani kalak si badia ras terus ngelayanisa.’​—Heb. 6:10.