1, 2. Ka uagu gayara lubéi líderaguniña wéiyaaña lidan afiñeni lani Pábulu hénpulu?

 HÍNSIÑETIÑA meha íbirigu kristiánugu lun apostolu Pábulu, ligía meha lawadigimaridubei hawagu mabuchadunga luagu (Adü. 20:31). Ligía meha hínsiñe lubéi houn. Kei hénpulu luagu aban dan, da le híchugubei wéiyaaña lidan afiñeni ha éfesubaña fe marihíndügüya hamaali lan apostolu Pábulu “aba hayahun súngubei lau igarigu” (Adü. 20:37). Ítarameme, wéiriti hínsiñe íbirigu houn wéiyaaña lidan afiñeni ani adüga hamuti sun hayaraati lun híderaguniña (Fili. 2:16, 17). Anihein dan gagibuguatiña luma fiu lénrengunga. Ka gayaraabei líderaguniña?

² Wéiyaaña lidan afiñeni ha gíbebei haberesegun, gayaraati háyeihani lani apostolu Pábulu hénpulu (1 Ko. 11:1). Mabafuti meha Pábulu kei ánheligu, aban meha wügüri charati ligía, ligía anihein lubéi meha dan láfaagun lun ladügüni le buídubei (Rom. 7:18-20). Íbini gagibugua lan meha luma saragu turobuli mábürühanti larüna, ani meferidirun lumuti giñe lugundan. Anhein háyeihan wéiyaaña lidan afiñeni lani Pábulu hénpulu hasigiruba eseriwida lun Heowá lau ugundani íbini laganagua turobuli. Ariha waméi ida luba lan hadügüni.

3. Kaba uagu wayanuhan lidan aturiahani le, ani kaba wafurendeira?

³ Lidan aturiahani le wayanuhaba luagu gádürü katei létima úmabei hagagibudagua wéiyaaña lidan afiñeni: 1) lunti gadaani hamá lun hapurichihan luma lun hadügüni le líbiri haberesegun, 2) Hóunigiruniña íbirigu lau ínsiñehabuni, 3) Hagagibudagun luma hachara guánarügü, 4) Hagagibudagun luma hachara amu. Wafurendeiruba giñe ida liña lan lagagibudagun Pábulu luma kada sügǘ le ani ida luba lan hasigirun wéiyaaña lidan afiñeni áyeihei lani hénpulu.

4. Ka san uagu gayara lubéi hénrengu lan houn wéiyaaña lidan afiñeni aban hamá hénpulu lidan apurichihani?

⁴ Ka uagu hénrengu lubéi. Amu luéi aban hamá hénpulu lidan apurichihani, gíbeti heberesegun wéiyaaña lidan afiñeni. Ariha wamá fiu lídangiñe. Anihein dan mosu lan halidihani adamuridaguni le adügǘbei labadinagua dimaasu o Taturiahóun Bíbülia lidan damuriguaü. Amu luéi lira, mosu giñe harihin luagu ámuya dasi o haransehan yanu. Ani díreitiña giñe dan lun híderaguniña ídehatiña lidan damuriguaü luma lun híchugun dǘgüdaguaü houn íbirigu (1 Fe. 5:2). Añahein giñe wéiyaaña ídehatiña lidan tábunawagun luma letenirun tun Luban Adamuridaguni tuma burí amu muna to ayusurúboun lun láhudurawagun lun Heowá. Lóugiñe sun katei, le súdinitimabei houn wéiyaaña lidan afiñeni hapurichihani uganu buiti, kei hadügüni ha híbiri lílana damuriguaü (Mat. 28:19, 20).

5. Ka hénpulu líchugubei Pábulu luagu apurichihani?

⁵ Lani Pábulu hénpulu. Lidan Filipuna 1:10, daritiwa ka lan uagu aban lubéi apurichihati buiti Pábulu. Ñein líchigei adundehani le woun: “lun gayara lan hanúadahani katei le buídubei”. Ligía guánarügü afalarubalin adundehani le líchugubei. Rúwati aban dasi lun ani ariha lumuti kei aban katei le súdinitimabei lidan libagari. Apurichihati lidan guririguaü luma tidan burí muna (Adü. 20:20). Mámarügü lidan ítaga oura lapurichihan ni aban weyu lidan dimaasu. Súnwandan meha lau apurichiha, meferidirunti meha ni murusun chansi. Kéiburi, dan le lagurabahabaliña lánigu paaná lidan uburugu Atenasi, aba layanuhan luagu uganu buiti houn fiu gürigia ha súdinibaña ani buiti lidin lun (Adü. 17:16, 17, 34). Íbini dan le dáüwañu lubéi lúbiñe Roma apurichihati houn sun gürigia ha achülürübaña arihei (Fili. 1:13, 14; Adü. 28:16-24).

6. Ida liña larufudahan Pábulu houn amu íbirigu?

⁶ Subudi lumuti meha Pábulu ida luba lan meferidirun lan dan. Héchuti meha agunbiraha amu lun houdin apurichiha luma. Kéiburi, dan le lídinbei apurichiha luagu furumiñeti wéiyaasu kei misionéru, agunbiraha lumuti Huan Márükosu lúmagua, ani lidan libiaman luéiyasun ñǘdünti Timotéu luma (Adü. 12:25; 16:1-4). Áfaaguati lun larufudahan houn wügüriña ha lun gahandilihadi hamá katei lidan damuriguaü, gíchigadi hamá dǘgüdaguaü houn íbirigu luma lun máisturugu hamá ha buítiña (1 Ko. 4:17).

7. Ida luba hasigiruni wéiyaaña lidan afiñeni adundehani le líchugubei Pábulu le adarirubei lidan Éfesuna 6:14, 15?

⁷ Le wafurendeirubei. Gayaraati giñe háyeihani wéiyaaña lidan afiñeni lani Pábulu hénpulu lau meferidirun hamá ni murusun chansi lun hapurichihan (aliiha huméi Éfesuna 6:14, 15). Kéiburi, gayaraati hapurichihan dan le houdin agañeiha o lidan fulasu le ñein lubéi hawadigimarida. Anhein hídehaña lubéi lidan bunaguaü  le tani lóundarun Heowá, gayaraati hayanuhan luagu uganu buiti houn besinagu luma houn ha achülürübaña ederegerei lubuña bunaguaü. Ítara kei ladügüni Pábulu, gayaraati hayusuruni dan le hásügürübei apurichiha lun harufudahan houn amu, kéiburi houn ídehatiña lidan damuriguaü.

8. Ka lunbei hadügüni wéiyaaña lidan afiñeni dan le mégeiwa lan?

⁸ Moun lumuti weiri lan haberesegun wéiyaaña lidan afiñeni lau hetenirun lun hani buligasion lidan damuriguaü o lidan sirkuitu darí lun madaani hamá lun hapurichihan. Anhein busén habéi lun magibedagun lan dasi hau, anihein dan mosu lan hamaharun lun ítaga dasi. Másiñati lárigiñe lan hafurieidun libügürü katei le aba híchugun fe anhein lan hetenira lun ítaga dasi metenibadün lan lun katei le súdinitimabei, kei burí letenirún lun áhuduraguni keisi iduheñu sagü dimaasu, hapurichihan o harufudahan houn hasaanigu lun gapurichihadi hamá. Añahein hádangiñe íbirigu hénrenguti houn hariñagun uá dan le lichugún somu dasi houn, lau sun lira chouru huméi gunfuranda lumutün lan Heowá buidu luagu busén humá hadügüni katei lau lubudubu.

9. Ka hénrengubei houn wéiyaaña lidan afiñeni ladüga liibe heberesegun?

⁹ Ka uagu hénrengu lubéi. Kei le wawinwanduña lubéi lidan lagumuhóun dan gíbeti lénrengunga le ídangiñebei hásügüra lubúeingu Heowá. Ligíati, mégeitiwa sun wagía dǘgüdaguaü luma gurasu. Anihein dan megei hamá fiu íbirigu ídemuei lun midin hamá lídangiñe luriban üma (1 Tesa. 5:14). Inarüni siñá hamani wéiyaaña lidan afiñeni agidara sun turobuli le úmabei wagagibudagua. Gama lumoun, busenti Heowá lun hadügüni wéiyaaña lidan afiñeni sun hayaraati lun híchugun dǘgüdaguaü luma lun hóunigiruniña lumutuniña. Ida luba hasagarun wéiyaaña lidan afiñeni ha beresegubaña dan lun híderaguniña íbirigu?

10. Según 1 Tesalónikana 2:7, ida liña lóuseruniña Pábulu líbirigu?

¹⁰ Lani Pábulu hénpulu. Súnwandan láluahan Pábulu lariñagun houn íbirigu buidu lan hadüga ani ruti giñe dǘgüdaguaü houn. Buídubei giñe lun háyeihani wéiyaaña lidan afiñeni Pábulu lau harufudun ínsiñeni lidan hóuseruniña íbirigu (aliiha huméi 1 Tesalónikana 2:7). Chóurugüda lumuti Pábulu houn líbirigu hínsiñe hamá dandu lun kei lun Heowá (2 Ko. 2:4; Efe. 2:4, 5). Óusera lumutiña kei lumadagu ani sügüti dan hama. Arufuda lumuti afiñe lan hawagu lau layanuhan houn furangu luagu lanufude luma luagu lichara (2 Ko. 7:5; 1 Tim. 1:15). Lau sun lira meteniti lun liturobulin, lun líderaguniña íbirigu letenira.

11. Ka san uagu líchiga Pábulu adundehani houn lánigu paaná kristiánugu?

¹¹ Anihein meha dan mosu lan lererehan Pábulu houn lánigu paaná kristiánugu. Madügün lumuti ladüga ligañi, ladügünbalin ladüga berese lan hau ani mabusenrunti lun héiguadun lidoun turobuli. Áfaaguati lun ménrengun lan  adundehani le líchugubei houn, áfaaguati giñe lun larihini hánharun lun adundehani. Kéiburi, dan le labürühanbei houn korintuna ererehati houn furangu. Dan lárigiñe aba lóunahani Titu arihaña ladüga busenti meha lun lasubudiruni ida liña lan léiguadun le tariñagubei ligaradan houn. Ma lugundan dan le líchugubei fe anha hamá lun adundehani le líchugubei houn! (2 Ko. 7:6, 7).

12. Ka gayaraabei hadügüni wéiyaaña lidan afiñeni lun híchugun dǘgüdaguaü luma gurasu houn hábirigu?

¹² Le wafurendeirubei. Gayaraati hafalaruni wéiyaaña lidan afiñeni lani Pábulu hénpulu lau hásügürün dan hama hábirigu. Gayaraati hadügüni lau chülügiñe hamá lidoun adamuridaguni lun hayanuhan hamá luma lun híchugun dǘgüdaguaü hámagua. Anihein dan fiúrügüñein minutu emegeirúa lun lichugún gurasu lun aban íbiri luma ínsiñeni le lemegeirunbei (Rom. 1:12; Efe. 5:16). Falá hamuti wéiyaaña lidan afiñeni lani Pábulu hénpulu lau hayusurunu Bíbülia lun híchugun gurasu houn hábirigu luma lun hariñaguni houn hínsiñe hamá lun Heowá. Lau lira arufudatiña ínsiñehabuni lau gabügürügua lan hagúahan houn o hayanuhan hamá luma lau háluahan chansi lun hariñagun houn buidu lan hadüga. Anhein lunti lubéi lererehan aban wéiyaali lidan afiñeni lun aban íbiri lunti tídangiñeti lan Lererun Bungiu le lunbei lariñaguni. Lunti furangu lan ani lau ínsiñeni sagá hamaamuga íbirigu buiti lídangiñe (Gal. 6:1).

13. Ka lánibei lichara aban wéiyaali lidan afiñeni lidan lasandiragun lungua?

¹³ Ka uagu hénrengu lubéi. Charatiña giñe wéiyaaña lidan afiñeni ítara kei sun gürigia (Rom. 3:23). Anihein dan mosu háfaagun lun harihini hachara lau aban lubuidun igaburi. Másiñati lábürühan harüna ladüga siñá lan hetenirun lun le siñá habéi adüga. Añahein amu marihin hamuti hachara kei aban katei mabuidunti ani saminatiña mama lan mosu hadügün asansiruni.

14. Según Filipuna 4:13, ida liña líderaguni ǘnabuguni Pábulu lun lagagibudagun luma lichara?

¹⁴ Lani Pábulu hénpulu. Ariñagati meha apostolu Pábulu siñá lan lagagibudagun luma lichara lábugua. Subudi lumuti meha megei lani erei le ñǘbuinbei lúmagiñe Bungiu. Lidan dan le sügühalibei éibaaha lumutiña meha kristiánugu lau furundei. Lau lásügürün dan aba gunfuranda lani wuriba lan le ladügübei ani aranseñu liña meha lun lasansiruni ligaburi (1 Tim. 1:12-16). Lau lídehan Heowá chülüti Pábulu lun aban lan wéiyaali lidan afiñeni le hínsiñehabuti, gudemehabu ani ǘnabugu ligía. Gáriti meha lun dan le líchugubei fe luagu lichara, gama lumoun, aba líchugun fe feruduna lubéi lan Heowá ani aba masigi hali lan asaminara luagu lichara (Rom. 7:21-25). Subudi lumuti meha siñá lan macharabei lan, gama lumoun adüga lumuti sun liyaraati lun labuiduragüdüni ligaburi keisi  kristiánu, lau ǘnabuguni aba larabachun luagu Heowá lun gayara lan lagunfulirun lau lani ministeriu (1 Ko. 9:27; aliiha huméi Filipuna 4:13).

15. Ida luba larihini aban wéiyaali lidan afiñeni lichara lau aban igaburi buiti?

¹⁵ Le wafurendeirubei. Mama ladüga machara hamá wéiyaaña lidan afiñeni hiridúnbei lun wéiyaaña hamá, lau sun lira, agurabati Heowá lun hánharun lun hachara luma lun habuiduragüdüni hagaburi kei aban kristiánu (Efe. 4:23, 24). Aban wéiyaali lidan afiñeni lunti layusurunu Lererun Bungiu lun larihini halía lan lemegeira asansiruni luma lun ladügüni. Ítarati líderagubei Heowá lun gunda lan luma lun lagunfuliruni lidasin (Sant. 1:25).

16. Ka gayaraabei lasuseredun ánhaña eredera wéiyaaña lidan afiñeni etenira lun hachara íbirigu?

¹⁶ Ka uagu hénrengu lubéi. Másiñati harihini wéiyaaña lidan afiñeni hachara íbirigu dan le hásügürün dan hama. Ánhaña móunigiragun wéiyaaña lidan afiñeni houngua gayaraabei hasafaragun ani magudemehabu hagíame o gekeheredin hamá. Ariñagati Pábulu anihán lan le labusenrunbei Mafia (2 Ko. 2:10, 11).

17. Ida liña larihiniña Pábulu íbirigu?

¹⁷ Lani Pábulu hénpulu. Súnwandan meha larihiniña Pábulu íbirigu lau aban lubuidun igaburi. Mama ladüga marihin lani hachara, ladüga anihein burí dan adügati hachara lun lasandiragun lungua wuriba. Subudi lumuti meha Pábulu mama lan ladüga chará lan aban gürigia lun wuribabei lan. Hínsiñetiña meha íbirigu lun ani téniti meha lun lubuidun hagaburi. Íbini larihini hénrengu lan houn lun hadügüni le buídubei, gabaroun lumuti busén hamá hadügüni le buídubei megeirügütiña murusun ídemuei.

18. Ka wafurendeirubei lídangiñe ligaburi líderaguniña Pábulu Ewodía tuma Síntike? (Filipuna 4:1-3)

¹⁸ Ariha waméi ida liña lan líderaguniña Pábulu bián íbirigu würiña ha lílana damuriguaü le Filipubei (aliiha huméi Filipuna 4:1-3). Genegeti aban lan tadisedun Ewodía tuéi Síntike ladüga gaturobulin hamá hámagua. Lubaragiñe letenirun Pábulu lun turobuli le hádanbei íbirigu ha, aba letenirun lun lubuidun igaburi le hawagubei lau heseriwidun lun Bungiu lau úaraguni. Subudi lumuti meha hínsiñe hamá lun Heowá. Kei le ariha lubalin lubuidun hagaburi aba línchahaniña lun harandarun. Ladüga letenirun Pábulu lun lubuidun hagaburi íbirigu ha adügati lira lun lagundaarun luma lun lakipuruni lubuidun lumadagua hama íbirigu ha lídanbaña damuriguaü ligía.

19. a) Ka gayaraabei hadügüni wéiyaaña lidan afiñeni lun harihiniña íbirigu lidan aban lubuidun igaburi? b) Ka hafurendeirubei tídangiñe iyawaü to ñein lubéi aban wéiyaali lidan afiñeni arumadahoun Luban Adamuridaguni?

¹⁹ Le wafurendeirubei. Wéiyaaña lidan afiñeni teni humá lun lubuidun igaburi le hawagubei íbirigu. Inarüni chará hamá íbirigu, lau sun lira anihein igaburi buiti hawagu (Fili. 2:3). Ani chóuruti anihein lan dan mósume lan hererehan lun somu íbiri o tun somu íbiri. Ítara kei Pábulu  áfaagua humá lun metenirun humá lun dimurei ni lun katei le adügübei lun hagañidun amu. Teni humá lun ínsiñeni le hasandirubei íbirigu ha luagu Heowá, ani ariha huméi heseriwiduña lan lun lau awanduni ani gayara lan habuiduragüdüni hagaburi. Wéiyaaña ha arihibaliña íbirigu lau aban lubuidun igaburi adügatiña lun hasandirun íbirigu ha aban ínsiñeni le móubati lidan damuriguaü.

20. Ka lunbei hadügüni wéiyaaña lidan afiñeni lun hasigirun afurendeira lídangiñe lani Pábulu hénpulu?

²⁰ Buídubei lidin houn wéiyaaña lidan afiñeni ánhaña asigirei aturiahei lani Pábulu hénpulu. Kei hénpulu, belú humá lidoun Índice de las publicaciones Watch Tower ábame háluahani lidan ebelaagülei “Pablo” lárigiñeme ábame hebelurun lidoun “ejemplo para los ancianos”. Danme le hakutihani ariñahani le álügüdagua humá hungua: “Ida luba líderagunina lani Pábulu hénpulu lun nasigirun adügei nidasin kei wéiyaali lidan afiñeni lau ugundani?”.

21. Ka gayaraabei hachoururuni wéiyaaña lidan afiñeni?

²¹ Wéiyaaña lidan afiñeni, aritagua huméi magurabahan lan Heowá lun macharabadün lan, le lagurabahabei húmagiñe lun úaragua humá lun luma lun gunda humá (1 Ko. 4:2). Gebegiti meha lun Heowá úaraguni le larufudubei Pábulu luma le ladügübei. Chouru huméi gebegi lan lun Heowá wadagimanu le hadügübei, kei lariñaguni Ebüréu 6:10: “Mabulieidun lubéi le adüga humaalibei, luma ínsiñehabuni le arufuda humaalibei lun lau híderaguniña hiduheñu luagu afiñeni, katei le áünhaguabei adüga”.