1-2. Txikombiso txa mpostoli Paulo txi nga vhunisa kutxani madhota nyamsi?

 MPOSTOLI Paulo a txi va randa ngutu vanawe. Ene a ti thuma ngutu kasi ku va khatalela. (Mith. 20:31) Kota wuyelo Makristu onewo ma ti mu randa ngutu Paulo. Dikhambi dimwani mbimo yi madhota a khe Efesu ma nga ziva ti to ma si na ku mu wona kambe mpostoli Paulo “votshe va to khata kudila ngutu.” (Mith. 20:37) Madhota ma randa ngutu vanathu ni ku va maha totshe ti va nga ti kotako kasi ku va vhuna. (Vaf. 2:16, 17) Kambe mbimo yimwani madhota ma manana ni sikarato, se ngu ti ti nga ma vhunako ti to me wonisana naso?

² Madhota ma nga gonda ka txikombiso txa mpostoli Paulo. (1 Vak. 11:1) Ene i ti m’thu wo fana ni nathu. Paulo a sa hetiseka, ni ku mbimo yimwani a txi lwa ngutu ti to e maha ati i ku ta tinene. (Var. 7:18-20) Ene a txi wonisana ni sikarato so tala. Kambe eto kha ta maha ti to Paulo e luza litsako lakwe. Madhota ma nga xula sikarato asi ma wonisanako naso me simama me va ni litsako mbimo yi ma thumelako Jehovha. He wone ti to ma nga mahisa kutxani.

3. Hi na bhula ngu txani ka gondo yiya?

³ Ka gondo yiya hi na wona mune wa sikarato asi madhota ma wonisanako naso. 1) Ku va ni mbimo yo txhumayela ni kumaha mithumo yimwani , 2) kuva vadyisi vavanene, 3) kuwonisana ni kutandeka kwawe, 4) kuwonisana ni kwa mbi hetiseka ka vamwani. Hi na tshumela hi wona nzila yi Paulo a nga xula ngu yona sikarato siya, ni ku madhota ma nga maha txani kasi ku mu tekelela.

4. Ngu kutxani madhota ti nga wonekako ti txi ma karatela kuthangela ka mthumo wo txhumayela?

⁴ Ngu kutxani i di txikarato. Hahanze ka mithumo yimwani ayi madhota ma yi mahako yo thangela dibanzani ni kutxhumayela, vona va ni mithumo yimwani yo tala. Ngu txikombiso, vona va txitxana kova mzumba-txitulo ka mitshangano ya hagari ka divhiki ni kutshimbitisa gondo ya Bhiblia ya dibanza. Vona va tshumela ve khatalela siavelo so veka miwomba-wombo. Ni ku va bhisi va txi trenara malanda a wuthumeli ni ku tshumela me kuzeta vanathu dibanzani. (1 Pedro 5:2) Madhota mamwani ma pateka ko aka ni kuwuseta tinyumba ta Mfumo kumweko ni tinyumba timwani ta wukhozeli. Kambe ona ma ti ziva ti to mthumo awu i ku wa lisima ngutu kwawe ngu txhumayela mahungu a Mfumo, kufana ni vahuweleli vamwani dibanzani.—Mat. 28:19, 20.

5. Ngu txihi txikombiso atxi mpostoli Paulo a nga hi siyela?

⁵ Txikombiso txa Paulo. Ati ti nga txi vhuna Paulo ti to e humelela ka mthumo wakwe ngu ti ti ku ka Vafilipiya 1:10, aha a nga khene ‘sawulani ati ti ku ta tinene ngutu.’ Paulo a txi thumisile txialakanyiso txakwe. Ene a ti avetwe ka mthumo wo txhumayela ni ku kudingana malembe o tala a txi wu wona mthumo wonewo i di wa lisima ngutu. Ene a ‘gondisile masoni ka vathu ni tinyumbani kwawe.’ (Mith. 20:20) Ene a si njo txhumayela ngu mbimo yo kari dwe ya ditshiku, mwendo ngu ditshiku do kari ka divhiki, ene a txi txhumayela yotshe mbimo. Ni ku a txi londola yotshe mikhanjo ayi a nga txi yi mana ti to e txhumayela. Ngu txikombiso, mbimo yi a nga txi rinzela vangana vakwe khe Atena ene a txhumayete vathu va tinduma ni ku vamwani ka vona va tsakete. (Mith. 17:16, 17, 34) Hambi mbimo yi a nga ti “sungilwe” Paulo a simamile e txhumayela ava a nga ti va mana hafuhi.—Vaf. 1:13, 14; Mith. 28:16-24.

6. Ngu tihi Paulo a nga maha ti to e trenara vamwani?

⁶ Mpostoli a ti thumisa kwati mbimo yakwe, ene a ti ramba vamwani kutxhumayelani. Ngu txikombiso ka liendo lakwe lo khata kota murumiwa ene a tekile Johani ni Marku, ni ku ka liendo la wumbidi ene a tekile Timoti. (Mith. 12:25; 16:1-4) Ti ha kubasani ti to Paulo a txi va gondisa nzila yo khatalela dibanza, nzila yo maha kwati maendo a wudyisi ni ku va vagondisi va vanene.—1 Vak. 4:17.

7. Madhota ma nga londisisa kutxani txialakanyiso txa mpostoli Paulo atxi txi ku ka Vaefesu 6:14, 15?

⁷ Hi gonda txani. Madhota ma nga etetela txikombiso txa Paulo ngu ku tiemisela kutxhumayela ngu kulondola mkhanjo wumwani  ni wumwani awu va wu manako, i si nga kugwitela ko txhumayela ngu m’ti ni m’ti dwe. (Lera Vaefesu 6:14, 15.) Ngu txikombiso, ona ma nga txhumayela ma ni kuxavani ka so kari mwendo ma di mthumoni. Ni ku ngako ma di ka mthumo wo aka, ona ma nga txhumayela vavhizinyo mwendo ka vaxavisi. Kufana ni mpostoli Paulo, madhota ma nga londola mbimo yi ma yi hetako ma di kutxhumayelani ti to me trenara vamwani, kupata ni malanda a wuthumeli.

8. Ngu tihi madhota mbimo yimwani ti nga lavako me ti maha?

⁸ Madhota kha ma fanela kuzumba ma di bhisi ngutu ngu khatalela mithumo ya dibanzani mwendo ya txigava atxi va ku ka txona ha ko za ve pwata ni mbimo yo txhumayela. Ti to ve ziva kudinganisela mbimo yimwani ti nga lava ve lamba siavelo simwani. Msana ko maha mkombelo ni kualakanyisisa vona va nga wona ti to i tshuku kulava siavelo so kari, kasi kuthangetisa ati i ku ta lisima ngutu. Timhaka toneto ta lisima ti pata kutshimbitisa wukhozeli wa mwaya divhiki ni divhiki ni kupateka ka mthumo wo txhumayela. Ni kutrena vanana ka mthumo wuya wo txhumayela. Vamwani ti nga va karatela kulamba mithumo yo kari. Kambe to kha ta biha, phela Jehovha wa tiziva ti to anu mi maha totshe mi ti kotako ti to mi dinganisela ngu txikongomelo txo thangetisa ati i ku ta lisima ngutu.

9. Ngu txihi txikarato atxi madhota ma mananako natxo?

⁹ Ngu kutxani i di txikarato. Vanathu va Jehovha va manana ni sikarato so tala. Ka masiku yawa o gwita hotshethu hi lava kutsaniswa, kuseketelwa ni kuthavelelwa. Mbimo yimwani vanathu va nga lava kuvhunwa kasi ku ve vayilela kumaha to biha. (1 Vat. 5:14) Ditshuri ti to madhota ma nge sikoti kuthavisa sotshe sikarato asi vathu va Jehovha va wonisanako naso. Hambiketo, Jehovha a lava ti to madhota ma maha totshe ti ma nga ti kotako kasi kutsanisa ni ku vhikela tinvuta takwe. Aku madhota ma zumbako ma di bhisi, ma nga yi manisa kutxani mbimo yo me khatalela vanathu?

10. Ngu kuya ngu 1 Vatesalonika 2:7, Paulo a kombisile kutxani ti to a ti khatala ngu vanawe?

¹⁰ Txikombiso txa Paulo. Paulo a txi lava tinzila to ndunduzela ni kuaka vanawe. Madhota ni ona ma nga tekelela txikombiso txa Paulo ngu kuñola vathu va Jehovha ngu lirando. (Lera 1 Vatesalonika 2:7.) Paulo a tsanisekisile vakhozeli kulowe ti to ene a ti va randa ngutu ni ku Jehovha nene a txi va randa. (2 Vak. 2:4; Vaef. 2:4, 5) Paulo a ti ñola vanawe kota vangana vakwe. A ti heta mbimo navo. Ene a kombisile ti to a ti va themba ngu kuwomba-womba navo ngu ti ti nga ti mu karata kumweko ni kutandeka kwawe. (2 Vak. 7:5; 1 Tim. 1:15) Hambiketo, Paulo a si veki  mapimo ka sikarato sakwe. Kambe, ene a ti veka mapimo ko vhuna vanawe.

11. Ngu kutxani Paulo ti di lavile e ningela txivhuno vanawe?

¹¹ Mbimo yimwani Mpostoli Paulo ti ti lava e ningela txivhuno ka vanawe. Kambe ene asi mahi toneto ngu konaha ka kuhenya. Ene a txi ningela txivhuno nguko a nga ti khatala ngutu ngu vona ni ku a txi lava ku va vhikela ka tiphango to tala. Mbimo yi a nga txi ningela txivhuno a txi txi ningela ngu nzila ya ti to txi ya pfisiseka ni ku ti hehuka ku txi amukelwa. Ngu txikombiso, ka dipapilo dakwe adi a nga bhalela Vakorinto, ene ti lavile e va kawuka. Msana kova a di mahile toneto, ene a va rumelete Titosi. Ene a di emete nzila yi va ndi no angula ngu yona. Ene a tsakile ngutu mbimo a nga ziva ti to va txi thumisile txialakanyiso atxi a nga ti va ningile.—2 Vak. 7:6, 7.

12. Madhota ma nga maha txani kasi kutsanisa vanathu?

¹² Hi gonda txani? Madhota ma nga tekela txikombiso txa mpostoli Paulo ngu kuheta mbimo ni vanathu. Yimweyo ya tinzila yo maha toneto, ngu kuxongolela kuhoka mitshanganoni kasi ve ta va ni mbimo yo bhula ni vanathu. Phela kha ti lavi mbimo yo lapha ti to u kuzetana ni vanathu. (Var. 1:12; Vaef. 5:16) Madhota nga tekelela Paulo mbimo yi ma tsanisako vanathu ngu kuthumisa Dipswi da Txizimu ti to me va aka ni ku va tsanisekisa ti to Jehovha wa va randa. Ona ma fanete ku tiveka hakubasani ti to ma va randa vanathu, ni ku ma fanete me xola mikhanjo yo va ndunduzela. Ngako madhota ma txi ningela txivhuno ma fanete me txi seketela ka Dipswi da Txizimu. Ngako txi txi lava me ningela txivhuno txi kongoma, ona ma fanete kukombisa wunene, nguko ma lava ti to txivhuno txawe txi amukelwa.—Vag. 6:1.

13. Kwa mba hetiseka ka madhota ti nga ma maha me ti pfisa kutxani?

¹³ Ngu kutxani i di txikarato. Madhota ni ona kha ma hetiseka kufana ni nathu, ni ona maha tiphazamo. (Var. 3:23) Mbimo yimwani ma nga thuka me va ni mawonelo a walo ngu ona mapune ngu konaha ka kutandeka kwawe. Mamwani ma nga veka ngutu mapimo ka kutandeka ka ona, aha ko za me godhola. Ni ku vamwani va nga kuwona kutandeka kwawe i si nga txikarato aha koza va si mahi mizamo yo maha kutxitxa.

14. Ngu kuya ngu dibhuku da Vafilipiya 4:13, ngu tihi ti nga vhuna Paulo ti to e wonisana ni kutandeka kwakwe?

¹⁴ Txikombiso txa Paulo. Paulo a txi tiziva ti to a si na kusikota kuwonisana ni kutandeka kwakwe ngu mtamo wakwe apune. Ene txi lava mtamo awu wu nga txi ta ngu ka Txizimu. Makhatoni Paulo a txi hiseka ngu kuxanisa Makristu, kambe ngu kutsimbila ka mbimo a ti woni  ti to ati a nga txi ti maha ti di bihile se e ti emisela kutxitxa wuthu wakwe. (1 Tim. 1:12-16) Ngu kuvhunwa ngu Jehovha ene a vile m’thu wa lirando, wa wuxinji ni ku va dyisi wamnene. Kambe a si zumbeli kupimisa ngu tona, kuhambana ni eto, ene ati kholwa ti to Jehovha a ndi na mu divalela ka sionho sakwe. (Var. 7:21-25) Ene asi rinzeli kuva m’thu wo hetiseka. Hahanze keto, ene a txi maha totshe ati a nga txi ti kota kasi kutshukwatisa wuthu wakwe wa Wukristu ni kuthemba ti to Jehovha a na mu vhuna kuhetisisa mthumo wakwe.—1 Vak. 9:27; lera Vafilipiya 4:13.

15. Ngu yahi mawonelo aya madhota ma fanelako kuva nawo ngu kutandeka kwawe?

¹⁵ Hi gonda txani. Madhota kha ma sawulwa nguko i ku vo hetiseka. Hambiketo, Jehovha a lava ti to ve tumela ti to va maha tiphazamo ni ku ve tshukwatisa wuthu wawe Wukristu. (Vaef. 4:23, 24) Madhota ma fanete me ti xolisisa ngu kuthumisa Bhiblia, kasi kuwona amu va nga tshukwatisako kona. Va txi maha toneto, Jehovha a na va vhuna ti to ve mana litsako, ni kuva madhota a manene.—Jak. 1:25.

16. Ngu tihi ti nga mahekako ngako madhota ma txi veka mapimo ka tiphazamo ta vanathu?

¹⁶ Ngu kutxani i di txikarato. Aku madhota ma thumisanako kumweko ni vanathu, ti nga maha me wona ngutu tiphazamo ta vanathu. Ngako ma si ti woneli, madhota ma nga henya, me ñola vanathu ngu nzila ya tshofu hambi kuva lamula ngu nzila ya walo. Kambe Paulo a txharihisile Makristu ti to ngako va txi maha toneto, va na va va txi maha ati Sathani ati lavako.—2 Vak. 2:10, 11.

17. Ngu yahi mawonelo aya Paulo a nga ti nawo ngu Makristu kulowe?

¹⁷ Txikombiso txa Paulo. Ene a ti ni mawonelo a manene ngu vanathu. Ene a txi ziva kwati tiphazamo tawe, ngu mbimo yimwani ti txi mu gwesa ene apune. Hambiketo, Paulo a txi ti ziva ti to kuva mwanathu a txi maha tiphazamo kha ti wombi ti to o va m’thu wo biha. Ene a txi dhunda vanathu, ngu toneto a txi veka mapimo ka tifanelo tawe ta tinene. Mbimo yi Makristu kulowe ti nga txi ma karatela kumaha ti i ku ta tinene ene a txi ti veka a mu ko khene vona va lava kumaha ati i ku tatinene, kambe vo lava txivhuno basi.

18. Hi gonda txani ka nzila yi Paulo a nga vhuna ngu yona Evhodhiya ni Sintike? (Vafilipiya 4:1-3)

¹⁸ Wona txikombiso txa nzila mpostoli Paulo a nga vhuna ngu yona vanathu va dibanza da Filipiya. (Lera Vafilipiya 4:1-3.) Evhodhiya ni Sintike va tumelete kwa mbi pfana kwawe ku va hambanisa. Paulo kha va ñola ngu nzila ya tshofu mwendo ku va lamula, ene a vekile mapimo ka tifanelo tawe ta tinene. Vanathu vale vavambidi i di vo thembeka ni ku va di ni nduma ya yinene. Paulo a txi ti ziva ti to Jehovha a txi va randa. Aku Paulo a nga ti ni mawonelo a manene ngu vanathu vale ava kuzetile ti to ve maha kudikha. Paulo a txi wona tifanelo ta tinene ka vamwani, se eto ti mu vhunile ti to e  simama e va ni litsako kumweko ni ku va ni wungana ni vanathu va dibanza dile.

19. a) Madhota ma nga maha txani ti to me va ni mawonelo a manene ngu vanathu? b) Ngu tihi ati u ti gondako ka mfota wu wu kombisako didhota di txi basisa Nyumbani ka Mfumo?

¹⁹ Hi gonda txani? Madhota ma fanete kuwona tifanelo ta tinene ka vanathu. Hotshethu kha ha hetiseka, hambiketo mmwani ni mmwani wathu a ni tifanelo to tsakisa. (Vaf. 2:3) Ditshuri ti to mbimo yimwani madhota ma na lava kuningela txivhuno ka vanathu. Hambiketo, kufana ni mpostoli Paulo madhota ma fanete kuwona ta tinene ka vanathu i si nga kuveka mapimo ka tiphazamo tawe. Hahanze keto, vona va fanete kuwona lirando lawe ngu Jehovha, kutimisela kwawe ve thumela Jehovha ni mizamo yawe yo maha ati i ku tatinene. Madhota aya ma wonako tifanelo ta tinene ka vanathu maha ti to votshe dibanzani ve tipfa va txi randwa.

20. Nji txani txi madhota ma nga txi mahako ti to me simama me wuyelwa ngu txikombiso txa Paulo?

²⁰ Anu madhota mi nga wuyelwa ngutu ngu txikombiso txa Paulo. Ngu txikombiso u nga bela ka Índice das Publicações da Torre de Vigia, u ya aha ku ku “Paulo” u bela aha ku ku “exemplo para os anciãos.” Mbimo yi u gondako misungo ya timhaka yoneyo u nga ti wotisa tiya, ‘Txikombiso txa Paulo txi nga di vhunisa kutxani mbimo ni hetisisako mthumo wangu kota didhota?’

21. Ngu tihi ati madhota ma nga tsanisekako ka tona?

²¹ Anu madhota, khumbulani ti to Jehovha kha kombeli ti to mi va vo hetiseka, kambe a kombela ti to mi va vo thembeka. (1 Vak. 4:2) Jehovha a wu tsakete ngutu mthumo wa mpostoli Paulo kumweko ni kuthembeka kwakwe. Nananu tsanisekani ti to Jehovha wa mi randa ngutu, ni ku wa tsaka ngu mthumo awu mi wu mahako. Jehovha kha na mbi ‘divala mthumo wanu, ni lirando li mi nga li kombisa ka ditina dakwe anu mi nga thumela vasawuleki vakwe, avava ni konkuwa, mi va thumelako.’—Vaheb. 6:10.