1-2. Nganong ang ehemplo ni apostol Pablo makatabang sa mga ansiyano karon?

 GIMAHAL ni apostol Pablo ang mga igsoon. Naningkamot siya pag-ayo sa pag-atiman kanila. (Buh. 20:31) Tungod ana, gimahal pag-ayo sa mga igsoon si Pablo. Kas-a, ang mga ansiyano sa Efeso “nanghilak pag-ayo” pagkahibalo nila nga dili na nila siya makita pag-usab. (Buh. 20:37) Karon pod, gimahal pag-ayo sa atong kugihang mga ansiyano ang mga igsoon ug ilang ginahimo ang ilang maarangan sa pagtabang kanila. (Filip. 2:16, 17) Pero usahay dili sayon para sa mga ansiyano nga himoon ang tanan nilang buluhaton. Unsay makatabang nila?

² Ang atong kugihang mga ansiyano makakat-on sa ehemplo ni Pablo. (1 Cor. 11:1) Tawo ra pod siya parehas nato. Dili siya perpekto, ug naay mga higayon nga naglisod siya sa paghimo kon unsay husto. (Roma 7:18-20) Ug nakaeksperyensiya pod siyag daghang kalisdanan. Pero wala moundang si Pablo sa pagtabang sa mga igsoon. Wala pod niya tugoti nga mawala ang iyang kalipay. Pinaagi sa pagsundog kang Pablo, makaya sa mga ansiyano ang ilang mga kalisdanan ug magpabilin silang malipayon sa pag-alagad kang Jehova. Atong hisgotan kon unsaon nila nâ paghimo.

3. Unsay hisgotan nato niining artikuloha, ug unsa pay atong makat-onan?

³ Niining artikuloha, hisgotan nato ang upat ka butang nga lisod tingaling himoon sa mga ansiyano: (1) kon unsaon nga mahimong balanse sa pagsangyaw ug sa ubang responsibilidad, (2) kon unsaon paggahin ug panahon aron dasigon ang mga igsoon, (3) kon unsaon nga dili sila maluya bisan pa sa kaugalingong mga kahuyangan, ug (4) kon unsaon pagtratar ang mga igsoon sa mahigugmaong paagi bisan pa sa ilang mga kahuyangan. Atong makat-onan kon unsay nakatabang kang Pablo  nga mahimo kining upat ka butang ug kon unsaon siya pagsundog sa mga ansiyano.

4. Nganong dili tingali sayon para sa mga ansiyano nga manguna sa pagsangyaw?

⁴ Kon nganong dili ni sayon usahay. Ang mga ansiyano daghag responsibilidad, gawas pa sa ilang pagpanguna sa pagsangyaw. Pananglitan, magpulipuli silag dumala sa midweek nga tigom ug sa Pagtuon sa Kongregasyon sa Bibliya. Mohatag pod silag mga pakigpulong. Kugihan silang mobansay sa mga ministeryal nga alagad ug malipay silang modasig kanunay sa mga igsoon. (1 Ped. 5:2) Ang ubang ansiyano nagboluntaryo sa pagtukod ug pagmentinar sa mga Kingdom Hall ug sa ubang pasilidad. Pero sama sa ubang igsoon sa kongregasyon, ang pinakaimportanteng buluhaton sa mga ansiyano mao ang pagsangyaw.—Mat. 28:19, 20.

5. Unsang maayong ehemplo ang gipakita ni Pablo bahin sa pagsangyaw?

⁵ Ang ehemplo ni Pablo. Sa Filipos 1:10, gisulti ni Pablo kon nganong milampos siya sa pagsangyaw. Siya miingon: ‘Seguroa ninyo ang mas importanteng mga butang.’ Si Pablo mismo nagpadapat niana. Sa daghang katuigan, gipakita niya nga pinakaimportante sa iyang kinabuhi ang ministeryo nga gihatag kaniya. Nagsangyaw siya “sa publiko ug sa balay ug balay.” (Buh. 20:20) Wala siya maghunahuna nga angay siyang mosangyaw sa ingon ani lang nga oras o sa ingon ani lang nga adlaw. Hinuon, iyang gipahimuslan ang tanang kahigayonan sa pagsangyaw! Pananglitan, samtang naghulat siya sa iyang mga kauban didto sa Atenas, naa siyay gisangyawan nga prominenteng mga tawo ug maayo ang resulta niini. (Buh. 17:16, 17, 34) Bisan dihang “gibilanggo” siya, iyang gisangyawan kadtong iyang mga naestorya.—Filip. 1:13, 14; Buh. 28:16-24.

6. Giunsa pagbansay ni Pablo ang uban?

⁶ Gigamit ni Pablo ang iyang panahon sa pinakamaayong paagi. Sagad, naa siyay iuban sa iyang pagministeryo. Pananglitan, sa iyang unang biyahe ingong misyonaryo, iyang giuban si Juan Marcos, ug sa ikaduhang biyahe, si Timoteo. (Buh. 12:25; 16:1-4) Seguradong naningkamot si Pablo nga tudloan sila kon unsaon pag-organisar ug kongregasyon, kon unsaon pag-atiman ang mga igsoon, ug kon unsaon nga mahimong maayong magtutudlo.—1 Cor. 4:17.

7. Unsaon pagpadapat sa mga ansiyano ang giingon ni Pablo sa Efeso 6:14, 15?

⁷ Unsay leksiyon? Masundog sa mga ansiyano si Pablo dili lang sa pagsangyaw sa balay ug balay, kondili pinaagi pod sa pagkaandam mosangyaw bisan asa ug bisan kanus-a. (Basaha ang Efeso 6:14, 15.) Pananglitan, mosangyaw tingali sila sa ilang trabahoan o dihang  mamalit. Ug dihang magboluntaryo sila sa pagtukod ug mga Kingdom Hall, sangyawan pod tingali nila ang mga silingan o ang mga namaligya. Sama kang Pablo, sa dihang mosangyaw ang mga ansiyano, magamit nila ni nga panahon aron bansayon ang uban, apil ang mga ministeryal nga alagad.

8. Usahay, unsay kinahanglang himoon sa usa ka ansiyano?

⁸ Dili gyod tugotan sa mga ansiyano nga ma-busy kaayo sila sa ilang mga asaynment sa kongregasyon o sa sirkito nga wala na silay panahon sa pagsangyaw. Aron mahimong balanse, usahay kinahanglan tingali nilang balibaran ang ubang asaynment. Tingali human sa pagpamalandong ug pag-ampo, ilang makita nga kon dawaton nila ang maong asaynment, mapasagdan nila ang mas importanteng mga butang. Apil ana ang pagdumalag pamilyahanong pagsimba kada semana, pagkahimong dasig sa pagsangyaw, o pagbansay sa ilang mga anak sa pagsangyaw. Dili tingali sayon sa uban ang pagbalibad ug mga asaynment, pero makaseguro sila nga nakasabot si Jehova nga gusto lang nilang mahimong balanse sa tanang butang.

9. Tungod sa ka-busy sa mga ansiyano, maglisod tingali sila sa paghimo sa unsa?

⁹ Kon nganong dili ni sayon usahay. Ang katawhan ni Jehova nag-atubang ug daghang problema. Niining kataposang mga adlaw, kitang tanan nagkinahanglag pagdasig, tabang, ug paghupay. Ug usahay, ang uban magkinahanglag tabang aron makalikay sa sala. (1 Tes. 5:14) Siyempre, dili kayang wad-on sa mga ansiyano ang tanang problema sa katawhan ni Jehova. Bisan pa ana, gusto ni Jehova nga himoon sa mga ansiyano ang ilang maarangan aron dasigon ug protektahan ang iyang katawhan. Bisag busy ang mga ansiyano, unsaon nila paggahin ug panahon aron tabangan ang mga igsoon?

10. Base sa 1 Tesalonica 2:7, giunsa pag-atiman ni Pablo ang katawhan ni Jehova?

¹⁰ Ang ehemplo ni Pablo. Si Pablo nangitag paagi aron apresyahon ug dasigon ang mga igsoon. Maayo gyong sundogon sa mga ansiyano ang iyang ehemplo pinaagi sa mapinanggaong pag-atiman sa katawhan ni Jehova. (Basaha ang 1 Tesalonica 2:7.) Gipasaligan ni Pablo ang mga igsoon nga gimahal niya sila ug gimahal pod sila ni Jehova. (2 Cor. 2:4; Efe. 2:4, 5) Gitratar ni Pablo ang mga igsoon ingong iyang mga higala ug naggahin siyag panahon kanila. Gipakita niya nga misalig siya nila kay iyang gisultian sila sa iyang mga kahuyangan ug gikabalak-an. (2 Cor. 7:5; 1 Tim. 1:15) Pero imbes magpokus si Pablo sa iyang mga problema, iyang gitabangan ang mga igsoon.

11. Nganong gitambagan ni Pablo ang mga igsoon?

¹¹ Usahay, kinahanglang tambagan ni Pablo  ang mga igsoon. Gihimo niya ni, dili tungod kay nasuko siya, kondili tungod kay gimahal niya sila ug gusto niyang maprotektahan sila sa lainlaing kapeligrohan. Naningkamot siya nga daling masabtan ang iyang tambag, ug interesado siya sa ilang reaksiyon. Pananglitan, sa iyang sulat sa mga taga-Corinto, naghatag siyag bug-at nga tambag. Unya iyang gipaadto kanila si Tito. Gustong mahibaloan ni Pablo kon unsay ilang reaksiyon sa iyang sulat. Nalipay kaayo siya pagkahibalo niya nga ilang gipadapat ang iyang tambag!—2 Cor. 7:6, 7.

12. Sa unsang mga paagi mapalig-on sa mga ansiyano ang mga igsoon?

¹² Unsay leksiyon? Masundog sa mga ansiyano si Pablo pinaagi sa paggahin ug panahon sa mga igsoon. Ang usa ka paagi nga ila ning mahimo mao ang pag-abot ug sayo sa tigom aron maestorya nila ang uban. Sagad, sa pipila lang ka minuto, mahatag na sa mga ansiyano ang pagdasig nga gikinahanglan sa mga igsoon. (Roma 1:12; Efe. 5:16) Ang ansiyano nga nagsundog kang Pablo mogamit pod sa Bibliya aron palig-onon ang pagtuo sa mga igsoon ug pasaligan sila nga gimahal sila sa Diyos. Ipabati pod niya nga gimahal niya sila. Regular siyang makig-estorya nila, tan-awon niya ang ilang maayong mga hiyas, ug isulti niya kon unsay iyang naapresyar kanila. Kon kinahanglan siyang motambag, iya ning ibase sa Pulong sa Diyos. Espesipiko ang iyang tambag pero dili sakit ang iyang paagi sa pagsulti kay gusto niya nga ipadapat sa mga igsoon ang iyang tambag.—Gal. 6:1.

13. Unsa kahay bation sa usa ka ansiyano bahin sa iyang mga kahuyangan?

¹³ Kon nganong dili ni sayon usahay. Ang mga ansiyano dili perpekto. Sama sa uban, sila masayop. (Roma 3:23) Usahay dili tingali balanse ang ilang panghunahuna bahin sa ilang kahuyangan. Ang uban magpokus pag-ayo sa ilang mga kahuyangan maong maluya sila. Ang uban pod, ila rang balewalaon ang ilang mga kahuyangan mao nga dili sila maghunahuna nga kinahanglan silang mohimog kausaban.

14. Base sa Filipos 4:13, sa unsang paagi ang pagkamapainubsanon nakatabang nga mahimong balanse ang panglantaw ni Pablo sa iyang mga kahuyangan?

¹⁴ Ang ehemplo ni Pablo. Mapainubsanong giila ni Pablo nga dili siya makabaton ug balanseng panghunahuna sa iyang mga kahuyangan nga siyasiya ra. Gikinahanglan niya ang tabang sa Diyos. Sa wala pa siya mahimong Kristohanon, gilutos niya pag-ayo ang mga alagad sa Diyos. Pero sa ulahi, giila niya nga sayop ang iyang gihimo ug andam siyang magbag-o sa iyang panghunahuna ug personalidad. (1 Tim. 1:12-16) Sa tabang ni Jehova, si Pablo  nahimong mahigugmaon, maluluy-on, ug mapainubsanong ansiyano. Nahibalo siya sa iyang mga kahuyangan, ug naguol siya ana. Pero imbes magsigeg hunahuna sa iyang mga kahuyangan, misalig siya nga gipasaylo siya ni Jehova. (Roma 7:21-25) Kabalo si Pablo nga masayop gyod siya. Pero naningkamot siya nga mapauswag ang iyang Kristohanong personalidad ug mapainubsanong misalig sa tabang ni Jehova aron matuman niya ang iyang buluhaton.—1 Cor. 9:27; basaha ang Filipos 4:13.

15. Sa unsang paagi ang ansiyano makabaton ug balanseng panglantaw sa iyang mga kahuyangan?

¹⁵ Unsay leksiyon? Si Jehova wala magdahom nga perpekto ang mga ansiyano. Pero nagdahom siya nga ilhon nila ang ilang kasaypanan ug ugmaron ang Kristohanong personalidad. (Efe. 4:23, 24) Angayng susihon sa ansiyano ang iyang kaugalingon base sa iyang nakat-onan sa Bibliya ug himoon ang gikinahanglang mga kausaban. Unya tabangan siya ni Jehova nga magmalipayon ug mahimong maayong ansiyano.—Sant. 1:25.

16. Unsay posibleng mahitabo kon ang ansiyano magpokus sa kahuyangan sa uban?

¹⁶ Kon nganong dili ni sayon usahay. Makita tingali sa mga ansiyano ang kahuyangan sa mga igsoon dihang pirme silang makig-uban nila. Pero kon dili magbantay ang mga ansiyano, basin maglagot sila ug mahimong mahukmanon ug dili mahigugmaon. Gipasidan-an ni Pablo ang mga Kristohanon nga mao nay gusto ni Satanas nga ilang himoon.—2 Cor. 2:10, 11.

17. Giunsa paglantaw ni Pablo ang mga igsoon?

¹⁷ Ang ehemplo ni Pablo. Kanunayng positibo ang iyang panglantaw sa mga igsoon. Nahibalo siya sa ilang kasaypanan, kay usahay bisan siya ilang mapasakitan. Pero nahibalo si Pablo nga kon masayop ang usa ka tawo, wala ni magpasabot nga daotan na siya. Gimahal ni Pablo ang mga igsoon ug nagpokus siya sa ilang maayong mga hiyas. Kon ang mga igsoon maglisod sa pagbuhat kon unsay husto, maghunahuna siya nga maayo ang ilang motibo ug nagkinahanglan ra gyod silag tabang.

18. Unsay imong nakat-onan sa pagtratar ni Pablo kang Euodia ug Sintique? (Filipos 4:1-3)

¹⁸ Pananglitan, konsideraha kon giunsa pagtratar ni Pablo ang duha ka sister sa kongregasyon sa Filipos. (Basaha ang Filipos 4:1-3.) Si Euodia ug Sintique nag-away ug wala na magtingganay. Pero wala sila kasab-i o hukmi ni Pablo. Hinuon, nagpokus siya sa ilang maayong mga hiyas. Matinumanon sila nga mga sister nga maayog rekord sa pag-alagad. Nahibalo si Pablo nga gihigugma sila ni Jehova. Kay positibog panglantaw si Pablo kanila, iyang gidasig sila nga sulbaron ang ilang di pagsinabtanay. Nakatabang pod ni nga makapabilin siyang malipayon ug suod sa mga igsoon niana nga kongregasyon.

19. (a) Unsay himoon sa mga ansiyano aron positibo silag panglantaw sa mga igsoon? (b) Unsay imong makat-onan sa hulagway bahin sa ansiyano nga nanglimpiyo sa Kingdom Hall?

 ¹⁹ Unsay leksiyon? Mga ansiyano, tan-awa ang maayong mga hiyas sa mga igsoon. Ang kada usa dili perpekto, pero naa silay nindot nga mga hiyas. (Filip. 2:3) Tinuod, kinahanglang tambagan usahay sa mga ansiyano ang usa ka igsoon. Pero sama kang Pablo, ang mga ansiyano maningkamot nga dili magpokus sa iyang makapalagot nga sinultihan ug binuhatan. Hinuon, angay silang magpokus sa iyang gugma kang Jehova, sa iyang paglahutay sa pag-alagad, ug sa iyang potensiyal sa paghimog maayo. Kon ang mga ansiyano magpokus sa maayong mga hiyas sa uban, matabangan nila ang mga igsoon nga mobating gimahal sa kongregasyon.

20. Unsay himoon sa mga ansiyano aron padayon silang makabenepisyo sa ehemplo ni Pablo?

²⁰ Mga ansiyano, makatabang ninyo ang padayong pagtuon sa ehemplo ni Pablo. Pananglitan, sa Watch Tower Publications Index, puwede ninyong tan-awon ang ulohang “Paul” ug dayon ang sub-ulohan nga “example for elders.” Samtang inyong basahon ang mga reperensiya, pangutan-a ang inyong kaugalingon, ‘Sa unsang paagi ang ehemplo ni Pablo makatabang nako nga magpabiling malipayon samtang ginatuman nako ang akong responsibilidad ingong ansiyano?’

21. Sa unsa makaseguro ang mga ansiyano?

²¹ Mga ansiyano, hinumdomi nga si Jehova wala magdahom nga dili na mo masayop. Ang iya lang gihangyo mao nga magmatinumanon mo. (1 Cor. 4:2) Giapresyar ni Jehova ang pagkugi ug pagkamatinumanon ni Pablo. Makaseguro mo nga gipabilhan pod sa Diyos ang inyong ginahimo sa pag-alagad kaniya. Dili gyod kalimtan ni Jehova “ang inyong buhat ug ang gugma nga inyong gipakita para sa iyang ngalan pinaagi sa pag-alagad ug sa padayon ninyong pag-alagad sa mga balaan.”—Heb. 6:10.