1-2. Yotagiha ya murumiwi Paulo enakamihedhe dhavi anddimuwa a mmulogoni a masaka abano?

 MURUMIWI Paulo wanakwela venjene abali na arogora. Iyene wanlaba na guru vaddiddi sabwani wanatanala. (Mer. 20:31) Sabwa ya ejuwene, abali na arogora animukwela venjene Paulo. Nsaka dhahi, anddimuwa a Éfeso muziwilani wi kakamonile vina Paulo otene “aroma wunla.” (Mer. 20:37) Anddimuwa ehu a mmulogoni anowakwela abali na arogora dhahene ninga Paulo vina anokosa guru eli yetene wi akamihedhe. (Fil. 2:16, 17) Dila dhina, anddimuwa a mmulogoni anogumanana dhorutxa. Txini enakamihedhe okwaranya makattamiho aba?

² Enele okala ya malago anddimuwa a mmulogoni ofwara yotagiha ya Paulo. (1 Kor. 11:1) Iyene wali muttu womaningoni kana ewodhelo dhina anju. Paulo wali muttu wohiligana dila dhina iyene wanivilibihedha okosa dhilobo dhapama. (Rom. 7:18-20) Ottiya ejo iyene wahikana makattamiho menjene. Mbwenye Paulo keyeleli mundduni nne vina kajombeliwa wagalala. Agamutagiha Paulo, anddimuwa a mmulogoni anele owodha owanana makattamiho angumananina ahiyelelaga wagalala womulabela Yehova. Ovano ndoweni none txini enfwanyelani okosa.

3. Txini enasekeserhe iyo mwari mwa nsunzo ntti?

³ Mwari mwa nsunzo ntti, ninele osekeserha dhorutxa nayi dhingumanana anddimuwa a mmulogoni: (1) ovipimelela mmabasani a olaleya na mittorho dhina, (2) agawaredhelaga abali na arogora, (3) agawanagana dhowobana dhawa vina (4) agapattiwa ohiligana wa attu ena. Ninele osekeserha  vina mukalelo opemberile murumiwi Paulo makattamiho agumaniliyena vina mukalelo onawodhe ofwara anddimuwa a mmulogoni yotagiha yaye.

4. Enkalelaga eni yorutxa mwa anddimuwa a mmulogoni okala yotagiha ya pama mmabasani olaleya?

⁴ Ekalelini elobo yorutxa. Anddimuwa enjene a mmulogoni ahikana muttorho wa osogorhela mabasa a olaleya. Motagiha, enjiha anoweddiha matugumano a vari va sumana vina anosogorhela Nsunzo na Bibilia na Mulogo. Ena ahikana muttorho wowattomela abali dhipaddi. Vina waswagiha adhari orumeliwa a va mulogoni na wavaha nipangarhazo abali na arogora. (1 Ped. 5:2) Anddimuwa ena a mmulogoni anokamihedha mabasa omaga Numba dha Omwene na mipara dhina dha nikuru nehu. Ejo bilivi, dhahene ninga abali otene a mulogoni, munddimuwa wa mulogo onofwanyela oziwa wi mabasa amakamaka olaleya muttaka wa Omwene wa Mulugu.—Mt. 28:19, 20.

5. Yotagiha gani ya olaleya ettihile murumiwi Paulo?

⁵ Yotagiha ya Paulo. Elobo yamukamihedha Paulo wi dhilobo dhimweddelege pama enfwanyeya va Filipi 1:10 ennikokomeza wi: “Nisakulege dhofwanyelela.” Paulo ohifwara nikokomezo ntti nivahiliye. Iyene wattomiwe ninga namalaleya wa miselu dhapama, mwa vyaka dhinjene iyene wona mabasa aba ninga elobo yamakamaka mwigumini mwaye. Iyene wanlaleya ‘vattaddo vina numba na numba.’ (Mer. 20:20) Iyene kapima mudhidhi walaleyihe ninga mudhidhi mung’onovi valaboni obe labo nimodha vasumanani. Iyene wampura gari eli yotene ya olaleya miselu dhapama! Motagiha, mudhidhi wajedhiye akwaye muttette wa Atena, wahalaleya miselu dhapama nikuru dhahi na attu ofuma, enaya ahiwelela miselu dhapama. (Mer. 17:16, 17, 34) Oku mudhidhi “wafugeliwiye mu kambura,” Paulo wanalaleya abale adha omona.—Fil. 1:13, 14; Mer. 28:16-24.

6. Maswagiho gani avahile murumiwi Paulo?

⁶ Paulo ohilabihedha pama mudhidhi waye. Iyene wahifiyedha wawoba ena wi avitaganyihe na iyene mmabasani a olaleya. Motagiha, oleddo woroma ninga misihonariyu, iyene wahimuttukula Joau na Marko; oleddo wanawili wamuttukulile Timótio. (Mer. 12:25; 16:1-4) Kavali waganyedha wi Paulo wahikosa guru eli yotene yowaswagiha alobwana aba, mukalelo wosasanyedha milogo, weddelela vina okala anamasunziha apama.—1 Kor. 4:17.

7. Anddimuwa a mmulogoni anafware dhavi nikokomezo na Paulo ninfwanyeya va Éfeso 6:14, 15?

⁷ Ensunza iyo. Anddimuwa a mmulogoni kanfanyela omutagiha murumiwi Paulo na mabasa a olaleya bahi awene anofwanyela vina  okala omala nawale wi avahege onamoona wa vattaddo mudhidhi-mudhidhivi. (Kengesa Éfeso 6:14, 15.) Motagiha, enowodheya awene ovaha onamona agadhowa ogula elobo vina agakala omabasani. Obe agakala omabasani a omaga Numba dha Omwene enowodheya walaleyela anamanddamani vina anamaguliha. Dhahene ninga Paulo, anddimuwa a mmulogoni anofwanyela olabihedha mudhidhi wawa wi aswagihe ena otaganyiha na emeleli orumeliwa a mmulogoni.

8. Dila dhina anddimuwa a mmulogoni anfwanyela okosa eni?

⁸ Anddimuwa a mmulogoni txipo kazuzumeletxe vaddiddi mabasa a mmulogoni ofiyedha ohikanaga mudhidhi wa odhowa mmabasani a olaleya. Wi akalevi ovipimelela dila dhina anofwanyela okala ovipimelela mmabasani mena a Omwene anttomeliwani. Agamala otanalela makaniha na nlobelo, anodha ononelamo wi agarumela mabasa mena anodhaga ohikanaga mudhidhi wa ozuzumela mabasa mena amakamaka. Dhilobo ninga osogorhela webedha wa ntakulu sumana dhotene, okanaga mudhidhi wa odhowa omabasani a olaleya vina waswagiha aniwa ozuzumela mabasene abo. Dila dhina mwa ena enokalaga yorutxa okodda agatomeliwa mabasa mena a Omwene, masiki dhawene awene anofwanyela okana ebaribari wi Yehova onononelamo efunelo yawa ya okala attu opimeleleya mwa dhotene.

9. Makattamiho gani angumanana anddimuwa a mmulogoni sabwa ya winjiveliwa dhilobo dhokosa?

⁹ Ekaleleni yorutxa. Nlogo na Yehova ninogumanana makattamiho menjene. Masaka aba omariha iyo notene ninofuna nipangarhazo, nikamihedho vina olibihiwa. Dila dhina ena mwa iyo anofunaga nikamihedho wi arabele mweddelo wabure. (1 Tes. 5:14) Pumwenemo, mbwenye anddimuwa a mmulogoni kanawodhe obarela makattamiho otene angumanana nlogo na Yehova. Masiki dhahene, Yehova onjedhela wi anddimuwa a mmulogoni akose ejile enwodhani wi avahe nikamihedho vina nibarelo mabila aye. Anddimuwa a mmulogoni anawodhe dhavi ofwanya mudhidhi wa ovaha nipangarazo ninfuneya?

10. Ninga munlogela 1 Tesalónika 2:7, Paulo wonihile dhavi wi wanzuzumela nlogo na Yehova?

¹⁰ Yotagiha ya Paulo. Paulo wantamela mare owatamalela abali vina walibiha. Enokala yofwanyelela anddimuwa a mmulogoni ofwara yotagiha eji yapama modhela ozuzumela nlogo na Yehova na okwela. (Kengesa 1 Tesalónika 2:7.) Paulo wahatonyihedha abali na arogora wi Yehova vamodha na iyene anakwela. (2 Kor. 2:4; Ef. 2:4, 5) Paulo wawona abali na arogora a mmulogoni ninga amarho vina wantamela okala na awene. Iyene ohoniha wi wanakuluvela abali, wonihile ejiwene mwawaddeliye sopipiriha makattamiho agumaniliyena vina dhowobana dhaye. (2 Kor. 7:5; 1 Tim.  1:15) Masiki dhawene Paulo, kazuzumela bahi makattamiho aye. Ottiya ejo, iyene wahikana efunelo yowakamihedha abali na arogora.

11. Yafuneyelani Paulo wavaha malago abali na arogora?

¹¹ Dila dhina, Paulo wahona wi yanfuneya wavaha malago abali na arogora. Mbwenye iyene kavaha malago sabwa ya wi elosilidhiwa na awene. Iyene wakosela ejiwene sabwani wanatanala vina wafuna arabelihe dhilobo dhowopiha. Vowi wanatanala abali wantamela ovevutxa malagoya avahiye wi akale ononeleyamo. Motagiha, valebeleye karta akadda Korinto, iyene wahavaha malago ovadda. Mmaliliye oleba baperengeza na Tito, Paulo wahizuzuma obuwelaga mukalelo ogewelilani malago ali mukartanimwa. Vasogorhova Paulo wahagalala vaziwiliye wi abali ahakela malagoya vina avirihamo!—2 Kor. 7:6, 7.

12. Anddimuwa a mmulogoni anawodhe dhavi walibiha abali na arogora?

¹² Ensunza iyo. Anddimuwa a mmulogoni anele ofwara yotagiha ya Paulo agatamelaga mudhidhi wa okala na abali vina arogora. Mukalelo mmodha wa okosa ejiwene ja ofiyaga mmatugumanoni na mudhidhene wi akanege mudhidhi wa ologa makani olibiha na abali. Vina anele okana mudhidhi mung’onovi wa walibiha vina wavaha nipangarhazo abali na arogora asegedhehile. (Rom. 1:12; Ef. 5:16) Munddimuwa wa mulogo onele ofwara yotagiha ya Paulo modhela walibiha abali na arogora alabihedhaga Nzu na Mulugu na wakuluvelihaga wi Mulgu onowakwela venjene. Vina otamela mudhidhi wa okala na awene na watamalela dhilobo dhinkosani. Dhahene onele olagiha wi onowaziwa abaliha vina onowakwela. Munddimuwa wa mulogo agafunaga ovaha malago onofwanyela olabihedha Nzu na Mulugu. Iyene agavahaga nlagona kampottotxa mbwenye onovaha noderetu, sabwani onfuna wi abali na arogora ewelele vina avirihemo.—Gal. 6:1.

13. Ohiligana wa anddimuwa a mulugo onapatta dhavi?

¹³ Ekaleleni elobo yorutxa. Anddimuwa a mmulogoni attu ohiligana. Dhahene ninga muttu-muttuvi awene vina anovonya. (Rom. 3:23) Dila dhina awene anorutxiwa ovipimelela na dhovirigana dhawa. Ena anozuzumela wang’ana venjene dhowobana dhawa nanda ejo enowawobaniha. Oku enaya anubuwela wi ohiligana kahiyo elobo yamakamaka, sabwa ya ejiwene kantamela wogolela apale vanvonyani.

14. Mowiwanana na Filipi 4:13, oviyeviha omukamihedhile dhavi Paulo owanana dhowobana dhaye?

¹⁴ Yotagiha ya Paulo. Na ovyeviha Paulo wahinonelamo wi kagawodhile opemberha dhowobana dhaye. Iyene wahinonelamo wi wanfuna guru dha Mulugu. Vamaromo, Paulo  wanafwarafwara Akristu. Vasogorova, iyene wahidha ononelamo wi yakosiye kiyakalile nanda wahitxinja mubuwelo waye na meddelo aye. (1 Tim. 1:12-16) Na nikamihedho na Yehova, Paulo wahidha okala muttu wokwela, wattagaraga vina mukumbuzi wapama. Iyene wahikosa dhilobo dhinjene dhohikala masiki dhawele kakala mudhidhi mwinjene obuwelaga esiwene, wankuluvela wi Yehova wahimala omulevelela. (Rom. 7:21-25) Paulo kajedhela okosa dhilobo noligana. Ottiya ejo iyene wahilaba na guru wi onuwihe mikalelo dha Okristu vina na oviyeviha wahizinddihela wi agahiwodha wakwaniha mabasa aye na nikamihedho na Yehova.—1 Kor. 9:27; kengesa Filipi 4:13.

15. Anddimuwa a mmulogoni anakane dhavi monelo wopimeleleya sabwa ya dhovonya dhawa?

¹⁵ Dhinsunza iyo. Anddimuwa a mmulogoni kanttomeliwa mabasa a weddiha milogo sabwa ya awene okala attu oligana. Yehova onjedhela wi awene arumele dhovonya dhawa, vina atamele wunuwiha mikalelo dha Okristu. (Ef. 4:23, 24) Anddimuwa a mmulogoni anofwanyela ovipepesa modhela osunza Nzu na Mulugu vina okosa matxinjo. Yehova onele wakamihedha okana wagalala vina okala anddimuwa a mmulogoni apama.—Tia. 1:25.

16. Txini egapadduwile anddimuwa a mmulogoni kozuzumela wang’ana dhovonya dha attu ena?

¹⁶ Ekaleleni yorutxa. Vowi anddimuwa a mmulogoni anolaba mudhidhi mwinjene na abali vina arogora kinrutxa wona dhovonya dhawa. Nona agahikale txenjewa anddimuwa a mmulogoni anodhaga odhugudheya vina okana elemelelo yowattonga abali. Paulo wahawaddela Akristu wi Satana agahiziveliwa wawona anddimuwa a mmulogoni aweddihaga abali dhawene.—2 Kor. 2:10, 11.

17. Paulo wawona dhavi abali na arogoro?

¹⁷ Yotagiha ya Paulo. Iyene wantamela wona dhilobo dhapama dhakosa abali. Paulo wanziwa wi awene anvonya vina dhovonya dhawa dila dhina dhanimpatta. Masiki dhawene, Paulo txipo kattihile ottihaniya merelo abure na muttu wabure. Iyene wanakwela abali vina wanzuzumela mikalelo dhapama dhanani. Paulo agazinddiyela wi mbali olovonya iyene wannonelamo wi kakosile na ofuna yamujombela yali ovahiwa mwana nikamihedho wi akose elobo yofwanyelela.

18. Txini esunziliwe na mukalelo weddihile Paulo makani a Evódia na Síntike? (Filipi 4:1-3)

¹⁸ Karoma otanalela mukalelo waweddihile Paulo arogora eli a mulogo wo Filipi. (Kengesa Filipi 4:1-3.) Evódia na Síntike ahigumanana makattamiho abuwene adhile ogwadda mandano awa. Mbwenye muziweli Paulo iyene kasilidhiwe na awene vina katamelile wattonga, iyene wahizuzumela mikalelo dhapama dhanani. Awene ali arogora ororomeleya adhile vawale amulabelaga Yehova. Paulo wanziwa wi Yehova wanakwela venjene. Sabwa ya monelo wapama wa Paulo wahapangarhaza  arogora abale ologela makani anani. Sabwa ya Paulo ozuzumelaga mikalelo dhapama dha abali na arogora wahidhowavi alibihaga mandano aniye na abali a mulogo obule.

19. (a) Anddimuwa a mmulogoni anawodhe dhavi okana monelo wovipimelela na abaliwa? (b) Txini ensunziwe na foto enlagiha munddimuwa wa mmulogoni akuputtaga Numba ya Omwene?

¹⁹ Ensunza iyo. Anddimuwa a mmulogoni, anofwanyela ozuzumelaga wang’ana mikalelo dhapama dhina abali na arogora. Iyo notene nili attu ohiligana; masiki dhawene muttu-muttu wa iyo ohikana mikalelo dhinnitikiniha. (Fil. 2:3) Mudhidhi na mudhidhi, anddimuwa a mulogo anofwanyelela wavahaga abali na arogora malago. Dhahene ninga Paulo, awene kanfwanyela osilidhiwa obe wattonga abaliya. Ottiya ejo, awene anofwanyela ozuzumela mukalelo onimukwelani Yehova, ovilela wawa vina ewodhelo yawa ya okosa dhilobo dhapama. Anddimuwa a mmulogoni azuzumela mikalelo dhapama dha attu ena anele wakamihedha abali na arogora ovihonaga wi anokweliwa na abali otene a mmulogoni.

20. Anddimuwa a mmulogoni anawodhe dhavi odhowavi apurelagamo yotagiha ya Paulo?

²⁰ Anddimuwa a mmulogoni anele wakwaniha muttorho wawa agadhowagavi asunzaga yotagiha ya Paulo. Motagiha, Índice das Publicações da Torre de Vígia, mutxiddo mwa mwana mutoma “Paulo” na musorho onloga “exemplos para os anciãos.” Weyo onele wengesa makani anfwanyeya mwenemo; ogamala osekeserha dhipano esi kavikose nivuzo ntti, ‘Yotagiha ya Paulo enaddikamihedhe dhavi okanavi wagalala oku ddakwanihagavi mabasa aga ninga munddimuwa wa mulogo?’

21. Anddimuwa a mmulogoni anfwanyela okana ebaribari gani?

²¹ Anddimuwa a mmulogoni, kamudduwale wi Yehova kanukumbirhani wi mukosege dhilobo na mukalelo woligana iyene onukumbirhani wi mukale wororomeleya. (1 Kor. 4:2) Yehova wanvaha ttima mabasa a Paulo vina ororomeleya waye. Kakanavi nikuluvelo wi Yehova onovaha ttima mabasa animukoseliwe. Iyene txipo “kandduwala mabasinyu, okwela onimukwelenyuna, thagaraga dhawirelinyu akadda Mutugumano dhinawirela nyuwo napanovi.”—Aheb. 6:10.