1-2. Lamkaltu Paul nunning nih tuchan Khrihfa upa pawl kha zeitindah a bawmh khawh hna?

 LAMKALTU Paul nih unau pawl kha a dawt hna. An caah thabat hngal loin rian a ṭuan. (Lam. 20:31) Cucaah zumtukhat unau hna nih Paul kha an dawt tuk. Voikhat cu Efesa i Khrihfa upa hna nih kan hmu ṭhan kho ti lai lo tiah an ruah caah ‘an ṭah.’ (Lam. 20:37) Cu bantukin Khrihfa upa nih unau pawl kha an dawt tuk hna i an si khawh chungin an bawmh hna. (Fil. 2:16, 17) Asinain a caan ah Khrihfa upa hna cu zuamcawhnak an tong. Mah zuamcawhnak tei awkah zeinihdah a bawmh hna?

² Rian aa zuammi Khrihfa upa nih Paul nunning kha an hlathlai khawh. (1 Kor. 11:1) Paul cu vancungmi nih an ngeihmi sining hna a ngei lo. A caan ah a hmaanmi thil tuah awkah aa harhmi mitlinglo pakhat a si ve. (Rom 7:18-20) Cun buaibainak tampi zong a ngei. Asinain Paul cu a lung a dong lo i aa lawmhnak zong a tlau lo. Khrihfa upa hna nih Paul an i zohchunhnak thawngin an tonmi zuamcawhnak kha an tei khawh i Jehovah rian kha nuam tein an ṭuan khawh peng. Cutin zeitindah a si ti kha zohhmanh hna u sih.

3. Hi capar ah zei kong dah kan i ruah lai i cutin tuah awkah zeinihdah a kan bawmh lai?

³ Hi capar ah Khrihfa upa nih an tonmi zuamcawhnak pali a simi: (1) phungchim rian le a dang rian hna a tlari tein ṭuannak, (2) unau pawl thazaang peknak, (3) pumpak derthawmnak tei khawhnak le (4) midang tlinlonak tawnghthamnak timi kong kan i ruah lai. Cun Paul nih zuamcawhnak a tei khawh ning le Khrihfa upa nih an i zohchunh khawh ning kong kan i ruah lai.

4. Khrihfa upa pawl cu phungchim rian hruainak ah zeicah zuamcawhnak an ton khawh?

⁴ Zuamcawhnak a sinak a ruang. Khrihfa upa cu phungchim rian hruainak lengah a dang rian tampi an ngei. Tahchunhnak ah, Khrihfa upa tampi cu zarhlai pumhnak tlangtlak awk le Khrihfabu Baibal Cawnnak tlaih awkah rian an ngei. Cun a dang phungchimnak rian hna zong an ngei. Bu rianṭuantu pawl kha tampi in an cawnpiak hna i unau pawl zong kha dawtnak he tha an pek hna. (1 Pet. 5:2) Khrihfa upa cheukhat cu Biakinn saknak, remhnak le Jehovah biaknak ah hmanmi a dang innsaknak hna ah an i tel. Khrihfa unau dihlak bantukin Khrihfa upa caah a biapi bikmi cu phungchim rianṭuannak a si.—Matt. 28:19, 20.

5. Paul nih phungchimtu pakhat in zei zohchunh awk ṭha dah a chiah?

⁵ Paul nunning. Paul nih Filipi 1:10, NW ah a hlawh a tlingmi phungchimtu a sinak a ruang kha hitin a chim: “A biapi deuhmi thil kha hngalh i zuam.” Paul nih mah ningin a rak zulh. Phungchim dingin rian pek a si i kum tampi chung mah rian kha a biapi bikmi thil in a rak hmuh. Zapi lakah siseh, innkhat hnu innkhat ah siseh phung a rak chim. (Lam. 20:20) Anih nih nikhat chung i caan caankhat lawng asiloah zarhkhat ah nikhat lawng phung a rak chim lo. Caanṭha a hmuh fatin phung a rak chim. Tahchunhnak ah, Athen khua ah a hawile a hngah hna lioah a min a thangmi phu pakhat kha phung a chimh hna i mah lakin cheukhat nih an rak cohlan. (Lam. 17:16, 17, 34) ‘Thong a tlak’ lio hmanhah a pawngah a ummi hna kha phung a rak chimh hna.—Fil. 1:13, 14; Lam. 28:16-24.

6. Paul nih zeidah a rak cawnpiak hna?

⁶ Paul nih a ṭha bik in a caan a hman. Midang zong kha phungchimnak rian ah i tel dingin a sawm hna. Tahchunhnak ah, a hmasa missionary in khual a tlawn lioah Johan Marka kha a auh i a voihnihnak a tlawn ah Timote kha a auh. (Lam. 12:25; 16:1-4) Paul nih mah pa hna kha Khrihfabu tlangtlak ning, tuukhal rian ṭuan ning le hmual a ngeimi cawnpiaktu si khawh ning kong he aa tlaiin a cawnpiak hna lai ti cu lunghrinh awk a um lo.—1 Kor. 4:17.

7. Efesa 6:14, 15 i Paul chimmi kha Khrihfa upa nih zeitindah an zulh khawh?

⁷ Cawn khawhmi. Khrihfa upa nih innkhat hnu innkhat phungchimnak lawngah si loin zeitik caan paohah phungchim dingin timhcia tein le lungtho tein an umnak thawngin Paul kha an i zohchunh khawh. (Efesa 6:14, 15 rel.) Tahchunhnak ah, thilcawknak  asiloah rianṭuannak ah phung an chim khawh. Asiloah Biakinn saknak rian an bawmh hna tikah mah pawngkam ah a ummi le an sinah thil a rak zuarmi hna sinah phung an chim khawh. Paul bantukin Khrihfa upa nih bu rianṭuantu hna i telin phungchimnak rian ah midang cawnpiaknak caah an caan kha an hman khawh.

8. A caan ah Khrihfa upa pakhat nih zeidah tuah a herh men lai?

⁸ Khrihfa upa nih phungchimnak rian ah a caan pe kho lo tiangin Khrihfabu rian asiloah peng zohkhenhnak rian ah an rian an i tamter tuk awk a si lo. Mah rian hna ah a tlarimi si awkah rian cheukhat al a hauh caan a um men lai. Thlacam buin an ruah tikah mah rian kan cohlan ahcun a biapi deuhmi thil kan tuah kho lai lo ti kha an hun hngalh men lai. Mah thil hna ah zarh fatin tuahmi chungkhar pumhnak, lungtho tein phungchim rian ah i telnak asiloah phungchim dingin fale cawnpiaknak hna aa tel. Cheukhat nih an hmuhmi tinvo sung kha al awkah an i harh ko nain zeizong vialte ah a tlarimi si an duhnak kha Jehovah nih a hngalhthiam ti kha an zumh khawh.

9. A rian a tammi Khrihfa upa nih zei zuamcawhnak dah an ton?

⁹ Zuamcawhnak a sinak a ruang. Jehovah miphun cu buaibainak tampi kan ngei. Hi donghnak caan chungah kan dihlak in thazaang peknak, bawmhnak le hnemhnak kan herh. A caan ah cheukhat nih a ṭha lomi tuahsernak hna hrial awkah bawmhnak an herh men lai. (1 Thes. 5:14) Khrihfa upa nih Jehovah miphun tonmi buaibainak vialte an hlo kho dih lo ti cu a hmaan ko. Asinain Khrihfa upa nih a tuu pawl kha thazaang pe in kilveng hna seh tiah Jehovah nih aa ruahchan. A rian a tammi Khrihfa upa nih unau pawl bawmh awkah zeitindah a caan an pek khawh?

10. Paul nih 1 Thesalon 2:7 ningin Jehovah miphun kha zeitindah a rak zohkhenh hna?

¹⁰ Paul nunning. Paul cu unau pawl thangṭhat awk le thazaang pek awkah timhcia a si zungzal. Khrihfa upa nih Jehovah miphun kha dawtnak in an pehtlaih hnanak thawngin Paul nunning kha an i zohchunh. (1 Thesalon 2:7 rel.) Paul nih zumtukhat unau pawl a dawt hna le Jehovah nih a dawt hna kha a hngalhter hna. (2 Kor. 2:4; Efe. 2:4, 5) Paul nih unau pawl kha hawikom bantukin a pehtlaih hna i anmah he caan a hmangṭi. A ṭihmi thil le a derthawmnak kong a chimh hnanak thawngin an cungah zumhnak a ngeih kha a langhter. (2 Kor. 7:5; 1 Tim. 1:15) Asinain Paul nih amah pumpak buaibainak cungah lungthin a rak pe lo. Mah canah unau pawl kha bawmh a duh hna.

11. Paul nih unau pawl kha zeicah a chimhhrinh hna?

¹¹ Paul nih a caan ah unau pawl kha chimhhrinh  a herh. Asinain zeitikhmanh ah a thin hun buin a chimhrin bal hna lo. A dawt hna caah le ṭih a nungmi thil in huhphenh a duh hna ca tu ah a chimhhrinhmi hna a si. A chimhhrinhmi hna kha an hngalhthiam khawh nakhnga le an cohlan khawh nakhnga aa zuam. Tahchunhnak ah, Korin Khrihfa hna sin a cakuat ah fakpi in a rak chimhhrinh hna. Mah cakuat a ṭial hnuah Titas kha an sinah a thlah. Paul nih a cakuat an lehrulh ning he aa tlaiin a thin a rak phang. A pekmi ruahnak cheuhnak an cohlanmi le an zulhmi a hngalh caah aa lawm tuk.—2 Kor. 7:6, 7.

12. Khrihfa upa nih zumtukhat unau pawl kha zeitindah tha an pek khawh hna?

¹² Cawn khawhmi. Khrihfa upa nih zumtukhat unau pawl he caan an hmanṭinak thawngin Paul kha an i zohchunh khawh. Cutin tuah khawhnak lamkhat cu midang he i chawnhbiak dingin pumhnak ah tuan deuh in phanh kha a si. Unau pawl herhmi hnemhnak pek awkah a caan tlawmpal lawng pek a hau. (Rom 1:12; Efe. 5:16) Paul aa zohchunhmi Khrihfa upa nih unau pawl zumhnak fehter chin awkah Baibal hmangin tha an pek hna i Pathian nih a dawt hna ti kha an hngalhter hna. Mah lengah anmah nih an dawt hnanak zong an hngalhter hna. Anmah he pehtlaihnak an ngei zungzal i thangṭhat awkah caanṭha an kawl. Khrihfa upa pakhat nih a chimhhrinh hna tikah Baibal cungah hram a bunh awk a si. Unau pawl nih a chimhhrinhmi cohlang hna seh ti a duh caah cuset khaset tiin dawtnak he a cawnpiak hna.—Gal. 6:1.

13. Khrihfa upa pakhat kha a derthawmnak nih zeitindah a hnorsuan khawh?

¹³ Zuamcawhnak a sinak a ruang. Khrihfa upa cu mitlinglo an si. Midang bantukin palhnak an tuah ve. (Rom 3:23) A caan ah an derthawmnak cungah a tlarimi hmuhnak ngeih awkah an i harh men lai. Cheukhat nih ri an ngeihmi cungah lungthin an pek tuk caah an lung a dong men lai. Cun cheukhat nih an tlinlonak cu a biapimi a si lo i thlennak tuah zong a hau lo tiah an ruah.

14. Filipi 4:13 ningin toidornak nih Paul kha a derthawmnak tawnghtham awkah zeitindah a bawmh?

¹⁴ Paul nunning. Paul cu aa toidormi a si caah a derthawmnak kha keimah tein ka tawngtham kho lo ti kha a hngalh. Pathian pekmi thazaang a herh. Paul cu a hmasa ah a lung a khongmi a si i puarhrang ngaiin Khrihfa pawl a rak hrem hna. Asinain a tuahsernak a palh kha a hngalh i a ziaza kha lungtho tein thlen a duh. (1 Tim. 1:12-16) Paul cu Jehovah bawmhnak thawngin dawtnak, zaangfahnak le toidornak a ngeimi Khrihfa pakhat  a hung si. Derthawmnak tampi a ngeihmi kha a hngalh ko nain mah kong ruah peng canah Jehovah nih a ka ngaihthiam lai ti kha a zumh. (Rom 7:21-25) Mitling si dingin aa ruahchan lo. Mah canah a ngeihmi Khrihfa ziaza a ṭhancho nakhnga fakpi in aa zuam i a rian a liim khawh nakhnga toidor tein Jehovah bawmhnak kha aa bochan.—1 Kor. 9:27; Filipi 4:13 rel.

15. Khrihfa upa nih an derthawmnak he aa tlaiin zei bantuk a tlarimi hmuhnak dah an ngeih awk a si?

¹⁵ Cawn khawhmi. Khrihfa upa pawl cu mitling an si ruangah rian pekmi an si lo. Asinain Jehovah nih an palhnak kha cohlang in Khrihfa ziaza ṭhanter hna seh ti a duh. (Efe. 4:23, 24) Khrihfa upa pakhat nih ṭhancho a herhnak zawn kha i hngalh awkah Baibal kha a hlathlai awk a si i a herhmi ningin thlennak a tuah awk a si. Cuticun aa nuammi le a hlawh a tlingmi si awkah Jehovah nih a bawmh lai.—Jeim 1:25.

16. Khrihfa upa pakhat nih midang tlinlonak cungah lungthin a pek ahcun zeidah a cang kho?

¹⁶ Zuamcawhnak a sinak a ruang. Unau pawl he naih tein rian an ṭuanṭi caah unau pawl tlinlonak kha Khrihfa upa nih fawi tein an hngalh khawh. Asinain an i ralrin lo ahcun Khrihfa upa cu a puarhrangmi, dawtnak a ngei lomi le mi sualnak a kawlmi an hung si kho. Mah cu Satan nih tuahter aan duhmi hna a si tiah Paul nih ralrin a pek hna.—2 Kor. 2:10, 11.

17. Paul nih unau pawl kha zeitindah a hmuh hna?

¹⁷ Paul nunning. Unau pawl kha a ṭhatnaklei in a hmuh peng hna. A caan ah an tuahsernak nih amah pumpak kha a hnorsuan caah an palhnak kha a hngalh. Asinain mi pakhat nih palhnak a tuah men ruangah anih miṭhalo a si tinak a si lo ti kha Paul nih hngalh. Unau pawl kha a dawt tuk hna i a ṭhami an sining cungah lungthin a pek. Unau pawl nih a hmaanmi thil tuah an i harh tikah annih nih a hmaanmi thil tuah an duh i cutin tuah khawh awkah bawmh an hau tiah a ruah.

18. Paul nih Euodia le Sintekhe buaibainak a tawnghtham ningin zeidah na cawn khawh? (Filipi 4:1-3)

¹⁸ Tahchunhnak ah, Paul nih Filipi Khrihfabu ah a ummi unaunu pahnih kha zeitindah a rak bawmh hna ti kha ruathmanh u. (Filipi 4:1-3 rel.) Euodia le Sintekhe cu lung i khah lonak an ngeih caah an i komh ti lomi a si men lai. Asinain Paul nih a mawhchiat hna lo i an ngeihmi sining ṭha cung tu ah lungthin a rak pek. Zumhfekmi mah unaunu pahnih cu caan saupi Jehovah a bia cangmi an si. Jehovah nih a dawt hna ti kha Paul nih a hngalh. Mah unaunu pahnih cungah a ṭhami hmuhnak a ngeih caah an karah daihnak ser dingin tha a rak pek hna. Paul nih midang i a ṭhami an sining cungah lungthin a pek caah aa nuam  kho peng i unau pawl he a fekmi hawikomhnak a ngei kho peng.

19. (a) Khrihfa upa nih zumtukhat unau cungah zeitindah a ṭhami hmuhnak an ngeih khawh peng? (b) Biakinn a thianhmi Khrihfa upa pakhat hmanthlak in zeidah na cawn khawh?

¹⁹ Cawn khawhmi. Khrihfa upa hna, unau pawl ngeihmi sining ṭha kha hmuh awkah i zuam u. Kan dihlak in mitlinglo kan si nain kan dihlak in sining ṭha kan ngei. (Fil. 2:3) Khrihfa upa nih a caan ah unau pawl ruahnak cheuh a herh caan a um ti cu a hmaan ko. Asinain Khrihfa upa nih Paul bantukin mi pakhat nih thinhung buin a chimmi bia le a tuahsernak cungah lungthin an pek awk a si lo. Mah canah Jehovah an dawtnak, Pathian rian ah inkhawhnak an ngeihmi le thilṭha an tuah khawhnak cung tu ah lungthin an pek. A ṭhatnaklei in hmuhnak a ngeimi Khrihfa upa nih Khrihfabu ah dawtnak le daihnak an lenter.

20. Khrihfa upa nih Paul nunning in zeitindah ṭhathnemhnak an hmuh khawh?

²⁰ Khrihfa upa nih Paul nunning an hlathlai pengnak thawngin bawmhnak an hmu lai. Cutin an hlathlai tikah hitin an i hal kho: ‘Khrihfa upa pakhat in ka rian ka ṭuan lioah kaa nuamhnak kilven dingin Paul nunning nih zeitindah a ka bawmh khawh?’ (Tahchunhnak ah, w97 8/1 ca. 17-18. bt 99, 166-167 [BU] ah zoh.)

21. Khrihfa upa nih zeidah an zumh khawh?

²¹ Khrihfa upa hna, Jehovah nih a tlingmi si awkah si loin zumhfek tein um awkah aan halmi hna kha i cinken u. (1 Kor. 4:2) Jehovah nih Paul rian aa zuammi le zumhfek tein a ummi kha a sunsak tuk. Pathian nih a caah na ṭuanmi a sunsak tuk ti kha na zumh khawh. Jehovah nih “rian nan rak ṭuanmi le nan Khrihfa hawi nan rak bawmh tawn hna i atu zongah nan bawmh ko rih hna thawngin nan langhtermi amah nan dawtnak kha a philh lai lo.”—Heb. 6:10.