1, 2. ¿Pablo yizabara sãwũã kʼarebaseabʉ zõrãrã kongregasionebemara idi ewaridera?

 PABLOBARA mejãcha kãgabasi mebẽrãra akʉza mejãcha trajabasi ãyi kʼarea (Hech. 20:31). Maʉ̃ kʼarea Pablora mejãcha kãgadebasi, bari jaraita mebẽrã éfesodebemara jẽgasida kʼawuasidade iyira wua ze ẽ baita (Hech. 20:37). Idi ewadebida zõrãrãbara mejãcha kãgabʉ mebẽrã Pablode kĩrãkʼa akʉza zarea opanʉ yi kʼareba nesidabʉ kʼarebadaita (Filip. 2:16, 17).

² Zõrãrã nekʼãrẽ mejãcha obʉbara yibia bayi Pobloba oda akʉita (1 Cor. 11:1). Pablora nemitia omia baera edaʉde zarea oibarabasi nebia oita (Rom. 7:18-20). Pabloba mawũã bedʼea zroma ũdusidu, iyira pae ẽ basi akʉza idubʉ ẽ basi iyi sobiabʉta. Zõrãrãba Pablode kĩrãkʼa opanʉbʉrʉ Jeowaba zokʼabʉra sobiade opanañi ãya bedʼea zroma erpanʉmina. Akʉdadrʉ ãya sãwũã oseapanʉta.

3. ¿Kʼãrẽ ʉ̃rʉ bedʼeadayi naʉ̃ artikulodera? Akʉza ¿Kʼãrẽta kʼawuabʉ maʉ̃neba?

³ Naʉ̃ artikulodera kʼawuadayi nekʼãrẽ kimare zõrãrãita zareabʉta. 1) Ewari jʉrʉita Daizeze Bedʼea jaradiaita akʉza maʉ̃ daucha nekʼãrẽ wuabema oita. 2) Mebẽrã kãgade akʉita. 3) Iyikʉza akʉita iya kʼãrẽ nemitia obʉta. 4) Wuabemabawara trajaita. Maʉ̃ awuara kʼawuadayi, kʼãrẽta osita Pabloba iyi bedʼea zroma ũduside akʉza zõrãrãba sãwũã Pablode kĩrãkʼa oseabʉta.

4. ¿Edaʉde kʼãrẽa zõrãrãitara zareabʉ Daizeze Bedʼea jaradiata mawũã yiza bia bʼaita wuabemaraita?

⁴ ¿Kʼãrẽa zareabʉ?. Ãyara yiza biata ũdubira Daizeze Bedʼea jaradiabʉde nekʼãrẽ mejãcha oibaramina, ¿kʼãrẽta  opanʉ? Ãyara kongregasione ãba yi jʉrepanʉnera diskursota bio jara ũrĩbidaibara, maʉ̃ awuara kongregasione nekʼãrẽ waebʉta akʉdaibara. Adewara zõrãrã kongregasione kʼarebabaria jaradiaibara sãwũã akʉibarata kongregasionʼra, maʉ̃ awuara mebẽrãʼa so zarea diapanʉ (1 Ped. 5:2). Akʉza ʉ̃kʉrʉ zõrãrã kʼarebabʉ Daizeze de ara oita adewara Daizeze de parãnaita, mawũãsidu ãyitara audre yibia Daizeze Bedʼea jaradiaita mebẽrã jõmaʉ̃ba opanʉ kĩrãkʼa (Mat. 28:19, 20). 

5. ¿Kʼãrẽ yiza biata jaradiasi Pablobara Daizeze Bedʼea jaradiaide?

⁵ ¿Kʼãrẽ yiza diasi Pabloba? Filipenses 1:10ba jara ũrĩbibʉ, kʼãrẽa Pablobara biʼia jara diabasita Daizeze Bedʼeara nama jarabʉ: «Wuagadamarẽã nekʼãrẽ audre yibiata». Pablobara maʉ̃ta mawũã obasi, iyitara audre yibiabasi Daizeze Bedʼea mejãcha jaradiaita nekʼãrẽ badu obʉira maʉ̃ta mawũã osi poaga mejãchabayeda, iya jarasi: «Jarasia jõmaʉ̃ daidʼu, jarasia dezabidʼa» (Hech. 20:20). Adewara Pablobara ewari wiña jaradia ẽ basi awuarabʉrʉ jʉrʉbasi badua jaradiai bʼaita. Bari jaraita, ewari aba Pablobara Atenasne iyi neũdukʼawuarata jʉ̃ãbasi, maʉ̃ne awuru ẽbẽrarã jaradianʉmesi Daizeze Bedʼeata (Hech. 17:16, 17, 34). Gorogoroba Pablo jidasidadera iyi deda pikibʉsida, mawũãsidu Pablobara Daizeze Bedʼeata jarasi ẽbẽrarã iyiʉ̃me bedʼeabʉrʉʼa (Filip. 1:13, 14; Hech. 28:16-24).

6. ¿Pablobara sãwũã jaradia wuabemara ẽbẽrarãʼa?

⁶ Pablobara bia zokʼa kawuabasi iyi ewarira. Pabloba Daizeze Bedʼea jaradia wãbʉrʉza wuabemara jarabasi iyi kʼaidu jaradia wãnamarẽã. Bari jaraita Pabloba drʉa jĩgara jaradia wãsidera, Juan Marcosʼa iyi kʼaidu jaradia wãmarea jarasi, tẽã awuru pʉwʉrʉrama jĩgara jaradia wãside jarasi Timoteoʼa iyi kʼaidu jaradia wãmarẽã (Hech. 12:25; 16:1-4). Yi Pablo kʼaidu wãpanʉara jaradiabasi sãwũã nejaradiabari yibia bʼaita akʉza sãwũã akʉibarata kongregasionʼra (1 Cor. 4:17).

7. ¿Sãwũã zõrãrãbara oseapanʉ Efesios 6:14, 15de jarabʉ kĩrãkʼa?

⁷ ¿Kʼãrẽta kʼawuapanʉ? Zõrãrãbara Daizeze Bedʼeara deza deza jaradiapanʉ ẽ awuarabʉrʉ ãyi wãsimae jaradiapanʉ, mawũã ãya Pablode kĩrãkʼa opanʉ (akʉra Efesios 6:14, 15). Bari jaraita, ãyara jaradiaseabʉ ne edabʉmae, ãyi trajabʉmae. Zõrãrãbara Pablode kĩrãkʼa oseapanʉ ãya Daizeze Bedʼea jaradia wãbʉrʉde, ãba wãseapanʉ zõrãrã kʼarebabaribawara  maʉ̃ne jaradiaseabʉ sãwũã akʉibarata kongregasionʼra.

8. ¿Edaʉde kʼãrẽta oibara zõrãrãbara ãya jarabʉdade nekʼãrẽta omarẽã?

⁸ Zõrãrãbara ewarita erbaibara jaradia wãita, mamina ewarita jipa neẽ bʉrʉ, biga bayi ĩjã ẽ baita awuru trajo oita, ¿kʼãrẽa? Zõrãrã kongregasionebemarabara edaʉde ãyi yiwidʼida tẽã kʼawuaseapanʉ ãya jarapanʉta jõma ĩjãnara ewari neẽ baita semanaza ãyi mebẽrãbawara Jeowa ʉ̃rʉ kʼawuadaita, Daizeze Bedʼea jaradia wãita akʉza ãyi wũãwũãra Daizeze Bedʼea jaradia kʼawuabita. Ʉ̃kʉrʉ zõrãrãitara edaʉde zarea jaraita obe ẽã abarita ãyaʼa jarakʉanʉra, mamina Jeowabara kʼawuabʉ ãya kʼãrẽã mawũã jarasita, adewara kãgabʉ zõrãrã ewari erbamarẽã nekʼãrẽ jõma oita.

9. Zõrãrã nekʼãrẽ mejãcha obʉmina maʉ̃ awuara, ¿kʼãrẽta oibara?

⁹ ¿Kʼãrẽã zareabʉ? Jeowa odepanʉra naʉ̃ ewari jõbodoarepanʉ baera, ewariza audre ũdupanʉ bedʼea zromata, maʉ̃ kʼarea jõmaʉ̃ba nesidapanʉ so zarea diadamarẽã akʉza kʼarebadamarẽã. Edaʉde ʉ̃kʉrʉta nesidabʉ kʼarebata mawũã ãya nemitia oda ẽ baita (1 Tes. 5:14). Zõrãrãbara jõma ara obeda ẽ mebẽrãba bedʼea zroma erbʉra, mawũãsidu Jeowabara kãgabʉ mebẽrãʼa so zarea diadamarẽã akʉza bia akʉdamarẽã, mawũẽra zõrãrãra nekʼãrẽ mejãcha odaibara.

10. 1 Tesalonicenses 2:7de jarabʉdebara, ¿Pablobara sãwũã akʉbasi mebẽrãra?

¹⁰ ¿Kʼãrẽ yizata diasi Pabloba? Pablobara mebẽrãne nebia ũdubʉrʉdera iyira jarabasi mawũã, adewara ewari jõmaʉ̃nẽ so zarea diabasi mebẽrãʼa. Zõrãrãbara Pablode kĩrãkʼa opanʉ mebẽrã bia edabʉdade akʉza kãgade akʉpanʉne (akʉra 1 Tesalonicenses 2:7). Pablobara jarabasi yi mebẽrãʼa Jeowaba akʉza iyabida mejãcha kãgabʉta (2 Cor. 2:4; Efes. 2:4, 5). Pablobara mebẽrã akʉbasi iyi neũdukʼawuara kĩrãkʼa adewara ewari jʉrʉbasi ãyibawara bʼaita akʉza Pablobara jara ũrĩbibasi iyira kʼãrẽ kʼarea perabʉta adewara kʼãrẽ nemitia oẽ baya yõbʉta mawũã ũdubisi Pablobara yi mebẽrãne ĩjãbʉta (2 Cor. 7:5; 1 Tim. 1:15). Pablobara iya bedʼea zroma erbʉtrʉ krĩcha ẽ basi awuarabʉrʉ krĩchasibasi sãwũã kʼarebaita mebẽrãta.

11. ¿Kʼãrẽa Pablobara ũrãgʼabasi mebẽrã?

¹¹ Edaʉde Pablobara ũrãgʼabasi mebẽrãra, mamina mawũã oẽ basi ãyibawara kĩrʉbʉ baera awuarabʉrʉ mawũã ũrãgʼabasi kãgabasi baera adewara kʼarebasi ãya nemitia oẽ marẽã. Pabloba mebẽrãta ũrãgʼabasidera bedʼea zareabʉta jara ẽ basi akʉza akʉbasi mebẽrãba sãwũã ũrĩpanʉta iya ũrãgʼa diabʉra. Pablobara kartata  diabʉesi corintiodebemara, maʉ̃ kartadera ũrãgʼata bio jarabasi mamina maʉ̃ tẽã zokʼabʉesi Titota, iya kʼawuaita sãwũã ũrĩsidata. Pablobara mejãcha sobiabasi corintiodebemaraba ũrĩsida baera (2 Cor. 7:6, 7).

12. ¿Zõrãrãbara kʼãrẽta oseabʉ mebẽrãʼa so zarea diaita?

¹² ¿Kʼãrẽta kʼawuapanʉ? Zõrãrãbara Pablode kĩrãkʼa oseapʉnʉ ewari jʉrʉbʉde mebẽrãʉ̃me bedʼeaita. Bari jaraita, zõrãrãta ãza jʉ̃ẽ ẽ bʉrʉ, bedʼeasaeabʉ mebẽrãbawara. Edaʉde mebẽrãʼa so zarea diaita akʉza kʼarebaira ewari mejãcha nesida ẽ (Rom. 1:12; Efes. 5:16). Zõrãrãba Pablode kĩrãkʼa odaira ũrãgʼa diaibara Daizeze Bedʼeadeba adewara mebẽrãʼa kĩrãbebibara Jeowaba mejãcha kãgabʉta akʉza zõrãrãbara kãgabʉta ũdubipanʉ mebẽrãbawara badua bedʼeapanʉne adewara mebẽãba nebiata osibʉrʉ ãyaʼa jarabʉde kʼãrẽ biata osita. Mebẽã abaʉta nesidabʉrʉ ũrãgʼata, zõrãrãbara Daizeze Bedʼeadeba ũrãgʼa diaibara. Adewara zõrãrabara mebẽrã ũrãgʼa diabʉdera mia kʼãrẽsida mera ẽ jarabʉ ãyaʼa, mamina maʉ̃ra ibiade jarapanʉ, mawũã ũrãgʼapanʉ ãya sãwũã jarabʉdeba sopʉa senti ẽ marẽã mebẽãta (Gál. 6:1).

13. Zõrãrã jõmaʉ̃ta nemitia omiamina, ¿kʼãrẽta krĩchada ẽ baibara?

¹³ ¿Kʼãrẽa zareabʉ? Zõrãrã jõmaʉ̃ta nemitia omiara abarika dayirã kĩrãkʼa (Rom. 3:23). Edaʉde ʉ̃kʉrʉ zõrãrã ãya biode jẽda krĩchabʉ ãya kʼãrẽ aña odata akʉza ãya kʼãrẽ obe ẽãta. Mamina ʉ̃kʉrʉ zõrãrãbara krĩchabʉ ãya aña odara, kʼãrẽa awuara oira nesida ẽãta. Mamina maʉ̃ krĩchaira jipa zeri ẽ.

14. Filipenses 4:13de jarabʉdera, ¿Pablora edabʉta krĩchabasi baera naʉ̃ba sãwũã kʼarebasi?

¹⁴ ¿Kʼãrẽ yizata diasi Pabloba? Pablobara bia kʼawuabasi iyira nemitia omia baera jõma aripe oẽãta, mawũã krĩchasi edabʉta krĩchabasi baera, maʉ̃ kʼarea nesidabasita Daizeze jaure zareaba kʼarebamarẽã. Pablo kristianobai nããra pẽwãbasi kristianota beaita akʉza zʉbʉria oita, mamina iya tẽãne kʼawuasi mawũã oira zeri ẽ ẽãta mawũã iyi krĩchara awuara besi, mõbe nebiata ojʉ̃drʉsi (1 Tim. 1:12-16). Jeowa kʼarebadeba Pablora zõrãrã ẽbẽra biabasi, edabʉta krĩchabasi, kãgabasi wuabemarara akʉza so borekea akʉbasi. Pablora iya nemitia oda kʼarea krĩcha obasi, mamina iya maʉ̃trʉ ewari jõmʉ̃nẽ krĩchanʉme ẽ basi,  kʼawuabasi iya nemitia odara Jeowaba kĩrãduasita (Rom. 7:21-25). Pablobara kʼawuabasi iyira nemitia omiata, maʉ̃ba kʼawuabasi jõma aripe oẽãta. Maʉ̃ kʼarea krĩchasi iya nebia obʉra audre bia oita akʉza Jeowaʼa yi kʼarebabisi sãwũã bia jaradia kʼawuaita mawũã osi edabʉta krĩchabasi baera (1 Cor. 9:27; akʉra Filipenses 4:13).

15. Zõrãrãbara edaʉde aña obʉ nemitia omia baera maʉ̃ kʼarea, ¿kʼãrẽta oibara?

¹⁵ ¿Kʼareta kʼawuapanʉ? Zõrãrã kongregasionebemara zõrãrã babida ẽ ãyita nemitia oka baera. Mamina Jeowabara kãgabʉ zõrãrãba krĩchadamarẽã ãyabida nemitia obarita akʉza Jeowaba zokʼabʉta odamarẽã (Efes. 4:23, 24). Zõrãrã ãyikʉza akʉdaibara kʼãrẽta waebʉta Daizeze Bedʼeaba jarabʉdebemata, maʉ̃ne ũdudara aña obʉta maʉ̃ra mesera ara odaibara, mawũã opanʉbʉrʉ Jeowaba kʼarebayi sobia bʼaita akʉza bia odaita ãya traja obʉra (Sant. 1:25).

16. ¿Kʼãrẽta berabariseabʉ zõrãrãba mebẽrãba nemitia obʉtrʉ akʉpanʉbʉrʉ?

¹⁶ ¿Kʼãrẽã zareabʉ? Mebẽrãbawara trajabʉdera, zõrãrãbara ũduseabʉ mebẽrãbara aña obʉta, zõrãrãba biode akʉbʉbʉrʉ mebẽrãba aña obʉta ãyi ʉ̃rʉ imitia bedʼeaseabʉ akʉza ãyaʼa kãga ũdubida ẽ. Pablobara kristianora jarasi Diarubara [Ãtomĩa] mawũã panamarẽã kãgabʉta (2 Cor. 2:10, 11).

17. ¿Pablobara kʼãreta akʉbasi mebẽrãnera?

¹⁷ ¿Kʼãrẽ yizata diasi Pabloba? Pablobara kʼawuabasi mebẽrãbara nemitia obʉta mamina iya audre akʉbasi mebẽrãba nebia otrʉ. Adewara Pablobara kʼawuabasi kʼai ẽbẽrata wãrĩnu so kayiruabasita akʉza kʼaiba nebia obʉta mamina edaʉde nemitia obarita. Akʉza Pablobara mejãcha kãgabasi mebẽrãra adewara akʉbasi mebẽrãba ãyi sode nebia erbʉtrʉ. Maʉ̃ kʼarea ũdubaside ẽbẽrata zarea obʉta nebia oita, krĩchabasi naʉ̃ ẽbẽrabara soiduba obasita akʉza kʼarebasi iya nesidabʉde.

18. Filipenses 4:1-3 bayeda jarabʉdebara, ¿kʼãrẽta kʼawuapanʉ Pabloba Evodia, Síntique kʼarebadadeba?

¹⁸ Akʉdadrʉ Pablobara sãwũã kʼarebasita mebẽã wẽrã ũme Filiposdebemata (akʉra Filipenses 4:1-3). Evodia, Síntiqueʉ̃me ãyirainʉ yõsida, mamina Pablobara maʉ̃ kʼarea ãyira kʼẽã ẽ basi mia ãyi ʉ̃rʉ imitia bedʼea ẽ basi, awuarabʉrʉ akʉsi ãyi sode nebia erbʉta akʉza Jeowa ode sãwũã kʼẽrẽpa panʉta adewara kʼawuabasi Jeowabara ãyira kãgabʉta. Ãyi sode nebia erbʉta akʉsi baera ũrãgʼasi ãyi bedʼea zroma erbʉra ara odamarẽã mawũã aduʼa panaita. Pablobara akʉbasi  baera mebẽrãba ãyi sode nebia erbʉta naʉ̃ba kʼarebasi sobia bʼaita akʉza neũdukʼawua bia erbaita kongregasione.

19. (1) ¿Kʼãrẽta oibara zõrãrãba mebẽrãba sode nebia erbʉta akʉita? (2) ¿Kʼãrẽta jaradiabʉ zõrãrãʼa Daizeze Nokʼo ʉ̃rʉ bedʼeabari deda imanʉmʉneba?

¹⁹ ¿Kʼãrẽta kʼawupanʉ? Zõrãrã akʉra mebẽrãba ãyi sode nebia erbʉta. Mebẽrãra nemitia omiamina ãyi sodera nebiata erbʉ (Filip. 2:3). Edaʉde marabara ũrãgʼa diaibara mebẽrãba aña obʉta ara odamarẽã, mawũã obʉdera jʉ̃zaba krĩcha ẽ baibara ãya nemitia obʉtrʉ awuarabʉrʉ kĩrãbedaibara naʉ̃ mebẽãra iyi sode nebia erbʉta. Krĩchaibara naʉ̃ mebẽãbara kãgabʉta Jeowara, iyi ode kʼẽrẽpabʉta akʉza nemitia obʉra ara oseabʉta. Zõrãrã mebẽrãba sode nebia erbʉta akʉpanʉbara kʼarebabʉ kongregasione aduʼa panaita.

20. ¿Kʼãrẽta oseabʉ zõrãrãbara audre kʼawuaita Pablo ʉ̃rʉ?

²⁰ Zõrãrãitara yibia bayi audre kʼawuaita Pabo ʉ̃rʉ. Bara jarita, jʉrʉseabʉ bedʼea Pablo, Índice de las publicaciones Watch Tower, mõbe bedʼea «Pablo» abʉmae jʉrʉda «ejemplo para los ancianos». Maraba naʉ̃ ũdubʉrʉde mayikʉza widiseabʉ, ¿sãwũã kʼarebaseabʉ Pablo yizabara mʉ̃ra sobia bʼaita zõrãrã kongregasionebemane?

21. ¿Zõrãrãbara kʼãrẽta ĩjãnaibara?

²¹ Zõrãrã kĩrãbeidua Jeowabara jʉ̃ã ẽãta maraba jõma aripe omarẽã awuarabʉrʉ iyara jʉ̃ãbʉ marara kʼẽrẽpa panamarẽã (1 Cor. 4:2). Jeowabara bia akʉsi Pabloba odara akʉza iyi kʼẽrẽpa badara, idibida maraba wãrĩnu ĩjãseabʉ Jeowabara bia akʉbʉta maraba obʉra, Hebreos 6:10de jarabʉ kĩrãkʼa: «Maraba opanʉra kĩrãdua ẽ akʉza iyi trʉ̃ kãga ũdubipanʉsida, iyi pʉwʉrʉta kʼarebasida baera akʉza kʼarebapanʉ baera».