1, 2. ¿Chucoch jiñi i yejemplo Pablo miʼ mejlel i coltan jiñi ancianojob ti ili ora?

 JIÑI apóstol Pablo tsiʼ wen cʼuxbi i yermañujob, i jin chaʼan cabʌl chuqui tsiʼ mele tiʼ tojlelob (Hech. 20:31). Jin chaʼan tsaʼ wen cʼuxbinti. Jumpʼejl ejemplo, ti jumpʼejl bʌ qʼuin, cheʼ bʌ jiñi ancianojob ti Éfeso tsiʼ yubiyob chaʼan maʼañix mi caj i chʌn qʼuelob Pablo, «tsaʼ laj cajiyob ti uqʼuel» (Hech. 20:37). Cheʼ jaʼel, jiñi ancianojob ti ili ora miʼ wen cʼuxbiñob i yermañujob i cabʌl chuqui miʼ melob (chaʼleñob) chaʼan miʼ coltañob (Filip. 2:16, 17). Pero an i tajol miʼ ñusañob wocol. ¿Chuqui miʼ mejlel i coltañob?

² Jiñi ancianojob wen cabʌlob i yeʼtel (troñel), jin chaʼan yomʌch miʼ qʼuelbeñob i yejemplo Pablo (1 Cor. 11:1). Pablo lajalʌch bajcheʼ joñonla, xmulil jaʼel i an tajol yom miʼ chaʼlen wersa chaʼan miʼ mel chuqui wen (Rom. 7:18-20). Anquese tsiʼ ñusa wocol tac, tsaʼʌch i chʌn chaʼle wersa yicʼot maʼañic tiʼ sʌtʌ i tijicñʌyel. Mi jiñi ancianojob mucʼʌch i lajibeñob i yejemplo, chʌn tijicña mi caj i bej melbeñob i yeʼtel Jehová anquese miʼ ñusañob wocol. Laʼ laj qʼuel bajcheʼ miʼ mejlel i melob.

3. ¿Chuqui mi caj laj qʼuel ti ili estudio, i chuqui mi caj laj cʌn?

³ Ti ili estudio mi caj laj qʼuel chʌnchajp wocol muʼ bʌ i ñusañob jiñi ancianojob: 1) Yom miʼ chaʼleñob subtʼan yicʼot miʼ melob jiñi yan tac bʌ i yeʼtel, 2) yom miʼ cʌntañob yicʼotob i cʼuxbiya jiñi tiñʌmeʼ, 3) yom miʼ mʌlbeñob jiñi i cʼunlel tac i 4) yom miʼ ñusʌbeñob i sajtemal jiñi yañoʼ bʌ. Mi caj laj qʼuel chuqui tsiʼ mele Pablo chaʼan miʼ ñusan ili wocol tac yicʼot bajcheʼ miʼ mejlel i lajiñob jiñi ancianojob.

4. ¿Chucoch an i tajol wocol miʼ yubiñob jiñi ancianojob chaʼan miʼ yʌcʼob wem bʌ ejemplo ti subtʼan?

⁴ ¿Chucoch wocol? Jiñi ancianojob yom miʼ yʌcʼob wem bʌ ejemplo ti jiñi subtʼan, pero anto yan tac bʌ i yeʼtelob. Laʼ laj qʼuel chaʼpʼej uxpʼejl. An i tajol yom miʼ chaʼleñob ti presidir jiñi tempa bʌ I Subtʼan yicʼot i Melbal jiñi xÑoptʼan o yom miʼ ñusañob jiñi Cʌntesʌntel chaʼan i tʼan Dios ti congregación. Cheʼ jaʼel, yom miʼ chajpañob yan tac bʌ asignación o discurso tac. Cheʼ jaʼel, miʼ wen aqʼueñob i yorajlel chaʼan miʼ chajpañob jiñi siervo ministerialob yicʼot chaʼan miʼ ñuqʼuesʌbeñob i pusicʼal jiñi hermanojob (1 Ped. 5:2). An ancianojob muʼ bʌ i chaʼleñob coltaya tiʼ melol (pʌtol) yicʼot tiʼ cʌntʌntel jiñi i Yotlel tac tempa bʌ yicʼot yan tac bʌ baqui mi lac chʼujutesan Jehová. Pero, cheʼ bajcheʼ jiñi yambʌ xsubtʼañob, jiñi ñumen ñuc bʌ i cʼʌjñibal tiʼ tojlel jiñi ancianojob jiñʌch jiñi subtʼan (Mat. 28:19, 20).

5. ¿Chuqui ti ejemplo tsiʼ yʌcʼʌ Pablo ti jiñi subtʼan?

⁵ Jiñi i yejemplo Pablo. Ti Filipenses 1:10 miʼ coltañonla lac ñaʼtan chucoch Pablo tsaʼ sujti ti juntiquil wem bʌ xsubtʼan. Yaʼi mi lac taj ili ticʼojel: «Chaʼan mi laʼ qʼuel chuqui tac jiñi ñumen ñuc bʌ i cʼʌjñibal». Pablo tsaʼʌch i jacʼʌ i ticʼojel jaʼel. Tsaʼ aqʼuenti jumpʼejl eʼtel, i cabʌl jab tsiʼ qʼuele bajcheʼ jiñi ñumen ñuc bʌ i cʼʌjñibal tiʼ cuxtʌlel. Tsiʼ chaʼle subtʼan «baqui an yonlel lac piʼʌlob yicʼot ti jujumpʼejl otot» (Hech. 20:20). Mach tsaʼic jach i yajca bajcheʼ hora miʼ chaʼlen subtʼan o chaʼan jumpʼejl jach qʼuin ti jumpʼejl semana. Jumpʼejl ejemplo, ti jumpʼejl bʌ qʼuin cheʼ bʌ yaʼan ti Atenas, i woli (choncol) i pijtan jiñi i piʼʌlob, tiʼ sube wen tʼan junmojt lac piʼʌlob ñucoʼ bʌ i yeʼtel i añʌch tsaʼ bʌ i jacʼʌyob (Hech. 17:16, 17, 34). Cheʼ jaʼel, cheʼ bʌ ñupʼul, tiʼ sube wen tʼan majqui jach miʼ mejlel i pejcan (Hech. 28:16-24; Filip. 1:13, 14).

6. ¿Chuqui tsiʼ mele Pablo chaʼan miʼ cʌntesan yambʌ hermanojob?

⁶ Pablo tsaʼʌch i cʼʌñʌ ti wen jiñi i tiempo. Ñʌmʌl i pʌy yambʌlob ti subtʼan. Jumpʼejl ejemplo, cheʼ bʌ cojaxto tsaʼ majli ti subtʼan bajcheʼ misionero tsiʼ pʌyʌ majlel Juan Marcos i cheʼ tiʼ chaʼyajlel, tsiʼ pʌyʌ majlel Timoteo (Hech. 12:25; 16:1-4). Tsiʼ pʌsbeyob bajcheʼ yom miʼ chajpañob jiñi eʼtel ti congregación, bajcheʼ yom miʼ sujtelob ti wem bʌ xcʌnta tiñʌmeʼ yicʼot ti wem bʌ xcʌntesajob (1 Cor. 4:17).

7. ¿Bajcheʼ miʼ mejlel i jacʼob jiñi ancianojob jiñi ticʼojel tsaʼ bʌ i yʌcʼʌ Pablo ti Efesios 6:14, 15?

⁷ Muʼ bʌ laj cʌn. Jiñi ancianojob mach jin jach miʼ lajibeñob i yejemplo Pablo cheʼ bʌ miʼ chaʼleñob subtʼan ti ototʌl tac, yicʼotʌch cheʼ bʌ miʼ chaʼleñob subtʼan baqui jach añob  (pejcan Efesios 6:14, 15). Jumpʼejl ejemplo, miʼ mejlelob ti subtʼan cheʼ bʌ miʼ majlelob ti mʌñoñel o yaʼ tiʼ yeʼtel. O mi woliyob (yʌquelob) ti coltaya ti jumpʼejl construcción miʼ mejlel i subeñob wen tʼan jiñi lʌcʼʌl bʌ chumulob yaʼi o jiñi muʼ bʌ i cʼotel i cʌyob jiñi material tac. I, cheʼ bajcheʼ tsiʼ mele Pablo, cheʼ bʌ woliyob ti subtʼan miʼ mejlel i cʌntesañob yañoʼ bʌ, bajcheʼ jiñi siervo ministerialob.

8. ¿Chuqui yom miʼ bixel mel juntiquil anciano?

⁸ Jiñi ancianojob mach yomic miʼ cʌyob subtʼan tiʼ caj cabʌl chuqui woliʼ melob yaʼ ti congregación o yaʼ ti circuito. Chaʼan maʼañic miʼ yujtel iliyi, an i tajol mi caj i yʌlob chaʼan an chuqui maʼañic mi caj i mejlel i melob. Tajol cheʼ bʌ tsaʼix laʼ taja ti oración iliyi mi laʼ qʼuel chaʼan an jumpʼejl eʼtel muʼ bʌ i mʌctañetla chaʼan mi laʼ mel jiñi ñumen ñuc bʌ i cʼʌjñibal bajcheʼ jiñi chʼujutesaya ti familia, jiñi subtʼan o chaʼan mi laʼ cʌntesañob laʼ walobilob ti subtʼan. An wocol bʌ mi laʼ wubin chaʼan mi laʼ wʌl chaʼan maʼañic mi caj laʼ mejlel laʼ mel jumpʼejl eʼtel, pero miʼ mejlel laʼ ñop chaʼan Jehová miʼ chʼʌmben i sujm chaʼan yom pʼisbiletla tiʼ pejtelel chuqui mi laʼ mel.

9. La cujil chaʼan cabʌl chuqui miʼ melob jiñi ancianojob, jin chaʼan, ¿chuqui ti wocol miʼ tajob?

⁹ ¿Chucoch wocol? Jiñi i wiñiconbʌla Jehová an cabʌl lac wocol come chumulonla ti cojix tac bʌ qʼuin. Jin chaʼan, la com mi lac ñuqʼuesʌbentel lac pusicʼal yicʼot mi laj coltʌntel. An i tajol, an yom bʌ miʼ coltʌntelob chaʼan maʼañic miʼ majlelob ti mach bʌ weñic bij (1 Tes. 5:14). I sujmʌch chaʼan jiñi ancianojob maʼañic miʼ mejlel i laj jisañob lac wocol. Pero Jehová yom chaʼan miʼ chaʼleñob wersa chaʼan miʼ ñuqʼuesʌbeñob i pusicʼal yicʼot chaʼan miʼ cʌntʌbeñob jiñi i wiñicob. La cujil chaʼan cabʌl chuqui miʼ melob, jin chaʼan, ¿baqui miʼ mejlel i locʼsʌbeñob i yorajlel chaʼan miʼ coltañob i yermañujob?

10. Cheʼ bajcheʼ miʼ yʌl 1 Tesalonicenses 2:7, ¿bajcheʼ yilal Pablo tiʼ tojlel i yermañujob?

¹⁰ Jiñi i yejemplo Pablo. Tiʼ pejtelel ora tiʼ sʌcla bajcheʼ miʼ mejlel i suben jiñi hermanojob chaʼan weñʌch chuqui woliʼ melob yicʼot chaʼan miʼ pʼʌtʼesañob. Weñʌch cheʼ jiñi ancianojob miʼ lajiñob bajcheʼ tsiʼ pʌsʌ i cʼuxbiya tiʼ tojlel jiñi hermanojob (pejcan 1 Tesalonicenses 2:7). Pablo tiʼ sube jiñi hermanojob chaʼan mucʼʌch i cʼuxbiñob yicʼot chaʼan cheʼʌch Jehová jaʼel (2 Cor. 2:4; Efes. 2:4, 5). Tsiʼ qʼuele bajcheʼ i yamigojob i tsaʼ ajñi yicʼotob. Tsiʼ pʌsbeyob chaʼan mucʼʌch i chʼʌmob ti ñuc cheʼ bʌ tiʼ subeyob chuqui tac miʼ cʼojoʼtan (pensalin) yicʼot jiñi i cʼunlel tac (2 Cor. 7:5; 1 Tim. 1:15). Pero mach jin jach tsaʼ caji i ñaʼtan jiñi i wocol, tsiʼ ñaʼta bajcheʼ miʼ mejlel i coltan jiñi hermanojob.

11. ¿Chucoch jiñi apóstol Pablo tsiʼ yʌqʼue ticʼojel jiñi yambʌ xñoptʼañob?

¹¹ An i tajol, Pablo tsaʼʌch i yʌqʼue ticʼojel jiñi  yambʌ xñoptʼañob. Pero mach chaʼañic jach miʼ locʼsan i michʼajel, chaʼañʌch yom i coltañob chaʼan maʼañic miʼ yotsañob i bʌ ti wocol come miʼ cʼuxbiñob. Tsiʼ chaʼle wersa chaʼan mach wocolic ti chʼʌmbentel i sujm jiñi i ticʼojel yicʼot tsiʼ mulaj i qʼuel bajcheʼ yilal miʼ jajqʼuel. Jumpʼejl ejemplo, cheʼ bʌ tiʼ tsʼijbubeyob majlel jiñi corintiojob, tsiʼ yʌqʼueyob tsʌts bʌ ticʼojel tac. Pero ti wiʼil tsiʼ choco majlel Tito, come yom i ñaʼtan bajcheʼ yilal tsiʼ chʼʌmʌyob jiñi carta. ¡I wen tijicña cheʼ bʌ tsiʼ yubi chaʼan tsaʼʌch i jacʼʌyob jiñi ticʼojel! (2 Cor. 7:6, 7).

12. ¿Chuqui miʼ mejlel i melob jiñi ancianojob chaʼan miʼ pʼʌtʼesañob i yermañujob?

¹² Muʼ bʌ laj cʌn. Jiñi ancianojob miʼ mejlel i lajibeñob i yejemplo Pablo cheʼ bʌ miʼ yʌqʼueñob tiempo jiñi hermanojob. Junchajp bajcheʼ miʼ melob jiñʌch cheʼ seb miʼ cʼotelob ti tempa bʌ chaʼan miʼ chaʼleñob tʼan yicʼotob. An i tajol yom jach chaʼpʼej uxpʼejl minuto chaʼan miʼ ñuqʼuesʌbeñob i pusicʼal juntiquil hermano o chaʼan miʼ pʌsbeñob jiñi i cʼuxbiya (Rom. 1:12; Efes. 5:16). Jiñi ancianojob muʼ bʌ i lajiñob Pablo miʼ cʼʌñob jiñi Biblia chaʼan miʼ ñuqʼuesʌbeñob i pusicʼal jiñi hermanojob yicʼot chaʼan miʼ subeñob chaʼan Jehová mucʼʌch i cʼuxbiñob. Cheʼ jaʼel, miʼ pʌsbeñob i cʼuxbiya cheʼ bʌ maʼañic miʼ cʌy i pejcañob yicʼot miʼ sʌclañob bajcheʼ miʼ mejlel i subeñob chaʼan weñʌch chuqui woliʼ melob. Mi juntiquil anciano yom miʼ yʌcʼ jumpʼejl ticʼojel, yomʌch loqʼuem yaʼ ti Biblia. Jamʌ tsiquil chuqui miʼ yʌl, pero yicʼotʌch i cʼuxbiya come yomʌch coltaya (Gál. 6:1).

13. ¿Bajcheʼ miʼ mejlel i ticʼlan juntiquil anciano jiñi cʼunlel am bʌ i chaʼan?

¹³ ¿Chucoch wocol? Jiñi ancianojob xmulilob, jin chaʼan an i tajol miʼ tajob i sajtemal cheʼ bajcheʼ ti lac pejtelel (Rom. 3:23). An i tajol yom miʼ wen chaʼleñob wersa chaʼan pʼisbil jach miʼ qʼuelob jiñi i cʼunlelob. An muʼ bʌ i yubiñob i chʼijyemlel come jin jach miʼ ñaʼtañob jiñi maʼañic bʌ miʼ mejlel i melob. An maʼañic bʌ miʼ qʼuelob ti ñuc jiñi i sajtemalob i miʼ ñaʼtañob chaʼan maʼañic chuqui yom miʼ qʼuextañob.

14. Cheʼ bajcheʼ miʼ yʌl Filipenses 4:13, ¿bajcheʼ tsiʼ colta jiñi i pecʼlel Pablo chaʼan miʼ lʌtʼ jiñi i cʼunlel tac?

¹⁴ Jiñi i yejemplo Pablo. Yicʼot i pecʼlel tsiʼ yʌlʌ chaʼan maʼañic miʼ mejlel i bajñel mʌlben jiñi cʼunlel am bʌ i chaʼan, yujil chaʼan i cʼʌjñibal i chaʼan i coltaya Dios. Ti wajali tsiʼ wen ticʼla jiñi xñoptʼañob. Pero ti wiʼil tsiʼ qʼuele chaʼan mach weñic tsaʼ bʌ i mele i tsaʼʌch i qʼuexta jiñi i melbal (chaʼlibal) yicʼot i ñaʼtʌbal (1 Tim. 1:12-16). Tiʼ coltaya Jehová, tsaʼ sujti ti juntiquil xcʌnta tiñʌmeʼ yujil bʌ i cʼuxbiya, am bʌ i pʼuntaya yicʼot am bʌ i pecʼlel. Cʼuxʌch tsiʼ yubi jiñi i sajtemal tac, pero tsiʼ  ñopo chaʼan Jehová tsiʼ ñusʌbe i mul i maʼañix tsaʼ caji i chʌn ñaʼtan jiñi mach tac bʌ weñic tsiʼ mele (Rom. 7:21-25). Yujil chaʼan mach tojic, pero tsaʼʌch i chaʼle wersa chaʼan miʼ tojʼesan jiñi i melbal tac i tsiʼ colta i bʌ ti Jehová yicʼot i pecʼlel chaʼan miʼ tsʼʌctesan jiñi i yeʼtel (1 Cor. 9:27; pejcan Filipenses 4:13).

15. ¿Chuqui miʼ mejlel i mel juntiquil anciano chaʼan mach ñumeñic ti pʼis miʼ qʼuel jiñi i cʼunlel tac?

¹⁵ Muʼ bʌ laj cʌn. Mach chaʼañic tojob miʼ waʼchocontelob jiñi ancianojob, pero Jehová yomʌch chaʼan miʼ cʌñob chaʼan miʼ tajob i sajtemal yicʼot chaʼan yom miʼ chaʼleñob wersa chaʼan miʼ tajob wen tac bʌ i melbal (Efes. 4:23, 24). Yicʼot i coltaya jiñi i Tʼan Dios yom miʼ qʼuelob i bʌ yicʼot miʼ qʼuextañob jiñi mach bʌ weñic i melbalob. Cheʼ bajcheʼ jiñi, Jehová mi caj i coltañob chaʼan tijicñayob yicʼot chaʼan miʼ tsʼʌctesañob ti wen jiñi i yeʼtelob (Sant. 1:25).

16. ¿Chuqui miʼ mejlel ti ujtel mi jiñi ancianojob jin jach miʼ qʼuelbeñob i sajtemal jiñi hermanojob?

¹⁶ ¿Chucoch wocol? Tajol jiñi ancianojob miʼ tajob i qʼuel i sajtemal jiñi yañoʼ bʌ cheʼ bʌ miʼ chaʼleñob eʼtel yicʼotob. Mi maʼañic miʼ cʌntañob i bʌ miʼ mejlelob ti lujbʼan, i michʼañob o miʼ tajob ti tʼan. Pablo tiʼ sube jiñi xñoptʼañob chaʼan jiñʌch yom bʌ Satanás (2 Cor. 2:10, 11).

17. ¿Bajcheʼ yilal tsiʼ qʼuele i yermañujob jiñi Pablo?

¹⁷ Jiñi i yejemplo Pablo. Tiʼ pejtelel ora tsiʼ qʼuele chuqui wem bʌ tiʼ tojlel i yermañujob. Ili mach yomic i yʌl chaʼan maʼañic tsiʼ taja i qʼuelbeñob jiñi i sajtemal, come tsaʼʌch i ticʼla tac jaʼel. Pero yujil chaʼan mach lajalic jumpʼejl mach bʌ weñic lac melbal yicʼot juntiquil lac piʼʌl mach bʌ weñic. Tsiʼ cʼuxbi jiñi i yermañujob i jin chaʼan tsiʼ qʼuele jiñi wem bʌ i melbalob. I cheʼ bʌ tsiʼ qʼuele chaʼan an wocol bʌ miʼ yubin chaʼan miʼ mel chuqui wen, tsaʼʌch i ñaʼta chaʼan yomʌch i mel chuqui wem bʌ yicʼot chaʼan yom jach miʼ tsʼitaʼ coltʌntel.

18. ¿Chuqui mi laj cʌn chaʼan bajcheʼ Pablo tsiʼ colta Evodia yicʼot Síntique? (Filipenses 4:1-3).

¹⁸ Laʼ laj qʼuel bajcheʼ Pablo tsiʼ colta chaʼtiquil hermana yaʼ ti congregación Filipos (pejcan Filipenses 4:1-3). Miʼ mejlel la cʌl chaʼan Evodia yicʼot Síntique mach weñic miʼ qʼuelob i bʌ tiʼ caj an chuqui maʼañic bʌ miʼ mulʌbeñob i bʌ tiʼ tojlelob. Pablo mach jontolic (mañajic) tsiʼ mele i bʌ tiʼ tojlelob, mi tsaʼicto i lecoj subeyob. Tsiʼ qʼuele jiñi wem bʌ i melbalob yicʼot bajcheʼ miʼ pʌsob i xucʼtʌlel. Yujil chaʼan Jehová miʼ cʼuxbiñob. Tiʼ subeyob chaʼan miʼ chaʼ utsʼesañob i bʌ come wen bajcheʼ yilal tsiʼ qʼueleyob. Jiñi tsiʼ colta chaʼan chʌn tijicña miʼ yajñel yicʼot tsaʼ bej ajñi bajcheʼ i yamigo jiñi hermanojob ti congregación come wen bajcheʼ yilal tsiʼ qʼueleyob.

19. a) ¿Chuqui miʼ mejlel i melob jiñi ancianojob chaʼan wen bajcheʼ yilal miʼ qʼuelob jiñi hermanojob? b) ¿Chuqui maʼ cʌn tiʼ tojlel jiñi anciano am bʌ yaʼ ti foto woli bʌ i sʌqʼuesan jiñi i Yotlel tempa bʌ?

¹⁹ Muʼ bʌ laj cʌn. Ancianojob, qʼuelela jiñi wen tac bʌ i melbalob jiñi hermanojob. I sujmʌch  chaʼan xmulilob, pero añʌch wen tac bʌ i melbalob yom bʌ mi laj qʼuel ti ñuc (Filip. 2:3). I sujmʌch chaʼan an i tajol yom mi laʼ wʌcʼ ticʼojel. Pero cheʼ bajcheʼ tsiʼ mele Pablo, chaʼlenla wersa chaʼan mach jiñic jach mi laʼ qʼuel chuqui mach bʌ weñic tsiʼ yʌlʌyob o tsiʼ meleyob. Qʼuelela chaʼan jiñi hermano mucʼʌch i cʼuxbin Jehová, xucʼul woliʼ melben i yeʼtel yicʼot mucʼʌch i mejlel i tojʼesan i melbal. Jiñi ancianojob miʼ coltañob chaʼan an cʼuxbiya yaʼ ti congregación cheʼ bʌ wen bajcheʼ yilal miʼ qʼuelob jiñi hermanojob.

20. ¿Chuqui miʼ mejlel i melob jiñi ancianojob chaʼan miʼ bej cʌñob ti jiñi i yejemplo Pablo?

²⁰ Muʼ bʌ i mejlel i coltan jiñi ancianojob jiñʌch cheʼ miʼ bej chaʼleñob ti estudiar jiñi i yejemplo Pablo. Jumpʼejl ejemplo, yaʼ ti Índice de las publicaciones Watch Tower miʼ mejlel laʼ sʌclan baqui miʼ yʌl «Pablo» i cheʼ jiñi «ejemplo para los ancianos». Cheʼ bʌ maʼ qʼuel ili tema tac, miʼ mejlel a cʼajtiben a bʌ: «¿Bajcheʼ miʼ mejlel i coltañon jiñi i yejemplo Pablo chaʼan tijicñayon mic bej mel jiñi queʼtel bajcheʼ anciano?».

21. ¿Chuqui muʼ bʌ i mejlel i ñopob jiñi ancianojob?

²¹ Ancianojob, cʼajtesanla chaʼan Jehová maʼañic miʼ pijtan chaʼan tojetla, yom bʌ jiñʌch chaʼan xucʼuletla (1 Cor. 4:2). Tsiʼ qʼuele ti ñuc pejtelel chuqui tsiʼ mele Pablo yicʼot jiñi i xucʼtʌlel. Miʼ mejlel laʼ ñop chaʼan Jehová mucʼʌch i qʼuel ti ñuc jiñi laʼ weʼtel, come cheʼ bajcheʼ miʼ yʌl Hebreos 6:10, «maʼañic miʼ ñajʌyel i chaʼan jiñi tsaʼ bʌ laʼ mele, mi jiñicto jiñi cʼuxbiya tsaʼ bʌ laʼ pʌsʌ tiʼ tojlel i cʼabaʼ cheʼ tsaʼ laʼ colta jiñi chʼujuloʼ bʌ yicʼot cheʼ wolito laʼ bej coltañob».