1-2. Ebɛn kwan do na dza ɔsomafo Paul yɛe no botum aboa asafo mu mpanyimfo ndɛ?

 NNA ɔsomafo Paul dɔ no nuanom. Ntsi, ɔyɛɛ edwumadzen dze boaa hɔn. (Andw. 20:31) Iyi ntsi, nna no nuanom a ɔnye hɔn som no so dɔ no papaapa. Ber bi mpo dze, aber a mpanyimfo a wɔwɔ Ephesus no tsee dɛ wonnkohu Paul bio no, ‘wosuu pii.’ (Andw. 20:37) Asafo mu mpanyimfo so dɔ hɔn nuanom papaapa. Dɛm ntsi, wɔyɛ edwumadzen na wofi hɔn akoma nyina mu yɛ dza wobotum biara dze boa hɔn nuanom. (Phil. 2:16, 17) Naaso, ɔtɔfabi a, asafo mu mpanyimfo tum hyia nsɛndzendzen. Ebɛnadze na ɔbɔboa hɔn ma woeegyina dɛm nsɛndzendzen yi ano?

² Asafo mu mpanyimfo a wɔbɔ mbɔdzen yi botum esũasua dza Paul yɛe no. (1 Cor. 11:1) Nna Paul yɛ nyimpa tse dɛ hɛnara. Nna ɔyɛ nyimpa a onndzi mũ na ɔtɔfabi a ɔyer noho dɛ ɔbɛyɛ dza ɔtsen. (Rom. 7:18-20) Ɔwɔ mu dɛ ohyiaa ɔhaw ahorow dze naaso ɔammpa abaw na ɔannhwer n’enyigye so. Sɛ asafo mu mpanyimfo sũasua Paul a, wobotum egyina nsɛndzendzen a wohyia no ano na wɔaakɔ do dze enyigye asom Jehovah. Hom mma yɛnhwɛ dza asafo mu mpanyimfo botum ayɛ.

3. Ebɛnadze na yebosusu ho wɔ adzesua yi mu, na ebɛnadze bio na yɛbɔhwɛ?

³ Adzesua yi mu no, yebosusu nsɛndzendzen anan a asafo mu mpanyimfo taa hyia ho: (1) hɔnho a wɔdze bɛhyɛ asɛnka edwuma no mu na ber kor no ara so woeedzi asodzi a ɔhyɛ hɔn nsa no ho dwuma, (2) mber a wobenya dze ahyɛ hɔn nuanom nkuran, (3) hɔnankasa hɔn mberɛwyɛ ano a wobegyina, nye (4) hɔn nuanom mberɛwyɛ ano a wobegyina. Bio so yɛbɔhwɛ dza ɔboaa Paul ma otumii gyinaa nsɛndzendzen a ohyiae no ano nye dza asafo mu mpanyimfo botum esũa efi no nhwɛdo no mu.

4. Ebɛnadze ntsi na obotum ayɛ dzen ama asafo mu mpanyimfo dɛ wobedzi asɛnka edwuma no enyim?

⁴ Siantsir a iyi botum ayɛ dzen ama asafo mu mpanyimfo. Sɛ yɛdze asɛnka edwuma a asafo mu mpanyimfo dzi enyim no to nkyɛn a, wɔsan wɔ asodzi ahorow a ɔwɔ dɛ wodzi ho dwuma. Dɛ nhwɛdo no, asafo mu mpanyimfo pii yɛ eguamutsenafo wɔ dapɛn finimfin nhyiamu ase na wɔhwɛ yɛ Asafo Bible Adzesua no. Afei so, wɔma ɔkasa ahorow. Wɔyɛ edwumadzen tsetse asafo mu asomfo na wɔdze enyigye kɔ do hyɛ hɔn nuanom nkuran. (1 Pet. 5:2) Asafo mu mpanyimfo binom boa ma wosisi Ahendzi Asa nye asafo adan ahorow na wosiesie bi so. Ne nyina ekyir no, asafo mu mpanyimfo nye enuanom nyina bɔ mbɔdzen dɛ wɔbɛma asɛnka edwuma no ayɛ adze tsitsir wɔ hɔn asetsena mu.​—Matt. 28:19, 20.

5. Dɛ ɔsɛmpakafo no, ebɛn nhwɛdo na Paul yɛe?

⁵ Dza Paul yɛe. Wɔ Philippifo 1:10 no, Paul kãa dza ɔboaa no ma otumii yɛɛ asɛnka edwuma no ho asɛm. Ɔkãa dɛ yɛnyɛ ndzɛmba a no ho hia no. Paul dze nankasa n’afotu no yɛɛ edwuma. Nna wɔdze ɔsom edwuma bi ahyɛ ne nsa. Ɔdze mfe pii yɛɛ ɔsom edwuma no, na obuu no dɛ adze tsitsir wɔ n’asetsena mu. Ɔkãa asɛmpa no wɔ “guado nye efiefi” mu. (Andw. 20:20) Paul dze, nna beebiara a obohu nyimpa anaa ho kwan biara a obenya no, nna ɔdze kã asɛmpa no! Dɛ nhwɛdo no, aber a nna ɔrotweɔn ne mfɛfo wɔ Athens no, ɔdze ho kwan no kãa asɛmpa no kyerɛɛ nyimpa etsitsir bi a nna wɔwɔ kurow no mu, na wɔgyee asɛmpa no dzii. (Andw. 17:16, 17, 34) Aber a nna Paul da “mpokyerɛ” mu mpo no, ɔkɔr do kãa asɛm no kyerɛɛ hɔn a nna wɔwɔ ne nkyɛn no.​—Phil. 1:13, 14; Andw. 28:16-24.

6. Ebɛn ntsetsee na Paul dze maa enuanom binom?

⁶ Paul dze ne mber dzii dwuma yie. Mpɛn pii no nna ɔma enuanom binom bɛka noho wɔ ɔsom edwuma no mu. Dɛ nhwɛdo no, wɔ n’asɛmpatserɛw akwantu a odzi kan mu no, ɔnye John Mark kɔree. Na ɔfaa Timothy ka noho wɔ n’asɛmpatserɛw akwantu a otsĩa ebien no so mu. (Andw. 12:25; 16:1-4) Ɔda edzi kofee dɛ Paul yɛɛ dza obotum biara dɛ ɔbɔboa dɛm mbarimba yi ma woeehu mbrɛ wobesi ahyehyɛ asafo na wɔaaserasera enuanom no ahyɛ hɔn nkuran. Ɔsanee boaa mbarimba yi ma wohun mbrɛ wobesi ayɛ akyerɛkyerɛfo a wotu mpon.​—1 Cor. 4:17.

7. Asafo mu mpanyimfo besi dɛn dze Paul n’afotu a ɔwɔ Ephesusfo 6:14, 15 no ayɛ edwuma?

⁷ Esuadze a ɔwɔ mu. Nnyɛ efiefi asɛnka edwuma no nko na ɔsɛ dɛ asafo mu mpanyimfo dze hɔnho hyɛ mu, mbom ɔsɛ dɛ wɔyɛ krado dɛ wobefi hɔn pɛ mu edzi dase aber biara. Asafo mu mpanyimfo botum ayɛ dɛm dze esũasua Paul. (Kenkan Ephesusfo 6:14, 15.) Dɛ nhwɛdo no, sɛ wɔwɔ edwuma mu anaa worikedzi gua a, wobotum edzi dase. Anaa sɛ worisisi asafo adan ahorow a, wobotum akã asɛmpa  no akyerɛ nyimpa a wɔwɔ apaamu hɔ no anaa hɔn a wɔtɔ ndzɛmba wɔ hɔn nkyɛn no. Asafo mu mpanyimfo botum esũasua Paul na wɔaatsetse afofor nye asafo mu asomfo ber a wɔnye hɔn nam asɛnka mu no.

8. Ɔtɔ da a, bi a ebɛnadze na no ho behia dɛ asafo mu panyin bi yɛ?

⁸ Ɔnnsɛ dɛ dwumadzi a ɔhyɛ asafo mu mpanyimfo nsa wɔ asafo no mu anaa ɔmansin no mu no gye hɔn mber nyina ma ɔkɛba dɛ wonnya ber a wɔdze bɛyɛ asɛnka edwuma no. Mbrɛ ɔbɛyɛ a wobotum enya mber dze edzi asodzi ahorow a ɔhyɛ hɔn nsa ho dwuma no, bi a ɔbɛyɛ papa dɛ ɔtɔ da a, wɔnnkɛgye asodzi pii aka dza wɔwɔ no ho. Sɛ wosusu asɛm no ho na wɔbɔ ho mpaa a, bi a wobohu dɛ sɛ wɔgye asodzi ahorow a ɔtse dɛm no to hɔnho do a, ɔbɛyɛ dzen ama hɔn dɛ wobedzi ndzɛmba a ohia paa no ho dwuma. Ndzɛmba a no ho hia no bi nye ebusua som a wɔbɛyɛ no dapɛn biara, asɛnka edwuma a wɔdze mber pii bɛyɛ anaa ntsetsee a wɔdze bɛma hɔn mba wɔ asɛnka edwuma no mu. Binom wɔ hɔ a, sɛ wɔdze dwumadzi afofor reka dza ɔhyɛ hɔn nsa dada no ho a, ɔyɛ dzen ma hɔn dɛ wɔbɛkã dɛ worunntum nndzi ne nyina ho dwuma. Naaso ɔsɛ dɛ wɔkaa dɛ kakra a ɔhyɛ hɔn nsa a wotum yɛ no yie no Jehovah n’enyi sɔ.

9. Asafo mu mpanyimfo nnyi adagyer koraa, ntsi ebɛnadze na obotum ayɛ dzen ama hɔn dɛ wɔbɛyɛ?

⁹ Siantsir a iyi botum ayɛ dzen ama asafo mu mpanyimfo. Jehovah n’asomfo hyia nsɔhwɛ pii. Hɛn mu biara hia mboa, nkuranhyɛ nye awerɛkyekyer wɔ nda a odzi ekyir yi mu. Ɔtɔfabi a, binom behia mboa ama woeegyaa ndzeyɛbɔn bi. (1 Thess. 5:14) Nokwasɛm nye dɛ asafo mu mpanyimfo runntum nnyi ɔhaw a Jehovah n’asomfo hyia no nyina mmfi hɔ. Naaso, Jehovah hwɛ kwan dɛ asafo mu mpanyimfo no bɛhyɛ hɔn nuanom nkuran na wɔaabɔ hɔnho ban. Asafo mu mpanyimfo nnyi adagyer koraa, ntsi wobesi dɛn dze mboa a hɔn nuanom hia no ama hɔn?

10. Dɛ mbrɛ 1 Thessalonicafo 2:7 ma yehu no, ebɛnadze na paul yɛe dze kyerɛɛ dɛ ɔdwen Jehovah n’asomfo ho?

¹⁰ Dza Paul yɛe. Paul hwehwɛɛ akwan ahorow a obotum afa do akamfo no nuanom na ɔaahyɛ hɔn nkuran. Ɔsɛ dɛ asafo mu mpanyimfo sũasua Paul no nhwɛdo no na wɔda ɔdɔ edzi kyerɛ hɔn nuanom. (Kenkan 1 Thessalonicafo 2:7.) Paul maa no nuanom no hun dɛ ɔdɔ hɔn na Jehovah so dɔ hɔn. (2 Cor. 2:4; Eph. 2:4, 5) Paul faa enuanom a wɔwɔ asafo no mu no nyɛnko na ɔgyee mber nye hɔn bɔɔ fɛkuw. Paul kãa ndzɛmba a ɔbɔ no hũ nye ne mberɛwyɛ ho asɛm kyerɛɛ no nuanom no dze daa no edzi dɛ ɔwɔ hɔn mu ahotodo. (2 Cor. 7:5; 1 Tim. 1:15) Naaso, Paul ammfa n’adwen eennsi ɔhaw a nna orihyia no do. Mbom no, nna ɔwɔ ɔpɛ dɛ ɔbɔboa no nuanom.

11. Ebɛnadze ntsi na Paul tuu no nuanom no fo?

¹¹ Ɔtɔ da a, nna no ho hia dɛ Paul dze afotu ma no nuanom no. Naaso, nnyɛ dɛ no bo efuw hɔn ntsi na otuu hɔn fo. Mbom ɔdze afotu no maa hɔn osiandɛ nna ɔdɔ hɔn na ɔpɛ dɛ ɔbɔ  hɔnho ban fi biribiara a ɔbɛsɛɛ wɔnye Jehovah ntamu ebusuabɔ no ho. Ɔbɔɔ mbɔdzen dɛ ɔbɛma n’afotu no mu ada hɔ. Afei so, ɔbɔɔ mbɔdzen dɛ ɔnnkɛkã nsɛm a ɔbɛyɛ dzen ama n’etsiefo no dɛ wɔbɛgye ato mu. Dɛ nhwɛdo no, wɔ Paul ne krataa a ɔkyerɛwee kɛmaa Corinthfo no mu no, ɔdze afotu a no mu yɛ dzen maa hɔn. Ɔno ekyir no, ɔsomaa Titus kɔr hɔn nkyɛn. Nna Paul pɛ dɛ ohu mbrɛ enuanom no bɛyɛ hɔn adze wɔ ne krataa no ho. Aber a Paul tsee dɛ enuanom no agye ne krataa no na wɔdze n’afotu no reyɛ edwuma no, n’enyi gyee papaapa!​—2 Cor. 7:6, 7.

12. Ebɛnadze na asafo mu mpanyimfo botum ayɛ dze ahyɛ hɔn nuanom nkuran?

¹² Esuadze a ɔwɔ mu. Ɔsɛ dɛ asafo mu mpanyimfo sũasua Paul no nhwɛdo no na wonya mber ma hɔn nuanom a wɔnye hɔn som no. Kwan kor a wobotum afa do ayɛ dɛm nye dɛ wobodu asafo nhyiamu ase ntsɛm ama woeetum nye hɔn nuanom abɔ nkɔmbɔ a ɔhyɛ nkuran. Mpɛn pii no, ɔnngye ber pii ana yeetum efi ɔdɔ mu ahyɛ onua anaa akyerɛbaa bi nkuran. (Rom. 1:12; Eph. 5:16) Asafo mu panyin a osũasua Paul no nhwɛdo no dze Bible no hyɛ no nuanom hɔn gyedzi dzen, na ɔma wonya awerɛhyɛmu dɛ Nyankopɔn dɔ hɔn. Nkyii so ɔdze ne ndzeyɛɛ kyerɛ dɛ ɔdɔ no nuanom no. Ɔtaa nye no nuanom no dzi nkɔmbɔ na ɔkamfo hɔn wɔ mbɔdzen a wɔbɔ no ho. Sɛ no ho behia dɛ asafo mu panyin bi tu onua bi fo a, ɔsɛ dɛ ɔdze n’afotu no gyina Bible no do. Ɔsɛ dɛ ɔma n’afotu no mu da hɔ, na ofi ayamuyie mu yɛ dɛm, osiandɛ ɔpɛ dɛ onua no dze n’afotu no yɛ edwuma.​—Gal. 6:1.

13. Mberɛwyɛ a asafo mu panyin bi wɔ no botum ama ɔaatse nka dɛn?

¹³ Siantsir a iyi botum ayɛ dzen ama asafo mu mpanyimfo. Asafo mu mpanyimfo nndzi mũ. Dɛ mbrɛ mfom wɔ hɛnho no, dɛmara na hɔn so mfom wɔ hɔn ho. (Rom. 3:23) Bi a, ɔtɔfabi a ɔbɛyɛ dzen ama hɔn dɛ wobenya hɔn mberɛwyɛ ho adwen pa. Bi a asafo mu mpanyimfo binom dze hɔn adwen besi hɔn mberɛwyɛ do araa ma hɔn abaw mu eebu. Binom so botum enya adwen dɛ hɔn mberɛwyɛ no nnyɛ hũ biara, ntsi no ho nnhia dɛ wɔyɛ nsesa.

14. Dɛ mbrɛ Philippifo 4:13 ma yehu no, ebɛn kwan do na ahobrɛadze a Paul daa no edzi no boaa no ma ogyinaa ne mberɛwyɛ ano?

¹⁴ Dza Paul yɛe. Paul fi ahobrɛadze mu gyee too mu dɛ nankasa runntum nnkõ nntsia ne mberɛwyɛ. Nna obehia Nyankopɔn no mboa ama oeetum edzi ne mberɛwyɛ do. Ansaana Paul rebɛyɛ Christiannyi no, nna ne tsirmu yɛ dzen. Afei so, ɔsoɛree tsiaa Christianfo no dzendzenndzen. Naaso ekyir yi, ɔbɛgyee too mu dɛ dza ɔyɛe no nna ɔnnyɛ. Afei so, nna ɔwɔ ɔpɛ dɛ ɔbɛyɛ nsesa wɔ no suban na ne ndzeyɛɛ mu. (1 Tim. 1:12-16) Jehovah boaa Paul ma  ɔbɛyɛɛ asafo mu panyin a nna ɔwɔ ɔdɔ, ayamuhyehye na ɔbrɛ noho adze. Nna onyim dɛ ɔwɔ mberɛwyɛ pii naaso ɔammfa n’adwen eennsi do. Mbom nna ɔgye dzi dɛ Jehovah dze no mfom bɛkyɛ no. (Rom. 7:21-25) Nna ɔnnhwɛ kwan dɛ obedzi mũ. Mbom ɔyeer noho dɛ obosũasua Christ, na ofii ahobrɛadze mu dze noho too Jehovah do dɛ ɔmboa no ma onwie ɔsom edwuma a wɔdze ahyɛ ne nsa no.​—1 Cor. 9:27; kenkan Philippifo 4:13.

15. Ebɛnadze na asafo mu panyin botum ayɛ dze akyerɛ dɛ ɔwɔ ne mberɛwyɛ ho adwen pa?

¹⁵ Esuadze a ɔwɔ mu. Sɛ wɔpaw obi dɛ asafo mu panyin a, ɔnnkyerɛ dɛ odzi mũ. Naaso sɛ asafo mu mpanyimfo dzi mfom a, Jehovah hwɛ kwan dɛ wɔbɛgye hɔn mfom ato mu, na wɔaada suban papa edzi dɛ Christianfo. (Eph. 4:23, 24) Ɔsɛ dɛ asafo mu panyin dze Bible no yɛ no mu nhwehwɛmu, na sɛ ohu dɛ biribi nnkɔ yie a, ɔsɛ dɛ ɔyɛ nsesa biara a no ho hia no. Sɛ ɔyɛ dɛm a, Jehovah bɔboa no ma n’enyi aagye na ɔaayɛ edwuma a ɔhyɛ ne nsa no yie.​—Jas. 1:25.

16. Sɛ asafo mu panyin bi dze n’adwen si no nuanom hɔn mberɛwyɛ do a, ebɛnadze na obotum efi mu aba?

¹⁶ Siantsir a iyi botum ayɛ dzen ama asafo mu mpanyimfo. Asafo mu mpanyimfo nye hɔn nuanom bɔ mu som. Iyi ntsi bi a ɔrennyɛ dzen koraa dɛ wobohu hɔn nuanom hɔn mberɛwyɛ. Sɛ asafo mu mpanyimfo annyɛ ahwɛyie a, wobotum enya hɔn nuanom no ho ebufuw, wɔaakasa etsia hɔn dzendzenndzen anaa woeebu hɔn atsɛn. Dɛm ndzɛmba yi ara na Satan pɛ dɛ Christianfo yɛ, ntsi Paul bɔɔ hɔn kɔkɔ dɛ wɔnyɛ ahwɛyie.​—2 Cor. 2:10, 11.

17. Nna ebɛn adwen na Paul wɔ wɔ no nuanom no ho?

¹⁷ Dza Paul yɛe. Ɔkɔr do nyaa no nuanom no ho adwen pa. Nna onyim enuanom no hɔn mberɛwyɛ, osiandɛ ɔtɔ da a nna wɔyɛ adze ma ɔhaw no. Naaso, nna Paul nyim dɛ sɛ obi dzi mfom a ɔno nnkyerɛ dɛ ɔyɛ nyimpa bɔn. Nna ɔdɔ enuanom no na ɔdze n’adwen sii hɔn suban pa do. Nna onyim dɛ ɔyɛ dzen ma enuanom no dɛ wɔbɛyɛ dza ɔtsen. Naaso, nna onyim dɛ wɔwɔ adwen pa, na wobehia mboa ama wɔaakɔ do ayɛ dza ɔtsen.

18. Kwan a Paul faa do siesiee asɛm a osii wɔ Euodia na Syntyche ntamu no, ebɛnadze na isũa fi mu? (Philippifo 4:1-3)

¹⁸ Asɛm bi sii wɔ nkyerɛbaa beenu bi a nna wɔwɔ Philippi asafo no mu no ntamu. Hom mma yɛnhwɛ dza Paul yɛe wɔ ho. (Kenkan Philippifo 4:1-3.) Obotum aba dɛ akasakasa bi a osii wɔ Euodia na Syntyche hɔn ntamu no maa wɔyɛɛ akaw. Paul annkasa enntsia hɔn anaa oemmbu hɔn atsɛn, mbom ɔdze n’adwen sii suban pa a nna wɔwɔ no do. Nna wɔyɛ mbaa anokwafo a wɔdze mfe pii asom Jehovah. Nna Paul nyim dɛ Jehovah dɔ hɔn paa. Osiandɛ nna Paul wɔ hɔnho adwen pa ntsi, ɔhyɛɛ hɔn nkuran dɛ wonsiesie akasakasa a wɔaba hɔn ntamu no. Asɛm no nye dɛ, nna Paul wɔ obiara ho adwen pa, ntsi aber biara nna ɔwɔ enyigye na ɔnye obiara ntamu yɛ kama.

19. (a) Ebɛn kwan do na asafo mu mpanyimfo botum enya enuanom ho adwen pa? (b) Mfonyin a ɔfa asafo mu panyin a orisiesie Ahendzi Asa do ho no, ebɛnadze na ibotum esũa efi mu?

 ¹⁹ Esuadze a ɔwɔ mu. Asafo mu mpanyimfo, hom mfa hom adwen nsi suban pa a hom nuanom wɔ no do. Hom nkaa dɛ, enuanom no mu biara nnyi hɔ a odzi mũ, naaso onua biara wɔ suban bi a ɔyɛ fɛw. (Phil. 2:3) Nokwasɛm nye dɛ, ofi ber to ber no, no ho behia dɛ asafo mu mpanyimfo tu enuanom fo. Naaso, ɔsɛ dɛ asafo mu mpanyimfo sũasua Paul, na ɔnnsɛ dɛ wɔma enuanom no hɔn ndzeyɛɛ nye hɔn nsɛm a ɔhyɛ ebufuw no haw hɔn. Mbom ɔsɛ dɛ wɔma ɔtsena hɔn adwen mu dɛ enuanom no dɔ Jehovah na wɔwɔ ɔpɛ dɛ wɔbɛyɛ dza ɔtsen. Afei so, wɔdze abotar rigyina ɔhaw a worihyia no ano mbrɛ ɔbɛyɛ a wɔbɔkɔ do asom Jehovah. Asafo mu mpanyimfo a wɔwɔ enuanom ho adwen pa no ma ɔdɔ na asomdwee kɔ do tsena asafo no mu.

20. Asafo mu mpanyimfo besi dɛn akɔ do enya Paul no nhwɛdo no do mfaso?

²⁰ Sɛ asafo mu mpanyimfo kɔ do ara sũasua Paul no nhwɛdo no a, ɔbɔboa hɔn paa. Dɛ nhwɛdo no, ibotum ahwɛ iyi ho nsɛm wɔ Watch Tower Publications Index no mu. Kɔ asɛntsir a wɔato dzin “Paul” na hwɛ asɛntsir kakraba “example for elders” (nhwɛdo ma asafo mu mpanyimfo) no. Aber a irususu nsɛm ahorow a ɔwɔ hɔ ho no, ibotum ebisa woho dɛ, ‘Ebɛn kwan do na Paul no nhwɛdo no botum aboa me ma maakɔ do enya enyigye na meetum ayɛ edwuma a ɔhyɛ me nsa no?’

21. Ebɛn awerɛhyɛmu na asafo mu mpanyimfo botum enya?

²¹ Asafo mu mpanyimfo, Jehovah nnhwehwɛ dɛ hom bedzi mũ, mbom dza ɔhwehwɛ fi hom nkyɛn nye dɛ hom bedzi nokwar. (1 Cor. 4:2) Jehovah n’enyi sɔɔ Paul no nokwardzi nye edwumadzen a ɔyɛe wɔ no som mu no. Hom nnya awerɛhyɛmu dɛ dza hom tum yɛ wɔ Jehovah no som mu no, n’enyi sɔ. Jehovah no werɛ nnkefir “hom ndwuma nye ɔdɔ no a hom kyerɛe wɔ ne dzin ho, dɛ hom soom ahotsewfo no na hom da ho som” no.​—Heb. 6:10.