1-2. Kijan ègzanp a lapòt Pòl pé itil pou sé ansyen-la jòdijou ?

 LAPÒT Pòl té enmé frè é sè a-y é i té ka travay rèd pou pran swen a yo (Akt 20:31). Sé pousa, frè é sè a-y té enmé-y onlo osi. Pa ègzanp, lèwvwè sé ansyen-la ki té ka rété Éfèz la aprann kè yo pa té’é wouvwè-y, yo pléré gwo dlo (Akt 20:37). Menmjan-la, ansyen an nou ka travay rèd pou frè é sè a yo. Yo enmé-yo é yo ka fè tousa yo pé pou édé-yo (Filip. 2:16, 17). Men dépawfwa, sé ansyen-la ka jwenn difikilté. Ka ki pé édé-yo rivé about a sé difikilté-lasa ?

² Ègzanp a Pòl pé aprann sé ansyen-la onlo biten (1 Kor. 11:1). Pòl sé té on moun kon toutmoun. I té enpawfè kon nou é i té ka goumé pou fè sa ki byen (Wom. 7:18-20). Anplisdisa, i viv dé biten ki té rèd toubònman. Men i pa lésé sa kasé 2 bra a-y é sa pa jen fè-y pèd jwa a-y. Si sé ansyen-la ka imité Pòl, yo ké pé andiré sé difikilté-la yo ka jwenn la é yo ké kontinyé sèvi Jéova èvè tchè-kontan.

3. Dè ki biten nou ké palé adan awtik-lasa é poukwa ?

³ Adan awtik-lasa nou ké palé dè 4 difikilté onlo ansyen ka jwenn : 1) lèwvwè fò-yo òwganizé-yo pou touvé tan pou yo préché é pou fè tout travay-la yo ni a fè la, 2) lèwvwè fò-yo touvé tan pou ankourajé frè é sè a yo, 3) lèwvwè fò-yo goumé èvè pwòp défo a yo é 4) lèwvwè yo ka vwè défo a lézòt é kè fò-yo kolaboré èvè yo. Nou ké vwè kijan lapòt Pòl rivé about a sé difikilté-lasa é nou ké vwè kijan sé ansyen-la pé imité-y.

4. Fò sé ansyen-la prèmyé douvan adan prédikasyon-la. Poukwa yo pé touvé sa difisil ?

⁴ Poukwa sa pé difisil ? Sé sé ansyen-la ki dwètèt prèmyé douvan adan prédikasyon-la é fò-yo fè tousa yo ni a fè osi.  Pa ègzanp, adan lasanblé-la, ni onlo ki ka dirijé réinyon a simenn-la. Anplisdisa, yo ka kondui étid biblik a lasanblé-la. Dépawfwa osi, yo ka ba-yo fè on diskou. Fò-yo pran on tan pou fòwmé sé asistan-la é fò-yo òwganizé-yo pou yo toujou la pou ankourajé frè é sè a yo (1 Pyè 5:2). Sèwten adan yo ka bay on pal pou konstwi oben pou pran swen a Sal di Wayòm oben a dòt batiman a lòwganizasyon. Men kon toutmoun adan lasanblé-la, prèmyé biten yo ka fè sé préché (Mat. 28:19, 20).

5. Ki ègzanp Pòl ka ba sé ansyen-la ?

⁵ Ki ègzanp Pòl ka ba sé ansyen-la ? Pòl sé té on zouti-filé an prédikasyon. Kijan i té ka rivé fè sa ? Nou ka touvé répons-la an Filipyen 1:10. Mi sa Pòl limenm ka di : « Vérifyé sa ki pli enpòwtan. » Sé vré sé Pòl ki bay konsèy-lasa men i té ka mété-y an pratik osi. Jéova té mandé-y préché é pou Pòl sé té biten-la ki té pi enpòwtan la. Dayè, pannan plizyè lanné, i pòté bon mannèv pou i té pé sa fè sa. I té ka préché « an piblik é dè kaz an kaz » (Akt 20:20). I pa té ni lè pou préché é i pa té ni jou pou préché. Dépi i té ka touvé on lokazyon, i té ka préché. Pa ègzanp, pannan i té Atèn é kè i té ka atann déotwa frè é sè, i pwofité pou préché ba dé gwotchak é ni sa adan yo ki aksèpté lavérité (Akt 17:16, 17, 34). É menm lèwvwè i té ‘lajòl parapòt a Kris’, i préché ba moun ki té alantou a-y (Filip. 1:13, 14 ; Akt 28:16-24).

6. Kijan Pòl té ka fòwmé frè é sè a-y ?

⁶ Pòl té ka sèvi èvè tan a-y méyè mannyè ki ti ni. Souvantfwa, i té ka mandé sé frè é sè la vin préché èvè-y. Pa ègzanp, lèwvwè i fè 1^é vwayaj a-y antankè misyonè, i menné Jan yo ka kriyé Mawk èvè-y é lè i fè 2^èm vwayaj a-y, i menné Timoté èvè-y (Akt 12:25 ; 16:1-4). Sèten i pwofité dè sé moman-lasa pou montré-yo ka pou yo fè pou on lasanblé fonksyonné byen, kijan pou yo fè travay a yo antankè bèwjé é kijan pou yo anségné pibyen (1 Kor. 4:17).

7. Kijan sé ansyen-la pé suiv sa Pòl ka di an Éfézyen 6:14, 15 ?

⁷ Kijan sé ansyen-la pé imité ègzanp a Pòl ? Sé ansyen-la pé imité Pòl lèwvwè yo pa’a kontanté-yo dè préché dè kaz-an-kaz men lèwvwè yo paré pou yo préché kèlkèswa koté-la yo yé la oben kèlkèswa moman-la (li Éfézyen 6:14, 15). Pa ègzanp yo pé palé èvè kolèg a yo dè lavérité é yo pé pwofité pou palé dè lavérité osi lèwvwè yo ka fè kous a yo. Anplisdisa, lèwvwè yo ka bay on pal pou konstwi on Sal di Wayòm, yo pé pwofité pou préché ba sé moun-la ki ka rété alantou a sal-la oben yo pé pwofité pou préché ba sé moun-la ki ka vann matéryo ba yo. É kon Pòl, pannan yo ka préché èvè sé frè é sè la, yo pé pwofité  pou fòwmé-yo, konsa yo ké pé fòwmé sé asistan-la osi.

8. Dépawfwa, ka fò on ansyen fè ?

⁸ On ansyen pa dwètèt janmen lésé sé aktivité-la i ka fè la pou lasanblé-la oben pou siwkonskripsyon-la pran tèlman adan tan a-y kè i pa ni tan pou préché ankò. Dépawfwa, pou on ansyen pé sa ni plis tan pou fè tousa i ni a fè, fò i ké rèfizé dòt rèsponsabilité kè pétèt yo ké pwopozé-y. Prèmyé biten pou i fè, sé réfléchi é palé Jéova dè sa. Konsa, sa ké édé-y vwè si lè i ké aksèpté sa yo ka mandé-y fè la, i ké ni asé tan pou fè sélézòt biten enpòwtan la i ni a fè la, kon pa ègzanp, fè étid familyal la chak simenn èvè fanmi a-y, préché é fòwmé timoun a-y pou yo préché osi. Dépawfwa, lèwvwè yo ka ba sèwten ansyen dòt rèsponsabilité, pou yo rèfizé, yo ka touvé sa rèd. Men on biten yo pé sèten, sé kè Jéova sav kè si yo ka rèfizé sé rèsponsabilité-lasa sé pas yo anvi fè sa yo ja ni a fè la byen konm i fo.

9. Ki dòt difikilté sé ansyen-la pé rivé a jwenn ?

⁹ Poukwa sa pé difisil ? Jòdijou, sèwvitè a Bondyé ka jwenn onlo éprèv toubònman. Pannan sé dènyé jou-la, noutout bizwen kè yo ankourajé-nou, kè yo soutyenn-nou é kè yo konsolé-nou. É dépawfwa, sèwten adan nou bizwen kè yo édé-yo pas yo ka goumé pou yo pa fè on mové biten(1 Tés. 5:14). Sé vré, sé ansyen-la pé pa fè sé éprèv-la sé frè é sè la ka jwenn la disparèt men Jéova vé kè yo fè tousa yo pé pou ankourajé é pou pwotéjé timouton a-y. Konm sé ansyen-la ni onlo biten a fè, kijan yo pé touvé tan pou pran swen a sé frè é sè la adan lasanblé-la ?

10. Dapré 1 Tésalonisyen 2:7, ka Pòl fè pou pran swen a frè é sè a-y ?

¹⁰ Ki ègzanp Pòl ka ba sé ansyen-la ? Pòl toujou té ka chèché on mwayen pou félisité frè é sè a-y é i té ka chèché a fè fwa a yo vin pi fò. Fò sé ansyen-la fè tousa yo pé pou imité ègzanp a-y. Pousa yo ké aji èvè onlo lanmou é èvè onlo jantiyès èvè frè é sè a yo (li 1 Tésalonisyen 2:7). Pòl té ka fè frè é sè a-y sav kè i té enmé-yo é kè Jéova té enmé-yo (2 Kor. 2:4 ; Éféz. 2:4, 5). Pou-y, sé frè é sè la, sé té zanmi a-y é i té ka pasé tan èvè yo. Ni dé biten ki té ka enkyété Pòl é i té sav kè i té ka fè érè, men i pa té pè palé franchman dè sa èvè frè é sè a-y. Sa té ka montré kè i té ka fè-yo konfyans (2 Kor. 7:5 ; 1 Tim. 1:15). Men i pa té ka ranpli tèt a yo èvè pwoblèm a-y. Sa ki té pi enpòwtan pou-y sé té édé lézòt.

11. Poukwa Pòl ba frè é sè a-y konsèy ?

¹¹ Dépawfwa, fò Pòl té woupran sèwten frè é sè. Men lèwvwè i té ka fè sa, i pa jen té ka fè-y pas i té kòlè. I té ka ba-yo konsèy pas i té ka sousyé-y dè yo é pas i té vé pwotéjé-yo. I té ka fè ansòt pou sé konsèy-la i té ka  ba-yo la té fasil a konprann é i té anvi kè yo aksèpté sé konsèy-lasa. Pa ègzanp, i voyé on lèt ba sé Korentyen-la pou ba-yo déotwa ti konsèy é i palé ba yo franchman lè i fè sa. Men aprésa, i voyé Tit koté yo. Poukwa i fè sa ? Pas i té bizwen sav kijan sé Korentyen-la pran sa lèwvwè yo risivwè lèt a-y. A pa ti kontan i té kontan lèwvwè i tann-di kè yo aksèpté konsèy a-y é kè yo mété sé konsèy-lasa an pratik ! (2 Kor. 7:6, 7).

12. Kijan sé ansyen-la pé konsolidé fwa a frè é sè a yo ?

¹² Kijan sé ansyen-la pé imité ègzanp a Pòl ? Sé ansyen-la pé imité Pòl lèwvwè yo ka pasé tibwen tan èvè frè é sè a yo. Pa ègzanp yo pé òwganizé-yo pou rivé granbonnè réinyon, konsa yo ni tan kozé èvè sé frè é sè la é yo pé ankourajé-yo. Dépawfwa, on ti moman tousèl ou ka pasé èvè on moun ki ka soufè ka fè-y dibyen é byensouvan ou pa bizwen plis ki déotwa minit pou fè sa (Wom. 1:12 ; Éféz. 5:16). Ondòt biten sé ansyen-la pé fè pou imité Pòl, sé itilizé Lézékriti pou konsolidé fwa a frè é sè a yo é pou fè-yo sonjé kè Jéova enmé-yo. Anplisdisa, yo pa pè di frè é sè a yo kè yo enmé-yo. Yo ka pran labitid mandé sé frè é sè la nouvèl a yo é yo ka pwofité dè tout lokazyon pou félisité-yo. Lèwvwè yo bizwen ba on moun on konsèy, yo toujou ka bazé-yo asi Labib. Yo ka palé ba moun-la pou i konprann byen ka ki pwoblèm-la é yo ka aji èvè onlo bonté pas yo anvi moun-lasa apliké konsèy-la yo ka ba-y la (Gal. 6:1).

13. Lèwvwè on ansyen ka konstaté kè i ni on défo, ka i pé rèsanti ?

¹³ Poukwa sa pé difisil ? Sé ansyen-la a pa dé moun ki pawfè. Kifè, yo ka fè érè kon toutmoun (Wom. 3:23). Lèwvwè on ansyen ka konstaté kè i ni on défo, fò i fè atansyon pou i pa ba sa twòp enpòwtans é fò i fè atansyon pou i pa fè konsi sé on biten an kouyonnad. Men sa pa toujou fasil. Poukwa ? Pas si i ka ba sa twòp enpòwtans, sa pé dékourajé-y. É si pou-y sé on biten an kouyonnad, i pé mèt an tèt a-y kè i pa bizwen fè pon chanjman.

14. An Filipyen 4:13, nou ka vwè kijan Pòl ni onlo imilité. Ki bèl ègzanp i lésé ban nou ?

¹⁴ Ki ègzanp Pòl ka ba sé ansyen-la ? Pòl té ni imilité é i té ka rèkonnèt kè i té ni défo. I té sav byen osi kè i pa té’é jen rivé chanjé tousèl a-y. I té bizwen kè Jéova ba-y fòs pou fè sa. Avan i té vin krétyen, i pèwsékité sé krétyen-la kon ponp. Men aprésa i rann-li kont kè i té mal aji. I té paré a chanjé mantalité a-y é i té paré a chanjé sèwten biten adan pèwsonalité a-y (1 Tim. 1:12-16). Konm Jéova édé-y, i vin on bèwjé ki enmé timouton a Bondyé, ki ni onlo  konpasyon é ki ni onlo imilité. I té sav kè i té ni onlo défo men i pa té ka lésé sa pran tèt a-y pas i té sèten kè Jéova sé on Bondyé ki ka padonné (Wom. 7:21-25). I pa té ka mèt an tèt a-y kè fò i aji on mannyè ki pawfè. Men i té ka fè éfò pou chanjé pèwsonalité a-y piti-a-piti é èvè onlo imilité i té ka mandé Jéova édé-y pou fè travay-la i té ba-y fè la (1 Kor. 9:27 ; li Filipyen 4:13).

15. Kijan pou sé ansyen-la vwè sé défo-la yo ni la ?

¹⁵ Kijan sé ansyen-la pé imité ègzanp a Pòl ? Yo pa’a chwazi on frè pou vin ansyen pas i pawfè. Men sa Jéova vé, sé kè sé ansyen-la rèkonnèt défo a yo é kè yo mèt nouvo pèwsonalité-la asi yo (Éféz. 4:23, 24). Lèwvwè on ansyen ka étidyé tousèl a-y, fò i chèché a vwè adan ki domenn i bizwen pwogrésé é aprésa fò i fè sé chanjman-la i ni a fè la. Si i fè sa, Jéova ké édé-y vin on bon ansyen é i ké édé-y ni tchè-kontan osi (Jak 1:25).

16. Si on ansyen ka konsantré-y twòp asi défo a lézòt, ka ki pé rivé ?

¹⁶ Poukwa sa pé difisil ? Sé ansyen-la ka pasé onlo tan èvè frè é sè a yo, kifè yo ka fin pa konnèt défo a frè é sè a yo. Si yo pa’a fè atansyon sa pé égri-yo, yo pé jous rivé a kritiké frè é sè a yo é pétèt kè yo pé’é montré-yo janti èvè yo ankò. Dayè Pòl di sé krétyen-la kè sé sa Satan té’é vé kè yo fè (2 Kor. 2:10, 11).

17. Kijan Pòl té ka vwè frè é sè a-y ?

¹⁷ Ki ègzanp Pòl ka ba sé ansyen-la ? Pòl toujou té ka vwè frè é sè a-y on mannyè ki pozitif. I té sav kè yo té ka fè érè men i té sav osi kè a pa paskè on moun ka fè on mové biten kè sa vé di kè moun-lasa pa bon. I té enmé frè é sè a-y é i té ka konsantré-y asi bèl kalité a yo. Lèwvwè frè é sè a-y té ni dimal a fè sa ki byen, i té préféré mèt an tèt a-y kè yo pa té ni pon mové lentansyon men kè sa yo té bizwen sé kè on moun édé-yo.

18. Kijan Pòl réyaji lèwvwè Évodi é Sentich té an bab é ka sa ka aprann-nou ? (Filipyen 4:1-3).

¹⁸ Pa ègzanp, an-nou vwè kijan Pòl édé 2 sè ki té adan lasanblé Filip (li Filipyen 4:1-3). Évodi é Sentich té an bab, é pétèt kè chyen a yo pa té k’ay lachas. Men Pòl montré-y janti èvè yo é olyé i kritiké-yo i konsantré-y asi bèl kalité a yo. Sa té ka fè plizyè lanné kè sé sè-lasa té ka sèvi Jéova é kè yo té fidèl. Pòl té sav kè Jéova té enmé-yo toubònman. Konm Pòl té ka pansé kè sé 2 sè-lasa sé té dé bon moun, i ankourajé-yo wouvin byen. Pòl té ka konsantré-y asi bèl kalité a lézòt, kifè, sa édé-y rété bon bon zanmi èvè frè é sè a lasanblé-lasa é sa édé-y kontinyé ni tchè-kontan.

19. a) Ka sé ansyen-la pé fè pou vwè frè é sè a yo on mannyè ki pozitif ? b) Nou ka vwè on ansyen ki ka édé on jenn frè nétwayé Sal di Wayòm-la, ka sa ka aprann-nou ?

¹⁹ Kijan sé ansyen-la pé imité ègzanp a Pòl ? Sé ansyen-la, fò-zò fè tousa zò pé pou  zò vwè bèl kalité a frè é sè a zòt. Sé vré, yo sé dé moun enpawfè, men yo ni bèl kalité osi é nou pé imité bèl kalité a yo (Filip. 2:3). Dépawfwa, sé ansyen-la ké ni a ba on frè oben on sè on ti konsèy. Pétèt kè yo pa enmé sèwten biten kè moun-lasa ka di oben sèwten biten kè i ka fè men kon Pòl, fò pa yo arété-yo asi sa. Okontrè, fò-yo toujou sonjé kè frè é sè a yo enmé Jéova, kè yo ka andiré onlo biten pou sèvi-y é kè sèl biten yo vé, sé pwogrésé. Lè sé ansyen-la ka konsantré-yo asi bèl kalité a frè é sè a yo, sa ka édé sé frè é sè lasa santi kè toutmoun enmé-yo adan lasanblé-la.

20. Ka sé ansyen-la pé fè pou ègzanp a Pòl kontinyé édé-yo ?

²⁰ Sé ansyen-la, si zò ka kontinyé étidyé ègzanp a Pòl, sa ké édé-zòt plis ankò. Pa ègzanp, zò pé ay adan Index des publications des Témoins de Jéhovah, aprésa zò ka chèché « Paul », aprésa zò ka chèché « exemple pour les anciens ». Toupannan zò ka li sé piblikasyon-la yo ka pwopozé-zòt la, mi sa pou zò mandé-zòt : « Kijan ègzanp a Pòl pé édé-mwen pou mwen pé sa toujou ni tchè-kontan é pou mwen pé sa fè travay an mwen antankè bèwjé byen konm i fo ?

21. Dè kibiten sé ansyen-la pé sèten ?

²¹ Sé ansyen-la, fò-zò toujou sonjé kè Jéova pa ka atann kè zò aji on mannyè ki pawfè, men sa i vé, sé kè zò rété fidèl a-y (1 Kor. 4:2). Lapòt Pòl té ka travay rèd é i té fidèl adan travay a-y. Kifè, tchè a Bondyé té kontan. Zò pé sèten osi kè travay-la zò ka fè la pou Jéova ni onlo valè pou-y. I pé’é jen « oubliyé sa zò fè é lanmou-la zò montré la pou non a-y lè zò té ka sèvi lésen é lè zò ka kontinyé sèvi-yo » (Ébr. 6:10).