1-2. Kouman èkzanp apot Pòl pouvé idé ansyen-yan jòdla ?

 APOT Pòl té kontan so frè ké sò, i travay rèd menm pou pran swen di yé (Actes 20:31). A pou sa so frè ké sò-ya té kontan l’ bokou. Roun jou, lò ansyen-yan annan asanblé-a ki té Éfèz anprann ki yé pa té ké jen wè l’ ankò, « yé tout koumansé pléré gro pléré » (Actes 20:37). Kou Pòl, nou ansyen-yan ki ka travay rèd kontan yé frè ké yé sò toubonnman, é yé ka fè tousa yé pouvé pou idé yé (Phil. 2:16, 17). Mé détan, sa rèd pou ansyen-yan fè tousa yé gen pou fè. Kisa ki pouvé idé yé ?

² Ansyen-yan pouvé pran èkzanp asou apot Pòl (1 Cor. 11:1). I té sa roun moun kou tout moun. I pa té parfè é détan, i té divèt briga pou fè sa ki byen (Rom. 7:18-20). I té gen plizyèr problèm mé i pa janmen ni lésé tonbé ni pédi so lajwa. Si ansyen-yan ka imité Pòl, yé ké pouvé kontinyé sèrvi Jéova ké tchò kontan menm lò yé gen problèm. Annou wè kouman yé pouvé fè sa.

3. Kisa nou ké wè annan sa artik-a é ki ròt bagaj nou ké anprann ?

³ Annan sa artik-a, nou ké wè kat bagaj ki pouvé rèd pou ansyen-yan fè : 1) trapé tan pou préché ké tout ròt bagaj yé divèt fè, 2) pran tan pou ankourajé frè-ya ké sò-ya, 3) pa dékourajé paské yé pa ka fè tout bagaj kou yé divèt épi 4) byen réyaji lò yé ka wè défò ròt-ya. Nou ké anprann kisa ki idé Pòl é kouman ansyen-yan pouvé imité so èkzanp.

4. Poukisa détan sa pouvé rèd pou ansyen-yan montré èkzanp annan prédikasyon-an ?

⁴ Problèm-an : Anplis di pran douvan annan zafè préché, ansyen-yan gen bokou ròt bagaj pou fè. Souvan, bokou annan yé ka fè prézidans annan réinyon ki ka fèt an mitan simenn-an ouben yé ka dirijé étid biblik asanblé-a. Détan, yé ka doumandé yé fè diskour osi. Yé ka pran tan pou fòrmé asistan-yan é yé toujou disponib pou ankourajé yé frè ké sò-ya (1 Pierre 5:2). Roun ran ansyen ka travay annan konstriksyon ké réparasyon sal di Rwayonm ké ròt batiman nou ka sèrvi pou adoré Jéova. Anplis di sa, kou tout ròt proklamatèr-ya annan asanblé-a, travay pi enpòrtan-an ansyen-yan ka fè, a préché (Mat. 28:19, 20).

5. Ki èkzanp Pòl ka bay ansyen-yan ?

⁵ Èkzanp Pòl : Annan Philippiens 1:10, Pòl ka di nou poukisa i té vayan annan zafè préché-a lò i di « konprann ki bagaj ki pi enpòrtan. » Pòl swiv so pròp konsèy. Yé té bay li roun ministèr, é i toujou wè l’ kou roun bagaj ki té enpòrtan. I préché « douvan tout moun ké di kaz an kaz » (Actes 20:20). I pa jis té ka préché roun moman annan lajournen-an ouben roun jou annan simenn-an. I té ka préché chak fwa ké tout koté i té pouvé fè l’. Parèkzanp, lò i té Atèn pannan i té ka antann so zanmi, i préché pou roun group grotchap ki té la é roun ran annan yé byen asèpté mésaj-a (Actes 17:16, 17, 34). Menm lò Pòl té lajòl, i té ka préché pou sa-ya ki té òbò li (Phil. 1:13, 14 ; Actes 28:16-24).

6. Ki fòrmasyon Pòl té ka bay so frè-ya ?

⁶ Pòl té ka byen sèrvi tan i té gen. Souvan i té ka envité so frè-ya vini préché ké li. Parèkzanp, lò i fè so prémyé vwayaj misyonèr, i pran Jan-Mark ké li, é annan so dézyèm vwayaj i pran Timoté (Actes 12:25 ; 16:1-4). Nou pouvé sir Pòl fè tousa i té pouvé pou montré sa wonm-yan kouman pou yé té òrganizé roun asanblé, kouman yé té pouvé ankourajé frè ké sò-ya é kouman yé té pouvé divini vayan annan zafè ansényé (1 Cor. 4:17).

7. Kouman ansyen-yan pouvé fè sa Pòl di annan Éphésiens 6:14, 15 ?

⁷ Sa nou ka anprann : Ansyen-yan pouvé imité Pòl lò yé ka préché di kaz an kaz, mé osi lò yé toujou paré pou préché nenpòrt ki tan ké nenpòrt ki koté (li Éphésiens 6:14, 15). Parèkzanp yé pouvé préché lò yé ka fè yé komisyon ouben  koté yé ka travay. Si yé ka idé konstrwi roun sal di Rwayonm, yé pouvé préché pou yé vwazen ouben pou moun koté yé ka alé achté matéryèl. Kou Pòl, ansyen-yan pouvé sèrvi tan yé ka pasé ka préché ké ròt-ya pou fòrmé yé, asistan-yan parèkzanp.

8. Détan kisa roun ansyen ké pitèt divèt fè ?

⁸ Roun ansyen pa janmen divèt gen tròp travay pou fè annan asanblé-a ouben annan sirkonskripsyon-an ki i pa gen asé tan pou préché ankò. Pou i gen tan pou fè tousa i divèt fè, détan i ké divèt réfizé fè roun travay yé ka propozé li fè. Apré i priyè Jéova pou sa, pitèt i ké wè ki i pa ké pouvé okipé di sa ki pi enpòrtan si i ka asèpté sa travay-a. Annan bagaj ki pi enpòrtan, i gen étidyé Labib-a ké so fanmi chak simenn, préché ké balan ouben anprann so timoun préché. Roun ran ka trouvé sa rèd pou réfizé pran plis rèsponsabilité. Mé yé pouvé sir ki Jéova ka konprann ki yé lé byen okipé di tousa yé divèt fè.

9. Ki ròt problèm ansyen-yan pouvé jwenn ?

⁹ Problèm-an : Pèp Jéova-a ka jwenn bokou traka. Pannan sa dèrnyé jou-ya, nou tout bézwen yé ankourajé nou, idé nou ké konsolé nou. É détan, roun ran bézwen yé idé yé pou yé pa pran roun mové chimen (1 Thess. 5:14). Asiré ansyen-yan pa pouvé tiré tout problèm pèp Jéova-a ka jwenn. Mé Jéova lé kanmenm ki ansyen-yan fè sa yé pouvé pou ankourajé ké protéjé so pèp. Kouman ansyen-yan ki ja gen bokou bagaj pou fè pouvé trouvé tan pou idé frè ké sò-ya ?

10. Dapré 1 Thessaloniciens 2:7, kisa Pòl fè pou pran swen di so frè ké sò-ya ?

¹⁰ Èkzanp Pòl : Pòl té toujou paré pou félisité ké ankourajé ròt-ya. Ansyen-yan ka imité so èkzanp lò yé ka aji ké yé frè ké sò annan yé asanblé ké bokou lanmou (li 1 Thessaloniciens 2:7). Pòl té ka di so frè ké sò-ya ki i té kontan yé, é ki Jéova té kontan yé (2 Cor. 2:4 ; Éph. 2:4, 5). I té ka wè yé kou so zanmi, é i té ka pasé tan ké yé. I té ka montré yé ki i té ka fè yé konfyans paské i té ka palé ké yé franchman di sa ki té ka enkyété li é di so défo (2 Cor. 7:5 ; 1 Tim. 1:15). Mé a pa yenki di sopa problèm i té ka palé. Sa ki té pi enpòrtan pou li, a té idé so frè ké sò.

11. Poukisa Pòl bay so frè ké sò-ya konsèy ?

¹¹ Détan, Pòl té gen pou bay so frè ké sò-ya konsèy. Mé i pa janmen té ka fè sa paské i té faché. I té ka bay yé konsèy  paské i té kontan yé é i té lé protéjé yé di sa ki té pouvé danjéré pou yé. I té ka éséyé bay so konsèy roun fason ki té fasil pou konprann, é i té lé yé asèpté l’. Parèkzanp, annan so lèt pou Korentyen-yan, Pòl palé franchman ké yé. Apré i ékri sa lèt-a, i voyé Tit wè yé. Pòl té présé savé kouman yé té réyaji lò yé li so lèt. I té byen kontan lò i wè ki yé té byen pran konsèy i té bay yé (2 Cor. 7:6, 7).

12. Kouman ansyen-yan pouvé fè yé frè ké sò-ya vin pi fò ?

¹² Sa nou ka anprann : Ansyen-yan pouvé swiv èkzanp Pòl lò yé ka pasé tan ké yé frè ké yé sò-ya. Parèkzanp, yé pouvé rivé anvan réinyon-an koumansé pou palé ké yé é pou ankourajé yé. Souvan, déztrwa minit asé pou idé roun moun ki ka soufri (Rom. 1:12 ; Éph. 5:16). Kou Pòl, ansyen-yan ka sèrvi Labib-a pou fè lafwa yé frè ké sò-ya vin pi fò é pou fè yé sonjé ki Bondjé kontan yé. Anplis di sa, yé pa pè fè yé frè ké sò-ya savé ki yé kontan yé. Yé ka pran yé nouvèl souvan é yé ka chaché tout okazyon pou félisité yé. É lò yé gen pou bay roun moun roun konsèy, yé toujou ka apiyé asou Labib-a. Yé ka byen èspliké moun-an sa ki pa k’alé, mé yé ka fè l’ jantiman paské yé lé sir ki moun-an ké asèpté konsèy-a (Gal. 6:1).

13. Kouman roun ansyen pouvé réyaji parapòrta so défo ?

¹³ Problèm-an : Ansyen-yan pa parfè ; kou tout moun yé ka fè dé bagaj yé pa divèt (Rom. 3:23). Détan sa pouvé rèd pou yé wè yé défo kou yé divèt wè yé. Roun ran pouvé tèlman enkyèt akoz di yé défo ki yé pouvé dékourajé. Ròt ankò pouvé pansé ki yé défo pa enpòrtan é ki yé pa gen anyen pou chanjé.

14. Dapré Philippiens 4:13, ki èkzanp Pòl ka bay nou annan zafè gen imilité ?

¹⁴ Èkzanp Pòl : Kou Pòl té gen imilité, i té ka konprann ki i pa té pouvé briga ké so défo li rounso. I té bézwen fòrs Bondjé pouvé bay. Anvan Pòl divini krétyen, a pa ti pèrsékité i pèrsékité krétyen-yan. Mé pita i konprann ki sa i té fè pa té bon é i asèpté chanjé so konpòrtman ké so pèrsonalité (1 Tim. 1:12-16). Jéova idé li é i divini roun ansyen plen ké lanmou, ké konpasyon ké imilité. I té byen savé ki défo i té gen. Mé pasé i rété asou sa, i té ka fòrsé so kò sonjé ki Jéova sa roun Bondjé ki ka pardonnen (Rom. 7:21-25). I té savé i pa té pouvé parfè, mé i travay rèd pou chanjé so  pèrsonalité é a ké imilité i konté asou Jéova pou i idé li fè so travay (1 Cor. 9:27 ; li Philippiens 4:13).

15. Si ansyen-yan ka wè yé défo kou yé divèt wè yé, kouman sa ké idé yé ?

¹⁵ Sa nou ka anprann : Yé pa ka chwazi ansyen-yan paské yé parfè. Mé Jéova lé yé rékonnèt yé défo é i lé yé travay pou gen pèrsonalité krétyen-an (Éph. 4:23, 24). Lò roun ansyen ka étidyé Labib-a, i divèt chaché wè kisa i gen pou chanjé é apré sa, fè chanjman. Konsa, Jéova ké idé l’ pou i sa roun bon ansyen é pou ‘so tchò kontan annan sa i ka fè’ (Jacq. 1:25).

16. Kisa ki pouvé rivé si roun ansyen ka rété asou défo ròt-ya gen ?

¹⁶ Problèm-an : Ansyen-yan ka pasé bokou tan ké yé frè ké sò-ya, donk i gen roun moman yé ka wè ki défo yé gen. Mé si yé pa panga, yé pouvé divini dé moun ki ka nèrvé, yé pouvé rèd ké yé ouben kritiké yé frè ké sò-ya. Pòl avèrti krétyen-yan ki Satan té ké byen kontan yé fè sa (2 Cor. 2:10, 11).

17. Kouman Pòl té ka wè so frè ké sò-ya ?

¹⁷ Èkzanp Pòl : Pòl toujou té ka pansé bon bagaj asou so frè ké sò-ya. I té savé ki yé té ka fè bétiz, é détan sa yé té ka fè té ka fè l’ lapenn. Mé i té savé ki, menm si roun moun té ka fè roun bétiz, sa pa té lé di ki sa moun-an té mové. I té kontan so frè ké sò-ya, é i té ka rété asou yé bèl kalité. Lò yé té ka djoubaté pou fè sa ki bon, Pòl té ka chwazi krè ki yé té lé vréman fè sa ki bon, é ki yé té jis bézwen roun moun idé yé.

18. Dapré Philippiens 4:1-3, kisa fason Pòl idé Évodi ké Sentich ka anprann nou ?

¹⁸ Parèkzanp, gadé kouman Pòl idé dé sò annan asanblé Filip (li Philippiens 4:1-3). Évodi ké Sentich té faché, pitèt yé té trapé roun djopopo é yé pa té zanmi ankò. Pòl pa palé rèd ké yé é i pa kritiké yé non plis. I rété asou yé bèl kalité. Sa sò-ya ki té fidèl té sèrvi Jéova pannan lontan. Pòl té savé ki Jéova té kontan yé. Kou Pòl té ka pansé bon bagaj asou yé, i ankourajé yé fè lapè ké yé konpanyen. Pòl rivé gardé so lajwa é rété bon zanmi ké frè ké sò-ya annan sa asanblé-a paské i té ka rété asou bèl kalité ròt-ya té gen.

19. a) Kouman ansyen-yan pouvé kontinyé pansé bon bagaj asou yé frè ké sò-ya ? b) Kisa to pouvé anprann ké zimaj-a koté nou ka wè roun ansyen ké roun jenn frè ka nétwayé sal di Rwayonm-an ?

¹⁹ Sa nou ka anprann : Zòt ki ansyen, a pou zòt chaché wè ki bèl kalité zòt frè ké sò-ya gen. Yé pyès pa parfè, mé yé chak gen bèl kalité nou pouvé pran plézi  konnèt (Phil. 2:3). A vré, tanzantan ansyen-yan ké pitèt gen pou bay roun frè ouben roun sò roun konsèy. Mé, kou Pòl, ansyen-yan divèt éséyé pa rété asou bagaj roun moun ka di ouben ka fè ki pouvé nèrvé yé. Pasé yé fè sa, sa byen si yé ka kontinyé sonjé ki sa moun-an kontan Jéova, ki i ka tchenbé rèd annan so sèrvis pou Bondjé é ki i pouvé fè sa ki byen. Lò ansyen-yan ka rété asou bèl kalité yé frè ké sò-ya gen, yé ka idé yé santi kouman asanblé-a kontan yé.

20. Kisa ansyen-yan pouvé fè pou yé profité ankò plis di èkzanp Pòl ?

²⁰ Zòt ki ansyen, a ké roun bon bagaj si zòt ka kontinyé étidyé èkzanp Pòl. Parèkzanp, annan Index des publications des Témoins de Jéhovah zòt pouvé gadé annan parti asou « Paul » épi anba « exemple pour les anciens ». Toupannan zòt ka li référans-ya yé ka bay zòt, doumandé zòt kò : « Kouman èkzanp Pòl pouvé idé mo kontinyé gen lajwa toupannan mo ka fè mo travay ansyen ? »

21. Di kisa ansyen-yan pouvé sir ?

²¹ Pa bliyé ki Jéova pa ka doumandé zòt pou zòt parfè ; i lé zòt fidèl (1 Cor. 4:2). Jéova té ka pran plézi wè Pòl travay rèd ké fidélité. Zòt pouvé sir ki Jéova ka pran plézi annan sa zòt ka fè pou li. Jéova pa ké janmen « bliyé sa zòt fè pou li, ni lanmou zòt montré pou so non lò zòt idé sen-yan » (Héb. 6:10).